1. Tʋmɩyɛ nɖɩ Yehowa ɖʋ lʋlɩyaa?

YEHOWA lɩzɩ kajalaɣ halʋ nɛ abalʋ lɛ, ɛha-wɛ waɖɛ se palʋlɩ piya. Ye mbʋ, Bibl wɛnɩ toovenim se kɩyɔɔdɩ se: “Piya kɛ kʋjɔʋ ŋgʋ kɩlɩnɩ Yehowa cɔlɔ yɔ.” (Keɣa 127:3, nwt.) Tɔm ndʋ, tɩ-tɔbʋʋ lɛ suwe? Kpaɣ se ña-taabalʋ kɩbanʋ nɔɔyʋ ɖʋ-ŋ tʋmɩyɛ se ŋcɔnɩ e-liidiye nɖɩ ɖɩɖɔ siŋŋ yɔ ɖɩ-yɔɔ. Ɛzɩma pɩlakɩ-ŋ? Pɩtʋʋ fɛyɩ se pɩkɛɣnɩ-ŋ hɩɖɛ ɖʋʋ se ɛta-ŋ liu. Ɛlɛ ŋpɩzɩɣ nɛ ŋnɩɣzɩ nɛ ŋpɔzʋʋ ña-tɩ se ɛzɩ ɛzɩma ŋkaɣ labʋ nɛ ŋcɔnɩ ñɩm mbʋ pɩ-yɔɔ camɩyɛ? Yehowa weyi ɛkɛ ɖa-taabalʋ kɩbanʋ yɔ, ɛcɛlɩ lʋlɩyaa nabʋyʋ se pɔcɔnɩ pɩ-yɔɔ, nɛ pɩmʋ ñɩm siŋŋ nɛ pɩkpaɖɩ liidiye. Ɛɖʋ-wɛ tʋmɩyɛ se pɔcɔnɩ pe-piya yɔɔ camɩyɛ nɛ peyele nɛ sɩwɛɛ koboyaɣ taa.

2. Tɔm pɔzʋʋ mbʋ yɔɔ ɖɩkaɣ cosuu?

² Alɩwaatʋ ndʋ halʋ nɛ abalʋ pɔɖɔkʋʋ nesi yɔ, anɩ pɩwɛɛ se ɛkpaɣ lɩmaɣza se palʋlɩ piya yaa pataalʋlɩ, nɛ alɩwaatʋ ndʋ pɩwɛɛ se palʋlɩ-sɩ? Ɛbɛ lʋlɩyaa pɩzɩɣ pala nɛ pasɩnɩ pe-piya nɛ sihiɣ koboyaɣ si-wezuu caɣʋ taa? Iyele nɛ ɖɩyɔɔdɩ Bibl taa paɣtʋ kila naayɛ tɔm. Apɩzɩɣ nɛ asɩnɩ Krɩstʋ ñɩma mba pɔɖɔkɩ nesi yɔ nɛ pakpaɣ lɩmaɣza nɛ lɛɣtʋ.

3. (a) Alɩwaatʋ ndʋ halʋ nɛ abalʋ pɔɖɔkʋʋ nesi yɔ, anɩ pɩwɛɛ se ɛkpaɣ lɩmaɣzɩyɛ se palʋlɩ piya yaa pataalʋlɩ? (b) Bibl paɣtʋ kiɖe nɖɩ pɩwɛɛ se nesi ɖɔkɩyaa hɔʋ taa ñɩma nɛ pa-taabalaa palabɩnɩ tʋmɩyɛ?

³ Ɛyaa maɣzɩɣ se halʋ nɛ abalʋ pɔɖɔkʋʋ nesi kpaagbaa lɛ, pɩwɛɛ se papaɣzɩ piya lʋlʋʋ. Halɩ pɔ-hɔʋ taa ñɩma nɛ lalaa papɩzɩɣ nɛ pañɩɣ pɔ-yɔɔ se palʋlɩ piya lɔŋ. Payaɣ koobu  nɔɔyʋ se Jethro nɛ ɛwɛ Aazii ɛjaɖɛ taa. Ɛyɔɔdaa se: “Ɛgbɛyɛ taa ñɩma mba pɛwɛnɩ piya yɔ, pa-taa nabɛyɛ ñɩkɩɣ nesi ɖɔkɩyaa mba pɛfɛyɩnɩ piya yɔ pɔ-yɔɔ se paɖʋ hɔŋ.” Koobu lɛlʋ weyi payaɣ se Jeffrey nɛ ɛwɛ Aazii ɛjaɖɛ taa ɖɔɖɔ yɔ, ɛyɔɔdaa se: “Nabɛyɛ heyiɣ nesi ɖɔkɩyaa mba pɛfɛyɩnɩ piya yɔ se paakaɣ wɛnʋʋ nɔɔyʋ se ɛcɔnɩ pɔ-yɔɔ alɩwaatʋ ndʋ pakpadɩyɩɣ yɔ.” Paa mbʋ yɔ, nesi ɖɔkɩyaa maɣmaɣ pɩwɛɛ se pakpaɣ lɩmaɣzɩyɛ se palʋlʋʋ piya yaa paalʋlʋʋ. Mba pɩwɛɛ se pakpaɣ lɩmaɣzɩyɛ; pa-sʋʋtʋ pɩkɛnaa. (Gal. 6:5) Pɩkɛ toovenim se taabalaa nɛ hɔʋ taa ñɩma ñɩnɩɣ se nesi ɖɔkɩyaa kɩfama ɩwɛɛ taa leleŋ taa. Ɛlɛ pɩcɛyaa se pa-tɩŋa pɔtɔzɩ se piya wɛnʋʋ hɔɔlʋʋ taa lɛ, nesi ɖɔkɩyaa pɩwɛɛ se pɛsɛtɩ pa-tɩ tɔm.—1 Tes. 4:11.

4-5. (a) Tɔm naalɛ ndʋ pɩwɛɛ se nesi ɖɔkɩyaa ɩyɔɔdɩ nɛ panɩɩnɩ ɖama tɩ-yɔɔ? (b) Nɛ ɛzɩmtaa pɩkɩlɩɣ ɖeu se pɔyɔɔdɩ-tʋ? Lɩzɩ pɩ-taa.

⁴ Nesi ɖɔkɩyaa mba palɩzaa se palʋlʋʋ piya yɔ, pɩwɛɛ se pɔyɔɔdɩ nɛ panɩɩnɩ ɖama tɔm kɩcɛyɩtʋ naalɛ tʋnɛ tɩ-yɔɔ: Kajalaɣ lɛ, ɛzɩmtaa pɔsɔɔlaa se papaɣzɩ piya lʋlʋʋ? Nabʋlɛ lɛ, piya ɛzɩma pɔsɔɔlaa se palʋlɩ? Ɛzɩmtaa pɩwɛɛ se panɩɩnɩ ɖama tɔm ndʋ tɩ-yɔɔ? Nɛ ɛbɛ yɔɔ pɩcɛyaa se panɩɩnɩ ɖama tɔm ndʋ tɩ-naalɛ tɩ-yɔɔ?

⁵ Sakɩyɛ taa lɛ, pʋcɔ nɛ halʋ nɛ abalʋ pɔɖɔkɩ nesi lɛ, pɩwɛɣ ɖeu se pɔyɔɔdɩ piya lʋlʋʋ tɔm. Ɛbɛ yɔɔ? Mbʋ pʋyɔɔ yɔ, pɩcɛyɩ siŋŋ se pa-naalɛ pɛwɛɛnɩ lɩmaɣza kʋɖʋma tɔm ndʋ tɩ-yɔɔ. Pɩtasɩ lɛ, pɩkaɣ pɔzʋʋ se pamaɣzɩ nɛ pana se pɔñɔɔzɩ pa-tɩ camɩyɛ se pasɩɣlɩ sʋʋtʋ ndʋ yaa patɩñɔɔzɩ pa-tɩ. Nesi ɖɔkɩyaa nabɛyɛ kpaɣ lɩmaɣza se paɖaŋɩɣ pɩnaɣ kʋɖʋmaɣ yaa naalɛ pe-nesi ɖɔkʋʋ wayɩ pʋcɔ nɛ papaɣzɩ piya lʋlʋʋ mbʋ pʋyɔɔ yɔ, pɛwɛɣnɩ piya lɛ, pɩkaɣ-wɛ pɔzʋʋ alɩwaatʋ nɛ ɖoŋ sakɩyɛ se pɩsa nɛ pɔcɔnɩ sɩ-yɔɔ. Ɛbɛ yɔɔ? Palakɩ mbʋ se pɩsa nɛ pehiɣ alɩwaatʋ nɛ pacaɣ ɛzɩ halʋ nɛ ɛ-walʋ yɔ nɛ pɩmalɩnɩ-wɛ. Pɩhaɣ-wɛ waɖɛ se pɔñɔtɩnɩ ɖama nɛ pɩkɩlɩ pʋcɔ nɛ piya kɔɔ.—Efɛz. 5:33.

6. Ɛzɩma ɖɩwɛ alɩwaatʋ kaɖɛ ñɩndʋ taa yɔ pʋyɔɔ lɛ, lɩmaɣza wena nesi ɖɔkɩyaa nabɛyɛ kpaɣaa?

⁶ Krɩstʋ ñɩma lalaa lɩzaa se pamaɣzɩɣnɩ Noowa pɩyalaa naadozo nɛ pa-halaa pa-kɩɖaŋ. Noowa pɩyalaa nɛ pa-halaa patɩlʋlɩ piya kpaagbaa. (Kiɖe 6:18; 9:18, 19; 10:1; 2 Pɩy. 2:5) Yesu kpaɣ ɖa-alɩwaatʋ nɛ ɛmaɣzɩnɩ “Noowa kɩyakɩŋ” nɛ pɩtʋʋ fɛyɩ se ‘alɩwaatʋ kaɖɛ ñɩndʋ ndʋ tɩ-lʋbɩnʋʋ wɛ kaɖɛ yɔ’ tɩ-taa ɖɩwɛɛ. (Mat. 24:37; 2 Tim. 3:1)  Pʋyɔɔ lɛ, nesi ɖɔkɩyaa nabɛyɛ kpaɣ lɩmaɣza se potuzuu piya lʋlʋʋ nɛ ɛsɩndaa nɛ pɩha-wɛ waɖɛ nɛ pala tʋma Yehowa sɛtʋ taa nɛ pɩkpaɖɩ.

7. Paɣtʋ kila wena awɛ Luka 14:28, 29 nɛ Aduwa 21:5 taa yɔ, ɛzɩma apɩzɩɣ nɛ asɩnɩ nesi ɖɔkɩyaa?

⁷ Nesi ɖɔkɩyaa mba pɛwɛ lɔŋ yɔ pakpakɩɣ lɩmaɣza se pana se palʋlʋʋ piya yaa paalʋlʋʋ; nɛ ye palʋlʋʋ, piya ɛzɩma pañɩnɩɣ se palʋlɩ. Alɩwaatʋ ndʋ pakpakɩɣ lɩmaɣza ana yɔ, palakɩnɩ tʋmɩyɛ paɣtʋ kiɖe nɖɩ ɖɩwɛ Luka 14:28, 29 taa yɔ. (Kalɩ Luka 14:28, 29.) Ɛzɩ ɛyʋ weyi ɛsɔɔlaa se ɛma kuduyuu yɔ ɛlakʋʋ yɔ, patʋʋzʋʋ se pana se pɛwɛnɩ liidiye nɖɩ pɩpɔzʋʋ yɔ. Lʋlɩyaa nabɛyɛ yɔɔdaa se piya lʋlʋʋ nɛ sɩ-yɔɔ cɔnʋʋ kpakɩɣ liidiye sakɩyɛ. Pɩtasɩ lɛ nesi ɖɔkɩyaa mba, paakpakɩɣ lɩmaɣza lɛ, pɔtɔzʋʋ se piya lʋlʋʋ nɛ sɩ-yɔɔ cɔnʋʋ kaɣ pɔzʋʋ alɩwaatʋ nɛ ɖoŋ. Pʋyɔɔ lɛ, pɩcɛyaa se nesi ɖɔkɩyaa ɩmaɣzɩ tɔm pɔzʋʋ pʋnɛ pɩ-yɔɔ: ‘Pɩkaɣ pɔzʋʋ se ɖa-naalɛ ɖɩla tʋmɩyɛ nɛ ɖɩcɔnɩ ɖɔ-hɔʋ kɩcɛyɩm ɖeɖe na? Ðɩnɩnɩ ɖama “tomnaɣ yɔɔ wondu ndʋ tɩtɛɖɩɣ” ɖɔ-hɔʋ yɔ tɩ-yɔɔ? Ye pɩwɛɛ se ɖa-naalɛ ɖɩla tʋmɩyɛ, akaɣ cɔnʋʋ ɖe-piya ɖeɖe? Akaɣ wɛnʋʋ ɖoŋ sɩ-maɣzɩm nɛ sɩ-lakasɩ yɔɔ? Nesi ɖɔkɩyaa kaatazɩɣ tɔm pɔzʋʋ mbʋ pɩ-taa lɛ, palakɩnɩ tʋmɩyɛ tɔm ndʋ tɩwɛ Aduwa 21:5 taa yɔ.—Kalɩ Aduwa 21:5.

8. (a) Kala wena nesi ɖɔkɩyaa pɩzɩɣ nɛ pakatɩ? (b) Nɛ ɛbɛ walʋ weyi ɛwɛnɩ sɔɔlɩm yɔ ɛkaɣ labʋ?

⁸ Pɩpɔzaa se pɩɣa lʋlɩyaa mba pa-naalɛ pakpaɣ po-ɖoŋ nɛ pa-alɩwaatʋ sakɩyɛ nɛ pɔcɔnɩ ke-ɖeɖe. Ye mbʋ, ye nesi ɖɔkɩyaa nabɛyɛ ɩlʋlʋʋ piya ɖama yɔɔ ɖama yɔɔ yɔ, pɩpɩzɩɣ nɛ pɩwɛɛ kaɖɛ paa lʋlɩyʋ weyi lɛ se ɛcɔnɩ paa pɩɣa ŋga lɛ, ke-ɖeɖe ɛzɩ pɩpɔzʋʋ yɔ. Nesi ɖɔkɩyaa nabɛyɛ, mba paawɛnɩ piya cikpesi sakɩyɛ yɔ pɔtɔm se pɩɩlabɩ-wɛ kaɖɛ. Pɩpɩzɩɣ nɛ pɩnɩɣ ɖoyo nɔɔyʋ paa ɛzɩmtaa. Pɩpɩzɩɣ nɛ pɩnɩɣ-ɩ siŋŋ nɛ ɛɛtasɩɣ wɛnʋʋ ɖoŋ se ɛkpɛlɩkɩ, ɛtɩmɩ nɛ esusi tɔm ɖoŋ ɖoŋ. Pɩpɩzɩɣ nɛ pɩwɛɛ-ɩ kaɖɛ se ewelisi camɩyɛ kediɣzisi taa nɛ pɩwazɩ-ɩ. Ɛlɛ, walʋ weyi ɛwɛnɩ sɔɔlɩm yɔ, ɛkaɣ labʋ mbʋ ɛpɩzɩɣ yɔ nɛ ɛsɩnɩ ɛ-halʋ alɩwaatʋ ndʋ pɩpɔzʋʋ se pɔcɔnɩ pe-piya ɖeɖe kediɣzisi taa nɛ ɖɩɣa yɔ. Kɩɖaʋ nakʋyʋ yɔ. Ɛpɩzɩɣ nɛ ɛsɩnɩ ɛ-halʋ ɖɩɣa tʋma labʋ. Ɛkaɣ ñaɣʋ pana se hɔʋ taa Ɛsɔ sɛtʋ ndʋ palakɩ ɖoŋ ɖoŋ yɔ, tɩwazɩ paa weyi. Nɛ ɛkaɣ ñaɣʋ pana ɖoŋ ɖoŋ ɖɔɖɔ se ɛ nɛ ɛ-hɔʋ palɩɣ tɔm susuu.

9-10. Ɛbɛ pɩwɛɛ se lʋlɩyaa ɩla nɛ pasɩnɩ pe-piya?

⁹ Mbʋ lʋlɩyaa pɩzɩɣ pala nɛ pasɩnɩ pe-piya nɛ sɩkpɛlɩkɩ ɛzɩma sɩsɔɔlɩ Yehowa yɔ pɩ-taa nabʋyʋ lɛ ɛbɛ? Ɛzɩma papɩzɩɣ nɛ pakandɩyɩ pe-piya yɔɔ nɛ ɛjaɖɛ kɩdɛkɛdɩyɛ ɖɩnɛ  ɖɩtaakɔnɩ-sɩ kaɖɛ? Na mbʋ lʋlɩyaa pɩzɩɣ nɛ pala yɔ, pɩ-taa nabʋyʋ.

¹⁰ Tɩmnɩ Yehowa se ɛsɩnɩ-ŋ. Na kɩɖaʋ ŋgʋ Manowaa nɛ ɛ-halʋ pahawa yɔ. Mba lʋlɩnɩ Samsɔɔ. Alɩwaatʋ ndʋ Manowaa nawa se ɛ nɛ ɛ-halʋ pakaɣ wɛnʋʋ abalɩbɩɣa yɔ, etendi Yehowa se ɛsɩnɩ-wɛ nɛ pana ɛzɩma pɩwɛɛ se pɔcɔnɩ pa-pɩɣa yɔɔ yɔ.

11. Ɛzɩ pɔyɔɔdʋʋ Tɔm Hʋyaa 13:8 taa yɔ, ɛzɩma lʋlɩyaa pɩzɩɣ nɛ pamaɣzɩnɩ Manowaa kɩɖaʋ?

¹¹ Nihad nɛ Alma mba pɛwɛ Bɔsɩnii Ɛrɩzegooviini ɛjaɖɛ taa yɔ, Manowaa kɩɖaʋ kpɛlɩkɩ-wɛ lɔŋ. Palɩzɩ pɩ-taa se: “Ɛzɩ Manowaa yɔ, ɖitendi Yehowa se ɛsɩnɩ-ɖʋ nɛ ɖɩna ɛzɩma pɩwɛɛ se ɖɩla nɛ ɖɩkɛ lʋlɩyaa kɩbama yɔ. Nɛ Yehowa tɩŋnɩ nʋmɔŋ ndɩ ndɩ ɛzɩ Masɩ, ɛgbɛyɛ takayɩsɩ, kediɣzisi nɛ kigbeɣliŋ yɔɔ nɛ ecosi ɖa-adɩma yɔɔ.”—Kalɩ Tɔm Hʋyaa 13:8.

12. Kɩɖaʋ ŋgʋ Yosɛɛfʋ nɛ Maarɩɩ paha pe-piya?

¹² Kɛ kɩɖaʋ kɩbaŋʋ. Tɔm ndʋ ŋyɔɔdʋʋ yɔ tɩcɛyaa; paa mbʋ yɔ, mbʋ ŋlakɩ yɔ pɩtʋʋ fɛyɩ se pɩkaɣ wɛnʋʋ ɖoŋ siŋŋ ña-pɩɣa yɔɔ. Ða-taa pɩzɩɣ nɛ pɩtɛ se Yosɛɛfʋ nɛ Maarɩɩ paha kɩɖaʋ kɩbaŋʋ pe-piya, pɩkpɛndɩnɩ Yesu. Yosɛɛfʋ lakaɣ tʋmɩyɛ nɛ kpekpeka se ɛcɔnɩ ɛ-hɔʋ yɔɔ. Pɩtasɩ lɛ, Yosɛɛfʋ seɣti ɛ-hɔʋ taa ñɩma se pɔsɔɔlɩ fezuu taa wondu. (Wp. 4:9, 10) Paa Paɣtʋ ɛtaañɩkɩɣ Yosɛɛfʋ yɔɔ se ɛkpaɣ ɛ-hɔʋ “paa pɩnaɣ ŋga” nɛ ewoni Yeruzalɛm Paska kazandʋ taa yɔ, ɛlakaɣ mbʋ. (Luka 2:41, 42) Pɩtɩla, cajanaa nabɛyɛ maɣzaɣ se pɩkɩlɩ kaɖɛ se ɛyʋ ɛkpaɣ hɔʋ kpeekpe nɛ pɔɖɔ nʋmɔʋ ŋgʋ, nɛ nʋmɔʋ ŋgʋ kɩ-ɖɔm kɩlɩɣ kpaɣʋ alɩwaatʋ nɛ liidiye sakɩyɛ. Ɛlɛ, Yosɛɛfʋ kaasɔɔlɩ fezuu taa wondu siŋŋ nɛ ɛwɩlɩ e-piya se sɩla mbʋ ɖɔɖɔ. Pɩtasɩ lɛ, Maarɩɩ kaasɩm Masɩ camɩyɛ. Pɩtʋʋ fɛyɩ se ɛtɩŋnɩ ɛ-yɔɔdaɣ nɛ ɛ-lakasɩ yɔɔ nɛ ɛwɩlɩ e-piya se sɩsɔɔlɩ Ɛsɔtɔm.

13. Ɛzɩma nesi ɖɔkɩyaa nabɛyɛ maɣzɩnɩ Yosɛɛfʋ nɛ Maarɩɩ pa-kɩɖaʋ?

¹³ Nihad nɛ Alma mba pɔ-tɔm ɖɩyɔɔdaa nɛ pɩɖɛɛ yɔ, paasɔɔlaa se pamaɣzɩnɩ kɩɖaʋ ŋgʋ Yosɛɛfʋ nɛ Maarɩɩ pahawa yɔ. Ɛzɩma pɩsɩnɩ-wɛ nɛ pawɩlɩ pa-pɩyalʋ ɛzɩma ɛsɔɔlɩ Ɛsɔ nɛ ɛsɛɛ-ɩ yɔ? Pɔyɔɔdaa se: “Ðɩtɩŋnɩ ɖe-wezuu caɣʋ yɔɔ nɛ ɖɩwɩlɩ ɖa-pɩyalʋ ɛzɩma pɩwɛ ɖeu se ɛyʋ ɛɖɔ Yehowa paɣtʋ kila yɔɔ e-wezuu caɣʋ taa yɔ.” Nihad tasɩ yɔɔdʋʋ se: “Kɛ ɛyʋ weyi ŋsɔɔlaa se ña-pɩɣa ɛkɛna yɔ.”

14. Ɛbɛ yɔɔ pɩwɛɛ se lʋlɩyaa ɩtɩlɩ mba pe-piya ɖʋʋnɩ taabalɩyɛ yɔ?

¹⁴ Sɩnɩ ñe-piya nɛ sɩlɩzɩ taabalaa kɩbama. Pɩwɛɛ se caja nɛ ɖoyo patɩlɩ mba pe-piya ɖʋʋnɩ taabalɩyɛ yɔ nɛ mbʋ sɩwɛɛ nɛ sɩlakɩ yɔ. Pʋ-tɔbʋʋ lɛ se pɩwɛɛ se lʋlɩyaa ɩtɩlɩ mba pe-piya yɔɔdʋʋnɩ réseaux sociaux waa yɔɔ nɛ sɩ-pɔrtaabɩlɩwaa yɔɔ yɔ. Taabalaa mba, papɩzɩɣ nɛ pɛwɛɛnɩ ɖoŋ piya maɣzɩm nɛ sɩ-lakasɩ yɔɔ.—1 Kɔr. 15:33.

15. Ɛbɛ Jessie kɩɖaʋ pɩzɩɣ nɛ kɩkpɛlɩkɩ lʋlɩyaa?

¹⁵ Ɛbɛ lʋlɩyaa pɩzɩɣ nɛ pala ye paasɩŋ tɔm sakɩyɛ ordinatɛɛrɩwaa nɛ pɔrtaabɩlɩwaa yɔɔ yɔ? Payaɣ lʋlɩyʋ nɔɔyʋ se Jessie, ɛwɛ Filipiini ɛjaɖɛ taa. Ɛyɔɔdaa se: “Ðɩɩsɩŋ tɔm sakɩyɛ ordinatɛɛrɩwaa nɛ pɔrtaabɩlɩwaa yɔɔ. Paa mbʋ yɔ, pɩtɩɖɩɣ-ɖʋ nʋmɔʋ se ɖɩwɩlɩ ɖe-piya kala ndɩ ndɩ wena sɩpɩzɩɣ nɛ sɩkatɩ ordinatɛɛrɩwaa nɛ pɔrtaabɩlɩwaa tʋmɩyɛ labɩnʋʋ taa yɔ.” Paa ordinatɛɛrɩwaa nɛ pɔrtaabɩlɩwaa tʋmɩyɛ labɩnʋʋ ɛtɩmalɩnɩ Jessie yɔ, ɛtɩɖaŋ e-piya se sɩtaalabɩnɩ-wɛ tʋmɩyɛ. Ɛlɩzɩ pɩ-taa se: “Menseɣti men-piya se sɩlabɩnɩ-wɛ tʋmɩyɛ nɛ sɩkpɛlɩkɩ kʋnʋŋ kɩfalʋʋ, sɩñɔɔzɩ kediɣzisi nɛ sɩkalɩ Bibl paa ɖooye.” Tɔm ñʋʋ nakʋyʋ wɛ jw.org^® hɔɔlʋʋ “Adolescents” tɛɛ nɛ kɩyɔɔdʋʋ lɩmaɣza wena pɩwɛɛ se ɛyʋ ɛwɛɛnɩ tɔm nɛ fotonaa tiyinuu intɛrnɛɛtɩ yɔɔ yɔ. Ye  ɩkɛ lʋlɩyaa yɔ, mɩ nɛ mi-piya ɩtɛm kalʋʋ nɛ ɩtazɩ kɩ-taa? Mɩ nɛ sɩ ɩtɛm cɔnʋʋ Awɛnɩ ɖoŋ lɛlʋ yɔɔ—Ña yaa Ñɛ-tɛ téléphone? nɛ Taatɔlɩ réseaux sociaux waa kpacanaa taa * tɛ videowaa tam sakɩyɛ yaa we? Wondu ndʋ, tɩpɩzɩɣ nɛ tɩsɩnɩ-mɩ alɩwaatʋ ndʋ ɩwɩlɩɣ mi-piya ɛzɩma sɩlabɩnɩ tʋmɩyɛ ordinatɛɛrɩwaa nɛ pɔrtaabɩlɩwaa nɛ lɛɣtʋ yɔ.—Adu. 13:20.

16. Ɛbɛ lʋlɩyaa sakɩyɛ laba nɛ ɛbɛ lɩ pɩ-taa?

¹⁶ Lʋlɩyaa sakɩyɛ tɩŋɩɣnɩ nʋmɔŋ ndɩ ndɩ yɔɔ se pɩha pe-piya waɖɛ nɛ sɩɖʋ taabalɩyɛ nɛ mba pahaɣ kɩɖaʋ kɩbaŋʋ Ɛsɔ sɛtʋ taa yɔ. Kɩɖaʋ nakʋyʋ yɔ. N’Déni nɛ Bomine pɔɖɔkɩ nesi nɛ pɛwɛ Kootidiivʋwaarɩ ɛjaɖɛ taa. Ðoŋ ɖoŋ lɛ, pamʋʋ egeetiye yɔɔ cɔnɩyʋ se ɛsʋʋ pɛ-tɛ. N’Déni kɛdaa se: “Pɩɩwɛnɩ ɖoŋ kɩbaŋ siŋŋ ɖa-pɩyalʋ yɔɔ. Piyeba nɛ ɛpaɣzɩ nʋmɔʋ lɩzʋʋ tʋmɩyɛ labʋ nɛ lɛɛlɛɛyɔ ɛkɛ Egeetiye yɔɔ cɔnɩyʋ sɩnɩyʋ.” Ŋpɩzɩɣ ŋyele ɖɔɖɔ nɛ ñe-piya ɖʋ taabalɩyɛ nɖɩ ɖɩ-ɖɔndɩ yaa we?

17-18. Ɛzɩmtaa pɩwɛɛ se lʋlɩyaa ɩpaɣzɩ pe-piya falɩsʋʋ?

¹⁷ Paɣzɩ ñe-piya falɩsʋʋ ɖooo sɩ-pɩjatʋ taa. Pɩwɛɣ ɖeu nɛ pɩkɩlɩ se lʋlɩyaa ɩpaɣzɩ pe-piya falɩsʋʋ lɔŋ. (Adu. 22:6) Iyele nɛ ɖɩna Timootee kɩɖaʋ. Alɩwaatʋ natʋyʋ taa ɛ nɛ Pɔɔlɩ pɔɖɔm nʋmɔŋ. Timootee ɖoo Eniisi nɛ e-neze Loyiisi pafalɩsɩ-ɩ “ɖooo pɩjatʋ taa.”—2 Tim. 1:5; 3:15.

¹⁸ Nesi ɖɔkɩyaa lalaa wɛ ɖɔɖɔ Kootidiivʋwaarɩ ɛjaɖɛ taa nɛ payaɣ-wɛ se Jean-Claude nɛ Peace. Papɩzaa nɛ pɔcɔnɩ piya loɖo nzɩ pɛwɛna yɔ sɩ-tɩŋa sɩ-yɔɔ nɛ sɩsɔɔlɩ Yehowa nɛ sɩsɛɣ-ɩ. Ɛbɛ sɩnɩ-wɛ nɛ papɩzɩ nɛ pala mbʋ? Pamaɣzɩnɩ Eniisi nɛ Loyiisi pa-kɩɖaʋ. Pɔyɔɔdaa se: “Ðɩwɩlɩ ɖe-piya Ɛsɔtɔm kpaɣnɩ ɖooo sɩ-pɩjatʋ taa. Ðɩlʋlɩ-sɩ nɛ pitileɖi lɛ ɖɩpaɣzaa.”—Wp. 6:6, 7.

19. Ye pɔtɔm se ŋheyi ñe-piya Ɛsɔtɔm yɔ, pʋ-tɔbʋʋ lɛ suwe?

¹⁹ Ye pɔtɔm se ‘ŋheyi’ ñe-piya Yehowa tɔm yɔ, pʋ-tɔbʋʋ lɛ suwe? Ebree tɔm piye nɖɩ pɛɖɛzɩ Wayɩ Wayɩ Paɣtʋ 6:7 taa se “ŋŋheyi” yɔ, ɖɩ-tɔbʋʋ lɛ se ŋwɩlɩɣ nɛ ŋlɛlɩɣ ɖoŋ ɖoŋ. Pɩsa nɛ lʋlɩyaa la mbʋ lɛ, pɩwɛɛ se pakpaɣ alɩwaatʋ nɛ pa nɛ pe-piya pacakɩ  ɖoŋ ɖoŋ. Nabʋyʋ taa pɩpɩzɩɣ nɛ pitii lʋlɩyaa yɔɔɔ mbʋ pʋyɔɔ yɔ, pɩwɛɛ se pawɩlɩ piya paɣtʋ natʋyʋ nɛ pɛlɛlɩɣ tam sakɩyɛ. Ɛlɛ lʋlɩyaa pɩzɩɣ pañaɣ pana nɛ patɩlɩ se pɩkɛnɩ nʋmɔʋ ŋgʋ kɩ-yɔɔ papɩzɩɣ patɩŋna nɛ pasɩnɩ pe-piya nɛ sɩnɩɩ Ɛsɔtɔm taa nɛ sɩɖɔ tɩ-yɔɔ yɔ.

20. Yɔɔdɩ ɛzɩma papɩzɩɣ nɛ palabɩnɩ tʋmɩyɛ Keɣa 126:4, piya yɔɔ cɔnʋʋ hɔɔlʋʋ taa yɔ.

²⁰ Tɩlɩ ñe-piya camɩyɛ. Keɣa 126 taa, pakpaɣ piya nɛ pamaɣzɩnɩ tɔʋ ñɩma. (Kalɩ Keɣa 126:4.) Ɛzɩma papɩzɩɣ nɛ pakpaɣ wondu ndɩ ndɩ nɛ polubini tɔʋ ñɩma, nɛ ɛzɩma tɔʋ ñɩma ana a-paɣlɩka pɩzɩɣ nɛ pɩwɛɛ ndɩ ndɩ yɔ, mbʋ ɖɔɖɔ paa pɩɣa ŋga lɛ, kɛwɛ ndɩ nɛ lɛɛka. Ye mbʋ, pɩwɛɛ se lʋlɩyaa ɩtɩlɩ ɛzɩma pɩwɛɛ se pafalɩsɩ paa pa-pɩɣa ŋga yɔ. Ða-alɩwaatʋ taa Izrayɛɛlɩ ɛjaɖɛ taa nesi ɖɔkɩyaa nabɛyɛ pɩzaa nɛ pasɩnɩ pe-piya naalɛ nɛ sɩsɛɛ Yehowa. Pɔyɔɔdɩ mbʋ pɩsɩnɩ-wɛ yɔ pɩ-tɔm se: “Ðɩkpɛlɩkɩnɩ paa pɩɣa ŋga lɛ Bibl nɛ hɔɔlʋʋ.” Toovenim taa lɛ, paa hɔʋ ñʋʋdʋ weyi pɩpɔzʋʋ se ɛkpaɣ lɩmaɣzɩyɛ nɛ ɛna se pɩcɛyaa se ɛla mbʋ, yaa ɛpɩzɩɣ nɛ ɛla mbʋ.

21. Sɩnʋʋ mbʋ lʋlɩyaa pɩzɩɣ nɛ paɖaŋ Yehowa cɔlɔ?

²¹ Nabʋyʋ taa, lʋlɩyaa pɩzɩɣ nɛ pamaɣzɩ se pɩkɩlɩ kaɖɛ se pawɩlɩ pe-piya tɔm, ɛlɛ piya kɛ kʋjɔʋ ŋgʋ kɩlɩnɩ Yehowa cɔlɔ yɔ. Ɛsɔɔlɩ paa ɛzɩmtaa se ɛsɩnɩ-wɛ. Ewelisiɣ adɩma wena lʋlɩyaa lakɩ yɔ faaa. Nɛ ɛtɩŋɩɣnɩ Bibl, ɖɛ-ɛgbɛyɛ takayɩsɩ, kɩɖaŋ nɛ lɔŋ tasʋʋ mbʋ ɛgbɛyɛ taa lʋlɩyaa mba pɛwɛ niye yɔ pahaɣ yɔ ɩ-yɔɔ nɛ ecosuu adɩma ana a-yɔɔ.

22. Mbʋ pɩkpaɖɩ ɖeu nɛ lʋlɩyaa pɩzɩɣ nɛ paha pe-piya yɔ, pɩ-taa nabʋyʋ lɛ ɛbɛ?

²² Ɛyaa nabɛyɛ yɔɔdʋʋ se pɩɣa yɔɔ cɔnʋʋ kpakɩɣ pɩnzɩ 20, ɛlɛ lʋlɩyaa kaɣ kɛʋ lʋlɩyaa mbʋ tam. Mbʋ pɩkpaɖɩ ɖeu nɛ papɩzɩɣ paha pe-piya yɔ pɩ-taa nabʋyʋ lɛ sɔɔlɩm, alɩwaatʋ, nɛ falɩsʋʋ mbʋ pɩlɩnɩ Bibl taa yɔ. Ɛzɩma pɩɣa nakɛyɛ kaɣ mʋʋ falɩsʋʋ mbʋ yɔ, pɩkaɣ wɛʋ ndɩ nɛ ɛzɩma lɛɛka mʋʋ-pʋ yɔ. Paa mbʋ yɔ, lʋlɩyaa mba pɔsɔɔlɩ Yehowa yɔ, pɔcɔnɩ piya nzɩ sɩ-yɔɔ yɔ, pɩlakɩ sɩ-taa sakɩyɛ ɛzɩ pɩlakʋʋ koobu halɩñɩnʋ weyi payaɣ se Joanna Mae nɛ ɛwɛ Aazii hɔɔlʋʋ taa yɔ. Ɛyɔɔdaa se: “Mamaɣzɩɣ falɩsʋʋ mbʋ mamʋ ma-lʋlɩyaa cɔlɔ yɔ pɩ-yɔɔ lɛ, mɛwɛnɩ ɛsɩmɩyɛ siŋŋ se pasɩɣzɩ-m lɔŋ nɛ pawɩlɩ-m se mɔnsɔɔlɩ Yehowa. Pɩtɩkɛ wezuu ɖeke paha-m, paha-m ɖɔɖɔ wezuu ŋgʋ kɩwɛnɩ tɔbʋʋ nɩʋ yɔ.” (Adu. 23:24, 25) Mbʋ ɖɔɖɔ pɩlakɩ ɖo-koobiya miiliyɔɔwaa sakɩyɛ.