Aayɩ, Bibl yaa caanaʋ taa tɔm takayɩsɩ tɩyɔɔdɩ se pamɩyɩsɩ Krɩstʋ ñɩma lɩm ɛyaa mba pasɩba yɔ pa-hɩɖɛ taa.

Ɛzɩma pɛɖɛzɩ mayaɣ ŋga Biblwaa sakɩyɛ taa yɔ, piyeba nɛ ɛyaa nabɛyɛ maɣzɩɣ se pamɩyɩsɩ lɩm kajalaɣ Krɩstʋ ñɩma ɛyaa mba pasɩba yɔ pa-hɩɖɛ taa. Kɩɖaʋ nakʋyʋ yɔ; Biblwaa nabɛyɛ yɔɔdaa se: “Lɛɛlɛɛyɔ ye sɩɖaa femtu ɛfɛyɩ, ɛzɩma ɛyaa mba pamɩyɩsɩ-wɛ lɩm sɩɖaa hɩɖɛ taa yɔ pakaɣ labʋ?”

Ɛlɛ, na tɔm ndʋ Bibl taa tazɩyaa naalɛ nabɛyɛ yɔɔdaa yɔ. Gregory Lockwood yɔɔdaa se nabʋyʋ fɛyɩ Bibl taa yaa caanaʋ taa tɔm takayɩsɩ taa nɛ pɩwɩlɩɣ se pamɩyɩsɩ nɔɔyʋ lɩm sɩɖʋ nɔɔyʋ hɩɖɛ taa. Gordon Donald Fee mawa se: “Kɩɖaʋ nakʋyʋ fɛyɩ Bibl taa yaa caanaʋ taa tɔm takayɩsɩ taa nɛ kɩwɩlɩɣ se pamɩyɩsɩ nɔɔyʋ lɩm sɩɖaa hɩɖɛ taa. Ɛyɔɔdaa se patɩyɔɔdɩ Nɔɔ Haʋ Kɩfam Bibl taa kpa se palabɩ mbʋ, nɛ nabʋyʋ fɛyɩ nɛ pɩwɩlɩɣ se kajalaɣ Krɩstʋ ñɩma taa nɔɔyʋ labɩ mbʋ yaa se coocinaa mba palɩ apostoloowaa sɩm wayɩ kpaagbaa yɔ palabɩ mbʋ kpa.”

Bibl yɔɔdʋʋ se pɩwɛɛ se Yesu wayɩ tɩŋɩyaa “ɩla ajɛɛ tɩŋa taa ɛyaa nɛ papɩsɩ tɔmkpɛlɩkɩyaa, [pamɩyɩsɩ-wɛ lɩm nɛ pawɩlɩ-wɛ] nɛ pɔɖɔ tɔm ndʋ payɩ” ɛwɩlaa yɔ tɩ-yɔɔ. (Mat. 28:19, 20) Pʋcɔ nɛ nɔɔyʋ pɩsɩ tɔmkpɛlɩkɩyʋ weyi pamɩyɩsɩ-ɩ lɩm yɔ lɛ, pɩwɛɛ se ɛtɩlɩ Yehowa nɛ ɛ-Pɩyalʋ pɔ-yɔɔ tɔm, ɛwɛɛnɩ tisuu pɔ-yɔɔ nɛ ɛñam-wɛ. Ɛyʋ weyi ɛtɛm sɩbʋ nɛ ɛwɛɛ pɩlaʋ taa yɔ, ɛɛpɩzɩɣ nɛ ɛla mbʋ, nɛ Krɩstʋ ñɩma mba pɛwɛ wezuu yɔ, pa-taa nɔɔyʋ ɛɛpɩzɩɣ nɛ ɛla mbʋ e-lone taa.—Ekl. 9:5, 10; Yoh. 4:1; 1 Kɔr. 1:14-16.

Ye mbʋ, suwe Pɔɔlɩ ñɩnaɣ yɔɔdʋʋ?

Kɔrɛntɩ ñɩma nabɛyɛ yɔɔdaɣ se paakaɣ sɩɖaa fezuu. (1 Kɔr. 15:12) Pɔɔlɩ yeba nɛ patɩlɩ se pɩkɛ cɛtɩm. Ɛzɩma tɩyɛ? Ɛyɔɔdaa se ‘paa kɩyakʋ ŋgʋ ɛwɛ sɩm nɔɔ taa.’ Paa mbʋ yɔ, ɛɛwɛ wezuu. Ɛlɛ paa ɛkatɩ kala sakɩyɛ yɔ, ɛ-taa kaatɛma se ɛ-sɩm wayɩ lɛ, pakaɣ-ɩ fezuu se ɛcaɣ wezuu ɛsɔdaa ɛzɩ Yesu yɔ.—1 Kɔr. 15:30-32, 42-44.

Pɩɩwɛɛ se Kɔrɛntɩ mba ɩnɩɩ pɩ-taa se ɛzɩma pɛkɛ Krɩstʋ ñɩma patam numwaa yɔ pʋyɔɔ lɛ, pakaɣ kala katʋʋ paa ɖooye nɛ pasɩ pʋcɔ nɛ papɩzɩ pefezi-wɛ. Pʋyɔɔ lɛ alɩwaatʋ ndʋ “[pamɩyɩsɩɣ-wɛ] Krɩstʋ Yesu taa” yɔ, pɩwɩlɩɣ ɖɔɖɔ se “[pamɩyɩsɩ-wɛ] ɛ-sɩm taa.” (Roma 6:3) Pɩwɩlɩɣ se ɛzɩ Yesu yɔ, pakaɣ katʋʋ kala nɛ pasɩ se pɩsa nɛ pefezi-wɛ nɛ pakpa ɛsɔdaa.

Pamɩyɩsɩ Yesu lɩm nɛ pɩcɛzɩ pɩnzɩ naalɛ lɛ, eheyi ɛ-apostoloowaa taa naalɛ se: “Lɩm mbʋ peɖiɣni-m mɩyɩsʋʋ yɔ, pakaɣ-mɩ pʋ mɩyɩsʋʋ.” (Mark. 10:38, 39) Pɩtɩkɛ lɩm maɣmaɣ taa paawɛɛ nɛ pamɩyɩsɩɣ Yesu. Ɛñɩnaɣ yɔɔdʋʋ se ɛzɩma ɛkaɣ ɖɔkʋʋ ɛ-cɩŋgɩlɩm wɛtʋ yɔ, pɩkaɣ yebu nɛ pakʋ-ɩ. Pɔɔlɩ mawa se patam numwaa nɛ Krɩstʋ ‘pakaɣ kpɛndʋʋ nɛ pɔtɔɔ kʋñɔŋ se pɩsa nɛ pɛkpɛndɩ pa nɛ ɩ nɛ pasam-wɛ ɖɔɖɔ.’ (Roma 8:16, 17; 2 Kɔr. 4:17) Ye mbʋ, pɩwɛɛ se paba ɖɔɖɔ pasɩ nɛ pefezi-wɛ nɛ pacaɣ wezuu ɛsɔdaa.

Ye mbʋ, papɩzɩɣ nɛ pɛɖɛzɩ tɔm ndʋ Pɔɔlɩ yɔɔdaa yɔ ɖeyi ɖeyi se: “Ye pɩtaakɛ mbʋ yɔ, mba peɖiɣni-wɛ lɩm mɩyɩsʋʋ se pɩsa nɛ papɩsɩ sɩɖaa yɔ, ɛbɛ pakaɣ labʋ? Ye paafeziɣ sɩɖaa kaaʋ yɔ, ɛbɛ yɔɔ ɖɔɖɔ peɖiɣni-wɛ lɩm mɩyɩsʋʋ se papɩsɩ mbʋ?”