1. Kajalaɣ pɩnzɩ mɩnʋʋ taa, ɖʋtʋ ndʋ paalabɩ Yehowa ɛgbɛyɛ taa se pɩtɩŋa pʋtʋʋzɩ cɔlɩɩɩ?

 ALƖWAATƲ ndʋ Yehowa ɖʋʋ ɛ-samaɣ tʋmɩyɛ naɖɩyɛ yɔ, ɛsɔɔlaa se kala ɖʋtʋ camɩyɛ nɛ pɩtɩŋa pʋtʋʋzɩ cɔlɩɩɩ. (1 Kɔr. 14:33) Kɩɖaʋ nakʋyʋ yɔ: Ɛsɔ sɔɔlɩm lɛ se posusi tɔm kɩbandʋ tɛtʋ kpeekpe yɔɔ. (Mat. 24:14) Yehowa lɩzɩ Yesu se ɛcɔnɩ tʋmɩyɛ nɖɩ ɖɩ-yɔɔ. Nɛ Yesu wɛɛ nɛ eɖiyiɣ tʋmɩyɛ nɖɩ se pɩsa nɛ paalakɩ-ɖɩ lɛ, pala ɖʋtʋ camɩyɛ nɛ pɩtɩŋa pʋtʋʋzɩ cɔlɩɩɩ. Kajalaɣ pɩnzɩ mɩnʋʋ taa, paalɩzɩ apostoloowaa nɛ ɛzʋtʋyaa nabɛyɛ Yeruzalɛm se pɛkɛ nɔɔɖɛyaa ɛgbɛyɛ taa mba. Mba kpakaɣnɩ lɩmaɣza nɛ pɩɩwɛɛ se agbaa tɩŋa ɩɖɔ lɩmaɣza ana a-yɔɔ. Alɩwaatʋ ndʋ agbaa ñɔwaɣ hɔɔlɩŋ ndɩ ndɩ taa yɔ, a-taa ɛzʋtʋyaa heyaɣ koobiya lɩmaɣza wena nɔɔɖɛyaa ɛgbɛyɛ kpaɣaa yɔ. (Tʋma 14:23; 15:2; 16:4) Koobiya ɖɔŋaɣ lɔŋ weyi patasaɣ-wɛ yɔ ɩ-yɔɔ lɛ, «agbaa wɛɛ nɛ akpaɣ ɖoŋ tisuu taa nɛ ahukuu paa ɖooye.»—Tʋma 16:5.

2. Kpaɣnɩ pɩnaɣ 1919 lɛ, ɛzɩma Yehowa ɖiyi ɛ-samaɣ nɛ ɛha-kɛ fezuu taa tɔɔnaɣ?

² Halɩ nɛ sɔnɔ, Yehowa wɛɛ nɛ ɛlakɩ ɖʋtʋ se pɩtɩŋa pʋtʋʋzɩ cɔlɩɩɩ ɛ-ɛgbɛyɛ taa. Kpaɣnɩ pɩnaɣ 1919 lɛ, Yesu wɛɛ nɛ eɖiyiɣ patam numwaa nabɛyɛ se pɔcɔnɩ tɔm susuu tʋmɩyɛ yɔɔ nɛ paha ɛ-wayɩ tɩŋɩyaa fezuu taa tɔɔnaɣ. a (Luka 12:42) Pɩnaɣ kpayɩ kpayɩ se Yehowa wɛɛ nɛ ɛwazɩɣ pa-tʋmɩyɛ yɔɔ.—Iza. 60:22; 65:​13, 14.

3-4. (a) Kɩɖaʋ ŋgʋ wɩlɩɣ se ɖihikiɣ wazasɩ mbʋ pʋyɔɔ yɔ ɖɩlakɩ ɖʋtʋ camɩyɛ? (b) Ɛbɛ ɖɩkaɣ naʋ tɔm ñʋʋ kʋnɛ kɩ-taa?

 ³ Ye ɖɩɩtaala ɖʋtʋ camɩyɛ yɔ, ɖɩtaapɩzɩ nɛ ɖɩla tʋmɩyɛ nɖɩ Yesu ɖʋ-ɖʋ yɔ. (Mat. 28:​19, 20) Kɩɖaʋ nakʋyʋ yɔ: Ye pataañɔɔzɩ kookasɩ nzɩ sɩ-taa ɖisusuu tɔm yɔ camɩyɛ yɔ, paa weyi eesusi tɔm ɖenɖe ɛsɔɔlaa yɔ. Pɩtɩla tɔm susuyaa sakɩyɛ kaasusi tɔm tam sakɩyɛ kookasɩ nasɩyɩ taa nɛ peyele lɛɛsɩ. Ŋpɩzɩɣ nɛ ŋmaɣzɩ nɛ ŋna wazasɩ lɛɛsɩ nzɩ ɖihikiɣ mbʋ pʋyɔɔ yɔ ɖɩlakɩ ɖʋtʋ camɩyɛ yɔ?

⁴ Yesu kaañɔɔzɩ ɛ-wayɩ tɩŋɩyaa camɩyɛ alɩwaatʋ ndʋ ɛɛwɛ tɛtʋ yɔɔ yɔ, nɛ mbʋ ɖɔɖɔ ewoki pɩ-yɔɔ nɛ ɛñɔɔzʋʋ Ɛsɔ samaɣ sɔnɔ. Tɔm ñʋʋ kʋnɛ kɩ-taa, ɖɩkaɣ naʋ kɩɖaʋ ŋgʋ Yesu hawa yɔ, nɛ ɛzɩma ɖɛ-ɛgbɛyɛ maɣzɩɣnɩ-ɩ yɔ. Ðɩkaɣ naʋ ɖɔɖɔ ɛzɩma ɖɩpɩzɩɣ nɛ ɖɩwɩlɩ se ɖɩtaɣ Yehowa ɛgbɛyɛ liu yɔ.

ÐƐ-ƐGBƐYƐ MAƔZƖƔNƖ YESU

5. Hɔɔlʋʋ ŋgʋ taa ɖɩmaɣzɩɣnɩ Yesu? (Yohanɛɛsɩ 8:28)

⁵ Yesu kpɛlɩkɩ ɛ-Caa cɔlɔ mbʋ pɩwɛɛ se ɛla nɛ ndʋ pɩwɛɛ se ɛyɔɔdɩ yɔ. Ɛzɩ Yesu yɔ, Ɛsɔtɔm yɔɔ Yehowa ɛgbɛyɛ tɩŋɩɣna nɛ ɖɩsɩɣnɩ-ɖʋ se ɖɩtɩlɩ mbʋ pɩwɛ ɖeu nɛ mbʋ pɩfɛyɩ ɖeu yɔ nɛ tɩ-yɔɔ ɖɔɖɔ ɖɩtɩŋɩɣna nɛ ɖiɖiyiɣ-ɖʋ ɖe-wezuu caɣʋ taa. (Kalɩ Yohanɛɛsɩ 8:28; 2 Tim. 3:​16, 17) Ðoŋ ɖoŋ lɛ, pɔtɔzʋʋ-ɖʋ se ɖɩkalɩɣ Ɛsɔtɔm nɛ ɖɩɖɔŋ tɩ-yɔɔ. Ðɩɖɔŋ lɔŋ tasʋʋ mbʋ pɩ-yɔɔ lɛ, ɛzɩma pɩwazɩɣ-ɖʋ?

6. Ɛbɛ pɩzɩɣ pɩsɩnɩ-ɖʋ nɛ ɖe-Bibl kpɛlɩkʋʋ wazɩ-ɖʋ nɛ pɩkɩlɩ?

⁶ Alɩwaatʋ ndʋ ɖɩtɩŋɩɣnɩ ɖɛ-ɛgbɛyɛ takayɩsɩ yɔɔ nɛ ɖɩkpɛlɩkɩɣ Bibl yɔ, ɖihikiɣ wazasɩ sakɩyɛ. Pɩsɩɣnɩ-ɖʋ se ɖɩkpaɣ tɔm ndʋ Bibl yɔɔdʋʋ yɔ nɛ ɖɩmaɣzɩnɩ lɔŋ weyi ɛgbɛyɛ tasɩɣ-ɖʋ yɔ. Alɩwaatʋ ndʋ ɖɩnaɣ se Bibl yɔɔ Yehowa ɛgbɛyɛ tɩŋɩɣna nɛ ɖɩtasɩɣ-ɖʋ lɔŋ yɔ, ɖɩtaɣ-ɖɩ liu nɛ pɩkɩlɩ.—Roma 12:2.

7. Tɔm ndʋ Yesu susaa, nɛ ɛzɩma Yehowa ɛgbɛyɛ maɣzɩɣnɩ-ɩ?

⁷ Yesu susi «Ɛsɔ Kewiyaɣ tɔm kɩbandʋ.» (Luka 4:​43, 44) Yesu ɖʋ ɖɔɖɔ ɛ-wayɩ tɩŋɩyaa paɣtʋ se posusi Kewiyaɣ tɔm. (Luka 9:​1, 2; 10:​8, 9) Sɔnɔ, mba payɩ pɛwɛ Yehowa ɛgbɛyɛ taa yɔ, posusuu Kewiyaɣ tɔm paa le patɩɩwɛɛ yaa paa sʋʋtʋ ndʋ patɩɩwɛna yɔ.

8. Waɖɛ sɔsɔɖɛ nɖɩ ɖɩwɛna?

⁸ Pɩkɛnɩ-ɖʋ waɖɛ sɔsɔɖɛ se ɖisusi lalaa Ɛsɔ Kewiyaɣ toovenim tɔm. Pɩtɩkɛ ɛyaa tɩŋa wɛnɩnɩ waɖɛ nɖɩ. Kɩɖaʋ nakʋyʋ yɔ: Alɩwaatʋ ndʋ Yesu kaawɛ tɛtʋ yɔɔ yɔ, ɛtaaha feziŋ kɩdɛkɛdɩŋ nʋmɔʋ se ɩlɩzɩ aseɣɖe ɛ-yɔɔ. (Luka 4:41) Sɔnɔ, pʋcɔ nɛ nɔɔyʋ kpɛndɩ Yehowa samaɣ yɔɔ nɛ esusi tɔm lɛ, pɩwɛɛ se ɛcaɣ wezuu ŋgʋ kɩkɛdɩɣnɩ Yehowa yɔ. Ye ɖɩlɩzɩɣ aseɣɖe paa le nɛ alɩwaatʋ ndʋ payɩ ɖɩpɩzɩɣ yɔ, ɖɩwɩlɩɣ se ɖa-taa wɛ leleŋ nɛ waɖɛ nɖɩ. Ɛzɩ Yesu yɔ, ɖa-kaɖʋwa lɛ se ɖiɖuu Kewiyaɣ ɖomaɣ ɛyaa laŋa taa nɛ ɖɩmɩzɩ-kɛ lɩm.—Mat. 13:​3, 23; 1 Kɔr. 3:6.

9. Ɛbɛ Yehowa ɛgbɛyɛ laba se pɩsa nɛ ɛyaa tɩlɩ Ɛsɔ hɩɖɛ?

⁹ Yesu yeba nɛ ɛyaa tɩlɩ Ɛsɔ hɩɖɛ. Yesu tɩmaɣnɩ ɛ-Caa lɛ, ɛyɔɔdaa se: «Meyeba nɛ patɩlɩ ña-hɩɖɛ.» (Yoh. 17:26) Ɛzɩ Yesu yɔ, Yehowa ɛgbɛyɛ lakɩ mbʋ payɩ ɖɩpɩzɩɣ yɔ se ɖɩsɩnɩ ɛyaa nɛ patɩlɩ Ɛsɔ hɩɖɛ. Ðɩtɩŋnɩ Bibl—Ɛjaɖɛ kɩfaɖɛ tɔm ɖɛzʋʋ yɔɔ nɛ ɖɩla mbʋ. Bibl ŋgʋ kɩ-taa, papɩsɩnɩ Ɛsɔ hɩɖɛ lona wena a-taa ɖɩɩwɛ kiɖe tɛɛ kʋnʋmɩŋ weyi ɩ-taa paama-kʋ yɔ a-taa. Lɛɛlɛɛyɔ, pɛɖɛzɩ Bibl ŋgʋ kɩ-tɩŋa yaa kɩ-hɔɔlʋʋ kʋnʋmɩŋ weyi ɩ-taa yɔ, ɩcɛzɩ 270. Ye ŋkalɩ Bibl ŋgʋ kɩ-taa Tɔm kɩsɔzɩtʋ A4 nɛ A5 yɔ, ŋkaɣ naʋ mbʋ pʋyɔɔ papɩsɩnɩ Ɛsɔ hɩɖɛ ɖi-lona  taa yɔ, nɛ ɛzɩma palabɩ mbʋ yɔ. Bible d’étude taa Appendice C yɔɔdʋʋ mbʋ pʋyɔɔ pɩwɛɛ se Ɛsɔ hɩɖɛ ɛwɛɛ Krɩstʋ Mba Grɛɛkɩ Masɩ taa tam 237 yɔ pɩ-tɔm.

10. Tɔm ndʋ Miyamaarɩ halʋ nɔɔyʋ yɔɔdaa yɔ, ɛbɛ tɩkpɛlɩkɩɣ-ŋ?

¹⁰ Ðɩsɔɔlaa se ɖɩsɩnɩ ɛyaa sakɩyɛ nɛ patɩlɩ Ɛsɔ hɩɖɛ ɛzɩ Yesu kaalabʋ yɔ. Halʋ nɔɔyʋ wɛ Miyamaarɩ ɛjaɖɛ taa, ɛwɛnɩ pɩnzɩ 67. Ɛkpɛlɩkaa nɛ ɛtɩlɩ se payaɣ Ɛsɔ se Yehowa lɛ, ɛpaɣzɩ wiu nɛ eheyi weyi ɛkpɛlɩkaɣnɩ-ɩ Bibl yɔ se: «Ðooo palʋlʋʋ-m yɔ, sɔnɔ manɩɣ se payaɣ Ɛsɔ se Yehowa. . . . Ŋwɩlɩ-m tɔm kɩcɛyɩtʋ ndʋ mantɩnɩɩ-tʋ ɖoli kaaʋ yɔ.» Ɛzɩ kɩɖaʋ kʋnɛ kɩwɩlʋʋ yɔ, alɩwaatʋ ndʋ laŋa kɩbana tɩnaa tɩlɩɣ Ɛsɔ hɩɖɛ yɔ, pɩpɩzɩɣ nɛ pɩlɛɣzɩ pe-wezuu caɣʋ.

WOLO PƖ-YƆƆ NƐ ŊTAƔ ÐƐ-ƐGBƐYƐ LIU

11. Ɛzɩma ɛzʋtʋyaa pɩzɩɣ nɛ pawɩlɩ se pataɣ Yehowa ɛgbɛyɛ liu? (Cɔnɩ ɖɔɖɔ kɩlɛmʋʋ.)

¹¹ Ɛzɩma ɛzʋtʋyaa pɩzɩɣ nɛ pawɩlɩ se pataɣ Yehowa ɛgbɛyɛ liu? Ɛgbɛyɛ tasɩɣ-wɛ lɔŋ lɛ, pɩwɛɛ se pakalɩ lɔŋ tasʋʋ mbʋ camɩyɛ nɛ pala mbʋ payɩ papɩzɩɣ yɔ nɛ pɔɖɔ pɩ-yɔɔ. Ðoŋ ɖoŋ lɛ, patasɩɣ-wɛ lɔŋ pɩlɩɩnɩ ɛzɩma pala kediɣzisi yaa ɛzɩma patɩmɩ ɛgbɛyɛ ɛsɩndaa yɔ pɩ-yɔɔ; patasɩɣ-wɛ ɖɔɖɔ lɔŋ pɩlɩɩnɩ ɛzɩma pɔcɔnɩ Krɩstʋ heɣsi yɔɔ yɔ pɩ-yɔɔ. Ye ɛzʋtʋyaa ɩɖɔŋ ɛgbɛyɛ lɔŋ tasʋʋ mbʋ pɩtɩŋa pɩ-yɔɔ yɔ, koobiya kaɣ ɖiɣzinuu se Yehowa sɔɔlɩ-wɛ nɛ ɛcɔŋnɩ pɔ-yɔɔ.

12. (a) Ɛbɛ yɔɔ pɩwɛɛ se ɖɩɖʋ nesi mba pɛɖɛɣ-ɖʋ nɔɔ yɔ? (Ebree mba 13:​7, 17) (b) Ɛbɛ yɔɔ pɩwɛɛ se ɖɩka ɖa-lɩmaɣza mba pɛɖɛɣ-ɖʋ nɔɔ yɔ pɛ-wɛtʋ kɩbandʋ yɔɔ?

¹² Ɛzʋtʋyaa tasɩɣ-ɖʋ lɔŋ lɛ, pɩwɛɛ se ɖitisi faaa nɛ ɖɩɖɔ ɩ-yɔɔ. Ye ɖɩlakɩ mbʋ yɔ, pɩkaɣ wɛʋ mba pɛɖɛɣ-ɖʋ nɔɔ yɔ kɛlɛʋ se pala pa-tʋmɩyɛ. Bibl seɣtiɣ-ɖʋ se ɖɩña mba pɛɖɛɣ-ɖʋ nɔɔ yɔ nɛ ɖiluzi ɖa-tɩ pɛ-tɛɛ. (Kalɩ Ebree mba 13:​7, 17.) Nabʋyʋ taa pɩpɩzɩɣ nɛ pɩwɛɛ kaɖɛ se ɖɩla mbʋ. Ɛbɛ yɔɔ? Mbʋ pʋyɔɔ yɔ abalaa mba patɩtalɩ pilim. Ɛlɛ, ye ɖɩkaŋ ɖa-lɩmaɣza pɛ-wɛtʋ kɩdɛkɛdɩtʋ yɔɔ nɛ ɖɩɩkaŋ-yɛ pɛ-wɛtʋ kɩbandʋ yɔɔ yɔ, ɖɩkaɣ ɖʋʋ nesi ɖo-koyindinaa. Ɛzɩma tɩyɛ? Ðo-koyindinaa sɔɔlaa se peyele nɛ ɖɩpɩtɩ nɛ ɖɩpɔzɩ ɖa-tɩ se ɛzɩ Ɛsɔ wɛna nɛ ɛtɩŋɩɣnɩ ɛgbɛyɛ yɔɔ nɛ eɖiyiɣ-ɖʋ. Ye mbʋ, ye ɖɩwɛnɩ lɩmaɣza kɩdɛkɛda ɛzʋtʋyaa yɔɔ yɔ, pɩpɩzɩɣ piyele nɛ ɖɩpaɣzɩ wɛnʋʋ ɖɔɖɔ lɩmaɣza kɩdɛkɛda ɛgbɛyɛ yɔɔ, piyeki nɛ ɖɩɩtasɩɣ-ɖɩ liu taʋ. Ɛbɛ ɖɩpɩzɩɣ ɖɩla nɛ ɖɩtɩlɩ cɛtɩm tɔm ndʋ ɖo-koyindinaa yɛlɩɣna yɔ nɛ ɖikizi-tʋ?

TAAHA LALAA NƲMƆƲ SE PALA NƐ ŊYELE ƐGBƐYƐ LIU TAƲ

13. Ɛbɛ Ɛsɔ koyindinaa lakɩ se pɩsa nɛ ɖɩmaɣzɩ se mbʋ Yehowa ɛgbɛyɛ lakɩ yɔ pɩfɛyɩ ɖeu?

¹³ Ɛsɔ koyindinaa ñakɩ pana se peyele nɛ ɖɩkpaɣ mbʋ ɛ-ɛgbɛyɛ lakɩ nɛ pɩwɛ ɖeu yɔ ɛzɩ mbʋ pɩfɛyɩ ɖeu yɔ. Kɩɖaʋ nakʋyʋ yɔ: Ðɩkpɛlɩkɩ Bibl taa se Yehowa sɔɔlaa se ɛ-sɛyaa ɩwɛɛ kele kele tomnaɣ yɔɔ, wezuu kɩbaŋʋ caɣʋ nʋmɔʋ taa nɛ fezuu taa. Ɛyɔɔdaa se pɩwɛɛ se palɩzɩ weyi ɛlakɩ lakasɩ nzɩ sɩfɛyɩ kele kele nɛ eekpiɖiɣ yɔ ɛgbɛyɛ taa. (1 Kɔr. 5:​11-13; 6:​9, 10) Ðɩñaŋ Bibl taa paɣtʋ ndʋ. Ɛlɛ ɖo-koyindinaa kʋyʋʋ ɖɔ-yɔɔ nɛ pɔyɔɔdʋʋ se ɖɩtɩsɔɔlɩ ɛyaa, ɖɩkʋʋ ɛyaa tɔm nɛ ɖɩɩmʋʋ ɛyaa mba paacakɩ wezuu ɛzɩ ɖa yɔ.

14. Awɛɛ nɛ eseɣtiɣ ɛyaa se pɔyɔɔdɩ cɛtɩm tɔm Yehowa ɛgbɛyɛ yɔɔ?

¹⁴ Tɩlɩ weyi ɖeyi ɖeyi ɛkʋyʋʋ ɛgbɛyɛ yɔɔ yɔ. Sataŋ Eleeu wɛna nɛ eseɣtiɣ ɛyaa se pɔyɔɔdɩ cɛtɩm tɔm Yehowa ɛgbɛyɛ yɔɔ. Ɛnʋ kɛnɩ «cɛtɩm caa.» (Yoh. 8:44; Kiɖe 3:​1-5) Ye mbʋ, pɩɩlakɩ-ɖʋ piti se Sataŋ  tɩŋɩɣnɩ ɖo-koyindinaa yɔɔ nɛ ɛyɛlɩɣnɩ cɛtɩm tɔm Yehowa ɛgbɛyɛ yɔɔ. Ɛɛtɛm labʋ mbʋ kajalaɣ pɩnzɩ mɩnʋʋ taa.

15. Ɛbɛ Ɛsɔ sɛtʋ ñʋndɩnaa kaalabɩ Yesu nɛ ɛ-wayɩ tɩŋɩyaa?

¹⁵ Kajalaɣ pɩnzɩ mɩnʋʋ taa, mba paɖʋ Sataŋ nesi yɔ pɔyɔɔdɩ cɛtɩm tɔm ndɩ ndɩ maamaaci lakasɩ nzɩ Ɛsɔ Pɩyalʋ lakaɣ yɔ sɩ-yɔɔ, ŋgʋ maamaaci lakasɩ nzɩ sɩ-wayɩ fɛyɩ. Kɩɖaʋ nakʋyʋ yɔ: Ɛsɔ sɛtʋ ñʋndɩnaa kaaheyi samaɣ se «aleewaa ñʋʋdʋ» haɣaɣnɩ Yesu ɖoŋ nɛ ɛɖɔɔnʋʋ aleewaa. (Mark. 3:22) Pahʋwaɣnɩ Yesu tɔm lɛ, Ɛsɔ sɛtʋ ñʋndɩnaa kʋ ɛ-tɔm se ɛyɔɔdɩ tɔm kɩdɛkɛdɩtʋ Ɛsɔ yɔɔ, nɛ peseɣti samaɣ se kɔpɔzɩ nɛ pakʋ Yesu. (Mat. 27:20) Pʋwayɩ Krɩstʋ wayɩ tɩŋɩyaa susaɣ tɔm kɩbandʋ lɛ, po-koyindinaa ‘peɣzi ɛyaa nɛ peseɣti-wɛ’ se pakaɖɩnɩ-wɛ. (Tʋma 14:​2, 19) La Tour de Garde 1^er décembre 1998 taa, patazɩ Tʋma Labʋ 14:2 taa nɛ pɔyɔɔdɩ se: «Pɩtasɩna se Yuuda ñɩma mba pakaɖaɣnɩ Krɩstʋ ñɩma yɔ pekizi tɔm ndʋ posusaɣ-wɛ yɔ lɛ, pɔyɔɔdɩ ɖɔɖɔ tɔm kɩdɛkɛdɩtʋ sakɩyɛ pɔ-yɔɔ se pɩsa nɛ ɛyaa itaawelisini-wɛ nɛ papaɖɩ-wɛ.»

16. Ye ɖɩnɩ cɛtɩm tɔm natʋyʋ yɔ, tɔm ndʋ yɔɔ pɩwɛɛ se ɖɩtɔzɩ?

¹⁶ Sataŋ cɛtɩm tɩsɩɩ tɩnaɣ kajalaɣ pɩnzɩ mɩnʋʋ taa. Sɔnɔ ɖɔɖɔ «eɖiɣni peɣzuu tɛtʋ tɩŋa.» (Natʋ 12:9) Ye ŋnɩ tɔm kɩdɛkɛdɩtʋ natʋyʋ ɛgbɛyɛ yɔɔ yaa koobiya mba pɛɖɛɣ nɔɔ yɔ pɔ-yɔɔ yɔ, tɔzɩ mbʋ Ɛsɔ koyindinaa kaalabɩ Yesu nɛ kajalaɣ pɩnzɩ mɩnʋʋ taa tɔmkpɛlɩkɩyaa yɔ pɩ-yɔɔ. Sɔnɔ, pɛwɛɛ nɛ panazɩɣ Ɛsɔ sɛyaa nɛ pɔyɔɔdʋʋ cɛtɩm tɔm pɔ-yɔɔ ɛzɩ Bibl kaayɔɔdʋʋ ɖeyi ɖeyi yɔ. (Mat. 5:​11, 12) Ye ɖɩsɩm weyi ɛ-cɔlɔ cɛtɩm tɔm lɩnaa yɔ nɛ ɖɩlakɩ nabʋyʋ kpɛdɛyɛ  se ɖɩkandɩyɩ ɖa-tɩ yɔɔ yɔ, tɩɩkaɣ-ɖʋ peɣzuu. Ɛbɛ pɩwɛɛ se ɖɩla nɛ ɖɩkandɩyɩnɩ ɖa-tɩ yɔɔ?

17. Ɛbɛ ɖɩpɩzɩɣ ɖɩla nɛ cɛtɩm tɔm ɛtaakɔnɩ-ɖʋ kaɖɛ? (2 Timootee 1:13) (Kalɩ ɖɔɖɔ aɖakaɣ « Alɩwaatʋ ndʋ ɖɩnɩɣ cɛtɩm tɔm yɔ, ɛbɛ pɩwɛɛ se ɖɩla?»)

¹⁷ Kizi cɛtɩm tɔm. Apostoloo Pɔɔlɩ heyi-ɖʋ mbʋ ɖeyi ɖeyi pɩwɛɛ se ɖɩla ye ɖɩnɩ cɛtɩm tɔm natʋyʋ yɔ. Eheyi Timootee se ‘ɛɖʋ nabɛyɛ paɣtʋ se pataakemni mʋya’ nɛ ‘pekizi mʋya wena apisiɣ wondu kiɖeɖetu yɔ.’ (1 Tim. 1:​3, 4; 4:7) Maɣzɩ tɔm tʋnɛ tɩ-yɔɔ nɛ ŋna: Pɩɣa ɛjam pɩzɩɣ nɛ kakpaɣ azuluma pʋyʋ tataa nɛ kaɖʋ kɔ-nɔɔ taa, ɛlɛ ɛyʋ sɔsɔ ɛɛpɩzɩɣ nɛ ɛla mbʋ kpa, mbʋ pʋyɔɔ yɔ ɛnawa se pɩpɩzɩɣ nɛ pɩkɔnɩ-ɩ kaɖɛ. Ðikiziɣ cɛtɩm tɔm, mbʋ pʋyɔɔ yɔ ɖɩsɩm weyi ɛ-cɔlɔ tɩlɩnaa yɔ. Ɛlɛ ɖɩñɔʋnɩ toovenim «tɔm kɩbandʋ» kpam.—Kalɩ 2 Timootee 1:13.

18. Ɛzɩma ɖɩpɩzɩɣ nɛ ɖɩwɩlɩ se ɖɩtaɣ Yehowa ɛgbɛyɛ liu?

¹⁸ Hɔɔlɩŋ sakɩyɛ weyi ɩ-taa Yehowa ɛgbɛyɛ maɣzɩɣnɩ Yesu yɔ, ɩ-taa 3 ɖeke tɔm ɖɩyɔɔdaa. Ŋŋkpɛlɩkɩɣ Bibl lɛ, ñaɣ pana nɛ ŋna hɔɔlɩŋ lɛɛŋ weyi ɩ-taa Yehowa ɛgbɛyɛ maɣzɩɣnɩ Yesu yɔ. Sɩnɩ ñɛ-ɛgbɛyɛ taa koobiya lalaa nɛ pataa Yehowa ɛgbɛyɛ liu nɛ pɩkɩlɩ. Pɩtasɩ lɛ, ɖɔkɩ ñe-siɣsiɣ wɛtʋ Yehowa ɛsɩndaa nɛ ŋñɔɔnɩ ɛ-ɛgbɛyɛ nɖɩ ɖɩ-yɔɔ ɛtɩŋɩɣna se eyele nɛ ɛ-sɔɔlɩm la yɔ; ye ŋlakɩ mbʋ yɔ ŋwɩlɩɣ se ŋwɛɛ nɛ ŋtaɣ Yehowa ɛgbɛyɛ liu. (Keɣ. 37:28) Tɛtɛ nɛ ɖiwolo pɩ-yɔɔ nɛ ɖɩwɛɛnɩ ɛsɩmɩyɛ waɖɛ sɔsɔɖɛ nɖɩ ɖɩwɛna se ɖɩwɛɛ Yehowa sɛyaa siɣsiɣ tɩnaa mba pɔsɔɔlɩ ɖama yɔ pɛ-hɛkʋ taa yɔ.