Alɩwaatʋ pazɩ pʋcɔ nɛ Yesu sɩkɩ lɛ, ɛbɛ yɔɔ ɛyɔɔdɩ Daviid tɔm ndʋ tɩwɛ keɣa 21:2 taa yɔ?

Alɩwaatʋ pazɩ pʋcɔ nɛ Yesu sɩkɩ lɛ, ɛyɔɔdɩ Maatiyee 27:46 taa tɔm tʋnɛ: “Mɛ-Ɛsɔ, mɛ-Ɛsɔ, ɛbɛ yɔɔ ŋlɔ-m?” Alɩwaatʋ ndʋ Yesu yɔɔdɩ tɔm ndʋ yɔ, eyeba nɛ tɔm ndʋ keɣa maɖʋ Daviid ma Keɣa 21:2 taa yɔ tɩla. (Mark. 15:34) Pɩɩwɛɣ ɖeu se ɖɩkɔ tɔm ñʋʋ se Yesu yɔɔdɩ tɔm tʋnɛ mbʋ pʋyɔɔ yɔ ɛlɔ lidaʋ yaa elesi tisuu alɩwaatʋ pazɩ. Yesu kaasɩm mbʋ pʋyɔɔ pɩɩwɛɛ se ɛsɩ yɔ camɩyɛ, nɛ ɛɛsɔɔlɩ faaa se ɛsɩ. (Mat. 16:21; 20:28) Ɛɛnawa ɖɔɖɔ se ɛ-sɩm alɩwaatʋ talɩɣ lɛ, Yehowa ɛɛkaɣ ‘huuzuu ɛ-yɔɔ.’ (Yɔɔb 1:10) Ye mbʋ, Yehowa tihuuzi Yesu yɔɔ se pɩsa nɛ Yesu wɩlɩ se paa ɛ-sɩm kaawɛ kaɖɛ ɛzɩma yɔ, ɛɖɔkʋʋ e-siɣsiɣ wɛtʋ paa ɛzɩmtaa.—Mark. 14:35, 36.

Ye mbʋ, ɛbɛ yɔɔ Yesu yɔɔdɩ Keɣa ŋga ka-taa tɔm? Paa ɖɩɩsɩŋ mbʋ pʋyɔɔ ɖeyi ɖeyi Yesu yɔɔdɩ tɔm ndʋ yɔ, iyele nɛ ɖɩna lɩmaɣza wena a-yɔɔ pɩtɩla ɛyɔɔdɩ-tʋ yɔ a-taa naayɛ. *

Yesu yɔɔdʋʋ tɔm ndʋ yɔ, ɛzɩ ɛwɛɛ nɛ ɛwɩlɩɣ se Yehowa ɛɛkaɣ ɖʋʋ nesi ɛ-sɩm taa? Pɩtaawɛɛ se Yehowa ɛsɩnɩ Yesu nɛ pʋcɔ ɛhɛyɩ kɩhɛyʋʋ pʋ-ñʋʋ taa. Ɛɛkɛ ɛyʋ nɛ pɩɩwɛɛ se ɛsɩ nɛ pɩsa nɛ ɛpɩzɩ “ɛɖɩŋ sɩm paa ɛyʋ weyi lɛ ɛ-yɔɔ.”—Ebr. 2:9.

Yesu yɔɔdʋʋ keɣa ŋga ka-taa tɔm ndʋ yɔ, ɛzɩ ɛɛwɛɛ nɛ ɛhɔŋ ɛyaa lɩmaɣza nɛ ewokini keɣa ŋga ka-taa tɔm tɩŋa yɔɔ? Alɩwaatʋ ndʋ tɩ-taa, Yuuda ñɩma sakɩyɛ  kaaɖɔkɩ keɣsi sakɩyɛ taa tɔm pa-ñʋʋ taa. Alɩwaatʋ ndʋ panɩɣ keɣa nakɛyɛ taa mayaɣ kʋɖʋmaɣ taa tɔm yɔ, papɩzɩɣ nɛ pɔtɔzɩ keɣa ŋga katɩŋa ka-taa tɔm yɔɔ kpaagbaa. Ye tɔm ndʋ tɩɩwɛnɩ Yesu ñʋʋ taa yɔ, ɖɩnɛ ɛlɛ ɛɛwɛɛ nɛ ɛsɩɣnɩ ɛ-wayɩ tɩŋɩyaa mba pɛkɛ Yuuda ñɩma yɔ se pɔtɔzɩ natʋ tɔm sakɩyɛ ndʋ tɩɩwɛ keɣa ŋga ka-taa yɔ tɩ-yɔɔ. Natʋ tɔm ndʋ, tɩyɔɔdʋʋ mbʋ pɩlaba pʋcɔ nɛ Yesu sɩ nɛ mbʋ pɩlabɩ ɛ-sɩm wayɩ yɔ pɩ-tɔm. (Keɣa 21:8, 9, 16, 17, 19, 25) Pɩtasɩ lɛ, keɣa ŋga kɛ-kɛdɛzaɣ masɩ saŋ Yehowa nɛ sɩyɔɔdʋʋ se ɛkɛ Wiyaʋ tɛtʋ kpeekpe yɔɔ.—Keɣa 21:28-31.

Yesu yɔɔdʋʋ tɔm ndʋ yɔ, ɛzɩ ɛwɛɛ nɛ ɛwɩlɩɣ se ɛtɩla kɩwɛɛkɩm nabʋyʋ? Pʋcɔ nɛ Yesu sɩkɩ lɛ, paamuli-i nɛ pahʋʋnɩ-ɩ tɔm nɛ pakʋ ɛ-tɔm se ɛyɔɔdɩ tɔm kɩdɛkɛdɩtʋ Ɛsɔ yɔɔ. (Mat. 26:65, 66) Sahedrɛɛ taa ñɩma kpeɣli ɖama lɛɛ lɛɛ ɖoo cɩjɩka taa nɛ pahʋʋnɩ-ɩ tɔm nɛ patɩɖɔ tɔm hʋʋ paɣtʋ yɔɔ. (Mat. 26:59; Mark. 14:56-59) Yesu yɔɔdʋʋ tɔm ndʋ nɛ pɩkɛnɩ tɔm pɔzʋʋ yɔ, pɩtɩla, ɛɛwɛɛ nɛ ɛhɔŋ ɛyaa lɩmaɣza se patɩlɩ se ɛtɩla kɩwɛɛkɩm nabʋyʋ nɛ pɩpɔzʋʋ se pakʋ-ɩ.

Pɩtasɩ lɛ, Yesu yɔɔdʋʋ tɔm ndʋ yɔ, ɛzɩ ɛwɛɛ nɛ ɛtɔzʋʋ lalaa se paa Yehowa kaaha nʋmɔʋ se Daviid weyi ɛma keɣa ŋga yɔ ɛla kʋñɔŋ yɔ, pɩtɩwɩlɩ se Daviid tɔm tɩtasɩ Yehowa kɛdɩnʋʋ na? Tɔm ndʋ Daviid pɔzaa yɔ, tɩtɩwɩlɩ se elesi tisuu. Ɛyɔɔdɩ tɔm ndʋ nɛ pɩtɛ lɛ, ɛyɔɔdɩ se ɛtaɣ liu se Yehowa pɩzɩɣ nɛ ɛya ɛ-sɛyaa ñʋʋ nɛ Yehowa wobi pɩ-yɔɔ nɛ ɛwazɩɣ-ɩ. (Keɣa 21:24, 25, 28) Mbʋ ɖɔɖɔ paa “Daviid Pɩyalʋ” Yesu kaalabɩ kʋñɔŋ nazɩm sizika yɔɔ yɔ, pɩtɩwɩlɩ se ɛ-tɔm tɩtasɩ kɛdɩnʋʋ Yehowa.—Mat. 21:9.

Yesu yɔɔdʋʋ tɔm ndʋ yɔ, ɛzɩ ɛwɛɛ nɛ ɛwɩlɩɣ se ɛ-taa wɩ siŋŋ se Yehowa tihuuzi ɛ-yɔɔ nɛ eyebi-i se ɛpɩzɩ nɛ ɛwɩlɩ ɛ-cɩŋgɩlɩm wɛtʋ kpayɩ kpayɩ? Yehowa taaɖʋ kiɖe tɛɛ se ɛ-Pɩyalʋ ɛtɔɔ kʋñɔŋ nɛ ɛsɩ. Aɖam nɛ Ɛva pakaɖɩnɩ-ɩ nɛ pɩtɛ lɛ, pɩkɔm nɛ pɩcɛyɩ se Yesu ɛtɔɔ kʋñɔŋ nɛ ɛsɩ. Yesu tɩla kɩwɛɛkɩm nabʋyʋ, ɛlɛ pɩɩwɛɛ se ɛtɔɔ kʋñɔŋ nɛ ɛsɩ nɛ pɩsa nɛ ɛcɔnɩ tɔm ndʋ Sataŋ kɔnaa yɔ ti-ɖeɖe nɛ ɛhɛyɩ kɩhɛyʋʋ pʋ-ñʋʋ taa se pɩsa nɛ ɛya mbʋ ɛyʋ lesaa yɔ. (Mark. 8:31; 1 Pɩy. 2:21-24) Ye Yehowa eyebi huuzuu Yesu yɔɔ alɩwaatʋ pazɩ e-wezuu caɣʋ taa yɔ, pi-ɖeke piyekina se pɩpɩzɩ nɛ pɩla mbʋ.

Ɛzɩ Yesu ñɩnaɣ se ɛsɩnɩ ɛ-wayɩ tɩŋɩyaa nɛ paka pa-lɩmaɣza lɩmaɣzɩyɛ nɖɩ ɖɩ-yɔɔ Yehowa ha nʋmɔʋ se ɛsɩ nazɩm sizika yɔɔ yɔ ɖɩ-yɔɔ? * Yesu kaanawa se ɛzɩma pakaɣ-ɩ kʋʋ ɛzɩ ɛyʋ kɩdɛkɛdʋ yɔ nazɩm sizika yɔɔ yɔ, pɩkaɣ tuuluu ɛyaa sakɩyɛ. (1 Kɔr. 1:23) Ye ɛ-wayɩ tɩŋɩyaa ɩkam pa-lɩmaɣza lɩmaɣzɩyɛ nɖɩ ɖɩ-yɔɔ ɖeyi ɖeyi ɛsɩba yɔ ɖɩ-yɔɔ yɔ, papɩzɩɣ nɛ panɩɩ mbʋ pʋyɔɔ ɛsɩba yɔ pɩ-taa camɩyɛ. (Gal. 3:13, 14) Ðɩnɛ ɛlɛ paakaɣ-ɩ naʋ ɛzɩ kɩwɛɛkɩm laɖʋ yɔ, ɛlɛ panaɣ-ɩ ɛzɩ Ñʋʋ yaɖʋ yɔ.

Paa lɩmaɣza wena Yesu ɛɛwɛna pʋcɔ nɛ ɛyɔɔdʋʋ tɔm ndʋ yɔ, eɖiɣzinaa ye ɛsɩbɩ nazɩm sizika yɔɔ yɔ, Yehowa sɔɔlɩm ɛwɛɛ nɛ ɛlakɩ. Yesu yɔɔdɩ keɣa ŋga ka-taa tɔm nɛ pɩla alɩwaatʋ pazɩ lɛ, ɛtɔ se: “Pɩtɩŋa pɩlaba!” (Yoh. 19:30; Luka 22:37) Ɛɛɛ, ɛzɩma Yehowa yebi Yesu yɔɔ huuzuu alɩwaatʋ pazɩ yɔ, pɩha Yesu nʋmɔʋ se ɛla mbʋ payɩ petiyi-i tɛtʋ yɔɔ se ɛkɔɔ nɛ ɛla yɔ. Pɩha-ɩ waɖɛ ɖɔɖɔ se eyele nɛ tɔm ndʋ payɩ pama ɛ-yɔɔ “Moyizi Paɣtʋ taa nɛ Nayaa takayɩsɩ taa nɛ Keɣsi taa yɔ” tɩla.—Luka 24:44.