1. Alɩwaatʋ ndʋ pakaɖɩnɩ Yehowa Edɛɛnɩ kaɖaɣ taa yɔ, tɔm ndʋ ɛyɔɔdaa nɛ tɩkpazɩɣ ɖoŋ Aɖam sayɩnaa?

KPAƔNƖ alɩwaatʋ ndʋ ɛyʋ labɩ kɩwɛɛkɩm nɛ elesi pilim wɛtʋ yɔ, Yehowa paɣzɩ wɩlʋʋ se ɛkɛ Ɛsɔ weyi ɛkpazɩɣ ɖoŋ yɔ. Pakaɖɩnɩ-ɩ Edɛɛnɩ kaɖaɣ taa nɛ pitileɖi lɛ, ɛyɔɔdɩ tɔm ndʋ tɩkaɣ kpazʋʋ ɖoŋ Aɖam sayɩnaa yɔ. Tɔm ndʋ ɛyɔɔdaa yɔ tɩwɩlɩɣ se paa Aɖam ɛlabɩ kɩwɛɛkɩm yɔ, lidaʋ nakʋyʋ wɛɛ! Natʋ tɔm ndʋ tɩwɛ Kiɖe Tɛɛ Tɔm 3:15 taa yɔ, tɩ-tɔbʋʋ nɩʋ ha ɛyaa lidaʋ se pakaɣ ɖɩzʋʋ Eleeu Sataŋ weyi ɛkɛ “ɖooo lɔŋ taa ɖʋm” yɔ, nɛ mbʋ payɩ ɛwɛɛkaa yɔ.​—Natʋ 12:9; 1 Yoh. 3:8.

2. Ɛzɩma Yehowa kpazɩ ɖoŋ Noowa?

² Yehowa sɛyʋ Noowa kaacaɣ wezuu kɩdɛkɛdɩm ɛjaɖɛ nɖɩ ɖɩ-taa ɛ nɛ ɛ-hɔʋ taa ñɩma pe-ɖeke pɛsɛɣaɣnɩ Yehowa yɔ. Ñam ñam lakasɩ nɛ kʋzʋʋ kɩdɛkɛdʋʋ wezuu ŋgʋ  ɛyaa cakaɣ yɔ, pɩpɩzaɣ se piyele nɛ pitii Noowa yɔɔɔ. (Kiɖe 6:4, 5, 11; Yud. 6) Ɛlɛ Yehowa heyi-i tɔm natʋyʋ nɛ tɩkpazɩ-ɩ ɖoŋ nɛ tiseɣti-i ɖɔɖɔ se ewolo pɩ-yɔɔ nɛ ɛ nɛ ‘Ɛsɔ pɔɖɔŋ.’ (Kiɖe 6:9) Yehowa heyi Noowa se ɛcaɣ ɖɩzʋʋ ɛjaɖɛ kɩdɛkɛdɩyɛ nɖɩ nɛ ɛkɛdɩ-ɩ ɖɔɖɔ mbʋ pɩwɛɛ se ɛla nɛ pɩya ɛ nɛ ɛ-hɔʋ taa ñɩma ñʋʋ yɔ. (Kiɖe 6:13-18) Tɔm ndʋ Yehowa yɔɔdaa yɔ, tɩkpazɩ Noowa ɖoŋ pɩdɩɩfɛyɩ.

3. Ɛzɩma Ɛsɔ kpazɩ Yozuwee ɖoŋ? (Cɔnɩ kiɖe tɛɛ kɩlɛmʋʋ.)

³ Pʋwayɩ paɖʋ Yozuwee tʋmɩyɛ se eɖiyi Ɛsɔ samaɣ nɛ ewoni-kɛ Kanaŋ tɛtʋ taa. Tʋmɩyɛ kaɖɛ ñɩnɖɛ nɖɩ, ɖɩ-hɔɔlʋʋ nakʋyʋ lɛ se pɩwɛɛ se eyooni ajɛɛ ɖoŋ ñɩna wena aatɛm wɛʋ tɛtʋ ndʋ tɩ-taa yɔ. Ye mbʋ Yozuwee kaawɛnɩ toovenim se sɔɔndʋ ɛkpa-ɩ. Pʋyɔɔ Yehowa tiyi Moyizi se ɛkpazɩ Yozuwee ɖoŋ. Ɛsɔ yɔɔdaa se: “Ðʋ paɣtʋ Yozuwee nɛ ŋkpazɩ-ɩ ɖoŋ nɛ ŋsɛzɩ-ɩ, mbʋ yɔ ɛnʋ kaɣnɩ nɔɔ ɖɛʋ samaɣ kanɛ yɔ nɛ ɛkaɣnɩ-kɛ tɛtʋ tayʋʋ, ndʋ ŋkɔŋ-tʋ lesuu poliŋ taa yɔ.” (Wp. 3:28) Pʋcɔ nɛ Yozuwee paɣzɩ tʋmɩyɛ nɖɩ lɛ, Yehowa kpazɩ-ɩ ɖoŋ nɛ ɛyɔɔdɩ se: “Ɛzɩ mantɩɖʋ-ŋ paɣtʋ se: Kpa ɖoŋ nɛ ŋɖɔkɩ kpam, ña-laŋɩyɛ ɛtaalɩɩ, nɛ sɔɔndʋ ɛtaakpa-ŋ, mbʋ pʋyɔɔ yɔ [Yehowa] ñɛ-Ɛsɔ wɛ ñɔ-cɔlɔ pɩtɩŋa pɩ-taa, mbʋ mbʋ ŋlakɩ yɔ.” (Yoz. 1:1, 9) Pɩtʋʋ fɛyɩ se tɔm tʋnɛ tɩkpazɩ-ɩ ɖoŋ siŋŋ!

4, 5. (a) Ɛzɩma Yehowa kpazɩ ɖoŋ ɛ-samaɣ caanaʋ taa? (b) Ɛzɩma Yehowa kpazɩ ɛ-Pɩyalʋ ɖoŋ?

⁴ Pɩtasɩnɩ se Yehowa kpazaɣ ɖoŋ ɛyaa nabɛyɛ lɛ, ɛɛyɔɔdɩ ɖɔɖɔ tɔm pee wena akpazɩ ɖoŋ ɛ-samaɣ tɩŋa yɔ. Alɩwaatʋ ndʋ Yuuda ñɩma kaawɛ yomiye taa Babilɔɔnɩ yɔ, Yehowa yɔɔdɩ natʋ tɔm natʋyʋ nɛ tɩkpazɩ-wɛ ɖoŋ siŋŋ. Ɛyɔɔdaa se: “Ña-laŋɩyɛ ɛtaalɩɩ, mbʋ yɔ mɛwɛ ñɔ-cɔlɔ; taahʋʋ, mbʋ yɔ mɛnkɛ ñɛ-Ɛsɔ: Mankaɣ-ŋ kpazʋʋ ɖoŋ nɛ mankaɣ-ŋ sɩnʋʋ nɛ mankaɣ-ŋ ɖɔkʋʋ nɛ mon-toovenim nɩwaŋ.” (Iza. 41:10) Ɛɛkpazɩ ɖoŋ caanaʋ taa Krɩstʋ ñɩma nɛ mbʋ ɖɔɖɔ eɖiɣni labʋ ɛ-sɛyaa mba pɛwɛ sɔnɔ yɔ.​—Kalɩ 2 Kɔrɛntɩ 1:3, 4.

⁵ Halɩ Yesu maɣmaɣ, ɛ-Caa kpazɩ-ɩ ɖoŋ. Alɩwaatʋ ndʋ pamɩyɩsaɣ Yesu lɩm yɔ, ɛnɩ nɔɔ nakɛyɛ taŋ nɛ ɛsɔdaa kiŋ nɛ keheyi-i se: “Ɛnʋ yɔ ɛkɛnɩ man-Pɩyalʋ kʋsɔɔlʋ weyi man-taa wɛ-ɩ nɛ leleŋ pɩdɩɩfɛyɩ yɔ.” (Mat. 3:17) Pɩtʋʋ fɛyɩ se tɔm tʋnɛ tɩɩkpazɩ Yesu ɖoŋ nɛ ɛpɩzɩ nɛ ɛla tɔm susuu tʋmɩyɛ nɖɩ ɖɩ-yɔɔ ɛkɔm tɛtʋ yɔɔ yɔ!

6. Ɛzɩma talaŋ waa eduuye kpazɩɣ-ɖʋ ɖoŋ?

⁶ Yesu maɣzɩnɩ ɛ-Caa kɩɖaʋ. Yesu yɔɔdaɣ ɛjaɖɛ kɩdɛkɛdɩyɛ ɖɩnɛ ɖɩ-tɛm tɔm lɛ, etuu talaŋ waa eduuye nɛ pɩkpazɩ mba paawɛnɩ tisuu yɔ ɖoŋ. Ñʋʋdʋ sam paa ɛ-lɩmɖʋyʋ siɣsiɣ tʋ weyi lɛ se: “Camɩyɛ mbʋ yɔ! Lɩmɖʋyʋ kɩbanʋ nɛ siɣsiɣ tʋ, ŋwɛ siɣsiɣ cikpem ɖeɖe yɔ, mankpaɣ-ŋ sɔsɔm ñʋʋdʋ. Sʋʋ ña-caa leleŋ taa.” (Mat. 25:21, 23) Tɔm tʋnɛ tɩkpazɩɣ-ɖʋ ɖoŋ se ɖɩɖɔkɩ ɖe-siɣsiɣ wɛtʋ nɛ ɖiwolo pɩ-yɔɔ nɛ ɖɩsɛɛ Yehowa.

7. (a) Ɛzɩma Yesu kpazɩ ɖoŋ ɛ-apostoloowaa? (b) Nɛ ɛzɩma ɛkpazɩ ɖoŋ Pɩyɛɛrɩ?

⁷ Yesu apostoloowaa yowaɣni ɖama ɖoŋ ɖoŋ se pana se pa-taa lɛ akɩlaa, ɛlɛ Yesu ɖʋ suuɖu nɛ eseɣti-wɛ se poluzi pa-tɩ nɛ pɛwɛɛ ɛzɩ lɩmɖʋyaa yɔ, nɛ pataawɛɛ ɛzɩ ñʋndɩnaa yɔ. (Luka 22:24-26) Pɩyɛɛrɩ ñɛkpɛzɩ tam sakɩyɛ se ɛɛsɩŋ Yesu. (Mat. 16:21-23; 26:31-35, 75) Paa mbʋ yɔ, Yesu tɩɖɔɔnɩ Pɩyɛɛrɩ, ɛlɛ ɛkpazɩ-ɩ ɖoŋ nɛ halɩ  ɛɖʋ-ɩ tʋmɩyɛ se ɛkpazɩ e-koobiya ɖoŋ.​—Yoh. 21:16.

8. Ɛzɩma Ezekiyaasɩ kpazɩ ɖoŋ sɔɔjanaa ñʋndɩnaa nɛ Yuuda samaɣ?

⁸ Pʋcɔ nɛ Yehowa Pɩyalʋ kɔŋ tɛtʋ yɔɔ nɛ ɛhaɣ ɖoŋ kpazʋʋ kɩɖaʋ ŋgʋ kɩtalɩ pilim yɔ lɛ, Yehowa sɛyaa siɣsiɣ ñɩma kaanawa se pɩpɔzʋʋ se pakpazɩ ɖama ɖoŋ. Pʋcɔ nɛ Ezekiyaasɩ kʋyɩ se eyooni Asiirii ñɩma lɛ, ekpeɣli sɔɔjanaa ñʋndɩnaa nɛ Yuuda samaɣ tɩŋa se ɛkpazɩ-wɛ ɖoŋ. Bibl yɔɔdaa se: “Nɛ [ɛ]-tɔm ndʋ yɔ tɩkpazɩ ɖoŋ ɛyaa samaɣ.”​—Kalɩ 4 Awiya 32:6-8.

9. Ɛbɛ Yɔɔb takayaɣ kpɛlɩkɩɣ-ɖʋ ɖoŋ kpazʋʋ yɔɔ?

⁹ Paa pɩɩpɔzaa se pɛhɛzɩ Yɔɔb laŋɩyɛ yɔ, ɛ-maɣmaɣ ɛwɩlɩ ɖoŋ kpazʋʋ kɩɖaʋ kɩbaŋʋ ɛ-taabalaa naadozo, mba paakɛ “laŋɩyɛ hɛzɩyaa mba paɖʋʋ ɖɩwɩzɩyɛ yɔ.” Eheyi-wɛ se ye ɛnʋ kaawɛnɩ po-lone taa yɔ, ‘ɛɛkpazɩ-wɛ ɖoŋ nɛ ɛ-nɔɔ taa tɔm nɛ ɛhɛzɩ pa-laŋa nɛ e-ndomee.’ (Yɔɔb 16:1-5) Eliihu kpazɩ ɖoŋ Yɔɔb nɛ pʋwayɩ lɛ, Yehowa maɣmaɣ kpazɩ Yɔɔb ɖoŋ ɖɔɖɔ.​—Yɔɔb 33:24, 25; 36:1, 11; 42:7, 10.

10, 11. (a) Ɛbɛ yɔɔ pɩɩpɔzaa se pakpazɩ Yeftee pɛlɛ ɖoŋ? (b) Sɔnɔ, mba pɩpɔzaa se pakpazɩ ɖoŋ ɖɔɖɔ?

¹⁰ Yeftee pɛlɛ kɛnɩ caanaʋ taa ɛyʋ lɛlʋ weyi pɩɩpɔzaa se pakpazɩ-ɩ ɖoŋ yɔ. Pʋcɔ nɛ Tɔm hʋyʋ Yeftee wolo se eyooni Amɔɔnɩ mba lɛ, eɖuuni Yehowa se ye ɛlɛ ɛsɩnɩ-ɩ nɛ ɛwa you yɔ, kajalaɣ ɛyʋ weyi ɛkaɣ lɩnʋʋ ɛ-ɖɩɣa taa nɛ ɛkatɩ-ɩ alɩwaatʋ ndʋ ɛpɩsɩɣnɩ you taa yɔ, ɛkaɣ-ɩ haʋ Yehowa nɛ ɛla tʋmɩyɛ kediɣzaɣ kizinziku tɛɛ. Ɛwabɩ you nɛ ɛpɩsɩɣ lɛ, ɛ-pɛlɛ ɛgbamɩyɛ weyi ɛtɩtɩlɩ abalʋ yɔ, ɛkatɩ-ɩ nɛ taa leleŋ. Piitibi Yeftee yɔɔɔ. Paa mbʋ yɔ, ɛɖɔm e-ɖuutu yɔɔ nɛ etiyini ɛ-pɛlɛ ɛnʋ Siiloo se ɛlɛ ɛla tʋmɩyɛ kediɣzaɣ kizinziku tɛɛ e-wezuu caɣʋ kpeekpe.​—Th. 11:30-35.

¹¹ Paa pɩɩlabɩ kaɖɛ Yeftee yɔ, pɩtɩla pɩɩlabɩ kaɖɛ ɛ-pɛlɛ nɛ pɩkpaɖɩ. Ɛlɛ etisini sɔɔlɩm faaa nɛ ɛsɩnɩ ɛ-caa nɛ ɛlɛ ɖɔ e-ɖuutu yɔɔ. (Th. 11:36, 37) Pʋyɔɔ lɛ, ɛtɩwalɩ nɛ ɛtɩlʋlɩ pɩɣa, ŋgʋ mbʋ pɩzaɣna se piyele nɛ ɛ-caa hɔʋ etaaɖe. Pɩwɩlɩɣ se pɩpɔzaa se pakpazɩ ɖoŋ Yeftee pɛlɛ alɩwaatʋ ndʋ tɩ-taa. Bibl yɔɔdaa se: “Nɛ pɩpɩsɩ Izrayɛɛlɩ pɛlaa sɔnzɩ se: Paa pɩnaɣ ŋga lɛ pekpeɣliɣ kɩyakɩŋ naanza nɛ pewii Gileyaadɩ tʋ Yeftee pɛlɛ.” (Th. 11:39, 40) Ye mbʋ Krɩstʋ ñɩma mba patɩɖɔkɩ nesi nɛ pakpaɣ pɛ-ɛɖandʋ nɛ pakaŋ pa-lɩmaɣza “Kɩbaɣlʋ tɔm yeke” yɔɔ yɔ, pɩtɩmʋna se pasam-wɛ nɛ pakpazɩ-wɛ ɖoŋ yaa we?​—1 Kɔr. 7:32-35.

12, 13. Ɛzɩma Pɩyɛɛrɩ ‘kpazɩ e-koobiya ɖoŋ’?

¹² Ðoo wena a-taa pakpa Yesu yɔ, eheyi Apostoloo Pɩyɛɛrɩ se: “Siimɔɔ, Siimɔɔ, tɩlɩ se Sataŋ pɔzɩ nʋmɔʋ se ɛñamsɩ-mɩ nɛ ɛfalɩ-mɩ ɛzɩ mɩla yɔ. Ɛlɛ mantɩmɩ ñɔ-yɔɔ se ñe-tisuu ɛtaamʋʋ. Mbʋ lɛ ña yɔ, [ŋpɩsaa] lɛ, ŋkpazɩ ño-koobiya ɖoŋ!”​—Luka 22:31, 32.

¹³ Pɩyɛɛrɩ wɩlaa se ɛkɛ tilimiye, kajalaɣ Krɩstʋ ɛgbɛyɛ taa. (Gal. 2:9) Ɛtɩŋnɩ ɛ-kɩɖaʋ kɩbaŋʋ yɔɔ nɛ ɛkpazɩ e-koobiya ɖoŋ Pantekooti wiye nɛ pʋwayɩ ɖɔɖɔ. Ɛtɛzaɣ ɛ-tɔm susuu tʋmɩyɛ lɛ, ɛma e-koobiya Krɩstʋ ñɩma takayaɣ nɛ ɛyɔɔdɩ se: “Mamaɣ-mɩ tɔm tʋnɛ yɔ, . . . se mansazɩ-mɩ nɛ meheyi-mɩ aseɣɖe tɔm se Ɛsɔ kʋjɔʋ kɛlɛ siŋŋ: Ɩɖɔkɩ-kʋ kpam.”  (1 Pɩy. 5:12) Fezuu kiɖeɖeu sɩnɩ Pɩyɛɛrɩ nɛ ɛma takayɩsɩ nzɩ yɔ, sɩkpazɩ Krɩstʋ ñɩma ɖoŋ ɖooo caanaʋ taa, nɛ halɩ nɛ sɔnɔ sɩwɛɛ nɛ sɩkpazɩɣ-ɖʋ ɖoŋ. Ðoŋ kpazʋʋ pʋnɛ pɩ-tɔm cɛyɩ siŋŋ alɩwaatʋ ndʋ ɖɩɖaŋ kpam se Yehowa lidaʋ tɔm ɛla yɔ.​—2 Pɩy. 3:13.

14, 15. Fezuu kiɖeɖeu sɩnɩ apostoloo Yohanɛɛsɩ nɛ ɛma tɔm ndʋ yɔ, ɛzɩma tɩkpazɩ ɖoŋ Krɩstʋ ñɩma pɩnzɩ mɩnɩŋ sakɩyɛ?

¹⁴ Apostoloo Yohanɛɛsɩ kaawɩlaa ɖɔɖɔ se ɛkɛ tilimiye kajalaɣ Krɩstʋ ɛgbɛyɛ taa. Ɛkɛdɩ Yesu tɔm susuu tʋmɩyɛ tɔm ɛ-tɛ Evaŋgilim taa, nɛ tɔm ndʋ tɩkpazɩ Krɩstʋ ñɩma ɖoŋ pɩnzɩ mɩnɩŋ sakɩyɛ nɛ halɩ nɛ sɔnɔ tɩwɛɛ nɛ tɩkpazɩɣ-ɖʋ ɖoŋ ɖɔɖɔ. Tɔm ndʋ Yesu yɔɔdaa se sɔɔlɩm patɩlɩɣnɩ ɛ-wayɩ tɩŋɩyaa toovenim mba yɔ, Yohanɛɛsɩ tɛ Evaŋgilim taa ɖeke ɖɩpɩzɩɣ nɛ ɖɩna-tʋ.​—Kalɩ Yohanɛɛsɩ 13:34, 35.

¹⁵ Takayɩsɩ naadozo nzɩ Yohanɛɛsɩ mawa yɔ, ɛyɔɔdɩ sɩ-taa toovenim tɔm kɩbandʋ sakɩyɛ. Alɩwaatʋ ndʋ kɩwɛɛkɩm sʋʋtʋ nɩɣ-ɖʋ siŋŋ yɔ, tɔm ndʋ ɖɩkalɩɣ se “Yesu calɩm ñalɩɣ ɖa-kɩwɛɛkɩm kpeekpe” yɔ, tɩɩhɛzɩɣ ɖa-laŋa yaa we? (1 Yoh. 1:7) Nɛ ye ɖa-laŋa ɛkʋʋ ɖɔ-tɔm paa ɛzɩmtaa, ɖa-taa ɛɛlakɩ leleŋ siŋŋ alɩwaatʋ ndʋ ɖɩkalɩɣ se “Ɛsɔ kɩlɩ ɖa-laŋɩyɛ” yɔ? (1 Yoh. 3:20) Yohanɛɛsɩ ɖeke manɩ ɛ-takayaɣ taa se “Ɛsɔ kɛ sɔɔlɩm.” (1 Yoh. 4:8, 16) Ɛ-takayaɣ naalɛ ñɩŋga nɛ naadozo ñɩŋga, pakpazɩɣ ɖoŋ Krɩstʋ ñɩma mba pɛwɛɛ nɛ pɔɖɔŋ “[toovenim] tɔm nʋmɔʋ taa” yɔ.​—2 Yoh. 4; 3 Yoh. 3, 4.

16, 17. Ɛzɩma Pɔɔlɩ kpazɩ ɖoŋ kajalaɣ Krɩstʋ ñɩma?

¹⁶ Pɩtɩla kajalaɣ pɩnzɩ mɩnʋʋ taa apostoloo weyi ɛkɩlɩ kpazʋʋ ɖoŋ e-koobiya yɔ, ɛnʋ lɛ Pɔɔlɩ. Kpaɣnɩ alɩwaatʋ ndʋ Krɩstʋ ɛgbɛyɛ ñɔwa yɔ, Yeruzalɛm  tɛtʋ taa apostoloowaa sakɩyɛ kaawɛɛ nɛ peeɖe ɖɔɖɔ Nɔɔɖɛyaa ɛgbɛyɛ kaawɛɛ. (Tʋma 8:14; 15:2) Krɩstʋ ñɩma mba paawɛ Yudee yɔ, posusi Krɩstʋ tɔm ɛyaa mba yɔ, Yuuda Ɛsɔ sɛtʋ wɩlɩtʋ yɔɔ lɛ, paatɛm wɛnʋʋ tisuu se Ɛsɔ toovenim tʋ kʋyʋm wɛna. Ɛlɛ, Apostoloo Pɔɔlɩ lɛ, fezuu kiɖeɖeu ɖiyi-i se esusi tɔm Grɛɛkɩ nɛ Roma ajɛɛ taa ñɩma mba paba sɛɣaɣ ɛsɔnaa sakɩyɛ yɔ.​—Gal. 2:7-9; 1 Tim. 2:7.

¹⁷ Pɔɔlɩ ɖɔm nʋmɔʋ nɛ ewolo poliŋ ajɛɛ wena payaɣ sɔnɔ se Turkii, Grɛɛsɩ nɛ Itaalii yɔ a-taa; nɛ ɛɖʋ Krɩstʋ agbaa kɩfana, sɩɩnaa layaa ajɛɛ ana a-taa. Krɩstʋ ñɩma kɩfama mba ‘panɩ siziŋ pɛ-tɛ mba nesi tɛɛ’ nɛ pɩɩpɔzaa se pakpazɩ-wɛ ɖoŋ. (1 Tes. 2:14) Pɩtalɩ pɩnaɣ 50 mbʋ yɔ lɛ, Pɔɔlɩ ma takayaɣ ɛgbɛyɛ kɩfaɖɛ nɖɩ ɖɩwɛ Tesalooniiki yɔ nɛ ɛyɔɔdɩ se: “Ðɩsɛɣ Ɛsɔ tam mi-kpeekpe mɩ-yɔɔ paa ɛzɩma taa, nɛ ɖɩtɔzʋʋ mɩ-yɔɔ ɖa-adɩma taa. Ðɩtɔzʋʋ kaahɛzaɣ ɖɛ-Ɛsɔ nɛ ɖa-Caa ɛsɩndaa mi-tisuu tʋmɩyɛ yɔɔ, mɩ-sɔɔlɩm lakasɩ yɔɔ, mɩ-tɩ ɖɔkʋʋ nɛ lidaʋ yɔɔ.” (1 Tes. 1:2, 3) Eseɣti-wɛ se pakpazɩ ɖama ɖoŋ nɛ ɛyɔɔdɩ se: “Pʋyɔɔ lɛ, ɩsɔzɩ ɖama ɖoŋ, ɩsɩnɩ ɖama wɩlʋʋ nʋmɔʋ kɩbaŋʋ.”​—1 Tes. 5:11.

18. Ɛzɩma kajalaɣ pɩnzɩ mɩnʋʋ taa Nɔɔɖɛyaa Ɛgbɛyɛ kaakpazɩ Filiipu ɖoŋ?

¹⁸ Kajalaɣ pɩnzɩ mɩnʋʋ taa Nɔɔɖɛyaa Ɛgbɛyɛ kaakpazɩ ɖoŋ siŋŋ Krɩstʋ agbaa taa ñɩma nɛ mba pɛɖɛɣaɣ nɔɔ a-taa yɔ. Alɩwaatʋ ndʋ tɔm susuyu Filiipu susaɣ Krɩstʋ tɔm Samaarii ñɩma yɔ, Nɔɔɖɛyaa Ɛgbɛyɛ taa koobiya kaaɖʋ-ɩ nesi. Petiyini pa-taa koobiya naalɛ, Pɩyɛɛrɩ nɛ Yohanɛɛsɩ se powolo nɛ pala adɩma nɛ Ɛsɔ yele nɛ fezuu kiɖeɖeu tii Krɩstʋ ñɩma kɩfama mba pɔ-yɔɔ. (Tʋma 8:5, 14-17) Pɩtʋʋ fɛyɩ se Nɔɔɖɛyaa Ɛgbɛyɛ nesi ɖʋʋ mbʋ, pɩɩkpazɩ Filiipu nɛ Krɩstʋ ñɩma kɩfama mba ɖoŋ pɩdɩɩfɛyɩ!

19. Ɛzɩma pɩlabɩ Kajalaɣ Krɩstʋ ñɩma, alɩwaatʋ ndʋ pamʋ takayaɣ ŋga Nɔɔɖɛyaa Ɛgbɛyɛ tiyini-wɛ yɔ?

¹⁹ Pʋwayɩ lɛ pɩɩwɛɛ se Nɔɔɖɛyaa Ɛgbɛyɛ ɛtazɩ tɔm taa nɛ pana se pɩwɛɛ se pɛpɛlɩ sɩɩnaa layaa mba papɩsɩ Krɩstʋ ñɩma yɔ, ɛzɩ Moyizi paɣtʋ kaapɔzʋʋ se pɛpɛlɩ Yuuda ñɩma yɔ. (Tʋma 15:1, 2) Fezuu kiɖeɖeu ɖiyi-wɛ nɛ patɩŋnɩ Masɩ yɔɔ nɛ pana se pɩtɩtasɩ cɛyʋʋ se pala mbʋ; pʋyɔɔ lɛ, pama takayaɣ nɛ petiyini agbaa se aɖɔ lɩmaɣza ana a-yɔɔ. Nɔɔɖɛyaa Ɛgbɛyɛ lɩzɩ koobiya nabɛyɛ nɛ ɖitiyi-wɛ se powoni takayaɣ ŋga agbaa. Ɛbɛ lɩ pɩ-taa? “Pakalɩ-kɛ nɛ pɛtɛ lɛ, koobiya taa la leleŋ pɩŋŋ.”​—Tʋma 15:27-32.

20. (a) Ɛzɩma Nɔɔɖɛyaa Ɛgbɛyɛ nɖɩ ɖɩwɛ sɔnɔ yɔ ɖɩkpazɩɣ ɖoŋ ɛjaɖɛ kpeekpe yɔɔ koobiya? (b) Tɔm pɔzʋʋ mbʋ yɔɔ ɖɩkaɣ cosuu ñʋʋ ŋgʋ kɩkɔŋ yɔɔ kɩ-taa?

²⁰ Sɔnɔ Yehowa Aseɣɖe Tɩnaa tɛ Nɔɔɖɛyaa Ɛgbɛyɛ kpazɩɣ ɖoŋ Betɛɛlɩ hɔʋ taa ñɩma, alɩwaatʋ tɩŋa Ɛsɔ sɛtʋ tʋmlaɖaa nɛ koobiya tɩŋa mba pɛwɛ ɛjaɖɛ kpeekpe yɔɔ yɔ. Koobiya hikiɣ taa leleŋ nɛ ɖoŋ kpazʋʋ, ɛzɩ pɩɩwɛʋ kajalaɣ pɩnzɩ mɩnʋʋ taa yɔ. Pɩtasɩ lɛ, pɩnaɣ 2015 taa Nɔɔɖɛyaa Ɛgbɛyɛ lɩzɩ hatʋ cabɩ takayaɣ Reviens à Jéhovah nɛ takayaɣ ŋga kɛwɛɛ nɛ kakpazɩɣ ɖoŋ siŋŋ koobiya sakɩyɛ ɛjaɖɛ kpeekpe yɔɔ. Ɛlɛ mba pɛwɛnɩ wala agbaa taa yɔ, pe-ɖeke pɩwɛɛ se pamaɣzɩnɩ Yehowa nɛ pakpazɩ lalaa ɖoŋ na? Tɔm pɔzʋʋ mbʋ, pɩ-yɔɔ ɖɩkaɣ cosuu ñʋʋ ŋgʋ kɩkɔŋ yɔ kɩ-taa.