TƆM ÑƲƲ ŊGƲ ÐƖKPƐLƖKƖƔ YƆ 19
Ɛzɩma ɖɩpɩzɩɣ nɛ ɖɩcɛyɩsɩ tisuu mbʋ ɖɩwɛnɩ ɛjaɖɛ kɩfaɖɛ tamaɣ ŋga Yehowa labɩ-ɖʋ yɔ kɔ-yɔɔ?
‘Ɛzɩ Yehowa yɔɔdʋʋ nɛ ɛɛlakɩ?’—KƖG. 23:19.
HENDU 142 Ðɩñɔɔnɩ ɖe-lidaʋ kpam
LƖMAƔZA SƆSƆNA a
1-2. Alɩwaatʋ ndʋ ɖɩwɛɣ nɛ ɖɩɖaŋɩɣ ɛjaɖɛ kɩfaɖɛ yɔ, ɛbɛ pɩpɔzʋʋ se ɖɩla?
TAMAƔ ŋga Yehowa laba se ɛkaɣ lɛɣzʋʋ ɛjaɖɛ kɩdɛkɛdɩyɛ ɖɩnɛ nɛ ɛjaɖɛ kɩfaɖɛ nɖɩ ɖɩ-taa siɣsiɣ wɛtʋ kaɣ wɛʋ yɔ kamʋ ñɩm siŋŋ ɖɛ-ɛsɩndaa. (2 Pɩy. 3:13) Paa ɖɩɩsɩŋ alɩwaatʋ ndʋ ɛjaɖɛ kɩfaɖɛ kaɣ kɔm yɔ, mbʋ pɩwɛɛ nɛ pɩlakɩ ɛjaɖɛ yɔɔ yɔ pɩwɩlɩɣ se pɩɩkaɣ pɔzʋʋ se ɖɩɖaŋ alɩwaatʋ sakɩyɛ.—Mat. 24:32-34, 36; Tʋma 1:7.
2 Pʋcɔ nɛ pɩtalɩ mbʋ lɛ, paa ɖɩwɛʋ toovenim taa yɔ pɩtɩɩlabɩ alɩwaatʋ ɛzɩma yɔ, ɖa-tɩŋa payɩ pɩpɔzʋʋ se ɖɩwɛɛnɩ tisuu tamaɣ ŋga kɔ-yɔɔ nɛ pɩkɩlɩ. Ɛbɛ yɔɔ? Mbʋ pʋyɔɔ yɔ halɩ paa ɛyʋ ɛwɛnɩ tisuu sɔsɔm yɔ pɩpɩzɩɣ nɛ pɩhɛɛ. Toovenim taa lɛ, apostoloo Pɔɔlɩ yɔɔdaa se ye ɖɩfɛyɩnɩ tisuu siŋŋ yɔ pɩkɛ «kɩwɛɛkɩm mbʋ pɩkaɣdɩɣ-ɖʋ kɛlɛʋ yɔ.» (Ebr. 12:1) Pɩsa nɛ ɖe-tisuu ɛtaahɛɛ lɛ, pɩpɔzʋʋ se ɖoŋ ɖoŋ lɛ ɖɩmaɣzɩ nɛ ɖɩna mbʋ pɩwɩlɩɣ kpayɩ kpayɩ se pɩkazɩ pazɩ lɛ ɛjaɖɛ kɩfaɖɛ kaɣ kɔm yɔ.—Ebr. 11:1.
3. Ɛbɛ ɖɩkaɣ naʋ tɔm ñʋʋ kʋnɛ kɩ-taa?
3 Tɔm ñʋʋ kʋnɛ kɩ-taa, ɖɩkaɣ naʋ nʋmɔŋ naadozo weyi ɩ-yɔɔ ɖɩpɩzɩɣ ɖɩtɩŋna nɛ ɖɩcɛyɩsɩ tisuu mbʋ ɖɩwɛnɩ ɛjaɖɛ kɩfaɖɛ tamaɣ ŋga Yehowa laba yɔ kɔ-yɔɔ yɔ. Nʋmɔŋ ɛnɩ yɔ: (1) ɖɩmaɣzɩ kɩhɛyʋʋ pʋ-ñʋʋ taa yɔɔ siŋŋ, (2) ɖɩmaɣzɩ Yehowa ɖoŋ yɔɔ, nɛ (3) ɖɩla fezuu taa tʋma. Pʋwayɩ lɛ, ɖɩkaɣ naʋ ɛzɩma tɔm ndʋ Yehowa heyi Habakuuki yɔ tɩkpazɩɣ ɖe-tisuu ɖoŋ sɔnɔ yɔ. Ɛlɛ kajalaɣ lɛ, iyele nɛ ɖɩna wɛtʋ ndʋ ɖɩpɩzɩɣ nɛ ɖɩkatɩ lɛɛlɛɛyɔ nɛ pɩpɔzʋʋ se ɖɩwɛɛnɩ tisuu sɔsɔm tamaɣ ŋga Yehowa laba se ɛjaɖɛ kɩfaɖɛ kaɣ kɔm yɔ kɔ-yɔɔ yɔ.
WƐTƲ NDƲ TƖ-TAA PƖPƆZƲƲ-ÐƲ TISUU SƆSƆM YƆ
4. Pɩpɔzʋʋ-ɖʋ tisuu sɔsɔm pʋcɔ nɛ ɖɩkpaɣ lɩmaɣza wena?
4 Paa evemiye nɖɩ, ɖɩkpakɩɣ lɩmaɣza wena apɔzʋʋ se ɖɩwɛɛnɩ tisuu sɔsɔm yɔ. Kɩɖaŋ nɩɩyɩ yɔ: Ðɩkpakɩɣ lɩmaɣza wena yɔ atukuuni taabalɩyɛ ɖʋʋ, helim mʋʋ, sukuli labʋ, nesi ɖɔkʋʋ, piya lʋlʋʋ, nɛ tomnaɣ yɔɔ tʋmɩyɛ labʋ. Pɩwɛɣ ɖeu se ɖɩpɔzɩ ɖa-tɩ se: ‘Lɩmaɣza wena mankpakɩɣ yɔ awɩlɩɣ se man-taa tɛma se ɛjaɖɛ ɖɩnɛ ɖɩɩkaɣ wɛʋ tam nɛ pɩkazɩ pazɩ lɛ ɛjaɖɛ kɩfaɖɛ kaɣ lɛɣzʋʋ ɖi-lone taa? Yaa ɛyaa mba pacakɩ wezuu ɛzɩ sɩm kɛ pɩtɩŋa payɩ pɩ-tɩnaɣ yɔ pɛwɛnɩ ɖoŋ lɩmaɣza wena mankpakɩɣ yɔ a-yɔɔ?’ (Mat. 6:19, 20; Luka 12:16-21) Ye ɖɩcɛyɩsɩɣ tisuu mbʋ ɖɩwɛna se ɛjaɖɛ kɩfaɖɛ ñɔtɩ kpam yɔ, pɩkaɣ yebu nɛ ɖɩkpaɣ lɩmaɣza kɩbana.
5-6. Ɛbɛ yɔɔ pɩpɔzʋʋ-ɖʋ tisuu sɔsɔm kʋñɔŋ alɩwaatʋ taa? Ha kɩɖaʋ nakʋyʋ.
5 Ðɩkatɩɣ ɖɔɖɔ takɩm mbʋ pɩ-taa pɩpɔzʋʋ-ɖʋ tisuu sɔsɔm yɔ. Pɩtɩla panazɩɣ-ɖʋ, ɖɩhɩnɩ kʋdɔŋ sɔsɔʋ nakʋyʋ yaa ɖɩkatɩɣ takɩm lɛɛbʋ mbʋ pɩpɩzɩɣ piyele nɛ pitibi-ɖʋ yɔɔɔ yɔ. Kajalaɣ taa lɛ, pɩtɩla ɖɩñakɩ pana nɛ ɖɩɖɔkɩ ɖa-tɩ takɩm mbʋ pɩ-taa. Ɛlɛ takɩm mbʋ, ɖoŋ ɖoŋ lɛ pɩkpakɩɣ alɩwaatʋ; pʋyɔɔ lɛ pɩpɔzʋʋ-ɖʋ tisuu sɔsɔm se pɩsa nɛ ɖɩɖɔkɩ ɖa-laŋɩyɛ nɛ ɖiwolo pɩ-yɔɔ nɛ ɖɩsɛɣ Yehowa nɛ taa leleŋ.—Roma 12:12; 1 Pɩy. 1:6, 7.
6 Alɩwaatʋ ndʋ ɖɩwɛɣ kaɖɛ naɖɩyɛ taa yɔ, pɩpɩzɩɣ nɛ pɩlabɩ-ɖʋ ɛzɩ ɛjaɖɛ kɩfaɖɛ ɛɛkɔŋ lɔŋ yɔ. Ɛzɩ pɩwɩlɩɣ se ɖe-tisuu hɛwa? Pɩtɩkɛ paa ɛzɩmtaa pɩwɩlɩɣ mbʋ. Iyele nɛ ɖɩkpaɣ kɩɖaʋ kʋnɛ: Alɩwaatʋ ndʋ tɛʋ wɛɣ nɛ kɩnɩɣ kpɩtaŋ sakɩyɛ yɔ, pɩpɩzɩɣ nɛ pɩlabɩ-ɖʋ ɛzɩ wɩsɩ ɛɛlɩɣ lɔŋ yɔ. Ɛlɛ pʋwayɩ wɩsɩ lɩɣ. Mbʋ ɖɔɖɔ alɩwaatʋ ndʋ pitiki-ɖʋ yɔɔɔ kpem yɔ, pɩpɩzɩɣ nɛ pɩlabɩ-ɖʋ ɛzɩ ɛjaɖɛ kɩfaɖɛ ɛɛkɔŋ lɔŋ yɔ. Ɛlɛ ye ɖɩwɛnɩ tisuu sɔsɔm yɔ, ɖɩnawa se ɛjaɖɛ kɩfaɖɛ kaɣ kɔm mbʋ pʋyɔɔ yɔ Yehowa labɩnɩ tamaɣ ŋga. (Keɣa 93:3, 14, 15; Ebr. 6:17-19) Ye ɖa-taa ɛtɛm mbʋ yɔ, ɖɩkaɣ wobu pɩ-yɔɔ nɛ ɖɩsɩɣ Yehowa sɛtʋ kajalaɣ lone taa ɖe-wezuu caɣʋ taa.
7. Lɩmaɣza wena pɩpɔzʋʋ se ɖikizi?
7 Iyele nɛ ɖɩna hɔɔlʋʋ lɛɛkʋ ŋgʋ kɩ-taa pɩpɔzʋʋ-ɖʋ ɖɔɖɔ tisuu sɔsɔm yɔ; ŋgʋ lɛ tɔm susuu tʋmɩyɛ. Ɛyaa mba ɖisusuu tɔm yɔ pa-taa sakɩyɛ maɣzɩɣ se «tɔm kɩbandʋ» ndʋ ɖisusuu-wɛ se Ɛsɔ labɩ tamaɣ se ɛjaɖɛ kɩfaɖɛ kaɣ kɔm yɔ tɩɩpɩzɩɣ nɛ tɩkɛ toovenim. (Mat. 24:14; Ezek. 33:32) Ðɩtɩsɔɔlɩ kaaʋ se ɖɩha nʋmɔʋ nɛ pa-lɩmaɣza ana awɛɛnɩ ɖoŋ ɖɔ-yɔɔ. Pɩsa nɛ pɩtaatalɩ-ɖʋ mbʋ lɛ, pɩpɔzʋʋ se ɖɩwɛɛ nɛ ɖɩcɛyɩsɩɣ ɖe-tisuu. Iyele nɛ ɖɩna nʋmɔŋ naadozo weyi ɩ-yɔɔ ɖɩpɩzɩɣ ɖɩtɩŋna nɛ ɖɩla mbʋ yɔ.
ÐƖMAƔZƖ KƖHƐYƲƲ PƲ-ÑƲƲ TAA YƆƆ
8-9. Ye ɖɩmaɣzɩɣ kɩhɛyʋʋ pʋ-ñʋʋ taa yɔɔ yɔ, ɖoŋ weyi pɩpɩzɩɣ nɛ pɩwɛɛnɩ ɖe-tisuu yɔɔ?
8 Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩcɛyɩsɩ ɖe-tisuu yɔ ɩ-taa nakʋyʋ lɛ se ɖɩmaɣzɩ kɩhɛyʋʋ pʋ-ñʋʋ taa yɔɔ. Kɩhɛyʋʋ pʋ-ñʋʋ taa sɩɣnɩ-ɖʋ se ɖa-taa ɛtɛ se Ɛsɔ tamasɩ kaɣ labʋ. Alɩwaatʋ ndʋ ɖɩmaɣzɩɣ mbʋ pʋyɔɔ Ɛsɔ hɛyɩ kɩhɛyʋʋ pʋ-ñʋʋ taa nɛ ɛzɩma ɛhɛyɩ-kʋ yɔ pɩ-yɔɔ camɩyɛ yɔ, pɩcɛyɩsɩɣ ɖe-tisuu se tamaɣ ŋga Ɛsɔ laba se ɖɩkaɣ caɣʋ wezuu maatɛŋ ɛjaɖɛ kɩfaɖɛ taa yɔ kɛkɛ toovenim nɛ kakaɣ labʋ. Ɛbɛ yɔɔ ɖɩpɩzɩɣ nɛ ɖɩyɔɔdɩ mbʋ?
9 Ɛzɩma tɩyɛ Ɛsɔ hɛyɩ kɩhɛyʋʋ pʋ-ñʋʋ taa? Yehowa tiyi ɛ-Pɩyalʋ kʋsɔɔlʋ, ɛ-taabalʋ weyi ɛkɩlɩ sɔɔlʋʋ yɔ se ɛlɩɩnɩ ɛsɔdaa nɛ ɛkɔɔ nɛ palʋlɩ-ɩ tɛtʋ yɔɔ nɛ ɛkɛ ɛyʋ weyi ɛtalɩ pilim yɔ. Alɩwaatʋ ndʋ Yesu kaawɛ tɛtʋ yɔɔ yɔ, ɛɖɔkɩ ɛ-laŋɩyɛ kʋñɔmɩŋ ndɩ ndɩ taa. Pʋwayɩ lɛ ɛnɩɩ siziŋ siŋŋ nɛ ɛsɩ. Kɩhɛyʋʋ ŋgʋ Yehowa hɛyaa yɔ kɩmʋ ñɩm siŋŋ! Ðɛ-Ɛsɔ sɔɔlɩm tʋ ɛɛpɩzɩɣ nɛ ɛha nʋmɔʋ se ɛ-Pɩyalʋ ɛtɔɔ kʋñɔŋ nɛ ɛsɩ nɛ piyele nɛ ɖɩcaɣ wezuu kɩbaŋʋ ŋgʋ kɩwɛ tobi yɔ na. (Yoh. 3:16; 1 Pɩy. 1:18, 19) Yehowa hɛyɩ kɩhɛyʋʋ ŋgʋ kɩmʋ ñɩm siŋŋ yɔ, pʋyɔɔ lɛ ɛkaɣ yebu nɛ ɖɩpɩzɩ nɛ ɖɩcaɣ wezuu maatɛŋ ɛjaɖɛ kɩfaɖɛ taa.
ÐƖMAƔZƖƔ YEHOWA ÐOŊ YƆƆ
10. Ɛzɩ Efɛɛzɩ mba 3:20 yɔɔdʋʋ yɔ, ɛbɛ Yehowa pɩzɩɣ nɛ ɛla?
10 Nʋmɔʋ naalɛ ñɩŋgʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩcɛyɩsɩ ɖe-tisuu yɔ ŋgʋ yɔ: Pɩwɛɛ se ɖɩmaɣzɩɣ Yehowa ɖoŋ yɔɔ. Ɛwɛnɩ ɖoŋ se eyele nɛ tamasɩ nzɩ payɩ ɛlaba yɔ sɩla. Sɔnɔ, ɛyaa sakɩyɛ maɣzɩɣ se tamaɣ ŋga Ɛsɔ laba se ɖɩkaɣ caɣʋ wezuu maatɛŋ ɛjaɖɛ kɩfaɖɛ taa yɔ kaapɩzɩɣ nɛ kala. Ɛlɛ ɖoŋ ɖoŋ lɛ Yehowa lakɩ tamasɩ nzɩ ɛyaa ɩɩpɩzɩɣ nɛ pala yɔ. Ɛkɛ Ɛsɔ Ðoŋ Tɩŋa Tʋ. (Yɔɔb 42:2; Mark. 10:27) Pʋyɔɔ lɛ, alɩwaatʋ ndʋ ɛlakɩ tamasɩ nzɩ sɩcaɣ piti yɔ, pɩɩɖɩɣzɩɣ-ɖʋ.—Kalɩ Efɛɛzɩ mba 3:20.
11. Tamasɩ nzɩ Ɛsɔ laba nɛ sɩwɛ piti yɔ, ha sɩ-taa kʋɖʋmaɣ kɩɖaʋ. (Kalɩ aɖakaɣ « Ŋgee tamasɩ nasɩyɩ laba.»)
11 Caanaʋ taa, Yehowa kaalabɩ ɛ-samaɣ tamasɩ nasɩyɩ nɛ ɛyaa ɛsɩndaa lɛ, pɩwɛ ɛzɩ sɩɩpɩzɩɣ nɛ sɩla yɔ. Iyele nɛ ɖɩna tamasɩ nzɩ sɩ-taa nasɩyɩ. Eheyi Abraham nɛ Saara se pakaɣ wɛnʋʋ pɩɣa pa-akpadɩyɩtʋ taa. (Kiɖe 17:15-17) Ɛtasɩ heyuu Abraham se ɛcɛlɩɣ ɛ-lʋlʋʋ taa mba Kanaŋ tɛtʋ. Alɩwaatʋ ndʋ Abraham lʋlʋʋ taa mba, pʋ-tɔbʋʋ se Izrayɛɛlɩ piya, kaacaɣ yomiye taa Ejipiti yɔ pɩɩwɛ ɛzɩ tamaɣ ŋga kaakaɣ labʋ yɔ. Ɛlɛ kalaba. Pʋwayɩ, paa Elizaabɛɛtɩ kaakpadɩyaa yɔ, Yehowa yɔɔdaa se ɛkaɣ wɛnʋʋ pɩɣa. Eheyi ɖɔɖɔ Maarɩɩ se ɛkaɣ lʋlʋʋ pɩɣa, ŋgʋ Maarɩɩ taatɩlɩ abalʋ, pɩɣa ŋga kɛkɛ Yehowa maɣmaɣ Pɩyalʋ. Piyekaɣ se tamaɣ ŋga Yehowa labɩ Edɛɛnɩ kaɖaɣ taa pɩnzɩ kudokiŋ sakɩyɛ yɔ kala.—Kiɖe 3:15.
12. Ɛbɛ Yozuwee 23:14 nɛ Izaayii 55:10, 11 peyeki se ɖa-taa ɛtɛmna pɩlɩɩnɩ Yehowa ɖoŋ yɔɔ?
12 Alɩwaatʋ ndʋ ɖɩmaɣzɩɣ tamasɩ nzɩ payɩ Yehowa laba nɛ ɛzɩma eyeba nɛ sɩla yɔ pɩ-yɔɔ yɔ, ɖɩnɩɣ pɩ-taa se ɛwɛnɩ ɖoŋ siŋŋ. Piyeki nɛ tisuu mbʋ ɖɩwɛnɩ tamaɣ ŋga ɛlaba se ɛjaɖɛ kɩfaɖɛ kaɣ kɔm yɔ kɔ-yɔɔ yɔ pɩkpa ɖoŋ. (Kalɩ Yozuwee 23:14; Izaayii 55:10, 11.) Nɛ tisuu mbʋ, pɩsɩɣnɩ-ɖʋ nɛ ɖɩñɔɔzɩ ɖa-tɩ camɩyɛ nɛ ɖɩsɩnɩ ɛyaa lalaa nɛ peɖiɣzina se tamaɣ ŋga Ɛsɔ laba se ɛjaɖɛ kɩfaɖɛ kaɣ kɔm yɔ katɩkɛ ɖoziye tɔm yaa cɛtɩm tɔm. Yehowa maɣmaɣ yɔɔdɩ ɛsɔdaa kɩfalʋʋ nɛ tɛtʋ kɩfatʋ pɔ-tɔm se: «Tɔm ndʋ tɩwɛ siɣsiɣ nɛ tɩkɛ toovenim.»—Natʋ 21:1, 5.
LAKƖ FEZUU TƲMA
ƐGBƐYƐ TAA KEDIƔZISI
Ɛzɩma fezuu taa tʋmɩyɛ ɖɩnɛ ɖɩpɩzɩɣ nɛ ɖɩcɛyɩsɩ ñe-tisuu? (Cɔnɩ tayʋʋ 13)
13. Ɛzɩma ɛgbɛyɛ taa kediɣzisi pɩzɩɣ nɛ sɩkpazɩ ɖe-tisuu ɖoŋ? Lɩzɩ pɩ-taa.
13 Nʋmɔʋ naadozo ñɩŋgʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩkpazɩ ɖe-tisuu ɖoŋ yɔ ŋgʋ lɛ se ɖɩkpakɩɣ alɩwaatʋ nɛ ɖɩlakɩ fezuu taa tʋma. Iyele nɛ ɖɩna ɛzɩma ɛgbɛyɛ taa kediɣzisi pɩzɩɣ nɛ sɩwazɩ-ɖʋ yɔ. Anna labɩ tʋma ndɩ ndɩ alɩwaatʋ tɩŋa Ɛsɔ sɛtʋ taa pɩnzɩ sakɩyɛ, ɛyɔɔdaa se: «Kediɣzisi sɩɣnɩ-m se men-tisuu ɛwɛɛ ɖoŋ. Halɩ paa tɔm yɔɔdɩyʋ ɛfɛyɩ niye tɔm yɔɔdʋʋ taa yaa ɛɛyɔɔdʋʋ tɔm kɩfatʋ natʋyʋ yɔ, ɖoŋ ɖoŋ lɛ manɩɣ tɔm natʋyʋ nɛ pɩsɩɣnɩ-m se manɩɩ Bibl taa toovenim tɔm natʋyʋ taa camɩyɛ, nɛ pɩkpazɩɣ men-tisuu ɖoŋ.» b Alɩwaatʋ ndʋ ɖo-koobiya cosuu tɔm kediɣzisi taa yɔ, pɩpɩzɩɣ ɖɔɖɔ nɛ pɩkpazɩ ɖe-tisuu ɖoŋ.—Roma 1:11, 12; 10:17.
TƆM SUSUU
Ɛzɩma fezuu taa tʋmɩyɛ ɖɩnɛ ɖɩpɩzɩɣ nɛ ɖɩcɛyɩsɩ ñe-tisuu? (Cɔnɩ tayʋʋ 14)
14. Ɛzɩma tɔm susuu kpazɩɣ ɖe-tisuu ɖoŋ?
14 Alɩwaatʋ ndʋ ɖisusuu tɔm yɔ ɖe-tisuu kpaɣ ɖoŋ ɖɔɖɔ. (Ebr. 10:23) Barbara wɛʋ nɛ ɛsɛɣ Yehowa yɔ pɩcɛzɩ pɩnzɩ 70. Ɛyɔɔdaa se: «Menɖiɣzinaa se tɔm susuu tʋmɩyɛ kpazɩɣ men-tisuu ɖoŋ paa ɛzɩmtaa. Monsusuu ɛyaa lalaa Yehowa tamasɩ tɔm nɛ pɩkɩlɩɣ lɛ, men-tisuu kpaɣ ɖoŋ nɛ pɩkɩlɩ.»
TƖ-YƆƆ KPƐLƖKƲƲ
Ɛzɩma fezuu taa tʋmɩyɛ ɖɩnɛ ɖɩpɩzɩɣ nɛ ɖɩcɛyɩsɩ ñe-tisuu? (Cɔnɩ tayʋʋ 15)
15. Ɛzɩma tɩ-yɔɔ kpɛlɩkʋʋ kpazɩɣ ɖe-tisuu ɖoŋ? (Cɔnɩ ɖɔɖɔ kɩlɛmɩŋ.)
15 Iyele nɛ ɖɩna fezuu taa tʋmɩyɛ lɛɛɖɛ nɖɩ ɖɩkpazɩɣ ɖe-tisuu ɖoŋ yɔ: nɖɩ lɛ tɩ-yɔɔ kpɛlɩkʋʋ. Susan ɖiɣzinaa se alɩwaatʋ ndʋ ɛlakɩ kpɛlɩkʋʋ ɖʋtʋ yɔ pɩsɩɣnɩ-ɩ. Ɛyɔɔdaa se: «Kujuka wiye lɛ, mɛnkpɛlɩkɩɣ Feŋuu Tilimiye tɔm ñʋʋ ŋgʋ ɖɩkaɣ kpɛlɩkʋʋ kpɩtaʋ ŋgʋ kɩkɔŋ yɔ. Hodo nɛ Piya wiye lɛ, mɔñɔɔzʋʋ kpɩtaʋ hɛkʋ taa kediɣzaɣ. Nɛ kɩyakɩŋ weyi ɩkazaa yɔ, malakɩ man-tɩ yɔɔ kpɛlɩkʋʋ.» Susan ɖɔŋ ɖʋtʋ ndʋ tɩ-yɔɔ paa ɛzɩmtaa, mbʋ sɩɣnɩnɩ-ɩ nɛ ɛcɛyɩsɩɣ e-tisuu. Irene labɩ tʋmɩyɛ ɖa-tʋmɩyɛ ɖɩlaɖɛ sɔsɔɖɛ taa pɩnzɩ sakɩyɛ, eɖiɣzinaa se Bibl taa natʋ tɔm kpɛlɩkʋʋ kpazɩɣ e-tisuu ɖoŋ. Ɛyɔɔdaa se: «Pɩwɛ piti kpem se Yehowa natʋ tɔm lakɩ ɖeyi ɖeyi ɛzɩ ɛyɔɔdʋʋ yɔ.» c
‘TƖKAƔ LABƲ’
16. Ɛbɛ yɔɔ tɔm ndʋ Yehowa heyi Habakuuki yɔ tɩwazɩɣ-ɖʋ sɔnɔ ɖɔɖɔ? (Ebree mba 10:36, 37)
16 Yehowa sɛyaa nabɛyɛ paɣzʋʋ ɖaŋʋʋ ɛjaɖɛ ɖɩnɛ ɖɩ-tɛm yɔ, pɩlakɩ alɩwaatʋ sakɩyɛ yɔ. Ɛyaa nabɛyɛ maɣzɩɣ se ɛjaɖɛ tɛm ɛɛkɔŋ lɔŋ. Ɛlɛ Yehowa sɩm ɛzɩma pɩlakɩ ɛ-sɛyaa yɔ. Nɛ toovenim taa lɛ, eheyi nayʋ Habakuuki se: «Natʋ tasɩ wɛʋ, tɩ nɛ tɩ-wɩyɛ, ɛlɛ tɩkɔŋ lɛɛ lɛɛ labʋ nɛ pɩɩkaɣ kɛʋ cɛtɩm tɔm; ye tɩcaɣ wayɩ kɔyɔ, ɖaŋ-tʋ, mbʋ yɔ tɩkɔŋ nɛ tɩɩcakɩ wayɩ.» (Hab. 2:3) Tɔm ndʋ, Yehowa heyi-tʋ Habakuuki se tɩwazɩ e-ɖeke na? Yaa ɛ-tɔm ndʋ tɩwazɩɣ-ɖʋ sɔnɔ ɖɔɖɔ? Fezuu kiɖeɖeu seɣti apostoloo Pɔɔlɩ nɛ ɛtasɩ maʋ tɔm ndʋ se tɩsɩnɩ Krɩstʋ ñɩma mba paɖaŋ ɛjaɖɛ kɩfaɖɛ yɔ. (Kalɩ Ebree mba 10:36, 37.) Ɛɛɛ, ɖa-taa pɩzɩɣ nɛ pɩtɛ se lidaʋ tɔm ndʋ Yehowa yɔɔdaa se ɛkaɣ ɖa-ñʋʋ yabʋ yɔ, paa pɩlakɩ-ɖʋ ɛzɩ tɩɩkɔŋ lɔŋ yɔ, ‘tɩkaɣ labʋ nɛ tɩɩcakɩ wayɩ.’
17. Ɛzɩma koobu halɩñɩnʋ nɔɔyʋ ɖɔm lɔŋ weyi Yehowa tasɩ Habakuuki yɔ ɛ-yɔɔ?
17 Yehowa sɛyaa nabɛyɛ ɖɔm lɔŋ weyi ɛtasɩ Habakuuki se ɛɖaŋ yɔ ɛ-yɔɔ, nɛ pa-taa nabɛyɛ paɣzʋʋ ɖaŋʋʋ yɔ pɩlakɩ pɩnzɩ sakɩyɛ yɔ. Kɩɖaʋ nakʋyʋ yɔ: Louise paɣzɩ Yehowa sɛʋ pɩnaɣ 1939 taa. Ɛyɔɔdaa se: «Alɩwaatʋ ndʋ tɩ-taa, mamaɣzaɣ se Armaagedɔɔ kaɣ kɔm pʋcɔ nɛ mɛntɛ liisee sukuli. Ɛlɛ pɩtɩla mbʋ. Mankalɩ Bibl taa kɛdɛsɩ nzɩ sɩyɔɔdʋʋ ɛyaa mba paɖaŋ Yehowa se ɛɖɔ ɛ-tɔm yɔɔ yɔ pɔ-tɔm pɩnzɩ sakɩyɛ, nɛ pɩsɩnɩ-m nɛ manɖaŋ Yehowa se ɛɖɔ ɛ-tɔm yɔɔ. Mankalɩ Noowa, Abraham, Yosɛɛfʋ nɛ ɛyaa lalaa mba paɖaŋ Yehowa pɩnzɩ sakɩyɛ pʋcɔ nɛ pamʋ mbʋ Yehowa labɩ tamaɣ se ɛhaɣ-wɛ yɔ pɔ-tɔm. Paa ɛzɩmtaa lɛ paawɛnɩ lidaʋ se tamasɩ nzɩ Yehowa laba yɔ sɩkaɣ labʋ, nɛ pɩsɩnɩ ma nɛ ɛyaa lalaa nɛ ɖa-taa tɛ se ɛjaɖɛ kɩfaɖɛ ñɔtɩ kpam.» Ɛyaa lalaa mba pɛsɛ Yehowa pɩnzɩ sakɩyɛ yɔ petisiɣ tɔm ndʋ tɩ-yɔɔ.
18. Ye ɖɩkpakɩɣ alɩwaatʋ nɛ ɖɩcɔŋnɩ wondu kɩlɩzɩtʋ yɔ, ɛzɩma pɩkpazɩɣ ɖe-tisuu ɖoŋ se ɛjaɖɛ kɩfaɖɛ kaɣ kɔm?
18 Pɩkɛ toovenim se ɛjaɖɛ kɩfaɖɛ tɩkɔmta. Ɛlɛ maɣzɩ wondu kɩlɩzɩtʋ ndʋ tɩwɛɛ yɔ tɩ-yɔɔ nɛ ŋna: Tɩ-taa natʋyʋ lɛ tɩɩnzɩ, tɩŋ, kpɩna nɛ ɛyaa. Wondu kɩlɩzɩtʋ ndʋ, tɩ-tɩŋa tɩwɛ keekee nɛ nɔɔyʋ ɛɛpɩzɩɣ nɛ ɛpɩtɩ se tɩwɛɛ paa alɩwaatʋ natʋyʋ tɩtaawɛɛ yɔ. Lɛɛlɛɛyɔ tɩwɛɛ mbʋ pʋyɔɔ yɔ Yehowa lɩzɩ-tʋ. (Kiɖe 1:1, 26, 27) Ðɛ-Ɛsɔ labɩ tamaɣ ɖɔɖɔ se ɛkaɣ kɔnʋʋ ɛjaɖɛ kɩfaɖɛ. Ɛkaɣ yebu nɛ tamaɣ ŋga kala. Ɛyaa kaɣ caɣʋ wezuu maatɛŋ nɛ pɛwɛɛnɩ tɔnʋʋ taa alaafɩya kiya ɛjaɖɛ kɩfaɖɛ taa. Alɩwaatʋ ndʋ Ɛsɔ ɖʋwa yɔ tɩtalɩɣ lɛ, ɛjaɖɛ kɩfaɖɛ kaɣ pɩsʋʋ pʋyʋ keekee ɛzɩ kedeŋa yɔɔ wondu ndʋ tɩcɔ-ɖʋ nɛ tɩta sɔnɔ yɔ.—Iza. 65:17; Natʋ 21:3, 4.
19. Ɛzɩma ŋpɩzɩɣ nɛ ŋcɛyɩsɩ ñe-tisuu?
19 Pʋcɔ nɛ pɩtalɩ mbʋ lɛ, la mbʋ payɩ ŋpɩzɩɣ yɔ nɛ ŋkpazɩ ñe-tisuu ɖoŋ. Paa ɛzɩmtaa lɛ, wɛɛnɩ ɛsɩmɩyɛ kɩhɛyʋʋ pʋ-ñʋʋ taa yɔɔ. Maɣzɩɣ Yehowa ɖoŋ yɔɔ. Lakɩ fezuu taa tʋma. Ye ŋlakɩ mbʋ yɔ, ŋpɩzɩɣ nɛ ŋwɛɛ «ɛyaa mba pɩtɩŋnɩ tisuu nɛ suuɖu ɖʋʋ yɔɔ lɛ pɛcɛlɩɣ-wɛ mbʋ pɩ-tɔm paayɔɔdaa se pɛcɛlɩɣ-wɛ yɔ» pa-taa.—Ebr. 6:11, 12; Roma 5:5.
HENDU 139 Maɣzɩ se ŋwɛ ɛjaɖɛ kɩfaɖɛ taa
a Ɛjaɖɛ kɩfaɖɛ tamaɣ ŋga kɔ-tɔm Bibl yɔɔdʋʋ yɔ, sɔnɔ ɛyaa sakɩyɛ iitisiɣ kɔ-yɔɔ. Pamaɣzɩɣ se pɩkɛ ɖoziye tɔm na, mʋɖɛ naɖɩyɛ nɛ pɩɩpɩzɩɣ nɛ pɩkɛ toovenim. Ɛlɛ ɖa lɛ, ɖa-taa tɛma se Yehowa tamasɩ tɩŋa kaɣ labʋ. Paa mbʋ yɔ, pɩsa nɛ ɖe-tisuu ɛtaahɛɛ lɛ, pɩpɔzʋʋ se ɖɩwɛɛ nɛ ɖɩkpazɩɣ-pʋ ɖoŋ. Ɛzɩma tɩyɛ? Tɔm ñʋʋ kʋnɛ kɩkaɣ pɩ-taa lɩzʋʋ.
b Pɛlɛɣzɩ hɩla naayɛ.
c Ye ŋcɔnɩ Index des publications des Témoins de Jéhovah tɛ hɔɔlʋʋ «Prophéties» taa yɔ, ŋpɩzɩɣ nɛ ŋna Bibl taa natʋ tɔm ñʋŋ sakɩyɛ. Kalɩ tɔm ñʋʋ «Les prédictions de Jéhovah s’accomplissent», nɛ ŋna kɩɖaʋ nakʋyʋ; kɩwɛ 1er janvier 2008 tɛ Feŋuu Tilimiye fransɩɩ ñɩnɖɛ taa.
