1. Ɛbɛ Yehowa na ɛ-samaɣ yɔɔ?

YEHOWA ƐSƆ “sɔɔlɩ ɛ-ɛyaa samaɣ.” (4 Aw. 2:10) Tɔm ndʋ tɩhaɣ-ɖʋ taa leleŋ siŋŋ! Yehowa na ɖɛ-wɛtʋ kɩbandʋ, ɛna ɛyʋ weyi ɖɩpɩzɩɣ nɛ ɖɩpɩsɩ yɔ, nɛ ɛhɔm-ɖʋ nɛ ɛkɔnɩ ɛ-cɔlɔ. Ye ɖiwobi pɩ-yɔɔ nɛ ɖɩwɛɛ siɣsiɣ ɛ-ɛsɩndaa yɔ, ɛkaɣ wɛʋ ɖɔ-cɔlɔ mbʋ tam.—Yoh. 6:44.

2. Ɛbɛ yɔɔ pɩwɛ nabɛyɛ kaɖɛ se petisi se Yehowa sɔɔlɩ-wɛ?

² Nabɛyɛ pɩzɩɣ nɛ pɔyɔɔdɩ se: ‘Manawa se Yehowa sɔɔlɩ ɛ-samaɣ, ɛlɛ ɛzɩma manpɩzɩɣ mala nɛ mana se Yehowa sɔɔlɩ-m ye palɩzɩ-m men-ɖeke yɔ? Ɛbɛ pɩzɩɣ piyele nɛ nɔɔyʋ pɔzɩ ɛ-tɩ tɔm ndʋ? Payaɣ koobu halɩñɩnʋ nɔɔyʋ se Oksana *, ɛtɔɔ kʋñɔŋ siŋŋ e-pitu taa, ɛyɔɔdaa se: “Man-taa kaalabɩ leleŋ siŋŋ alɩwaatʋ ndʋ maha man-tɩ nɛ pamɩyɩsɩ-m lɩm nɛ manpaɣzɩ paa ɖooye nʋmɔʋ lɩzʋʋ tʋmɩyɛ yɔ. Ɛlɛ pɩnzɩ 15 wayɩ lɛ, manpaɣzɩ tɔzʋʋ kʋñɔmɩŋ weyi maatɔɔ men-pitu taa yɔ ɩ-yɔɔ. Peeɖe mɔnkɔ tɔm ñʋʋ se Yehowa tɩtasɩ-m sɔɔlʋʋ nɛ mantɩmʋna se ɛsɔɔlɩ-m.” Payaɣ koobu halɩñɩnʋ nʋmɔʋ lɩzɩyʋ nɔɔyʋ se Yua. Ɛlɛ ɖɔɖɔ ɛɛtɔɔ kʋñɔmɩŋ sakɩyɛ e-pitu taa. Ɛyɔɔdaa se: “Maha me-wezuu Yehowa mbʋ pʋyɔɔ yɔ, maasɔɔlaa se meyele nɛ ɛ-taa la leleŋ. Ɛlɛ man-taa kaatɛma se ɛɛpɩzɩɣ nɛ ɛsɔɔlɩ-m kpa.”

3. Ɛbɛ ɖɩkaɣ kpɛlɩkʋʋ tɔm ñʋʋ kʋnɛ kɩ-taa?

³ Ɛzɩ koobiya siɣsiɣ tɩnaa mba ɖɩyɔɔdɩ pɔ-tɔm yɔ, ŋsɔɔlɩ Yehowa siŋŋ ɛlɛ pɩtɩla ŋpɩtɩɣ se ɛsɔɔlɩ-ŋ. Ɛbɛ yɔɔ pɩwɛɛ se ña-taa ɛtɛ se toovenim lɛ ɛmaɣzɩɣ ñɔ-yɔɔ? Nɛ ɛbɛ  pɩzɩɣ nɛ pɩsɩnɩ-ŋ alɩwaatʋ ndʋ ŋmaɣzɩɣ se Yehowa tɩsɔɔlɩ-ŋ yɔ? Iyele nɛ ɖicosi tɔm ndʋ tɩ-yɔɔ.

4. Ye ɖɩpɩtɩɣ se Yehowa sɔɔlɩ-ɖʋ yɔ, ɛbɛ yɔɔ pɩkɔŋnɩ-ɖʋ kaɖɛ?

⁴ Sɔɔlɩm kɛ ɖoŋ weyi eseɣtiɣ ɛyʋ yɔ. Ye ɖa-taa ɛtɛma se Yehowa sɔɔlɩ-ɖʋ nɛ ɛsɩɣnɩ-ɖʋ yɔ, pɩkaɣ-ɖʋ seɣtuu nɛ ɖɩsɛɛ-ɩ nɛ ɖa-laŋɩyɛ pilim paa ɖɩkatɩɣ kala yɔ. Ɛlɛ ye ɖɩpɩtɩɣ se Yehowa maɣzɩɣ ɖɔ-yɔɔ yɔ, ‘ɖo-ɖoŋ kɛɣ ɛjandʋ na.’ (Adu. 24:10) Alɩwaatʋ ndʋ pitiki-ɖʋ yɔɔɔ nɛ ɖɩpɩtɩɣ se Ɛsɔ sɔɔlɩ-ɖʋ yɔ, ɖɩɩkaɣ tasʋʋ pɩzʋʋ nɛ ɖɩkaɖɩnɩ Sataŋ.—Efɛz. 6:16.

5. Koobiya nabɛyɛ mba papɩtaɣ se Ɛsɔ sɔɔlɩ-wɛ yɔ ɛbɛ talɩ-wɛ?

⁵ Abʋta yeba nɛ ɖa-alɩwaatʋ taa Krɩstʋ ñɩma siɣsiɣ tɩnaa nabɛyɛ tisuu hɛɛ. James kɛ ɛgbɛyɛ taa ɛzʋtʋyʋ, ɛyɔɔdaa se: “Paa malakaɣ tʋmɩyɛ Betɛɛlɩ nɛ man-taa wɛɛ leleŋ se manɖʋʋ nesi tɔm susuu ɛgbɛyɛ nɖɩ ɖɩ-taa pɔyɔɔdʋʋ kʋnʋŋ kɩfalʋʋ nakʋyʋ yɔ, mɔnpɔzaɣ man-tɩ se toovenim taa lɛ ɛzɩ Yehowa mʋʋ kɩlaŋ weyi malaɣ-ɩ yɔ? Alɩwaatʋ natʋyʋ halɩ mɔnpɔzaɣ man-tɩ se ɛzɩ Yehowa welisiɣ ma-adɩma na?” Eva wɛ ɖɔɖɔ alɩwaatʋ tɩŋa Ɛsɔ sɛtʋ tʋmɩyɛ taa. Ɛyɔɔdaa se: “Menɖiɣzinaa se ye ɛyʋ ɛpɩtɩɣ se Yehowa sɔɔlɩ-ɩ yɔ, pɩkɔŋnɩ-ɩ kaɖɛ mbʋ pʋyɔɔ yɔ, pɩwɛɣnɩ ɖoŋ mbʋ payɩ ɛlakɩ se ɛsɛɛ Yehowa yɔ pɩ-yɔɔ. Piyeki nɛ ɖɩɩtasɩɣ sɔɔlʋʋ fezuu taa tʋma nɛ ɖilesi taa leleŋ weyi ɖihikiɣ Yehowa sɛtʋ taa yɔ.” Michael kɛ paa ɖooye nʋmɔʋ lɩzɩyʋ nɛ ɛkɛ ɖɔɖɔ ɛgbɛyɛ taa ɛzʋtʋyʋ. Ɛyɔɔdaa se: “Ye ŋŋtisiɣ se Ɛsɔ maɣzɩɣ ñɔ-yɔɔ yɔ, ŋkaɣ-ɩ posinuu.”

6. Alɩwaatʋ ndʋ ɖɩpaɣzɩɣ pɩtʋʋ se Yehowa sɔɔlɩ-ɖʋ yɔ, ɛbɛ pɩwɛɛ se ɖɩla?

⁶ Kɩɖaŋ ɩnɛ, ɩwɩlɩɣ se ye ɖɩmaɣzɩɣ se Yehowa tɩsɔɔlɩ-ɖʋ yɔ, pɩpɩzɩɣ nɛ pɩcamɩ ɖe-tisuu kpem. Ɛlɛ ye ɖɩpaɣzɩ pɩtʋʋ se Yehowa sɔɔlɩ-ɖʋ yɔ, ɛbɛ pɩwɛɛ se ɖɩla? Pɩwɛɛ se ɖɩlɔ lɩmaɣza ana kpaagbaa. Pɔzɩ Yehowa se ɛsɩnɩ-ŋ nɛ ŋlɛɣzɩ lɩmaɣza ana nɛ “Ɛsɔ tɛ laŋhɛzɩyɛ nɖɩ ɖɩkaɣ ɖaŋʋʋ ña-laŋɩyɛ nɛ ña-maɣzɩm pɔ-yɔɔ yɔ.” (Keɣa 138:23; Fil. 4:6, 7) Nɛ tɔzɩ se pɩtɩkɛ ñe-ɖeke ŋwɛnɩnɩ lɩmaɣza ana. Koobiya siɣsiɣ tɩnaa lalaa wɛɛ nɛ palʋkɩnɩ lɩmaɣza kɩdɛkɛda ana ɖɔɖɔ. Halɩ caanaʋ taa Yehowa sɛyaa kaakatɩ kala ana. Iyele nɛ ɖɩna lɔŋ weyi apostoloo Pɔɔlɩ kɩɖaʋ pɩzɩɣ nɛ kɩkpɛlɩkɩ-ɖʋ yɔ.

7. Kʋñɔmɩŋ weyi Pɔɔlɩ kaakataa?

⁷ Nabʋyʋ taa pɩlakɩ-ŋ ɛzɩ tʋma sakɩyɛ wɛ ñɔ-yɔɔ nɛ ŋŋpɩzɩɣ se ŋla a-tɩŋa na? Ye mbʋ yɔ, ŋkaɣ nɩʋ Pɔɔlɩ tɔm taa. Pɩtɩkɛ ɛgbɛyɛ kʋɖʋmɖɩyɛ yɔɔ Pɔɔlɩ nɩɣzaɣ, ɛlɛ ɛnɩɣzaɣ “agbaa tɩŋa yɔɔ.” (2 Kɔr. 11:23-28) Ŋlesi ña-taa leleŋ mbʋ pʋyɔɔ yɔ, ŋfɛyɩnɩ tɔnʋʋ taa alaafɩya? Pɔɔlɩ kaakatɩ kʋñɔŋ nakʋyʋ nɛ kɩhaɣaɣ-ɩ wɩzasɩ siŋŋ. Pɩtɩla pɩɩkɛnɩ kʋdɔŋ nakʋyʋ nɛ ɛɛsɔɔlaa se kɩcɛ. (2 Kɔr. 12:7-10) Ña-maɣmaɣ ñɛ-ɛjandʋ yeki nɛ pitiki-ŋ yɔɔɔ nabʋyʋ taa? Mbʋ pɩlakaɣ Pɔɔlɩ alɩwaatʋ natʋyʋ. Ɛya ɛ-tɩ se “ɛyʋ weyi ɛcaɣ pʋtɔdɩyɛ kpem yɔ” mbʋ pʋyɔɔ yɔ, ɛlʋkaɣnɩ ɛ-ɛjandʋ paa ɛzɩmtaa.—Roma 7:21-24.

8. Ɛbɛ kaasɩnɩ Pɔɔlɩ nɛ ɛlʋbɩnɩ ɛ-kʋñɔmɩŋ?

⁸ Paa Pɔɔlɩ kaakatɩ kʋñɔmɩŋ ndɩ ndɩ nɛ pitibi-i yɔɔɔ alɩwaatʋ natʋyʋ taa yɔ, ewobi pɩ-yɔɔ nɛ ɛsɛɣ Yehowa. Ɛbɛ kaasɩnɩ-ɩ nɛ ɛla mbʋ? Paa ɛsɩm ɛ-ɛjandʋ yɔ, ɛɛwɛnɩ tisuu sɔsɔm kɩhɛyʋʋ pʋ-ñʋʋ taa yɔɔ. Ɛɛsɩm tamaɣ ŋga Yesu laba se ‘weyi ɛwɛɣnɩ tisuu Yesu yɔɔ yɔ, ehikiɣ wezuu maatɛŋ yɔ.’ (Yoh. 3:16; Roma 6:23) Pɩtʋʋ fɛyɩ se Pɔɔlɩ kaawɛ ɛyaa mba paawɛnɩ tisuu kɩhɛyʋʋ pʋ-ñʋʋ taa yɔɔ yɔ pa-taa. Ɛ-taa kaatɛma se Yehowa sɔɔlɩ siŋŋ se ɛkpaɣ nɛ ekpeɣ, halɩ pɩkpɛndɩnɩ mba palabɩ kɩwɛɛkɩm sɔsɔm yɔ, ye pekpiɖi pa-kɩwɛɛkɩm yɔɔ yɔ.—Keɣa 85:5.

9. Tɔm ndʋ Pɔɔlɩ ma Galaatii mba 2:20 taa yɔ, ɛbɛ tɩkpɛlɩkɩɣ-ɖʋ?

⁹ Pɔɔlɩ kaawɛnɩ tisuu ɖɔɖɔ se Ɛsɔ sɔɔlɩ-ɩ siŋŋ mbʋ pʋyɔɔ yɔ, ɛɛnawa se Ɛsɔ tiyi Yesu se ɛsɩ ɛ-yɔɔ. (Kalɩ Galaatii mba 2:20.) Na laŋɩyɛ hɛzʋʋ tɔm ndʋ pɛtɛzɩnɩ mayaɣ ŋga yɔ. Pɔɔlɩ yɔɔdaa se: ‘Ɛsɔ Pɩyalʋ sɔɔlɩ-m nɛ ɛkpaɣ ɛ-tɩ nɛ ɛcɛlɩ mɔ-yɔɔ.’ Pɔɔlɩ taamaɣzɩɣ se ɛkɛ ɛyʋ kɩdɛkɛdʋʋ siŋŋ nɛ pʋyɔɔ lɛ Ɛsɔ ɛɛpɩzɩɣ nɛ ɛsɔɔlɩ-ɩ. Ɛtaamaɣzɩɣ se: ‘Manpɩzɩɣ nɛ mana mbʋ pʋyɔɔ Yehowa sɔɔlɩ mon-koobiya yɔ ɛlɛ mantɩsa se ɛpɩzɩɣ nɛ ɛsɔɔlɩ-m.’ Pɔɔlɩ tɔzɩ Roma mba se: “Alɩwaatʋ ndʋ ɖɩɩkɛ kɩwɛɛkɩm laɖaa yɔ, Krɩstʋ sɩbɩ ɖɔ-yɔɔ.” (Roma 5:8) Nabʋyʋ ɛɛpɩzɩɣ nɛ pɩɖɩɣ Ɛsɔ nʋmɔʋ se ɛtaasɔɔlɩ-ɖʋ!

10. Lɔŋ weyi Roma mba 8:38, 39 kpɛlɩkɩɣ-ɖʋ?

¹⁰ Kalɩ Roma mba 8:38, 39. Pɔɔlɩ taa kaatɛm siŋŋ se Ɛsɔ sɔɔlɩm wɛ ɖoŋ. Ɛmawa se nabʋyʋ ɛɛkaɣ “pɩzʋʋ nɛ pɩyasɩ-ɖʋ nɛ Ɛsɔ sɔɔlɩm.” Pɔɔlɩ kaanawa se Yehowa kaaɖʋ suuɖu siŋŋ Izrayɛɛlɩ piya yɔɔ. Ɛɛna ɖɔɖɔ ɛzɩma Yehowa na ɛ-pʋtɔdɩyɛ yɔ. Ðɩpɩzɩɣ nɛ ɖikpeɣli Pɔɔlɩ tɔm ɛzʋnɔ: ‘Ye Yehowa etiyi ɛ-maɣmaɣ ɛ-Pɩyalʋ se ɛsɩ mɔ-yɔɔ yɔ,  mantasɩ wɛnʋʋ kawanaɣ nakɛyɛ se manpɩtɩ ɛ-sɔɔlɩm yɔɔ?’—Roma 8:32.

11. Paa Pɔɔlɩ kaalabɩ kɩwɛɛkɩm ɛzɩ mbʋ pɩ-tɔm pɔyɔɔdɩ 1 Timootee 1:12-15 taa yɔ, ɛbɛ yɔɔ ɛ-taa kaatɛma se Ɛsɔ sɔɔlɩ-ɩ?

¹¹ Kalɩ 1 Timootee 1:12-15. Pɩtɩla alɩwaatʋ natʋyʋ Pɔɔlɩ tɔzaɣ mbʋ ɛɛlaba pʋcɔ nɛ ɛpɩsɩɣ Krɩstʋ tʋ yɔ pɩ-yɔɔ nɛ pɩcɛyɩɣ-ɩ siŋŋ. Pɩɩɖɩɣzɩɣ-ɖʋ se ɛya ɛ-tɩ se kɩwɛɛkɩm laɖaa taa “kajalaɣ ñɩnʋ.” Pʋcɔ nɛ Pɔɔlɩ tɩlɩɣ toovenim lɛ, ɛɛnazɩ Krɩstʋ ñɩma tɛtʋ ndɩ ndɩ taa, ɛɛkpa nabɛyɛ nɛ ɛɖʋ salaka nɛ eetisaa se pakʋ nabɛyɛ. (Tʋma 26:10, 11) Ye pɩlaba se Pɔɔlɩ katɩ Krɩstʋ ñɩma mba ɛɛɖʋ nesi nɛ pakʋ-wɛ yɔ pa-pɩɣa nakɛyɛ yɔ, pɩtʋʋ fɛyɩ se pɩɩcɛyɩ-ɩ siŋŋ. Pɔɔlɩ kaakpiɖi ɛ-kɩwɛɛkɩm yɔɔ, ɛlɛ ɛnawa se ɛɛpɩzɩɣ nɛ ɛlɛɣzɩ mbʋ ɛtɛm labʋ nɛ pɩɖɛɛ yɔ. Eetisaa se Krɩstʋ sɩbɩ ɛ-yɔɔ nɛ ɛma se: “Pɩtɩŋnɩ Ɛsɔ lootiye yɔɔ lɛ, mɛnkɛ mbʋ mɛnkɛwa yɔ.” (1 Kɔr. 15:3, 10) Lɔŋ weyi pɩkpɛlɩkɩɣ-ɖʋ? Tisi se Krɩstʋ sɩbɩ ñɔ-yɔɔ nɛ ɛha-ŋ waɖɛ se taabalɩyɛ kɩbanɖɛ ɛwɛɛ ña nɛ Yehowa mɩ-hɛkʋ taa. (Tʋma 3:19) Pɩtɩkɛ kɩwɛɛkɩm mbʋ ɖɩɩlaba nɛ pɩɖɛɛ yɔ, alɩwaatʋ ndʋ ɖɩɩkɛ Yehowa Aseɣɖe Tʋ yaa ɖɩtaakɛ yɔ, pɩ-tɔm cɛyɩnɩ Ɛsɔ ɛsɩndaa ɛlɛ mbʋ ɖɩlakɩ lɛɛlɛɛyɔ nɛ mbʋ ɖɩkaɣ labʋ cee wayɩ yɔ pɩ-tɔm cɛyɩnɩ ɛ-ɛsɩndaa.—Iza. 1:18.

12. Ye ɖɩmaɣzɩɣ se ɖɩfɛyɩ wazaɣ yaa ɖɩtɩmʋna se pɔsɔɔlɩ-ɖʋ yɔ, ɛzɩma tɔm ndʋ tɩwɛ 1 Yohanɛɛsɩ 3:19, 20 taa yɔ tɩpɩzɩɣ nɛ tɩsɩnɩ-ɖʋ?

¹² Alɩwaatʋ ndʋ ŋmaɣzɩɣ ɛzɩma Yesu sɩbɩ ña-kɩwɛɛkɩm yɔɔ yɔ pɩ-yɔɔ yɔ, ŋpɩzɩɣ nɛ ŋyɔɔdɩ se: ‘Mamaɣzɩɣ se mantɩmʋna se paɖʋ-m hɩɖɛ mbʋ.’ Ɛbɛ yɔɔ ŋpɩzɩɣ nɛ ŋmaɣzɩ mbʋ? Ða-laŋɩyɛ tɩtalɩ pilim, nɛ ɖɩpɩzɩɣ nɛ ɖipeɣzi-ɖʋ nɛ ɖɩmaɣzɩɣ se ɖɩfɛyɩnɩ wazaɣ nakɛyɛ yaa ɖɩtɩmʋna se pɔsɔɔlɩ-ɖʋ. (Kalɩ 1 Yohanɛɛsɩ 3:19, 20.) Alɩwaatʋ ndʋ lɩmaɣza ana apaɣzɩɣ kɔm ɖa-ñʋʋ taa yɔ, pɩwɛɛ se ɖɩtɔzɩ se “Ɛsɔ kɩlɩ ɖa-laŋa.” Sɔɔlɩm mbʋ  ɖa-Caa weyi ɛwɛ ɛsɔdaa yɔ ɛwɛnɩ ɖɔ-yɔɔ yɔ, pɩwɛ ɖoŋ nɛ pɩkɩlɩ lɩmaɣza kɩdɛkɛda wena amɛlɩ ɖa-laŋa taa yɔ. Pɩwɛɛ se ɖɩñaɣ pana nɛ ɖitisi se Yehowa sɔɔlɩ-ɖʋ. Pɩsa nɛ ɖɩla mbʋ lɛ, pɩwɛɛ se ɖɩkpɛlɩkɩɣ Ɛsɔtɔm ɖoŋ ɖoŋ, ɖɩtɩmɩɣ kaahɛzaɣ nɛ ɖɩkpakɩɣ alɩwaatʋ nɛ ɖa nɛ Ɛsɔ sɛyaa ɖɩcakɩ. Ɛbɛ yɔɔ pɩcɛyɩ siŋŋ se ɖɩlakɩ mbʋ?

13. Ɛzɩma Ɛsɔtɔm kpɛlɩkʋʋ pɩzɩɣ nɛ pɩsɩnɩ-ɖʋ? (Kalɩ ɖɔɖɔ aɖakaɣ “ Ɛzɩma Ɛsɔtɔm sɩɣnɩ-wɛ yɔ.”)

¹³ Kpɛlɩkɩɣ Ɛsɔtɔm paa evemiye nɖɩ, nɛ ŋkaɣ naʋ Yehowa wɛtʋ kɩbandʋ sakɩyɛ nɛ pɩkɩlɩ. Ŋkaɣ naʋ se ɛsɔɔlɩ-ŋ siŋŋ. Ye ŋmaɣzɩɣ Ɛsɔtɔm yɔɔ paa evemiye nɖɩ yɔ, pɩpɩzɩɣ pɩsɩnɩ-ŋ nɛ ŋmaɣzɩ ña-ñʋʋ taa camɩyɛ nɛ ŋsɩnzɩ wondu ña-maɣzɩm nɛ ña-laŋɩyɛ taa camɩyɛ. (2 Tim. 3:16) Payaɣ Ɛgbɛyɛ taa ɛzʋtʋyʋ nɔɔyʋ se Kevin, ɛɛlʋbɩnɩ lɩmaɣza wena ɛwɛna nɛ pɩlakɩ-ɩ ɛzɩ ɛtɩlɩɩ pʋyʋ yɔ. Ɛyɔɔdaa se: “Mankalɩ Keɣa 102 taa tɔm nɛ mamaɣzɩ tɩ-yɔɔ lɛ, pɩsɩnɩ-m nɛ mɔñɔɔzɩ ma-lɩmaɣza nɛ manɩɩ pɩ-taa se Yehowa maɣzɩɣ mɔ-yɔɔ siŋŋ.” Koobu halɩñɩnʋ Eva weyi ɖɩtɛm ɛ-tɔm yɔɔdʋʋ nɛ pɩɖɛɛ yɔ ɛyɔɔdaa se: “Evemiye tɛŋ lɛ, mankpakɩɣ alɩwaatʋ nɛ mamaɣzɩɣ mbʋ pɩ-tɔm cɛyɩ Yehowa ɛsɩndaa yɔ pɩ-yɔɔ. Piyeki nɛ ma-laŋɩyɛ hɛɣ nɛ pɩkpazɩɣ men-tisuu ɖoŋ.”

14. Ɛzɩma adɩma pɩzɩɣ nɛ pɩsɩnɩ-ɖʋ?

¹⁴ Tɩmɩɣ kaahɛzaɣ. (1 Tes. 5:17) Ye ŋsɔɔlaa se ña nɛ ɛyʋ nɔɔyʋ ɩɖʋ taabalɩyɛ yɔ, pɩwɛɛ se ŋyɔɔdʋʋnɩ-ɩ ɖoŋ ɖoŋ nɛ ŋheyiɣ-i ɛzɩma pɩlakɩ-ŋ yɔ. Mbʋ pɩwɛ ɖa nɛ Yehowa ɖa-taabalɩyɛ hɔɔlʋʋ taa ɖɔɖɔ. Alɩwaatʋ ndʋ ɖiheyiɣ-i ɛzɩma pɩlakɩ-ɖʋ yɔ, ɖa-lɩmaɣza, nɛ mbʋ pɩcɛyɩɣ-ɖʋ yɔ adɩma taa yɔ, ɖɩwɩlɩɣ se ɖɩtaɣ-ɩ liu nɛ ɖɩnawa se ɛsɔɔlɩ-ɖʋ. (Keɣa 93:17-19; 1 Yoh. 5:14, 15) Yua weyi ɖɩyɔɔdɩ ɛ-tɔm nɛ pɩɖɛɛ yɔ, ɛyɔɔdaa se: “Maatɩmɩɣ lɛ, pɩtɩkɛ mbʋ pɩlabɩ me-evemiye taa yɔ pi-ɖeke pɩ-tɔm meheyiɣ Yehowa; meheyiɣ-i ndʋ ɖeyi ɖeyi mamaɣzɩɣ yɔ nɛ ɛzɩma pɩlakɩ-m yɔ. Alɩwaatʋ wɛɛ nɛ tɩɖɛɣ lɛ, maatasɩɣ naʋ Yehowa ɛzɩ tʋmɩyɛ naɖɩyɛ ñʋʋdʋ yɔ, ɛlɛ manaɣ-ɩ ɛzɩ Caja weyi ɛsɔɔlɩ e-piya siŋŋ yɔ.”—Kalɩ aɖakaɣ “ Ŋkalɩ-kɛ?”

15. Ɛzɩma Yehowa wɩlɩɣ se ɛmaɣzɩɣ ɖɔ-yɔɔ?

¹⁵ Kpakɩɣ alɩwaatʋ nɛ ña nɛ taabalaa mba pɛwɛ siɣsiɣ yɔ ɩcakɩ; pɛkɛnɩ kʋjɔʋ ŋgʋ kɩlɩnɩ Yehowa cɔlɔ yɔ. (Yak. 1:17) Ða-Caa weyi ɛwɛ ɛsɔdaa yɔ, ɛha-ɖʋ ɛgbɛyɛ taa koobiya mba ‘pɔsɔɔlʋʋ paa ɖooye yɔ’ nɛ ɛwɩlɩɣnɩ-ɖʋ se ɛmaɣzɩɣ ɖɔ-yɔɔ. (Adu. 17:17) Takayaɣ ŋga Pɔɔlɩ ma Koloosi mba yɔ ka-taa, ɛya Krɩstʋ ñɩma mba paasɩnɩ-ɩ yɔ pa-taa nabɛyɛ hɩla nɛ ɛtɔ se: “Papɩsɩ mba pɛhɛzɩ ma-laŋɩyɛ siŋŋ yɔ.” (Kol. 4:10, 11) Halɩ pɩɩpɔzaa se pasɩnɩ Krɩstʋ Yesu, nɛ pɩɩkɛdɩnɩ-ɩ  se ɛ-taabalaa, ɛyaa nɛ Ɛsɔ tiyiyaa paasɩnɩ-ɩ.—Luka 22:28, 43.

16. Ɛzɩma taabalaa mba pɛwɛ siɣsiɣ yɔ papɩzɩɣ pasɩnɩ-ɖʋ nɛ ɖɩñɔtɩnɩ Yehowa?

¹⁶ Kʋjɔʋ ŋgʋ Yehowa labɩ-ŋ nɛ ɛha-ŋ taabalaa mba pɛwɛ siɣsiɣ yɔ, kɩwɛɛ nɛ kɩwazɩ-ŋ camɩyɛ na? Alɩwaatʋ ndʋ ɖiheyiɣ kʋñɔmɩŋ weyi ɖɩkatɩɣ yɔ ɩ-tɔm taabalʋ weyi ɛpɩ fezuu taa yɔ, pɩɩwɩlɩɣ se ɖe-tisuu hɛwa, ɛlɛ pɩpɩzɩɣ nɛ pihuuzi ɖɔ-yɔɔ. James, weyi ɖɩyɔɔdɩ ɛ-tɔm nɛ pɩɖɛɛ yɔ ɛyɔɔdaa se: “Ma nɛ Krɩstʋ ñɩma mba papɩ fezuu taa yɔ ɖɩɖʋ taabalɩyɛ kɩbanɖɛ lɛ, pɩsɩnɩ-m kpem. Alɩwaatʋ ndʋ lɩmaɣza kɩdɛkɛda kɩlɩɣ-m yɔ, taabalaa kɩbama mba, paɖʋʋ suuɖu nɛ pewelisiɣni-m nɛ peheyiɣ-m se pɔsɔɔlɩ-m. Pɩtɩŋnɩ pɔ-yɔɔ lɛ, menɖiɣzinaa se Yehowa sɔɔlɩ-m nɛ ɛmaɣzɩɣ mɔ-yɔɔ.” Pɩcɛyaa se ɖɩñaɣ pana nɛ taabalɩyɛ kɩbanɖɛ wɛɛ ɖa nɛ ɖo-koobiya ɖɛ-hɛkʋ taa.

17-18. Anɩ pɩwɛɛ se ɖiwelisina, nɛ ɛbɛ yɔɔ?

¹⁷ Sataŋ sɔɔlaa se ɖiyele lʋbʋ se ɖɩlakɩ mbʋ pɩwɛ ɖeu yɔ. Ɛsɔɔlaa se ɖɩmaɣzɩ se Yehowa tɩsɔɔlɩ-ɖʋ nɛ ɖɩtɩmʋna se Yehowa ɛya ɖa-ñʋʋ. Ɛlɛ ɛzɩ ɖɩnaʋ yɔ, pɩtɩkɛ toovenim.

¹⁸ Yehowa sɔɔlɩ-ŋ. Ŋmʋ ñɩm siŋŋ ɛ-ɛsɩndaa. Ye ŋñaŋɩ-ɩ yɔ, ŋkaɣ wɛʋ “ɛ-sɔɔlɩm taa tam” ɛzɩ Yesu yɔ. (Yoh. 15:10) Ye mbʋ, taawelisini Sataŋ yaa ña-laŋɩyɛ nɖɩ ɖɩkʋʋ ñɔ-tɔm yɔ. Ɛlɛ welisini Yehowa, ɛnʋ weyi ɛnaɣ kɩbam mbʋ pɩwɛ ɖa-taa paa weyi ɛ-taa yɔ. Ña-taa ɛtɛ se ‘ɛsɔɔlɩ ɛ-samaɣ,’ pɩkpɛndɩnɩ ña-ɖɔɖɔ!