1. Ɛbɛ Yehowa sɔɔlaa se ɖɩla?

 MBƲ pɩkɩlɩɣ haʋ halʋ nɔɔyʋ nɛ ɛ-walʋ taa leleŋ yɔ, pɩ-taa nabʋyʋ lɛ alɩwaatʋ ndʋ palʋlʋʋ pɩɣa nɛ kɛwɛnɩ tɔnʋʋ taa alaafɩya camɩyɛ yɔ. Ɛlɛ paa lʋlɩyaa ɩsɔɔlɩ pɩɣa ŋga palʋlɩ cɩɩɩ yɔ siŋŋ yɔ, patɩsɔɔlɩ se kɛkɛ pɩɣa mbʋ tam. Halɩ papaɣzɩɣ nɩɣzʋʋ ye kaapaɣlɩɣ yɔ. Mbʋ ɖɔɖɔ Yehowa taa wɛ leleŋ alɩwaatʋ ndʋ ɖɩkpɛzɩɣ nɩŋgbanzɩ kajalaɣ ñɩnzɩ nɛ ɖɩpɩsɩ Yesu wayɩ tɩŋɩyʋ yɔ, ɛlɛ ɛtɩsɔɔlɩ se ɖɩsɩɩnɩ peeɖe. (1 Kɔr. 3:1) Ɛsɔɔlaa se ‘ɖɩpɩsɩ sɔsaa.’—1 Kɔr. 14:20.

2. Tɔm ndʋ yɔɔ ɖɩkaɣ cosuu tɔm ñʋʋ kʋnɛ kɩ-taa?

² Ye pɔtɔm se ɖɩpɩɩ fezuu taa yɔ, pʋ-tɔbʋʋ lɛ suwe? Ɛbɛ pɩpɔzʋʋ se ɖɩla nɛ ɖɩpɩsɩ Krɩstʋ ñɩma mba papɩ fezuu taa yɔ? Ɛzɩma fezuu taa tɔɔnaɣ yuŋ ñɩŋga sɩɣnɩ-ɖʋ se ɖɩpɩɩ fezuu taa? Nɛ ɛbɛ yɔɔ pɩfɛyɩ se ɖɩmaɣzɩɣ se ɖɩtɛm pɩʋ fezuu taa nɛ pɩtɩcɛyɩ se ɖɩtasɩ pana ñaɣʋ? Ðɩkaɣ cosuu tɔm pɔzʋʋ mbʋ pɩ-yɔɔ tɔm ñʋʋ kʋnɛ kɩ-taa.

YE PƆTƆM SE ÐƖPƖƖ FEZUU TAA YƆ, PƲ-TƆBƲƲ LƐ SUWE?

3. Ye pɔtɔm se ɖɩpɩɩ fezuu taa yɔ, pʋ-tɔbʋʋ lɛ suwe?

³ Grɛɛkɩ tɔm piye nɖɩ pɛɖɛzɩ Bibl taa se «sɔsaa» yɔ, papɩzɩɣ nɛ palɩzɩ ɖɩ-taa ɖɔɖɔ se «mba papɩwa yɔ» nɛ «mba patalɩ pilim yɔ.» a (1 Kɔr. 2:6) Ðɩpɩsɩɣ sɔsaa yaa Krɩstʋ ñɩma mba papɩwa yɔ alɩwaatʋ ndʋ ɖɩlɩɣnɩ fezuu taa pɩjatʋ taa nɛ ɖɩpɩsɩ halaa nɛ abalaa mba papɩ fezuu taa yɔ. Toovenim taa lɛ, paa ɖɩkɔm nɛ  ɖɩpɩɩ fezuu taa yɔ, pɩpɔzʋʋ se ɖiwolo pɩ-yɔɔ nɛ ɖɩɖɛɣnɩ ɛsɩndaa. (1 Tim. 4:15) Ða-tɩŋa payɩ ɖɩpɩzɩɣ nɛ ɖɩpɩɩ fezuu taa, pɩkpɛndɩnɩ piya. Ɛlɛ ɛbɛ wɩlɩɣ se Krɩstʋ tʋ nɔɔyʋ pɩ fezuu taa?

4. Ɛbɛ wɩlɩɣ se Krɩstʋ tʋ nɔɔyʋ pɩ fezuu taa?

⁴ Krɩstʋ tʋ weyi ɛpɩ fezuu taa yɔ, ɛɖɔŋ paɣtʋ ndʋ payɩ Ɛsɔ ɖʋwa yɔ tɩ-yɔɔ, nɛ ɛɛlɩzɩɣ ndʋ ɛsɔɔlaa yɔ nɛ ɛɖɔŋ tɩ-yɔɔ. Pɩkɛ toovenim se ɛzɩma ɛtɩtalɩ pilim yɔ pʋyɔɔ lɛ, pɩkaɣ-ɩ coɖuu. Paa mbʋ yɔ, ɛwɩlɩɣ paa evemiye nɖɩ se ɛ-lɩmaɣza nɛ ɛ-lakasɩ lakɩ nɔɔ kʋɖʋmaɣ nɛ Ɛsɔ sɔɔlɩm. Esu ɛyʋtʋ kɩfatʋ nɛ ɛñakɩ pana paa ɛzɩmtaa se ɛ-lɩmaɣza ɩla nɔɔ kʋɖʋmaɣ nɛ Ɛsɔ ñɩna. (Efɛz. 4:​22-24) Ɛfalɩsɩ ɛ-tɩ se pɩsa nɛ ɛkpaɣ lɩmaɣza kɩbana wena alakɩ nɔɔ kʋɖʋmaɣ nɛ Yehowa paɣtʋ nɛ ɛ-paɣtʋ kila yɔ, pʋyɔɔ lɛ pɩtɩcɛyɩ se paɖʋ-ɩ paɣtʋ sakɩyɛ se tiɖiyi e-wezuu caɣʋ. Alɩwaatʋ ndʋ ɛkpakɩɣ lɩmaɣzɩyɛ naɖɩyɛ yɔ, ɛñakɩ pana se ɛɖɔ lɩmaɣzɩyɛ nɖɩ ɛkpaɣaa yɔ ɖɩ-yɔɔ.—1 Kɔr. 9:​26, 27.

5. Ɛbɛ pɩzɩɣ nɛ pɩtalɩ Krɩstʋ tʋ weyi ɛtɩpɩɩ fezuu taa yɔ? (Efɛɛzɩ mba 4:​14, 15)

⁵ Ɛlɛ Krɩstʋ tʋ weyi ɛtɩpɩɩ fezuu taa yɔ, «ɛyaa cɛtɩm» nɛ «ajitu tɔm» pɩzɩɣ nɛ tipeɣzi-i kɛlɛʋ yem, nɛ tɔm ndʋ ɛyaa kpɛyɩɣ nɛ pawɩlɩɣ yɔ nɛ tisuu yebiyaa wɩlɩtʋ pɩzɩɣ ɖɔɖɔ nɛ tipeɣzi-i. b (Kalɩ Efɛɛzɩ mba 4:​14, 15.) Ɛpɩzɩɣ nɛ ɛlakɩ ɛyaa lalaa sʋsɩ, ɛkɔŋnɩ you yaa ɛkɔʋ pana lɛɛ lɛɛ; nɛ alɩwaatʋ ndʋ pɩtakɩɣ-ɩ yɔ, ɛɛpɩzɩɣ nɛ ɛɖɔkʋʋ ɛ-tɩ.—1 Kɔr. 3:3.

6. Kɩɖaʋ ŋgʋ pɩzɩɣ nɛ kɩsɩnɩ-ɖʋ nɛ ɖɩna ɛzɩma ɛyʋ pɩɣ fezuu taa yɔ? (Cɔnɩ ɖɔɖɔ kɩlɛmʋʋ.)

⁶ Ɛzɩ ɖɩnaʋ nɛ pɩɖɛɛ yɔ, Masɩ kpaɣ ɛzɩma ɛyʋ pɩɣ fezuu taa yɔ nɛ sɩmaɣzɩnɩ ɛzɩma pɩɣa paɣlɩɣ nɛ kapɩsɩɣ ɛyʋ sɔsɔ yɔ. Pɩɣa fɛyɩnɩ lɛɣtʋ, pʋyɔɔ lɛ pɩpɔzʋʋ se ɛyʋ sɔsɔ nɔɔyʋ ɛcɔnɩ ke-ɖeɖe nɛ ɛkandɩyɩ kɔ-yɔɔ. Iyele nɛ ɖɩkpaɣ kɩɖaʋ kʋnɛ: Ðoyo nɔɔyʋ pɩzɩɣ nɛ eheyi ɛ-pɩɣa se kɔɖɔkɩ e-nesi alɩwaatʋ ndʋ pɛtɛzɩɣ habɩyɛ yɔ. Pɩɣa ŋga, kɛwɛɣ nɛ kapaɣlɩɣ lɛ, ko-ɖoo pɩzɩɣ nɛ eyele ke-ɖeke se kɛtɛzɩ habɩyɛ; ɛlɛ ɛkaɣ-kɛ heyuu se kɔcɔnɩ ka-nɩmɩyɛ yɔɔ nɛ ke-nesi kɩbanzɩ yɔɔ nɛ ye lɔɔɖɩyɛ naɖɩyɛ ɛɛkɔŋ lɛ kɛtɛzɩ. Pɩɣa ŋga, kɔkɔŋ nɛ kapaɣlɩ lɛ, ka-maɣmaɣ kasɩma se pɩwɛɛ se kala mbʋ nɛ kaɖɛ naɖɩyɛ ɛtaatalɩ-kɛ. Ɛzɩ pɩpɔzʋʋ se ɛyʋ sɔsɔ nɔɔyʋ ɛsɩnɩ pɩɣa nɛ kaɖɛ naɖɩyɛ ɛtaatalɩ-kɛ yɔ, mbʋ  ɖɔɖɔ pɩpɔzʋʋ se ɖoŋ ɖoŋ lɛ pasɩnɩ Krɩstʋ tʋ weyi ɛtɩpɩɩ fezuu taa yɔ nɛ ɛfɛɛ fezuu taa kala nɛ ɛkpaɣ lɩmaɣza kɩbana. Ɛlɛ alɩwaatʋ ndʋ Krɩstʋ tʋ weyi ɛpɩ fezuu taa yɔ ɛcaɣ se ɛkpaɣ lɩmaɣzɩyɛ naɖɩyɛ yɔ, ɛmaɣzɩɣ Bibl paɣtʋ kila yɔɔ nɛ ɛtɩlɩ Yehowa lɩmaɣza lɩmaɣzɩyɛ nɖɩ ɛcaɣ kpaɣʋ yɔ ɖɩ-yɔɔ nɛ pʋwayɩ lɛ, ɛkpaɣ lɩmaɣzɩyɛ nɖɩ ɖɩlabɩ nɔɔ kʋɖʋmaɣ nɛ Bibl paɣtʋ kila yɔ.

7. Ɛzɩ pɩpɔzʋʋ se lalaa ɩsɩnɩ Krɩstʋ tʋ weyi ɛpɩ fezuu taa yɔ?

⁷ Ɛzɩ pɩwɩlɩɣ se pɩɩkaɣ pɔzʋʋ kpa se nɔɔyʋ ɛsɩnɩ Krɩstʋ tʋ weyi ɛpɩ fezuu taa yɔ? Aayɩ. Nabʋyʋ taa, pɩpɔzʋʋ se mba papɩ fezuu taa yɔ, pɔpɔzɩ ɖɔɖɔ nɛ pasɩnɩ-wɛ. Ɛlɛ ɛyʋ weyi ɛtɩpɩɩ fezuu taa yɔ, ɛɖaŋɩɣ se lalaa iheyi-i mbʋ pɩwɛɛ se ɛla yɔ yaa pakpaɣ lɩmaɣzɩyɛ e-lone taa. Piyele nɛ Krɩstʋ tʋ weyi ɛpɩ fezuu taa yɔ, ɛpɔzʋʋ mba pakɩlɩ-ɩ lɔŋ nɛ lɛɣtʋ yɔ se pasɩnɩ-ɩ, nɛ eɖiɣziɣna se ɛ-maɣmaɣ pɩwɛɛ se ɛkpaɣ lɩmaɣzɩyɛ nɛ Yehowa sɔɔlaa se ‘ɛsɩɣlɩ ɛ-maɣmaɣ ɛ-sʋʋtʋ.’—Gal. 6:5.

8. Hɔɔlɩŋ weyi taa Krɩstʋ ñɩma mba papɩ fezuu taa yɔ pɛfɛyɩnɩ wɛtʋ kʋɖʋmtʋ?

⁸ Ɛyaa sɔsaa fɛyɩnɩ tomnaɣ yɔɔ wɛtʋ kʋɖʋmtʋ, mbʋ ɖɔɖɔ Krɩstʋ ñɩma mba papɩ fezuu taa yɔ, pɛfɛyɩnɩ fezuu taa wɛtʋ kʋɖʋmtʋ, ɛzɩ lɔŋsɩnɖɛ, abalɩtʋ, kʋjɔʋ labʋ nɛ lalaa siziŋ nɩʋ mbʋ yɔ. Pɩtasɩ lɛ, ye Krɩstʋ ñɩma 2 mba papɩ fezuu taa yɔ pakatɩ wɛtʋ kʋɖʋmtʋ natʋyʋ yɔ, lɩmaɣza wena nɔɔyʋ kpakɩɣ yɔ, apɩzɩɣ nɛ awɛɛ ndɩ nɛ lɛlʋ ñɩna; ɛlɛ lɩmaɣza ana a-naalɛ aakaɖɩɣnɩ Bibl paɣtʋ kila. Tɔm ndʋ tɩkɛ toovenim, kɔzɩ kɔzɩ hɔɔlɩŋ weyi ɩ-taa pɩwɛɛ se paa weyi ɛmaɣzɩ ɛ-ɛhʋyɛ yɔɔ pʋcɔ nɛ ɛkpaɣ lɩmaɣzɩyɛ yɔ. Ye patɩlɩ tɔm ndʋ yɔ, piyeki nɛ paahʋʋnɩ ɖama tɔm ye patɩkpaɣ lɩmaɣza kʋɖʋma yɔ. Ɛlɛ pakaŋ pa-lɩmaɣza ɛzɩma pala nɛ nɔɔ kʋɖʋmaɣ wɛɛ pɛ-hɛkʋ taa yɔ pɩ-yɔɔ.—Roma 14:10; 1 Kɔr. 1:10.

ƐBƐ PƖPƆZƲƲ SE ÐƖLA NƐ ÐƖPƖSƖ KRƖSTƲ ÑƖMA MBA PAPƖ FEZUU TAA YƆ?

9. Ɛzɩ ɖɩpɩzɩɣ nɛ ɖɩcaɣ yem nɛ ɖɩpɩɩ fezuu taa? Lɩzɩ pɩ-taa.

⁹ Alɩwaatʋ wɛɣ nɛ tɩɖɛɣ lɛ, pɩɣa wɛɣ nɛ kapaɣlɩɣ, ɛlɛ nɔɔyʋ ɛɛpɩzɩɣ nɛ ɛcaɣ yem nɛ ɛpɩɩ fezuu taa, pɩpɔzʋʋ se ɛñaɣ pana. Kɩɖaʋ nakʋyʋ yɔ: Kɔrɛntɩ mba kaatisaa nɛ pamʋ tɔm kɩbandʋ, peyele nɛ pamɩyɩsɩ-wɛ lɩm, pamʋ fezuu kiɖeɖeu nɛ pɛkpɛlɩkɩ tɔm sakɩyɛ apostoloo Pɔɔlɩ cɔlɔ. (Tʋma 18:​8-11) Paa mbʋ yɔ, pamɩyɩsɩ-wɛ lɩm nɛ pɩla pɩnzɩ sakɩyɛ pʋwayɩ lɛ, pa-taa sakɩyɛ kaakɛ piya mbʋ fezuu taa. (1 Kɔr. 3:2) Ɛzɩma ɖɩpɩzɩɣ ɖɩla nɛ pɩtaatalɩ-ɖʋ mbʋ?

10. Ɛbɛ pɩpɔzʋʋ se ɖɩla nɛ ɖɩpɩɩ fezuu taa? (Yuudi 20)

¹⁰ Pɩsa nɛ ɖɩpɩɩ fezuu taa lɛ, kajalaɣ lɛ pɩpɔzʋʋ se ɖɩsɔɔlɩ se ɖɩla mbʋ. Mba pɔsɔɔlɩ «kɩɩsɩŋɩyɩtʋ» nɛ pɔsɔɔlaa se pɛkɛ piya fezuu taa tam yɔ, paakaɣ pɩʋ fezuu taa kpa. (Adu. 1:22) Ðɩtɩsɔɔlɩ se ɖɩmaɣzɩnɩ mba palabɩ sɔsaa ɛlɛ pɔsɔɔlaa se pa-lʋlɩyaa ɩkpaɣnɩ lɩmaɣza po-lone taa yɔ. Ɛlɛ ɖɩsɔɔlaa se ɖa-maɣmaɣ ɖɩñaɣ pana nɛ ɖɩpɩɩ fezuu taa. (Kalɩ Yuudi 20.) Ye ŋwɛɛ nɛ ŋñakɩ pana se ŋpɩɩ fezuu taa yɔ, tɩmnɩ Yehowa se ɛsɩnɩ-ŋ nɛ ‘ŋsɔɔlɩ nɛ ŋtɛ ŋwɛɛnɩ ɖoŋ nɛ ŋla mbʋ payɩ ɛsɔɔlaa yɔ.’—Filp. 2:13.

11. Ɛbɛ Yehowa ha-ɖʋ se pɩsɩnɩ-ɖʋ nɛ ɖɩpɩɩ fezuu taa? (Efɛɛzɩ mba 4:​11-13)

¹¹ Yehowa ɛɛɖaŋɩɣ se ɖe-ɖeke ɖɩñaɣ pana nɛ ɖɩpɩɩ fezuu taa. Koobiya mba pɛkɛ ninɖiɣyaa nɛ wɩlɩyaa ɛgbɛyɛ taa yɔ, pafalɩsɩ-wɛ se pasɩnɩ-ɖʋ nɛ ‘ɖɩpaɣlɩ’ fezuu taa nɛ «ɖɩpɩɩ nɛ [ɖɩwɛɛnɩ] pilim wɛtʋ ndʋ Krɩstʋ wɛna yɔ.» (Kalɩ Efɛɛzɩ mba 4:​11-13.) Yehowa ha-ɖʋ ɖɔɖɔ e-fezuu kiɖeɖeu se kɩsɩnɩ-ɖʋ nɛ ɖɩwɛɛnɩ «Krɩstʋ maɣzɩm.» (1 Kɔr. 2:​14-16) Pɩtasɩ lɛ, eyeba nɛ pama Evaŋgilimwaa 4 se ɛwɩlɩ-ɖʋ ɛzɩma Yesu maɣzaɣ, ɛzɩma ɛyɔɔdaɣ nɛ ɛzɩma ɛlakaɣ alɩwaatʋ ndʋ ɛɛwɛ tɛtʋ yɔɔ yɔ. Ye ŋmaɣzɩɣnɩ Yesu maɣzɩm nɛ ɛ-lakasɩ yɔ, ŋkaɣ pɩzʋʋ nɛ ŋpɩɩ fezuu taa.

 ƐZƖMA FEZUU TAA TƆƆNAƔ YUŊ ÑƖŊGA SƖƔNƖ-ÐƲ SE ÐƖPƖƖ FEZUU TAA?

12. Ɛbɛ «Krɩstʋ yɔɔ kajalaɣ wɩlɩtʋ» kɛnaa?

¹² Pɩsa nɛ ɖiwolo pɩ-yɔɔ nɛ ɖɩpɩɩ fezuu taa lɛ, pɩcɛyaa ɖɔɖɔ se ɖɩkpɛlɩkɩ nɛ «ɖɩcɛzɩ Krɩstʋ yɔɔ kajalaɣ wɩlɩtʋ,» p ʋ-tɔbʋʋ se kajalaɣ wɩlɩtʋ ndʋ pɩwɛɛ se Krɩstʋ mba ɩtɩlɩ yɔ. Kajalaɣ wɩlɩtʋ ndʋ tɩ-taa natʋyʋ tukuuni kɩwɛɛkɩm yɔɔ kpiɖuu, tisuu, lɩm mɩyɩsʋʋ nɛ sɩɖaa femtu. (Ebr. 6:​1, 2) Pɩkɛ wɩlɩtʋ ndʋ tɩ-yɔɔ paa Krɩstʋ tʋ weyi lɛ etisiɣ yɔ. Pʋyɔɔ apostoloo Pɩyɛɛrɩ yɔɔdɩ wɩlɩtʋ ndʋ tɩ-tɔm alɩwaatʋ ndʋ ɛwɩlaɣ ɛyaa tɔm Pantekooti wiye yɔ. (Tʋma 2:​32-35, 38) Pʋcɔ nɛ ɖɩpɩsɩ Krɩstʋ tɔmkpɛlɩkɩyʋ lɛ, pɩwɛɛ se ɖitisi kajalaɣ wɩlɩtʋ ndʋ tɩ-yɔɔ. Pɔɔlɩ yɔɔdaa se ye nɔɔyʋ eetisiɣ sɩɖaa femtu wɩlɩtʋ yɔɔ yɔ, pɩwɩlɩɣ se ɛtɩkɛ Krɩstʋ tʋ toovenim tʋ. (1 Kɔr. 15:​12-14) Ɛlɛ pɩtɩpɔzɩ se ɖɩsɩɩnɩ kajalaɣ wɩlɩtʋ ndʋ ti-ɖeke.

13. Ɛbɛ pɩwɛɛ se ɖɩla nɛ fezuu taa tɔɔnaɣ yuŋ ñɩŋga ŋga pɔyɔɔdɩ kɔ-tɔm Ebree mba 5:14 taa yɔ kawazɩ-ɖʋ? (Cɔnɩ ɖɔɖɔ kɩlɛmʋʋ.)

¹³ Fezuu taa tɔɔnaɣ yuŋ ñɩŋga wɛ ndɩ nɛ kajalaɣ wɩlɩtʋ. Pɩtɩkɛ Yehowa paɣtʋ ɖeke wɛnɩ fezuu taa tɔɔnaɣ yuŋ ñɩŋga taa, ɛlɛ paɣtʋ kila wɛ ɖɔɖɔ ka-taa nɛ asɩɣnɩ-ɖʋ se ɖɩnɩɩ Yehowa lɩmaɣza taa. Pɩsa nɛ tɔɔnaɣ ŋga kawazɩ-ɖʋ lɛ, pɩwɛɛ se ɖɩkpɛlɩkɩɣ Ɛsɔtɔm, ɖɩmaɣzɩɣ tɩ-yɔɔ nɛ ɖɩla mbʋ payɩ ɖɩpɩzɩɣ yɔ nɛ ɖɩɖɔ tɩ-yɔɔ. Ye ɖɩlakɩ mbʋ yɔ, ɖɩwɛɛ nɛ ɖɩfalɩsɩɣ ɖa-tɩ se ɖɩkpaɣ lɩmaɣza wena akɛdɩɣnɩ Yehowa yɔ. c—Kalɩ Ebree mba 5:14.

14. Ɛzɩma Pɔɔlɩ sɩnɩ Kɔrɛntɩ mba se papɩɩ fezuu taa?

¹⁴ Ðoŋ ɖoŋ lɛ, alɩwaatʋ ndʋ Krɩstʋ ñɩma mba patɩpɩɩ fezuu taa yɔ pakatɩɣ wɛtʋ ndʋ tɩ-taa Bibl tɩɖʋ paɣtʋ natʋyʋ ɖeyi ɖeyi yɔ, pɩwɛ-wɛ kaɖɛ se pakpaɣ lɩmaɣza kɩbana. Ye Bibl ɛtɩɖʋ paɣtʋ natʋyʋ kpayɩ yɔ, nabɛyɛ pɩzɩɣ nɛ pamaɣzɩ se papɩzɩɣ nɛ pala mbʋ pɔsɔɔlaa yɔ. Lalaa pɩzɩɣ nɛ pɔpɔzɩ se peheyi-wɛ mbʋ pɩwɛɛ se pala yɔ ɖenɖe pɩtɩpɔzɩ se paɖʋ paɣtʋ natʋyʋ yɔ. Kɩɖaʋ nakʋyʋ yɔ: Pɩwɛ ɛzɩ Krɩstʋ ñɩma mba paawɛ Kɔrɛntɩ yɔ paapɔzɩ Pɔɔlɩ se ɛzɩ pɩmʋnaa se pɔtɔɔ tɔɔnaɣ ŋga paala sɩɩnaa yɔɔ yɔ yaa pataatɔɔ. Pɔɔlɩ tiheyi-wɛ mbʋ pɩwɛɛ se pala yɔ, ɛlɛ eheyi-wɛ se pɩwɛɛ se pa-taa paa weyi lɛ ɛtɩŋnɩ ‘waɖɛ nɖɩ ɛwɛna se ɛlɩzɩ yɔ’  ɖɩ-yɔɔ nɛ ɛla mbʋ ɛ-ɛhʋyɛ haɣ-ɩ nʋmɔʋ se ɛla yɔ. Ɛlabɩnɩ tʋmɩyɛ paɣtʋ kila naayɛ se ɛsɩnɩ-wɛ nɛ pakpaɣ lɩmaɣza wena aayeki se pɛ-ɛhʋyɛ ɛcɛyɩ-wɛ yɔ nɛ aayeki ɖɔɖɔ se pituuli lalaa yɔ. (1 Kɔr. 8:​4, 7-9) Ye mbʋ, Pɔɔlɩ kaawɛɛ nɛ ɛsɩɣnɩ Kɔrɛntɩ mba se papɩɩ fezuu taa nɛ pɩsa nɛ palabɩnɩ tʋmɩyɛ ɖoŋ weyi pɛwɛna se panɩɩ tɔm taa yɔ; ɛlɛ pataaɖaŋ se lalaa iheyini-wɛ mbʋ pɩwɛɛ se pala yɔ, yaa pataaɖaŋ se paɖʋ-wɛ paɣtʋ paa mbʋ lɛ pɩ-taa.

15. Ɛzɩma Pɔɔlɩ sɩnɩ Ebree Krɩstʋ ñɩma se papɩɩ fezuu taa?

¹⁵ Ðɩkpɛlɩkɩɣ lɔŋ kɩbaŋ nɩɩyɩ tɔm ndʋ Pɔɔlɩ ma Ebree Krɩstʋ mba yɔ tɩ-taa. Pa-taa nabɛyɛ taañakɩ pana se powolo pɩ-yɔɔ nɛ papɩɩ fezuu taa. ‘Mbʋ ɛzɩ paatɔɔ fezuu taa tɔɔnaɣ yuŋ ñɩŋga lɛ, paɖaɣnɩ pɩsʋʋ naalɩm wayɩ.’ (Ebr. 5:12) Pataakpɛlɩkɩɣ tɔm kɩfatʋ ndʋ Yehowa tɩŋaɣnɩ ɛgbɛyɛ yɔɔ nɛ ɛwɩlɩɣ-wɛ yɔ nɛ pataatisiɣ tɩ-yɔɔ ɖɔɖɔ. (Adu. 4:18) Kɩɖaʋ nakʋyʋ yɔ: Yuuda ñɩma mba paatisi Yesu yɔɔ yɔ, pa-taa sakɩyɛ kaawɛɛ nɛ peseɣtiɣ ɛyaa se pɔɖɔ Moyizi Paɣtʋ yɔɔ, ŋgʋ Yesu kɩlaʋ yeba nɛ tɩsɩɩ tɩnaɣ pɩlakɩ pɩnzɩ 30. (Roma 10:4; Tiiti 1:10) Pɩnzɩ 30 nzɩ, sɩhaɣaɣ Krɩstʋ mba waɖɛ se panɩɩ pɩ-taa se pɩtaatasɩ cɛyʋʋ se pɔɖɔ Moyizi Paɣtʋ yɔɔ. Mba payɩ pakalɩ takayaɣ ŋga Pɔɔlɩ ma Ebree mba yɔ, papɩzɩɣ nɛ pɔyɔɔdɩ se toovenim taa lɛ, ka-taa tɔm kɛ fezuu taa tɔɔnaɣ yuŋ ñɩŋga. Ɛ-takayaɣ sɩɣaɣnɩ-wɛ se pana se nʋmɔʋ kɩfalʋʋ ŋgʋ kɩ-yɔɔ patɩŋaɣna nɛ pɛsɛɣ Yehowa yɔ kɩɩkpaɖɩ ɖeu. Nɛ pɩhaɣaɣ-wɛ ɖɔɖɔ abalɩtʋ se powolo pɩ-yɔɔ nɛ posusuu tɔm paa Yuuda mba ɩkaɖɩɣnɩ-wɛ yɔ.—Ebr. 10:​19-23.

ƐBƐ YƆƆ PƖFƐYƖ SE ÐƖMAƔZƖƔ SE ÐƖTƐM PƖƲ FEZUU TAA NƐ PƖTƖCƐYƖ SE ÐƖTASƖ PANA ÑAƔƲ?

16. Pɩtasɩna se pɩpɔzʋʋ se ɖɩñaɣ pana nɛ ɖɩpɩɩ fezuu taa lɛ, ɛbɛ ɖɔɖɔ pɩwɛɛ se ɖɩla?

¹⁶ Pɩpɔzʋʋ se ɖɩñaɣ pana siŋŋ nɛ ɖɩpɩɩ fezuu taa, ɛlɛ pɩwɛɛ ɖɔɖɔ se ɖɩñaɣ pana nɛ ɖɩtaapɩsɩnɩ wayɩ. Ɛlɛ pɩsa nɛ ɖɩla mbʋ lɛ, pɩwɛɛ se ɖɩkpa ɖa-tɩ nɛ ɖɩtaamaɣzɩ se ɖɩtɛm pɩʋ fezuu taa nɛ pɩtɩcɛyɩ se ɖɩtasɩ pana ñaɣʋ. (1 Kɔr. 10:12) Pɩpɔzʋʋ se ‘ɖɩwɛɛ nɛ ɖɩtakɩɣ ɖa-tɩ’ nɛ ɖa-taa tɛ se ɖɩwɛɛ nɛ ɖɩɖɛɣnɩ ɛsɩndaa.—2 Kɔr. 13:5.

17. Takayaɣ ŋga Pɔɔlɩ ma Koloosi mba yɔ ka-taa, ɛzɩma ɛwɩlaa se pɩcɛyaa se papɩɩ fezuu taa nɛ pataapɩsɩnɩ wayɩ?

¹⁷ Takayaɣ ŋga Pɔɔlɩ ma Koloosi mba yɔ ka-taa, ɛtasɩ wɩlʋʋ se pɩcɛyaa se papɩɩ fezuu taa nɛ pataapɩsɩnɩ wayɩ. Paa Koloosi Krɩstʋ ñɩma kaatɛm pɩʋ fezuu taa yɔ, Pɔɔlɩ paɣ-wɛ se  pakpa pa-tɩ nɛ ɛjaɖɛ yɔɔ lɩmaɣza itaapeɣzi-wɛ. (Kol. 2:​6-10) Pɩtʋʋ fɛyɩ se Epafraasɩ ɖɔɖɔ kaasɩm Koloosi ɛgbɛyɛ taa mba camɩyɛ nɛ ɛtɩmaɣ pɔ-yɔɔ kaahɛzaɣ se ‘pɛtɛzɩ ɖɔkʋʋ kpam’ yaa papɩɩ fezuu taa. (Kol. 4:12) Ɛbɛ pɩkpɛlɩkɩɣ-ɖʋ? Pɔɔlɩ nɛ Epafraasɩ paanɩ pɩ-taa se pɩsa nɛ ɛyʋ pɩɩ fezuu taa nɛ ɛtaapɩsɩnɩ wayɩ lɛ, pɩpɔzʋʋ-ɩ pana ñaɣʋ nɛ pɩpɔzʋʋ ɖɔɖɔ se Ɛsɔ ɛsɩnɩ-ɩ. Paasɔɔlaa se paa kaɖɛ nɖɩ Koloosi mba ɩtɩɩwɛɛ nɛ pakatɩɣ yɔ, pɩwɛɛ se pañaɣ pana nɛ papɩɩ fezuu taa nɛ pataapɩsɩnɩ wayɩ yaa pɛkɛ Krɩstʋ ñɩma mba papɩwa nɛ pɛtɛ yɔ.

18. Ɛbɛ pɩzɩɣ nɛ pɩtalɩ Krɩstʋ tʋ weyi ɛpɩ fezuu taa yɔ? (Cɔnɩ ɖɔɖɔ kɩlɛmʋʋ.)

¹⁸ Pɔɔlɩ paɣ Ebree mba se ye Krɩstʋ tʋ weyi ɛpɩ fezuu taa yɔ ɛtɩkpa ɛ-tɩ yɔ, ɛpɩzɩɣ nɛ elesi taabalɩyɛ nɖɩ ɖɩwɛ ɛ nɛ Ɛsɔ pɛ-hɛkʋ taa yɔ tam. Krɩstʋ tʋ nɔɔyʋ laŋɩyɛ pɩzɩɣ nɛ ɖɩkpa ɖoŋ nɛ halɩ eekpiɖiɣ kɩwɛɛkɩm mbʋ ɛlaba yɔ pɩ-yɔɔ se pɩsa nɛ Ɛsɔ kpeɣ-i. Taa leleŋ tɔm lɛ se Ebree mba taawɛɛ wɛtʋ ndʋ tɩ-taa. (Ebr. 6:​4-9) Suwe ɖɩpɩzɩɣ nɛ ɖɩyɔɔdɩ sɔnɔ ɛyaa mba pɛhɛ fezuu taa yaa palɩzɩ-wɛ ɛgbɛyɛ taa nɛ pʋwayɩ pekpiɖi yɔ pɔ-yɔɔ? Ɛzɩma poluzi pa-tɩ nɛ pekpiɖi yɔ, pawɩlaa se pɛwɛ ndɩ nɛ mba Pɔɔlɩ kaayɔɔdɩ pɔ-tɔm ɛ-takayaɣ taa yɔ. Ɛlɛ alɩwaatʋ ndʋ papɩsɩɣ Yehowa cɔlɔ yɔ, pɩpɔzʋʋ se pasɩnɩ-wɛ. (Ezek. 34:​15, 16) Ɛgbɛyɛ taa ɛzʋtʋyaa pɩzɩɣ nɛ pala ɖʋtʋ nɛ koobu weyi ɛpɩ fezuu taa yɔ ɛsɩnɩ-wɛ nɛ patasɩ kpaʋ ɖoŋ fezuu taa.

19. Kaɖʋwa ŋga pɩwɛɛ se ɖɩwɛɛna?

¹⁹ Ye ŋwɛɛ nɛ ŋlʋkɩ se ŋɖɛɛnɩ ɛsɩndaa nɛ ŋpɩɩ fezuu taa yɔ, ŋkaɣ talʋʋ kaɖʋwa ŋga. Wolo pɩ-yɔɔ nɛ ŋtɔkɩ fezuu taa tɔɔnaɣ yuŋ ñɩŋga nɛ ŋyele nɛ ña-lɩmaɣza la nɔɔ kʋɖʋmaɣ nɛ Yehowa ñɩna nɛ pɩkɩlɩ. Nɛ ye ŋtɛm pɩʋ fezuu taa yɔ, la mbʋ payɩ ŋpɩzɩɣ yɔ nɛ ŋtaapɩsɩnɩ wayɩ kaaʋ.