TƆM ÑƲƲ ŊGƲ ÐƖKPƐLƖKƖƔ YƆ 35
HENDU 123 Ðiluzi ɖa-tɩ teokrasɩ ɖʋtʋ tɛɛ
Ɛzɩma ɛzʋtʋyaa pɩzɩɣ nɛ pasɩnɩ mba palɩzɩ-wɛ ɛgbɛyɛ taa yɔ?
«Alɩwaatʋ ndʋ kɩwɛɛkɩm laɖʋ kʋɖʋm kpiɖiɣ ɛ-kɩwɛɛkɩm yɔɔ yɔ, . . . taa leleŋ wɛɣ ɛsɔdaa ɛ-yɔɔ nɛ pɩkɩlɩ ɛyaa siɣsiɣ tɩnaa 99 mba pɩɩpɔzʋʋ-wɛ kpiɖuu yɔ.»—LUKA 15:7.
LƖMAƔZƖYƐ SƆSƆÐƐ
Ðɩkaɣ naʋ mbʋ pʋyɔɔ pɩpɔzʋʋ se palɩzɩ ɛyaa nabɛyɛ ɛgbɛyɛ taa yɔ, nɛ mbʋ ɛzʋtʋyaa pɩzɩɣ pala nɛ pasɩnɩ-wɛ nɛ pekpiɖi pa-kɩwɛɛkɩm yɔɔ nɛ pɔ-tɔm ɖaɣnɩ kɛdɩnʋʋ Yehowa yɔ.
1-2. (a) Ɛzɩma pɩlakɩ Yehowa alɩwaatʋ ndʋ ɛyaa nabɛyɛ lakɩ kɩwɛɛkɩm nɛ paakpiɖiɣ yɔ? (b) Ɛbɛ Yehowa sɔɔlaa se kɩwɛɛkɩm laɖaa ɩla?
YEHOWA tɩkɛ Ɛsɔ weyi ɛhaɣ nʋmɔʋ se paa weyi ɛla mbʋ ɛsɔɔlaa yɔ; ɛpaɖɩɣ kɩdɛkɛdɩm. (Keɣ. 5:4-6) Yehowa sɔɔlaa se ɖɩña ɛ-paɣtʋ ndʋ tɩwɛ Bibl taa yɔ. Ɛnawa se ɖɩtɩtalɩ pilim nɛ ɛɛɖaŋɩɣ se ɖɩla mbʋ pɩtalɩ pilim yɔ. (Keɣ. 130:3, 4) Paa mbʋ yɔ, eehuuzuu ɛsa «ɛyaa mba paañaŋ Ɛsɔ nɛ pawaɣnɩ Ɛsɔ lootiye nɛ palakɩ lakasɩ nzɩ sɩwɛ fɛyɛ yɔ» pa-lakasɩ yɔɔ. (Yud. 4) Pʋyɔɔ Bibl yɔɔdʋʋ se pakaɣ ɖɩzʋʋ «ɛyaa mba paañaŋ Ɛsɔ yɔ» Ɛsɔ you ŋgʋ payaɣ se Armaagedɔɔ yɔ kɩ-taa.—2 Pɩy. 3:7; Natʋ 16:16.
2 Ɛlɛ, Yehowa tɩsɔɔlɩ se ɛɖɩzɩ nɔɔyʋ. Ɛzɩ ɖɩnaʋ tɔm ñʋŋ weyi ɩɖɛwa yɔ ɩ-taa yɔ, Bibl yɔɔdʋʋ kpayɩ kpayɩ se «ɛsɔɔlaa se ɛyaa tɩŋa ikpiɖi pa-kɩwɛɛkɩm yɔɔ.» (2 Pɩy. 3:9) Ɛzɩ Yehowa yɔ, ɛzʋtʋyaa wɛ suuɖu alɩwaatʋ ndʋ pasɩɣnɩ kɩwɛɛkɩm laɖʋ se ekpiɖi ɛ-kɩwɛɛkɩm yɔɔ nɛ ɛ-tɔm ɖaɣnɩ kɛdɩnʋʋ Yehowa yɔ. Paa mbʋ yɔ, pɩtɩkɛ kɩwɛɛkɩm laɖaa tɩŋa tisiɣna nɛ pekpiɖiɣ. (Iza. 6:9) Nabɛyɛ woki pɩ-yɔɔ nɛ palakɩ kɩwɛɛkɩm paa ɛgbɛyɛ taa ɛzʋtʋyaa ɩñakɩ pana kaahɛzaɣ se pasɩnɩ-wɛ yɔ. Ɛbɛ pɩwɛɛ se ɛzʋtʋyaa ɩla wɛtʋ ndʋ tɩ-taa?
«ƖLƖZƖ ƐYƲ KƖDƐKƐDƲ MƖ-HƐKƲ TAA»
3. (a) Ɛbɛ Bibl yɔɔdʋʋ se pala kɩwɛɛkɩm laɖʋ weyi etikpiɖi yɔ? (b) Ɛbɛ yɔɔ ɖɩpɩzɩɣ nɛ ɖɩyɔɔdɩ se kɩwɛɛkɩm laɖʋ maɣmaɣ lɩzɩna se palɩzɩ-ɩ ɛgbɛyɛ taa?
3 Ye kɩwɛɛkɩm laɖʋ nɔɔyʋ ekizi kpiɖuu yɔ, pɩwɛɛ se ɛzʋtʋyaa ɩɖɔ lɔŋ tasʋʋ mbʋ pɩwɛ 1 Kɔrɛntɩ mba 5:13 taa yɔ pɩ-yɔɔ. Mayaɣ ŋga kɔyɔɔdʋʋ se: «Ɩlɩzɩ ɛyʋ kɩdɛkɛdʋ mɩ-hɛkʋ taa.» Kɩwɛɛkɩm laɖʋ nawa se ye etikpiɖi yɔ pakaɣ-ɩ lɩzʋʋ ɛgbɛyɛ taa, ye mbʋ pɩwɛ ɛzɩ ɛ-maɣmaɣ ɛlɩzɩna se palɩzɩ-ɩ ɛgbɛyɛ taa yɔ. Eɖiɣni kʋm mbʋ ɛ-maɣmaɣ eɖuwa yɔ. (Gal. 6:7) Ɛbɛ yɔɔ ɖɩyɔɔdʋʋ mbʋ? Mbʋ pʋyɔɔ yɔ ekizaa se ɛɛlɛɣzɩɣ, paa ɛzʋtʋyaa ɩñaɣ pana tam sakɩyɛ se pasɩnɩ-ɩ yɔ. (2 Awi. 17:12-15) Ɛ-lakasɩ wɩlɩɣ se ɛlɩzaa se ɛɛɖɔŋ Yehowa paɣtʋ kila yɔɔ.—Wp. 30:19, 20.
4. Ye palɩzɩ nɔɔyʋ ɛgbɛyɛ taa yɔ, ɛbɛ yɔɔ posusuu-tʋ ɛgbɛyɛ?
4 Ye palɩzɩ kɩwɛɛkɩm laɖʋ weyi etikpiɖi yɔ ɛgbɛyɛ taa yɔ, posusuu ɛgbɛyɛ ɛsɩndaa se ɛyʋ ɛnʋ ɛtɩtasɩ kɛʋ Yehowa Aseɣɖe Tʋ. Paasusuu tɔm ndʋ se paɖʋnɩ fɛyɛ kɩwɛɛkɩm laɖʋ. Ɛlɛ posusuu-tʋ se pɩsa nɛ koobiya ɖɔ lɔŋ weyi Bibl tasaa se ‘peyele taabalɩyɛ ɖʋʋ’ nɛ ɛyʋ ɛnʋ nɛ ‘halɩ pa nɛ ɛyʋ ɛnʋ pataatɔɔ’ yɔ ɩ-yɔɔ. (1 Kɔr. 5:9-11) Lɩmaɣzɩyɛ kɩbanɖɛ naɖɩyɛ yɔɔ Yehowa ɖʋ paɣtʋ ndʋ. Apostoloo Pɔɔlɩ mawa se: «Lɔlɔm pazɩ yem lakɩ nɛ mʋtʋ kpeekpe ñɩŋ.» (1 Kɔr. 5:6) Ye patɩlɩzɩ kɩwɛɛkɩm laɖʋ weyi ekizi kpiɖuu yɔ ɛgbɛyɛ taa yɔ, lalaa pɩzɩɣ nɛ pamaɣzɩ se pɩtɩcɛyɩ se paña Yehowa paɣtʋ.—Adu. 13:20; 1 Kɔr. 15:33.
5. (a) Ye palɩzɩ koobu nɔɔyʋ ɛgbɛyɛ taa yɔ, lɩmaɣza wena pɩwɛɛ se ɖɩwɛɛnɩ ɛ-yɔɔ? (b) Nɛ ɛbɛ yɔɔ?
5 Ye palɩzɩ koobu nɔɔyʋ ɛgbɛyɛ taa yɔ, lɩmaɣza wena pɩwɛɛ se ɖɩwɛɛnɩ ɛ-yɔɔ? Paa ɖɩɩɖʋʋ-ɩ nɛ taabalɩyɛ yɔ, pɩwɛɛ se ɖɩkpaɣ-ɩ ɛzɩ heu weyi eleba yɔ nɛ ɖɩtaamaɣzɩ se ɛ-tɔm tɛma. Ye heu nɔɔyʋ eleba yɔ, ɛpɩzɩɣ nɛ ɛɖaɣnɩ pɩsʋʋ ewiɖe taa. Tɔzɩ se ɛyʋ ɛnʋ ɛɛkpaɣ e-wezuu nɛ ɛcɛlɩ Yehowa. Ɛlɛ ɛsʋ kaɖɛ taa mbʋ pʋyɔɔ yɔ etiwolo pɩ-yɔɔ nɛ ɛɖɔŋ e-ɖuutu yɔɔ. (Ezek. 18:31) Paa mbʋ yɔ, ɛzɩma alɩwaatʋ tɩtɛmta nɛ Yehowa naɣ ɛyaa pʋtɔdɩyɛ faaa; yɔ pʋyɔɔ lɛ, lidaʋ wɛɛ se ɛyʋ ɛnʋ ɛkaɣ pɩsʋʋ. Ye mbʋ, paa palɩzɩ kɩwɛɛkɩm laɖʋ nɔɔyʋ ɛgbɛyɛ taa yɔ, ɛzɩma ɛzʋtʋyaa pɩzɩɣ nɛ pawɩlɩ se pɛwɛnɩ lidaʋ se ɛkaɣ lɛɣzʋʋ?
ƐZƖMA ƐGBƐYƐ TAA ƐZƲTƲYAA SƖƔNƖ MBA PALƖZƖ-WƐ ƐGBƐYƐ TAA YƆ?
6. Ɛbɛ ɛzʋtʋyaa lakɩ se pasɩnɩ weyi palɩzɩ-ɩ ɛgbɛyɛ taa yɔ?
6 Ye palɩzɩ nɔɔyʋ ɛgbɛyɛ taa yɔ, pɩwɩlɩɣ se ɛgbɛyɛ taa ɛzʋtʋyaa haɣ-ɩ siɣye nɛ peyebi-i e-ɖeke se ɛñaɣ pana nɛ ɛpɩsɩ Yehowa cɔlɔ? Paalakɩ mbʋ kpa. Alɩwaatʋ ndʋ ɛzʋtʋyaa kɔɔmitee heyiɣ kɩwɛɛkɩm laɖʋ se pakaɣ-ɩ lɩzʋʋ ɛgbɛyɛ taa yɔ, peheyiɣ-i ɖɔɖɔ nɩŋgbanzɩ nzɩ ɛpɩzɩɣ nɛ ɛkpɛzɩ nɛ ɛpɩsɩ ɛgbɛyɛ taa yɔ. Ɛlɛ ɛzʋtʋyaa ɩɩsɩɣnɩ peeɖe. Sakɩyɛ taa lɛ, pakaɣ-ɩ heyuu se pɔsɔɔlaa se pa nɛ ɩ paɖaɣnɩ katʋʋ fenasɩ nasɩyɩ wayɩ nɛ pana se ɛlɛɣzɩ ɛ-lɩmaɣza na. Ye kɩwɛɛkɩm laɖʋ etisaa se patasɩ-ɩ katʋʋ yɔ, kɩyakʋ ŋgʋ pakatɩɣ yɔ, ɛgbɛyɛ taa ɛzʋtʋyaa seɣtiɣ-i nɛ nɔɔ kɩbaŋa se ekpiɖi nɛ ɛpɩsɩ ɛgbɛyɛ taa. Halɩ ye etikpiɖi alɩwaatʋ ndʋ tɩ-taa yɔ, ɛzʋtʋyaa kaɣ ñaɣʋ pana nɛ patasɩ-ɩ katʋʋ pʋwayɩ nɛ peseɣti-i se ekpiɖi.
7. Ɛzɩma ɛzʋtʋyaa maɣzɩɣnɩ Yehowa pʋtɔdɩyɛ naʋ alɩwaatʋ ndʋ pasɩɣnɩ ɛyʋ weyi palɩzɩ-ɩ ɛgbɛyɛ taa yɔ? (Yereemii 3:12)
7 Ɛzʋtʋyaa maɣzɩɣnɩ Yehowa pʋtɔdɩyɛ naʋ alɩwaatʋ ndʋ pasɩɣnɩ ɛyʋ weyi palɩzɩ-ɩ ɛgbɛyɛ taa yɔ. Caanaʋ taa, Yehowa taaɖaŋ se Izrayɛɛlɩ mba ikpiɖi pʋcɔ nɛ ɛsɩnɩ-wɛ. Ɛlɛ ɛkpɛzɩ nɩŋgbanzɩ nzɩ pɩpɔzʋʋ yɔ nɛ ɛsɩnɩ-wɛ paa pataawɩlɩɣ se pɔsɔɔlɩ kpiɖuu yɔ. Tɔm ñʋʋ naalɛ ñɩŋgʋ taa, ɖɩnawa se Yehowa heyi Ozee se ɛkpaɣ nɛ ekpeɣ ɛ-halʋ nɛ ɛpɩsɩnɩ-ɩ paa ɛlɛ kaawɛɛ nɛ ɛlakɩ kɩwɛɛkɩm mbʋ yɔ. Yehowa tɩŋnɩ kɩɖaʋ ŋgʋ kɩ-yɔɔ nɛ ɛwɩlɩ se ɛnʋ kɛ pʋtɔdɩyɛ nayʋ siŋŋ. (Ozee 3:1; Mal. 3:7) Ɛgbɛyɛ taa ɛzʋtʋyaa pɩzɩɣ nɛ pamaɣzɩnɩ Yehowa nɛ pɔsɔɔlɩ siŋŋ se kɩwɛɛkɩm laɖʋ ɛpɩsɩ, nɛ paayeki nɛ pɩwɛɛ-ɩ kaɖɛ se ɛpɩsɩ.—Kalɩ Yereemii 3:12.
8. Ɛzɩma eduuye nɖɩ Yesu tuu pɩɣa kilebaɣ yɔɔ yɔ ɖɩsɩɣnɩ-ɖʋ se ɖɩnɩɩ Yehowa pʋtɔdɩyɛ naʋ tɔbʋʋ nɛ pɩkpaɖɩ? (Luka 15:7)
8 Tɔzɩ pɩɣa kilebaɣ eduuye nɖɩ Yesu kaatuwaa nɛ ɖɩyɔɔdɩ ɖɩ-tɔm tɔm ñʋʋ naalɛ ñɩŋgʋ taa yɔ ɖɩ-yɔɔ. Caja losi ɛ-pɩyalʋ eɖiɣni pɩsʋʋ ɖɩɣa lɛ, «ese nɛ ewolo ekpibi-i nɛ ɛkpɛlɩ ɛ-yɔɔ nɛ sɔɔlɩm.» (Luka 15:20) Caja tɩɖaŋ se ɛ-pɩyalʋ ɛpɔzɩ se ɛkpaɣ nɛ ekpeɣ-i. Ɛlɛ ɛnʋ calɩnɩ kpɛzʋʋ nɩŋgbaŋaɣ mbʋ pʋyɔɔ yɔ ɛsɔɔlɩ-ɩ. Ɛzʋtʋyaa ñakɩ pana se pɛwɛɛnɩ wɛtʋ kʋɖʋmtʋ ndʋ mba peleba yɔ pɔ-hɔɔlʋʋ taa. Pɔsɔɔlaa se heŋ weyi ileba yɔ, «ɩpɩsɩ ɖɩɣa.» (Luka 15:22-24, 32) Taa leleŋ wɛɣ ɛsɔdaa alɩwaatʋ ndʋ kɩwɛɛkɩm laɖʋ nɔɔyʋ kpiɖiɣ ɛ-kɩwɛɛkɩm yɔɔ yɔ, nɛ mbʋ ɖɔɖɔ taa leleŋ wɛɣ tɛtʋ yɔɔ.—Kalɩ Luka 15:7.
9. Ɛbɛ Yehowa sɔɔlaa se kɩwɛɛkɩm laɖaa ɩla?
9 Ðɩkpɛlɩkʋʋ nɛ ɖɩtalɩ cɩnɛ yɔ, pɩ-taa tʋ kpayɩ kpayɩ se Yehowa ɛɛhaɣ nʋmɔʋ mba palakɩ kɩwɛɛkɩm nɛ paakpiɖiɣ yɔ se pɛwɛɛ ɛgbɛyɛ taa. Ɛlɛ ɛɛhaɣ siɣye kɩwɛɛkɩm laɖaa. Ɛsɔɔlaa se papɩsɩ ɛ-cɔlɔ. Yehowa yɔɔdɩ lɩmaɣza wena ɛwɛnɩ kɩwɛɛkɩm laɖaa mba pekpiɖiɣ pa-kɩwɛɛkɩm yɔɔ yɔ a-tɔm Ozee 14:4 taa. Ɛyɔɔdaa se: «Mankaɣ waʋ pe-siɣsiɣ kɩɩwɛʋ. Mankaɣ-wɛ sɔɔlʋʋ nɛ ma-laŋɩyɛ faaa, mbʋ pʋyɔɔ yɔ meyebi-i nɛ pana kɔʋ.» Tɔm ndʋ tiseɣtiɣ ɛzʋtʋyaa kpem se pañaɣ pana nɛ pañɩnɩ mbʋ pɩwɩlɩɣ se kɩwɛɛkɩm laɖʋ nɔɔyʋ paɣzɩ kpiɖuu yɔ. Tiseɣtiɣ ɖɔɖɔ mba peyebi Yehowa sɛʋ yɔ siŋŋ se papɩsɩ Yehowa cɔlɔ kpɛdɛyɛ.
10-11. Ɛzɩma ɛzʋtʋyaa kaɣ ñaɣʋ pana se pasɩnɩ mba palɩzɩ-wɛ ɛgbɛyɛ taa pɩlakɩ alɩwaatʋ sakɩyɛ yɔ?
10 Ɛzɩma ɛzʋtʋyaa pɩzɩɣ nɛ pasɩnɩ mba palɩzɩ-wɛ ɛgbɛyɛ taa nɛ pɩɖɛɛ, nɛ pɩtɩla pɩlakɩ pɩnzɩ sakɩyɛ yɔ? Pʋtɔma ɛyaa mba, peyebi kɩwɛɛkɩm mbʋ pɩ-yɔɔ paalɩzɩ-wɛ ɛgbɛyɛ taa yɔ pɩ-labʋ. Halɩ nabʋyʋ taa, pɩtɩla pɔsɔ mbʋ pʋyɔɔ paalɩzɩ-wɛ ɛgbɛyɛ taa yɔ pɩ-yɔɔ. Paa pɩtɩɩkɛ suwe yɔ, ɛzʋtʋyaa kaɣ ñaɣʋ pana nɛ patɩlɩ ɖenɖe ɛyaa mba pɛwɛɛ yɔ nɛ pekilimi pɔ-yɔɔ. Pa nɛ ɛyaa mba pakatɩɣ lɛ, halɩ papɩzɩɣ nɛ peheyi-wɛ se ye pɔsɔɔlaa yɔ pa nɛ wɛ papɩzɩɣ nɛ patɩmɩ, nɛ pʋwayɩ lɛ peseɣti-wɛ nɛ sɔɔlɩm se papɩsɩ ɛgbɛyɛ taa. Pɩkɛ toovenim se ye palɩzɩ nɔɔyʋ ɛgbɛyɛ taa pɩnzɩ sakɩyɛ yɔ, ɛhɛɣ fezuu taa siŋŋ. Paa mbʋ yɔ, ye ɛwɩlaa se ɛsɔɔlaa se ɛpɩsɩ ɛgbɛyɛ taa yɔ, ɛzʋtʋyaa pɩzɩɣ nɛ pala ɖʋtʋ nɛ nɔɔyʋ kpɛlɩkɩnɩ-ɩ Bibl, paa patɩpɩsɩnɩtɩ-ɩ ɛgbɛyɛ taa yɔ. Ɛlɛ paa pɩtɩɩkɛ suwe yɔ, ɛzʋtʋyaa pɩwɛɛ se pala ɖʋtʋ nɛ nɔɔyʋ kpɛlɩkɩnɩ-ɩ Bibl.
11 Ɛzʋtʋyaa ñakɩ pana se pamaɣzɩnɩ Yehowa pʋtɔdɩyɛ naʋ. Pʋyɔɔ lɛ, pañɩnɩɣ mba payɩ peyebi Yehowa sɛʋ yɔ nɛ peseɣti-wɛ se papɩsɩ ɛ-cɔlɔ. Ye kɩwɛɛkɩm laɖʋ nɔɔyʋ ɛwɩlaa se ekpiɖi ɛ-kɩwɛɛkɩm yɔɔ nɛ eyele ɛ-lakasɩ kɩdɛkɛdɩsɩ yɔ, papɩzɩɣ nɛ papɩsɩnɩ-ɩ ɛgbɛyɛ taa kpaagbaa.—2 Kɔr. 2:6-8.
12. (a) Hɔɔlɩŋ weyi taa pɩpɔzʋʋ kpem se ɛzʋtʋyaa ɩtɩlɩ labʋ? (b) Ɛbɛ yɔɔ pɩfɛyɩ se ɖɩmaɣzɩ se Yehowa ɛɛpɩzɩɣ nɛ ɛna kɩwɛɛkɩm laɖaa nabɛyɛ pʋtɔdɩyɛ kpa? (Kalɩ ɖɔɖɔ pɩ-tɛɛ tɔm.)
12 Hɔɔlɩŋ nɩɩyɩ taa lɛ, pʋcɔ nɛ ɛzʋtʋyaa pɩsɩnɩ nɔɔyʋ ɛgbɛyɛ taa lɛ, pɩpɔzʋʋ se patɩlɩ labʋ. Ye nɔɔyʋ ɛwɛɛkɩ pɩɣa nakɛyɛ yaa ɛpɩsɩ tisuu yebiyu yaa ɛtɩŋnɩ ajitu nʋmɔʋ nakʋyʋ yɔɔ se ɛcɛ nesi yɔ, pɩpɔzʋʋ se ɛzʋtʋyaa ɩtazɩ nɛ pana se toovenim taa lɛ ekpiɖi ɛ-kɩwɛɛkɩm yɔɔ. (Mal. 2:14; 2 Tim. 3:6) Pɩpɔzʋʋ se pakandɩyɩ ewiɖe yɔɔ. Alɩwaatʋ kʋɖʋmtʋ ndʋ tɩ-taa lɛ, pɩpɔzʋʋ se ɖɩtɩlɩ se Yehowa kaɣ ɖaɣnʋʋ mʋʋ kɩwɛɛkɩm laɖaa mba payɩ pawɩlɩɣ se toovenim taa lɛ pekpiɖi pa-kɩwɛɛkɩm yɔɔ nɛ peyele labʋ lakasɩ kɩdɛkɛdɩsɩ yɔ. Pʋyɔɔ lɛ, paa pɩpɔzʋʋ se ɛzʋtʋyaa ɩtɩlɩ labʋ alɩwaatʋ ndʋ pɔcɔŋnɩ mba palabɩ lalaa kañatʋ lakasɩ nasɩyɩ yɔ pɔ-tɔm ɖeɖe yɔ, pɩfɛyɩ se pamaɣzɩ se Yehowa ɛɛpɩzɩɣ nɛ ɛna ɛyaa mba pa-pʋtɔdɩyɛ kpa. a—1 Pɩy. 2:10.
MBƲ ƐGBƐYƐ PƖZƖƔ NƐ ÐƖLA YƆ
13. Tʋkaɣ ŋga wɛ wɛtʋ ndʋ ɖɩwɛnɩ ɛyʋ weyi pɔhɔm ɛ-nɩŋgbaŋʋʋ yɔ ɛ-yɔɔ nɛ wɛtʋ ndʋ ɖɩwɛnɩ ɛyʋ weyi palɩzɩ-ɩ ɛgbɛyɛ taa yɔ ɛ-yɔɔ yɔ tɩ-hɛkʋ taa?
13 Ɛzɩ ɖɩnaʋ tɔm ñʋʋ ŋgʋ kɩɖɛwa yɔ kɩ-taa yɔ, nabʋyʋ taa posusuu se pɔhɔm koobu nɔɔyʋ nɩŋgbaŋʋʋ. Paa mbʋ yɔ, ɖɩpɩzɩɣ ɖiwolo pɩ-yɔɔ nɛ ɖɩɖʋ-ɩ nɛ taabalɩyɛ, mbʋ pʋyɔɔ yɔ ɖɩnawa se ekpiɖaa nɛ eyele ɛ-lakasɩ kɩdɛkɛdɩsɩ. (1 Tim. 5:20) Ɛkpɛndɩ ɛwɛ ɛgbɛyɛ taa nɛ pɩpɔzʋʋ se ɛɖʋ taabalɩyɛ nɛ koobiya nɛ pakpazɩ-ɩ ɖoŋ. (Ebr. 10:24, 25) Ɛlɛ, ye palɩzɩ nɔɔyʋ ɛgbɛyɛ taa yɔ, pɩwɛ ndɩ kpem. ‘Ðiyeki taabalɩyɛ ɖʋʋ’ nɛ ɛyʋ ɛnʋ, halɩ ɖa nɛ ɩ ɖɩɩtɔkɩ.—1 Kɔr. 5:11.
14. Ye palɩzɩ nɔɔyʋ ɛgbɛyɛ yɔ, lɩmaɣzɩyɛ nɖɩ Krɩstʋ tʋ nɔɔyʋ pɩzɩɣ nɛ ɛtɩŋnɩ ɛ-ɛhʋyɛ nɖɩ ɛkpaɣ Bibl nɛ ɛfalɩsɩna yɔ ɖɩ-yɔɔ nɛ ɛkpaɣ? (Cɔnɩ ɖɔɖɔ kɩlɛmʋʋ.)
14 Ɛzɩ 1 Kɔrɛntɩ mba 5:11 taa tɔm ndʋ tɩwɩlɩɣ se pɩpɔzʋʋ se ɖɩsɔɔ ɛyʋ weyi palɩzɩ-ɩ ɛgbɛyɛ taa yɔ ɛ-yɔɔ caɣ caɣ? Aayɩ. Pɩkɛ toovenim se ɖa nɛ ɩ ɖɩɩɖʋʋ taabalɩyɛ. Ɛlɛ Krɩstʋ tʋ nɔɔyʋ pɩzɩɣ nɛ ɛlabɩnɩ tʋmɩyɛ ɛ-ɛhʋyɛ nɖɩ ɛkpaɣ Bibl nɛ ɛfalɩsɩna yɔ nɛ ɛkpaɣ lɩmaɣzɩyɛ se ɛyaɣ ɛyʋ weyi palɩzɩ-ɩ ɛgbɛyɛ taa yɔ se ɛkɔɔ kediɣzaɣ nakɛyɛ yaa ɛɛyaɣ-ɩ. Ɛyʋ ɛnʋ ɛpɩzɩɣ nɛ ɛkɛ ɛ-hɔʋ taa tʋ yaa pɩtɩla ɛɛkɛ ɛ-taabalʋ. Nɛ ye ɛkɔm kediɣzaɣ taa yɔ, ɛbɛ pɩwɛɛ se ɖɩla? Ðooo lɛ pɩtaapɔzɩ se ɖɩsɛɛ ɛyʋ ɛnʋ. Hɔɔlʋʋ kʋnɛ kɩ-taa ɖɔɖɔ lɛ, paa Krɩstʋ tʋ weyi lɛ pɩpɔzʋʋ se ɛtɩŋnɩ ɛ-ɛhʋyɛ nɖɩ ɛkpaɣ Bibl nɛ ɛfalɩsɩna yɔ ɖɩ-yɔɔ nɛ ɛkpaɣ lɩmaɣzɩyɛ. Nabɛyɛ pɩzɩɣ nɛ palɩzɩ se pɛsɛɣ ɛyʋ ɛnʋ yaa palakɩ-ɩ talɩ ɖeu kediɣzaɣ taa. Paa mbʋ yɔ, pɩfɛyɩ se ɖa nɛ ɩ ɖɩla kɛdaɣ nɛ pileɖi yaa ɖɩɖʋ-ɩ nɛ taabalɩyɛ.
Krɩstʋ mba pɩzɩɣ nɛ patɩŋnɩ pɛ-ɛhʋyɛ nɖɩ pakpaɣ Bibl nɛ pafalɩsɩna yɔ ɖɩ-yɔɔ nɛ pakpaɣ lɩmaɣzɩyɛ se payaɣ weyi palɩzɩ-ɩ ɛgbɛyɛ taa yɔ se ɛkɔɔ kediɣzaɣ nakɛyɛ taa yaa paayaɣ-ɩ; yaa pakpaɣ lɩmaɣzɩyɛ se pɛsɛɣ weyi palɩzɩ-ɩ ɛgbɛyɛ taa nɛ ɛkɔɔ kediɣzaɣ nakɛyɛ yɔ yaa paasɛɣ-ɩ (Cɔnɩ tayʋʋ 14)
15. Kɩwɛɛkɩm laɖaa mba tɔm pɔyɔɔdɩ 2 Yohanɛɛsɩ 9-11 taa? (Kalɩ ɖɔɖɔ aɖakaɣ « Ɛzɩ kɩwɛɛkɩm kʋɖʋmam tɔm Yohanɛɛsɩ nɛ Pɔɔlɩ pɛwɛɛ nɛ pɔyɔɔdʋʋ?»)
15 Nabɛyɛ pɩzɩɣ nɛ pɔpɔzɩ se: «Pɩcaɣ Bibl yɔɔdaa se ye Krɩstʋ tʋ nɔɔyʋ ɛsɛ kɩwɛɛkɩm laɖʋ weyi ekizaa se eekpiɖiɣ yɔ, ɛɖʋʋ nesi ɛ-tʋma kɩdɛkɛda» na? (Kalɩ 2 Yohanɛɛsɩ 9-11.) Tɔm ndʋ tɩcɔ mayaɣ ŋga nɛ tɩta yɔ, tɩwɩlɩɣ se tisuu yebiyaa nɛ ɛyaa mba peseɣtiɣ lalaa se pala kɩwɛɛkɩm yɔ, mba lɔŋ tasʋʋ mbʋ pitukuuna. (Natʋ 2:20) Pʋyɔɔ lɛ, ye ɛyʋ nɔɔyʋ ɛyɛlɩɣnɩ tisuu yebiyaa tɔm yaa eseɣtiɣ lalaa se pala kɩwɛɛkɩm yɔ, ɛgbɛyɛ taa ɛzʋtʋyaa iikilimiɣ ɛ-yɔɔ. Paa mbʋ yɔ, lidaʋ wɛɛ se ɛyʋ ɛnʋ ɛpɩzɩɣ nɛ ekpiɖi ɛ-kɩwɛɛkɩm yɔɔ. Ɛlɛ, pɩfɛyɩ se ɖɩsɛɛ-ɩ yaa ɖɩyaa-ɩ se ɛkɔɔ ɛgbɛyɛ taa kediɣzaɣ nakɛyɛ pɩkɔɔ nɛ pɩsɩɩnɩ alɩwaatʋ ndʋ ekpiɖaa yɔ.
MAƔZƖNƖ YEHOWA PƲTƆDƖYƐ NAƲ
16-17. (a) Ɛbɛ Yehowa sɔɔlaa se kɩwɛɛkɩm laɖaa ɩla? (Ezekɩyɛɛlɩ 18:32) (b) Ɛzɩma ɛgbɛyɛ taa ɛzʋtʋyaa wɩlɩɣ se pa nɛ Yehowa pɛkpɛndɩɣ nɛ palakɩ tʋmɩyɛ?
16 Ɛbɛ ɖɩkpɛlɩkɩ Feŋuu Tilimiye ɖɩnɛ ɖɩ-taa? Yehowa tɩsɔɔlɩ se paɖɩzɩ nɔɔyʋ. (Kalɩ Ezekɩyɛɛlɩ 18:32.) Ɛsɔɔlaa se kɩwɛɛkɩm laɖaa ɩla mbʋ pɩpɔzʋʋ yɔ nɛ pa nɛ ɩ peceɣ. (2 Kɔr. 5:20) Pʋyɔɔ kpaɣnɩ ɖooo caanaʋ taa, Yehowa kaawɛɛ nɛ eseɣtiɣ ɛ-samaɣ nɛ ɛyaa ndɩ ndɩ se pekpiɖi pa-kɩwɛɛkɩm yɔɔ nɛ papɩsɩ ɛ-cɔlɔ. Pɩkɛnɩ ɛgbɛyɛ taa ɛzʋtʋyaa waɖɛ se pa nɛ Yehowa pɛkpɛndɩ nɛ pasɩnɩ kɩwɛɛkɩm laɖaa nɛ pekpiɖi.—Roma 2:4; 1 Kɔr. 3:9.
17 Maɣzɩ taa leleŋ weyi ɛwɛ ɛsɔdaa alɩwaatʋ ndʋ kɩwɛɛkɩm laɖʋ nɔɔyʋ kpiɖiɣ yɔ ɩ-yɔɔ nɛ ŋna. Ða-Caa Yehowa maɣmaɣ taa lakɩ leleŋ siŋŋ alɩwaatʋ ndʋ payɩ e-heŋ weyi ileba yɔ ɩ-taa nɔɔyʋ pɩsɩɣ ɛgbɛyɛ taa yɔ. Alɩwaatʋ ndʋ ɖɩmaɣzɩɣ Yehowa pʋtɔdɩyɛ naʋ nɛ e-lootiye pɔ-yɔɔ yɔ, sɔɔlɩm mbʋ ɖɩwɛnɩ ɛ-yɔɔ yɔ pɩpaɣlɩɣ nɛ pɩkɩlɩ.—Luka 1:78.
HENDU 111 Mbʋ pʋyɔɔ ɖɩwɛ taa leleŋ taa yɔ
a Bibl yɔɔdʋʋ se paakpakɩɣ ɛyaa nabɛyɛ kɩwɛɛkɩm nɛ pekpeɣ-wɛ. Ɛyaa mba, pakpaɣ lɩmaɣzɩyɛ se pɛwɛɣ nɛ pakaɖɩɣnɩ Ɛsɔ tam. Yehowa nɛ Yesu pe-ɖeke papɩzɩɣna nɛ palɩzɩ se paakpeɣu nɔɔyʋ ɛ-kɩwɛɛkɩm.—Mark. 3:29; Ebr. 10:26, 27.
