1. Ɛbɛ yɔɔ ɖicosuu tɔm kediɣzisi taa?

 ƐBƐ yɔɔ ɖiwoki ɛgbɛyɛ taa kediɣzisi? Lɩmaɣzɩyɛ sɔsɔɖɛ lɛ se ɖiwoki se ɖɩsa Yehowa. (Keɣa 25:12; 110:1) Pɩtasɩ lɛ, ɖiwoki kediɣzisi se pɩsa nɛ ɖɩpɩzɩ nɛ ɖɩkpazɩ ɖama ɖoŋ kaɖɛ alɩwaatʋ tʋnɛ tɩ-taa. (1 Tes. 5:11) Alɩwaatʋ ndʋ ɖɩkpazɩɣ ɖe-nesi nɛ ɖicosi tɔm yɔ, ɖɩsɩɣna se ɖɩtalɩ kaɖʋsɩ nzɩ sɩ-naalɛ.

2. Wala wena ɖɩwɛna se ɖicosi tɔm ɖe-kediɣzisi taa?

² Paa kpɩtaʋ ŋgʋ lɛ, ɖɩwɛnɩ waɖɛ se ɖicosi tɔm ɖe-kediɣzisi taa. Kɩɖaŋ nɩɩyɩ yɔ: Paa kpɩtaʋ ɖɩdɛnɖɛ nɖɩ lɛ, ɖɩpɩzɩɣ nɛ ɖicosi tɔm alɩwaatʋ ndʋ ɖɩkpɛlɩkɩɣ Feŋuu Tilimiye ɛgbɛyɛ taa yɔ. Nɛ kpɩtaʋ hɛkʋ taa kediɣzisi taa lɛ, ɖɩpɩzɩɣ nɛ ɖicosi tɔm alɩwaatʋ ndʋ ɖɩlakɩ fezuu taa ñɩm, ɛgbɛyɛ taa Bibl kpɛlɩkʋʋ, nɛ hɔɔlɩŋ lɛɛŋ weyi ɩkɛ tɔm pɔzʋʋ nɛ tɔm cosuu yɔ.

3. Kala wena ɖɩpɩzɩɣ nɛ ɖɩkatɩ, nɛ ɛzɩma Ebree mba 10:24, 25 sɩɣnɩ-ɖʋ?

³ Ða-tɩŋa ɖɩsɔɔlaa se ɖɩsa Yehowa nɛ ɖɩsɔɔlaa ɖɔɖɔ se ɖɩkpazɩ ɖo-koobiya Krɩstʋ mba ɖoŋ. Ɛlɛ alɩwaatʋ ndʋ ɖɩñɩnɩɣ se ɖicosi tɔm yɔ, ɖɩpɩzɩɣ nɛ ɖɩkatɩ kala. Pɩtɩla sɔɔndʋ kpaɣ-ɖʋ se ɖicosi tɔm yaa ɖɩpɩzɩɣ nɛ ɖɩsɔɔlɩ kpem se ɖicosi tɔm, ɛlɛ paayaɣ-ɖʋ ɖoŋ ɖoŋ ɛzɩ ɖɩsɔɔlʋʋ yɔ. Ɛbɛ pɩzɩɣ pɩsɩnɩ-ɖʋ nɛ ɖɩwa kala ana? Tɔm ndʋ apostoloo Pɔɔlɩ ma Ebree mba yɔ, tɩsɩɣnɩ-ɖʋ se ɖicosi tɔm ndʋ tɩ-yɔɔ. Ɛyɔɔdaɣ mbʋ pʋyɔɔ pɩcɛyaa se ɖikpeɣliɣ ɖama yɔ pɩ-tɔm lɛ, ɛyɔɔdaa se pɩwɛɛ se ɖɩla mbʋ nɛ pɩsa nɛ «ɖɩkpazɩɣ ɖama ɖoŋ.» (Kalɩ Ebree 10:24, 25.) Tɔm ndʋ ɖicosuu se ɖɩwɩlɩ se ɖɩwɛnɩ tisuu yɔ, paa tɩwɛ kɛlɛʋ yɔ, tɩpɩzɩɣ nɛ tɩkpazɩ lalaa ɖoŋ. Ye ɖɩtɔzʋʋ tɔm ndʋ tɩ-yɔɔ yɔ, pɩkaɣ-ɖʋ sɩnʋʋ se sɔɔndʋ ɛtaakɩlɩ-ɖʋ kpaʋ se ɖɩkpazɩ nesi nɛ ɖicosi tɔm. Nɛ ye paayaɣ-ɖʋ ɖoŋ ɖoŋ yɔ, pɩwɛɛ se ɖa-taa ɛla leleŋ mbʋ pʋyɔɔ yɔ pɩhaɣ ɛgbɛyɛ taa mba lalaa waɖɛ se pocosi.—1 Pɩy. 3:8.

4. Lɩmaɣza naadozo wena taa ɖɩkaɣ tazʋʋ tɔm ñʋʋ kʋnɛ kɩ-taa?

 ⁴ Tɔm ñʋʋ kʋnɛ kɩ-taa, kajalaɣ taa lɛ, ɖɩkaɣ naʋ ɛzɩma ɖɩpɩzɩɣ nɛ ɖɩkpazɩ ɖama ɖoŋ ye ɖɩwɛ ɛgbɛyɛ cikpeɖe naɖɩyɛ taa nɛ mba pocosuu tɔm yɔ patɩɖɔɔ yɔ. Pʋwayɩ lɛ, ɖɩkaɣ naʋ ɛzɩma ɖɩpɩzɩɣ nɛ ɖɩkpazɩ ɖama ɖoŋ ye ɖɩwɛ ɛgbɛyɛ sɔsɔɖɛ naɖɩyɛ taa nɛ sakɩyɛ kpazɩɣ nesi se pocosi tɔm yɔ. Kɛdɛzaɣ ɖeɖe lɛ, ɖɩkaɣ naʋ ɛzɩma ɖɩpɩzɩɣ nɛ ɖicosi tɔm nɛ pɩkpazɩ lalaa ɖoŋ siŋŋ yɔ.

5. Ye ɛyaa pazɩ ɩwɛnɩ kediɣzaɣ taa yɔ, ɛzɩma ɖɩpɩzɩɣ nɛ ɖɩkpazɩ ɖama ɖoŋ?

⁵ Ɛgbɛyɛ cikpeɖe taa lɛ, mba pocosuu tɔm yɔ patɩɖɔɔ. Ye mbʋ nabʋyʋ taa lɛ, pɩpɩzɩɣ nɛ pɩpɔzɩ se weyi ɛcɔŋnɩ kpɛlɩkʋʋ yɔɔ yɔ ɛɖaŋ alɩwaatʋ pazɩ pʋcɔ nɛ nɔɔyʋ kpazɩ nesi. Pɩpɩzɩɣ piyele nɛ pɩlakɩ-ɖʋ ɛzɩ kediɣzaɣ ɛɛtɛŋ lɔŋ nɛ kaakpazɩɣ ɛyʋ ɖoŋ yɔ. Ɛbɛ ŋpɩzɩɣ nɛ ŋla? Ha ña-tɩ faaa nɛ ŋkpazɩɣ nesi ɖoŋ ɖoŋ. Ye ŋlakɩ mbʋ yɔ, ŋpɩzɩɣ nɛ ŋseɣti lalaa nɛ pocosuu tɔm ɖoŋ ɖoŋ nɛ pɩkɩlɩ.

6-7. Ɛzɩma ɖɩpɩzɩɣ ɖɩla nɛ sɔɔndʋ ɛtaakɩlɩ-ɖʋ kpaʋ se ɖicosi tɔm?

⁶ Ye sɔɔndʋ ɛkpaɣ-ŋ kpem se ŋcosi tɔm yɔ, ɛbɛ ŋpɩzɩɣ nɛ ŋla? Pɩlakɩ ɛyaa sakɩyɛ mbʋ. Ɛlɛ pɩsa nɛ ŋkpazɩ ño-koobiya ɖoŋ nɛ pɩkɩlɩ lɛ, pɩwɛɣ ɖeu se ŋñɩnɩ nɛ ŋna nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋwa sɔɔndʋ ndʋ yɔ. Ɛzɩma ŋpɩzɩɣ nɛ ŋla?

⁷ Feŋuu Tilimiye takayɩsɩ nzɩ palɩzaa nɛ pɩɖɛɛ yɔ sɩ-taa paatasɩ-ɖʋ lɔŋ ndɩ ndɩ; ye ŋkpaɣ alɩwaatʋ nɛ ŋtazɩ ɩ-taa nɩɩyɩ taa yɔ pɩpɩzɩɣ nɛ pɩsɩnɩ-ŋ. b Lɔŋ taasʋʋ mbʋ, pɩ-taa nabʋyʋ lɛ se ŋñɔɔzɩ kpɛlɩkʋʋ camɩyɛ. (Adu. 21:5) Ye ŋsɩm tɔm ndʋ ɩkaɣ kpɛlɩkʋʋ yɔ camɩyɛ yɔ, pɩkaɣ-ŋ wɛʋ kɛlɛʋ nɛ pɩkɩlɩ se ŋkpazɩ nesi nɛ ŋcosi tɔm. Pɩtasɩ lɛ, ñɔ-tɔm cosuu ɛwɛɛ tobi. (Adu. 15:23; 17:27) Tɔm cosuu mbʋ pɩwɛ tobi yɔ, piyeki se sɔɔndʋ ɛtaakɩlɩ-ŋ kpaʋ. Tɔm cosuu mbʋ pɩwɛ tobi yɔ, pɩtɩla yɔ pɩpɩzɩɣ nɛ pɩkɛ tɔm loyaɣ kʋɖʋmaɣ yaa tɔm loyisi naalɛ, nɛ halɩ koobiya nɩɣ tɩ-taa kɛlɛʋ nɛ pɩkɩlɩ tɔm cosuu mbʋ pɩɖaɣlaa nɛ lɩmaɣza sakɩyɛ wɛ pɩ-taa yɔ. Ye ŋcosuu tɔm tobi nɛ ña-maɣmaɣ ñɔ-tɔm pee yɔ, pɩwɩlɩɣ se ŋñɔɔzɩ ña-tɩ camɩyɛ nɛ ŋnɩɣ tɔm ndʋ ɩwɛɛ nɛ ɩkpɛlɩkɩɣ yɔ tɩ-taa kpayɩ kpayɩ.

8. Alɩwaatʋ ndʋ ɖɩlakɩ ɖo-ɖoŋ ɖeɖe se ɖicosi tɔm yɔ, ɛzɩma pɩlakɩ Yehowa?

⁸ Ye ŋñaɣ pana nɛ ŋlabɩnɩ tʋmɩyɛ lɔŋ tasʋʋ mbʋ pɩ-taa nabʋyʋ ɛlɛ sɔɔndʋ ɖiɣni-ŋ kpaʋ siŋŋ mbʋ se ŋcosi tɔm nɛ pɩcɛzɩ tam kʋɖʋm yaa tam nabʋlɛ yɔ, ɛbɛ ŋpɩzɩɣ nɛ ŋla? Ña-taa ɛtɛ se Yehowa taa lakɩ leleŋ nɛ pana wena ŋñakɩnɩ ña-laŋɩyɛ pilim se ŋla mbʋ ŋpɩzɩɣ yɔ. (Luka 21:1-4) Yehowa ɛɛpɔzʋʋ-ɖʋ se ɖɩla nɛ pɩcɛzɩ mbʋ ɖɩpɩzɩɣ nɛ ɖɩla yɔ. (Fil. 4:5) Maɣzɩ nɛ ŋna mbʋ ŋpɩzɩɣ nɛ ŋla yɔ, ɖʋ ña-tɩ kaɖʋwa se ŋlakɩ-pʋ, nɛ ŋtɩmnɩ Yehowa se ɛsɩnɩ-ŋ. Kiɖe tɛɛ lɛ, ŋpɩzɩɣ nɛ ŋɖʋ ña-tɩ kaɖʋwa se ŋcosuu tɔm tam kʋɖʋm nɛ ŋcosuu nɛ pɩwɛɛ tobi.

9. Ɛbɛ yɔɔ pɩpɩzɩɣ nɛ pɩwɛɛ kaɖɛ se ɛyʋ ecosi tɔm agbaa sɔsɔna taa?

⁹ Ɛgbɛyɛ nɖɩ ɖɩ-taa ŋwɛɛ yɔ, ye tɔm susuyaa ɩɖɔwa yɔ ŋpɩzɩɣ nɛ ŋkatɩ kaɖɛ nɖɩ ɖɩwɛ ndɩ yɔ. Pʋtɔma koobiya sakɩyɛ kpazɩɣ nesi se pocosi tɔm nɛ pʋyɔɔ lɛ ɖoŋ ɖoŋ lɛ paayaɣ-ŋ. Payaɣ koobu halɩñɩnʋ nɔɔyʋ se Danielle nɛ ɛsɔɔlɩ tɔm cosuu kediɣzisi  taa paa ɛzɩmtaa. c Ɛkpakɩɣ tɔm cosuu se pɩkɛ ɛ-Ɛsɔ sɛtʋ hɔɔlʋʋ nakʋyʋ, nʋmɔʋ ŋgʋ kɩ-yɔɔ ɛtɩŋɩɣna nɛ ɛkpazɩɣ lalaa ɖoŋ yɔ, nɛ nʋmɔʋ ŋgʋ kɩ-yɔɔ ɛtɩŋɩɣna nɛ ɛcɛyɩsɩɣ tisuu mbʋ ɛwɛnɩ Bibl taa wɩlɩtʋ yɔɔ yɔ. Ɛlɛ ɛkʋyaa nɛ ewolo ɛgbɛyɛ sɔsɔɖɛ naɖɩyɛ taa lɛ, paayaɣ-ɩ ɖoŋ ɖoŋ, halɩ nabʋyʋ taa kediɣzaɣ tɛŋ patɩyaa-ɩ paa tam kʋɖʋm maɣmaɣ. Ɛyɔɔdaa se: «Pɩcɛyaɣ-m. Pɩlakaɣ-m ɛzɩ melesi waɖɛ naɖɩyɛ yɔ. Ye pɩlakɩ mbʋ tam sakɩyɛ yɔ, ŋpɩzɩɣ nɛ ŋpaɣzɩ ña-tɩ pɔzʋʋ se ɛzɩ paɖʋ pa-taa kɩɖʋʋ faŋŋ nɛ paayaɣ-ŋ.»

10. Pɩsa nɛ ɖɩwɛɛnɩ waɖɛ nɛ pɩkɩlɩ se ɖicosi tɔm lɛ, ɛbɛ ɖɩpɩzɩɣ nɛ ɖɩla?

¹⁰ Wiɖiyi pɩtɛmɩ-ŋ labʋ ɛzɩ pɩlabʋ Danielle yɔ? Ye ɛɛɛ yɔ, pɩtɩla ŋmaɣzaa se pɩkɩlɩɣ ɖeu se ŋyele tɔm cosuu kediɣzisi taa nɛ ŋwelisiɣ kiwelisu. Ɛlɛ taayele pana ñaɣʋ se ŋcosi tɔm. Ɛbɛ ŋpɩzɩɣ nɛ ŋla? Ye ŋñɔɔzʋʋ ña-tɩ se ŋcosi tɔm pɔzʋʋ sakɩyɛ yɔɔ paa kediɣzaɣ ŋga lɛ ka-taa yɔ, pɩpɩzɩɣ nɛ pɩsɩnɩ-ŋ. Piyeki se ye patɩya-ŋ se ŋcosi tɔm yɔɔ kpɛlɩkʋʋ kiɖe tɛɛ yɔ, ŋpɩzɩ nɛ ŋtasɩ wɛnʋʋ waɖɛ nɛ ŋcosi alɩwaatʋ ndʋ kediɣzaɣ wɛɣ nɛ kowoki pɩ-yɔɔ yɔ. Ŋŋñɔɔzʋʋ Feŋuu Tilimiye lɛ, maɣzɩ nɛ ŋna nɔɔ kʋɖʋmaɣ ŋga kɛwɛ paa tayʋʋ mbʋ lɛ nɛ tɔm ñʋʋ pɛ-hɛkʋ taa yɔ. Ye ŋlakɩ mbʋ yɔ, ŋkaɣ wɛnʋʋ tɔm kɩbandʋ natʋyʋ se ŋcosi alɩwaatʋ ndʋ ɩkpɛlɩkɩɣ tɔm ñʋʋ ŋgʋ yɔ. Pɩtasɩ lɛ, ŋpɩzɩɣ nɛ ŋñɔɔzɩ ña-tɩ nɛ pɩtalɩɣ tayʋʋ mbʋ pɩyɔɔdʋʋ Bibl wɩlɩtʋ kaɖɛ ñɩndʋ natʋyʋ tɔm lɛ, ŋpɩzɩ nɛ ŋcosi. (1 Kɔr. 2:10) Ɛbɛ yɔɔ? Mbʋ pʋyɔɔ yɔ pɩtɩla paatazɩɣ tayʋʋ mbʋ pɩ-taa lɛ, ɛyaa pazɩ yem kaɣnɩ kpazʋʋ nesi. Ye ŋlabɩnɩ tʋmɩyɛ lɔŋ tasʋʋ ndɩ ndɩ mbʋ, ɛlɛ kediɣzisi sakɩyɛ taa patɩya-ŋ se ŋcosi tɔm yɔ, ɛbɛ ŋpɩzɩɣ nɛ ŋla? Pʋcɔ nɛ kediɣzaɣ paɣzɩ lɛ, ŋpɩzɩɣ nɛ ŋñɔtɩnɩ weyi ɛcɔŋnɩ kpɛlɩkʋʋ mbʋ pɩ-yɔɔ yɔ nɛ ŋheyi-i tɔm pɔzʋʋ mbʋ pɩ-yɔɔ ŋsɔɔlaa se ŋcosi yɔ.

11. Filiipi mba 2:4 seɣtiɣ-ɖʋ se ɖɩla we?

¹¹ Kalɩ Filiipi mba 2:4. Fezuu kiɖeɖeu ɖiyi apostoloo Pɔɔlɩ nɛ eseɣti Krɩstʋ mba se pamaɣzɩɣ lalaa kɛzɛsɩ yɔɔ. Ɛzɩma ɖɩpɩzɩɣ nɛ ɖɩɖɔ lɔŋ tasʋʋ mbʋ pɩ-yɔɔ kediɣzisi taa? Ðɩpɩzɩɣ nɛ ɖɩla mbʋ, ye ɖɩtɔzʋʋ se lalaa  ɖɔɖɔ sɔɔlaa se pocosi tɔm ɛzɩ ɖa ɖɔɖɔ ɖɩsɔɔlʋʋ yɔ.

12. Nʋmɔʋ kɩbaŋʋ ŋgʋ yɔɔ ɖɩpɩzɩɣ ɖɩtɩŋna nɛ ɖɩkpazɩ lalaa ɖoŋ kediɣzisi taa? (Cɔnɩ ɖɔɖɔ kɩlɛmʋʋ.)

¹² Iyele nɛ ɖɩkpaɣ kɩɖaʋ kʋnɛ: Alɩwaatʋ ndʋ ña nɛ ña-taabalaa ɩlakɩ kɛdaɣ nakɛyɛ yɔ, ŋyɔɔdʋʋ kadadayaɣ nɛ pɩɩhaɣ-wɛ waɖɛ se pɔyɔɔdɩ? Pɩtʋʋ fɛyɩ se ŋŋlakɩ mbʋ! Ŋsɔɔlaa se paba ɖɔɖɔ pɔyɔɔdɩ. Mbʋ ɖɔɖɔ alɩwaatʋ ndʋ ɖɩwɛɣ kediɣzisi taa yɔ, ɖɩsɔɔlaa se ɖɩha ɛyaa sakɩyɛ waɖɛ nɛ pocosi tɔm. Toovenim taa lɛ, nʋmɔŋ kɩbaŋ weyi ɩ-yɔɔ ɖɩtɩŋɩɣna se ɖɩkpazɩ ɖo-koobiya ɖoŋ yɔ ɩ-taa nakʋyʋ lɛ se ɖɩha-wɛ waɖɛ nɛ pɔyɔɔdɩ tisuu mbʋ pɛwɛna yɔ pɩ-tɔm. (1 Kɔr. 10:24) Iyele nɛ ɖɩna ɛzɩma ɖɩpɩzɩɣ nɛ ɖɩla mbʋ yɔ.

13. Ɛzɩma ɖɩpɩzɩɣ nɛ ɖɩha ɛyaa sakɩyɛ waɖɛ nɛ pocosi tɔm?

¹³ Mbʋ ɖɩpɩzɩɣ nɛ ɖɩla yɔ pɩ-taa nabʋyʋ lɛ se pɩwɛɛ se ɖicosi tɔm nɛ tɩwɛɛ tobi; ye ɖɩlakɩ mbʋ yɔ pɩhaɣ sakɩyɛ waɖɛ nɛ papɩzɩ nɛ pocosi tɔm. Ɛgbɛyɛ taa ɛzʋtʋyaa nɛ tɔm susuyaa lalaa mba pɛwɛ niye yɔ, papɩzɩɣ nɛ paha kɩɖaʋ hɔɔlʋʋ ŋgʋ kɩ-taa. Ŋŋcosuu tɔm se tɩwɛɛ tobi lɛ, taakɩlɩ yɔɔdʋʋ lɩmaɣza sakɩyɛ tɔm. Ye ŋyɔɔdɩ tayʋʋ taa lɩmaɣza tɩŋa tɔm yɔ pɩɩkaɣ haʋ lalaa waɖɛ se pɔyɔɔdɩ. Tayʋʋ pʋnɛ pɩ-taa ɖɩna lɔŋ tasʋʋ naalɛ; mbʋ yɔ: Ñɔ-tɔm cosuu ɛwɛɛ tobi nɛ taakɩlɩ yɔɔdʋʋ lɩmaɣza sakɩyɛ tɔm. Ye ña pacalɩ yaʋ se ŋcosi tayʋʋ pʋnɛ pɩ-taa yɔ, pɩwɛɣ ɖeu se ŋyɔɔdɩ lɩmaɣzɩyɛ kʋɖʋmɖɩyɛ ɖeke tɔm.

14. Ɛbɛ pɩzɩɣ pɩsɩnɩ-ɖʋ nɛ ɖɩna se pɩwɛɛ se ɖɩkpazɩɣ nesi ɖoŋ ɖoŋ yaa ɖɩtaakpazɩ? (Cɔnɩ ɖɔɖɔ kɩlɛmʋʋ.)

¹⁴ Wɛɛ lɛɣtʋ nɛ ŋtɩlɩ alɩwaatʋ ndʋ pɩpɔzʋʋ se ŋkpazɩ nesi nɛ alɩwaatʋ ndʋ pɩpɔzʋʋ se ŋtaakpazɩ yɔ. Ye ɖɩkɩlɩɣ kpazʋʋ nesi ɖoŋ ɖoŋ yɔ, pɩpɩzɩɣ piyele nɛ weyi ɛcɔŋnɩ kpɛlɩkʋʋ yɔɔ yɔ ɛmaɣzɩ se pɩkɛnɩ-ɩ kɩjɛyʋʋ se ɛyaɣ-ɖʋ ɖoŋ ɖoŋ ŋgʋ lalaa tihiɣti waɖɛ se pocosi. Pɩpɩzɩɣ piyele nɛ pitii lalaa yɔɔɔ nɛ paatasɩɣ nesi kpazʋʋ.—Ekl. 3:7.

15. (a) Ye patɩyaa-ɖʋ se ɖicosi tɔm yɔ, ɛzɩma pɩwɛɛ se ɖɩla? (b) Mba pɔcɔŋnɩ kpɛlɩkʋʋ yɔɔ yɔ, ɛzɩma papɩzɩɣ nɛ pawɩlɩ se pamaɣzɩɣ ɛyaa tɩŋa yɔɔ? (Kalɩ aɖakaɣ « Alɩwaatʋ ndʋ ŋcɔŋnɩ kediɣzaɣ hɔɔlʋʋ nakʋyʋ yɔɔ yɔ.»)

 ¹⁵ Alɩwaatʋ ndʋ koobiya sakɩyɛ kpazɩɣ nesi kpɛlɩkʋʋ alɩwaatʋ taa yɔ, ɖɩɩpɩzɩɣ nɛ ɖicosi tɔm ɖoŋ ɖoŋ ɛzɩ ɖɩsɔɔlʋʋ yɔ. Nabʋyʋ taa, pɩtɩla weyi ɛcɔŋnɩ kpɛlɩkʋʋ yɔɔ yɔ ɛɛpɩzɩɣ nɛ ɛyaa ɖa-tɩŋa se ɖicosi. Ye patɩyaa-ɖʋ yɔ, pɩpɩzɩɣ nɛ pitibi-ɖʋ yɔɔɔ, ɛlɛ pɩtɩpɔzɩ se ɖɩkɔ pana.—Ekl. 7:9.

16. Ɛzɩma ɖɩpɩzɩɣ nɛ ɖɩkpazɩ ɖoŋ mba pocosuu tɔm yɔ?

¹⁶ Ye ŋŋpɩzɩɣ se ŋcosi tɔm yɔɔ ɖoŋ ɖoŋ ɛzɩ ŋsɔɔlʋʋ yɔ, pɩwɛɣ ɖeu se ŋwelisiɣ camɩyɛ alɩwaatʋ ndʋ lalaa cosuu yɔ nɛ kediɣzaɣ tɛŋ lɛ, ŋsam-wɛ pɔ-tɔm cosuu yɔɔ. Ye ŋsaŋ ño-koobiya yɔ, pɩkpazɩɣ-wɛ ɖoŋ ɖɔɖɔ ɛzɩ alɩwaatʋ ndʋ ŋcosuu tɔm yɔ. (Adu. 10:21) Ye ɖɩsaŋ lalaa yɔ, pɩkɛ nʋmɔʋ lɛɛkʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩkpazɩ ɖama ɖoŋ yɔ.

17. (a) Ɛzɩma lʋlɩyaa pɩzɩɣ nɛ pasɩnɩ pe-piya nɛ sɩñɔɔzɩ tɔm cosuu mbʋ pɩmʋnaa yɔ? (b) Ɛzɩ ɖɩnaʋ video taa yɔ, ɖɩɩñɔɔzʋʋ tɔm cosuu nabʋyʋ lɛ, nɩŋgbanzɩ naanza nzɩ pɩwɛɛ se ɖɩkpɛzɩ? (Kalɩ ɖɔɖɔ pɩ-tɛɛ tɔm.)

¹⁷ Ɛzɩma ɖɔɖɔ ɖɩpɩzɩɣ nɛ ɖɩkpazɩ ɖama ɖoŋ ɖe-kediɣzisi taa? Ye ŋkɛ lʋlɩyʋ yɔ, sɩnɩ ñe-piya nɛ sɩñɔɔzɩ tɔm cosuu mbʋ pɩlakɩ nɔɔ kʋɖʋmaɣ nɛ sɩ-pɩnzɩ yɔ. (Mat. 21:16) Nabʋyʋ taa, kpɛlɩkʋʋ tukuuni tɔm kɩcɛyɩtʋ  ɛzɩ nesi ɖɔkʋʋ yaa wezuu kɩbaŋʋ caɣʋ yɔɔ tɔm mbʋ yɔ; paa mbʋ yɔ, pɩtɩla tayʋʋ kʋɖʋm yaa naalɛ wɛɣ kpɛlɩkʋʋ mbʋ pɩ-taa nɛ paatazɩɣ pɩ-taa lɛ piya pɩzɩɣ nɛ sicosi tɔm. Pɩtasɩ lɛ, pɩtɩla paa sɩkpazɩɣ nesi yɔ, pɩtɩkɛ paa ɛzɩmtaa pakaɣ-sɩ yaʋ. Sɩnɩ ñe-piya nɛ sɩtɩlɩ mbʋ pʋyɔɔ pɩwɛ mbʋ yɔ. Ye ŋlɩzɩ-sɩ pɩ-taa mbʋ yɔ, pɩpɩzɩɣ piyele nɛ piitiki-sɩ yɔɔɔ alɩwaatʋ ndʋ payaɣ lalaa nɛ paayaɣ-sɩ yɔ.—1 Tim. 6:18. d

18. Ðiicosuu tɔm lɛ, ɛzɩma ɖɩpɩzɩɣ ɖɩla nɛ ɖɩtaahɔ ɛyaa lɩmaɣza nɛ ɖɩkɔnɩ ɖa-maɣmaɣ ɖɔ-yɔɔ? (Aduwa 27:2)

¹⁸ Ða-tɩŋa ɖɩpɩzɩɣ nɛ ɖɩñɔɔzɩ tɔm cosuu mbʋ pɩkpazɩɣ koobiya Krɩstʋ mba lalaa ɖoŋ nɛ pɩɖʋʋ hɩɖɛ Yehowa yɔ. (Adu. 25:11) Nabʋyʋ taa ɖɩpɩzɩɣ nɛ ɖɩyɔɔdɩ mbʋ pɩtalɩ-ɖʋ ɖe-wezuu caɣʋ taa yɔ pɩ-tɔm tobi; paa mbʋ yɔ, pɩwɛɛ se ɖɩkpa ɖa-tɩ nɛ ɖɩtaakɩlɩɣ yɔɔdʋʋ ɖa-maɣmaɣ ɖɔ-yɔɔ tɔm. (Kalɩ Aduwa 27:2; 2 Kɔr. 10:18) Ɛlɛ ɖɩñakɩ pana se ɖɔ-tɔm cosuu ɛhɔ ɛyaa lɩmaɣza nɛ piwoni Yehowa, ɛ-Tɔm, nɛ ɛ-sɛyaa pɔ-yɔɔ. (Natʋ 4:11) Ɛlɛ ye tayʋʋ nabʋyʋ tɛ tɔm pɔzʋʋ eseɣtiɣ-ɖʋ se ɖɩyɔɔdɩ ndʋ ɖa-maɣmaɣ ɖɩmaɣzɩɣ yɔ, pʋbʋ lɛ pɩmʋnaa se ɖɩla mbʋ. Ðɩnaɣ pɩ-kɩɖaʋ tayʋʋ mbʋ pɩkɔŋ yɔ pɩ-taa.

19. (a) Ye ɖɩmaɣzɩɣ mba payɩ pɛwɛ kediɣzaɣ taa yɔ pɔ-yɔɔ yɔ, ɛbɛ lɩɣ pɩ-taa? (Roma mba 1:11, 12) (b) Ðicosuu tɔm kediɣzisi taa yɔ, ɛbɛ kɛdɩɣnɩ-ŋ pɩ-taa?

¹⁹ Paɣtʋ natʋyʋ fɛyɩ ɖeyi ɖeyi nɛ tɩwɩlɩɣ ɛzɩma ɖicosi tɔm yɔ; paa mbʋ yɔ ɖa-tɩŋa ɖɩpɩzɩɣ ɖɩñaɣ pana nɛ ɖɩkpazɩɣ ɖama ɖoŋ. Pɩ-labʋ pɩzɩɣ nɛ pɩpɔzɩ se ɖɩtaakɩlɩɣ tɔm cosuu ɖoŋ ɖoŋ. Yaa pɩ-labʋ pɩzɩɣ nɛ pɩpɔzɩ se ɖe-liu ɛsɩbɩnɩ wala wena ɖɩwɛna se ɖicosi tɔm yɔ nɛ ɖa-taa la leleŋ ɖɔɖɔ se lalaa wɛnɩ waɖɛ se pocosi tɔm. Ye ɖɩkaŋ ɖa-lɩmaɣza lalaa kɛzɛsɩ yɔɔ ɖe-kediɣzisi taa yɔ, ɖa-tɩŋa ɖɩkaɣ pɩzʋʋ nɛ ‘ɖɩkpazɩ ɖama ɖoŋ.’—Kalɩ Roma mba 1:11, 12.