Feŋuu Tilimiye takayɩsɩ nzɩ sɩlɩ pɩnaɣ kanɛ yɔ, ŋkalɩ-sɩ camɩyɛ na? Ye ŋkalɩ-sɩ camɩyɛ yɔ, maɣzɩ nɛ ŋna se ŋpɩzɩɣ nɛ ŋcosi tɔm pɔzʋʋ pʋnɛ pɩ-yɔɔ:

Lɩmaɣza wena pɩwɛɛ se ɖɩwɛɛnɩ Krɩstʋ ñɩma patam numwaa yɔɔ?

Ðɩsaŋ-wɛ pe-tisuu yɔɔ; ɛlɛ paa mbʋ yɔ ɖɩɩɖɛlɩsɩɣ niye alɩwaatʋ ndʋ ɖɩsaŋ-wɛ yɔ. Ðɩtɩsɔɔlɩ se ‘ɖɩkɩlɩ sam lalaa.’ (Yud. 16, pɩ-tɛɛ tɔm.) Ðɩɩpɔzʋʋ-wɛ tɔm lidaʋ ŋgʋ pɛwɛna yɔ kɩ-yɔɔ.—w20.01, h. 29.

Ɛbɛ pɩwɛɛ se piyele nɛ ña-taa tɛ se Yehowa maɣzɩɣ ñɔ-yɔɔ?

Bibl wɩlɩɣ se pʋcɔ nɛ palʋlʋʋ-ŋ lɛ, ɛtɛmɩ-ŋ sɩm. Nɛ ewelisiɣ ña-adɩma. Ɛsɩm ndʋ ŋmaɣzɩɣ yɔ nɛ ɛsɩm mbʋ pɩwɛ ña-laŋɩyɛ taa yɔ, nɛ mbʋ ŋlakɩ yɔ, pɩpɩzɩɣ nɛ pɩɖʋ-ɩ ɖɩwɩzɩyɛ yaa pɩha-ɩ taa leleŋ. (3 Aw. 28:9; Adu. 27:11) Ɛhɔmɩ-ŋ nɛ ɛkɔnɩ ɛ-cɔlɔ.—w20.02, h. 12.

Kɩɖaŋ weyi wɩlɩɣ alɩwaatʋ ndʋ pɩwɛɛ se ɖɩyɔɔdɩ nɛ alɩwaatʋ ndʋ pɩwɛɛ se ɖisu yɔ?

Ðɩyɔɔdʋʋ Yehowa yɔɔ tɔm nɛ taa leleŋ. Ye ɖɩnawa se nɔɔyʋ kpaɣ nʋmɔʋ kɩdɛkɛdʋʋ nakʋyʋ yɔ, ɖɩyɔɔdʋʋ. Ye pɩpɔzʋʋ yɔ, ɛzʋtʋyaa yɔɔdʋʋ se patasɩ lɔŋ. Ajɛɛ wena a-taa paɖɩɣ ɖɛ-Ɛsɔ sɛtʋ tʋma nʋmɔʋ yɔ, ɖɩɩyɔɔdʋʋ ɛzɩma palakɩ ɖɛ-Ɛsɔ sɛtʋ peeɖe yɔ (yaa ɖɩɩpɔzʋʋ tɔm pɩ-yɔɔ ɖɔɖɔ.) Ðiikuluu mɛsaɣ tɛɛ tɔm yɔɔ.—w20.03, h. 20-21.

Ɛzɩma tɩyɛ kudoloŋ ŋgʋ kɩtɔm pɔyɔɔdɩ Yowɛɛlɩ ñʋʋ 2 taa yɔ kɩwɛ ndɩ nɛ ŋgʋ kɩ-tɔm pɔyɔɔdɩ Natʋ ñʋʋ 9 taa yɔ?

Yowɛɛlɩ 2:20–3:2 yɔɔdʋʋ se Ɛsɔ ɖɔɔnɩ kudoloŋ nɛ ɛla tamaɣ se ɛhɛyɩɣ mbʋ kɩwɛɛkaa yɔ pi-lone taa. Pʋwayɩ lɛ, Ɛsɔ pɩyɩɣ e-fezuu. Natʋ tɔm ndʋ tɩlaba alɩwaatʋ ndʋ Babilɔɔnɩ ñɩma yoni Izrayɛɛlɩ yɔ nɛ pʋwayɩ ɖɔɖɔ. Natʋ 9:1-11 kpaɣ ɖa-alɩwaatʋ taa patam numwaa nɛ kɩmaɣzɩnɩ kudoloŋ. Posusuu ɛjaɖɛ kɩdɛkɛdɩyɛ ɖɩnɛ Ɛsɔ nɩŋgbaŋʋʋ hɔm tɔm nɛ pɩcɛyɩɣ mba paɖʋʋ-ɖɩ nesi yɔ siŋŋ.—w20.04, h. 3-6.

Akɛ hayo kiŋ wiyaʋ sɔnɔ?

Rusii nɛ ajɛɛ wena aɖʋʋ-kʋ nesi yɔ. Pakaɖɩnɩ Ɛsɔ samaɣ kaɣlaa, paɖɩɣ nʋmɔʋ ɖɔ-tɔm susuu tʋmɩyɛ nɛ papaɖɩ koobiya. Hayo kiŋ wiyaʋ nɛ hadɛ kiŋ wiyaʋ pɛwɛɛ nɛ poyouni ɖama.—w20.05, h. 13.

Wɛtʋ nakʋ ndʋ tɩ-tɔm pɔyɔɔdɩ Galaatii mba 5:22, 23 taa yɔ, ti-ɖeke tɩkɛnɩ wɛtʋ ndʋ pɛkpɛndaa nɛ payaa se “piye nɖɩ fezuu lʋlʋʋ yɔ”?

Aayɩ. Fezuu kiɖeɖeu sɩɣnɩ-ɖʋ se ɖɩwɛɛnɩ wɛtʋ kɩbandʋ lɛɛtʋ ɛzɩ siɣsiɣ wɛtʋ mbʋ yɔ. (Efɛz. 5:8, 9)—w20.06, h. 17.

Ye ŋɖʋʋ ño-fotonaa yaa ñɔ-yɔɔ tɔm lɛɛtʋ réseaux sociaux waa yɔɔ yɔ, kala wena ŋpɩzɩɣ nɛ ŋkatɩ yɔ a-taa naɖɩyɛ lɛ nɖɩ?

Ñɔ-yɔɔ tɔm ndʋ ŋɖʋʋ réseaux sociaux waa yɔɔ yɔ, tɩpɩzɩɣ tiyele nɛ ɛyaa maɣzɩ se ŋfɛyɩnɩ tɩ luzuu ɛlɛ ŋkpazɩɣ ña-tɩ.—w20.07, h. 6-7.

Ɛbɛ tɔm susuyaa pɩzɩɣ nɛ pɛkpɛlɩkɩ kpakpasɩ kpayaa mba pɛwɛ niye yɔ pɔ-cɔlɔ?

Palakɩ tʋmɩyɛ alɩwaatʋ ndʋ tɩ-yɔɔ papɩzɩɣ nɛ pehiɣ kpakpasɩ yɔ nɛ ɖenɖe papɩzɩɣ nɛ pehiɣ-sɩ yɔ. Pafalɩsɩ pa-tɩ se palabɩnɩ tʋmɩyɛ wondu ndʋ tɩmʋnaa yɔ. Palakɩ tʋmɩyɛ nɛ abalɩtʋ alɩwaatʋ ndʋ ɛsɔdaa wɛtʋ lɛɣzɩɣ yɔ. Ðɩpɩzɩɣ nɛ ɖɩla mbʋ ɖɔɖɔ ɖɔ-tɔm susuu taa.—w20.09, h. 5.

Nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩsɩnɩ ɖe-Bibl kpɛlɩkɩyaa nɛ pakpazɩ ɖoŋ sɔɔlɩm mbʋ pɛwɛnɩ Yehowa yɔɔ yɔ ɩ-taa nɩɩyɩ lɛ weyi?

Ðɩpɩzɩɣ ɖiseɣti-wɛ se pakalɩɣ Bibl paa ɖooye nɛ pamaɣzɩɣ tɔm ndʋ pakalaa yɔ tɩ-yɔɔ. Nɛ ɖɩpɩzɩɣ nɛ ɖɩkpɛlɩkɩ-wɛ adɩma labʋ.—w20.11, h. 4.

Mba tɔm pɔyɔɔdaa se “pakaɣ pe-kpeekpe haʋ wezuu Krɩstʋ taa”?—1 Kɔr. 15:22.

Tɔm ndʋ apostoloo Pɔɔlɩ yɔɔdaa yɔ, tɩɩwɩlɩɣ se pakaɣ fezuu ɛyaa kpeekpe. Krɩstʋ ñɩma patam numwaa tɔm ɛwɛɛ nɛ ɛyɔɔdʋʋ, mba papɩsɩ-wɛ “kele kele tɩnaa Krɩstʋ Yesu taa yɔ.” (1 Kɔr. 1:2; 15:18)—w20.12, h. 5-6.

Pɛlɛɣzɩɣ patam numwaa “ɛzɩ ɛsɩyɛ piɖuu yɔ, alɩwaatʋ ndʋ payaɣ kɛdɛzaɣ ɛgandɩyɛ yɔ” nɛ pɩtɛ lɛ, ɛbɛ pakaɣ labʋ?—1 Kɔr. 15:51-53.

Pa nɛ Krɩstʋ pakaɣ ɖiyuu ɛyaa nɛ ñɩɣyʋʋ ɖaʋ. (Natʋ 2:26, 27)—w20.12, h. 12-13.