TƆM ÑƲƲ ŊGƲ ÐƖKPƐLƖKƖƔ YƆ 15
Lɔŋ weyi Yesu maamaaci lakasɩ kpɛlɩkɩɣ-ɖʋ?
«Ɛcɔɔ tɛtʋ tɩŋa taa nɛ ɛlakɩ kɩbandʋ nɛ ɛwaɣ mba payɩ Eleeu nazaɣ yɔ.»—TƲMA 10:38.
HENDU 13 Krɩstʋ kɛnɩ ɖa-kɩɖaʋ
LƖMAƔZA SƆSƆNA a
1. Kɛdɩ wɛtʋ ndʋ tɩ-taa Yesu labɩ ɛ-kajalaɣ maamaaci lakasɩ yɔ.
MAƔZƖ nɛ ŋna mbʋ pɩɩlabɩ pɩnaɣ 29 ɖɩdɛnɖɛ yɔ, pɩɩkɛ alɩwaatʋ ndʋ Yesu paɣzɩ ɛ-Ɛsɔ sɛtʋ tʋmɩyɛ yɔ. Paaya Yesu nɛ e-ɖoo Maarɩɩ nɛ Yesu tɔmkpɛlɩkɩyaa nabɛyɛ nesi ɖɔkʋʋ kazandʋ natʋyʋ taa Kana; pɩɩkɛ tɛtʋ cikpetu nɛ tɩwɛ Nazarɛɛtɩ hayo kiŋ, Nazarɛɛtɩ tɛtʋ ndʋ tɩ-taa palʋlɩ Yesu. Taabalɩyɛ kaawɛ Maarɩɩ nɛ nesi ɖɔkɩyaa kɩfama hɔŋ taa mba hɛkʋ taa, nɛ pɩwɛ ɛzɩ ɛɛwɛɛ nɛ ɛsɩɣna se pɔcɔnɩ agɔma yɔɔ yɔ. Nesi ɖɔkʋʋ kazandʋ wɛɛ nɛ tiwoki pɩ-yɔɔ lɛ, pakatɩ kaɖɛ naɖɩyɛ nɛ ɖiyekaɣ se fɛyɛ ɛkpa nesi ɖɔkɩyaa kɩfama mba nɛ pɔ-hɔŋ siŋŋ; kaɖɛ nɖɩ lɛ se patɩtasɩ wɛnʋʋ vɛɛ. b Pʋtɔma yɔ, ɛyaa mba pɔkɔm kazandʋ ndʋ tɩ-taa yɔ, paaɖɔwa nɛ pɩcɛzɩ ɛzɩma pamaɣzaɣ yɔ. Maarɩɩ caŋ ewolo nɛ eheyi ɛ-pɩyalʋ se: «Pɛfɛyɩnɩ vɛɛ.» (Yoh. 2:1-3) Ɛbɛ Yesu laba? Ɛlabɩ nabʋyʋ nɛ pɩwɛ ŋgee: eyeba nɛ lɩm pɩsɩ «vɛɛ kɩbaŋʋ.»—Yoh. 2:9, 10.
2-3. (a) Maamaaci lakasɩ nzɩ Yesu laba? (b) Ye ɖɩtazɩ maamaaci lakasɩ nzɩ Yesu laba yɔ sɩ-taa yɔ, ɛzɩma pɩwazɩɣ-ɖʋ?
2 Alɩwaatʋ ndʋ Yesu lakaɣ ɛ-Ɛsɔ sɛtʋ tʋmɩyɛ tɛtʋ yɔɔ yɔ, ɛlabɩ maamaaci lakasɩ sakɩyɛ. c Ɛlabɩnɩ tʋmɩyɛ ɖoŋ weyi ɛwɛna se ɛla maamaaci lakasɩ yɔ nɛ ɛsɩnɩ ɛyaa kudokiŋ sakɩyɛ. Kɩɖaʋ nakʋyʋ yɔ: Ɛlabɩ maamaaci lakasɩ nasɩyɩ nɛ ɛcalɩ abalaa 5 000 nɛ lɛɛsɩ taa lɛ, ɛcalɩ abalaa 4 000. Nɛ ye pakpaɣ halaa nɛ piya nzɩ sɩɩwɛ peeɖe yɔ nɛ pɛkpɛndɩ abalaa mba pɔ-yɔɔ yɔ, ɛyaa mba ɛcalɩ maamaaci lakasɩ nzɩ sɩ-naalɛ sɩ-taa yɔ papɩzɩɣ nɛ pɛcɛzɩ 27 000. (Mat. 14:15-21; 15:32-38) Alɩwaatʋ ndʋ tɩ-taa Yesu labɩ maamaaci lakasɩ nzɩ sɩ-naalɛ yɔ, ɛwa ɖɔɖɔ kʋdɔndɩnaa sakɩyɛ mba paawɛ peeɖe yɔ. (Mat. 14:14; 15:30, 31) Ɛyaa mba Yesu labɩ piti lakasɩ nɛ ɛwaa-wɛ nɛ ɛcalɩ-wɛ yɔ, maɣzɩ nɛ ŋna ɛzɩma pɩɩɖɩɣzɩ-wɛ yɔ!
3 Maamaaci lakasɩ nzɩ Yesu laba yɔ sɩkpɛlɩkɩɣ-ɖʋ lɔŋ sakɩyɛ. Tɔm ñʋʋ kʋnɛ kɩ-taa, ɖɩkaɣ naʋ lɔŋ weyi maamaaci lakasɩ nzɩ sɩpɩzɩɣ nɛ sɩkpɛlɩkɩ-ɖʋ nɛ ɩkpazɩɣ ɖe-tisuu ɖoŋ yɔ ɩ-taa nɩɩyɩ. Pʋwayɩ lɛ, ɖɩkaɣ naʋ ɛzɩma ɖɩpɩzɩɣ nɛ ɖɩmaɣzɩnɩ tɩ luzuu nɛ pʋtɔdɩyɛ naʋ mbʋ Yesu lɩzaa nɛ ɛwɩlɩ alɩwaatʋ ndʋ ɛlakaɣ maamaaci lakasɩ yɔ.
LƆŊ WEYI PƖKPƐLƖKƖƔ-ÐƲ YEHOWA NƐ YESU PƆ-YƆƆ YƆ
4. Yesu maamaaci lakasɩ kpɛlɩkɩɣ-ɖʋ lɔŋ weyi yɔ, ɩkpazɩɣ ɖe-tisuu ɖoŋ pɩɩlɩnɩ mba yɔɔ?
4 Yesu maamaaci lakasɩ kpɛlɩkɩɣ-ɖʋ lɔŋ, nɛ lɔŋ ɛnɩ ɩsɩɣnɩ-ɖʋ se tisuu mbʋ ɖɩwɛnɩ ɛ nɛ ɛ-Caa pɔ-yɔɔ yɔ pɩcɛyɩsɩ nɛ pɩkɩlɩ. Pɩwɛ mbʋ, mbʋ pʋyɔɔ yɔ ɖoŋ weyi Yesu lakaɣnɩ maamaaci lakasɩ yɔ, Yehowa cɔlɔ ɛlɩnaa. Tʋma labʋ 10:38 heyiɣ-ɖʋ se: «Ɛsɔ ta [Yesu] num fezuu kiɖeɖeu taa nɛ ɛha-ɩ ɖoŋ, nɛ ɛcɔɔ tɛtʋ tɩŋa taa nɛ ɛlakɩ kɩbandʋ nɛ ɛwaɣ mba payɩ Eleeu nazaɣ yɔ, mbʋ pʋyɔɔ yɔ Ɛsɔ kaawɛ ɛ-cɔlɔ.» Tɔzɩ ɖɔɖɔ se tɔm ndʋ payɩ Yesu yɔɔdaa nɛ mbʋ payɩ ɛlaba yɔ, pɩkpɛndɩnɩ maamaaci lakasɩ nzɩ ɛlaba yɔ sɩ-taa, ɛmaɣzɩnɩ ɛ-Caa maɣzɩm nɛ ɛzɩma pɩlakɩ-ɩ yɔ ɖeyi ɖeyi. (Yoh. 14:9) Iyele nɛ ɖɩna Lɔŋ naadozo weyi Yesu maamaaci lakasɩ kpɛlɩkɩɣ-ɖʋ yɔ.
5. Ɛbɛ seɣti Yesu nɛ ɛla maamaaci lakasɩ? (Maatiyee 20:30-34)
5 Kajalaɣ lɛ, Yesu nɛ ɛ-Caa pɔsɔɔlɩ-ɖʋ siŋŋ. Alɩwaatʋ ndʋ Yesu kaawɛ tɛtʋ yɔɔ yɔ, ɛlabɩnɩ tʋmɩyɛ ɖoŋ weyi ɛwɛna se ɛla maamaaci lakasɩ yɔ nɛ ɛsɩnɩ mba paawɛ kʋñɔŋ taa yɔ; nɛ ɛtɩŋnɩ nʋmɔʋ ŋgʋ kɩ-yɔɔ nɛ ɛwɩlɩ se ɛsɔɔlɩ ɛyaa siŋŋ. Kɩyakʋ nakʋyʋ, yʋlʋmaa nabɛyɛ naalɛ tendi-i se ɛsɩnɩ-wɛ. (Kalɩ Maatiyee 20:30-34.) Taasɔɔ se pɔ-tɔm ‘labɩ Yesu pʋtɔdɩyɛ’ nɛ ɛwaa-wɛ. Grɛɛkɩ tɔm loyaɣ ŋga pɛɖɛzɩ cɩnɛ se ‘labɩ pʋtɔdɩyɛ’ yɔ, kawɩlɩɣ pʋtɔdɩyɛ naʋ mbʋ pɩlɩnɩ ɖooo ɛyʋ laŋɩyɛ taa yɔ. Pʋtɔdɩyɛ naʋ sɔsɔm mbʋ, piseɣti Yesu nɛ ɛcalɩ mba ñɔɔsɩ wɩɣaɣ-wɛ yɔ nɛ ɛwaa canaɣ nakɛyɛ; Yesu tɩŋnɩ nʋmɔʋ ŋgʋ kɩ-yɔɔ nɛ ɛwɩlɩ ɛyaa sɔɔlɩm. (Mat. 15:32; Mark. 1:41) Ða-taa pɩzɩɣ nɛ pɩtɛ se Yehowa Ɛsɔ «naɣ pʋtɔdɩyɛ siŋŋ;» ɛ nɛ ɛ-Pɩyalʋ pɔsɔɔlɩ-ɖʋ pɩdɩɩfɛyɩ nɛ panɩɣ siziŋ alɩwaatʋ ndʋ panaɣ-ɖʋ ɖɩtɔkɩ kʋñɔmɩŋ yɔ. (Luka 1:78; 1 Pɩy. 5:7) Paɖaŋ kpam se paɖɩzɩ kala wena payɩ ɛyaa katɩɣ yɔ.
6. Ðoŋ weyi Ɛsɔ ha Yesu?
6 Nabʋlɛ lɛ, Ɛsɔ ha Yesu ɖoŋ se ɛcɔnɩ kala wena ɛyaa katɩɣ yɔ a-ɖeɖe. Alɩwaatʋ ndʋ Yesu lakaɣ maamaaci lakasɩ yɔ, ɛwɩlaa se ɛpɩzɩɣ nɛ ɛhɩzɩ kala wena payɩ ɖa-maɣmaɣ ɖɩfɛyɩnɩ ɖoŋ se ɖiyele nɛ asɩɩ tɩnaɣ yɔ. Ɛwɛnɩ ɖoŋ se eholi-ɖʋ mbʋ piyeki nɛ ɛyaa katɩɣ kala yɔ pi-nesi tɛɛ, pʋ-tɔbʋʋ se kɩwɛɛkɩm mbʋ pɛɖɛzɩ-ɖʋ yɔ; nɛ ɛwɛnɩ ɖoŋ ɖɔɖɔ se ɛlɩzɩ-ɖʋ mbʋ kɩwɛɛkɩm kɔŋna yɔ pi-nesi tɛɛ; pʋ-tɔbʋʋ se kʋdɔmɩŋ nɛ sɩm. (Mat. 9:1-6; Roma 5:12, 18, 19) Maamaaci lakasɩ nzɩ ɛlaba yɔ, sɩwɩlɩɣ se ɛpɩzɩɣ nɛ ɛwaa «kʋdɔmɩŋ kpeekpe» nɛ halɩ efezi sɩɖaa. (Mat. 4:23; Yoh. 11:43, 44) Pɩtasɩ lɛ, ɛwɛnɩ ɖoŋ helim sɔsɔm yɔɔ nɛ ɛwɛnɩ ɖoŋ ɖɔɖɔ se eholi ɛyaa feziŋ kɩdɛkɛdɩŋ nesi tɛɛ. (Mark. 4:37-39; Luka 8:2) Ðɩtɩlʋʋ se Yehowa ha ɖoŋ ɛnɩ ɛ-Pɩyalʋ yɔ, pɩhɛzɩɣ ɖa-laŋɩyɛ siŋŋ!
7-8. (a) Maamaaci lakasɩ nzɩ Yesu laba yɔ, siyeba nɛ ɖa-taa tɛ suwe? (b) Maamaaci lakasɩ nzɩ ŋɖaŋ kpam se ŋna ɛjaɖɛ kɩfaɖɛ taa?
7 Nabudozo lɛ, ɖa-taa pɩzɩɣ nɛ pɩtɛ se wazasɩ nzɩ sɩ-tɔm Ɛsɔ yɔɔdaa yɔ, ɛkaɣ-sɩ kɔnʋʋ cee wayɩ alɩwaatʋ ndʋ e-Kewiyaɣ kaɣ ɖiyuu tɛtʋ yɔ. Yesu kɛnɩ Ɛsɔ Kewiyaɣ Wiyaʋ nɛ maamaaci lakasɩ nzɩ ɛlaba alɩwaatʋ ndʋ ɛɛkɛ ɛyʋ tɛtʋ yɔɔ yɔ, sɩwɩlɩɣ-ɖʋ mbʋ ɛkaɣ labʋ tɛtʋ kpeekpe yɔɔ yɔ. Maɣzɩ wɛtʋ ndʋ tɩ-taa ɖɩkaɣ wɛʋ yɔ tɩ-yɔɔ nɛ ŋna: Alɩwaatʋ ndʋ Krɩstʋ kaɣ ɖiyuu tɛtʋ yɔ, ɖɩkaɣ wɛnʋʋ tomnaɣ taa alaafɩya kiya, mbʋ pʋyɔɔ yɔ ɛkaɣ ɖɩzʋʋ kʋdɔmɩŋ nɛ ɛjandʋ ndʋ payɩ tiyeki nɛ ɛyaa lakɩ kʋñɔŋ yɔ. (Iza. 33:24; 35:5, 6; Natʋ 21:3, 4) Ðɩɩkaɣ tasʋʋ sɩbʋ ñɔɔsɩ, nɛ asɛyɩŋ ɩɩkaɣ tasʋʋ labʋ nɛ pɩkɔnɩ ɛyʋ kaɖɛ. (Iza. 25:6; Mark. 4:41) Ðɩkaɣ mʋʋ ɖɛ-ɛyaa kʋsɔɔlaa mba palɩɣnɩ «pɩlaŋ taa» yɔ nɛ taa leleŋ siŋŋ. (Yoh. 5:28, 29) Maamaaci lakasɩ nzɩ ɖeyi ɖeyi ŋɖaŋaa se ŋna ɛjaɖɛ kɩfaɖɛ taa?
8 Alɩwaatʋ ndʋ Yesu lakaɣ maamaaci lakasɩ yɔ, ɛwɩlaa se ɛwɛnɩ tɩ luzuu nɛ pʋtɔdɩyɛ naʋ siŋŋ nɛ pɩwɛɛ se ɖɩmaɣzɩnɩ ɛ-wɛtʋ kɩbandʋ ndʋ. Iyele nɛ ɖɩna kɩɖaŋ naalɛ. Ðɩpaɣzɩnɩ kɛdaɣ ŋga kɔyɔɔdʋʋ nesi ɖɔkʋʋ kazandʋ ndʋ palabɩ Kana yɔ.
LƆŊ WEYI PƖKPƐLƖKƖƔ-ÐƲ TƖ LUZUU YƆƆ YƆ
9. Ɛbɛ yɔɔ Yesu labɩ maamaaci lakasɩ nesi ɖɔkʋʋ kazandʋ taa Kana? (Yohanɛɛsɩ 2:6-10)
9 Kalɩ Yohanɛɛsɩ 2:6-10. Alɩwaatʋ ndʋ vɛɛ tɛm nesi ɖɔkʋʋ kazandʋ taa yɔ, pɩɩkɛnɩ kɩjɛyʋʋ se Yesu ɛla nabʋyʋ yaa we? Aayɩ. Natʋ tɔm natʋyʋ fɛyɩ nɛ tɩyɔɔdʋʋ se Yesu kaɣ labʋ maamaaci lakasɩ nɛ lɩm pɩsɩ vɛɛ. Ɛlɛ, maɣzɩ nɛ ŋna ɛzɩma pɩkaɣ-ŋ labʋ ye pɩlaba se sʋlʋm tɛm ña-maɣmaɣ ñe-nesi ɖɔkʋʋ kazandʋ taa yɔ. Pɩtɩla yɔ, Yesu na hɔʋ ŋgʋ nɛ kɔzɩ kɔzɩ nesi ɖɔkɩyaa mba pa-pʋtɔdɩyɛ nɛ ɛsɔɔlɩ se ɛsɩnɩ-wɛ nɛ fɛyɛ ɛtaakpa-wɛ. Pʋyɔɔ ɛlabɩ maamaaci lakasɩ nzɩ sɩ-tɔm ɖɩyɔɔdɩ tɔm ñʋʋ kʋnɛ ki-kiɖe tɛɛ yɔ. Eyeba nɛ lɩm pɩsɩ vɛɛ kɩbaŋʋ; pɩɩtalɩ ɛzɩ litrinaa 390 mbʋ yɔ. Pʋtɔma yɔ, ɛlabɩ-kʋ nɛ kɩɖɔɔ mbʋ se pɩsa nɛ kɩkazɩ nɛ palabɩnɩ-kʋ tʋmɩyɛ pʋwayɩ yaa ɛlabɩ mbʋ se papɩzɩ nɛ pɛpɛdɩ-kʋ nɛ pɩsɩnɩ nesi ɖɔkɩyaa mba nɛ pɛwɛɛnɩ liidiye nɛ pɩkɩlɩ. Pɩtʋʋ fɛyɩ se nesi ɖɔkɩyaa kɩfama mba pa-taa kaalabɩ leleŋ kpem!
Maɣzɩnɩ Yesu nɛ taatɩŋnɩ mbʋ ña-maɣmaɣ ŋlakɩ yɔ pɩ-yɔɔ nɛ ŋkpazɩɣ ña-tɩ (Cɔnɩ tayʋʋ 10-11) e
10. Kɛdaɣ ŋga pama Yohanɛɛsɩ ñʋʋ 2 taa yɔ, tɔm kɩcɛyɩtʋ ndʋ tɩwɛ ka-taa yɔ tɩ-taa natʋyʋ lɛ ndʋ? (Cɔnɩ ɖɔɖɔ kɩlɛmʋʋ.)
10 Kɛdaɣ ŋga pama Yohanɛɛsɩ ñʋʋ 2 taa yɔ, maɣzɩ ka-taa tɔm kɩcɛyɩtʋ natʋyʋ yɔɔ nɛ ŋna. Ŋpɩzaa nɛ ŋɖiɣzina se pɩtɩkɛ Yesu maɣmaɣ luni lɩm nɛ ɛpɩyɩ pɛɛ ŋgbaŋ taa? Mbʋ ɛzɩ ɛɛhɔm ɛyaa lɩmaɣza nɛ ɛkɔnɩ ɛ-tɩ yɔɔ lɛ, eheyi lɩmɖʋyaa se polu lɩm nɛ pisu ŋgbaŋ taa. (Kalɩtʋ 6, 7) Nɛ Yesu yeba nɛ lɩm pɩsɩ vɛɛ nɛ pɩtɛ lɛ, ɛ-maɣmaɣ eticozi vɛɛ ŋgʋ nɛ ewoni kazandʋ yɔɔ cɔnɩyʋ. Ɛlɛ lɩmɖʋyaa eheyaa se pocozi-kʋ nɛ powoni-i. (Kalɩtʋ 8) Pɩtʋʋ fɛyɩ se Yesu ticozi vɛɛ kɔpʋ taa nɛ ɛɖɔkɩ-kʋ mba pɔkɔm kazandʋ taa yɔ pɛ-ɛsɩndaa nɛ ɛyɔɔdɩnɩ tɩ kpazʋʋ se: ‘Ɩɖɩŋ vɛɛ ŋgʋ malabɩ lɛɛlɛɛyɔ lɛɛlɛɛyɔ yɔ nɛ ɩna!’
11. Ɛbɛ ɖɩpɩzɩɣ nɛ ɖɩkpɛlɩkɩ Yesu maamaaci lakasɩ taa?
11 Maamaaci lakasɩ nzɩ Yesu laba nɛ lɩm pɩsɩ vɛɛ yɔ, ɛbɛ ɖɩpɩzɩɣ nɛ ɖɩkpɛlɩkɩ sɩ-taa? Ðɩkpɛlɩkɩɣ tɩ luzuu. Yesu tɩtɩŋnɩ maamaaci lakasɩ nzɩ sɩ-yɔɔ nɛ ɛkpazɩ ɛ-tɩ. Toovenim taa lɛ, wiɖiyi Yesu tɩtɩŋnɩ mbʋ ɛlaba yɔ pɩ-yɔɔ nɛ ɛkpazɩ ɛ-tɩ. Ɛlɛ eluzaɣ ɛ-tɩ nɛ ɖoŋ ɖoŋ lɛ ɛcɛlaɣ samtʋ tɩŋa ɛ-Caa. (Yoh. 5:19, 30; 8:28) Ye ɖɩmaɣzɩɣnɩ Yesu nɛ ɖɩwɛɛnɩ tɩ luzuu yɔ ɖɩɩkaɣ tɩŋnʋʋ mbʋ ɖɩlakɩ yɔ pɩ-yɔɔ nɛ ɖɩkpazɩɣ ɖa-tɩ. Paa ɛbɛ ɖɩtɩɩlakɩ Yehowa sɛtʋ taa yɔ, ɖɩtaakʋndɩnɩ-pʋ; ɛlɛ ɖɩkʋndɩnɩ Ɛsɔ kɩbanʋ weyi ɖɩwɛnɩ waɖɛ nɛ ɖɩsɛɣ yɔ. (Yer. 9:23, 24) Pɩpɔzʋʋ se ɖɩcɛlɩ-ɩ samtʋ ndʋ ɛmʋnaa yɔ. Toovenim taa lɛ, ye Yehowa ɛtɩsɩnɩ-ɖʋ yɔ ɖɩɩpɩzɩɣ nɛ ɖɩla kɩbam nabʋyʋ.—1 Kɔr. 1:26-31.
12. Hɔɔlʋʋ ŋgʋ taa ɖɔɖɔ ɖɩpɩzɩɣ nɛ ɖɩmaɣzɩnɩ Yesu tɩ luzuu? Ha kɩɖaʋ nakʋyʋ.
12 Iyele nɛ ɖɩna hɔɔlʋʋ lɛɛkʋ ŋgʋ kɩ-taa ɖɩpɩzɩɣ nɛ ɖɩmaɣzɩnɩ Yesu tɩ luzuu yɔ. Maɣzɩ wɛtʋ tʋnɛ tɩ-yɔɔ nɛ ŋna: Ɛgbɛyɛ taa ɛzʋtʋyʋ nɔɔyʋ kpaɣ alɩwaatʋ sakɩyɛ nɛ ɛsɩnɩ ɛgbɛyɛ taa tʋmlaɖʋ nɔɔyʋ nɛ ɛlɛ ñɔɔzɩ samaɣ taa tɔm yɔɔdʋʋ mbʋ paha-ɩ kajalaɣ ɖeɖe yɔ. Mbʋ pɩlɩ pɩ-taa yɔ lɛ se koobu evebu ɛnʋ ɛpɩzaa nɛ ɛyɔɔdɩ samaɣ taa tɔm ndʋ camɩyɛ nɛ tɩkɛdɩnɩ koobiya. Kediɣzaɣ tɛma lɛ, koobu nɔɔyʋ ñɔtɩnɩ ɛgbɛyɛ taa ɛzʋtʋyʋ ɛnʋ nɛ ɛyɔɔdɩ se: ‘Koobu Akele yɔɔdɩ samaɣ taa tɔm camɩyɛ kpem, yaa pɩtɩkɛ mbʋ?’ Ɛzɩ pɩcɛyaa ɛzʋtʋyʋ ɛnʋ ɛyɔɔdɩ se: ‘Ɛɛɛ, ɛlɛ mankpaɣ alɩwaatʋ sakɩyɛ nɛ mansɩnɩ-ɩ’? Yaa pɩwɛɛ se ɛyɔɔdɩnɩ tɩ luzuu se: ‘Ɛɛɛ, ɛyɔɔdɩ samaɣ taa tɔm camɩyɛ. Man-taa wɛnɩ-ɩ leleŋ kpem’? Ye ɖɩwɛnɩ tɩ luzuu yɔ, ɖɩɩñɩnɩɣ se ɛyaa ɩtɩlɩ kɩbam mbʋ ɖɩlakɩ lalaa yɔ, nɛ pasam-ɖʋ pɩ-yɔɔ. Ðɩnawa se Yehowa naɣ mbʋ ɖɩlakɩ yɔ nɛ pɩmʋ ñɩm ɛ-ɛsɩndaa, nɛ pʋyɔɔ lɛ ɖe-liu sɩkɩnɩ-pʋ. (Kpaɣ-tʋ nɛ ŋmaɣzɩnɩ Maatiyee 6:2-4; Ebr. 13:16) Pɩtʋʋ fɛyɩ se ye ɖɩmaɣzɩɣnɩ Yesu nɛ ɖɩwɩlɩɣ se ɖɩwɛnɩ tɩ luzuu yɔ, ɖɔ-tɔm kɛdɩɣnɩ Yehowa.—1 Pɩy. 5:6.
LƆŊ WEYI PƖKPƐLƖKƖƔ-ÐƲ PƲTƆDƖYƐ NAƲ YƆƆ YƆ
13. Yesu ñɔtɩnɩ Nayɩnɩ tɛtʋ lɛ ɛbɛ ɛnawa, nɛ ɛbɛ ɛlaba? (Luka 7:11-15)
13 Kalɩ Luka 7:11-15. Alɩwaatʋ ndʋ Yesu kpaɣaa nɛ ɛlabɩnɩ ɛ-Ɛsɔ sɛtʋ tʋmɩyɛ yɔ, tɩtayaɣ kɩmaŋ lɛ nabʋyʋ laba. Maɣzɩ mbʋ pɩlaba yɔ pɩ-yɔɔ nɛ ŋna: Yesu ɖiɣni ɖɔm nʋmɔʋ nɛ ewoki Galilee tɛtʋ ndʋ payaɣ se Nayɩnɩ yɔ tɩ-taa, titiposini Sunɛm tɛtʋ; nɛ Sunɛm tɛtʋ ndʋ tɩ-taa nayʋ Eliizee kaafezi halʋ nɔɔyʋ pɩyalʋ pɩlakɩ ɛzɩ pɩnzɩ 900 mbʋ yɔ. (2 Aw. 4:32-37) Yesu ñɔtɩnɩ tɛtʋ nɔnɔɔ lɛ, ɛna ɛyaa samaɣ nakɛyɛ kalɩnɩ tɛtʋ taa nɛ kowoki nɔɔyʋ pim. Pɩɩlabɩ pʋtɔdɩyɛ kpem, mbʋ pʋyɔɔ yɔ lelu nɔɔyʋ pɩɣa ɛgbamɩyɛ sɩbɩna. Ɛlɛ ɖoyo weyi ɛɛwɛ kʋñɔwiye taa yɔ, pɩtɩkɛ e-ɖeke ɛɛwɛna; tɛtʋ taa ɛyaa samaɣ sɔsɔɔ nakɛyɛ kaawɛ ɛ-cɔlɔ. Yesu sɩnzɩ samaɣ ŋga kaawɛɛ nɛ kɛɖɛɣ pɩlaŋ yɔɔ yɔ nɛ ɛla ɖoyo ɛnʋ nabʋyʋ, pɩɩwɛ ŋgee: efezi ɛ-pɩyalʋ! Ɛyaa naadozo mba Yesu fezaa nɛ pama pɔ-tɔm kpayɩ Evaŋgilimwaa taa yɔ, pa-taa kajalaɣ tʋ lɛ.
Maɣzɩnɩ Yesu nɛ ŋla nabʋyʋ nɛ ŋsɩnɩ mba pɛwɛ kʋñɔwiye taa yɔ nɛ ŋwɩlɩ-wɛ se ŋnɩɣ pe-siziŋ (Cɔnɩ tayʋʋ 14-16)
14. Kɛdaɣ ŋga kɛwɛ Luka ñʋʋ 7 taa yɔ, ka-taa tɔm kɩcɛyɩtʋ natʋyʋ lɛ ndʋ? (Cɔnɩ ɖɔɖɔ kɩlɛmʋʋ.)
14 Kɛdaɣ ŋga kɛwɛ Luka ñʋʋ 7 taa yɔ, maɣzɩ ka-taa tɔm kɩcɛyɩtʋ natʋyʋ yɔɔ nɛ ŋna. Ŋpɩzaa nɛ ŋɖiɣzina se Yesu «na» ɖoyo weyi ɛwɛ kʋñɔwiye taa yɔ nɛ pʋwayɩ lɛ «ɛ-tɔm labɩ-ɩ pʋtɔdɩyɛ» na? (Kalɩtʋ 13) Pʋtɔma yɔ, Yesu na-ɩ ɛwɛɛ nɛ ewiɣ nɛ ɛɖɔŋ ɛ-pɩyalʋ tomnaɣ cɔlɔ, nɛ Yesu nɩɩ ɖoyo ɛnʋ e-siziŋ. Ðoyo ɛnʋ ɛ-tɔm tɩla pʋtɔdɩyɛ Yesu yem, ɛlɛ ɛwɩlɩ-ɩ se ɛnɩɣ e-siziŋ. Pɩtʋʋ fɛyɩ se ɛyɔɔdɩnɩ-ɩ nɛ nɔɔ ŋga kɛhɛzɩɣ ɛyʋ laŋɩyɛ yɔ nɛ ɛtɔ se: «Yele wiu.» Pʋwayɩ lɛ ɛla nabʋyʋ se ɛsɩnɩ-ɩ. Efezi ɛ-pɩyalʋ nɛ ‘ɛcɛlɩ-ɩ.’—Kalɩtʋ 14, 15.
15. Ɛbɛ Yesu maamaaci lakasɩ pɩzɩɣ nɛ sɩkpɛlɩkɩ-ɖʋ?
15 Maamaaci lakasɩ nzɩ Yesu laba nɛ efezi lelu ɛnʋ ɛ-pɩyalʋ yɔ, lɔŋ weyi sɩkpɛlɩkɩɣ-ɖʋ? Sɩkpɛlɩkɩɣ-ɖʋ se pɩpɔzʋʋ se ɖɩnɩɩ mba pɛwɛ kʋñɔwiye taa yɔ pe-siziŋ. Toovenim taa lɛ, ɖɩɩpɩzɩɣ nɛ ɖifezi sɩɖaa ɛzɩ Yesu kaalabʋ yɔ. Ɛlɛ ɛzɩ Yesu yɔ, ye ɖɩsɩm cɔnʋʋ yɔ, ɖɩpɩzɩɣ nɛ ɖɩnɩɩ mba pɛwɛ kʋñɔwiye taa yɔ pe-siziŋ. Ðɩpɩzɩɣ nɛ ɖɩtɩŋnɩ ɖɔ-yɔɔdaɣ yɔɔ yaa ɖɩpɩzɩɣ nɛ ɖɩla mbʋ ɖɩpɩzɩɣ yɔ nɛ ɖɩsɩnɩ-wɛ nɛ ɖɩhɛzɩ pa-laŋɩyɛ nɛ ɖɩwɩlɩ-wɛ se ɖɩnɩɣ pe-siziŋ. d (Adu. 17:17; 2 Kɔr. 1:3, 4; 1 Pɩy. 3:8) Paa tɔm natʋyʋ pazɩ yem ɖɩyɔɔdaa yaa camɩyɛ lakasɩ nasɩyɩ ɖɩlabɩ-wɛ yɔ, pɩpɩzɩɣ nɛ pɩkpazɩ-wɛ ɖoŋ nɛ pɩhɛzɩ pa-laŋɩyɛ siŋŋ.
16. Ɛzɩ ɖɩnaʋ kɩlɛmʋʋ yɔɔ yɔ, ɖoyo weyi ɛ-pɛlɛ sɩba nɛ pitileɖita yɔ, lɔŋ weyi ɛ-tɔm kpɛlɩkɩɣ-ɖʋ?
16 Iyele nɛ ɖɩna kɩɖaʋ nakʋyʋ: Pɩlakɩ pɩnzɩ nasɩyɩ yɔ, paawɛɛ nɛ peteɣ hendu ɛgbɛyɛ taa kediɣzaɣ nakɛyɛ taa lɛ, koobu halɩñɩnʋ nɔɔyʋ na se ɖoyo nɔɔyʋ wɛɛ nɛ ewiɣ, nɛ ɖoyo ɛnʋ ɛɛñɔtɩnɩ-ɩ. Hendu ndʋ tɩyɔɔdaɣ sɩɖaa femtu lidaʋ tɔm, nɛ ɖoyo ɛnʋ ɛ-pɛlɛ sɩbʋ yɔ pitileɖita. Koobu halɩñɩnʋ ɛnʋ ɛna mbʋ lɛ ɛcaŋ ewolo ɛsɩŋ ɖoyo ɛnʋ ɛ-cɔlɔ, nɛ ɛtɩnɩ e-nesi ɛ-yɔɔ, nɛ ɛ nɛ ɩ pɛtɛzɩ hendu ndʋ teu. Ðoyo ɛnʋ ɛyɔɔdɩ pʋwayɩ se: «Menɖiɣzinaa se koobiya sɔɔlɩ-m siŋŋ.» Ɛ-taa kaalabɩ leleŋ siŋŋ se eewobi kediɣzaɣ ŋga. Ɛyɔɔdaa se: «Kewiyaɣ kpaaŋ taa peeɖe ɖihikiɣ sɩnʋʋ.» Mba pɛkɛ «pɩɖɛmwaa» mbʋ pʋyɔɔ yɔ pelesi pɛ-ɛyʋ kʋsɔɔlʋ nɔɔyʋ yɔ, ɖa-taa pɩzɩɣ nɛ pɩtɛ se mbʋ ɖɩlakɩ kɛlɛʋ se ɖɩwɩlɩ-wɛ se ɖɩnɩɣ pe-siziŋ yɔ, Yehowa naɣ-pʋ nɛ pɩmʋ ñɩm ɛ-ɛsɩndaa.—Keɣa 33:19.
KPƐLƖKƲƲ ÐƲTƲ NDƲ TƖKPAZƖƔ TISUU ÐOŊ NƐ PƖKƖLƖ YƆ
17. Ɛbɛ ɖɩkpɛlɩkɩ tɔm ñʋʋ kʋnɛ kɩ-taa?
17 Ye ɖɩkpɛlɩkɩɣ maamaaci lakasɩ nzɩ Yesu laba nɛ pɛkɛdɩ sɩ-tɔm Evaŋgilimwaa taa yɔ, pɩkpazɩɣ-ɖʋ ɖoŋ siŋŋ. Sɩwɩlɩɣ-ɖʋ se Yehowa nɛ ɛ-Pɩyalʋ pɔsɔɔlɩ-ɖʋ siŋŋ; sɩwɩlɩɣ ɖɔɖɔ se Yesu wɛnɩ ɖoŋ se ɛcɔnɩ kala wena payɩ ɛyaa katɩɣ yɔ a-ɖeɖe; nɛ sɩsɩɣnɩ-ɖʋ ɖɔɖɔ se ɖa-taa ɛ-tɛ kiya se tamasɩ nzɩ Ɛsɔ labɩ cee wayɩ yɔɔ yɔ, pɩkazɩ pazɩ lɛ sɩ-tɩŋa sɩkaɣ labʋ alɩwaatʋ ndʋ Ɛsɔ Kewiyaɣ kaɣ ɖiyuu tɛtʋ kpeekpe yɔ. Ðɩɩtazɩɣ kɛdɛsɩ nzɩ sɩ-taa lɛ, ɖɩpɩzɩɣ ɖɩmaɣzɩ nɛ ɖɩna ɛzɩma ɖɩpɩzɩɣ nɛ ɖɩmaɣzɩnɩ Yesu wɛtʋ kɩbandʋ ndɩ ndɩ yɔ. Pɩɩwɛɣ ɖeu se ɖɩla ɖʋtʋ nɛ ɖa-tɩ yɔɔ kpɛlɩkʋʋ yaa hɔʋ taa Ɛsɔ sɛtʋ alɩwaatʋ taa lɛ ɖɩkpɛlɩkɩ Yesu maamaaci lakasɩ lɛɛsɩ yɔɔ tɔm na? Maɣzɩ nɛ ŋna lɔŋ weyi kɛdɛsɩ nzɩ sɩkpɛlɩkɩɣ-ŋ yɔ, nɛ pʋwayɩ lɛ ŋkɛdɩ ɛyaa lalaa mbʋ ŋkpɛlɩkaa yɔ. Ye ŋlakɩ mbʋ yɔ, ña nɛ lalaa ɩpɩzɩɣ nɛ ɩlakɩ kɛdɛsɩ nzɩ sɩkpazɩɣ ɖoŋ yɔ!—Roma 1:11, 12.
18. Tɔm ndʋ taa ɖɩkaɣ tazʋʋ tɔm ñʋʋ ŋgʋ kɩkɔŋ yɔ kɩ-taa?
18 Ɛyaa mba Yesu fezaa nɛ pama pɔ-tɔm Bibl taa yɔ, pɛkpɛndɩ naadozo. Ɛ-Ɛsɔ tʋmɩyɛ caɣaɣ tɛm lɛ, efezi pa-taa kɛdɛzaɣ ñɩnʋ. Ɛlɛ femtu ndʋ tɩɩwɛ ndɩ, mbʋ pʋyɔɔ yɔ ɛ-taabalʋ kɩbanʋ nɔɔyʋ efezaa, nɛ pepimi-i nɛ pɩla kɩyakɩŋ naanza lɛ efezi-i. Lɔŋ weyi Evaŋgilim taa kɛdaɣ ŋga kapɩzɩɣ nɛ kɛkpɛlɩkɩ-ɖʋ? Nɛ tisuu mbʋ ɖɩwɛnɩ sɩɖaa femtu lidaʋ yɔɔ yɔ, ɛzɩma ɖɩpɩzɩɣ nɛ ɖɩkpazɩ-pʋ ɖoŋ? Tɔm ñʋʋ ŋgʋ kɩkɔŋ yɔ, kɩkaɣ cosuu tɔm pɔzʋʋ mbʋ pɩ-yɔɔ.
HENDU 20 Ŋha-ɖʋ ña-Pɩyalʋ kʋsɔɔlʋ
a Pɩkɛdɩɣnɩ-ɖʋ siŋŋ se ɖɩkalɩɣ kɛdɛsɩ nzɩ sɩyɔɔdʋʋ Yesu maamaaci lakasɩ tɔm yɔ. Sɩ-taa nasɩyɩ yɔ: eyeba nɛ helim sɔsɔm nabʋyʋ su ɖiɣ ɖiɣ, ɛwa kʋdɔndɩnaa, efezi sɩɖaa. Patɩma kɛdɛsɩ nzɩ Bibl taa se ɖɩkalɩɣ-sɩ nɛ sɩkɛdɩɣnɩ-ɖʋ yem, ɛlɛ pama-sɩ se sɩkpɛlɩkɩ-ɖʋ lɔŋ. Ðɩkaɣ tazʋʋ sɩ-taa nasɩyɩ taa nɛ ɖɩna mbʋ sɩkpɛlɩkɩɣ-ɖʋ Yehowa nɛ Yesu pɔ-yɔɔ nɛ pɩkpazɩɣ ɖe-tisuu ɖoŋ yɔ. Nɛ ɖɩkaɣ naʋ ɖɔɖɔ Ɛsɔ wɛtʋ kɩbandʋ ndʋ pɩwɛɛ se ɖɩñaɣ pana nɛ ɖɩwɛɛna yɔ.
b Bibl taa tazɩyʋ nɔɔyʋ lɩzɩ pɩ-taa se: «Wɩsɩ ɖɩlɩyɛ ajɛɛ taa ɛyaa maɣzaɣ se pɩkɛnɩ kɩjɛyʋʋ se pamʋ agɔma, nɛ mbʋ pamʋʋnɩ agɔma yɔ pɩɩwɛɛ se pɩɖɔɔ nɛ pɩcɛzɩ mbʋ ɖeyi ɖeyi pɩpɔzʋʋ agɔma mba yɔ. Weyi ɛmʋʋ ɛyaa ɛgɔndʋ camɩyɛ yɔ, kɔzɩ kɔzɩ ye pɩkɛ nesi ɖɔkʋʋ kazandʋ taa yɔ, pɩwɛɛ se ɛwɛɛnɩ tɔɔnaɣ nɛ sʋlʋm nɛ pɩcɛzɩ mbʋ pɩpɔzʋʋ agɔma yɔ.»
c Evaŋgilimwaa yɔɔdʋʋ Yesu maamaaci lakasɩ nzɩ sɩ-tɔm yɔ, sɩcɛzɩ 30. Pɩtasɩ lɛ, Yesu labɩ maamaaci lakasɩ lɛɛsɩ sakɩyɛ, ɛlɛ Bibl kpɛndɩ sɩ-tɔm nɛ kɩyɔɔdɩ. Kɩyakʋ nakʋyʋ «tɛtʋ [natʋyʋ] taa ɛyaa kpeekpe» wobi ɛ-cɔlɔ nɛ «ɛla nɛ ɛyaa sakɩyɛ mba kʋdɔmɩŋ ndɩ ndɩ cɛyaɣ-wɛ yɔ pɔ-yɔɔ cɛ.»—Mark. 1:32-34.
d Pɩsa nɛ ŋna lɔŋ tasʋʋ mbʋ pɩpɩzɩɣ pɩsɩnɩ-ŋ nɛ ŋtɩlɩ tɔm ndʋ pɩwɛɛ se ŋyɔɔdɩ yaa mbʋ pɩwɛɛ se ŋla nɛ ŋhɛzɩ mba pɛwɛ kʋñɔwiye taa yɔ pa-laŋɩyɛ lɛ, kalɩ tɔm ñʋʋ «Ðɩhɛzɩ mba pɛwɛ kʋñɔwiye taa yɔ pa-laŋa», kɩwɛ mai 2016 Feŋuu Tilimiye taa.
e KƖLƐMƲƲ YƆƆ TƆM: Yesu sɩŋnɩ wayɩ kiŋ; alɩwaatʋ ndʋ tɩ-taa lɛ, nesi ɖɔkɩyaa kɩfama nɛ mba payawa yɔ pɛwɛɛ nɛ pɔñɔʋ vɛɛ kɩbaŋʋ.
