Alɩwaatʋ ndʋ Yehowa heyi ɛyaa se ‘pawadɩ tɛtʋ yɔɔ nɛ pañazɩ-tʋ’ yɔ, ɛwɩlaa se alɩwaatʋ kaaɖɛɣ lɛ tɛtʋ kpeekpe kaɣaɣ pɩsʋʋ paradisuu. (Kiɖe 1:28) Mba pakaɣ mʋʋ tɛtʋ se tɩpɩsɩ pa-ñɩm yɔ, pɩkaɣ pɔzʋʋ se pala mbʋ Yehowa kaapɔzɩ ɛyaa kiɖe tɛɛ se pala yɔ. Tɛtʋ ɛɛkaɣ kɛʋ paradisuu kiɖe tɛɛ kpaagbaa mbʋ pʋyɔɔ yɔ Edɛɛnɩ kaɖaɣ tɩtasɩ wɛʋ. Armaagedɔɔ ñɩtɩɣ nɛ kɩtɛ lɛ, pɩkaɣ pɔzʋʋ se pala tʋma sakɩyɛ nɛ pɔñɔɔzɩ tɛtʋ yɔɔ hɔɔlɩŋ weyi ɩwɛɛkɩ lɛɛlɛɛyɔ yɔ nɛ ɩwɛɛ cɩɖɩ cɩɖɩ. Pɩtʋʋ fɛyɩ se pɩɩkaɣ kɛʋ tʋmɩyɛ cikpeɖe.

Pɩtɔzʋʋ-ɖʋ tʋmɩyɛ nɖɩ pɩɩpɔzaa se Izrayɛɛlɩ mba ɩla alɩwaatʋ ndʋ palɩnɩ yomiye taa Babilɔɔnɩ nɛ papɩsɩ pɛ-tɛ yɔ ɖɩ-yɔɔ. Pɩnzɩ 70 ɖɛwa nɔɔyʋ tɩcaɣ pɛ-tɛtʋ taa. Ɛlɛ Izaayii kaayɔɔdaa se Yehowa kaɣ-wɛ sɩnʋʋ nɛ pɔñɔɔzɩ pɛ-tɛtʋ nɛ tɩɖaɣnɩ wɛʋ kajʋka. Natʋ tɔm ndʋ tɩtɔŋaɣ se: «Ɛpɩsɩɣ ɛ-lakʋ Edɛɛnɩ nɛ ɛpɩsɩɣ ɛ-kadaɣ ɛzɩ Kɩbaɣlʋ kajaɣ yɔ.» (Iza. 51:3) Izrayɛɛlɩ mba pɩzaa nɛ pala mbʋ. Mbʋ ɖɔɖɔ, Yehowa kaɣ  sɩnʋʋ mba pakaɣ mʋʋ tɛtʋ se tɩpɩsɩ pa-ñɩm yɔ nɛ pɔñɔɔzɩ-tʋ nɛ tɩpɩsɩ paradisuu. Nɛ halɩ sɔnɔ sɔnɔ, ŋpɩzɩɣ nɛ ŋwɩlɩ se ŋsɔɔlaa se ŋɖʋ nesi tʋmɩyɛ nɖɩ.

Nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋla mbʋ yɔ ɩ-taa nakʋyʋ lɛ se pɩwɛɛ se ŋla mbʋ ŋpɩzɩɣ yɔ nɛ ŋyele nɛ ña-ɖɩɣa taa nɛ kɔ-hɔɔlɩŋ yɔɔ wɛɛ cɩɖɩ cɩɖɩ nɛ pɩtɩŋa pɩwɛɛ pi-lona taa. Ŋpɩzɩɣ nɛ ŋla mbʋ paa ñɔ-cɔlɔ mba ɩɩlakɩ mbʋ yɔ. Ŋpɩzɩɣ ɖɔɖɔ nɛ ŋɖʋ nesi nɛ pɔcɔnɩ ñe-egeetiye taa Kewiyaɣ Kpaaŋ nɛ Kigbeɣluu Kpaaŋ yɔɔ nɛ pɔñɔɔzɩ ɩ-taa nɛ ɩwɛɛ cɩɖɩ cɩɖɩ. Ye ñɛ-wɛtʋ ɛhaɣ-ŋ nʋmɔʋ yɔ ŋpɩzɩɣ ɖɔɖɔ nɛ ŋha ña-tɩ faaa se ŋɖʋʋ nesi alɩwaatʋ ndʋ asɛyʋ nakʋyʋ lakɩ ñe-egeetiye taa yɔ. Ye ŋlabɩ mbʋ yɔ pɩtʋʋ fɛyɩ se ŋwɩlɩɣ se ŋsɔɔlaa se ŋɖʋ nesi ye pɩpɔzʋʋ se pasɩnɩ ɖoli yɔ. Pɔzɩ ña-tɩ se: ‘Ɛzɩ manpɩzɩɣ nɛ mañaɣ pana nɛ mɛwɛɛ niye hɔɔlɩŋ ndɩ ndɩ nɩɩyɩ taa se pɩsa nɛ malabɩnɩ-ɩ tʋmɩyɛ ye Yehowa ɛkɔm nɛ ɛha-m waɖɛ se mamʋ tɛtʋ nɛ tɩpɩsɩ ma-ñɩm yɔ?’

Yesu fezi Yayiruusi pɛlɛ lɛ, ɛpɔzɩ kpaagbaa se pɩpɔzʋʋ se paha-ɩ nabʋyʋ nɛ ɛtɔɔ. (Mark. 5:42, 43) Pɩtɩla, pɩtaakɛ tʋmɩyɛ sɔsɔɖɛ se pɔcɔnɩ halɩbɩɣa ŋga kɔ-yɔɔ, kaawɛnɩ pɩnzɩ 12. Ɛlɛ alɩwaatʋ ndʋ Yesu yeki se tamaɣ ŋga ɛlaba se «mba payɩ pɛwɛ pɩlaŋ taa yɔ, pakaɣ nɩʋ ɛ-nɔɔ nɛ palɩɩ» yɔ kala yɔ, maɣzɩ nɛ ŋna tʋmɩyɛ sɔsɔɖɛ nɖɩ pɩkaɣ pɔzʋʋ se ɖɩla yɔ. (Yoh. 5:28, 29) Bibl tɩyɔɔdɩ tɔm sakɩyɛ pɩlɩɩnɩ tʋmɩyɛ nɖɩ ɖɩkaɣ labʋ yɔ ɖɩ-yɔɔ. Paa mbʋ yɔ, ɖɩmaɣzɩɣ se pɩtɩla pɩkaɣ pɔzʋʋ se ɖɩsɩnɩ mba pakaɣ-wɛ fezuu yɔ nɛ pɛwɛɛnɩ tɔɔnaɣ, ɖɩzʋyɛ nɛ wondu kususutu. Sɔnɔ sɔnɔ, ŋpɩzɩɣ nɛ ŋwɩlɩ se ŋsɔɔlaa se ŋñɔɔzɩ ña-tɩ nɛ ŋsɩna? Yele nɛ ɖɩna tɔm pɔzʋʋ mbʋ pɩ-yɔɔ pɩwɛɛ se ŋmaɣzɩ yɔ pɩ-taa nabʋyʋ.

Alɩwaatʋ ndʋ posusuu se egeetiye yɔɔ cɔnɩyʋ kaɣ kilimuu mɩ-ɛgbɛyɛ yɔɔ yɔ, ŋtisiɣ faaa se ŋmʋ-ɩ nɛ ña nɛ ɩ ɩtɔɔ tɔɔnaɣ na? Ye pɔpɔzɩ alɩwaatʋ tɩŋa Ɛsɔ sɛtʋ tʋmlaɖʋ nɔɔyʋ se eyele Betɛɛlɩ tʋmɩyɛ nɛ ɛɖʋ nesi tɔm susuu tʋmɩyɛ yaa ye egeetiye yɔɔ cɔnɩyʋ nɔɔyʋ ɛtɛm ɛ-tʋmɩyɛ, ŋtisiɣ faaa se ŋsɩnɩ-ɩ nɛ ehiɣ ɖɩzʋyɛ na? Ye palabɩ ɖʋtʋ se palakɩ kigbeɣluu sɔsɔʋ yaa ŋgee kigbeɣluu nakʋyʋ ñe-egeetiye taa, ŋpɩzɩɣ ŋha ña-tɩ faaa nɛ ŋɖʋ nesi tʋma wena palakɩ pʋcɔ nɛ kigbeɣluu paɣzɩ yaa kigbeɣluu tɛŋ lɛ? Yaa ŋpɩzɩɣ nɛ ŋha ña-tɩ nɛ ŋmʋ agɔma na?

Ɛzɩ Tʋma Labʋ 24:15 yɔɔdʋʋ yɔ ɖɩɖaŋaa se pakaɣ fezuu ɛyaa miiliyaarɩwaa sakɩyɛ. Ɛyaa mba pakaɣ-wɛ fezuu yɔ, pa-taa sakɩyɛ taahiɣ waɖɛ se pɛkpɛlɩkɩ nɛ patɩlɩ Yehowa pʋcɔ nɛ pasɩkɩ. Pefeziɣ-wɛ nɛ pɩtɛ lɛ, pakaɣ-wɛ haʋ waɖɛ se pala mbʋ. a Ɛsɔ sɛyaa siɣsiɣ tɩnaa kaɣ ɖʋʋ nesi tɔm wɩlʋʋ tʋmɩyɛ nɖɩ. (Iza. 11:9) Payaɣ koobu halɩñɩnʋ nɔɔyʋ se Charlotte. Esusi tɔm Erɔɔpɩ, Amerika Hadɛ Kiŋ, nɛ Afrika. Ɛɖaŋ kpam se ɛɖʋ nesi tɔm wɩlʋʋ tʋmɩyɛ nɖɩ. Ɛyɔɔdɩnɩ taa leleŋ se: «Manɖaŋ kpam se mawɩlɩ ɛyaa tɔm sɩɖaa femtu alɩwaatʋ taa. Alɩwaatʋ ndʋ mankalɩɣ caanaʋ taa ɛyʋ nɔɔyʋ yɔɔ tɔm yɔ, ɖoŋ ɖoŋ lɛ mamaɣzɩɣ se: ‘Ye ɛyʋ ɛnʋ ɛɛtɩlɩ Yehowa yɔ e-wezuu caɣʋ pɩzaɣ se kɩwɛɛ ndɩ kpem.’ Manɖaŋ kpam se mawɩlɩ mba pakaɣ-wɛ fezuu yɔ Yehowa yɔɔ tɔm nɛ ɛzɩma pe-wezuu caɣʋ kaɣ wɛʋ ɖeu ye palɩzaa se pɛsɛɣ-ɩ yɔ pɩ-tɔm.»

Halɩ Yehowa sɛyaa siɣsiɣ tɩnaa mba paacaɣ wezuu pʋcɔ nɛ Yesu kɔŋ tɛtʋ yɔɔ yɔ, tɔm sakɩyɛ wɛɛ se pakaɣ kpɛlɩkʋʋ. Danɩyɛɛlɩ kaama natʋ tɔm ndɩ ndɩ, ɛlɛ ɛtaanɩɩ tɩ-tɔbʋʋ. Maɣzɩ nɛ ŋna ɛzɩma pɩkaɣ-ɖʋ kɛnʋʋ taa leleŋ nɛ hɩɖɛ ɖʋʋ se ɖɩsɩnɩ-ɩ nɛ ɛtɩlɩ ɛzɩma natʋ tɔm ndʋ tɩlaba yɔ. (Dan. 12:8) Yaa maɣzɩ nɛ ŋna ɛzɩma ɖa-taa kaɣ labʋ leleŋ se ɖɩsɩnɩ Ruti nɛ Nawomii nɛ pana se pɔ-hɔʋ wɛ hɔŋ weyi ɩ-taa Mesiya lɩnaa yɔ ɩ-taa yɔ. Ða-taa kaɣ labʋ leleŋ siŋŋ se ɖɩɖʋ nesi ɛjaɖɛ kpeekpe yɔɔ tɔm wɩlʋʋ tʋmɩyɛ nɖɩ. Nɛ pʋbʋ taa lɛ, ɛjaɖɛ kɩdɛkɛdɩyɛ ɖɩnɛ ɖɩ-yɔɔ mbʋ pɩhaɣ-ɖʋ nɩɣzɛ nɛ pɩkɛzɩɣ ɖa-lɩmaɣza yɔ pɩɩkaɣ tasʋʋ wɛʋ!

Sɔnɔ sɔnɔ, ɛzɩma ŋpɩzɩɣ nɛ ŋwɩlɩ se ŋsɔɔlaa se ŋɖʋ nesi tɔm wɩlʋʋ tʋmɩyɛ nɖɩ? Nʋmɔŋ weyi ɩ-yɔɔ ŋpɩzɩɣ ŋtɩŋna nɛ ŋla mbʋ yɔ ɩ-taa nakʋyʋ lɛ se pɩwɛɛ se ŋñaɣ pana nɛ ŋwɛɛ niye tɔm wɩlʋʋ taa nɛ pɩkɩlɩ nɛ ŋɖʋʋ nesi ɛjaɖɛ kpeekpe yɔɔ tɔm susuu tʋmɩyɛ nɖɩ pɛwɛ nɛ palakɩ yɔ ɖoŋ ɖoŋ. (Mat. 24:14) Sɔnɔ paa akpadɩyɩtʋ yaa wɛtʋ lɛɛtʋ eyeba nɛ ŋŋpɩzɩɣ nɛ ŋsusuu tɔm ɛzɩ ŋsɔɔlʋʋ yɔ, ye ŋwobi pɩ-yɔɔ nɛ ŋñakɩ pana yɔ, ŋwɩlɩɣ se ŋsɔɔlɩ siŋŋ se ŋwɩlɩ tɔm mba pakaɣ-wɛ fezuu yɔ.

Tɔm pɔzʋʋ mbʋ pɩkɔŋ yɔ pɩ-tɔm cɛyaa nɛ pɩwɛɣ ɖeu se ɖɩmaɣzɩ pɩ-yɔɔ. Toovenim taa lɛ, ŋɖaŋ kpam se ŋmʋ tɛtʋ nɛ tɩpɩsɩ ña-ñɩm na? Ŋɖaŋ kpam se ŋñɔɔzɩ tɛtʋ nɛ tɩpɩsɩ paradisuu nɛ ŋcɔnɩ mba pakaɣ-wɛ fezuu yɔ pa-kɩcɛyɩm ɖeɖe nɛ ŋwɩlɩ-wɛ tɔm na? Sɔnɔ, ye ŋtɩŋɩɣnɩ wala wena payɩ ŋhikiɣ yɔ a-yɔɔ nɛ ŋɖʋʋ nesi tʋma wena anɩɣzɩnɩ wena ŋkaɣ labʋ alɩwaatʋ ndʋ ŋmʋʋ tɛtʋ se tɩpɩsɩ ña-ñɩm yɔ, ŋwɩlɩɣ se ŋñɔɔzɩ ña-tɩ!