1. (a) Ɛbɛ fezuu taa paradisuu kɛnaa? (b) Ɛbɛ pɩwɛɛ se ɖɩtɛ ɖa-taa se ɖɩlakɩ?

 PARADISUU nakʋyʋ wɛ tɛtʋ yɔɔ sɔnɔ nɛ ɛyaa mba palakɩ lakasɩ kɩbanzɩ yɔ, mba suni kɩ-taa. Ɛyaa miiliyɔɔwaa sakɩyɛ wɛnɩ kɩ-taa, nɛ laŋhɛzɩyɛ siŋŋ wɛ pɛ-hɛkʋ taa. Mba pɛtɛm wɛʋ paradisuu ŋgʋ kɩ-taa yɔ, pɛtɛm pa-taa se paakaɣ lɩʋ kɩ-taa kaaʋ. Pɔsɔɔlaa ɖɔɖɔ se ɛyaa sakɩyɛ ɩsɔzɩ pɔ-yɔɔ ŋgee lone nɖɩ ɖɩ-taa. Ɛbɛ ŋgee lone nɖɩ ɖɩkɛnaa? Ðɩkɛnɩ fezuu taa paradisuu. a

2. Ɛbɛ wɛ piti fezuu taa paradisuu hɔɔlʋʋ taa?

² Yehowa samaɣ wɛ Sataŋ ɛjaɖɛ kɩdɛkɛdɩyɛ nɖɩ ɖɩ-taa yɔ, ɛyaa paɖɩɣ ɖama ɖɩ-taa; ɛlɛ ɛtɩŋnɩ piti nʋmɔʋ nakʋyʋ yɔɔ nɛ eyele nɛ laŋhɛzɩyɛ nɛ nɔɔ kʋɖʋmaɣ pɛwɛɛ ɛ-sɛyaa hɛkʋ taa. (1 Yoh. 5:19; Natʋ 12:12) Ðɛ-Ɛsɔ sɔɔlɩm tʋ naɣ ɖoŋ kɩdɛkɛdɩŋ weyi ɛjaɖɛ ɖɩnɛ ɖɩwɛnɩ ɛyaa yɔɔ yɔ; ɛlɛ eyeki se ɖa lɛ, ɖɩwɛɛ pɛɛyɛ taa se pɩsa nɛ ɖɩsɛɛ-ɩ nɛ taa leleŋ. Bibl ya fezuu taa paradisuu se ‘ɖenɖe ɛyʋ cɔzʋʋ’ nɛ kaɖɛ naɖɩyɛ ɛɛtalɩɣ-ɩ yɔ nɛ «kaɖaɣ ŋga pamɩzɩ-kɛ lɩm camɩyɛ yɔ.» (Iza. 4:6; 58:11) Yehowa ɖoŋ taa lɛ, mba pɛwɛ fezuu taa paradisuu ŋgʋ kɩ-taa yɔ, pɛwɛ koboyaɣ nɛ pɛɛyɛ taa kaɖɛ kɛdɛzaɣ kɩyakɩŋ ɩnɛ ɩ-taa.—Iza. 54:14; 2 Tim. 3:1.

3. Ɛzɩma Izaayii ñʋʋ 65 taa natʋ tɔm kaalabɩ caanaʋ taa?

³ Yehowa tɩŋnɩ nayʋ Izaayii yɔɔ nɛ ɛyɔɔdɩ wɛtʋ ndʋ tɩ-taa mba pakaɣ wɛʋ fezuu taa paradisuu taa yɔ pɛwɛɣ yɔ tɩ-tɔm. Ŋpɩzɩɣ nɛ ŋna tɔm ndʋ Izaayii ñʋʋ 65 taa; natʋ tɔm ndʋ, tɩlabɩ  kajalaɣ ɖeɖe pɩnaɣ 537 taa P.P.Y. Alɩwaatʋ ndʋ tɩ-taa lɛ, Yuuda ñɩma mba paakpiɖi pa-kɩwɛɛkɩm yɔɔ yɔ, palɩnɩ yomiye taa Babilɔɔnɩ nɛ papɩsɩ pɛ-ɛjaɖɛ taa. Yehowa wazɩ ɛ-samaɣ nɛ ɛsɩnɩ-kɛ nɛ kala nɛ Yeruzalɛm tɛtʋ ndʋ paayɔkɩ-tʋ yɔ tɩɖaɣnɩ wɛʋ kajʋka, nɛ kaɖaɣnɩ maʋ templo se kɩkɛ lone nɖɩ ɖɩ-taa pɛsɛɣ Yehowa Izrayɛɛlɩ ɛjaɖɛ taa yɔ.—Iza. 51:11; Zak. 8:3.

4. Ɛzɩma Izaayii ñʋʋ 65 taa natʋ tɔm labɩ ɖa-alɩwaatʋ taa?

⁴ Izaayii natʋ tɔm paɣzɩ labʋ nabʋlɛ ɖeɖe pɩnaɣ 1919 taa. Pɩnaɣ ŋga ka-taa ɖa-alɩwaatʋ taa Yehowa sɛyaa lɩnɩ Babilɔɔnɩ Sɔsɔʋ yomiye taa. Pʋwayɩ lɛ, fezuu taa paradisuu paɣzɩ yɛlʋʋ pazɩ pazɩ tɛtʋ kpeekpe yɔɔ. Agbaa sakɩyɛ ñɔwa, nɛ Kewiyaɣ tɔm susuyaa kpekpeka tɩnaa mba pɛwɛ agbaa ana a-taa yɔ, pɛwɛnɩ Krɩstʋ mba wɛtʋ kɩbandʋ. Halaa nɛ abalaa mba ɖooo lɛ palakaɣ puuyaɣ lakasɩ nɛ pacakɩ wezuu kɩdɛkɛdʋʋ yɔ, lɛɛlɛɛyɔ lɛ, posu «ɛyʋtʋ kɩfatʋ ndʋ palɩzɩ-tʋ . . . ɛzɩ Ɛsɔ sɔɔlʋʋ yɔ.» (Efɛz. 4:24) Pɩkɛ toovenim se wazasɩ nzɩ sɩ-tɔm Izaayii yɔɔdaa yɔ, ɖɩkaɣ hiɣu sɩ-taa sakɩyɛ ɛjaɖɛ kɩfaɖɛ taa cee wayɩ. Paa mbʋ yɔ, ɖiɖiɣni hiɣu wazasɩ sakɩyɛ lɛɛlɛɛyɔ. Iyele nɛ ɖɩna ɖoŋ weyi fezuu taa paradisuu wɛnɩ ɖɔ-yɔɔ yɔ, nɛ mbʋ pʋyɔɔ pɩfɛyɩ kpa se ɖɩlɩɩ kɩ-taa yɔ.

WƐTƲ NDƲ TAA MBA PƐWƐ FEZUU TAA PARADISUU TAA YƆ PƐWƐƐ?

5. Ɛzɩ pɔyɔɔdʋʋ Izaayii 65:13 taa yɔ, wazasɩ nzɩ ɖɩwɛɛ nɛ ɖihikiɣ fezuu taa paradisuu taa?

⁵ Pɛwɛ alaafɩya fezuu taa nɛ pa-laŋa hɛwa. Izaayii natʋ tɔm wɩlɩɣ se wɛtʋ ndʋ tɩ-taa mba pɛwɛ fezuu taa paradisuu taa yɔ pɛwɛɛ yɔ, tɩwɛ ndɩ kpem nɛ wɛtʋ ndʋ tɩ-taa mba pɛfɛyɩ kɩ-taa yɔ pɛwɛɛ yɔ. (Kalɩ Izaayii 65:13.) Yehowa cɔŋnɩ ɛ-sɛyaa fezuu taa kɩcɛyɩm ɖeɖe siŋŋ. Ɛhaɣ-ɖʋ e-fezuu kiɖeɖeu, ɛ-Tɔm nɛ fezuu taa tɔɔnasɩ sakɩyɛ se ‘ɖɩtɔɔ, ɖɩñɔɔ nɛ ɖɩmɛyɩ.’ (Kpaɣ-tʋ nɛ ŋmaɣzɩnɩ Natʋ 22:17.) Ɛlɛ mba pɛfɛyɩ fezuu taa paradisuu taa yɔ, pɛwɛɛ nɛ ‘pasɩkɩ ñɔɔsɩ, lɔkɔtʋ kʋʋ-wɛ nɛ fɛyɛ kpaɣ-wɛ.’ Nɔɔyʋ ɛɛcɔŋnɩ pe-fezuu taa kɩcɛyɩm ɖeɖe.—Amo. 8:11.

6. (a) Ɛzɩma Yowɛɛlɩ 2:​21-24 yɔɔdɩ ɖe-fezuu taa tɔɔnaɣ tɔm? (b) Ɛbɛ ɖɩpɩzɩɣ ɖɩla nɛ kawazɩ-ɖʋ?

⁶ Natʋ tɔm ndʋ Yowɛɛlɩ mawa yɔ tɩ-taa, ɛlabɩnɩ tʋmɩyɛ mbʋ pɩ-tɔm cɛyɩ ɛyaa wezuu caɣʋ taa ɛzɩ tɔɔnaɣ pee, vɛɛ nɛ oliivi num mbʋ yɔ se ɛwɩlɩ se Yehowa haɣ ɛ-sɛyaa mbʋ payɩ pɩpɔzʋʋ-wɛ yɔ pɩkpɛndɩnɩ fezuu taa tɔɔnaɣ. (Yow. 2:​21-24) Yehowa tɩŋɩɣnɩ Bibl, ɛgbɛyɛ takayɩsɩ, ɖɛ-intɛrnɛɛtɩ lone, ɖe-kediɣzisi, egeetiye kigbeɣliŋ nɛ kigbeɣliŋ sɔsɔŋ yɔɔ nɛ ɛhaɣ-ɖʋ mbʋ payɩ pɩpɔzʋʋ-ɖʋ yɔ. Ðɩpɩzɩɣ nɛ ɖɩtɔɔ fezuu taa tɔɔnaɣ ŋga paa evemiye nɖɩ; ye ɖɩlakɩ mbʋ yɔ, ɖɩwɛɣ alaafɩya fezuu taa nɛ pɩkɩlɩ nɛ pɩhɛzɩɣ ɖɔɖɔ ɖa-laŋa siŋŋ.

7. Ɛbɛ yeki nɛ ‘ɖa-laŋa wɛɣ laŋhʋlʋmɩyɛ taa’? (Izaayii 65:14)

⁷ Pɛwɛ taa leleŋ taa nɛ pe-liu sɩba. Ɛsɔ sɛyaa pɩzɩɣ nɛ «[pama] kubusi nɛ taa leleŋ» mbʋ pʋyɔɔ yɔ pɛwɛnɩ ɛsɩmɩyɛ mbʋ Yehowa labɩ-wɛ yɔ pɩ-yɔɔ. (Kalɩ Izaayii 65:14.) Toovenim tɔm ndʋ tɩkpazɩɣ-ɖʋ ɖoŋ yɔ, Bibl taa tamasɩ nzɩ sɩhɛzɩɣ ɖa-laŋa yɔ nɛ lidaʋ ŋgʋ Yesu kɩhɛyʋʋ pʋ-ñʋʋ taa kɩlaʋ yeba nɛ ɖɩwɛɛnɩ cee wayɩ yɔɔ yɔ, piyeki nɛ ‘ɖa-laŋa wɛɣ laŋhʋlʋmɩyɛ taa.’ Ye ɖa nɛ ɖo-koobiya ɖɩlakɩ kɛdaɣ wazasɩ nzɩ sɩ-yɔɔ yɔ, pɩhaɣ-ɖʋ taa leleŋ siŋŋ.—Keɣ. 34:8; 133:​1-3.

8. Wɛtʋ kɩbandʋ 2 ndʋ tɔm cɛyɩ fezuu taa paradisuu taa?

⁸ Wɛtʋ kɩbandʋ 2 ndʋ tɩ-tɔm cɛyɩ fezuu taa paradisuu taa yɔ, ndʋ lɛ sɔɔlɩm nɛ nɔɔ kʋɖʋmaɣ ŋga kɛwɛ Yehowa sɛyaa hɛkʋ taa yɔ.  «Nɔɔ kʋɖʋmaɣ tomiye» nɖɩ, ɖɩsɩɣnɩ-ɖʋ se ɖɩmaɣzɩ nɛ ɖɩna ɛzɩma wezuu caɣʋ kaɣ wɛʋ ɛjaɖɛ kɩfaɖɛ taa yɔ; nɛ peeɖe lɛ, Yehowa sɛyaa kaɣ wɛnʋʋ sɔɔlɩm nɛ pɛwɛɛ nɔɔ kʋɖʋmaɣ taa nɛ pɩkɩlɩ sɔnɔ. (Kol. 3:14) Koobu halɩñɩnʋ nɔɔyʋ yɔɔdɩ mbʋ ɛna Yehowa sɛyaa yɔɔ alɩwaatʋ ndʋ ɛcalɩ-wɛ katʋʋ yɔ pɩ-tɔm. Ɛyɔɔdaa se: «Mantaatɩlɩ ɛzɩma ɛyʋ wɛɣ taa leleŋ taa yɔ, halɩ mantɩna wɛtʋ ndʋ mɔ-hɔʋ taa maɣmaɣ. Yehowa Aseɣɖe Tɩnaa hɛkʋ taa mancalɩ naʋ ɛzɩma ɛyaa wɩlɩɣ ɖama sɔɔlɩm siŋŋ yɔ.» Ye nɔɔyʋ ɛsɔɔlaa se ɛwɛɛ taa leleŋ taa siŋŋ nɛ e-liu sɩ yɔ, pɩwɛɛ se ɛsʋʋ ɖe-fezuu taa paradisuu taa. Yehowa sɛyaa wɛnɩ hɩɖɛ kɩbanɖɛ Yehowa nɛ ɛ-hɔʋ taa mba kpeekpe pɛ-ɛsɩndaa paa ɛjaɖɛ yɔɔ mba ɩtɩɩmaɣzɩɣ suwe pɔ-yɔɔ yɔ.—Iza 65:15.

9. Izaayii 65:​16, 17 yɔɔdʋʋ se ɛbɛ pɩkaɣ tɛmnʋʋ ɖa-kʋñɔmɩŋ?

⁹ Sɔɔndʋ ɛɛkpaɣ-wɛ nɛ pacakɩ ɖiɣ ɖiɣ. Izaayii 65:14 yɔɔdaa se mba pekiziɣ se paasʋʋ fezuu taa paradisuu taa yɔ, pakaɣ ‘mabʋ kubusi mbʋ pʋyɔɔ yɔ pa-laŋa wɛ siziŋ taa nɛ pakaɣ wiu pe-fezuu wɩzasɩ yɔɔ.’ Ɛlɛ ɛbɛ pɩkaɣ tɛmnʋʋ mbʋ payɩ piyeba nɛ Ɛsɔ samaɣ nɩɩ siziŋ nɛ mbʋ payɩ pɩkɔnɩ-kɛ laŋwɛɛkɩyɛ yɔ? ‘Pakaɣ sɔʋ pɩ-yɔɔ nɛ pɩkaɣ mʋʋʋ Ɛsɔ ɛsɩndaa.’ (Kalɩ Izaayii 65:​16, 17.) Yehowa kaɣ yebu nɛ ɖa-kʋñɔmɩŋ sɩɩ tɩnaɣ nɛ alɩwaatʋ kaaɖɛɣ lɛ, ɖɩɩkaɣ tɔzʋʋ mbʋ kʋñɔmɩŋ ɛnɩ ɩkɔnɩ-ɖʋ yɔ pɩ-yɔɔ paa ññɩɩ.

10. Ɛbɛ yɔɔ ña-taa wɛ leleŋ siŋŋ se ŋwɛ Yehowa ɛgbɛyɛ taa? (Cɔnɩ ɖɔɖɔ kɩlɛmʋʋ.)

¹⁰ Halɩ lɛɛlɛɛyɔ, alɩwaatʋ ndʋ ɖiwoki ɛgbɛyɛ taa kediɣzisi yɔ, ɖa-laŋa hɛɣ mbʋ pʋyɔɔ yɔ sɔɔndʋ ɛɛkpaɣ-ɖʋ sɩ-taa nɛ ɖɩɩkaŋ ɖa-lɩmaɣza mbʋ pɩhaɣ-ɖʋ nɩɣzɛ ɛjaɖɛ kɩdɛkɛdɩyɛ ɖɩnɛ ɖɩ-taa yɔ pɩ-yɔɔ. Ðɩsɩɣnɩ ɖo-koobiya se pa-laŋa ɩhɛɛ alɩwaatʋ ndʋ ɖɩwɛɣnɩ wɛtʋ kɩbandʋ ɛzɩ sɔɔlɩm, taa leleŋ, laŋhɛzɩyɛ, camɩyɛ lakasɩ nɛ hɛɛɛ wɛtʋ mbʋ yɔ. Nɛ wɛtʋ ndʋ tɩkɛ piye nɖɩ fezuu lʋlʋʋ yɔ ɖɩ-hɔɔlʋʋ nakʋyʋ. (Gal. 5:​22, 23) Ða-taa wɛ leleŋ siŋŋ se ɖɩwɛ Yehowa ɛgbɛyɛ taa. Mba pɛwɛɣ fezuu taa paradisuu taa tam yɔ, pakaɣ naʋ alɩwaatʋ ndʋ Ɛsɔ kaɣ yebu nɛ tamaɣ ŋga ɛlaba se ɛlɩzɩɣ «ɛsɔdaa kɩfalʋʋ nɛ tɛtʋ kɩfatʋ» yɔ kɛtɛzɩ labʋ yɔ.

11. Ɛzɩ Izaayii 65:​18, 19 yɔɔdʋʋ yɔ, ɖoŋ weyi fezuu taa paradisuu ŋgʋ Yehowa lɩzaa yɔ kɩwɛnɩ ɖɔ-yɔɔ?

¹¹ Pɛwɛnɩ ɛsɩmɩyɛ nɛ pɛwɛ amɛya taa. Izaayii wobi pɩ-yɔɔ nɛ ɛyɔɔdɩ mbʋ pʋyɔɔ pɩwɛɛ se ‘ɖɩmɛyɩ nɛ ɖɩwɛɛ taa leleŋ taa’ fezuu taa paradisuu taa yɔ pɩ-tɔm. Yehowa lɩzɩnɩ fezuu taa paradisuu ŋgʋ. (Kalɩ Izaayii 65:​18, 19.) Nɛ pɩɩɖɩɣzɩɣ-ɖʋ se ɛwɛɛ nɛ ɛtɩŋɩɣnɩ ɖɔ-yɔɔ se  ɛsɩnɩ ɛyaa nɛ palɩɩ ɛjaɖɛ ɖɩnɛ ɖɩ-agbaa taa nɛ pasʋʋ fezuu taa paradisuu taa. Mbʋ pʋyɔɔ yɔ agbaa ana aawɩlɩɣ-wɛ Ɛsɔ yɔɔ toovenim tɔm. Ðihikiɣ wazasɩ sakɩyɛ, mbʋ pʋyɔɔ yɔ ɖɩwɛ toovenim taa; nɛ pʋyɔɔ lɛ ɖa-taa wɛ leleŋ kpem nɛ ɖɩsɔɔlɩ siŋŋ se ɖiheyi ɛyaa lalaa wazasɩ nzɩ sɩ-tɔm.—Yer. 31:12.

12. Ŋmaɣzɩɣ tamaɣ ŋga kɔ-tɔm pɔyɔɔdɩ Izaayii 65:​20-24 taa yɔ kɔ-yɔɔ lɛ, ɛzɩma pɩlakɩ-ŋ, nɛ ɛbɛ yɔɔ pɩlakɩ-ŋ mbʋ?

¹² Ða mba ɖɩwɛ fezuu taa paradisuu taa yɔ, ɖɩwɛnɩ ɖɔɖɔ ɛsɩmɩyɛ lidaʋ ŋgʋ ɖɩwɛna yɔ kɩ-yɔɔ nɛ kiyeba nɛ ɖɩwɛɛ amɛya taa. Maɣzɩ mbʋ payɩ ɖɩkaɣ naʋ nɛ mbʋ payɩ ɖɩkaɣ labʋ ɛjaɖɛ kɩfaɖɛ taa yɔ pɩ-yɔɔ nɛ ŋna. Bibl yɔɔdaa se: «Pɩɣa cɩɩɩ nakɛyɛ ɛɛkaɣ tasʋʋ wɛʋ . . . se kɩyakɩŋ pazɩ ɖeke kacakɩ wezuu, nɛ akpadɩyʋ nɔɔyʋ ɛɛkaɣ wɛʋ ɖɔɖɔ se ɛɛtɛŋ ɛ-kɩyakɩŋ.» Ðɩkaɣ ‘maʋ ɖɩsɩ nɛ ɖɩsʋʋ sɩ-taa, nɛ ɖɩkaɣ sɔʋ viiñi tɩŋ nɛ ɖɩtɔɔ i-pee.’ Ðɩɩkaɣ «ñaɣʋ pana falaa,» mbʋ pʋyɔɔ yɔ ‘Yehowa kaɣ-ɖʋ wazʋʋ.’ Ɛlabɩ-ɖʋ tamaɣ se ɖɩkaɣ wɛʋ pɛɛyɛ taa, ɖɩkaɣ nɩʋ wezuu leleŋ nɛ ɖe-wezuu caɣʋ wɛɛnɩ tɔbʋʋ nɩʋ. ‘Halɩ pʋcɔ nɛ ɖɩyaa lɛ,’ ɛkaɣ tɩlʋʋ ɖa-taa paa weyi ɛ-kɩcɛyɩm nɛ ‘ɛhaɣzɩ mbʋ payɩ pɩwɛ wezuu yɔ mbʋ pi-liu wɛɛ yɔ.’—Iza. 65:​20-24; Keɣ. 145:16.

13. Ɛzɩ Izaayii 65:25 yɔɔdʋʋ yɔ, lɛɣzɩtʋ ndʋ ɛyaa lakɩ alɩwaatʋ ndʋ papaɣzɩɣ Yehowa sɛʋ yɔ?

¹³ Pɛwɛ laŋhɛzɩyɛ nɛ pɛɛyɛ taa. Ðooo lɛ, ɛyaa sakɩyɛ kaawɛ puuyaɣ, paawɛ ñaŋ yaa pataawɛɛ toovenim. Ɛlɛ Ɛsɔ fezuu sɩnɩ-wɛ nɛ pɛlɛɣzɩ pe-wezuu caɣʋ. (Kalɩ Izaayii 65:25.) Pañaɣ pana siŋŋ nɛ peyele wɛtʋ kɩdɛkɛdɩtʋ ndʋ paawɛna yɔ. (Roma 12:2; Efɛz. 4:​22-24) Paa mbʋ yɔ, ɖa Ɛsɔ sɛyaa ɖɩtɩtalɩ pilim, pʋyɔɔ lɛ pɩkaɣ-ɖʋ yʋsɩnʋʋ. Ɛlɛ Yehowa kpɛndɩ «ɛyaa ndɩ ndɩ» sɔɔlɩm tomiye nɖɩ ɖɩcɛyɩsɩ camɩyɛ yɔ ɖɩ-taa nɛ laŋhɛzɩyɛ taa. (Tiiti 2:11) Ɛsɔ ɖoŋ tɩŋa tʋ ɖeke pɩzɩɣna nɛ ɛla piti lakasɩ nzɩ.

14. Mbʋ pɩlabɩ koobu abalɩñɩnʋ nɔɔyʋ wezuu caɣʋ taa yɔ, ɛzɩma pɩwɩlɩɣ se Izaayii 65:25 taa tɔm kɛ toovenim?

¹⁴ Ɛzɩ toovenim taa lɛ, ɛyaa pɩzɩɣ nɛ pɛlɛɣzɩ pɛ-wɛtʋ na? Iyele nɛ ɖɩna evebu nɔɔyʋ kɩɖaʋ. Ɛɛwɛnɩ pɩnzɩ 20 lɛ, pakpa-ɩ nɛ paɖɩɣ salaka tam sakɩyɛ. Ɛcakaɣ wezuu kɩdɛkɛdʋʋ kpem nɛ ɛɛwɛ puuyaɣ pɩdɩɩfɛyɩ. Paaɖɩɣ-ɩ salaka, mbʋ pʋyɔɔ yɔ ɛmɩlaɣ lɔɔɖa nɛ wondu lɛɛtʋ nɛ ɛlakaɣ lakasɩ kɩdɛkɛdɩsɩ lɛɛsɩ sakɩyɛ. Ɛ nɛ paa anɩ papɩzaɣ se poyoo. Ɛnɩ Bibl taa toovenim tɔm kajalaɣ ɖeɖe nɛ ɛpaɣzɩ Yehowa Aseɣɖe Tɩnaa kediɣzisi wobu lɛ, ɛ-taa kaatɛma se ɛlɩ mbʋ pʋyɔɔ ɛyʋ wɛ wezuu yɔ pɩ-yɔɔ, mbʋ lɛ se ɛsɛɛ Yehowa fezuu taa paradisuu taa. Pamɩyɩsɩ-ɩ lɩm nɛ pɩtɛ lɛ, ɛmaɣzaɣ tɔm ndʋ tɩwɛ Izaayii 65:25 taa yɔ tɩ-yɔɔ ɖoŋ ɖoŋ nɛ ɛnaɣ ɛzɩma titukuuni-i yɔ. Ɛlɛɣzɩ e-wezuu caɣʋ; eyebi puuyaɣ lakasɩ nzɩ sɩnɩɣzɩnɩ mʋʋzʋʋ lakasɩ yɔ nɛ ɛpɩsɩ laŋhɛzɩyɛ tʋ ɛzɩ heɣa yɔ.

15. (a) Ɛbɛ yɔɔ ɖɩsɔɔlaa se ɖɩsɩnɩ ɛyaa lalaa nɛ pɛkpɛndɩ ɖɔ-yɔɔ fezuu taa paradisuu taa? (b) Ɛzɩma ɖɩpɩzɩɣ nɛ ɖɩla mbʋ?

¹⁵ Izaayii 65:13 paɣzɩnɩ tɔm tʋnɛ: «Tɔm tʋnɛ Kɩbaɣlʋ Kɩlɩm Yehowa yɔɔdʋʋ.» Kalɩtʋ 25 tɛzɩnɩ tɔm tʋnɛ: «Yehowa yɔɔdʋʋna.» Tɔm ndʋ Yehowa yɔɔdʋʋ yɔ tɩlakɩ paa ɛzɩmtaa. (Iza. 55:​10, 11) Fezuu taa paradisuu tɛm wɛʋ. Yehowa ha-ɖʋ koobiya hɔʋ ŋgʋ kɩwɛ ŋgee yɔ. Ðɩwɛ laŋhɛzɩyɛ nɛ pɛɛyɛ taa ɖɔ-hɔʋ ŋgʋ kɩ-taa, paa puuyaɣ lakasɩ isu ɛjaɖɛ yɔɔ yɔ. (Keɣ. 72:7) Pʋyɔɔ lɛ, ɖɩsɔɔlaa se ɖɩsɩnɩ ɛyaa sakɩyɛ nɛ pɛkpɛndɩ ɖɔ-yɔɔ hɔʋ ŋgʋ kɩ-taa. Ðɩpɩzɩɣ nɛ ɖɩla mbʋ ye ɖɩkaŋ ñʋʋ nɛ kpɛlɩkɩyaa labʋ tʋmɩyɛ yɔ.—Mat. 28:​19, 20.

ƐBƐ ÐƖPƖZƖƔ ÐƖLA NƐ ÐƖSƖNƖ ƐYAA LALAA NƐ PƆSƆƆLƖ SE PASƲƲ FEZUU TAA PARADISUU TAA?

16. Ɛbɛ pɩzɩɣ pɩsɩnɩ ɛyaa nɛ pɔsɔɔlɩ se pasʋʋ fezuu taa paradisuu taa?

¹⁶ Ða-tɩŋa ɖɩpɩzɩɣ nɛ ɖɩla nabʋyʋ nɛ ɖɩsɩnɩ ɛyaa lalaa nɛ pɔsɔɔlɩ se pasʋʋ fezuu taa  paradisuu taa. Pɩsa nɛ ɖɩla mbʋ lɛ, pɩpɔzʋʋ se ɖɩmaɣzɩnɩ Yehowa. Ɛɛkpaɣ ɛyaa nɛ ɖoŋ se pasʋʋ ɛ-ɛgbɛyɛ taa. Ɛlɛ ‘ɛhɔŋ’ ɛyaa hɛɛɛ nɛ ɛkɔŋnɩ ɛ-cɔlɔ. (Yoh. 6:44; Yer. 31:3) Laŋa kɩbana tɩnaa mba pɛkpɛlɩkɩ Yehowa wɛtʋ kɩbandʋ tɔm yɔ, pɔñɔtʋʋnɩ-ɩ pa-maɣmaɣ. Ɛzɩma ɖɩpɩzɩɣ ɖɩtɩŋnɩ ɖɛ-wɛtʋ kɩbandʋ nɛ ɖe-wezuu caɣʋ kɩbaŋʋ yɔɔ nɛ ɖɩhɔ ɛyaa nɛ ɖɩkɔnɩ fezuu taa paradisuu taa?

17. Ɛbɛ ɖɩpɩzɩɣ ɖɩla nɛ ɖɩsɩnɩ ɛyaa nɛ pɔsɔɔlɩ se pasʋʋ fezuu taa paradisuu taa?

¹⁷ Mbʋ ɖɩpɩzɩɣ ɖɩla nɛ ɖɩsɩnɩ ɛyaa nɛ pɔsɔɔlɩ se pasʋʋ fezuu taa paradisuu taa yɔ, pɩ-taa nabʋyʋ lɛ se ɖɩwɩlɩ ɖo-koobiya sɔɔlɩm nɛ ɖɩlabɩ-wɛ camɩyɛ lakasɩ. Alɩwaatʋ ndʋ ɛyaa kɩfama kɔŋ kediɣzisi taa yɔ, ɖɩsɔɔlaa se pɔyɔɔdɩ se: «Toovenim taa lɛ, Ɛsɔ wɛ mɩ-hɛkʋ taa.» Pʋtɔma yɔ, tɔm ndʋ Kɔrɛntɩ ñɩma mba pataakɛ koobiya nɛ powokaɣ kediɣzisi yɔ paayɔɔdaa. (1 Kɔr. 14:​24, 25; Zak. 8:23) Ye mbʋ, pɩwɛɛ se ɖiwolo pɩ-yɔɔ nɛ ɖɩɖɔ lɔŋ tasʋʋ pʋnɛ pɩ-yɔɔ: «Iyele nɛ laŋhɛzɩyɛ wɛɛ mɩ-hɛkʋ taa.»—1 Tes. 5:13.

18. Ɛbɛ pɩzɩɣ nɛ piseɣti ɛyaa nɛ pɔkɔɔ ɖɛ-ɛgbɛyɛ taa?

¹⁸ Paa ɛzɩmtaa lɛ, pɩwɛɛ se ɖɩñaɣ pana nɛ ɖɩnaɣ ɖo-koobiya ɛzɩ Yehowa naɣʋ-wɛ yɔ. Ye ɖɩkaŋ ɖa-lɩmaɣza pɛ-wɛtʋ kɩbandʋ yɔɔ nɛ ɖɩɩkaŋ-yɛ pɛ-ɛjandʋ yɔɔ yɔ, pɩsɩɣnɩ-ɖʋ nɛ ɖɩla mbʋ, mbʋ pʋyɔɔ yɔ wiɖiyi pɛ-ɛjandʋ ndʋ tɩkaɣ tɛm. Ye ‘ɖɩlakɩ ɖama camɩyɛ, ɖɩpɩsɩ pʋtɔdɩyɛ nayaa siŋŋ, nɛ ɖikpeɣ ɖama faaa’ yɔ, ɖɩpɩzɩɣ nɛ ɖɩcɔnɩ tɔm ndʋ payɩ tɩkɔŋ ɖɛ-hɛkʋ taa yɔ ti-ɖeɖe nɛ sɔɔlɩm. (Efɛz. 4:32) Ðɩnɛ ɛlɛ, pɩkaɣ seɣtuu ɛyaa mba pɔsɔɔlaa se pawɩlɩ-wɛ sɔɔlɩm yɔ nɛ pɔkɔɔ fezuu taa paradisuu taa. b

 WƐƐ FEZUU TAA PARADISUU TAA TAM

19. (a) Ɛzɩ aɖakaɣ « Paalɩwa nɛ paɖaɣnɩ pɩsʋʋ» yɔɔdʋʋ yɔ, suwe koobiya nabɛyɛ yɔɔdaa alɩwaatʋ ndʋ paɖaɣnɩ pɩsʋʋ fezuu taa paradisuu taa yɔ? (b) Ɛbɛ pɩwɛɛ se ɖɩtɛ ɖa-taa se ɖɩlakɩ? (Cɔnɩ ɖɔɖɔ kɩlɛmʋʋ.)

¹⁹ Ðɩwɛnɩ ɛsɩmɩyɛ siŋŋ mbʋ pʋyɔɔ yɔ ɖɩwɛ fezuu taa paradisuu taa. Kɩwɛ kajʋka kpem lɛɛlɛɛyɔ nɛ pɩkɩlɩ, nɛ ɛyaa mba pɛwɛɛ nɛ pɛsɛɣ Yehowa kɩ-taa lɛɛlɛɛyɔ yɔ, pɔɖɔ kpem nɛ pɩkɩlɩ. Tɛtɛ nɛ ɖɩwɛɛnɩ ɛsɩmɩyɛ paradisuu ŋgʋ Yehowa ha-ɖʋ yɔ kɩ-yɔɔ tam. Mba payɩ pɔsɔɔlaa se pa-laŋa ɩhɛɛ, pe-liu ɛsɩ, pacaɣ ɖiɣ ɖiɣ nɛ pɛwɛɛ pɛɛyɛ taa yɔ, pɩwɛɛ se pasʋʋ fezuu taa paradisuu taa nɛ pataalɩɩ kɩ-taa kpa. Ɛlɛ pɩwɛɛ se ɖɩkpa ɖa-tɩ camɩyɛ, mbʋ pʋyɔɔ yɔ Sataŋ wɛɛ nɛ ɛñakɩ pana se eyele nɛ ɖɩlɩɩ kɩ-taa. (1 Pɩy. 5:8; Natʋ 12:9) Ɛlɛ pɩfɛyɩ se ɖiyele nɛ ɛtalɩ ɛ-kaɖʋwa. Tɛtɛ nɛ ɖɩñaɣ pana siŋŋ nɛ ɖɩkandɩyɩ kele kele wɛtʋ nɛ laŋhɛzɩyɛ nɖɩ ɖɩwɛ fezuu taa paradisuu taa yɔ ɖɩ-yɔɔ nɛ ɖiyele ɖɔɖɔ nɛ kɩwɛɛ kajʋka tam.