Palʋlɩ-m pɩnaɣ 1955 taa, ɖɩɩkpɛndɩ abalɩbiya 3 nɛ ma lɛ tɩnʋʋ. Fɛɛlandɩ teŋgu kidiiliŋ hadɛ kiŋ cɔlɔ mancaɣaa nɛ manpaɣlɩ, nɛ egeetiye nɖɩ payaɣ lɛɛlɛɛyɔ se Vantaa tɛtʋ.

Pamɩyɩsɩ mon-ɖoo lɩm nɛ ɛpɩsɩ Yehowa Aseɣɖe Tʋ nɛ pɩla pɩnzɩ pazɩ pʋcɔ nɛ palʋlɩ-m. Ɛlɛ man-caa kaɖaɣnɩ toovenim nɛ ɛtaasɔɔlɩ se mon-ɖoo ɛkpɛlɩkɩnɩ ma nɛ man-ɖalaa Bibl yaa ewoni-ɖʋ kediɣzisi taa. Pʋyɔɔ mon-ɖoo wɩlaɣ-ɖʋ Bibl taa kajalaɣ wɩlɩtʋ alɩwaatʋ ndʋ man-caa ɛɛwɛɣ yɔ.

Kpaɣnɩ man-pɩjatʋ taa mɔñɔnɩ Yehowa kpam. Maawɛnɩ pɩnzɩ 7 lɛ, kɩyakʋ nakʋyʋ halʋ weyi ɛwɩlaɣ-ɖʋ sukuli taa yɔ, ɛ-taa kaawɩnɩ-m siŋŋ mbʋ pʋyɔɔ yɔ menkizaa se maatɔkɩ Fɛɛlandɩ mba tɔɔnaɣ ŋga payaɣ se verilättyjä yɔ, pɩkɛ kakandɛyʋʋ ŋgʋ palabɩ-kʋ nɛ calɩm yɔ. Peeɖe ɛñɩɣ ma-lɩkpaɣzasɩ nɛ e-nesi kʋɖʋmsɩ se ɛhaa mɔ-nɔɔ, nɛ ɛkpaɣ kakandɛyʋʋ hɔɔlaɣ e-nesi lɛɛsɩ taa se ɛsʋzɩ-kɛ nɛ ɖoŋ mɔ-nɔɔ taa. Nɛ mañaɣ pana nɛ mama kakandɛyʋʋ hɔɔlaɣ e-nesi taa.

Maawɛnɩ pɩnzɩ 12 lɛ, man-caa sɩ. Pʋwayɩ manpɩzaa nɛ mowoki kediɣzisi. Ɛgbɛyɛ taa koobiya wɩlaa se pamaɣzɩɣ mɔ-yɔɔ siŋŋ, nɛ piseɣti-m se mɛnɖɛɛnɩ ɛsɩndaa fezuu taa. Manpaɣzɩ Bibl kalʋʋ paa evemiye nɖɩ nɛ mɛnkpɛlɩkɩɣ ɛgbɛyɛ takayɩsɩ camɩyɛ. Ðʋtʋ kɩbandʋ ndʋ tɩsɩnɩ-m, nɛ  mɔnkɔma nɛ mɛwɛɛnɩ pɩnzɩ 14 lɛ pamɩyɩsɩ-m lɩm, pɩɩkɛ 8 août 1969 wiye.

Mɛntɛm sukuli kpaagbaa lɛ, manpaɣzɩ paa ɖooye nʋmɔʋ lɩzʋʋ tʋmɩyɛ. Pɩlabɩ kpɩtaŋ pazɩ lɛ, mankʋyɩ nɛ mowolo se manɖʋ nesi Pielavesi ɖenɖe pɩpɔzaɣ tɔm susuyaa nɛ pɩkɩlɩ yɔ. Peeɖe kaañɔtɩnɩ Fɛɛlandɩ hɛkʋ taa.

Pielavesi peeɖe mankatɩ pɛlɛ weyi payaɣ-ɩ se Sirkka yɔ, nɛ pʋwayɩ ma nɛ ɩ ɖɩɖɔkɩ nesi. Maasɔɔlɩ-ɩ siŋŋ mbʋ pʋyɔɔ yɔ ɛɛwɛnɩ tɩ luzuu nɛ ɛtɛ ɛsɔɔlɩ Yehowa pɩdɩɩfɛyɩ. Ɛtaañɩnɩɣ se ɛ-hɩɖɛ ɛsɛɛ nɛ ɛtaasɩɣ tomnaɣ yɔɔ wondu kajalaɣ ɖeɖe. Ða-naalɛ ɖɩɩsɔɔlaa se ɖɩla mbʋ payɩ ɖɩpɩzɩɣ yɔ Yehowa sɛtʋ taa nɛ ɖɩɩsɔɔlɩ faaa se ɖɩla tʋma wena payɩ paɖʋʋ-ɖʋ yɔ. Ðɩɖɔkɩ nesi 23 mars 1974 wiye. Ðɩɖɔkɩ nesi kpaagbaa lɛ, mbʋ ɛzɩ ɖɩɩɖɛ helim mʋʋ lɛ, ɖiwoba nɛ ɖɩɖʋ nesi tɛtʋ cikpetu ndʋ payaɣ se Karttula yɔ tɩ-taa, nɛ pɩpɔzaɣ Kewiyaɣ tɔm susuyaa peeɖe nɛ pɩkɩlɩ.

Kpaɣnɩ alɩwaatʋ ndʋ ɖɩɖɔkɩ nesi yɔ, Yehowa wɩlɩ-ɖʋ se ye ɖɩcalɩnɩ ñɩnʋʋ e-Kewiyaɣ yɔ, ɛkaɣ cɔnʋʋ ɖo-tomnaɣ yɔɔ kɩcɛyɩm ɖeɖe. (Mat. 6:33) Alɩwaatʋ ndʋ ɖɩɩwɛ Karttula yɔ, ɖɩtaawɛɛnɩ lɔɔɖɩyɛ. Kiɖe tɛɛ lɛ, cɛɛcɛ ɖɩcakaɣ. Ŋgʋ nikaɣ alɩwaatʋ taa, nikaɣ kpaɣaɣ pɩfɛyɩ yɔɔdʋʋ. Pʋcɔ nɛ ɖisusi tɔm ɖɛ-ɛgbɛyɛ kooka tɩŋa taa lɛ, pɩpɔzɩ-ɖʋ lɔɔɖɩyɛ. Ɛlɛ ɖɩtaawɛɛnɩ liidiye se ɖɩya naɖɩyɛ.

Kɩyakʋ nakʋyʋ man-ɖalʋ kɔɔ se ɛna-ɖʋ ɛlɛ ɖɩtaaɖʋna se ɛkɔŋ. Ɛkɔma lɛ, ɛha-ɖʋ ɛ-lɔɔɖɩyɛ. Ɛtɛm hɛyʋʋ ɖɩ-tɛ assurance liidiye. Sanzɩ ɖeke pɩpɔzʋʋ se ɖɩcɛ. Lɛɛlɛɛyɔ lɛ ɖɩwɛnɩ lɔɔɖɩyɛ nɖɩ ɖɩñɩnaɣ yɔ.

Yehowa ɖɔm tɔm ndʋ ɛyɔɔdaa se ɛcɔŋnɩ ɖa-kɩcɛyɩm ɖeɖe yɔ tɩ-yɔɔ. Ða-tʋmɩyɛ lɛ se ɖɩsɩɩ Kewiyaɣ tʋma kajalaɣ lone taa.

Ðɩlakaɣ nʋmɔʋ lɩzɩyaa sukuli pɩnaɣ 1978 taa lɛ, ɖa-wɩlɩyaa taa lɛlʋ, Raimo Kuokkanen a seɣti-ɖʋ se ɖɩñɩɣ niye takayaɣ taa nɛ ɖɩla Galaadɩ sukuli. Pʋyɔɔ ɖɩpaɣzɩ kpɛlɩkʋʋ aŋglɛɛ kʋnʋŋ se pɩsɩnɩ-ɖʋ nɛ ɖiwolo sukuli ŋgʋ. Ɛlɛ pɩnaɣ 1980 taa, pʋcɔ nɛ ɖihiɣ waɖɛ se ɖɩñɩɣ niye takayaɣ taa lɛ, paya-ɖʋ se ɖiwolo nɛ ɖɩla tʋmɩyɛ Fɛɛlandɩ ɛgbɛyɛ piliŋa taa. Pʋbʋ taa lɛ pataahaɣ Betɛɛlɩ tʋmlaɖaa nʋmɔʋ se powolo Galaadɩ sukuli. Ɛlɛ ɖɩɩsɔɔlaa se ɖɩla tʋmɩyɛ ɖenɖe Yehowa sɔɔlaa yɔ, pɩtɩkɛ ɖenɖe ɖa-maɣmaɣ ɖɩsɔɔlaa yɔ. Pʋyɔɔ ɖitisaa nɛ ɖiwolo Betɛɛlɩ. Paa mbʋ yɔ, ɖɩɩwɛɛ nɛ  ɖɩkpɛlɩkɩɣ aŋglɛɛ kʋnʋŋ se ye wiɖiyi paya-ɖʋ se ɖiwolo Galaadɩ sukuli yɔ pɩɩsɩnɩ-ɖʋ.

Pɩlabɩ pɩnzɩ nasɩyɩ pʋwayɩ lɛ, Nɔɔɖɛyaa ɛgbɛyɛ ha nʋmɔʋ Betɛɛlɩ tʋmlaɖaa se papɩzɩɣ nɛ powolo Galaadɩ sukuli. Pʋyɔɔ ɖɩñɩɣ niye takayaɣ taa kpaagbaa, ɛlɛ pɩtɩwɩlɩ se ɖɩtaasɔɔlɩ Betɛɛlɩ tʋmɩyɛ. Halɩ ɖɩɩsɔɔlɩ-ɖɩ kpem. Ðɩñɩnaɣ se ɖɩha ɖa-tɩ nɛ ɖɩla tʋmɩyɛ ɖenɖe kɩcɛyɩm wɛɛ yɔ, ye ɖɩpɩzɩɣ se ɖɩlabɩ-ɖɩ yɔ. Paya-ɖʋ nɛ ɖiwolo Galaadɩ sukuli ɖaŋ 79 ñɩŋgʋ, nɛ pɛcɛlɩ-ɖʋ ɖa-takayɩsɩ septembre 1985 taa. Paatiyini-ɖʋ Kolombii ɛjaɖɛ taa.

Ðɩtalɩ Kolombii lɛ, ɛgbɛyɛ piliŋa taa ɖɩcalɩ tʋmɩyɛ labʋ. Malakaɣ mbʋ payɩ manpɩzɩɣ yɔ tʋmɩyɛ nɖɩ paɖʋ-m yɔ ɖɩ-taa, ɛlɛ pɩnaɣ kʋɖʋmaɣ wayɩ lɛ mamaɣzɩ se pɩpɔzʋʋ se pɛlɛɣzɩ-ɖʋ tʋmɩyɛ. Peeɖe mɔnpɔzaa se pɛlɛɣzɩ-ɖʋ tʋmɩyɛ. Kajalaɣ ɖeɖe lɛ mɔnpɔzʋʋ se pɛlɛɣzɩ-ɖʋ tʋmɩyɛ yɔ nɛ wiɖiyi mantɩtasɩ pɔzʋʋ. Pʋwayɩ lɛ petiyini-ɖʋ Neiva tɛtʋ taa Huila egeetiye taa se ɖɩla Ɛsɔtɔm tiyiyu tʋmɩyɛ peeɖe.

Maasɔɔlɩ tɔm susuu tʋmɩyɛ paa ɛzɩmtaa. Maakɛ ɛɖanɛ nɛ nʋmɔʋ lɩzɩyʋ Fɛɛlandɩ ɛjaɖɛ taa lɛ, nabʋyʋ taa monsusaɣ tɔm kpaɣnɩ tanaŋ tɛɛ cu nɛ pɩkɔɔ pɩtalɩ ɖooo ɖanaɣ kpaagbaa. Ma nɛ Sirkka ɖɩɖɔkɩ nesi kpaagbaa lɛ, ɖɩkpakaɣ ɖɔɖɔ avema pilim nɛ ɖisusuu tɔm. Alɩwaatʋ ndʋ ɖisusuu tɔm lona wena aposaa yɔ a-taa yɔ, nabʋyʋ taa ɖɔ-lɔɔɖɩyɛ taa ɖɩhɩnɩɣ. Piyekaɣ nɛ ɖɩɩkɩlɩɣ ɖɔm nʋmɔʋ sakɩyɛ, nɛ piyekaɣ ɖɔɖɔ nɛ tɛʋ feŋ lɛ ɖɩpaɣzɩ tɔm susuu lɔŋ.

Ðɛ-Ɛsɔtɔm tiyiyu tʋmɩyɛ nɖɩ ɖɩ-taa, ɖɩɖaɣnɩ hiɣu kpekpeka ŋga ɖɩɩwɛnɩ tɔm susuu taa yɔ. Ðɛ-ɛgbɛyɛ huwaa nɛ Kolombii koobiya wɛnɩ ñamtʋ, pɔsɔɔlɩ ɛyaa nɛ pɛwɛnɩ ɛsɩmɩyɛ.

Tɛtʋ ndɩ ndɩ kaawɛ Neiva tɛtʋ ndʋ tɩ-taa ɖɩlakaɣ tʋmɩyɛ yɔ tɩ-cɔlɔ nɛ Yehowa Aseɣɖe Tʋ nɔɔyʋ taawɛɛ tɩ-taa. Mamaɣzaɣ ɛzɩma ɖɩpɩzɩɣ ɖɩla nɛ tɔm kɩbandʋ talɩ lona ana a-taa yɔ pɩ-yɔɔ siŋŋ. Ɛlɛ ɛtɛlɛmwaa puuyaɣ lakasɩ yɔɔ lɛ, pɩɩwɛ kaɖɛ se agɔma iwolo peeɖe mbʋ pʋyɔɔ yɔ pɩɖʋʋ pe-wezuu kaɖɛ taa. Pʋyɔɔ mantɩmaa se tɛtʋ ndʋ tɩ-taa tʋ nɔɔyʋ ɛpɩsɩ Yehowa Aseɣɖe Tʋ. Mamaɣzaɣ se pɩpɔzʋʋ se ɛyʋ ɛnʋ ɛcaɣ Neiva tɛtʋ taa nɛ ɛkpɛlɩkɩ toovenim. Pʋyɔɔ mantasɩ tɩmʋʋ se pamɩyɩsɩɣ-ɩ lɩm nɛ pɩtɛ lɛ, ɛpɩɩ fezuu taa nɛ ɛpɩsɩ ɛ-tɛtʋ taa nɛ esusi tɔm. Mantaana se Yehowa tɛm ñɩnʋʋ nʋmɔʋ kɩbaŋʋ nakʋyʋ nɛ ɛsɩɩ.

Pɩlabɩ alɩwaatʋ pazɩ pʋwayɩ lɛ, ma nɛ evebu nɔɔyʋ ɖɩpaɣzɩ Bibl kpɛlɩkʋʋ. Payaɣ-ɩ se Fernando González. Ɛwɛ Algeciras tɛtʋ taa. Tɩkɛ tɛtʋ ndɩ ndɩ ndʋ Yehowa Aseɣɖe Tʋ nɔɔyʋ taawɛɛ tɩ-taa yɔ tɩ-taa natʋyʋ. Fernando ɖɔŋaɣ nʋmɔʋ ŋgʋ kɩcɛzɩ kilomɛtanaa 50 yɔ paa kpɩtaʋ ŋgʋ nɛ ewoki Neiva nɛ ɛlakɩ tʋmɩyɛ. Ɛñɔɔzaɣ paa kpɛlɩkʋʋ mbʋ lɛ camɩyɛ, nɛ pitileɖi lɛ ɛpaɣzɩ kɔm kediɣzisi tɩŋa. Kpaɣnɩ kajalaɣ kpɩtaʋ ŋgʋ Fernando paɣzɩ kpɛlɩkʋʋ yɔ, ekpeɣlaɣ ɛ-tɛtʋ taa mba nɛ ɛwɩlɩɣ-wɛ tɔm ndʋ ɛkpɛlɩkaɣ yɔ.

Fernando paɣzɩ kpɛlɩkʋʋ nɛ pɩla fenasɩ 6 lɛ, ɛha ɛ-tɩ nɛ pamɩyɩsɩ-ɩ lɩm janvier 1990 taa. Pʋwayɩ lɛ ɛpɩsɩ paa ɖooye nʋmɔʋ lɩzɩyʋ. Lɛɛlɛɛyɔ lɛ Yehowa Aseɣɖe Tʋ nɔɔyʋ wɛ Algeciras tɛtʋ taa nɛ pʋyɔɔ lɛ ɛgbɛyɛ piliŋa pɩzaɣ se ketiyini nʋmɔʋ lɩzɩyaa kiya tɛtʋ ndʋ tɩ-taa nɛ pɩɩkɔŋnɩ-wɛ kaɖɛ naɖɩyɛ. Ɛgbɛyɛ naɖɩyɛ ñɔ tɛtʋ ndʋ tɩ-taa février 1992 taa.

 Fernando susi tɔm ɛ-tɛtʋ taa ɖeke na? Aayɩ. Ɛɖɔkɩ nesi nɛ pɩtɛ lɛ, ɛ nɛ ɛ-halʋ pakʋyɩ nɛ powolo San Vicente del Caguán tɛtʋ taa. Yehowa Aseɣɖe Tʋ nɔɔyʋ taawɛɛ tɛtʋ ndʋ tɩ-taa. Paɖʋ nesi nɛ ɛgbɛyɛ naɖɩyɛ ñɔ peeɖe. Pɩnaɣ 2002 taa, paha waɖɛ Fernando nɛ ɛpɩsɩ egeetiye yɔɔ cɔnɩyʋ nɛ halɩ nɛ sɔnɔ ɛ nɛ ɛ-halʋ Olga pɛwɛɛ nɛ palakɩ tʋmɩyɛ nɖɩ.

Mbʋ pɩlaba yɔ, pɩkpɛlɩkɩ-m se ɖɩɩtɩmɩɣ teokrasɩ tʋma yɔɔ lɛ, pɩcɛyɩ siŋŋ se ɖɩyɔɔdɩ mbʋ ɖeyi ɖeyi ɖɩñɩnɩɣ yɔ pɩ-tɔm. Yehowa lakɩ mbʋ ɖɩɩpɩzɩɣ nɛ ɖɩla yɔ. Ðɩtaasɔɔ se ɛ-hayɩm taa ɖɩlakɩ tʋmɩyɛ, pɩtɩkɛ ɖa-hayɩm taa.—Mat. 9:38.

Pɩnaɣ 1990 taa, pɔpɔzɩ-ɖʋ se ɖɩla egeetiye yɔɔ cɔnʋʋ tʋmɩyɛ. Kolombii tɛtʋ sɔsɔtʋ ndʋ payaɣ se Bogotá yɔ tɩ-taa ɖɩpaɣzɩ labʋ egeetiye yɔɔ cɔnʋʋ tʋmɩyɛ. Sɔɔndʋ kaakpa-ɖʋ nɛ tʋmɩyɛ nɖɩ. Ma nɛ ma-halʋ ɖɩɩkɛ ɛyaa yemwaa nɛ ɖɩtaawɛɛ niye hɔɔlʋʋ nakʋyʋ taa ɖeyi ɖeyi. Nɛ tɛtʋ sɔsɔtʋ taa caɣʋ tɩmalɩnɩ-ɖʋ. Paa mbʋ yɔ, Yehowa ɖɔm tamaɣ ŋga ɛlabɩ Filiipi mba 2:13 taa yɔ kɔ-yɔɔ. Kɔtɔŋ se: «Ɛsɔ kɛnɩ weyi ɛhaɣ-mɩ ɖoŋ ɛzɩ pɩkɛdʋʋnɩ-ɩ yɔ, se ɩsɔɔlɩ nɛ ɩtɛ ɩwɛɛnɩ ɖoŋ nɛ ɩla mbʋ payɩ ɛsɔɔlaa yɔ.»

Pʋwayɩ lɛ, pɔpɔzɩ-ɖʋ se ɖɩla egeetiye yɔɔ cɔnʋʋ tʋmɩyɛ Medellín egeetiye taa. Egeetiye nɖɩ ɖɩ-tɔm maayɔɔdɩ kiɖe tɛɛ. Puuyaɣ lakasɩ kaatɔyɩ ɖɩ-taa siŋŋ, piyeba nɛ sɔɔndʋ taatasɩɣ kpaʋ ɛyaa. Kɩyakʋ nakʋyʋ maawɛɛ nɛ mɛnkpɛlɩkɩɣnɩ nɔɔyʋ Bibl ɖɩɣa nakɛyɛ taa lɛ, nabɛyɛ paɣzɩ ɖama malɩfanaa tɔʋ awayɩ. Pɩlabɩ mbʋ lɛ, mancaɣaɣ pabʋʋ tataa, ɛlɛ Bibl kpɛlɩkɩyʋ ñowobi tayʋʋ kalʋʋ yɔɔ yem fɛɛɛ. Ɛtɛm tayʋʋ kalʋʋ lɛ, ɛkʋyɩ nɛ ɛlɩɩ awayɩ. Pɩlabɩ alɩwaatʋ pazɩ lɛ, ɛkpɛndɩnɩ abalɩbiya nasɩyɩ 2 nɛ ɛkɔɔ nɛ ɛyɔɔdɩ se: «Pɩtaawɩzɩ-ŋ, malɩwa se mañɩnɩ men-piya.»

Alɩwaatʋ lɛɛtʋ taa ɖɔɖɔ lɛ, ɖe-weziŋ kaawɛ kaɖɛ taa. Kɩyakʋ nakʋyʋ, ɖɩlakaɣ kpaɣ ɖɩɣa nɛ ŋwolo ɖɩɣa lɛ, ma-halʋ kɔɔ mɔn-cɔlɔ nɛ seya, sɔɔndʋ kpaɣaɣ-ɩ kpem. Ɛyɔɔdaa se nɔɔyʋ tɔ-ɩ malɩfa. Sɔɔndʋ kaakpa-m kpem. Ɛlɛ pʋwayɩ ɖɩkɔm nɛ ɖiɖiɣzina se weyi ɛtɔ malɩfa yɔ, pɩtɩkɛ Sirkka ɛñɩnaɣ tɔʋ. Ɛlɛ abalʋ nɔɔyʋ ɛñɩnaɣ tɔʋ, ɛlɛ kaawɛɛ nɛ ɛɖɔŋ Sirkka cɔlɔ kpam.

Alɩwaatʋ wɛɛ nɛ tɩɖɛɣ lɛ, sɔɔndʋ taakɩlɩɣ-ɖʋ kpaʋ nɛ puuyaɣ lakasɩ. Koobiya mba paawɛ peeɖe yɔ, paawɛ abalɩtʋ nɛ pɩɩkpazɩ-ɖʋ ɖoŋ siŋŋ, mbʋ pʋyɔɔ yɔ pakataɣ wɛtʋ ndʋ ɖɩkataɣ yɔ nɛ halɩ nabʋyʋ taa, pakataɣ wɛtʋ ndʋ tɩɩcɛzɩ mbʋ yɔ. Ðɩyɔɔdaa se ye Yehowa ɛwɛɛ nɛ ɛsɩɣnɩ-wɛ yɔ, ɛkaɣ-ɖʋ sɩnʋʋ ɖɔɖɔ. Ðɩɖɔŋaɣ lɔŋ weyi egeetiye taa ɛzʋtʋyaa tasaɣ-ɖʋ yɔ ɩ-yɔɔ paa ɛzɩmtaa, ɖɩtaalakɩ mbʋ pɩpɩzɩɣ nɛ pɩkɔnɩ-ɖʋ kaɖɛ yɔ, nɛ ɖɩɩɖʋzɩ mbʋ pɩkazaa yɔ Yehowa nesi tɛɛ.

Nabʋyʋ taa ɖɩkataɣ wɛtʋ natʋyʋ nɛ ɖɩmaɣzɩɣ se pɩkɛ wɛtʋ kaɖɛ ñɩndʋ, ɛlɛ toovenim taa lɛ pɩtaakɛ mbʋ. Kɩyakʋ nakʋyʋ, mowobi ɖɩɣa nakɛyɛ taa lɛ, manɩɩ nɔsɩ nasɩyɩ taŋ nɛ awayɩ kiŋ, nɛ pɩɩwɛ ɛzɩ halaa 2 kaawɛna nɛ patʋʋ ɖama yɔ. Mantaasɔɔlɩ se mewelisi pɔ-tɔm, ɛlɛ ɖɩɣdʋ heyi-m se ɖɩlɩɩ kʋjɔŋ tɛɛ nɛ mana. Ðɩlɩwa lɛ, menɖiɣzina se sumasɩ nzɩ sɩmaɣzɩɣnɩ ɛyaa yɔ, nzɩ kaawɛna nɛ sɩmaɣzɩɣnɩ ɖɩɣa cɔlɔ ñɩma nabɛyɛ.

Pɩnaɣ 1997 taa, paalɩzɩ-m se mɛnkɛ wɩlɩyʋ Ɛsɔ sɛtʋ tʋmɩyɛ falɩsʋʋ sukuli b taa. Paa ɛzɩmtaa lɛ, maasɔɔlɩ teokrasɩ sukulinaa wobu. Ɛlɛ mantaamaɣzɩ kpa se mankaɣ hiɣu waɖɛ sɔsɔɖɛ nɛ mɛnkɛ wɩlɩyʋ pa-taa nakʋyʋ taa.

Pʋwayɩ lɛ, paha-m waɖɛ nɛ manpɩsɩ ageeta yɔɔ cɔnɩyʋ. Alɩwaatʋ ndʋ pakpaɣ lɩmaɣzɩyɛ se ageeta yɔɔ cɔnʋʋ tʋmɩyɛ ɛɛtasɩɣ wɛʋ yɔ manpɩsɩ egeetiye yɔɔ cɔnʋʋ tʋmɩyɛ taa. Piyeba nɛ mala wɩlɩyʋ nɛ egeetiye yɔɔ cɔnʋʋ tʋmɩyɛ nɛ pɩcɛzɩ pɩnzɩ 30. Mehiɣ wazasɩ sakɩyɛ tʋma ana a-taa. Ɛlɛ pɩtɩkɛ paa ɛzɩmtaa pɩɩwɛ kɛlɛʋ. Iyele nɛ malɩzɩ-mɩ pɩ-taa.

Mɛnkɛ ɛyʋ weyi ɛ-laŋɩyɛ ɛɛtɔʋ yɔ. Pɩsɩnɩ-m nɛ malʋbɩnɩ kala ndɩ ndɩ. Ɛlɛ nabʋyʋ taa, mɛnɖɛlɛsaɣ niye alɩwaatʋ ndʋ mañɩnaɣ se mɔncɔnɩ ɛgbɛyɛ taa wɛtʋ natʋyʋ ɖeɖe yɔ. Alɩwaatʋ natʋyʋ, maaseɣti nabɛyɛ se pawɩlɩ lalaa sɔɔlɩm nɛ pɛkɛ mba panɩɣ tɔm taa yɔ, ɛlɛ mantaayɔɔdɩnɩ-wɛ nɛ nɔɔ kɩbaŋa. Pɩlabɩ pʋtɔdɩyɛ se alɩwaatʋ kʋɖʋmtʋ ndʋ tɩ-taa lɛ, ma-maɣmaɣ mantɩlɩzɩ wɛtʋ kɩbandʋ ndʋ nɛ mawɩlɩ.—Roma 7:​21-23.

Nabʋyʋ taa, mɛ-ɛjandʋ yekaɣ nɛ pitiki-m yɔɔɔ kpem. (Roma 7:24) Alɩwaatʋ natʋyʋ mantɩmnɩ Yehowa nɛ meheyi-i se ye meyebi Ɛsɔtɔm tiyiyu tʋmɩyɛ nɛ manpɩsɩ Fɛɛlandɩ yɔ, pɩkɩlɩɣ ɖeu. Ðanaɣ ŋga mowobi kediɣzaɣ. Tɔm ndʋ manɩ kediɣzaɣ ŋga ka-taa yɔ, tiyeba nɛ man-taa tɛ se pɩpɔzʋʋ se mancaɣ peeɖe nɛ mala tʋmɩyɛ nɖɩ paɖʋ-m yɔ nɛ mowolo pɩ-yɔɔ nɛ malʋkɩnɩ mɛ-ɛjandʋ. Halɩ nɛ sɔnɔ, menɖiɣni tɔzʋʋ ɛzɩma Yehowa cosi ma-adɩma ana a-yɔɔ kpayɩ kpayɩ yɔ nɛ pitukuuni ma-laŋɩyɛ. Pɩtasɩ lɛ, mɛwɛnɩ ɛsɩmɩyɛ siŋŋ se ɛsɩnɩ-m nɛ sɔɔlɩm nɛ malʋbɩnɩ mɛ-ɛjandʋ.

Ma nɛ Sirkka ɖɩwɛnɩ ɛsɩmɩyɛ siŋŋ se Yehowa ha-ɖʋ waɖɛ nɛ ɖɩkpaɣ ɖe-wezuu caɣʋ hɔɔlʋʋ sɔsɔʋ nɛ ɖɩlabɩnɩ alɩwaatʋ tɩŋa Ɛsɔ sɛtʋ tʋmɩyɛ. Mɛwɛnɩ ɛsɩmɩyɛ siŋŋ ɖɔɖɔ se pɩnzɩ nzɩ sɩ-tɩŋa sɩ-taa, Yehowa ha-m halʋ weyi ɛwɛnɩ sɔɔlɩm nɛ ɛwɛ siɣsiɣ yɔ.

Pɩkazɩ pazɩ lɛ mɛwɛɣnɩ pɩnzɩ 70, nɛ maatasɩɣ pɩzʋʋ nɛ mɛnkɛ wɩlɩyʋ ɛgbɛyɛ sukuli nakʋyʋ taa nɛ maatasɩɣ pɩzʋʋ ɖɔɖɔ nɛ mɛnkɛ egeetiye yɔɔ cɔnɩyʋ. Ɛlɛ pɩɩcɛyɩɣ-m. Ɛbɛ yɔɔ? Mbʋ pʋyɔɔ yɔ man-taa tɛma siŋŋ se mbʋ pɩɖʋʋ Yehowa hɩɖɛ nɛ pɩkɩlɩ yɔ lɛ se ɖɩtɩlɩ ɖo-ɖoŋ kamaɣ nɛ ɖɩsamɩ-ɩ nɛ laŋɩyɛ nɖɩ ɖɩ-taa nɛ sɔɔlɩm nɛ ɛsɩmɩyɛ ɖo yɔ. (Mik. 6:8; Mark. 12:​32-34) Pɩtɩcɛyɩ se ɖɩwɛɛnɩ lone sɔsɔɖɛ pʋcɔ nɛ ɖɩɖʋ Yehowa hɩɖɛ.

Mamaɣzɩɣ tʋma wena malaba nɛ pɩɖɛɛ yɔ a-yɔɔ lɛ, menɖiɣziɣna se patɩɖʋ-m tʋma ana mbʋ pʋyɔɔ yɔ mɛwɛ weewee nɛ pɩkpaɖɩ lalaa yaa mɛwɛ niye siŋŋ hɔɔlʋʋ nakʋyʋ taa. Pɩtɩkɛ mbʋ paa ññɩɩ. Ɛlɛ lootiye Yehowa labɩ-m nɛ ɛɖʋ-m tʋma ana. Paa mɛwɛnɩ ɛjandʋ yɔ ɛɖʋ-m tʋma ana. Manawa se Yehowa sɩnɩnɩ-m nɛ manpɩzɩ nɛ mala tʋma ana. Mbʋ mɛ-ɛjandʋ yeba nɛ pana Ɛsɔ ɖoŋ.—2 Kɔr. 12:9.