Yozuwee 9:1-27
9 Alɩwaatʋ ndʋ awiya wena payɩ aawɛnɩ Yɔɔrdaŋ wɩsɩ ɖɩɖʋyɛ hɔɔlʋʋ taa yɔ,+ pʋ-tɔbʋʋ se wena aawɛ pʋŋ egeetiye taa yɔ, wena aawɛ Seefela yɔ, wena aawɛ Teŋgu Sɔsɔʋ* kidiiliŋ kpeekpe yɔɔ yɔ,+ nɛ wena aawɛ Libaŋ ɛsɩndaa yɔ—Hɛɛtɩ mba, Amoori mba, Kanaŋ mba, Perizi mba, Hivi mba nɛ Yebuusi mba+—anɩ mbʋ pɩɩlaba yɔ lɛ,
2 aɖʋ ɛgbɛyɛ se ayooni Yozuwee nɛ Izrayɛɛlɩ.+
3 Gabawɔɔ mba+ ɖɔɖɔ nɩ mbʋ Yozuwee labɩ Yeriikoo+ nɛ Ayi+ yɔ pɩ-tɔm.
4 Peeɖe palabɩ lɛɣtʋ nɛ pakpaɣ tɔɔnaɣ nɛ posuu huyiŋ weyi ɩpɩnaa yɔ ɩ-taa nɛ patɩnɩ pa-kpaŋasɩ yɔɔ. Pakpaɣ ɖɔɖɔ tɔnɛ kokola* wena apɩnaa nɛ atʋlɩ nɛ pɔɖɔnɩ-yɛ ñɛyʋʋ ñɛyʋʋ yɔ;
5 pɛlɛ ɖɔɖɔ naataŋgbala wena atɛma nɛ pɔɖɔnɩ-yɛ kpabʋ kpabʋ yɔ, nɛ posuu tokonaa mba pahʋwa yɔ. Kpɔnɔnaa mba payɩ paaɖɔkaa yɔ, paawɩlaa nɛ papɩsɩ ɖula.
6 Ðɩnɛ ɛlɛ powolo Yozuwee cɔlɔ ɖigbeɣliye* taa Gilgaalɩ+ nɛ peheyi ɛ nɛ Izrayɛɛlɩ abalaa se: «Poliŋ ɛjaɖɛ naɖɩyɛ taa ɖɩlɩnaa nɛ ɖɩkɔɔ. Lɛɛlɛɛyɔ, iyele nɛ ɖa nɛ mɩ ɖɩɖʋ ɛgbɛyɛ.»
7 Ɛlɛ Izrayɛɛlɩ abalaa heyi Hivi mba+ se: «Pʋtɔma yɔ, ɩwɛ ɖɔ-cɔlɔ cɩnɛ kpam. Ɛzɩma ɖa nɛ mɩ ɖɩpɩzɩɣ nɛ ɖɩɖʋ ɛgbɛyɛ?»+
8 Nɛ pekitini Yozuwee se: «Ðɩkɛ ña-lɩmɖʋyaa.»*
Nɛ Yozuwee pɔzɩ-wɛ se: «Mba ɩkɛnaa, nɛ le ɩlɩnaa?»
9 Peeɖe pocosi-i se: «Ðooo poliŋ ɛjaɖɛ naɖɩyɛ taa ña-lɩmɖʋyaa lɩnaa,+ ñɛ-Ɛsɔ Yehowa hɩɖɛ yɔɔ, mbʋ pʋyɔɔ yɔ ɖɩnɩ ɛzɩma ɛ-hɩɖɛ sɛwa yɔ pɩ-tɔm nɛ mbʋ payɩ ɛɛlabɩ Ejipiti yɔ,+
10 nɛ mbʋ payɩ ɛɛlabɩ Amoori mba awiya 2 wena aawɛ Yɔɔrdaŋ hɔɔlʋʋ lɛɛkʋ* yɔɔ yɔ, pʋ-tɔbʋʋ se Hɛsɩbɔɔnɩ wiyaʋ Sihɔɔnɩ+ nɛ Basaanɩ wiyaʋ Oogi+ weyi ɛɛwɛ Astarɔtɩ yɔ.
11 Pʋyɔɔ ɖɛ-ɛzʋtʋyaa nɛ ɖɛ-ɛjaɖɛ taa mba tɩŋa heyi-ɖʋ se: “Ɩkpaɣ nʋmɔʋ ɖɔm tɔɔnaɣ nɛ iwolo ɩkatɩ-wɛ. Iheyi-wɛ se: ‘Ðɩkaɣ kɛʋ mɩ-lɩmɖʋyaa;+ lɛɛlɛɛyɔ, iyele nɛ ɖa nɛ mɩ ɖɩɖʋ ɛgbɛyɛ.’”+
12 Kpɔnɔ kʋnɛ kɩɩwɛnɩ ki-miŋ kɩyakʋ ŋgʋ ɖɩɩkpaɣ-kʋ nɛ ɖɩkʋyɩ ɖa-ɖɩsɩ taa se ɖɩkɔŋ mɩ-cɔlɔ cɩnɛ yɔ. Ɛlɛ lɛɛlɛɛyɔ, ɩna, kɩwɩlaa nɛ kɩpɩsɩ ɖula.+
13 Nɛ tɔnɛ kokola anɛ yɔ, aakɛ kɩfana alɩwaatʋ ndʋ ɖisu a-taa vɛɛ yɔ, ɛlɛ lɛɛlɛɛyɔ atʋlaa.+ Nɛ nʋmɔʋ ɖaɣlɩkɩŋ yɔɔ lɛ, ɖo-tokonaa hʋwa nɛ ɖa-naataŋgbala ñɛtɛ.»
14 Ðɩnɛ ɛlɛ, Izrayɛɛlɩ abalaa mʋ pɔ-tɔɔnasɩ nzɩ sɩ-taa nasɩyɩ,* ɛlɛ patɩpɔzɩ Yehowa lɩmaɣzɩyɛ.+
15 Nɛ Yozuwee yele nɛ panɩɩnɩ ɖama se laŋhɛzɩyɛ wɛɣ pɛ-hɛkʋ taa,+ nɛ eyele nɛ ɛ nɛ wɛ paɖʋ ɛgbɛyɛ se eyeki-wɛ nɛ pacaɣ wezuu, nɛ samaɣ ñʋndɩnaa ɖuuni-wɛ se pɔɖɔŋ tɔm ndʋ tɩ-yɔɔ.+
16 Pa nɛ wɛ paɖʋ ɛgbɛyɛ nɛ pɩla kɩyakɩŋ 3 lɛ, panɩɩ se paawɛ pɔ-cɔlɔ peeɖe kpam nɛ pataaposini-wɛ.
17 Peeɖe Izrayɛɛlɩ mba kʋyaa nɛ pɛɖɛɛ nɛ patalɩ pɛ-tɛtʋ taa kɩyakʋ 3 ñɩŋgʋ wiye; pɛ-tɛtʋ ndʋ, ndʋ yɔ Gabawɔɔ,+ Kefira, Beerɔɔtɩ nɛ Kiriyatɩ-Yeyarim.+
18 Ɛlɛ Izrayɛɛlɩ mba tiyooni-wɛ, mbʋ pʋyɔɔ yɔ samaɣ ñʋndɩnaa kaaɖuuni-wɛ Izrayɛɛlɩ tɛ Ɛsɔ Yehowa hɩɖɛ taa.+ Pʋyɔɔ samaɣ kpeekpe paɣzɩ midinuu ñʋndɩnaa.
19 Peeɖe ñʋndɩnaa tɩŋa heyi samaɣ kpeekpe se: «Ðiiɖuuni-wɛ Izrayɛɛlɩ tɛ Ɛsɔ Yehowa hɩɖɛ taa, nɛ pʋyɔɔ lɛ pɩtɩha-ɖʋ nʋmɔʋ se ɖɩlabɩ-wɛ kɩdɛkɛdɩm.
20 Mbʋ ɖɩkaɣ labʋ yɔ mbʋ yɔ: Ðɩkaɣ-wɛ yebu nɛ pacaɣ wezuu, se pɩsa nɛ pana etaatii ɖɔ-yɔɔ ɖuutu ndʋ ɖiɖuuni-wɛ yɔ tɩ-yɔɔ.»+
21 Nɛ ñʋndɩnaa tasɩ yɔɔdʋʋ se: «Iyele-wɛ nɛ pacaɣ wezuu, ɛlɛ pakaɣ kɛʋ samaɣ kpeekpe ɖasɩ cayaa nɛ lɩm luyaa.» Tamaɣ ŋga ñʋndɩnaa labɩ-wɛ.
22 Nɛ Yozuwee yaa-wɛ nɛ ɛpɔzɩ-wɛ se: «Ɛbɛ yɔɔ ɩcɛtɩ-ɖʋ nɛ iheyi-ɖʋ se: “Ðooo poliŋ taa ɖɩlɩnaa,” ŋgʋ toovenim taa lɛ ɩwɛ ɖɛ-hɛkʋ taa cɩnɛ?*+
23 Kpaɣnɩ lɛɛlɛɛyɔ nɛ pɩɖɛɣ lɛ, pɔlɔ mɩ-yɔɔ nɔɔ kɩdɛkɛdaɣ,+ nɛ ɩkaɣ kɛʋ yomaa tam nɛ ɩkaɣ pɩsʋʋ mɛ-Ɛsɔ ɖɩɣa ɖasɩ cayaa nɛ lɩm luyaa.»
24 Nɛ pocosi Yozuwee se: «Ña-lɩmɖʋyaa labɩ mbʋ, mbʋ pʋyɔɔ yɔ pɛkɛdɩ-ɖʋ kpayɩ kpayɩ se ñɛ-Ɛsɔ Yehowa ɖʋ ɛ-lɩmɖʋyʋ Moyizi paɣtʋ se ɛcɛlɩ-mɩ ɛjaɖɛ kpeekpe nɛ ɛɖɩzɩ ɖɩ-taa mba tɩŋa mɩ-ɛsɩndaa.+ Mbʋ yebina nɛ mɩ-yɔɔ lɛ, sɔɔndʋ kpa-ɖʋ se ɖiilesi ɖe-wezuu,*+ pʋyɔɔ ɖɩlabɩ mbʋ.+
25 Lɛɛlɛɛyɔ ɖɩwɛ ñe-nesi tɛɛ. Labɩ-ɖʋ mbʋ ŋmaɣzɩɣ se pɩwɛ ɖeu nɛ pɩmʋnaa yɔ.»
26 Nɛ mbʋ ɛlabɩ-wɛ; ɛyabɩ pa-ñʋʋ Izrayɛɛlɩ mba nesi tɛɛ nɛ paba tɩkʋ-wɛ.
27 Ɛlɛ kɩyakʋ ŋgʋ ki-wiye Yozuwee yeba nɛ papɩsɩ samaɣ nɛ Yehowa altaaru ɖasɩ cayaa nɛ lɩm luyaa+ lone nɖɩ ɛlɩzɩɣ* yɔ ɖɩ-taa,+ nɛ pɛwɛɛ nɛ palakɩ tʋmɩyɛ nɖɩ halɩ nɛ sɔnɔ.+
Pɩ-tɛɛ tɔm
^ Pʋ-tɔbʋʋ se Mediiteraanee.
^ Yaa «tɔnɛ kokola wena a-taa paɖʋʋ vɛɛ yɔ.»
^ Yaa «maalika.»
^ Yaa «ño-yomaa.»
^ Pʋ-tɔbʋʋ se Yɔɔrdaŋ wɩsɩ ɖɩlɩyɛ hɔɔlʋʋ.
^ Yaa «sɩ-taa nasɩyɩ se pana.»
^ Yaa «ɩwɛ ɖɔ-cɔlɔ cɩnɛ kpam?»
^ Yaa «ɖa-kalɩzasɩ.»
^ Yaa «Ɛsɔ lɩzɩɣ.»
