1. Ɛbɛ yɔɔ Yehowa paɣzɩ wondu lɩzʋʋ?

ALƖWAATƲ natʋyʋ, Yehowa ɖeke kaawɛna. Ɛlɛ, pɩtaacɛyɩɣ-ɩ se ɛɛwɛ e-ɖeke. Nabʋyʋ taatɛɖɩɣ-ɩ. Paa mbʋ yɔ, Ɛsɔ kaasɔɔlaa se lalaa ɩnɩɩ wezuu leleŋ. Sɔɔlɩm kaaseɣti Yehowa nɛ ɛpaɣzɩ wondu lɩzʋʋ.—Keɣa 35:10; 1 Yoh. 4:19.

2. Alɩwaatʋ ndʋ Yehowa lɩzɩ wondu lɛɛtʋ yɔ, ɛzɩma pɩlabɩ Yesu nɛ Ɛsɔ tiyiyaa?

² Kajalaɣ lɛ, Yehowa lɩzɩ ɛ-Pɩyalʋ Yesu. Pʋwayɩ lɛ, Yehowa nɛ ɛ-Pɩyalʋ palɩzɩ “wondu lɛɛtʋ tɩŋa,” tɩ-taa natʋyʋ lɛ, Ɛsɔ tiyiyaa. (Kol. 1:16) Yesu taa kaawɛ leleŋ siŋŋ se ɛ nɛ ɛ-Caa palakɩ tʋmɩyɛ. (Adu. 8:30) Nɛ Ɛsɔ tiyiyaa taa kaawɛ leleŋ ɖɔɖɔ. Yesu kɛnɩ Ɛsɔ Tʋmlaɖʋ Sɔsɔ. Yehowa nɛ Yesu paalɩzɩ ɛsɔdaa nɛ tɛtʋ lɛ, Ɛsɔ tiyiyaa kaanawa. Ɛzɩma Ɛsɔ tiyiyaa laba? ‘Pɛmɛyaɣ’ alɩwaatʋ ndʋ palɩzɩ tɛtʋ yɔ, nɛ pɩtʋʋ fɛyɩ se paawobi pɩ-yɔɔ nɛ pɛmɛyɩɣ mbʋ payɩ Yehowa lɩzaɣ yɔ pɩ-yɔɔ, kɔzɩ kɔzɩ ɛyaa yɔɔ. (Yɔɔb 38:7; Adu. 8:31) Wondu kɩlɩzɩtʋ ndʋ, tɩ-taa paa ŋgʋ wɩlaa se Yehowa wɛnɩ sɔɔlɩm nɛ lɔŋsɩnɖɛ.—Keɣa 103:24; Roma 1:20.

3. Ɛzɩ pɔyɔɔdʋʋ 1 Kɔrɛntɩ mba 15:21, 22 taa yɔ, ɛbɛ Yesu kɩhɛyʋʋ pʋ-ñʋʋ taa kɩlaʋ haɣ nʋmɔʋ se pɩla?

³ Yehowa kaasɔɔlaa se ɛyaa ɩcaɣ wezuu tam tɛtʋ kɩbandʋ ndʋ ɛlɩzaa yɔ tɩ-yɔɔ. Ɛlɛ, alɩwaatʋ ndʋ Aɖam nɛ Ɛva pakaɖɩnɩ pa-Caa sɔɔlɩm tʋ yɔ, kɩwɛɛkɩm nɛ sɩm palɩ tɛtʋ kpeekpe yɔɔ. (Roma 5:12) Ɛzɩma Yehowa laba? Kpaagbaa mbʋ lɛ,  ɛyɔɔdɩ ɛzɩma ɛkaɣ yabʋ ɛyaa ñʋʋ yɔ. (Kiɖe 3:15) Yehowa kaakpaɣ lɩmaɣzɩyɛ se ɛkaɣ cɛlʋʋ ɛ-Pɩyalʋ Yesu se pɩkɛnɩ kɩhɛyʋʋ pʋ-ñʋʋ taa kɩlaʋ, se pɩsa nɛ Aɖam nɛ Ɛva pe-piya lɩɩ kɩdɛkɛdɩm nɛ sɩm yomiye taa. Pɩtɩŋnɩ pɩ-yɔɔ lɛ, ɛpɩzɩɣ nɛ ɛha wezuu maatɛŋ mba payɩ pakaɣ lɩzʋʋ se pɛsɛɣ-ɩ yɔ.—Yoh. 3:16; Roma 6:23; kalɩ 1 Kɔrɛntɩ mba 15:21, 22.

4. Tɔm ndʋ yɔɔ ɖɩkaɣ cosuu tɔm ñʋʋ kʋnɛ kɩ-taa?

⁴ Ðɩpɩzɩɣ nɛ ɖɩpɔzɩ tɔm sakɩyɛ tamaɣ ŋga Ɛsɔ laba se efeziɣ sɩɖaa yɔ kɔ-yɔɔ. Ðɩpɩzɩɣ nɛ ɖɩpɔzɩ se: Pɩtɩla ɛzɩma sɩɖaa fezuu kaɣ ɖɔm? Ðɩkaɣ pɩzʋʋ nɛ ɖɩtɩlɩ ɖɛ-ɛyaa kʋsɔɔlaa alɩwaatʋ ndʋ pefeziɣ-wɛ yɔ? Taa leleŋ weyi ɖeyi ɖeyi sɩɖaa fezuu kaɣ-ɖʋ haʋ? Nɛ ɛzɩma sɩɖaa fezuu wɩlɩɣ-ɖʋ Yehowa sɔɔlɩm, ɛ-lɔŋsɩnɖɛ nɛ e-suuɖu? Iyele nɛ ɖicosi tɔm ndʋ tɩ-yɔɔ kʋɖʋm kʋɖʋm.

5. Ɛbɛ yɔɔ ɖɩpɩzɩɣ nɛ ɖɩyɔɔdɩ se pɩtɩkɛ ɛyaa tɩŋa pakaɣ kpɛndʋʋ nɛ pefezi kpaagbaa?

⁵ Sɩɖaa fezuu alɩwaatʋ taa Yehowa kaɣ tɩŋnʋʋ ɛ-Pɩyalʋ yɔɔ nɛ efezi ɛyaa miiliyɔɔwaa sakɩyɛ. Ɛlɛ ɛkaɣ kpɛndʋʋ pa-tɩŋa nɛ efezi-wɛ kpaagbaa? Ðɩpɩzɩɣ nɛ ɖicosi se aayɩ. Ɛbɛ yɔɔ? Mbʋ pʋyɔɔ yɔ, ye pɛkpɛndɩ ɛyaa sakɩyɛ nɛ pefezi kpaagbaa tɛtʋ yɔɔ yɔ, pɩpɩzɩɣ nɛ pisidi yem yem. Nɛ Yehowa ɛɛlakɩ nabʋyʋ nɛ pisidi yem yem kpa. Ɛnawa se pɩwɛɛ se pɔcɔlɩ wondu camɩyɛ nɛ pɩsa nɛ ɛyaa wɛɛ laŋhɛzɩyɛ taa. (1 Kɔr. 14:33) Yehowa Ɛsɔ kaawɛnɩ lɔŋsɩnɖɛ nɛ suuɖu alɩwaatʋ ndʋ ɛ nɛ Yesu pɔñɔɔzaɣ tɛtʋ pazɩ pazɩ se pʋcɔ nɛ palɩzɩ ɛyaa yɔ. Mbʋ ɖɔɖɔ Yesu kaɣ wɛnʋʋ lɔŋsɩnɖɛ nɛ suuɖu Pɩnzɩ Kudoku Kewiyitu Tɔɔʋ alɩwaatʋ taa; alɩwaatʋ ndʋ ɛ nɛ mba pehiɣ ñʋʋ yabʋ Armaagedɔɔ taa yɔ, pakaɣ ñɔɔzʋʋ tɛtʋ se pamʋ mba pakaɣ fezuu yɔ.

6. Ɛzɩ Tʋma Labʋ 24:15 yɔɔdʋʋ yɔ, mba kaɣ wɛʋ ɛyaa mba Yehowa kaɣ fezuu yɔ pa-taa?

 ⁶ Kɔzɩ kɔzɩ lɛ, pɩkaɣ pɔzʋʋ se mba pehikiɣ ñʋʋ yabʋ Armaagedɔɔ taa yɔ, pawɩlɩ mba pefezi-wɛ yɔ Ɛsɔ Kewiyaɣ tɔm nɛ Yehowa paɣtʋ. Ɛbɛ yɔɔ? Mbʋ pʋyɔɔ yɔ, mba pakaɣ fezuu yɔ, pa-taa sakɩyɛ kaɣ kɛʋ ɛyaa mba “pɛfɛyɩ siɣsiɣ” yɔ. (Kalɩ Tʋma Labʋ 24:15.) Pɩkaɣ pɔzʋʋ se pala lɛɣzɩtʋ sakɩyɛ nɛ pɩsa nɛ Krɩstʋ kɩhɛyʋʋ pʋ-ñʋʋ taa kɩlaʋ wazɩ-wɛ. Maɣzɩ nɛ ŋna tʋmɩyɛ sɔsɔɖɛ nɖɩ pɩkaɣ kɛnʋʋ yɔ: Ɛyaa miiliyɔɔwaa sakɩyɛ mba pataatɩlɩ Yehowa yɔɔ tɔm natʋyʋ yɔ, pɩkaɣ pɔzʋʋ se pawɩlɩ-wɛ Ɛsɔtɔm. Ɛzɩ ɖɩkaɣ kpɛlɩkɩnʋʋ ɛyaa Bibl kʋɖʋm kʋɖʋm ɛzɩ ɖɩlakʋʋ sɔnɔ yɔ? Ɛzɩ ɛyaa mba, pakaɣ wɛʋ agbaa taa se pafalɩsɩ-wɛ nɛ papɩzɩ nɛ pawɩlɩ tɔm ɛyaa lalaa mba pakaɣ fezuu pʋwayɩ yɔ? Pɩwɛɛ se ɖɩɖaŋ nɛ ɖɩna. Tɔm ndʋ ɖɩsɩma yɔ lɛ se Krɩstʋ Pɩnzɩ Kudoku Kewiyitu Tɔɔʋ kaatɛŋ lɛ, ‘patɩlɩɣ [Yehowa] tɛtʋ kpeekpe taa camɩyɛ.’ (Iza. 11:9) Ðɩkaɣ labʋ tʋma sakɩyɛ pɩnzɩ kudoku alɩwaatʋ ndʋ tɩ-taa nɛ taa leleŋ!

7. Ɛbɛ yɔɔ Ɛsɔ samaɣ kaɣ wɩlʋʋ mba pefezi-wɛ yɔ tɔm nɛ sɔɔlɩm?

⁷ Krɩstʋ Pɩnzɩ Kudoku Kewiyitu Tɔɔʋ alɩwaatʋ taa, pɩkaɣ pɔzʋʋ se Yehowa piya nzɩ sɩwɛ tɛtʋ yɔɔ yɔ, sɩ-tɩŋa sɩla lɛɣzɩtʋ nɛ sɩ-tɔm kɛdɩnɩ-ɩ. Pʋyɔɔ lɛ, pa-tɩŋa pakaɣ sɩnʋʋ mba pefezi-wɛ yɔ nɛ sɔɔlɩm se paba ɩla lɛɣzɩtʋ nɛ pɩsa nɛ pawa lɩmaɣza kɩdɛkɛda nɛ kɔɖɛyɩ kɩdɛkɛdʋʋ; nɛ pacaɣ wezuu ɛzɩ Yehowa paɣtʋ pɔzʋʋ yɔ. (1 Pɩy. 3:8) Pɩtʋʋ fɛyɩ se mba pakaɣ-wɛ fezuu yɔ, pakaɣ naʋ se Yehowa samaɣ wɛnɩ tɩ luzuu nɛ keɖiɣni ñaɣʋ pana nɛ kalakɩ lɛɣzɩtʋ se kɔ-tɔm ɛkɛdɩnɩ Yehowa. Nɛ mba pefezaa yɔ pakaɣ sɔɔlʋʋ se pɛkpɛndɩ kɔ-yɔɔ nɛ pɛsɛɛ Yehowa.—Fil. 2:12.

8. Ɛbɛ yɔɔ ɖɩpɩzɩɣ nɛ ɖɩtɔ se ɛyaa mba pakaɣ mʋʋ ɛyaa mba pefezi-wɛ yɔ, pakaɣ tɩlʋʋ pɛ-ɛyaa kʋsɔɔlaa?

⁸ Lɩmaɣza sakɩyɛ yɔɔ lɛ, ɖɩpɩzɩɣ nɛ ɖɩtɔ se ɛyaa mba pakaɣ mʋʋ ɛyaa mba pefezi-wɛ yɔ, pakaɣ tɩlʋʋ pɛ-ɛyaa kʋsɔɔlaa. Iyele nɛ ɖɩyɔɔdɩ lɩmaɣza ana a-taa naalɛ tɔm. Kajalaɣ lɛ, ye ɖɩmaɣzɩ ɛzɩma paatɛm fezuu ɛyaa nɛ pɩɖɛɛ yɔ pɩ-yɔɔ yɔ, ɖɩpɩzɩɣ nɛ ɖɩtɔ se pɩwɛ ɛzɩ Yehowa ɖaɣnɩɣ labʋ ɛyaa mba se papɩzɩ pɔcɔna, pɔyɔɔdɩ, nɛ pamaɣzɩ ɖeyi ɖeyi ɛzɩ paalakʋʋ pʋcɔ nɛ pasɩkɩ yɔ. Tɔzɩ se Yesu kpaɣ sɩm nɛ ɛmaɣzɩnɩ ɖom, nɛ ɛkpaɣ sɩɖaa fezuu nɛ ɛmaɣzɩnɩ ɛzɩma pefeziɣ ɛyʋ nɛ ɖom yɔɔ yɔ. (Mat. 9:18, 24; Yoh. 11:11-13) Alɩwaatʋ ndʋ ɛyaa feŋni ɖom yɔɔ yɔ, pɔcɔŋna nɛ panɩɣ ɖeyi ɖeyi ɛzɩ paawɛʋ pʋcɔ nɛ poɖou yɔ. Pɩtasɩ lɛ, pɔtɔzʋʋ ndʋ pamaɣzaɣ yɔ tɩ-yɔɔ. Iyele nɛ ɖɩyɔɔdɩ Lazaarɩ kɩɖaʋ tɔm. Ɛsɩba nɛ pepimi-i nɛ ɛla kɩyakɩŋ naanza pɩlaʋ taa; ye mbʋ e-tomnaɣ kaapaɣzɩ ɖazʋʋ. Paa mbʋ yɔ, alɩwaatʋ ndʋ Yesu fezi-i yɔ, Maarɩɩ nɛ Maarta patɩlɩ-ɩ kpaagbaa, nɛ pɩtʋʋ fɛyɩ se Lazaarɩ ɖɔɖɔ tɔzɩ pɔ-yɔɔ.—Yoh. 11:38-44; 12:1, 2.

9. Ɛyaa mba pefeziɣ-wɛ yɔ, ɛbɛ yɔɔ paakaɣ wɛnʋʋ maɣzɩm nɛ tomnaɣ ŋga katalɩ pilim yɔ kpaagbaa?

⁹ Yehowa labɩ tamaɣ se ɛyaa mba pakaɣ wɛʋ Krɩstʋ kewiyitu tɔɔʋ tɛɛ yɔ, pa-taa nɔɔyʋ ɛɛkaɣ tɔm se: “Pɩwɩɣ-m.” (Iza. 33:24; Roma 6:7) Ye mbʋ, sɩɖaa mba pakaɣ fezuu yɔ, pakaɣ wɛnʋʋ tomnaɣ ŋga kɛwɛ alaafɩya yɔ. Paa mbʋ yɔ, paakaɣ talʋʋ pilim kpaagbaa. Pɩtɩkɛ mbʋ yɔ, pɩtɩla pɔ-hɔʋ taa ñɩma nɛ pa-taabalaa ɩɩkaɣ-wɛ tɩlʋʋ. Pɩwɛ ɛzɩ ɛyaa kpeekpe kaɣ lɛɣzʋʋ pazɩ pazɩ nɛ patalɩ pilim Krɩstʋ Pɩnzɩ Kudoku Kewiyitu Tɔɔʋ alɩwaatʋ taa yɔ. Pɩnzɩ kudoku tɛŋ pʋcɔ nɛ Yesu pɩsɩnɩ Kewiyaɣ nɛ ɛcɛlɩ ɛ-Caa. Ðɩnɛ  ɛlɛ, Kewiyaɣ tɛm ka-tʋma tɩŋa. A-taa naɖɩyɛ lɛ se kala nɛ ɛyaa talɩ pilim.—1 Kɔr. 15:24-28; Natʋ 20:1-3.

10. Ðoŋ weyi sɩɖaa fezuu kaɣ wɛnʋʋ ñɔ-yɔɔ?

¹⁰ Maɣzɩ nɛ ŋna taa leleŋ weyi pɩkaɣ kɛnʋʋ se ŋmʋ ñɛ-ɛyaa kʋsɔɔlaa yɔ. Taa leleŋ kaɣ yebu se ŋhoŋi yaa ŋwili? Taa leleŋ kaɣ yebu se ŋtee Yehowa samtʋ hendu na? Ða-taa pɩzɩɣ nɛ pɩtɛ se ɖɩkaɣ sɔɔlʋʋ ɖa-Caa sɔɔlɩm tʋ nɛ ɛ-Pɩyalʋ pɩdɩɩfɛyɩ, mbʋ pʋyɔɔ yɔ pefezi ɛyaa.

11. Ɛzɩ tɔm ndʋ Yesu yɔɔdɩ Yohanɛɛsɩ 5:28, 29 taa yɔ tɩwɩlʋʋ yɔ, ɛbɛ mba pacakɩ wezuu ŋgʋ kɩlakɩ nɔɔ kʋɖʋmaɣ nɛ Ɛsɔ paɣtʋ yɔ pakaɣ hiɣu?

¹¹ Maɣzɩ nɛ ŋna taa leleŋ weyi mba pakaɣ fezuu yɔ pɛwɛɣna, alɩwaatʋ ndʋ pɔhɔzʋʋ ɛyʋtʋ kɩbɩndʋ nɛ pañakɩ pana se pacaɣ wezuu ŋgʋ kɩlakɩ nɔɔ kʋɖʋmaɣ nɛ Ɛsɔ paɣtʋ yɔ. Mba palakɩ lɛɣzɩtʋ ndʋ yɔ, pakaɣ-wɛ haʋ waɖɛ se pacaɣ wezuu Paradisuu taa tam. Hɔɔlʋʋ lɛɛkʋ taa lɛ, mba pakaɖɩɣnɩ Ɛsɔ yɔ, paakaɣ-wɛ haʋ waɖɛ se pɛwɛɛkɩ laŋhɛzɩyɛ nɖɩ ɖɩwɛ Paradisuu taa yɔ.—Iza. 65:20; kalɩ Yohanɛɛsɩ 5:28, 29.

12. Ɛzɩma tɩyɛ Yehowa kaɣ wazʋʋ mba payɩ pɛwɛɣ tɛtʋ yɔɔ yɔ?

¹² Ɛsɔ Kewiyitu tɔɔʋ alɩwaatʋ taa, Ɛsɔ samaɣ tɩŋa payɩ kaɣ naʋ se tɔm ndʋ tɩwɛ Aduwa 10:22 taa yɔ, tɩkɛ toovenim. Pɔyɔɔdɩ peeɖe se: “Yehowa wazaɣ pɩsɩɣ ɛyaa ñɩm tɩnaa, nɛ ɛɛsɔzʋʋ kʋñɔŋ nakʋyʋ pɩ-yɔɔ.” (Adu. 10:22, nwt) Yehowa fezuu kiɖeɖeu kaɣ labʋ tʋmɩyɛ Ɛsɔ samaɣ yɔɔ nɛ kapɩsɩ ñɩm tɩnaa fezuu taa, pʋ-tɔbʋʋ se pazɩ pazɩ lɛ kapɩsɩɣ ɛzɩ Krɩstʋ yɔ; nɛ pazɩ pazɩ lɛ kakaɣ talʋʋ pilim. (Yoh. 13:15-17; Efɛz. 4:23, 24) Paa ɖooye kɛwɛɣ nɛ kakpaɣ ɖoŋ, nɛ kɛ-wɛtʋ wɛɣ ɖeu nɛ pɩkɩlɩɣ. Wezuu caɣʋ kaɣ wɛʋ ɖeu alɩwaatʋ ndʋ tɩ-taa siŋŋ! (Yɔɔb 33:25) Ye mbʋ, ye ŋmaɣzɩɣ sɩɖaa fezuu lidaʋ yɔɔ, ɛzɩma pɩpɩzɩɣ nɛ pɩsɩnɩ-ŋ lɛɛlɛɛyɔ?

13. Ɛzɩ Keɣa 138:1-4 yɔɔdʋʋ yɔ, ɛzɩma sɩɖaa fezuu kaɣ-ɖʋ wɩlʋʋ se Yehowa sɩm-ɖʋ camɩyɛ?

¹³ Ɛzɩ ɖɩyɔɔdʋʋ nɛ pɩɖɛɛ yɔ, alɩwaatʋ ndʋ Yehowa feziɣ sɩɖaa yɔ, ɛkaɣ pɩsɩnʋʋ pa-lɩmaɣza, pɛ-ɛyʋtʋ nɛ eyele nɛ pɛkɛ ɛyaa mba paakɛnaa pʋcɔ nɛ pasɩkɩ yɔ. Maɣzɩ nɛ ŋna tʋmɩyɛ sɔsɔɖɛ nɖɩ pɩkɛnaa yɔ. Yehowa sɔɔlɩ-ŋ siŋŋ nɛ ɛsɩm ndʋ ŋmaɣzɩɣ yɔ, ɛzɩma pɩlakɩ-ŋ yɔ, ndʋ ŋyɔɔdʋʋ nɛ mbʋ ŋlakɩ yɔ pɩtɩŋa payɩ nɛ ɛtɔzʋʋ pɩ-yɔɔ. Ye mbʋ, ye pɩwɛɛ se efezi-ŋ yɔ, ɛpɩzɩɣ nɛ ɛpɩsɩnɩ-ŋ ña-lɩmaɣza, ñɛ-wɛtʋ nɛ ɛyʋ weyi ŋŋkɛnaa yɔ kɛlɛʋ yem. Wiyaʋ Daviid kaanawa se Yehowa sɩm ɖa-taa paa weyi camɩyɛ siŋŋ. (Kalɩ Keɣa 138:1-4.) Alɩwaatʋ ndʋ ɖɩtɩlɩɣ se Yehowa sɩm-ɖʋ camɩyɛ yɔ, ɛzɩma pɩlakɩ-ɖʋ?

14. Alɩwaatʋ ndʋ ɖɩmaɣzɩɣ ɛzɩma Yehowa sɩm-ɖʋ camɩyɛ yɔ pɩ-yɔɔ lɛ, ɖoŋ weyi pɩwɛɛ se pɩwɛɛnɩ ɖɔ-yɔɔ?

¹⁴ Alɩwaatʋ ndʋ ɖɩmaɣzɩɣ ɛzɩma Yehowa sɩm-ɖʋ camɩyɛ yɔ pɩ-yɔɔ yɔ, pɩfɛyɩ se sɔɔndʋ ɛkpa-ɖʋ. Ɛbɛ yɔɔ? Tɔzɩ se Yehowa cɔŋnɩ ɖɔ-yɔɔ camɩyɛ siŋŋ. Ða-taa paa weyi mʋ ñɩm ɛ-ɛsɩndaa. Ɛsɩm mbʋ payɩ pɩɩwɛnɩ ɖoŋ ɖɔ-yɔɔ ɖe-wezuu caɣʋ taa yɔ. Pɩhɛzɩɣ ɖa-laŋɩyɛ siŋŋ! Pɩtɩmʋna kpa se pɩlabɩ-ɖʋ se ɖɩwɛ ɖe-ɖeke. Yehowa wɛ ɖɔ-cɔlɔ paa ɛzɩmtaa nɛ ɛñɩnɩɣ se ɛsɩnɩ-ɖʋ.—4 Aw. 16:9.

15. Ɛzɩma sɩɖaa fezuu wɩlɩɣ se Yehowa wɛnɩ lɔŋsɩnɖɛ?

¹⁵ Sɩm kɛ you wonuu sɔsɔʋ ŋgʋ kɩkpaɣ ɛyaa sɔɔndʋ yɔ. Mba Sataŋ wɛnɩ ɖoŋ pɔ-yɔɔ yɔ, palakɩnɩ tʋmɩyɛ you wonuu ŋgʋ nɛ pañɩkɩɣ ɛyaa yɔɔ se palɩɩ pa-taabalaa wayɩ yaa se pala mbʋ pa-maɣmaɣ panawa se pɩfɛyɩ ɖeu yɔ. Ɛlɛ you wonuu ŋgʋ kɩfɛyɩnɩ ɖoŋ  ɖɔ-yɔɔ. Ðɩnawa se ye ɖo-koyindinaa ɩkʋ-ɖʋ yɔ, Yehowa kaɣ-ɖʋ fezuu. (Natʋ 2:10) Ða-taa tɛma se mbʋ payɩ palakɩ yɔ, pɩɩpɩzɩɣ piyele nɛ ɖiyele Yehowa sɛʋ. (Roma 8:35-39) Yehowa wɩlaa se ɛwɛnɩ lɔŋsɩnɖɛ siŋŋ mbʋ pʋyɔɔ yɔ, ɛha-ɖʋ sɩɖaa fezuu lidaʋ! Pʋyɔɔ lɛ, sɔɔndʋ ɛɛkpaɣ-ɖʋ nɛ mba paɖʋʋ Sataŋ nesi nɛ pañazɩɣ-ɖʋ se pakʋʋ-ɖʋ ye ɖɩɩlakɩ mbʋ pɔsɔɔlaa yɔ. Pɩtasɩ lɛ, pɩhaɣ-ɖʋ abalɩtʋ siŋŋ se ɖɩɖɔkɩ ɖe-siɣsiɣ wɛtʋ Yehowa ɛsɩndaa.

16. (a) Tɔm ndʋ pɩwɛɛ se ŋpɔzɩ ña-tɩ? (b) Nɛ ɛzɩma tɩ-yɔɔ cosuu kaɣ-ŋ sɩnʋʋ nɛ ŋtɩlɩ ɛzɩma ŋtaɣ Yehowa liu yɔ?

¹⁶ Ye mba papaɖɩɣ Yehowa yɔ, pɔyɔɔdaa se pakʋʋ-ŋ yɔ, ŋkaɣ taʋ Yehowa liu se ɛkaɣ-ŋ fezuu na? Ɛzɩma ŋpɩzɩɣ nɛ ŋtɩlɩ se ŋkaɣ taʋ Yehowa liu alɩwaatʋ ndʋ tɩ-taa yaa ŋŋtaɣ-ɩ? Nʋmɔʋ nakʋyʋ lɛ se ŋpɔzɩ ña-tɩ se: ‘Lɩmaɣza cikpena wena mankpakɩɣ paa ɖooye yɔ, awɩlɩɣ se mantaɣ Yehowa liu na?’ (Luka 16:10) Ŋpɩzɩɣ nɛ ŋpɔzɩ ña-tɩ ɖɔɖɔ se: ‘Wezuu ŋgʋ mancakɩ yɔ, kɩwɩlɩɣ se mantaɣ liu tamaɣ ŋga Yehowa laba se ɛcɔŋnɩ mon-tomnaɣ yɔɔ kɩcɛyɩm ɖeɖe ye mancalɩɣnɩ ñɩnʋʋ Kewiyaɣ yɔ?’ (Mat. 6:31-33) Ye ŋcosi tɔm pɔzʋʋ mbʋ pɩtɩŋa pɩ-yɔɔ se ɛɛɛ yɔ, pɩwɩlɩɣ se ŋtaɣ liu Yehowa, nɛ ŋkaɣ pɩzʋʋ nɛ ŋkaɖɩnɩ tɩlasɩ nzɩ ŋkaɣ katʋʋ nɛ ɛsɩndaa yɔ.—Adu. 3:5, 6.

17. (a) Ɛzɩma sɩɖaa fezuu wɩlɩɣ se Yehowa wɛ suuɖu? (b) Ɛzɩma ɖɩpɩzɩɣ nɛ ɖɩwɩlɩ se ɖɩwɛnɩ ɛsɩmɩyɛ Yehowa suuɖu yɔɔ?

¹⁷ Yehowa tɛm ɖʋʋ kɩyakʋ nɛ ñɩɣyʋʋ ŋgʋ kɩ-yɔɔ ɛkaɣ ɖɩzʋʋ ɛjaɖɛ kɩdɛkɛdɩyɛ ɖɩnɛ yɔ. (Mat. 24:36) Eelesiɣ suuɖu nɛ ɛɖɩzɩ-ɖɩ nɛ alɩwaatʋ ndʋ tɩtɩtalɩta. Ɛsɔɔlaa kpem se efezi sɩɖaa, ɛlɛ ɛɖʋʋ suuɖu. (Yɔɔb 14:14, 15) Ɛɖaŋaa se alɩwaatʋ kɩbandʋ ɛtalɩ nɛ efezi-wɛ nɛ pacaɣ wezuu. (Yoh. 5:28) Ðɩwɛnɩ lɩmaɣza kɩbana wena a-yɔɔ pɩwɛɛ se ɖɩsɛɛ Yehowa e-suuɖu yɔɔ yɔ. Maɣzɩ nɛ ŋna: Ɛzɩma Yehowa wɛnɩ suuɖu yɔ, pɩhaɣ waɖɛ ɛyaa sakɩyɛ pɩkpɛndɩnɩ ɖa-maɣmaɣ se ‘ɖikpiɖi ɖa-kɩwɛɛkɩm yɔɔ.’ (2 Pɩy. 3:9) Yehowa sɔɔlaa se ɛyaa sakɩyɛ ihiɣ waɖɛ nɛ pacaɣ wezuu maatɛŋ. Ye mbʋ, iyele nɛ ɖɩwɩlɩ se ɖɩwɛnɩ ɛsɩmɩyɛ Yehowa suuɖu yɔɔ. Ɛbɛ pɩwɛɛ se ɖɩla? Pɩwɛɛ se ɖɩñaɣ pana nɛ ɖɩñɩnɩ mba ‘pɛwɛnɩ laŋa kɩbana se pehiɣ wezuu maatɛŋ yɔ,’ nɛ ɖɩsɩnɩ-wɛ nɛ pɔsɔɔlɩ Yehowa nɛ pɛsɛɛ-ɩ. (Tʋma 13:48) Ðɩnɛ ɛlɛ, Yehowa suuɖu kaɣ-wɛ wazʋʋ ɛzɩ ɖa ɖɔɖɔ yɔ.

18. Ɛbɛ yɔɔ pɩcɛyaa se ɖɩwɩlɩ lalaa se ɖɩwɛ suuɖu?

 ¹⁸ Yehowa kaɣ ɖʋʋ suuɖu nɛ ɛɖaŋ se pɩnzɩ kudoku ɩtɛ pʋcɔ nɛ ɖɩtalɩ pilim. Pʋcɔ nɛ alɩwaatʋ ndʋ tɩtalɩ lɛ, Yehowa sɔɔlɩ faaa se ekpeɣ-ɖʋ ɖa-kɩwɛɛkɩm. Ye mbʋ, ɖa ɖɔɖɔ pɩwɛɛ se ɖɩmaɣzɩnɩ ɛ-kɩɖaʋ nɛ ɖɩka ɖa-lɩmaɣza lalaa wɛtʋ kɩbandʋ yɔɔ, nɛ ɖɩwɩlɩ-wɛ suuɖu. Iyele nɛ ɖɩyɔɔdɩ koobu halɩñɩnʋ nɔɔyʋ kɩɖaʋ tɔm. Nɩɣzɛ kʋdɔŋ kaapaɣzɩ cɛyʋʋ ɛ-walʋ siŋŋ alɩwaatʋ natʋyʋ nɛ eyele kediɣzisi wobu. Ɛyɔɔdaa se: “Pɩɩcɛyɩ-m kpem. Ðe-wezuu caɣʋ kaalɛɣzɩ yem tuda, nɛ ɖɩtaatasɩɣ pɩzʋʋ se ɖɩla mbʋ payɩ ɖɩɩsɔɔlaa se ɖɩla yɔ.” Paa mbʋ yɔ, pɩtɩŋa payɩ pɩ-taa, koobu ɛnɛ ɛɛwɩlɩ ɛ-walʋ se ɛwɛ suuɖu. Ɛtaɣaɣ Yehowa liu nɛ etiyele kpa se pitibi-i yɔɔɔ. Ɛzɩ Yehowa yɔ, ɛɛkam ɛ-lɩmaɣza ɛ-walʋ wɛtʋ kɩbandʋ yɔɔ na. Ɛyɔɔdaa se: “Ma-walʋ wɛnɩ wɛtʋ kɩbandʋ nɛ ɛwɛɛ ɛñakɩ pana pazɩ pazɩ se ɛ-yɔɔ ɛcɛ.” Pɩcɛyaa kpem se ɖɩwɩlɩ suuɖu ɖɔ-hɔʋ taa ñɩma yaa ɛgbɛyɛ taa ñɩma mba pɛwɛɛ nɛ pañakɩ pana se pawa kala naayɛ yɔ!

19. Ɛbɛ pɩwɛɛ se ɖɩtɛ ɖa-taa se ɖɩlakɩ?

¹⁹ Alɩwaatʋ ndʋ pacalɩ lɩzʋʋ tɛtʋ yɔ, Yesu nɛ Ɛsɔ tiyiyaa pa-taa kaalabɩ leleŋ. Ɛlɛ maɣzɩ nɛ ŋna ɛzɩma pa-taa kaɣ labʋ leleŋ alɩwaatʋ ndʋ panaɣ se tɛtʋ suni ɛyaa mba yɔ, patalɩ pilim nɛ pɔsɔɔlɩ Yehowa nɛ pɛsɛɣ-ɩ yɔ. Maɣzɩ nɛ ŋna taa leleŋ weyi ɩ-taa mba pakaɣ kpaʋ ɛsɔdaa yɔ pɛwɛɣ yɔ, alɩwaatʋ ndʋ panaɣ se pa-tʋmɩyɛ wɛɛ nɛ ɖɩwazɩɣ ɛyaa yɔ. (Natʋ 4:4, 9-11; 5:9, 10) Maɣzɩ se ŋwɛ wezuu alɩwaatʋ ndʋ tɩ-taa taa leleŋ ɛsɩtɛɣlɩm lɛɣzɩ kʋñɔŋ ɛsɩtɛɣlɩm yɔ, alɩwaatʋ ndʋ kʋdɔŋ, wɩzasɩ nɛ sɩm patɩtasɩ wɛʋ yɔ. (Natʋ 21:4) Pʋcɔ nɛ pɩtalɩ mbʋ lɛ, tɛ ña-taa se ŋmaɣzɩɣnɩ ña-Caa sɔɔlɩm tʋ, lɔŋsɩnɖʋ nɛ suuɖu tʋ Yehowa. Ye ŋlakɩ mbʋ yɔ, ŋkaɣ wɛʋ taa leleŋ taa paa tɩlasɩ nzɩ ŋkatɩɣ yɔ. (Yak. 1:2-4) Pɩwɛɛ se ɖɩsɛɛ Yehowa, tamaɣ ŋga ɛlaba se ‘ɛkaɣ fezuu ɛyaa’ yɔ kɔ-yɔɔ!—Tʋma 24:15.