Awiya wena ayouni ɖama kɛdɛzaɣ alɩwaatʋ taa yɔ
Natʋ tɔm ndʋ tɩwɛ anjaʋ kʋnɛ kɩ-yɔɔ yɔ, tɩ-taa natʋyʋ yɔɔdʋʋ mbʋ pɩlabɩ alɩwaatʋ kʋɖʋmtʋ taa yɔ pɩ-tɔm. Natʋ tɔm ndʋ, tɩ-tɩŋa tɩwɩlɩɣ se ɖɩwɛ kɛdɛzaɣ alɩwaatʋ taa.—Dan. 12:4.
Masɩ: Natʋ 11:7; 12:13, 17; 13:1-8, 12
Natʋ tɔm: “Tɛtɛgbɩnɛ” tɔkɩ kewiyitu tɛtʋ yɔɔ pɩnzɩ mɩnɩŋ sakɩyɛ. Kɛdɛzaɣ alɩwaatʋ taa lɛ, ɖɩ-ñʋʋ lʋbɛ ñɩŋgʋ mʋ heŋ. Pʋwayɩ, ñʋʋ ŋgʋ ki-heŋ waa nɛ “tɛtʋ kpeekpe” tɩŋ ɖɩ-wayɩ. Sataŋ lakɩnɩ tʋmɩyɛ tɛtɛgbɩnɛ nɖɩ se eyooni “mba pɩkazaa yɔ.”
Ɛzɩma tɩlakɩ yɔ: Tɛʋ sɔsɔʋ wayɩ, kominawaa mba pɛkɛ Yehowa koyindinaa yɔ pɔtɔɔ kewiyitu ɛyaa yɔɔ. Pɩnzɩ mɩnɩŋ sakɩyɛ wayɩ, Camaa you kajalaɣ ñɩŋgʋ alɩwaatʋ taa, Grandɩ Bretaañɩ Kewiyaɣ lesi ko-ɖoŋ sakɩyɛ. Kaɖaɣnɩ kpaʋ ɖoŋ alɩwaatʋ ndʋ kalabɩ nɔɔ kʋɖʋmaɣ nɛ Etaazuunii yɔ. Kɔzɩ kɔzɩ kɛdɛzaɣ alɩwaatʋ taa, Sataŋ wɛɛ nɛ ɛlakɩnɩ tʋmɩyɛ politiki agbaa se ɛnazɩ Ɛsɔ samaɣ.
Masɩ: Dan. 11:25-45
Natʋ tɔm: Hayo kiŋ wiyaʋ nɛ hadɛ kiŋ wiyaʋ poyouni ɖama kɛdɛzaɣ alɩwaatʋ taa.
Ɛzɩma tɩlakɩ yɔɔ: Caama nɛ Aŋglo-Amerika kewiyaɣ poyouni ɖama. Pɩnaɣ 1945 taa, Iniyɔɔ Soviyetiiki nɛ ajɛɛ wena aɖʋʋ-kʋ nesi yɔ papɩsɩ hayo kiŋ wiyaʋ. Pɩnaɣ 1991 taa, Iniyɔɔ Soviyetiiki lesi ki-ɖoŋ nɛ alɩwaatʋ wɛɛ nɛ tɩɖɛɣ lɛ, Rusii nɛ ajɛɛ wena aɖʋʋ-kʋ nesi yɔ papɩsɩ hayo kiŋ wiyaʋ.
Masɩ: Iza. 61:1; Mal. 3:1; Luka 4:18
Natʋ tɔm: Yehowa tiyi ‘e-tiyiyu’ se ‘ɛñɔɔzɩ nʋmɔʋ’ pʋcɔ nɛ pasɩɩ Mesiya Kewiyaɣ. Tiyiyu ɛnʋ ɛpaɣzɩ ‘susuu tɔm kɩbandʋ kʋñɔndɩnaa.’
Ɛzɩma tɩlakɩ yɔ: Kpaɣnɩ pɩnzɩ 1870 waa taa, Russell nɛ ɛ-taabalaa pakpaɣ alɩwaatʋ sakɩyɛ nɛ pɛkpɛlɩkɩ Bibl se patɩlɩ tɔm ndʋ ɖeyi ɖeyi kɩwɩlɩɣ yɔ. Pɩnzɩ 1880 waa taa, papaɣzɩ ɖiɣzinuu se pɩcɛyaa se Ɛsɔ sɛyaa isusi tɔm. Palɩzɩ tɔm ñʋŋ ɛzɩ “Ðɩsɔɔlɩ tɔm susuyaa 1000” nɛ “Pata-mɩ num se isusi tɔm” mbʋ yɔ.
Masɩ: Mat. 13:24-30, 36-43
Natʋ tɔm: Abalʋ nɔɔyʋ ɖu blee hayɩm nabʋyʋ taa. Pʋwayɩ lɛ, koyindu nɔɔyʋ ɖuu ñɩtʋ kɩdɛkɛdɩtʋ hayɩm mbʋ pɩ-taa. Ñɩtʋ kɩdɛkɛdɩtʋ paɣlɩ nɛ tihuuzi blee yɔɔ. Kʋmtʋ alɩwaatʋ talaa lɛ, patayɩ ñɩtʋ kɩdɛkɛdɩtʋ nɛ blee pɛ-hɛkʋ taa.
Ɛzɩma tɩlakɩ yɔ: Kpaɣnɩ pɩnzɩ 1800 waa ɖɩdɛnɖɛ lɛ, tʋkaɣ paɣzɩ wɛʋ toovenim Krɩstʋ ñɩma nɛ cɛtɩm Krɩstʋ ñɩma pɛ-hɛkʋ taa. Kɛdɛzaɣ alɩwaatʋ taa, pekpeɣli toovenim Krɩstʋ ñɩma nɛ tʋkaɣ wɛɛ pa nɛ cɛtɩm Krɩstʋ ñɩma pɛ-hɛkʋ taa.
Masɩ: Dan. 2:31-33, 41-43
Natʋ tɔm: Sɩʋ kpeliɣa ŋga palabɩnɩ ñɩɣtʋ ndɩ ndɩ yɔ ka-naataŋ kɛ cʋʋ nɛ ñɩɣyʋʋ.
Ɛzɩma tɩlakɩ yɔ: Cʋʋ sɩŋnɩ ɛyaa mba pɔ-yɔɔ Grandɩ Bretaañɩ nɛ Etaazuunii pɔtɔɔ kewiyitu yɔ. Ɛyaa mba pakaɖɩnɩ kominawaa mba, nɛ pɔ-yɔɔ lɛ kominawaa mba paapɩzɩɣ nɛ palabɩnɩ tʋmɩyɛ po-ɖoŋ kpeekpe.
Masɩ: Mat. 13:30; 24:14, 45; 28:19, 20
Natʋ tɔm: Posu “blee” ‘kpou taa’ nɛ palɩzɩ “yom siɣsiɣ tʋ nɛ lɔŋsɩnɖʋ” se ɛcɔnɩ ‘ɖɩɣa taa mba’ yɔɔ. Papaɣzɩ susuu “Kewiyaɣ tɔm kɩbandʋ . . . tɛtʋ kpeekpe yɔɔ.”
Ɛzɩma tɩlakɩ yɔ: Pɩnaɣ 1919 taa, palɩzɩ yom siɣsiɣ tʋ se ɛcɔnɩ Ɛsɔ samaɣ yɔɔ. Kpaɣnɩ alɩwaatʋ ndʋ lɛ, Bibl kpɛlɩkɩyaa wɛɛ nɛ posusuu tɔm nɛ pɩkpaɖɩɣ. Sɔnɔ, Yehowa Aseɣɖe Tɩnaa susuu tɔm ajɛɛ wena acɛzɩ 200 yɔ a-taa, nɛ kʋnʋmɩŋ weyi ɩ-taa palɩzɩɣ takayɩsɩ yɔ, ɩcɛzɩ 1000.
Masɩ: Dan. 12:11; Natʋ 13:11, 14, 15
Natʋ tɔm: Tɛtɛgbɩnɛ nɖɩ ɖɩwɛnɩ hɩŋ naalɛ yɔ, ɖɩɖɛ nɔɔ nɛ pala “sɩʋ kpeliɣa nakɛyɛ tɛtɛgbɩnɛ” nɛ ɖɩhaɣ “fezuu tɛtɛgbɩnɛ sɩʋ kpeliɣa.”
Ɛzɩma tɩlakɩ yɔ: Aŋglo-Amerika kewiyaɣ ɖɛ nɔɔ nɛ palɩzɩ ajɛɛ kɩgbɛndʋʋ ɛgbɛyɛ nɖɩ payaɣ se SDN yɔ. Ajɛɛ lɛɛna ɖʋ nesi ɛgbɛyɛ nɖɩ. Alɩwaatʋ wɛɛ nɛ tɩɖɛɣ lɛ, hayo kiŋ wiyaʋ sʋʋ ɛgbɛyɛ nɖɩ ɖɩ-taa kpaɣnɩ pɩnaɣ 1926 piwolo pɩnaɣ 1933. Ɛyaa kaamaɣzaa se ɛgbɛyɛ nɖɩ ɖɩpɩzɩɣ nɛ ɖɩla mbʋ Ɛsɔ Kewiyaɣ ɖeke pɩzɩɣna se kala yɔ. Pamaɣzaɣ se kapɩzɩɣ nɛ kɔkɔnɩ laŋhɛzɩyɛ ɛjaɖɛ kpeekpe yɔɔ. Lɩmaɣza ana ɖɔɖɔ ɛyaa wɛnɩ ONU yɔɔ.
Masɩ: Dan. 8:23, 24
Natʋ tɔm: Wiyaʋ weyi ɛ-ɛsɩndaa nɛ ñaŋ yɔ ‘ɛkʋ’ ɛyaa sakɩyɛ.
Ɛzɩma tɩlakɩ yɔ: Aŋglo-Amerika kewiyaɣ kʋ ɛyaa sakɩyɛ nɛ kɛwɛɛkɩ wondu sakɩyɛ ɖɔɖɔ. Kɩɖaʋ nakʋyʋ yɔ: Camaa you naalɛ ñɩŋgʋ alɩwaatʋ taa, Etaazuunii tɔ bɔmbɩwaa naalɛ ɛjaɖɛ nɖɩ ɖɩkɛ Grandɩ Bretaañɩ nɛ Etaazuunii po-koyindu yɔ ɖɩ-taa. You wonuu ŋgʋ, kɩwɛɛkɩ mbʋ yɔ, wiɖiyi you wonuu nakʋyʋ tɩwɛɛkɩ nɛ pɩtalɩ mbʋ.
Masɩ: Dan. 11:31; Natʋ 17:3, 7-11
Natʋ tɔm: Tɛtɛgbɩnɛ nɖɩ “ɖɩsɛ cɩɩɩ” nɛ ɖɩwɛɛnɩ hɩŋ hiu yɔ ɖɩlɩnɩ pɔʋ sɔsɔʋ taa, nɛ ɖɩkɛ wiyaʋ lutozo ñɩnʋ. Danɩyɛɛlɩ takayaɣ yɔɔdɩ wiyaʋ ɛnʋ ɛ-tɔm se ɛkɛ “yɔkɩyʋ kʋzɔɔtʋ sɩʋ kpeliɣa.”
Ɛzɩma tɩlakɩ yɔ: Ajɛɛ kɩgbɛndʋʋ ɛgbɛyɛ nɖɩ payaɣ se SDN yɔ, ɖɩsɩ tɩnaɣ Caama you naalɛ ñɩŋgʋ alɩwaatʋ taa. You tɛma lɛ, palɩzɩ ONU. Paɖʋʋ hɩɖɛ ONU ɛzɩ paaɖʋʋ hɩɖɛ SDN yɔ, hɩɖɛ ɖʋʋ mbʋ pɩmʋnɩ Ɛsɔ Kewiyaɣ yɔ. ONU kaɣ kʋyʋʋ Ɛsɔ sɛtʋ agbaa yɔɔ.
Masɩ: 1 Tes. 5:3; Natʋ 17:16
Natʋ tɔm: Ajɛɛ susuu se “laŋhɛzɩyɛ nɛ pɛɛyɛ” wɛɛ, nɛ “hɩŋ hiu” nɛ “tɛtɛgbɩnɛ” pakʋyɩ “halʋ tɩ pɛdɩyʋ” yɔɔ nɛ paɖɩzɩ-ɩ. Pʋwayɩ lɛ, paɖɩzɩ ajɛɛ.
Ɛzɩma tɩlakɩ yɔ: Ajɛɛ kaɣ maɣzʋʋ se apɩzaa ayele nɛ laŋhɛzɩyɛ nɛ pɛɛyɛ wɛɛ ɛjaɖɛ yɔɔ. Pʋwayɩ lɛ, ajɛɛ wena aɖʋʋ nesi ONU yɔ, aɖɩzɩɣ cɛtɩm Ɛsɔ sɛtʋ agbaa. Mbʋ wɩlɩɣna se kʋñɔŋ sɔsɔʋ paɣzaa. Kʋñɔŋ ŋgʋ, kɩkaɣ sɩʋ tɩnaɣ alɩwaatʋ ndʋ Yesu ɖɩzɩɣ Sataŋ ɛjaɖɛ hɔɔlʋʋ ŋgʋ kɩkazaa yɔ Armaagedɔɔ taa yɔ.
Masɩ: Ezek. 38:11, 14-17; Mat. 24:31
Natʋ tɔm: Gɔɔgɩ kpaɣ Ɛsɔ samaɣ ɛjaɖɛ wayɩ. Pʋwayɩ lɛ, tiyiyaa kpeɣli ‘ɛyaa mba palɩzaa yɔ.’
Ɛzɩma tɩlakɩ yɔ: Hayo kiŋ wiyaʋ nɛ kominawaa lalaa pakaɣ kʋyʋʋ Ɛsɔ samaɣ yɔɔ. Pakʋyʋʋ kɔ-yɔɔ nɛ pɩla alɩwaatʋ natʋyʋ lɛ, pakaɣ kpeɣluu patam numwaa mba pɩkazaa yɔ ɛsɔdaa.
Masɩ: Ezek. 38:18-23; Dan. 2:34, 35, 44, 45; Natʋ 6:2; 16:14, 16; 17:14; 19:20
Natʋ tɔm: ‘Weyi ɛɛcaɣ kpaŋnʋ kʋhʋlʋm yɔɔ yɔ ɛtɛzɩɣ wabʋ’ alɩwaatʋ ndʋ ɛɖɩzɩɣ Gɔɔgɩ nɛ ɛ-sɔɔjanaa yɔ. Pɔlɔ “tɛtɛgbɩnɛ” “miŋ lɩyɛ” taa, nɛ pɔyɔkɩ sɩʋ kpeliɣa sɔsɔɔ.
Ɛzɩma tɩlakɩ yɔ: Yesu weyi ɛkɛ Ɛsɔ Kewiyaɣ Wiyaʋ yɔ, ɛkaɣ yabʋ Ɛsɔ samaɣ ñʋʋ. Yesu, ɛyaa 144000 waa nɛ tiyiyaa, pakaɣ ɖɩzʋʋ ajɛɛ wena payɩ akʋyʋʋ Ɛsɔ samaɣ yɔɔ yɔ. Alɩwaatʋ ndʋ tɩ-taa Sataŋ ɛjaɖɛ kaɣ tɛm.
