Wɛtʋ ndʋ tɩ-taa lɛ, alɩwaatʋ ndʋ abalʋ ɖaɣnɩɣ ɖɔkʋʋ nesi yɔ, pɩwɛɛ se ɛgbɛyɛ ɛkpaɣ ɛ nɛ ɛ-halʋ kajalaɣ ñɩnʋ pe-nesi ɖɔkʋʋ se pɩsɩ tɩnaɣ, nɛ ɖɩkpaɣ se ɛ nɛ ɛ-halʋ naalɛ ñɩnʋ pɛwɛnɩ lɛɛlɛɛyɔ. Pɩsa nɛ ɖɩtɩlɩ lɩmaɣza wena a-yɔɔ ɖɩyɔɔdʋʋ mbʋ yɔ lɛ, iyele nɛ ɖɩtazɩ tɔm ndʋ Yesu yɔɔdɩ nesi cɛbʋ nɛ nesi ɖaɣnɩɣ ɖɔkʋʋ pɔ-yɔɔ yɔ tɩ-taa.

Ɛzɩ pamaʋ Maatiyee 19:9 taa yɔ, Yesu yɔɔdɩ Masɩ taa lɩmaɣzɩyɛ nɖɩ ɖi-ɖeke ɖɩ-yɔɔ nɔɔyʋ pɩzɩɣ nɛ ɛcɛ nesi yɔ ɖɩ-tɔm. Ɛyɔɔdaa se: “Weyi ekiziɣ ɛ-halʋ nɛ pɩtɩkɛ kʋzʋʋ kɩdɛkɛdʋʋ yɔɔ nɛ ɛkpaɣ halʋ lɛlʋ yɔ, ɛlabɩ acɛyɛ.” Tɔm ndʋ Yesu yɔɔdaa yɔ, tɩkpɛlɩkɩɣ-ɖʋ se (1) Masɩ taa lɩmaɣzɩyɛ kʋɖʋmɖɩyɛ nɖɩ ɖɩ-yɔɔ nɔɔyʋ pɩzɩɣ nɛ ɛcɛ nesi nɛ ɛ-nesi ɖɔkʋʋ mbʋ pɩsɩɩ tɩnaɣ yɔ nɖɩ lɛ kʋzʋʋ kɩdɛkɛdʋʋ wezuu caɣʋ nɛ (2) abalʋ weyi ekiziɣ ɛ-halʋ nɛ pɩtɩla nɔɔ kʋɖʋmaɣ nɛ Masɩ taa lɩmaɣzɩyɛ nɖɩ nɛ ɛɖɔkʋʋ nesi nɛ ɛyʋ lɛlʋ yɔ, ɛlabɩ acɛyɛ. *

Tɔm ndʋ Yesu yɔɔdaa yɔ, ɛzɩ tɩwɩlɩɣ se ye abalʋ nɔɔyʋ ɛcaɣ kʋzʋʋ kɩdɛkɛdʋʋ wezuu nɛ ekizi ɛ-halʋ yɔ Masɩ haɣ-ɩ waɖɛ se ɛɖaɣnɩ ɖɔkʋʋ nesi na? Pɩɩwɩlɩɣ mbʋ kokoko. Alɩwaatʋ ndʋ walʋ nɔɔyʋ lakɩ acɛyɛ yɔ, ɛ-halʋ pɩzɩɣ nɛ ɛlɩzɩ se ekpeɣ-i yaa eekpeɣ-i. Ye halʋ ekizaa se eekpeɣ-i nɛ pala nesi cɛbʋ takayaɣ komina ɛsɩndaa yɔ, pa-naalɛ pɛwɛnɩ waɖɛ faaa se paɖaɣnɩ nesi ɖɔkʋʋ alɩwaatʋ ndʋ palakɩ nesi cɛbʋ takayaɣ nɛ pɩtɛ yɔ.

Hɔɔlʋʋ lɛɛkʋ taa lɛ, halʋ weyi ɛ-walʋ labɩ acɛyɛ yɔ, ɛpɩzɩɣ nɛ ɛsɔɔlɩ siŋŋ se ɛkandɩyɩ e-nesi ɖɔkʋʋ yɔɔ, nɛ pʋyɔɔ lɛ etisiɣ faaa se ekpeɣ ɛ-walʋ. Ɛlɛ, ye walʋ weyi ɛlabɩ acɛyɛ yɔ, ekizi lɩmaɣzɩyɛ nɖɩ ɛ-halʋ kpaɣaa se ekpeɣ-i yɔ nɛ e-ɖeke ɛkpaɣ lɩmaɣzɩyɛ nɛ komina labɩ-wɛ nesi cɛbʋ takayaɣ? Ɛ-halʋ tisi faaa se ekpeɣ-i nɛ powolo pɩ-yɔɔ nɛ pɛwɛɛ ɖama cɔlɔ ɛzɩ halʋ nɛ ɛ-walʋ yɔ, pʋyɔɔ lɛ Masɩ ɩɩhaɣ-ɩ nʋmɔʋ se ɛtasɩ nesi ɖɔkʋʋ. Ye ɛkpaɣ lɩmaɣzɩyɛ nɛ ɛɖɔkɩ nesi nɛ ɛyʋ lɛlʋ, ŋgʋ Masɩ tɩha-ɩ nʋmɔʋ se ɛla mbʋ yɔ, ɖɩnɛ ɛlɛ ɛɖaɣnɩ labʋ acɛyɛ. Pʋyɔɔ lɛ, ɛgbɛyɛ taa ɛzʋtʋyaa kaɣ ɖaɣnɩɣ ɖʋʋ Tɔm hʋʋ kɔɔmiite se pɔcɔnɩ ɛ-lakasɩ kɩdɛkɛdɩsɩ nzɩ si-ɖeɖe.—1 Kɔr. 5:1, 2; 6:9, 10.

Ye abalʋ nɔɔyʋ ɛɖaɣnɩ ɖɔkʋʋ nesi ɛlɛ Masɩ tɩha-ɩ waɖɛ se ɛla mbʋ, lɩmaɣza wena pɩpɔzʋʋ se ɛgbɛyɛ ɛwɛɛnɩ nesi ɖɔkʋʋ kajalaɣ ñɩmbʋ nɛ naalɛ ñɩmbʋ yɔɔ? Ɛzɩ Masɩ ɛsɩndaa lɛ, nesi ɖɔkʋʋ kajalaɣ ñɩmbʋ tɩsɩɩ tɩnaɣ na? Hɔɔlʋʋ kʋnɛ kɩ-taa lɛ, ɛzɩ halʋ pɩzɩɣ nɛ ɛlɩzɩ se ekpeɣ ɛ-walʋ yaa eekpeɣ-i? Ɛzɩ pɩwɛɛ se ɛgbɛyɛ ɛkpaɣ nesi ɖɔkʋʋ nabʋlɛ ñɩmbʋ se pɩkɛ acɛyɛ labʋ na?

Pɩnzɩ nzɩ sɩɖɛwa yɔ sɩ-taa, ɛgbɛyɛ kpakaɣ nesi ɖɔkʋʋ nabʋlɛ ñɩmbʋ se pɩkɛ acɛyɛ labʋ ye halʋ weyi ɛtɩla acɛyɛ yɔ, ɛwɛ wezuu, ɛtɩtasɩ nesi ɖɔkʋʋ, nɛ ye ɛtɩcaɣ kʋzʋʋ kɩdɛkɛdʋʋ wezuu yɔ. Ɛlɛ Yesu tɩyɔɔdɩ halʋ weyi ɛtɩla acɛyɛ yɔ ɛ-tɔm alɩwaatʋ ndʋ ɛyɔɔdaɣ nesi cɛbʋ nɛ nesi ɖaɣnɩɣ ɖɔkʋʋ tɔm yɔ. Ɛlɩzɩ pɩ-taa se abalʋ weyi ekiziɣ ɛ-halʋ nɛ pɩɩlakɩ nɔɔ kʋɖʋmaɣ nɛ Masɩ nɛ ɛɖaɣnɩɣ nesi ɖɔkʋʋ nɛ ɛyʋ lɛlʋ yɔ,  ɛlabɩ acɛyɛ. Hɔɔlʋʋ kʋnɛ kɩ-taa lɛ, nesi cɛbʋ nɛ nesi ɖaɣnɩɣ ɖɔkʋʋ mbʋ Yesu tɔm se pɩkɛ acɛyɛ labʋ yɔ, piyeki se nesi ɖɔkʋʋ kajalaɣ ñɩmbʋ ɛsɩɩ tɩnaɣ.

Ye abalʋ nɔɔyʋ ekizi ɛ-halʋ nɛ ɛɖaɣnɩ ɖɔkʋʋ nesi nɛ piyele nɛ pe-nesi ɖɔkʋʋ sɩɩ tɩnaɣ yɔ, ɛ-halʋ kajalaɣ ñɩnʋ weyi ɛtɩla acɛyɛ yɔ ɛɛtasɩɣ wɛnʋʋ waɖɛ se ɛlɩzɩ se ekpeɣ-i yaa eekpeɣ-i. Ye mbʋ, pɩɩtasɩɣ-ɩ kɛnʋʋ sʋʋtʋ se ɛkpaɣ lɩmaɣzɩyɛ se ekpeɣ ɛ-walʋ yaa eekpeɣ-i. Pɩtasɩ lɛ, paa halʋ weyi ɛtɩla acɛyɛ yɔ ɛsɩba, ɛɖaɣnɩ nesi ɖɔkʋʋ, yaa ɛcaɣ kʋzʋʋ kɩdɛkɛdʋʋ wezuu yɔ, pɩɩlɛɣzɩɣ lɩmaɣza wena ɛgbɛyɛ wɛnɩ nesi ɖɔkʋʋ kɩfam yɔɔ yɔ. *

Kɩɖaʋ ŋgʋ kɩ-taa ɖɩtazaa nɛ pɩɖɛɛ yɔ kɩ-taa, walʋ labɩ acɛyɛ nɛ piyele nɛ pɛcɛ nesi. Nɛ ye walʋ ɛtɩla acɛyɛ, ɛlɛ ekizi ɛ-halʋ nɛ ɛɖaɣnɩ nesi ɖɔkʋʋ? Yaa ye walʋ ɛtɩcaɣ kʋzʋʋ kɩdɛkɛdʋʋ wezuu pʋcɔ nɛ ɛcɛ nesi, ɛlɛ ɛcɛbɩ nesi nɛ pɩtɛ lɛ ɛcaɣ kʋzʋʋ kɩdɛkɛdʋʋ wezuu nɛ ɛɖaɣnɩ nesi ɖɔkʋʋ, ŋgʋ ɛ-halʋ tisi faaa se ekpeɣ-i? Kɩɖaŋ ɛnɩ ɩ-tɩŋa ɩ-taa lɛ, nesi cɛbʋ nɛ nesi ɖaɣnɩɣ ɖɔkʋʋ mbʋ, pɩkɛ acɛyɛ nɛ piyeki se nesi ɖɔkʋʋ kajalaɣ ñɩmbʋ ɛsɩɩ tɩnaɣ. Nesi ɖɔkʋʋ nabʋlɛ ñɩmbʋ labɩ nɔɔ kʋɖʋmaɣ nɛ komina paɣtʋ. 15 novembre 1979 tɛ Feŋuu Tilimiye fransɩɩ ñɩnɖɛ, hɔɔlʋʋ 32 yɔɔ, palɩzɩ tɔm ndʋ tɩ-taa se: “Lɛɛlɛɛyɔ, abalʋ labɩ nesi ɖɔkʋʋ kɩfam nɛ pʋyɔɔ lɛ, ɛɛpɩzɩɣ nɛ eyele nɛ nesi ɖɔkʋʋ kɩfam mbʋ pɩsɩɩ tɩnaɣ nɛ ɛpɩsɩ ɛ-halʋ kɩbɩnʋ yɔɔ; nesi cɛbʋ, acɛyɛ nɛ nesi ɖaɣnɩɣ ɖɔkʋʋ yeba nɛ nesi ɖɔkʋʋ kajalaɣ ñɩmbʋ sɩɩ tɩnaɣ.”

Tɔm taa nɩʋ kɩfam pʋnɛ pɩɩwɩlɩɣ se Krɩstʋ ñɩma maɣzɩɣ se nesi ɖɔkʋʋ tɩtasɩ kɛʋ pʋyʋ kiɖeɖeu yaa se acɛyɛ labʋ tɩkɛ kɩwɛɛkɩm sɔsɔm. Ye abalʋ nɔɔyʋ ekizi ɛ-halʋ nɛ pɩtɩla nɔɔ kʋɖʋmaɣ nɛ Masɩ nɛ ɛɖaɣnɩ ɖɔkʋʋ nesi nɛ ɛyʋ lɛlʋ, ŋgʋ Masɩ ɩɩhaɣ-ɩ waɖɛ se ɛla mbʋ yɔ, pɩwɛɛ se pahʋʋnɩ-ɩ tɔm tɔm hʋʋ kɔɔmiite ɛsɩndaa acɛyɛ lakasɩ nzɩ sɩ-yɔɔ. (Ye halʋ weyi ɛɖaɣnɩ kpaɣʋ yɔ, ɛkɛ Krɩstʋ tʋ yɔ, pɩwɛɛ se pahʋʋnɩ ɛlɛ ɖɔɖɔ tɔm tɔm hʋʋ kɔɔmiite ɛsɩndaa.) Paa paakpakɩɣ nesi ɖɔkʋʋ kɩfam mbʋ se pɩkɛ acɛyɛ labʋ yɔ, abalʋ weyi ɛɖaɣnɩ nesi ɖɔkʋʋ yɔ, ɛɛmʋʋna se paha-ɩ ŋgee waɖɛ naɖɩyɛ ɛgbɛyɛ taa pɩnzɩ sakɩyɛ. Nɛ paapɩzɩɣ nɛ paha-ɩ waɖɛ naɖɩyɛ ye ɛyaa ɩtɩsɔɔ ɖɩwɩzɩyɛ nɖɩ ɛ-lakasɩ kɩdɛkɛdɩsɩ nzɩ sɩkɔnɩ-wɛ yɔ ɖɩ-yɔɔ yaa ye ɛyaa itiyele maɣzʋʋ se ɛtɩmʋna se pañamɩ-ɩ yɔ. Pʋcɔ nɛ paha-ɩ waɖɛ naɖɩyɛ lɛ, pɩwɛɛ ɖɔɖɔ se ɛgbɛyɛ taa ɛzʋtʋyaa ɩmaɣzɩ wɛtʋ ndʋ tɩ-taa halʋ kajalaɣ ñɩnʋ weyi ɛ-walʋ labɩ-ɩ agutaaku lakasɩ yɔ ɛwɛɛ yɔ tɩ-yɔɔ. Pɩwɛɛ ɖɔɖɔ se pamaɣzɩ wɛtʋ ndʋ tɩ-taa piya cikpesi nzɩ kɩwɛɛkɩm laɖʋ ɛnʋ eyeba yɔ sɩwɛɛ yɔ tɩ-yɔɔ.—Mal. 2:14-16.

Nesi cɛbʋ nɛ nesi ɖaɣnɩɣ ɖɔkʋʋ mbʋ pɩɩlakɩ nɔɔ kʋɖʋmaɣ nɛ Masɩ yɔ, pɩkɔŋnɩ kala sɔsɔna siŋŋ, pʋyɔɔ lɛ, pɩkɛɣnɩ lɔŋsɩnɖɛ se Krɩstʋ ñɩma ɩmaɣzɩnɩ Yehowa nɛ pakpaɣ nesi ɖɔkʋʋ se pɩkɛ pʋyʋ kiɖeɖeu.—Ekl. 5:3, 4; Ebr. 13:4.