TƆM ÑƲƲ ŊGƲ ÐƖKPƐLƖKƖƔ YƆ 31
HENDU 12 Ɛsɔ Kɩlɩm Yehowa
Mbʋ Yehowa laba se eholi ɛyaa kɩwɛɛkɩm nɛ sɩm pe-nesi tɛɛ yɔ
«Ɛsɔ sɔɔlɩ ɛjaɖɛ pɩŋŋ nɛ ɛcɛlɩ ɛ-Pɩyalʋ ɛgbamɩyɛ.» —YOH. 3:16.
LƖMAƔZƖYƐ SƆSƆÐƐ
Ðɩkaɣ naʋ mbʋ Yehowa laba se ɛsɩnɩ-ɖʋ nɛ ɖɩlʋbɩnɩ kɩwɛɛkɩm yɔ. Ðɩkaɣ naʋ ɖɔɖɔ ɖʋtʋ ndʋ ɛlaba se pɩsa nɛ ɖɩlɩɩ kɩwɛɛkɩm yomiye taa nɛ ɖihiɣ wezuu maatɛŋ yɔ.
1-2. (a) Ɛbɛ kɩwɛɛkɩm kɛnaa? (Kalɩ ɖɔɖɔ «Tɔm tɔbʋʋ.») (b) Nɛ ɛzɩma ɖɩpɩzɩɣ nɛ ɖɩlʋbɩnɩ-pʋ nɛ ɖɩwabɩ-pʋ? (c) Ɛbɛ ɖɩkaɣ naʋ tɔm ñʋʋ kʋnɛ kɩ-taa nɛ Feŋuu Tilimiye ɖɩnɛ ɖɩ-taa tɔm ñʋŋ lɛɛŋ taa? (Kalɩ ɖɔɖɔ «Tɔm ndʋ pama kalɩyaa yɔ» Feŋuu Tilimiye ɖɩnɛ ɖɩ-taa.)
ŊSƆƆLAA se ŋtɩlɩ ɛzɩma Yehowa Ɛsɔ sɔɔlɩ-ŋ siŋŋ yɔ? Ye ŋkpɛlɩkaa nɛ ŋtɩlɩ mbʋ ɛlaba se pɩsa nɛ eholi-ŋ kɩwɛɛkɩm nɛ sɩm pe-nesi tɛɛ yɔ, pɩsɩɣnɩ-ŋ nɛ ŋcosi tɔm ndʋ tɩ-yɔɔ. Kɩwɛɛkɩm a kɛ koyindu sɔsɔ nɛ ŋŋpɩzɩɣ nɛ ŋwabɩ-ɩ ña-maɣmaɣ ño-ɖoŋ taa. Ða-tɩŋa payɩ ɖɩlakɩ kɩwɛɛkɩm paa evemiye nɖɩ, nɛ kɩwɛɛkɩm yɔɔ ɖɩsɩkɩ. (Roma 5:12) Ɛlɛ tɔm kɩbandʋ natʋyʋ wɛɛ: Yehowa yeki se ɖa-taa ɛtɛ se paa pɩɩlabɩ ɛzɩma yɔ, ɛkaɣ-ɖʋ holuu kɩwɛɛkɩm nɛ sɩm pe-nesi tɛɛ.
2 Yehowa Ɛsɔ wɛʋ nɛ ɛsɩɣnɩ ɛyaa se palʋbɩnɩ kɩwɛɛkɩm yɔ, pɩtalɩɣ pɩnzɩ 6000. Ɛbɛ yɔɔ? Mbʋ pʋyɔɔ yɔ ɛsɔɔlɩ-ɖʋ. Kpaɣnɩ ɖooo kiɖe tɛɛ Yehowa sɔɔlɩ ɛyaa, pʋyɔɔ ɛkpɛzɩ nɩŋgbanzɩ sakɩyɛ se pɩsa nɛ ɛsɩnɩ-wɛ nɛ palʋbɩnɩ kɩwɛɛkɩm. Ɛsɔ nawa se kɩwɛɛkɩm kɔŋnɩ sɩm, nɛ ɛtɩsɔɔlɩ se ɖɩsɩ. Ɛsɔɔlaa se ɖɩcaɣ wezuu tam. (Roma 6:23) Nɛ ɛsɔɔlaa se ña ɖɔɖɔ ŋcaɣ wezuu tam. Tɔm ñʋʋ kʋnɛ kɩ-taa, ɖɩkaɣ cosuu tɔm pɔzʋʋ pʋnɛ pɩ-naadozo pɩ-yɔɔ: (1) Lidaʋ ŋgʋ Yehowa ha kɩwɛɛkɩm laɖaa? (2) Ɛbɛ kɩwɛɛkɩm laɖaa kaalabɩ Bibl alɩwaatʋ taa nɛ pɔ-tɔm kɛdɩnɩ Yehowa? (3) Ɛbɛ Yesu laba se pɩsa nɛ eholi ɛyaa kɩwɛɛkɩm nɛ sɩm pe-nesi tɛɛ?
LIDAƲ ŊGƲ YEHOWA HA KƖWƐƐKƖM LAÐAA?
3. Ɛzɩma pɩɖɔma nɛ ɖa-lʋlɩyaa kajalaɣ ñɩma pɩsɩ kɩwɛɛkɩm laɖaa?
3 Alɩwaatʋ ndʋ Yehowa lɩzɩ kajalaɣ abalʋ nɛ kajalaɣ halʋ yɔ, ɛɛsɔɔlaa se pɛwɛɛ koboyaɣ taa. Ɛha-wɛ ɖɩɣa kɩbaŋa, ɛha-wɛ waɖɛ se pɔɖɔkɩ nesi nɛ ɛɖʋ-wɛ tʋmɩyɛ kɩbanɖɛ. Pɩɩwɛɛ se peyele nɛ pa-lʋlʋʋ taa mba su tɛtʋ yɔɔ nɛ pala nɛ tɛtʋ tɩŋa pɩsɩ paradisuu ɛzɩ Edɛɛnɩ kaɖaɣ yɔ. Paɣtʋ kʋɖʋmtʋ ɖeke Ɛsɔ ɖʋ-wɛ, nɛ tɩ-yɔɔ ɖɔm taawɛɛ kaɖɛ. Ɛɛpaɣ-wɛ se ye pamanɩ paɣtʋ ndʋ tɩ-yɔɔ faɖaɖa yɔ pakaɣ sɩbʋ. Ðɩsɩm mbʋ pɩlabɩ pʋwayɩ yɔ. Tiyiyu kɩdɛkɛdʋ nɔɔyʋ kɔma nɛ ɛtakɩ Aɖam nɛ Ɛva se pɩsa nɛ pamaanɩ Ɛsɔ paɣtʋ yɔɔ, nɛ tiyiyu ɛnʋ ɛtaasɔɔlɩ Ɛsɔ nɛ ɛtaasɔɔlɩ ɛyaa ɖɔɖɔ. Aɖam nɛ Ɛva palabɩ mbʋ tiyiyu kɩdɛkɛdʋ ɛnʋ ɛɛsɔɔlaa yɔ. Patɩtaa pa-Caa kʋsɔɔlʋ liu, piyeba nɛ pala kɩwɛɛkɩm. Tɔm ndʋ Yehowa yɔɔdaa yɔ, tɩlabɩ ɖeyi ɖeyi. Kpaɣnɩ evemiye nɖɩ nɛ pɩɖɛɣ lɛ, Aɖam nɛ Ɛva pehiɣ pa-kɩwɛɛkɩm kazʋwa: papaɣzɩ kpadɩyʋʋ, nɛ pɩtɛmnɩ-wɛ nɛ sɩm.—Kiɖe 1:28, 29; 2:8, 9, 16-18; 3:1-6, 17-19, 24; 5:5.
4. Ɛbɛ yɔɔ Yehowa paɖɩɣ kɩwɛɛkɩm nɛ ɛsɩɣnɩ-ɖʋ se ɖɩñɔtɩnɩ-ɩ? (Roma mba 8:20, 21)
4 Yehowa yeba nɛ pama kɛdaɣ ŋga Bibl taa se pɩwazɩ-ɖʋ. Pɩsɩɣnɩ-ɖʋ se ɖɩnɩɩ mbʋ pʋyɔɔ ɛpaɖɩɣ kɩwɛɛkɩm kpem yɔ pɩ-taa. Kɩwɛɛkɩm posuu-ɖʋ nɛ ɖa-Caa Yehowa nɛ piwokini-ɖʋ sɩm taa. (Iza. 59:2) Pʋyɔɔ Sataŋ weyi ɛkɔnɩ kʋñɔmɩŋ ɛnɩ ɩ-tɩŋa yɔ, ɛsɔɔlɩ kɩwɛɛkɩm nɛ eseɣtiɣ ɛyaa se palabɩ-pʋ. Pʋtɔma yɔ, alɩwaatʋ ndʋ Aɖam nɛ Ɛva palabɩ kɩwɛɛkɩm yɔ ɛmaɣzaa se eyeba nɛ tamaɣ ŋga Ɛsɔ kaawɛnɩ ɛyaa yɔɔ yɔ kaɖʋ lɩm. Ɛlɛ ɛtɩna se Yehowa sɔɔlɩm paɣlɩ kpem. Ɛsɔ tɩlɛɣzɩ tamaɣ ŋga ɛlabɩ Aɖam nɛ Ɛva pa-lʋlʋʋ taa mba yɔ kpa. Ɛsɔɔlɩ ɛyaa, pʋyɔɔ ɛha pa-tɩŋa lidaʋ nakʋyʋ kpaagbaa. (Kalɩ Roma mba 8:20, 21.) Yehowa kaanawa se Aɖam nɛ Ɛva pa-lʋlʋʋ taa mba nabɛyɛ kaɣ-ɩ sɔɔlʋʋ nɛ pañamɩ-ɩ. Yehowa kɛ pa-Caa nɛ pa-Lɩzɩyʋ, pʋyɔɔ lɛ ɛkaɣ-wɛ sɩnʋʋ nɛ palɩɩ kɩwɛɛkɩm nesi taa nɛ pɔñɔtɩnɩ-ɩ. Ɛbɛ Yehowa kaɣ labʋ se pɩsa nɛ pɩtɩŋa mbʋ yɔ pɩla?
5. Ɛzɩmtaa Yehowa calɩ haʋ ɛyaa lidaʋ? Lɩzɩ pɩ-taa. (Kiɖe Tɛɛ Tɔm 3:15)
5 Kalɩ Kiɖe Tɛɛ Tɔm 3:15. Yehowa calɩ haʋ ɛyaa lidaʋ alɩwaatʋ ndʋ ɛyɔɔdɩ mbʋ pɩkaɣ tɛmnʋʋ Sataŋ yɔ pɩ-tɔm yɔ. Ɛyɔɔdaa se «lʋlʋʋ taa tʋ» nɔɔyʋ kaɣnɩ yabʋ ɛyaa ñʋʋ. Lʋlʋʋ taa tʋ ɛnʋ ɛkaɣ ɖɩzʋʋ Sataŋ nɛ ɛñɔɔzɩ mbʋ payɩ Sataŋ wɛɛkɩ Edɛɛnɩ yɔ. (1 Yoh. 3:8) Ɛlɛ pʋcɔ nɛ pɩtalɩ mbʋ lɛ, lʋlʋʋ taa tʋ ɛnʋ ɛkaɣ tɔɔʋ kʋñɔŋ. Sataŋ kaɣ-ɩ ɖʋʋ heŋ, pʋ-tɔbʋʋ se ɛkaɣ yebu nɛ ɛsɩ. Pɩkaɣ haʋ Yehowa laŋwɛɛkɩyɛ siŋŋ. Paa mbʋ yɔ, ɛkaɣ haʋ nʋmɔʋ se lʋlʋʋ taa tʋ ɛnʋ ɛtɔɔ kʋñɔŋ mbʋ pʋyɔɔ yɔ pɩkaɣ lɩzʋʋ ɛyaa kɩwɛɛkɩm nɛ sɩm pe-nesi tɛɛ.
CAANAƲ TAA, ƐBƐ ƐYAA LABA SE PEKPEƔ-WƐ PA-KƖWƐƐKƖM NƐ PƆ-TƆM KƐDƖNƖ YEHOWA?
6. Ɛbɛ Aabɛɛlɩ nɛ Noowa nɛ ɛyaa siɣsiɣ tɩnaa lalaa palaba se pɩsa nɛ pɔñɔtɩnɩ Yehowa?
6 Pɩnzɩ wɛɛ nɛ sɩɖɛɣ lɛ, Yehowa wɛɛ nɛ ɛwɩlɩɣ mbʋ ɛyaa pɩzɩɣ pala nɛ pɔñɔtɩnɩ-ɩ yɔ pazɩ pazɩ. Aɖam nɛ Ɛva pakaɖɩnɩ Yehowa Edɛɛnɩ kaɖaɣ taa nɛ pɩtɛ lɛ, pa-pɩyalʋ naalɛ ñɩnʋ Aabɛɛlɩ kaakɛnɩ ɛyʋ kajalaɣ ñɩnʋ weyi ɛɛwɛnɩ tisuu Yehowa yɔɔ yɔ. Aabɛɛlɩ kaasɔɔlɩ Yehowa nɛ ɛñɩnaɣ se ɛ-tɔm ɛkɛdɩnɩ-ɩ nɛ ɛɛsɔɔlaa se ɛñɔtɩnɩ-ɩ, pʋyɔɔ ɛla-ɩ kɩlaʋ nakʋyʋ. Aabɛɛlɩ kaakɛ ninɖiɣyu, pʋyɔɔ ɛkpaɣ heɣsi nasɩyɩ nɛ ɛlaa-sɩ Yehowa. Ɛzɩma pɩlabɩ Yehowa? «Aabɛɛlɩ nɛ ɛ-kɩlaʋ pɔ-tɔm kɛdɩnɩ Yehowa.» (Kiɖe 4:4) Ɛyaa lalaa ɖɔɖɔ kaala-ɩ kɩlaŋ nɛ ɛ-taa la leleŋ nɛ kɩlaŋ ɛnɩ, ɛyaa mba paasɔɔlɩ-ɩ nɛ pataɣ-ɩ liu. Pa-taa nɔɔyʋ lɛ Noowa. (Kiɖe 8:20, 21) Yehowa mʋ kɩlaŋ ɛnɩ nɛ ɛwɩlɩ se kɩwɛɛkɩm laɖaa tɔm pɩzɩɣ nɛ pɩkɛdɩnɩ-ɩ nɛ papɩzɩɣ nɛ pɔñɔtɩnɩ-ɩ. b
7. Abraham tisuu se ɛlaɣ ɛ-pɩyalʋ yɔ, ɛbɛ pɩkpɛlɩkɩɣ-ɖʋ?
7 Abraham ɖɔɖɔ kaawɛnɩ tisuu sɔsɔm Yehowa yɔɔ. Yehowa kaaheyi-i se ɛla nabʋyʋ nɛ pɩɩwɛ kaɖɛ siŋŋ. Eeheyi-i se ɛkpaɣ ɛ-pɩyalʋ Izaakɩ nɛ ɛlaa-ɩ kɩlaʋ. Pɩtʋʋ fɛyɩ se pɩɩha Abraham laŋwɛɛkɩyɛ siŋŋ. Paa mbʋ yɔ ɛñam Yehowa. Ɛlɛ Yehowa sɩnzɩ-ɩ alɩwaatʋ ndʋ ɛcaɣaɣ kʋʋ ɛ-pɩyalʋ yɔ. Kɩɖaʋ ŋgʋ kɩwɩlɩɣ-ɖʋ mbʋ Yehowa kaaɖʋwa se ɛlakɩ pʋwayɩ yɔ. Ɛkaɣ tisuu nɛ ɛlaa ɛ-Pɩyalʋ kʋsɔɔlʋ. Yehowa sɔɔlɩ ɛyaa pɩdɩɩfɛyɩ.—Kiɖe 22:1-18.
8. Kɩlaŋ weyi palaɣaɣ Paɣtʋ tɛɛ yɔ, ɛbɛ ɩɩsɩŋnaa? (Levitiki 4:27-29; 17:11)
8 Pɩlabɩ pɩnzɩ sakɩyɛ pʋwayɩ lɛ, Yehowa cɛlɩ Izrayɛɛlɩ mba Paɣtʋ. Nɛ Paɣtʋ ndʋ tɩ-taa, eheyi-wɛ se palaa kɩlaŋ nɛ pɩsa nɛ ekpeɣ-wɛ pa-kɩwɛɛkɩm. (Kalɩ Levitiki 4:27-29; 17:11.) Kɩlaŋ ɛnɩ ɩɩsɩŋnɩ kɩlaʋ sɔsɔʋ nakʋyʋ, nɛ kɩ-yɔɔ Yehowa kaɣ tɩŋnʋʋ nɛ ɛlɩzɩ ɛyaa kɩwɛɛkɩm nesi tɛɛ caɣ caɣ. Ɛsɔ heyi ɛ-nayaa se pama lʋlʋʋ taa tʋ weyi ɛ-yɔɔ ɛkaɣ tɩŋnʋʋ nɛ ɛla mbʋ yɔ ɛ-tɔm. Palɩzɩ pɩ-taa se lʋlʋʋ taa tʋ ɛnʋ ɛkaɣ kɛʋ Ɛsɔ Pɩyalʋ weyi ɛwɛ ŋgee yɔ, nɛ ɛkaɣ tɔɔʋ kʋñɔŋ nɛ ɛsɩ. Ɛkaɣ wɛʋ ɛzɩ heɣa ŋga pala-kɛ yɔ. (Iza. 53:1-12) Maɣzɩ tɔm tʋnɛ tɩ-yɔɔ nɛ ŋna: Yehowa kaɣ kpaɣʋ ɛ-Pɩyalʋ kʋsɔɔlʋ nɛ ɛlaa se pɩsa nɛ ɛlɩzɩ ɛyaa kɩwɛɛkɩm nɛ sɩm pe-nesi tɛɛ, nɛ ña ɖɔɖɔ ŋwɛ pa-taa.
ƐBƐ YESU LABA SE PƖSA NƐ EHOLI ƐYAA?
9. Suwe Yohanɛɛsɩ lɩm mɩyɩsɩyʋ yɔɔdɩ Yesu yɔɔ? (Ebree mba 9:22; 10:1-4, 12)
9 Kajalaɣ pɩnzɩ mɩnʋʋ taa, Yohanɛɛsɩ lɩm mɩyɩsɩyʋ na Yesu nɛ ɛyɔɔdɩ se:«Ɩna Ɛsɔ Heɣa ŋga kahɩzɩɣ ɛjaɖɛ kɩwɛɛkɩm yɔ!» (Yoh. 1:29) Tɔm ndʋ tɩwɩlɩɣ se Yesu kaakɛnɩ lʋlʋʋ taa tʋ weyi paayɔɔdɩ ɛ-tɔm nɛ pɩɖɛɛ yɔ. Ɛnʋ kaɣnɩ laʋ e-wezuu. Lɛɛlɛɛyɔ lɛ, kɩwɛɛkɩm laɖaa wɛnɩ lidaʋ se pakaɣ wabʋ kɩwɛɛkɩm caɣ caɣ.—Kalɩ Ebree mba 9:22; 10:1-4, 12.
10. Ɛzɩma Yesu wɩlaa se ɛkɔm se ɛyaa kɩwɛɛkɩm laɖaa?
10 Ɛyaa mba kɩwɛɛkɩm kaawɛnɩ ɖoŋ pɔ-yɔɔ yɔ, pɔ-yɔɔ Yesu kaakɩlɩ kam ɛ-lɩmaɣza nɛ ɛyaa-wɛ se papɩsɩ ɛ-wayɩ tɩŋɩyaa. Ɛɛnawa se kɩwɛɛkɩm yebina nɛ ɛyaa tɔkɩ kʋñɔŋ. Pʋyɔɔ ɛɛsɩnɩ kɔzɩ kɔzɩ ɛyaa mba paakɛ kɩwɛɛkɩm laɖaa yɔ. Ɛtɩŋnɩ kɩɖaʋ nakʋyʋ yɔɔ nɛ ɛlɩzɩ tɔm ndʋ tɩ-taa. Ɛyɔɔdaa se: «Ɛyaa mba pɛwɛnɩ pa-alaafɩya yɔ, pɩtɩkɛ mba pɩpɔzʋʋ ɖɔkɔtɔ, ɛlɛ kʋdɔndɩnaa pɩpɔzʋʋ ɖɔkɔtɔ.» Ɛsɔzaa se: «Pɩtɩkɛ ɛyaa siɣsiɣ tɩnaa mɔnkɔm yaʋ, ɛlɛ kɩwɛɛkɩm laɖaa.» (Mat. 9:12, 13) Mbʋ ɖeyi ɖeyi Yesu laba. Ɛkpaɣaa nɛ ekpeɣ halʋ kɩwɛɛkɩm laɖʋ nɔɔyʋ. Halʋ ɛnʋ ɛhɩzɩ Yesu nɩŋgbanzɩ yɔɔ nɛ ɛ-ɛsɩtɛɣlɩm. (Luka 7:37-50) Ɛwɩlɩ Samaarii halʋ nɔɔyʋ toovenim tɔm kɩcɛyɩtʋ lɔkɔ nakʋyʋ cɔlɔ, paa ɛɛnawa se halʋ ɛnʋ ɛcakaɣ wezuu kɩdɛkɛdʋʋ yɔ. (Yoh. 4:7, 17-19, 25, 26) Halɩ Ɛsɔ ha Yesu ɖoŋ se ɛwa sɩm. Ɛzɩma tɩyɛ? Yesu kaafezi ɛyaa nabɛyɛ nɛ sɩɖaa taa.—Mat. 11:5.
11. Ɛbɛ yɔɔ kɩwɛɛkɩm laɖaa kaasɔɔlaa se pɔñɔtɩnɩ Yesu?
11 Pɩɩɖɩɣzɩɣ-ɖʋ se halɩ kɩwɛɛkɩm laɖaa sɔsaa pɩzaa nɛ pɔñɔtɩnɩ Yesu. Ɛnaɣaɣ pa-pʋtɔdɩyɛ nɛ ɛnɩɣaɣ pe-siziŋ. Sɔɔndʋ taakpaɣ-wɛ se pɔyɔɔdɩnɩ-ɩ. (Luka 15:1, 2) Pɩtasɩ lɛ, Yesu saŋaɣ mba paawɛnɩ tisuu ɛ-yɔɔ yɔ nɛ ɛwazɩɣ-wɛ. (Luka 19:1-10) Ekpeɣaɣ-wɛ pa-kɩwɛɛkɩm faaa ɛzɩ ɛ-Caa yɔ. (Yoh. 14:9) Ɛtɩŋnɩ ɛ-yɔɔdaɣ nɛ ɛ-lakasɩ yɔɔ nɛ ɛwɩlɩ-wɛ se ɛ-Caa weyi ɛkɛ pʋtɔdɩyɛ nayʋ nɛ ekpeɣu ɛyaa faaa yɔ, ɛsɔɔlɩ-wɛ nɛ ɛsɔɔlaa se ɛsɩnɩ pa-taa paa weyi nɛ ɛwa kɩwɛɛkɩm. Yesu sɩnɩ kɩwɛɛkɩm laɖaa nɛ pɔsɔɔlɩ se pɛlɛɣzɩ pe-wezuu caɣʋ nɛ patɩŋ ɛ-wayɩ.—Luka 5:27, 28.
12. Tɔm ndʋ Yesu yɔɔdɩ ɛ-sɩm yɔɔ?
12 Yesu kaasɩm mbʋ pɩɩɖaŋɩ-ɩ nɛ ɛsɩndaa yɔ. Eeheyi ɛ-wayɩ tɩŋɩyaa tam sakɩyɛ se pakaɣ ɛ-wayɩ lɩʋ nɛ pakamɩ-ɩ sizika yɔɔ. (Mat. 17:22; 20:18, 19) Ɛɛnawa se ɛ-kɩlaʋ kaɣ hɩzʋʋ ɛjaɖɛ kɩwɛɛkɩm ɛzɩ Yohanɛɛsɩ nɛ nayaa paayɔɔdʋʋ yɔ. Yesu tasɩ yɔɔdʋʋ se ɛlaɣ e-wezuu nɛ pɩtɛ lɛ, ɛkaɣ «hɔm ɛyaa ndɩ ndɩ» nɛ ɛ-yɔɔ. (Yoh. 12:32) Ye kɩwɛɛkɩm laɖaa itisaa se Yesu ɛkɛ pa-Kɩbaɣlʋ nɛ pɔɖɔŋ ɛ-nɩŋgbanzɩ taa yɔ, pɔ-tɔm kaɣ kɛdɩnʋʋ Yehowa. Ye palabɩ mbʋ yɔ, pakaɣ-wɛ ‘holuu kɩwɛɛkɩm nesi tɛɛ.’ (Roma 6:14, 18, 22; Yoh. 8:32) Pʋyɔɔ Yesu labɩ abalɩtʋ nɛ etisi se ɛtɔɔ kʋñɔŋ nɛ ɛsɩ.—Yoh. 10:17, 18.
13. (a) Ɛzɩma pɩɖɔma nɛ pakʋ Yesu? (b) Ɛbɛ ɛ-sɩm kpɛlɩkɩɣ-ɖʋ Ɛsɔ Yehowa yɔɔ? (Cɔnɩ ɖɔɖɔ kɩlɛmʋʋ.)
13 Palɩ Yesu wayɩ, pakpa-ɩ, patʋʋ-ɩ, pɔyɔɔdɩ tɔm kɩdɛkɛdɩtʋ ɛ-yɔɔ, pahʋʋnɩ-ɩ tɔm nɛ halɩ pawɩlɩ-ɩ ñaŋ. Sɔɔjanaa woni-i ɖenɖe pɩɩwɛɛ se pakʋ-ɩ yɔ nɛ pakamɩ-ɩ sizika yɔɔ. Alɩwaatʋ ndʋ Yesu nɩɣaɣ siziŋ kʋñɔmɩŋ ɛnɩ ɩ-tɩŋa ɩ-taa yɔ, nɔɔyʋ ɖɔɖɔ kaanɩ siziŋ nɛ pɩkpaɖɩ. Ɛnʋ lɛ Yehowa. Ɛɛwɛnɩ ɖoŋ nɛ waɖɛ se ɛsɩnzɩ siziŋ weyi ɛ-Pɩyalʋ nɩɣaɣ yɔ, ɛlɛ ɛtɩla mbʋ. Ɛbɛ yɔɔ? Ɛbɛ seɣti caja sɔɔlɩm tʋ ɛnʋ nɛ ɛla mbʋ? Sɔɔlɩm seɣtini-i nɛ ɛla mbʋ. Yesu yɔɔdaa se: «Ɛsɔ sɔɔlɩ ɛjaɖɛ pɩŋŋ nɛ ɛcɛlɩ ɛ-Pɩyalʋ ɛgbamɩyɛ, se pɩsa nɛ weyi ɛwɛɣnɩ tisuu ɛ-yɔɔ yɔ, pataaɖɩzɩ-ɩ ɛlɛ ehiɣ wezuu maatɛŋ.»—Yoh. 3:16.
Alɩwaatʋ ndʋ Yehowa ha nʋmɔʋ se pakʋ ɛ-Pɩyalʋ nɛ piholi-ɖʋ kɩwɛɛkɩm nɛ sɩm pe-nesi tɛɛ yɔ, ɛnɩ siziŋ siŋŋ (Cɔnɩ tayʋʋ 13)
14. Ɛbɛ Yesu kɩlaʋ kpɛlɩkɩɣ-ŋ?
14 Yesu kɩlaʋ kɛnɩ yʋsaɣ sɔsɔɔ ŋga kawɩlɩɣ se Yehowa sɔɔlɩ Aɖam nɛ Ɛva pa-lʋlʋʋ taa mba yɔ. Pɩwɩlɩɣ se ɛsɔɔlɩ-ŋ siŋŋ. Ɛkpaɣ mbʋ ɛwɛna nɛ pɩkɩlɩ ɖeu yɔ nɛ ɛcɛlɩ, nɛ ɛnɩ siziŋ siŋŋ se pɩsa nɛ ɛlɩzɩ-ŋ kɩwɛɛkɩm nɛ sɩm pe-nesi tɛɛ. (1 Yoh. 4:9, 10) Toovenim taa lɛ, ɛsɔɔlaa se ɛsɩnɩ ɖa-taa paa weyi nɛ ɛlʋbɩnɩ kɩwɛɛkɩm nɛ ɛwabɩ-pʋ.
15. Pʋcɔ nɛ kɩhɛyʋʋ pʋ-ñʋʋ taa kʋjɔʋ ŋgʋ Ɛsɔ labɩ-ɖʋ yɔ kɩwazɩ-ɖʋ lɛ, ɛbɛ pɩwɛɛ se ɖɩla?
15 Kɩhɛyʋʋ pʋ-ñʋʋ taa kʋjɔʋ ŋgʋ Ɛsɔ labɩ-ɖʋ nɛ ɛkpaɣ ɛ-Pɩyalʋ ɛgbamɩyɛ nɛ ɛlaa yɔ, kiyeki se pakpaɣ ɖa-kɩwɛɛkɩm nɛ pekpeɣ-ɖʋ. Ɛlɛ pʋcɔ nɛ Ɛsɔ kpaɣ nɛ ekpeɣ-ɖʋ lɛ, pɩwɛɛ se ɖɩla nabʋyʋ. Ɛbɛ pɩwɛɛ se ɖɩla? Yohanɛɛsɩ Lɩm Mɩyɩsɩyʋ nɛ Yesu pɔyɔɔdaa se: «Ikpiɖi mɩ-kɩwɛɛkɩm yɔɔ, mbʋ pʋyɔɔ yɔ ɛsɔdaa Kewiyaɣ ñɔtaa.» (Mat. 3:1, 2; 4:17) Ye mbʋ, ye ɖɩsɔɔlɩ toovenim taa se ɖɩlʋbɩnɩ kɩwɛɛkɩm nɛ ɖɩñɔtɩnɩ ɖa-Caa sɔɔlɩm tʋ yɔ, pɩwɛɛ se ɖikpiɖi ɖa-kɩwɛɛkɩm yɔɔ. Ɛlɛ ye pɔtɔm se ɖikpiɖi yɔ, pʋ-tɔbʋʋ lɛ suwe? Nɛ ɛzɩma tɩyɛ pɩsɩɣnɩ-ɖʋ se ɖɔ-tɔm ɛkɛdɩnɩ Yehowa paa ɖɩkɛ kɩwɛɛkɩm laɖaa yɔ? Ðɩkaɣ cosuu tɔm ndʋ tɩ-yɔɔ tɔm ñʋʋ ŋgʋ kɩkɔŋ yɔ kɩ-taa.
HENDU 18 Ðɩwɛɛnɩ ɛsɩmɩyɛ Yesu kɩlaʋ yɔɔ
a TƆM TƆBƲƲ: Bibl taa lɛ, tɔm piye «kɩwɛɛkɩm» pɩzɩɣ nɛ pɩkɛ mbʋ ɖɩlakɩ nɛ pɩɩlakɩ nɔɔ kʋɖʋmaɣ nɛ Ɛsɔ paɣtʋ yɔ. Ɛlɛ tɔm piye «kɩwɛɛkɩm» pɩzɩɣ ɖɔɖɔ nɛ pɩkɛ mantɩtalɩ pilim wɛtʋ ndʋ Aɖam ɖɛzɩ-ɖʋ yɔ. Nɛ kɩwɛɛkɩm mbʋ pɛɖɛzɩ-ɖʋ yɔ pʋyɔɔ ɖa-tɩŋa ɖɩsɩkɩ.
