1-2. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

YE PETIYINI-Ŋ huyuu nakʋyʋ nɛ kɩ-taa lɛ, paɖʋ wonuu ŋgʋ pɩpɔzʋʋ-ŋ siŋŋ yɔ, ɛlɛ kɩtɩtalɩ alɩwaatʋ ndʋ ŋŋmaɣzaa yɔ tɩ-yɔɔ, ɛzɩma pɩlakɩ-ŋ? Pɩhaɣ-ŋ nɩɣzɛ na? Pɩtɩla pɩlakɩ-ŋ ɛzɩ Aduwa 13:12 yɔɔdʋʋ yɔ. Pɔyɔɔdɩ peeɖe se: “Lidaʋ ŋgʋ potuzaa yɔ, kɩɖʋʋ ciyam kʋñɔŋ.” Ɛlɛ, ye ŋnɩwa se lɩmaɣza kɩbana naayɛ yɔɔ huyuu ŋgʋ kɩtɩtalɩ alɩwaatʋ ndʋ ŋŋmaɣzaa yɔ tɩ-yɔɔ yɔ, ɛzɩma pɩlakɩ-ŋ? Ðɩnɛ ɛlɛ, pɩtɩla ŋkaɣ ɖʋʋ suuɖu nɛ ŋtisi faaa nɛ ŋɖaŋ.

² Tɔm ñʋʋ kʋnɛ kɩ-taa, ɖɩkaɣ naʋ Bibl paɣtʋ kila naayɛ, wena apɩzɩɣ asɩnɩ-ɖʋ nɛ ‘ɖɩwɛɛ ɖaŋʋʋ yɔɔ’ yɔ. (Mik. 7:7; nwt) Pʋwayɩ lɛ, ɖɩkaɣ naʋ hɔɔlɩŋ naalɛ weyi ɩ-taa pɩpɔzʋʋ se ɖɩɖʋ suuɖu nɛ ɖɩɖaŋ Yehowa yɔ. Kɛdɛzaɣ ɖeɖe lɛ, ɖɩkaɣ naʋ wazasɩ nzɩ sɩɖaŋ mba petisiɣ faaa se paɖaŋ Yehowa yɔ.

3. Paɣtʋ kiɖe nɖɩ ɖɩwɛ Aduwa 13:11 taa yɔ, tɔm ndʋ yɔɔ ɖɩñɩkɩɣ niye?

³ Aduwa 13:11 wɩlɩɣ-ɖʋ mbʋ pʋyɔɔ pɩpɔzʋʋ se ɖɩwɛɛ suuɖu yɔ. Pɔyɔɔdɩ peeɖe se: “Ñɩm mbʋ pacazɩ lɛɛ lɛɛ yɔ, pɩpasɩɣ; weyi ɛcazɩɣ nɛ e-nee [yaa pazɩ pazɩ] yɔ, ɛkpazɩɣ huuye.” Ŋpɩzaa nɛ ŋna paɣtʋ kiɖe nɖɩ ɖɩwɛ mayaɣ ŋga ka-taa yɔ? Ɛyʋ weyi ɛwɛnɩ lɔŋsɩnɖɛ yɔ, ɛɛlakɩ nabʋyʋ lɛ, ɛtɩlɩɣ labʋ nɛ ɛɖʋʋ suuɖu; nɛ pɩkaɣ lʋlʋʋ pee kɩbana.

4. Paɣtʋ kiɖe nɖɩ ɖɩwɛ Aduwa 4:18 taa yɔ, tɔm ndʋ yɔɔ ɖɩñɩkɩɣ niye?

⁴ Aduwa 4:18 heyiɣ-ɖʋ se: “Ɛyaa siɣsiɣ tɩnaa nʋmɔʋ ñɩlɩsɩɣ ɛzɩ mintʋsʋʋ yɔ, kɩɖɔŋ paɣlʋʋ nɛ kɩñɩlɩsɩɣ nɛ pɩkɔɔ pɩtalɩ wɩsɩ taa.” Tɔm ndʋ, titukuuni nʋmɔʋ ŋgʋ kɩ-yɔɔ Yehowa tɩŋɩɣna nɛ ekuluu ɛ-tamaɣ yɔɔ nɛ ɛwɩlɩɣ ɛ-samaɣ yɔ,  pʋ-tɔbʋʋ lɛ se ɛlakɩ mbʋ pazɩ pazɩ. Mayaɣ ŋga kapɩzɩɣ kasɩnɩ-ɖʋ ɖɔɖɔ nɛ ɖɩtɩlɩ ɛzɩma Krɩstʋ tʋ nɔɔyʋ lakɩ lɛɣzɩtʋ e-wezuu caɣʋ taa nɛ ɛñɔtʋʋnɩ Yehowa yɔ. Pʋcɔ nɛ ɛyʋ nɔɔyʋ ñɔtɩnɩ Yehowa lɛ, pɩkpakɩɣ alɩwaatʋ. Ye ɖɩkpɛlɩkɩɣ Ɛsɔtɔm camɩyɛ, nɛ ɖɩɖɔŋ tɩ-taa lɔŋ tasʋʋ nɛ lɔŋ weyi Yehowa ɛgbɛyɛ tasɩɣ-ɖʋ yɔ ɩ-yɔɔ yɔ, pazɩ pazɩ lɛ ɖɩkaɣ wɛnʋʋ wɛtʋ ndʋ Krɩstʋ wɛna yɔ. Pɩtasɩ lɛ, ɖɩkaɣ tɩlʋʋ Ɛsɔ camɩyɛ nɛ pɩkpaɖɩ. Iyele nɛ ɖɩna kɩɖaʋ ŋgʋ Yesu kpaɣaa nɛ ɛlɩzɩnɩ tɔm ndʋ tɩ-taa yɔ.

5. Kɩɖaʋ ŋgʋ Yesu kpaɣaa nɛ ɛwɩlɩnɩ ɛzɩma ɛyʋ ɖɛɣnɩ ɛsɩndaa fezuu taa pazɩ pazɩ yɔ?

⁵ Yesu tɩŋnɩ kɩɖaʋ nakʋyʋ yɔɔ nɛ ɛwɩlɩ ɛzɩma Kewiyaɣ tɔm ndʋ ɖisusuu yɔ, tɩwɛ ɛzɩ ɖomaɣ cikpelaɣ ŋga kapaɣlɩɣ pazɩ pazɩ laŋa kɩbana tɩnaa taa yɔ. Ɛyɔɔdaa se: “Ðomaɣ pee ñɔʋ nɛ apaɣlɩɣ—ɛlɛ [ɖomaɣ ɖuyu] ɛɛsɩŋ ɛzɩma pɩlakɩ yɔ. Tɛtʋ maɣmaɣ lʋlʋʋ pee pazɩ pazɩ, kajalaɣ lɛ hayʋʋ, pʋwayɩ lɛ lɔyʋʋ, nɛ kɛdɛzaɣ lɛ pee wena apɩwa yɔ.” (Mark. 4:27, 28) Suwe Yesu ñɩnaɣ yɔɔdʋʋ? Ɛɛwɛɛ nɛ ɛwɩlɩɣ se ɛzɩma ɖomaɣ ñɔʋ nɛ kapaɣlɩɣ pazɩ pazɩ yɔ, mbʋ ɖɔɖɔ ɛyʋ weyi ɛmʋʋ Kewiyaɣ tɔm yɔ, ɛɖɛɣnɩ ɛsɩndaa fezuu taa pazɩ pazɩ. Kɩɖaʋ nakʋyʋ yɔ: Alɩwaatʋ ndʋ ɖe-Bibl kpɛlɩkɩyaa ñɔtʋʋnɩ Yehowa yɔ, ɖɩpaɣzɩɣ naʋ lɛɣzɩtʋ kɩbandʋ sakɩyɛ ndʋ palaba yɔ. (Efɛz. 4:22-24) Ɛlɛ pɩwɛɛ se ɖɩtɔzɩ se Yehowa lakɩna nɛ ɖomaɣ cikpelaɣ ŋga kapaɣlɩɣ.—1 Kɔr. 3:7.

6-7. Ɛzɩma Yehowa kpaɣnaa nɛ ɛlɩzɩ tɛtʋ yɔ, ɛbɛ pɩkpɛlɩkɩɣ-ɖʋ?

⁶ Mbʋ payɩ Yehowa lakɩ yɔ pɩ-taa, ɛɖʋʋ suuɖu nɛ ɛkpakɩɣ alɩwaatʋ ndʋ pɩpɔzʋʋ yɔ nɛ ɛlakɩnɩ ɛ-tʋmɩyɛ. Ɛlakɩ mbʋ se pɩkɔnɩ ɛ-hɩɖɛ samtʋ nɛ pɩwazɩ ɛyaa lalaa ɖɔɖɔ. Iyele nɛ ɖɩna ɛzɩma Yehowa ñɔɔzɩ tɛtʋ pazɩ pazɩ se ɛyaa ɩpɩzɩ nɛ pacaɣ tɩ-yɔɔ yɔ.

⁷ Bibl yɔɔdaɣ ɛzɩma Yehowa lɩzɩ tɛtʋ yɔ pɩ-tɔm lɛ, kɩyɔɔdaa se esiɣ “tɩ-kamasɩ,” “ti-tigila” nɛ “tɩ-kaaʋ.” (Yɔɔb 38:5, 6) Halɩ ɛkpaɣ alɩwaatʋ nɛ ɛmaɣzɩ tʋmɩyɛ nɖɩ ɛlaba yɔ ɖɩ-yɔɔ. (Kiɖe 1:10, 12) Maɣzɩ nɛ ŋna ɛzɩma pɩɩlabɩ Ɛsɔ tiyiyaa alɩwaatʋ ndʋ pana  wondu kɩfatʋ ndʋ payɩ Yehowa lɩzaa yɔ. Pɩtʋʋ fɛyɩ se pa-taa kaalabɩ leleŋ siŋŋ. Ɛzɩma pa-taa kaalabɩ leleŋ yɔ, piiyeba nɛ papaɣzɩ ‘mɛyʋʋ.’ (Yɔɔb 38:7) Ɛbɛ pɩkpɛlɩkɩɣ-ɖʋ? Yehowa kpaɣ pɩnzɩ kudokiŋ sakɩyɛ nɛ ɛlɩzɩ tɛtʋ, tɩɩnzɩ, nɛ mbʋ payɩ pɩwɛ wezuu yɔ, ɛlɛ ɛcɔnɩ mbʋ payɩ ɛlɩzaa yɔ lɛ, ɛyɔɔdɩ se: “Pɩɩwɛ ɖeu pɩdɩɩfɛyɩ.”—Kiɖe 1:31.

8. Ɛbɛ ɖɩkaɣ naʋ lɛɛlɛɛyɔ?

⁸ Ɛzɩ ɖɩnaʋ kɩɖaŋ weyi ɩɖɛwa yɔ ɩ-taa yɔ, ɖɩpɩzɩɣ nɛ ɖɩna paɣtʋ kila sakɩyɛ wena añɩkɩɣ niye se pɩcɛyaa se ɖɩwɛɛ suuɖu yɔ Ɛsɔtɔm taa. Lɛɛlɛɛyɔ, ɖɩkaɣ naʋ hɔɔlɩŋ naalɛ weyi ɩ-taa pɩpɔzʋʋ se ɖitisi faaa nɛ ɖɩɖaŋ Yehowa yɔ.

9. Hɔɔlɩŋ weyi ɩ-taa pɩpɔzʋʋ se ɖɩɖaŋ Yehowa yɔ ɩ-taa nakʋyʋ lɛ ŋgʋ?

⁹ Pɩpɩzɩɣ nɛ pɩpɔzɩ se ɖɩɖaŋ nɛ Yehowa cosi ɖa-adɩma yɔɔ. Alɩwaatʋ ndʋ ɖɩtɩmɩɣnɩ Yehowa nɛ ɖɩpɔzʋʋ-ɩ se ɛha-ɖʋ ɖoŋ nɛ ɖɩlʋbɩnɩ kaɖɛ naɖɩyɛ yaa se ɛsɩnɩ-ɖʋ nɛ ɖɩwa ɛjandʋ natʋyʋ yɔ, pɩpɩzɩɣ nɛ pɩlabɩ-ɖʋ ɛzɩ sɩnʋʋ mbʋ ɖɩñɩnɩɣ yɔ pɩwɛɛ nɛ pɩkpakɩɣ alɩwaatʋ nɛ pɩcɛzɩɣ ɛzɩma ɖɩɩmaɣzaa yɔ. Ɛbɛ yɔɔ Yehowa eecosuu adɩma wena ɖɩlakɩ yɔ a-tɩŋa a-yɔɔ kpaagbaa?

10. Ɛbɛ yɔɔ pɩpɔzʋʋ se ɖɩɖʋ suuɖu nɛ ɖɩɖaŋ Yehowa nɛ ecosi ɖa-adɩma yɔɔ?

¹⁰ Yehowa welisiɣ adɩma wena ɖɩlakɩ yɔ camɩyɛ. (Keɣa 65:19) Ɛ-ɛsɩndaa lɛ, adɩma wena ɖɩlakɩnɩ ɖa-laŋɩyɛ pilim yɔ, awɩlɩɣ kpayɩ kpayɩ se ɖɩwɛnɩ tisuu. (Ebr. 11:6) Pɩtasɩ lɛ, alɩwaatʋ ndʋ Yehowa naɣ se ɖɩtɛm ɖa-taa se ɖɩcakɩ wezuu nɛ pɩla nɔɔ kʋɖʋmaɣ nɛ ɖa-adɩma, nɛ ɖɩtɛm ɖa-taa ɖɔɖɔ se ɖɩlakɩ ɛ-sɔɔlɩm yɔ, pɩkɛdɩɣnɩ-ɩ siŋŋ. (1 Yoh. 3:22) Pʋyɔɔ lɛ, alɩwaatʋ ndʋ ɖɩpɔzʋʋ Yehowa se ɛsɩnɩ-ɖʋ nɛ ɖiyele labʋ mbʋ pɩɩkɛdɩɣnɩ-ɩ yɔ, pɩpɩzɩɣ nɛ pɩpɔzɩ se ɖɩɖʋ suuɖu nɛ ɖɩla mbʋ payɩ ɖɩpɩzɩɣ yɔ nɛ ɖɩlɛɣzɩ. Yesu sɩnɩ-ɖʋ nɛ ɖɩnɩɩ pɩ-taa se adɩma wena ɖɩlakɩ yɔ, pɩpɩzɩɣ nɛ pɩla se Yehowa eecosuu a-taa naayɛ yɔɔ kpaagbaa. Ɛyɔɔdaa se: “Ɩwɛɛ pɔzʋʋ yɔɔ, nɛ pakaɣ-mɩ haʋ; ɩwɛɛ ñɩnʋʋ yɔɔ, nɛ ɩkaɣ hiɣu; ɩwɛɛ kɔtʋʋ yɔɔ, nɛ pakaɣ-mɩ tʋlʋʋ; mbʋ pʋyɔɔ yɔ weyi ɛpɔzʋʋ yɔ, ɛmʋʋ; nɛ weyi ɛñɩnɩɣ yɔ, ehikiɣ; nɛ weyi ɛkɔtʋʋ yɔ, pakaɣ-ɩ tʋlʋʋ.” (Mat. 7:7, 8) Ye ɖɩɖɔm lɔŋ tasʋʋ mbʋ pɩ-yɔɔ nɛ ‘ɖɩwɛɛ adɩma yɔɔ tam’ yɔ, ɖa-taa pɩzɩɣ nɛ pɩtɛ se ɖa-Caa weyi ɛwɛ ɛsɔdaa yɔ, ewelisiɣni-ɖʋ nɛ ɛkaɣ cosuu ɖa-adɩma yɔɔ.—Kol. 4:2.

11. Alɩwaatʋ ndʋ pɩlakɩ-ɖʋ ɛzɩ Ɛsɔ eecosuu ɖa-adɩma naayɛ yɔɔ lɔŋ yɔ, ɛzɩma tɔm ndʋ tɩwɛ Ebree mba 4:16 taa yɔ tɩsɩɣnɩ-ɖʋ?

¹¹ Paa pɩwɛ ɛzɩ Yehowa eecosuu ɖa-adɩma naayɛ yɔɔ lɔŋ yɔ, ɛlabɩ-ɖʋ tamaɣ se ecosuu ɖa-adɩma yɔɔ “alɩwaatʋ kɩbandʋ yɔɔ.” (Kalɩ Ebree mba 4:16.) Pʋyɔɔ pɩtɩpɔzɩ kpa se ɖɩkʋ Yehowa tɔm, ye nabʋyʋ ɛɛlakɩ lɛɛ lɛɛ ɛzɩ ɖɩɩmaɣzʋʋ yɔ. Kɩɖaʋ nakʋyʋ yɔ: Pɩlakɩ pɩnzɩ sakɩyɛ yɔ, ɛyaa sakɩyɛ wɛɛ nɛ patɩmɩɣ se Ɛsɔ Kewiyaɣ eyele nɛ ɛjaɖɛ kɩdɛkɛdɩyɛ ɖɩnɛ ɖɩsɩɩ tɩnaɣ. Halɩ Yesu yɔɔdaa se pɩpɔzʋʋ se ɖɩtɩmɩ tɔm ndʋ tɩ-yɔɔ. (Mat. 6:10) Ɛlɛ ye ɛyʋ nɔɔyʋ eyeba nɛ tisuu mbʋ ɛwɛnɩ Ɛsɔ yɔɔ yɔ pɩhɛɛ, mbʋ pʋyɔɔ yɔ ɛjaɖɛ tɛm tɩkɔɔ alɩwaatʋ ndʋ ɛyaa kaamaɣzaa se tɩkɔŋ yɔ tɩ-yɔɔ yɔ, pɩkɛɣnɩ kɩmɛlɛndʋ siŋŋ. (Hab. 2:3; Mat. 24:44) Pɩkɛɣnɩ lɔŋsɩnɖɛ se ɖiwolo pɩ-yɔɔ nɛ ɖɩɖaŋɩɣ Yehowa nɛ ɖɩtɩmɩɣnɩ-ɩ nɛ tisuu. Ɛjaɖɛ tɛm kaɣ kɔm alɩwaatʋ kɩbandʋ yɔɔ ɖeyi ɖeyi; mbʋ pʋyɔɔ yɔ Yehowa tɛm lɩzʋʋ ‘kɩyakʋ nɛ ñɩɣyʋʋ’ ŋgʋ kɩ-yɔɔ tɩkaɣ kɔm yɔ. Nɛ kɩyakʋ ŋgʋ, kɩkaɣ kɛʋ alɩwaatʋ kɩbandʋ ɖa-tɩŋa.—Mat. 24:36; 2 Pɩy. 3:15.

12. Kɔzɩ kɔzɩ alɩwaatʋ ndʋ taa pɩpɩzɩɣ nɛ pɩpɔzɩ se ɖɩɖʋ suuɖu?

¹² Pɩpɩzɩɣ nɛ pɩpɔzɩ se ɖɩɖʋ suuɖu nɛ ɖɩɖaŋ  nɛ pɔcɔnɩ mulum lakasɩ nasɩyɩ ɖeɖe. Ɛjaɖɛ ɖɩnɛ ɖɩ-yɔɔ, ɖoŋ ɖoŋ lɛ ɛyaa lakɩ kañatʋ lakasɩ mba pa nɛ wɛ patɩkaa kʋzʋʋ piliŋa, tomnaɣ tɔlɩm, kʋnʋŋ, cejewiye yaa ɛjaɖɛ yɔ. Ɛyaa lalaa lɛ, palakɩ-wɛ kañatʋ mbʋ pʋyɔɔ yɔ, pɛwɛnɩ tomnaɣ yɔɔ ɛjandʋ yaa maɣzɩm taa ɛjandʋ. Pomuli Yehowa samaɣ taa ɛyaa sakɩyɛ mbʋ pʋyɔɔ yɔ, petisiɣ Bibl yɔɔ. Alɩwaatʋ ndʋ palakɩ-ɖʋ kañatʋ ndʋ yɔ, pɩwɛɛ se ɖɩtɔzɩ tɔm ndʋ Yesu yɔɔdaa yɔ tɩ-yɔɔ. Ɛyɔɔdaa se: “Weyi ɛɖɔkɩ ɛ-laŋɩyɛ nɛ pɩkɔɔ pɩtɛ yɔ, ɛnʋ kaɣnɩ hiɣu ñʋʋ yabʋ.” (Mat. 24:13) Ɛlɛ, ye ŋnɩwa se ɛgbɛyɛ taa tʋ nɔɔyʋ labɩ kɩwɛɛkɩm sɔsɔm nabʋyʋ, ɛbɛ pɩpɔzʋʋ se ŋla? Ɛgbɛyɛ taa ɛzʋtʋyaa nɩɣ tɔm ndʋ nɛ pɩtɛ lɛ, ŋkaɣ-wɛ yebu se pɔcɔnɩ tɔm ndʋ ti-ɖeɖe nɛ ŋɖʋ suuɖu nɛ ŋɖaŋ se pakaɣ cɔnʋʋ tɔm ndʋ ti-ɖeɖe ɛzɩ Yehowa sɔɔlʋʋ yɔ? Alɩwaatʋ ndʋ ɛyʋ nɔɔyʋ lakɩ kɩwɛɛkɩm sɔsɔm yɔ, ɛbɛ pɩpɩzɩɣ nɛ pɩpɔzɩ se ɛzʋtʋyaa ɩla?

13. Alɩwaatʋ ndʋ nɔɔyʋ lakɩ kɩwɛɛkɩm sɔsɔm nabʋyʋ yɔ, ɛbɛ Yehowa sɔɔlaa se ɛgbɛyɛ taa ɛzʋtʋyaa ɩla?

¹³ Alɩwaatʋ ndʋ ɛgbɛyɛ taa ɛzʋtʋyaa nɩɣ se ɛgbɛyɛ taa tʋ nɔɔyʋ labɩ kɩwɛɛkɩm sɔsɔm nabʋyʋ yɔ, patɩmɩɣnɩ Yehowa nɛ pɔpɔzʋʋ-ɩ “lɔŋsɩnɖɛ nɖɩ ɖɩlɩnɩ hayo yɔ” se pɩsa nɛ pɛwɛɛnɩ lɩmaɣza wena ɛwɛnɩ wɛtʋ ndʋ tɩ-yɔɔ yɔ. (Yak. 3:17) Pa-kaɖʋwa lɛ se ye pɩsaŋ yɔ, pasɩnɩ kɩwɛɛkɩm laɖʋ nɛ palɩzɩ-ɩ “ɛ-nʋmɔʋ kilebuu taa.” (Yak. 5:19, 20) Pɩtasɩ lɛ, pɔsɔɔlaa se pala mbʋ payɩ papɩzɩɣ yɔ nɛ pakandɩyɩ ɛgbɛyɛ yɔɔ nɛ pɛhɛzɩ mba kɩwɛɛkɩm mbʋ pɩkɔnɩ laŋwɛɛkɩyɛ yɔ pa-laŋa. (2 Kɔr. 1:3, 4) Alɩwaatʋ ndʋ ɛgbɛyɛ taa ɛzʋtʋyaa nɩɣ se nɔɔyʋ labɩ kɩwɛɛkɩm sɔsɔm nabʋyʋ yɔ, pɩwɛɛ se kajalaɣ lɛ, pañaɣ pana nɛ patɩlɩ mbʋ pɩlabɩ ɖeyi ɖeyi yɔ, nɛ pɩpɩzɩɣ nɛ pɩkpaɣ-wɛ alɩwaatʋ. Pʋwayɩ lɛ pɩwɛɛ se patɩmɩ nɛ patɩŋnɩ Masɩ yɔɔ nɛ patasɩ kɩwɛɛkɩm laɖʋ lɔŋ nɛ pɔhɔ ɛ-nɩŋgbaŋʋʋ “ɛzɩ pɩmʋnʋʋ ɖeyi ɖeyi yɔ.” (Yer. 30:11; nwt) Paa ɛzʋtʋyaa ɩɩɖaŋɩɣ se alɩwaatʋ sakɩyɛ ɛkɩlɩ ɖɛʋ yɔ, paakɩlɩɣ kpedesuu nɛ pakpakɩɣ lɩmaɣza lɛɛ lɛɛ. Alɩwaatʋ ndʋ ɛgbɛyɛ taa ɛzʋtʋyaa cɔŋnɩ tɔm ɖeɖe camɩyɛ yɔ, pɩwazɩɣ ɛgbɛyɛ koobiya tɩŋa siŋŋ. Ɛlɛ paa ɛzʋtʋyaa ɩcɔnɩ tɔm ɖeɖe ɛzɩ pɩmʋnaʋ yɔ, ɛyaa mba kɩwɛɛkɩm laɖʋ lakasɩ tukunaa yɔ, papɩzɩɣ nɛ pɛwɛɛ laŋwɛɛkɩyɛ taa mbʋ. Ye ŋwɛ wɛtʋ ndʋ tɩ-taa yɔ, ɛbɛ ŋpɩzɩɣ ŋla nɛ siziŋ weyi ŋnɩɣ yɔ ɩpasɩ?

14. Ye Krɩstʋ tʋ nɔɔyʋ ɛɖʋ-ŋ ɖɩwɩzɩyɛ siŋŋ yɔ, Bibl taa kɩɖaʋ ŋgʋ pɩzɩɣ nɛ kɩsɩnɩ-ŋ nɛ ŋɖɔkɩ ña-tɩ?

 ¹⁴ Wiɖiyi ɛyʋ nɔɔyʋ, halɩ pɩtɩla koobu nɔɔyʋ labɩ nabʋyʋ nɛ pɩha-ŋ laŋwɛɛkɩyɛ siŋŋ na? Ŋpɩzɩɣ nɛ ŋna kɩɖaŋ kɩbaŋ Ɛsɔtɔm taa; kɩɖaŋ ɛnɩ ɩwɩlɩɣ-ɖʋ ɛzɩma ɖɩɖaŋ Yehowa nɛ ɛcɔnɩ tɔm ɖeɖe yɔ. Kɩɖaʋ nakʋyʋ yɔ: Paa Yosɛɛfʋ ɖalaa kaamuli-i yɔ, ɛtɩha nʋmɔʋ se pa-kɩwɛɛkɩm eyele nɛ ɛmʋ pana. Ɛlɛ ewobi pɩ-yɔɔ nɛ ɛka ñʋʋ nɛ Yehowa sɛtʋ, nɛ ɛlɛ wazɩ-ɩ mbʋ pʋyɔɔ yɔ ɛɖʋ suuɖu nɛ ɛɖɔkɩ ɛ-laŋɩyɛ. (Kiɖe 39:21) Alɩwaatʋ wɛɛ nɛ tɩɖɛɣ lɛ, Yosɛɛfʋ pɩzaa nɛ ɛsɔɔ laŋwɛɛkɩyɛ nɖɩ ɖɩ-taa ɛwɛɛ yɔ ɖɩ-yɔɔ, nɛ ɛna ɛzɩma Yehowa wazɩ-ɩ yɔ. (Kiɖe 45:5) Ɛzɩ Yosɛɛfʋ yɔ, ye ɖɩñɔtʋʋnɩ Yehowa nɛ ɖɩɖaŋɩɣ-ɩ se ɛcɔnɩ mulum lakasɩ ɖeɖe alɩwaatʋ kɩbandʋ yɔɔ yɔ, ɖihikiɣ laŋɩyɛ hɛzʋʋ.—Keɣa 7:18; 72:28.

15. Ɛbɛ sɩnɩ koobu halɩñɩnʋ nɔɔyʋ nɛ ɛsɔɔ mulum lakasɩ nzɩ palabɩ-ɩ yɔ sɩ-yɔɔ?

¹⁵ Toovenim taa lɛ, pɩtɩkɛ mulum lakasɩ tɩŋa kɛnɩ mulum lakasɩ sɔsɔsɩ ɛzɩ nzɩ paalabɩ Yosɛɛfʋ yɔ. Ɛlɛ lakasɩ kɩdɛkɛdɩsɩ nasɩyɩ pɩzɩɣ nɛ sɩkɔnɩ-ɖʋ laŋwɛɛkɩyɛ. Alɩwaatʋ ndʋ tɔm kɔŋ ɖa nɛ nɔɔyʋ ɖɛ-hɛkʋ taa yɔ, paa ɛyʋ ɛnʋ ɛkɛ Yehowa sɛyʋ yaa ɛtɩkɛ yɔ, ye ɖɩlakɩnɩ Bibl paɣtʋ kila tʋmɩyɛ yɔ, pɩwazɩɣ-ɖʋ. (Fil. 2:3, 4) Iyele nɛ ɖɩna kɩɖaʋ nakʋyʋ. Koobu halɩñɩnʋ nɔɔyʋ sʋ laŋwɛɛkɩyɛ taa siŋŋ alɩwaatʋ ndʋ ɛnɩwa se ɛ-tʋmɩyɛ taa tʋ nɔɔyʋ wɛɛ nɛ ɛyɔɔdʋʋ ɛ-yɔɔ tɔm kɩdɛkɛdɩtʋ ndʋ tɩtɩkɛ toovenim yɔ ɛyaa lalaa cɔlɔ yɔ. Mbʋ ɛzɩ koobu halɩñɩnʋ ɛnʋ eekpedesaa nɛ ɛcɔnɩ tɔm ndʋ ti-ɖeɖe lɛ, ɛkpaɣ alɩwaatʋ nɛ ɛmaɣzɩ Yesu kɩɖaʋ yɔɔ. Alɩwaatʋ ndʋ patʋ Yesu yɔ, ɛtɩtʋʋ nɔɔyʋ pi-lone taa. (1 Pɩy. 2:21, 23) Ɛmaɣzɩ Yesu kɩɖaʋ yɔɔ lɛ, ɛkpaɣ lɩmaɣzɩyɛ se eyeki tɔm ndʋ. Pʋwayɩ, ɛkɔm nɛ ɛnɩɩ se ɛ-tʋmɩyɛ taa taabalʋ ɛnʋ ɛwɛɛ nɛ ɛlʋkɩnɩ kʋdɔŋ sɔsɔʋ nakʋyʋ, nɛ ɛwɛ nɩɣzɛ taa siŋŋ. Peeɖe koobu halɩñɩnʋ ɛnʋ ɛkɔ tɔm ñʋʋ se pɩtɩla, ɛ-tʋmɩyɛ taa taabalʋ ɛnʋ ɛtaatɩlɩ pʋcɔ nɛ ɛyɔɔdɩ tɔm ndʋ. Pʋyɔɔ lɛ, koobu halɩñɩnʋ ɛnʋ ɛ-taa labɩ leleŋ siŋŋ se ɛɖʋ suuɖu nɛ ɛɖɔkɩ ɛ-tɩ kañatʋ lakasɩ nzɩ sɩ-taa, nɛ ehiɣ laŋhɛzɩyɛ.

16. Ye ŋwɛɛ nɛ ŋkatɩɣ mulum lakasɩ nasɩyɩ yɔ, ɛbɛ pɩzɩɣ nɛ pɩhɛzɩ ña-laŋɩyɛ? (1 Pɩyɛɛrɩ 3:12)

¹⁶ Ye ŋwɛɛ nɛ ŋɖɔkʋʋ ña-laŋɩyɛ mulum  lakasɩ nasɩyɩ taa, yaa nabʋyʋ eyeba nɛ ŋwɛɛ laŋwɛɛkɩyɛ taa yɔ, tɔzɩ se Yehowa ñɔtɩnɩ “laŋa wena apɛlaa yɔ.” (Keɣa 33:19) Ɛsɔɔlɩ-ŋ mbʋ pʋyɔɔ yɔ, ŋɖʋʋ suuɖu nɛ ŋkɛzɩɣ ña-sʋʋtʋ nɛ ŋsʋkɩ-ɩ. (Keɣa 54:23) Ɛnʋ kɛnɩ tɛtʋ kpeekpe Tɔm Hʋyʋ. Ɛnaɣ mbʋ payɩ pɩlakɩ yɔ. (Kalɩ 1 Pɩyɛɛrɩ 3:12.) Alɩwaatʋ ndʋ ŋkatɩɣ kala wena ŋŋpɩzɩɣ se ŋcɔnɩ a-ɖeɖe yɔ, ŋtisiɣ faaa se ŋɖaŋɩ-ɩ?

17. Ɛzɩ pɔyɔɔdʋʋ Izaayii 30:18 taa yɔ, lidaʋ ŋgʋ Yehowa haɣ-ɖʋ?

¹⁷ Piileɖiɣ lɛ, ɖa-Caa weyi ɛwɛ ɛsɔdaa yɔ, ɛkaɣ tɩŋnʋʋ e-Kewiyaɣ yɔɔ nɛ ɛwazɩ-ɖʋ siŋŋ. Izaayii 30:18 yɔɔdʋʋ se: “[Yehowa] ɖaŋaa se ɛna mɩ-pʋtɔdɩyɛ, nɛ ɛkʋyʋʋ se ekpeɣ-mɩ, mbʋ yɔ [Yehowa] kɛ Ɛsɔ weyi ɛhʋʋ tɔm siɣsiɣ yɔ, koboyaɣ tɩnaa kɛlɛ mba pataɣ-ɩ liu yɔ pe-kpeekpe.” Mba powoki pɩ-yɔɔ nɛ paɖaŋɩɣ Yehowa yɔ, pakaɣ hiɣu wazasɩ sakɩyɛ sɔnɔ sɔnɔ nɛ ɛjaɖɛ kɩfaɖɛ nɖɩ ɖɩwɛnɩ ɛsɩndaa yɔ ɖɩ-taa.

18. Wazasɩ nzɩ ɖɩkaɣ hiɣu?

¹⁸ Alɩwaatʋ ndʋ Ɛsɔ samaɣ sʋʋ ɛjaɖɛ kɩfaɖɛ taa yɔ, pɩɩkaɣ tasʋʋ pɔzʋʋ se kɔɖɔkɩ ka-laŋɩyɛ nɩɣzɛ nɛ kala wena kakatɩɣ sɔnɔ yɔ, a-taa. Mulum lakasɩ kaɣ sɩʋ tɩnaɣ, nɛ wɩzasɩ ɛɛkaɣ tasʋʋ wɛʋ. (Natʋ 21:4) Pɩɩkaɣ tasʋʋ pɔzʋʋ se ɖɩnɩɣzɩ ɖa-kɩcɛyɩm yɔɔ mbʋ pʋyɔɔ yɔ, pɩtɩŋa pɩkaɣ tɔyʋʋ. (Keɣa 71:16; Iza. 54:13) Pɩkaɣ wɛʋ ɖeu kpem.

19. Yehowa wɛɛ nɛ ɛñɔɔzʋʋ-ɖʋ pazɩ pazɩ lɛɛlɛɛyɔ se ɖɩpɩzɩ nɛ ɖɩla we?

¹⁹ Yehowa wɛɛ nɛ ɛñɔɔzʋʋ-ɖʋ lɛɛlɛɛyɔ se ɖɩpɩzɩ nɛ ɖɩcaɣ e-Kewiyaɣ tɛɛ. Nʋmɔʋ ŋgʋ kɩ-yɔɔ ɛtɩŋɩɣna nɛ ɛsɩɣnɩ-ɖʋ yɔ ŋgʋ lɛ se ɛwɛɛ nɛ ɛsɩɣnɩ-ɖʋ se ɖiyele wɛtʋ kɩdɛkɛdɩtʋ ndʋ ɖɩwɛna yɔ nɛ ɖɩñaɣ pana nɛ ɖɩwɛɛnɩ wɛtʋ kɩbandʋ ndʋ tɩkɛdɩɣnɩ-ɩ yɔ. Taayele nɛ pitibi-ŋ yɔɔɔ nɛ ŋyele Yehowa sɛʋ. Wezuu ŋgʋ kɩkpaɖɩ ɖeu yɔ, kɩwɛnɩ ɛsɩndaa. Ðɩwɛɣ nɛ ɖɩɖaŋɩɣ alɩwaatʋ ndʋ kpam lɛ, iyele nɛ ɖɩwɛɛ taa leleŋ taa nɛ ɖɩɖʋ suuɖu nɛ ɖɩɖaŋ Yehowa nɛ ɛla mbʋ ɛyɔɔdaa se ɛlakɩ yɔ.