Tɔm ñʋʋ ŋgʋ kɩ-taa, ɖɩkpɛlɩkaa se tɔm kɩcɛyɩtʋ ndʋ titukuuni ɛyaa nɛ Ɛsɔ tiyiyaa yɔ, ndʋ lɛ Yehowa hɩɖɛ sɔsɔɖɛ yɔɔ ñalʋʋ. Tɔm kɩcɛyɩtʋ ndʋ tɩ-hɔɔlʋʋ nakʋyʋ lɛ Yehowa kewiyitu kɩkɩlɩtʋ tɔɔʋ tɔm, pɩ-tɔbʋʋ lɛ se ɛzɩma Yehowa tɔkɩ kewiyitu yɔ mbʋ kpaɖɩnɩ ɖeu. Tɔm ndʋ titukuuni ɛyaa cɩŋgɩlɩm wɛtʋ yɔ tɩkɛ ɖɔɖɔ tɔm kɩcɛyɩtʋ ndʋ tɩ-hɔɔlʋʋ lɛɛkʋ.

Ɛbɛ yɔɔ lɛɛlɛɛyɔ lɛ ɖɩñɩkɩɣ niye se tɔm kɩcɛyɩtʋ ndʋ, titukuuni Yehowa hɩɖɛ nɛ ɖɩ-yɔɔ ñalʋʋ? Iyele nɛ ɖɩna lɩmaɣza 3.

Kajalaɣ lɛ, Sataŋ kʋyɩ Yehowa hɩɖɛ yɔɔ yaa episi-ɖɩ Edɛɛnɩ kaɖaɣ taa. Tɔm ndʋ Sataŋ pɔzɩ Ɛva yɔ, tɩwɩlɩɣ se Yehowa tɩkɛ Ɛsɔ kʋjɔʋ tʋ nɛ tɩwɩlɩɣ ɖɔɖɔ se mbʋ ɛpɔzɩ Aɖam nɛ Ɛva yɔ pɩfɛyɩ siɣsiɣ. Pʋwayɩ lɛ, ɛyɔɔdɩ tɔm ndʋ tɩkaɖɩɣnɩ Yehowa ñɩndʋ yɔ, nɛ toovenim taa lɛ ɛwɛɛ nɛ ɛyɔɔdʋʋ se Yehowa kɛ cɛtɩyʋ. Ye mbʋ ɛyɔɔdɩ cɛtɩm tɔm Yehowa hɩɖɛ yɔɔ. Ɛpɩsɩ «Eleeu», pɩ-tɔbʋʋ lɛ se «kɔlɔmɔtʋ tʋ.» (Yoh. 8:44) Ɛva welisi Sataŋ cɛtɩm tɔm, pʋyɔɔ lɛ ɛtɩña Ɛsɔ nɛ ɛkaɖɩnɩ e-kewiyitu kɩkɩlɩtʋ tɔɔʋ. (Kiɖe 3:1-6) Sataŋ wɛɛ nɛ ɛyɔɔdʋʋ cɛtɩm tɔm Ɛsɔ hɩɖɛ yɔɔ pɩkɔɔ pɩtalɩnɩ sɔnɔ, ɛwɛɛ nɛ ɛyɛlɩɣnɩ cɛtɩm tɔm ɛyʋ weyi Yehowa kɛnaa yɔ ɛ-yɔɔ. Mba petisiɣ cɛtɩm tɔm ndʋ tɩ-yɔɔ yɔ pɩwɛ kɛlɛʋ se pataaña Yehowa. Pʋyɔɔ lɛ, Ɛsɔ sɛyaa ɛsɩndaa lɛ kɔlɔmɔtʋ tɔm yɔɔdʋʋ Yehowa hɩɖɛ kiɖeɖeye yɔɔ kɛ kɩdɛkɛdɩm sɔsɔm kpem. Mbʋ yebina nɛ kʋñɔmɩŋ nɛ kañatʋ lakasɩ nzɩ payɩ sɩwɛ ɛjaɖɛ yɔɔ yɔ sɩwɛɛ.

Nabʋlɛ lɛ, Yehowa tɛm ɛ-taa se ɛlʋkɩ ɛ-hɩɖɛ yɔɔ nɛ ɛñalɩ ɖɩ-yɔɔ nɛ pɩsa nɛ pɩwazɩ e-wondu kɩlɩzɩtʋ tɩŋa. Pɩkɛ tɔm ndʋ tɩ-tɔm kɩlɩ cɛyʋʋ Yehowa ɛsɩndaa yɔ. Pʋyɔɔ ɛyɔɔdaa se: «Pɩtʋʋ fɛyɩ se mankaɣ labʋ nɛ ma-hɩɖɛ sɔsɔɖɛ yɔɔ ñalɩ.» (Ezek. 36:23) Nɛ alɩwaatʋ ndʋ Yesu yɔɔdaa se «ña-hɩɖɛ yɔɔ ɛñalɩ» yɔ, ɛɛwɛɛ nɛ ɛwɩlɩɣ Yehowa sɛyaa siɣsiɣ tɩnaa mbʋ pɩwɛɛ se pɩ-tɔm ɛkɩlɩ cɛyʋʋ pa-adɩma taa yɔ. (Mat. 6:9) Bibl ñɩɣ niye tam sakɩyɛ se pɩcɛyaa se pasa Yehowa hɩɖɛ. Kɩɖaŋ nɩɩyɩ yɔ. Bibl yɔɔdʋʋ se: «Ɩcɛlɩ Yehowa samtʋ ndʋ tɩmʋnɩ ɛ-hɩɖɛ yɔ.» (1 Kro. 16:29; Keɣ. 96:8) «Itee samtʋ hendu ɛ-hɩɖɛ sɔsɔɖɛ.» (Keɣ. 66:2) «Mankaɣ sam ña-hɩɖɛ sɔsɔɖɛ tam.» (Keɣ. 86:12) Alɩwaatʋ ndʋ Yehowa maɣmaɣ yɔɔdɩnɩ ɛsɔdaa yɔ, tɩ-taa natʋyʋ lɛ alɩwaatʋ ndʋ Yesu yɔɔdɩ Yeruzalɛm templo taa se: «Caa, sa ña-hɩɖɛ» yɔ. Yehowa cosaa se: «Mansam-ɖɩ nɛ mankaɣ-ɖɩ tasʋʋ sam.»—Yoh. 12:28. a

Nabudozo lɛ, paa ɛzɩmtaa lɛ, Yehowa tamaɣ lakɩ nɔɔ kʋɖʋmaɣ nɛ ɛ-hɩɖɛ. Maɣzɩ tɔm tʋnɛ tɩ-yɔɔ nɛ ŋna. Krɩstʋ Pɩnzɩ kudoku kewiyitu tɔɔʋ tɛŋ nɛ patakɩ ɛyaa kɛdɛzaɣ ɖeɖe lɛ, ɛbɛ lakɩ pʋwayɩ? Alɩwaatʋ ndʋ tɩ-taa lɛ, lɩmaɣza wena Ɛsɔ tiyiyaa nɛ ɛyaa pakaɣ wɛnʋʋ Yehowa hɩɖɛ yɔɔ? Pɩsa nɛ ɖicosi tɔm ndʋ tɩ-yɔɔ lɛ, iyele nɛ ɖɩtɔzɩ hɔɔlɩŋ naalɛ weyi tɔm ndʋ titukuuna yɔ ɩ-yɔɔ, pɩ-tɔbʋʋ lɛ se ɛyaa siɣsiɣ wɛtʋ Ɛsɔ ɛsɩndaa nɛ  Ɛsɔ kewiyitu kɩkɩlɩtʋ tɔɔʋ tɔm. Ɛyaa mba pawɩlaa se pɔɖɔkɩ pe-siɣsiɣ wɛtʋ yɔ, ɛzɩ pɩkaɣ-wɛ wɛʋ kaɖɛ se powolo pɩ-yɔɔ nɛ pɔɖɔkɩ pa-cɩŋgɩlɩm wɛtʋ na? Aayɩ. Pakaɣ talʋʋ pilim nɛ pɛtɛm-wɛ takʋʋ kiya. Pahaɣ-wɛ waɖɛ se pacaɣ wezuu tam. Pɩtasɩ lɛ, pɩɩkaɣ pɔzʋʋ se pawɩlɩ se ɛzɩma Yehowa tɔkɩ kewiyitu yɔ mbʋ kpaɖɩnɩ ɖeu yaa pɩtɩkɛ mbʋ kpaɖɩna. Alɩwaatʋ ndʋ tɩ-taa lɛ, wondu kɩlɩzɩtʋ ndʋ payɩ tɩwɛ tɛtʋ yɔɔ nɛ ɛsɔdaa yɔ, tɩkaɣ labʋ nɔɔ kʋɖʋmaɣ nɛ tɩkaɣ tisuu Yehowa kewiyitu tɔɔʋ yɔɔ. Piyele nɛ Yehowa hɩɖɛ yɔ?

Alɩwaatʋ ndʋ tɩ-taa lɛ, paa weyi ɛkaɣ tɩlʋʋ Yehowa yɔɔ toovenim tɔm, nɛ pakaɣ tɛm ñalʋʋ ɛ-hɩɖɛ yɔɔ. Paa mbʋ yɔ, Yehowa hɩɖɛ kaɣ wobu pɩ-yɔɔ nɛ ɖɩkɛ mbʋ pɩ-tɔm kɩlɩ cɛyʋʋ ɛ-sɛyaa ɛsɩndaa yɔ. Ɛbɛ yɔɔ? Mbʋ pʋyɔɔ yɔ Yehowa kaɣ wobu pɩ-yɔɔ nɛ ɛlakɩ tʋma wena awɛ piti yɔ nɛ panaɣ. Maɣzɩ nɛ ŋna. Yesu kaɣ ɛ-tɩ luzuu nɛ ɛɖʋzɩ kewiyitu kpeekpe Ɛsɔ nesi tɛɛ nɛ pʋyɔɔ lɛ Ɛsɔ kaɣ kɛʋ «pɩ-tɩŋa paa anɩ.» (1 Kɔr. 15:28) Pʋwayɩ lɛ, ɛyaa mba pɛwɛ tɛtʋ yɔɔ yɔ pakaɣ wɛnʋʋ «Ɛsɔ piya tɩ-yɔɔ wɛʋ sɔsɔm» nɛ panɩɩ pɩ-leleŋ. (Roma 8:21) Nɛ tamaɣ ŋga Yehowa laba se ekpeɣliɣ e-piya nzɩ sɩwɛ ɛsɔdaa nɛ tataa yɔ hɔʋ kʋɖʋmʋʋ taa yɔ, ɛkaɣ yebu nɛ kala.—Efɛz. 1:10.

Ɛzɩma pɩkaɣ tukunuu Yehowa hɔʋ ŋgʋ kɩwɛ ɛsɔdaa nɛ tataa yɔ? Pɩtʋʋ fɛyɩ se ɖɩkaɣ wobu pɩ-yɔɔ nɛ ɖɩsɔɔlɩ siŋŋ se ɖɩsa Yehowa hɩɖɛ. Fezuu ɖiyi keɣa maɖʋ Daviid nɛ ɛma se: «Pasa Ɛsɔ Yehowa . . . Pasa ɛ-hɩɖɛ sɔsɔɖɛ tam.» (Keɣ. 72:18, 19) Ðɩkaɣ wobu pɩ-yɔɔ nɛ ɖɩwɛɛnɩ lɩmaɣza kɩfana wena a-yɔɔ pɩwɛɛ se ɖɩsaŋ Yehowa tam yɔ.

Toovenim taa lɛ, Yehowa hɩɖɛ tukuuni mbʋ payɩ ɛkɛnaa yɔ. Kɔzɩ kɔzɩ lɛ, ɛ-hɩɖɛ tɔzʋʋ-ɖʋ ɛ-sɔɔlɩm yɔɔ. (1 Yoh. 4:8) Ðɩkaɣ tɔzʋʋ paa ɛzɩmtaa se Yehowa lɩzɩ-ɖʋ mbʋ pʋyɔɔ yɔ ɛsɔɔlɩ-ɖʋ, nɛ ɛhɛyɩ kɩhɛyʋʋ pʋ-ñʋʋ taa mbʋ pʋyɔɔ yɔ ɛsɔɔlɩ-ɖʋ, nɛ ɖɩkaɣ tɔzʋʋ ɖɔɖɔ paa ɛzɩmtaa se ɛzɩma ɛtɔkɩ kewiyitu yɔ pɩwɛ siɣsiɣ nɛ sɔɔlɩm ɖiyiɣni-i. Ɛlɛ, ɖɩkaɣ wobu pɩ-yɔɔ nɛ ɖɩnaɣ ɛzɩma Yehowa wɩlɩɣ sɔɔlɩm e-wondu kɩlɩzɩtʋ yɔ. Pɩkaɣ-ɖʋ seɣtuu se ɖɩwɛɛ nɛ ɖɩñɔtʋʋnɩ ɖa-Caa nɛ ɖiteɣ samtʋ hendu nɛ ɖɩsaŋ ɛ-hɩɖɛ sɔsɔɖɛ tam.—Keɣ. 73:28.