1. Pɩɩkazɩ pazɩ se Yesu ɛsɩ lɛ, tɔm ndʋ eheyi kɩdɛkɛdɩm laɖʋ weyi ɛɛwɛ ɛ-cɔlɔ yɔ? (Luka 23:39-43)

 YESU nɛ kɩdɛkɛdɩm laɖaa naalɛ mba paakam ɛ-cɔlɔ yɔ, panɩɣaɣ siziŋ alɩwaatʋ ndʋ pasɩkaɣ yɔ. (Luka 23:32, 33) Kɩdɛkɛdɩm laɖaa mba pa-naalɛ paawɛɛ nɛ pɔyɔɔdʋʋ tɔm kɩdɛkɛdɩtʋ Yesu yɔɔ. Ye mbʋ, pɩwɩlɩɣ kpayɩ kpayɩ se pataakɛ Yesu tɔmkpɛlɩkɩyaa. (Mat. 27:44; Mark. 15:32) Ɛlɛ pa-taa kʋɖʋm kɔm nɛ ɛlɛɣzɩ ɛ-wɛtʋ. Ɛyɔɔdaa se: «Yesu, tɔzɩ mɔ-yɔɔ alɩwaatʋ ndʋ ŋsʋʋ ñe-Kewiyaɣ taa yɔ.» Yesu cosi-i se: «Toovenim taa lɛ sɔnɔ meheyiɣ-ŋ se, ma nɛ ŋ ɖɩkaɣ wɛʋ Paradisuu taa.» (Kalɩ Luka 23:39-43.) Tɔm natʋyʋ fɛyɩ Bibl taa nɛ tɩwɩlɩɣ se tɔm ndʋ Yesu susi «ɛsɔdaa Kewiyaɣ» yɔɔ yɔ, kɩdɛkɛdɩm laɖʋ ɛnʋ eetisi tɩ-yɔɔ. Nɛ Yesu tɩyɔɔdɩ kpa se abalʋ ɛnʋ ɛkaɣ wɛʋ Kewiyaɣ ŋga ka-taa ɛsɔdaa. (Mat. 4:17) Cee wayɩ Paradisuu ŋgʋ kɩkaɣ wɛʋ tɛtʋ yɔɔ yɔ kɩ-tɔm Yesu yɔɔdaɣ. Ɛbɛ yɔɔ ɖɩpɩzɩɣ nɛ ɖɩyɔɔdɩ mbʋ?

2. Ɛbɛ wɩlɩɣ se kɩdɛkɛdɩm laɖʋ weyi ekpiɖaa yɔ ɛkɛ Yuuda tʋ?

² Kɩdɛkɛdɩm laɖʋ weyi ekpiɖaa yɔ ɛkɛɣnɩ Yuuda tʋ. Kɩdɛkɛdɩm laɖʋ ɛnʋ eheyi kɩdɛkɛdɩm laɖʋ lɛlʋ se: «Pɔhɔm ña-nɩŋgbaŋʋʋ ɖɔɖɔ ɛzɩ ɛnʋ yɔ, ɛlɛ ŋŋseɣ Ɛsɔ paa ññɩɩ?» (Luka 23:40) Yuuda mba sɛɣaɣ Ɛsɔ kʋɖʋm na, ɛlɛ ajɛɛ lɛɛna taa ɛyaa ñetisaɣ ɛsɔnaa sakɩyɛ yɔɔ. (Ejl. 20:2, 3; 1 Kɔr. 8:5, 6) Ye kɩdɛkɛdɩm laɖaa mba, paakɛ ajɛɛ lɛɛna taa mba yɔ, pɩtɩla kɩdɛkɛdɩm laɖʋ ɛnʋ ɛɛpɔzaa se: «Ŋŋseɣ Ɛsɔnaa paa ññɩɩ?» Pɩtasɩ lɛ, pɩtɩkɛ ajɛɛ lɛɛna taa mba cɔlɔ petiyi Yesu, ɛlɛ «Izrayɛɛlɩ ɖɩɣa taa heŋ kilebiŋ cɔlɔ» petiyi-i. (Mat. 15:24) Ɛsɔ kaayeba nɛ Izrayɛɛlɩ mba tɩlɩ se ɛkaɣ fezuu sɩɖaa. Pɩtɩla, kɩdɛkɛdɩm laɖʋ weyi ekpiɖaa yɔ ɛɛsɩm tɔm ndʋ, nɛ tɔm ndʋ ɛyɔɔdaa yɔ tɩwɩlɩɣ se ɛɛnawa se Yehowa kaɣ fezuu Yesu se ɛtɔɔ kewiyitu Ɛsɔ Kewiyaɣ taa. Pɩwɛ ɛzɩ abalʋ ɛnʋ ɛɛwɛnɩ lidaʋ se Ɛsɔ kaɣ-ɩ fezuu ɖɔɖɔ yɔ.

3. Alɩwaatʋ ndʋ Yesu yɔɔdɩ Paradisuu tɔm yɔ, pɩtɩla ɛbɛ yɔɔ kɩdɛkɛdɩm laɖʋ weyi ekpiɖaa yɔ ɛmaɣzaa? Lɩzɩ pɩ-taa. (Kiɖe Tɛɛ Tɔm 2:15)

 ³ Kɩdɛkɛdɩm laɖʋ weyi ekpiɖaa yɔ ɛkɛ Yuuda tʋ, pʋyɔɔ lɛ pɩtɩla ɛɛsɩm Aɖam nɛ Ɛva pɔ-yɔɔ tɔm nɛ Paradisuu ŋgʋ kɩ-taa Yehowa kaasɩ-wɛ yɔ kɩ-tɔm. Ye mbʋ, pɩtɩla eeɖiɣzinaa se Paradisuu ŋgʋ kɩ-tɔm Yesu yɔɔdaa yɔ, kɩkaɣ kɛʋ kaɖaɣ kɩbaŋa nakɛyɛ tɛtʋ yɔɔ cɩnɛ.—Kalɩ Kiɖe Tɛɛ Tɔm 2:15.

4. Tɔm ndʋ Yesu heyi kɩdɛkɛdɩm laɖaa mba paawɛ ɛ-cɔlɔ yɔ pa-taa lɛlʋ yɔ, pɩwɛɛ se tiseɣti-ɖʋ nɛ ɖɩmaɣzɩ tɔm ndʋ yɔɔ?

⁴ Tɔm ndʋ Yesu heyi kɩdɛkɛdɩm laɖʋ ɛnʋ yɔ, pɩwɛɛ se tiseɣti-ɖʋ nɛ ɖɩmaɣzɩ ɛzɩma wezuu caɣʋ kaɣ wɛʋ Paradisuu taa yɔ pɩ-yɔɔ. Toovenim taa lɛ, laŋhɛzɩyɛ nɖɩ ɖɩɩwɛ Wiyaʋ Salomɔɔ kewiyitu tɔɔʋ alɩwaatʋ taa yɔ, ɖɩpɩzɩɣ ɖɩsɩnɩ-ɖʋ nɛ ɖɩkpɛlɩkɩ tɔm natʋyʋ Paradisuu yɔɔ. Bibl yɔɔdʋʋ se Yesu kɩlɩ Salomɔɔ, pʋyɔɔ lɛ ɖɩpɩzɩɣ nɛ ɖɩɖaŋ se ɛ nɛ mba pakaɣ kewiyitu tɔɔʋ yɔ, pakaɣ kpɛndʋʋ nɛ pala tʋmɩyɛ nɛ peyele nɛ tɛtʋ pɩsɩ Paradisuu. (Mat. 12:42) Pɩnaɣ kpayɩ kpayɩ se pɩpɔzʋʋ se «heŋ lɛɛŋ» taa mba ɩmaɣzɩ mbʋ pɩpɔzʋʋ se pala nɛ pɩsa nɛ pamʋna nɛ pacaɣ wezuu tam Paradisuu taa yɔ pɩ-yɔɔ.—Yoh. 10:16.

5. Ŋmaɣzɩɣ se ɛzɩma wezuu caɣʋ kaɣ wɛʋ Paradisuu taa?

⁵ Ŋmaɣzɩɣ Paradisuu taa wezuu caɣʋ yɔɔ lɛ, ɛbɛ kɔŋ ña-lɩmaɣza taa? Pɩtɩla, ŋmaɣzɩɣ kaɖaɣ kɩbaŋa nakɛyɛ, ŋga kɛwɛ ɛzɩ Edɛɛnɩ kaɖaɣ yɔ kɔ-yɔɔ. (Kiɖe 2:7-9) Pɩtɩla, ŋtɔzʋʋ natʋ tɔm ndʋ Mikee yɔɔdaa yɔ tɩ-yɔɔ. Ɛyɔɔdaa se Ɛsɔ samaɣ taa «paa weyi lɛ ɛkaɣ caɣʋ e-viiñi taa nɛ e-hiyuu tɛɛ, nɛ nɔɔyʋ ɛɛkaɣ-ɩ tɔm caʋ.» (Mik. 4:3, 4) Pɩtɩla, ŋtɔzʋʋ ɖɔɖɔ Bibl masɩ nzɩ sɩyɔɔdʋʋ se tɔɔnasɩ kaɣ tɔyʋʋ yɔ sɩ-yɔɔ. (Keɣa 71:16; Iza. 65:21, 22) Ye mbʋ, ŋpɩzɩɣ ŋmaɣzɩ nɛ ŋna ña-tɩ kaɖaɣ kɩbaŋa nakɛyɛ taa, ŋcaɣ taabɩlɩ nakʋyʋ yɔɔ nɛ tɔɔnasɩ kɩbanzɩ sakɩyɛ wɛ kɩ-yɔɔ. Ŋfeziɣ helim mbʋ yɔ, pɩ-taa nɛ tɩŋ nɛ tɩŋ hɛtʋ sɔzɩŋ fɛmm. Nɛ pɩtɩla ɖɔɖɔ yɔ, ña nɛ ñɔ-hɔʋ taa mba, ña-taabalaa nɛ halɩ pɩkpɛndɩnɩ mba pefezi-wɛ yɔ ɩkpɛndaa ɩcaɣ nɛ ihoŋuu. Pɩtɩŋa payɩ mbʋ yɔ, pɩtɩkɛ ɖoziye yem. Pɩtʋʋ fɛyɩ se pɩtɩŋa payɩ mbʋ yɔ pɩkaɣ labʋ tɛtʋ yɔɔ cɩnɛ. Ɛlɛ Paradisuu taa lɛ, ɖɩkaɣ labʋ ɖɔɖɔ tʋma wena ahaɣ-ɖʋ taa leleŋ yɔ.

6. Tʋma wena ɖɩkaɣ labʋ Paradisuu taa? (Cɔnɩ kɩlɛmʋʋ.)

⁶ Yehowa lɩzɩ-ɖʋ se ɖɩla tʋmɩyɛ nɛ ɖihiɣ taa leleŋ. (Ekl. 2:24) Kɔzɩ kɔzɩ lɛ, Krɩstʋ Pɩnzɩ kudoku kewiyitu tɔɔʋ alɩwaatʋ taa, tʋma sakɩyɛ wɛɛ se ɖɩkaɣ labʋ. Mba pehikiɣ ñʋʋ yabʋ kʋñɔŋ sɔsɔʋ taa nɛ ɛyaa miiliyɔɔwaa sakɩyɛ mba pakaɣ-wɛ fezuu yɔ, pɩkaɣ-wɛ pɔzʋʋ wondu kususutu, tɔɔnaɣ, nɛ ɖɩzʋyɛ. Pɩsa nɛ pɛwɛɛnɩ pɩtɩŋa payɩ mbʋ yɔ lɛ, pɩkaɣ pɔzʋʋ se ɖɩla tʋma sakɩyɛ wena ahaɣ-ɖʋ taa leleŋ yɔ! Pɩɩwɛɛ se Aɖam nɛ Ɛva pahayɩ kaɖaɣ ŋga kaakɛ pa-ɖɩɣa yɔ ka-taa, mbʋ ɖɔɖɔ ɖɩkaɣ wɛnʋʋ waɖɛ se ɖɩñɔɔzɩ tɛtʋ nɛ tɩpɩsɩ Paradisuu. Pakaɣ fezuu ɛyaa miiliyɔɔwaa sakɩyɛ mba pataatɩlɩ tɔm sakɩyɛ Yehowa nɛ ɛ-kaɖʋsɩ pɔ-yɔɔ yɔ, nɛ pɩkaɣ  pɔzʋʋ se pawɩlɩ-wɛ tɔm. Pɩtasɩ lɛ, ɛyaa siɣsiɣ tɩnaa mba paacaɣ wezuu nɛ pɩla alɩwaatʋ sakɩyɛ pʋcɔ nɛ pɩtalɩɣ Yesu alɩwaatʋ taa yɔ, pɩkaɣ pɔzʋʋ se pasɩnɩ-wɛ nɛ pɛkpɛlɩkɩ tɔm sakɩyɛ nɛ pɩkɩlɩ. Maɣzɩ nɛ ŋna ɛzɩma pɩtɩŋa payɩ pɩ-labʋ kaɣ-ɖʋ haʋ taa leleŋ siŋŋ yɔ!

7. Tɔm ndʋ ɖa-taa pɩzɩɣ nɛ pɩtɛmna, nɛ ɛbɛ yɔɔ?

⁷ Ða-taa pɩzɩɣ nɛ pɩtɛ se cee wayɩ Paradisuu taa, ɖɩkaɣ caɣʋ wezuu laŋhɛzɩyɛ taa, ɖɩkaɣ wɛnʋʋ mbʋ payɩ pɩpɔzʋʋ-ɖʋ yɔ, nɛ pɩtɩŋa pɩkaɣ ɖɔm camɩyɛ cɔlɩɩɩ. Ɛbɛ yɔɔ? Mbʋ pʋyɔɔ yɔ, Yehowa tɛm-ɖʋ wɩlʋʋ ɛzɩma wezuu caɣʋ kaɣ wɛʋ ɛ-Pɩyalʋ kewiyitu tɔɔʋ tɛɛ yɔ pɩ-kɩɖaʋ nakʋyʋ. Kɩɖaʋ ŋgʋ lɛ kɛdaɣ ŋga kɔyɔɔdʋʋ Wiyaʋ Salomɔɔ kewiyitu tɔɔʋ tɔm yɔ.

8. Wiyaʋ Daviid ma tɔm ndʋ tɩwɛ Keɣa 36:10, 11, 29 taa yɔ nɛ pɩtɛ lɛ, ɛzɩma tɩlaba? (Kalɩ takayaɣ kanɛ ka-taa tɔm ñʋʋ «Tɔm ndʋ ɖa-takayɩsɩ kalɩyaa pɔzʋʋ yɔ.»)

⁸ Fezuu kiɖeɖeu sɩnɩ Wiyaʋ Daviid nɛ ɛyɔɔdɩ ɛzɩma wezuu caɣʋ kaɣ wɛʋ alɩwaatʋ ndʋ wiyaʋ siɣsiɣ tʋ nɛ lɔŋsɩnɖʋ nɔɔyʋ kaɣ caɣʋ kewiyaɣ kpelaɣ yɔɔ yɔ pɩ-tɔm. (Kalɩ Keɣa 36:10, 11, 29.) Ða nɛ ɛyaa ɖɩlakɩ kɛdaɣ cee wayɩ Paradisuu yɔɔ lɛ, ɖoŋ ɖoŋ lɛ ɖɩkalɩɣ-wɛ Keɣa 36:11. Ðɩwɛnɩ toovenim se ɖɩla mbʋ, mbʋ pʋyɔɔ yɔ Pʋʋ yɔɔ tɔm yɔɔdʋʋ taa, Yesu yɔɔdɩ mayaɣ ŋga ka-taa tɔm nɛ ɛwɩlɩ se tɩkaɣ labʋ cee wayɩ. (Mat. 5:5) Ɛlɛ Daviid tɔm ndʋ, tɩwɩlaɣ ɖɔɖɔ ɛzɩma wezuu caɣʋ kaɣaɣ wɛʋ Wiyaʋ Salomɔɔ alɩwaatʋ taa yɔ. Alɩwaatʋ ndʋ Salomɔɔ tɔkaɣ kewiyitu Izrayɛɛlɩ yɔ, Ɛsɔ samaɣ kaawɛ laŋhɛzɩyɛ taa siŋŋ nɛ pɩɖɔŋaɣnɩ-kɛ camɩyɛ ɛjaɖɛ nɖɩ ɖɩ-taa «naalɩm nɛ tʋŋ num pekpeŋ yem yɔ» ɖɩ-taa. Ɛsɔ heyi ɛ-sɛyaa se: «Ye ɩɖɔŋ man-paɣtʋ yɔɔ . . . yɔ, mankaɣ-mɩ kɔnʋʋ laŋhɛzɩyɛ mɩ-ɛjaɖɛ taa nɛ ɩkaɣ ɖou fɛɛɛ yem, nɔɔyʋ ɛɛñazɩɣ-mɩ.» (Lev. 20:24; 26:3, 6) Tamasɩ nzɩ, sɩlabɩ Salomɔɔ kewiyitu tɔɔʋ alɩwaatʋ taa. (3 Aw. 22:9; 29:26-28) Nɛ Yehowa kaalabɩ tamaɣ ɖɔɖɔ se ɛyaa kɩdɛkɛdaa «mʋkɩ.» (Keɣa 36:10) Ye mbʋ, tɔm ndʋ tɩwɛ Keɣa 36:10, 11, 29 taa yɔ, tɩlabɩ caanaʋ taa nɛ tɩkaɣ labʋ ɖɔɖɔ cee wayɩ.

9. Tɔm ndʋ Seeba abiɖe yɔɔdɩ Wiyaʋ Salomɔɔ kewiyitu tɔɔʋ yɔɔ?

⁹ Seeba abiɖe kaanɩwa se Izrayɛɛlɩ mba kaawɛ laŋhɛzɩyɛ taa nɛ piɖeni-wɛ Salomɔɔ kewiyitu  tɔɔʋ tɛɛ. Peeɖe ɛlɩnɩ poliŋ ɛjaɖɛ naɖɩyɛ taa nɛ ɛɖɔ nʋmɔʋ nɛ ewolo Yeruzalɛm se ɛ-maɣmaɣ ɛna wɛtʋ ndʋ tɩwɛ peeɖe yɔ. (1 Aw. 10:1) Ekilimi Salomɔɔ kewiyaɣ taa nɛ pɩtɛ lɛ, ɛyɔɔdɩ se: «Pɛkɛdɩ-m ndʋ yɔ tɩtɩtalɩ cɛɛkɛ hɔɔlʋʋ. . . . Koboyaɣ tɩnaa kɛlɛ ñɛ-ɛyaa nɛ koboyaɣ tɩnaa kɛlɛ ña-lɩmɖʋyaa panɛ yɔ, mba pasɩŋɩɣ ñɛ-ɛsɩndaa tam nɛ panɩɣ ñɔ-lɔŋ tɔm yɔ!» (1 Aw. 10:6-8) Ɛlɛ, wɛtʋ kɩbandʋ ndɩ ndɩ ndʋ tɩɩwɛ Salomɔɔ kewiyitu tɔɔʋ alɩwaatʋ taa yɔ, tɩɩkɛ mbʋ Yehowa ɖʋwa se ɛkaɣ labʋ ɛyaa Ɛ-Pɩyalʋ Yesu kewiyitu tɔɔʋ alɩwaatʋ taa yɔ pɩ-kɩɖaʋ nakʋyʋ na.

10. Hɔɔlɩŋ weyi taa Yesu kɩlɩ Salomɔɔ?

¹⁰ Yesu kɩlɩ Salomɔɔ hɔɔlɩŋ tɩŋa taa. Salomɔɔ taatalɩ pilim, ɛɛlabɩ kɩwɛɛkɩm sɔsɔm nɛ alɩwaatʋ wɛɛ nɛ tɩɖɛɣ lɛ, pɩkɔnɩ Ɛsɔ samaɣ kaɖɛ. Ɛlɛ Yesu ñɛkɛ Wiyaʋ weyi ɛtalɩ pilim yɔ, nɛ ɛfɛyɩnɩ kɩwɛɛkɩm nabʋyʋ. (Luka 1:32; Ebr. 4:14, 15) Paa Sataŋ kaatakɩ Yesu siŋŋ yɔ, Yesu wobi pɩ-yɔɔ nɛ ɛɖɔkɩ e-siɣsiɣ wɛtʋ Ɛsɔ ɛsɩndaa. Krɩstʋ wɩlaa se ɛɛkaɣ labʋ kɩwɛɛkɩm kpa, yaa ɛɛkaɣ labʋ mbʋ pɩkɔŋnɩ kaɖɛ ɛyaa siɣsiɣ tɩnaa mba pɔ-yɔɔ ɛtɔkɩ kewiyitu yɔ. Toovenim taa lɛ, pɩkɛnɩ-ɖʋ hɩɖɛ ɖʋʋ se ɛnʋ kɛnɩ ɖe-Wiyaʋ.

11. Mba kaɣ sɩnʋʋ Yesu kewiyitu tɔɔʋ?

¹¹ Yesu nɛ Ɛyaa 144 000 pakaɣnɩ tɔɔʋ kewiyitu, nɛ pakaɣ kpɛndʋʋ nɛ pala tʋmɩyɛ nɛ pɔcɔnɩ ɛyaa kɩcɛyɩm ɖeɖe nɛ peyele nɛ tamaɣ ŋga Yehowa wɛnɩ tɛtʋ yɔɔ yɔ kala. (Natʋ 14:1-3) Alɩwaatʋ ndʋ abalaa nɛ halaa mba paawɛ tɛtʋ yɔɔ yɔ, paakatɩ kala sakɩyɛ nɛ paatɔɔ kʋñɔmɩŋ, pʋyɔɔ lɛ pakaɣ kɛʋ awumbiya mba panɩɣ ɛyaa siziŋ yɔ. Ɛzɩ tʋmɩyɛ nɖɩ ɖeyi ɖeyi awumbiya mba pakaɣ labʋ?

12. Tʋmɩyɛ nɖɩ Yehowa kaɣ ɖʋʋ ɛyaa 144 000?

¹² Tʋmɩyɛ nɖɩ paɖʋ Yesu nɛ ɛ-awumbiya yɔ, ɖɩɖɔwa nɛ pɩkɩlɩ nɖɩ paaɖʋ Salomɔɔ yɔ. Pɩɩwɛɛ se Izrayɛɛlɩ wiyaʋ ɛnʋ, ɛcɔnɩ ɛyaa miiliyɔɔwaa sakɩyɛ kɩcɛyɩm ɖeɖe, nɛ ɛyaa mba paawɛ ɛjaɖɛ kʋɖʋmɖɩyɛ ɖeke taa na. Ɛlɛ mba pakaɣ tɔɔʋ kewiyitu Ɛsɔ Kewiyaɣ taa yɔ, pakaɣ ɖʋʋ nesi se pɔcɔnɩ ɛyaa miiliyaarɩwaa sakɩyɛ kɩcɛyɩm ɖeɖe nɛ ɛyaa mba pakaɣ wɛʋ ɛjaɖɛ kpeekpe yɔɔ. Waɖɛ sɔsɔɖɛ kpem Yehowa ha ɛyaa 144 000!

13. Ŋgee tʋmɩyɛ nɖɩ Yesu awumbiya kaɣ labʋ?

¹³ Ɛyaa 144 000 mba, pakaɣ kɛʋ awiya nɛ cɔjɔnaa ɛzɩ Yesu yɔ. (Natʋ 5:10) Moyizi Paɣtʋ tɛɛ lɛ, cɔjɔnaa kaakɛnɩ ɛyaa kajalaɣ ñɩma mba pɩɩwɛɛ se pasɩnɩ samaɣ nɛ kowolo pɩ-yɔɔ nɛ kɛwɛɛ alaafɩya tomnaɣ yɔɔ nɛ taabalɩyɛ kɩbanɖɛ wɛɛ ɖɔɖɔ ka nɛ Yehowa pɛ-hɛkʋ taa yɔ. Paɣtʋ kaakɛ «wondu kɩbandʋ ndʋ tɩkaɣ kɔm yɔ tɩ-kɩlɛmʋʋ,» pʋyɔɔ lɛ pɩmʋnɩ mbʋ se ɖɩkɔ tɔm ñʋʋ se Yesu awumbiya kaɣ sɩnʋʋ Ɛsɔ samaɣ nɛ kowolo pɩ-yɔɔ nɛ kɛwɛɛ alaafɩya tomnaɣ yɔɔ nɛ taabalɩyɛ kɩbanɖɛ wɛɛ ɖɔɖɔ ka nɛ Yehowa pɛ-hɛkʋ taa. (Ebr. 10:1) Lɛɛlɛɛyɔ lɛ, ɖɩɩsɩŋ ɛzɩma awiya nɛ cɔjɔnaa mba pakaɣ kpaɣnʋʋ se pɔyɔɔdɩnɩ Ɛsɔ Kewiyaɣ tɛɛ ñɩma mba pakaɣ wɛʋ tɛtʋ yɔɔ yɔ. Paa pɩtɩɩkɛ ɖʋtʋ ndʋ Yehowa kaɣ labʋ yɔ, ɖa-taa pɩzɩɣ nɛ pɩtɛ se cee wayɩ Paradisuu taa, mba pakaɣ wɛʋ tɛtʋ yɔɔ yɔ pakaɣ-wɛ wɩlʋʋ nʋmɔʋ ɛzɩ pɩpɔzʋʋ yɔ.—Natʋ 21:3, 4.

14. Ɛzɩma «heŋ lɛɛŋ» nɛ «ewiɖe cikpeɖe» taa mba pɛ-hɛkʋ taa wɛɛ?

¹⁴ Yesu ya mba ɛ nɛ wɛ pakaɣ kewiyitu tɔɔʋ yɔ se «ewiɖe cikpeɖe.» (Luka 12:32) Ɛyɔɔdɩ ɖɔɖɔ ɛyaa tindimiye naalɛ ñɩnɖɛ tɔm, nɛ ɛya paba se «heŋ lɛɛŋ.» Ɛyaa tindima ana a-naalɛ akpɛndaa nɛ akɛ ewiɖe kʋɖʋmɖɩyɛ nɛ nɔɔ kʋɖʋmaɣ wɛ a-hɛkʋ taa. (Yoh. 10:16) Sɔnɔ, tindima ana a-naalɛ a-taa mba kpɛndɩɣ nɛ palakɩ tʋmɩyɛ nɔɔ kʋɖʋmaɣ taa; nɛ alɩwaatʋ ndʋ tɛtʋ  pɩsɩɣ Paradisuu yɔ, pakaɣ wobu pɩ-yɔɔ nɛ pɛkpɛndɩɣ nɛ palakɩ tʋmɩyɛ nɔɔ kʋɖʋmaɣ taa. Toovenim taa lɛ, pʋbʋ taa lɛ, «ewiɖe cikpeɖe» taa mba kaɣ wɛʋ ɛsɔdaa nɛ «heŋ lɛɛŋ» taa mba ñakaɣ wɛnʋʋ lidaʋ se pacakɩ tɛtʋ yɔɔ nɛ panɩɩ wezuu leleŋ tam. Ɛlɛ, pɩsa nɛ «heŋ lɛɛŋ» taa mba mʋna se pacaɣ wezuu Paradisuu taa lɛ, pɩpɔzʋʋ se pala nabʋyʋ lɛɛlɛɛyɔ.

15. (a) Ɛzɩma tɩyɛ «heŋ lɛɛŋ» taa mba nɛ Krɩstʋ koobiya pɛkpɛndɩɣ nɛ palakɩ tʋmɩyɛ? (b) Ɛzɩma ŋpɩzɩɣ nɛ ŋmaɣzɩnɩ koobu weyi ɛwɛ kɔɔ ɖɩbɛdɩyɛ yɔ ɛ-kɩɖaʋ? (Cɔnɩ kɩlɛmʋʋ.)

¹⁵ Pʋcɔ nɛ kɩdɛkɛdɩm laɖʋ weyi ekpiɖaa yɔ ɛsɩkɩ lɛ, etihiɣ waɖɛ se ɛwɩlɩ Krɩstʋ ɛ-ɛsɩmɩyɛ mbʋ ɛlɛ labɩ-ɩ yɔ pɩ-yɔɔ. Ɛlɛ ɖa «heŋ lɛɛŋ» taa mba lɛ, sɔnɔ ɖɩwɛnɩ wala sakɩyɛ nɛ ɖɩpɩzɩɣ ɖɩtɩŋnɩ a-yɔɔ nɛ ɖɩwɩlɩ Yesu ɖɛ-ɛsɩmɩyɛ. Ðɩpɩzɩɣ nɛ ɖɩtɩŋnɩ wɛtʋ ndʋ ɖɩwɛnɩ koobiya patam numwaa yɔɔ yɔ tɩ-yɔɔ nɛ ɖɩwɩlɩ-ɩ se ɖɩsɔɔlɩ-ɩ. Yesu yɔɔdaa se wɛtʋ ndʋ heŋ lɛɛŋ taa mba wɛnɩ e-koobiya patam numwaa yɔɔ yɔ, tɩ-yɔɔ ɛkaɣ tɩŋnʋʋ nɛ ɛhʋʋnɩ-wɛ tɔm. (Mat. 25:31-40) Ðɩpɩzɩɣ nɛ ɖɩsɩnɩ Krɩstʋ koobiya ye ɖɩɖʋʋ nesi tɔm susuu nɛ kpɛlɩkɩyaa labʋ tʋmɩyɛ nɛ kpekpeka yɔ. (Mat. 28:18-20) Pɩsa nɛ ɖɩla mbʋ lɛ, ɖɩsɔɔlaa se ɖɩlabɩnɩ tʋmɩyɛ Bibl kpɛlɩkʋʋ takayɩsɩ nzɩ palɩzɩɣ yɔ camɩyɛ. Sɩ-taa nakɛyɛ lɛ Nɩɩ wezuu leleŋ tam! takayaɣ. Ye ŋtɩpaɣzɩtɩ nɔɔyʋ Bibl kpɛlɩkʋʋ yɔ, pɩɩwɛɣ ɖeu se ɛzɩ ño-ɖoŋ haɣʋ-ŋ nʋmɔʋ yɔ, ŋɖʋ ña-tɩ kaɖʋwa se ŋheyiɣ ɛyaa sakɩyɛ se ŋsɔɔlaa se ña nɛ wɛ ɩkpɛlɩkɩ Bibl?

16. Pɩsa nɛ ɖɩñɔɔzɩ ɖa-tɩ nɛ ɖɩkɛ Ɛsɔ Kewiyaɣ tɛɛ mba lɛ, ɛbɛ ɖɩpɩzɩɣ nɛ ɖɩla lɛɛlɛɛyɔ?

¹⁶ Pɩtɩpɔzɩ se ɖɩɖaŋ se ɖɩkɔŋ nɛ ɖɩwɛɛ Paradisuu taa lɛ pʋcɔ nɛ ɖɩpɩsɩ ɛyaa mba Yehowa sɔɔlaa se pɛwɛɛ peeɖe yɔ. Sɔnɔ sɔnɔ, ɖɩpɩzɩɣ ɖɩñaɣ pana nɛ ɖɩwɛɛ toovenim ɖɔ-yɔɔdaɣ nɛ ɖa-lakasɩ taa nɛ ɖɩtaaɖɛlɛsɩ niye ɖɔɖɔ ɖa-lakasɩ taa. Nɛ ɖɩpɩzɩɣ nɛ ɖɩwɛɛ siɣsiɣ Yehowa, ɖɛ-tɛŋga nɛ ɖo-koobiya Krɩstʋ mba ɛsɩndaa. Ye ɖɩñaŋ Yehowa lɛɛlɛɛyɔ ɛjaɖɛ kɩdɛkɛdɩyɛ ɖɩnɛ ɖɩ-taa yɔ, pɩkaɣ-ɖʋ wɛʋ kɛlɛʋ nɛ pɩkɩlɩ se ɖɩñamɩ-ɩ Paradisuu taa. Ðɩpɩzɩɣ ɖɔɖɔ nɛ ɖɩñaɣ pana nɛ ɖɩwɛɛ niye hɔɔlɩŋ ndɩ ndɩ taa nɛ ɖɩwɛɛnɩ ɖɔɖɔ wɛtʋ kɩbandʋ ndɩ ndɩ nɛ pɩwɩlɩ se ɖɩwɛɛ nɛ ɖɩñɔɔzʋʋ ɖa-tɩ se ɖɩcaɣ wezuu peeɖe. Kalɩ takayaɣ kanɛ ka-taa tɔm ñʋʋ «Ŋñɔɔzɩ ña-tɩ se ‘ŋmʋ tɛtʋ nɛ tɩpɩsɩ ña-ñɩm na’?»

17. Ɛzɩ kɩwɛɛkɩm mbʋ ɖɩlaba nɛ pɩɖɛɛ yɔ pʋyɔɔ lɛ, pɩwɛɛ se ɖiyele nɛ pitibi-ɖʋ yɔɔɔ na? Lɩzɩ pɩ-taa.

 ¹⁷ Pɩpɔzʋʋ ɖɔɖɔ se ɖɩñaɣ pana nɛ ɖiyele ɖa-tɩ tɔm kʋʋ kɩwɛɛkɩm sɔsɔm mbʋ ɖɩlaba nɛ pɩɖɛɛ yɔ pʋyɔɔ. Toovenim taa lɛ, ɖɩɩkaɣ maɣzʋʋ kpa se kɩhɛyʋʋ pʋ-ñʋʋ taa kɩlaʋ yɔɔ lɛ, «ɖiyeki faɖaɖa se kɩwɛɛkɩm ɛmalɩnɩ-ɖʋ.» (Ebr. 10:26-31) Ɛlɛ, ye ɖikpiɖi kɩwɛɛkɩm mbʋ ɖɩlaba yɔ pɩ-yɔɔ siŋŋ, ɖɩpɔzɩ ɛgbɛyɛ taa ɛzʋtʋyaa se pasɩnɩ-ɖʋ, nɛ ɖɩlɛɣzɩ ɖa-lakasɩ yɔ, ɖa-taa pɩzɩɣ nɛ pɩtɛ se Yehowa kpeɣ-ɖʋ faaa. (Iza. 55:7; Tʋma 3:19) Tɔzɩ tɔm ndʋ Yesu heyi Farɩsɩ mba yɔ tɩ-yɔɔ. Eheyi-wɛ se: «Pɩtɩkɛ ɛyaa siɣsiɣ tɩnaa mɔnkɔm yaʋ, ɛlɛ kɩwɛɛkɩm laɖaa.» (Mat. 9:13) Kɩhɛyʋʋ pʋ-ñʋʋ taa kɩlaʋ pɩzɩɣ nɛ kihuuzi ɖa-kɩwɛɛkɩm tɩŋa yɔɔ.

18. Kɩdɛkɛdɩm laɖʋ weyi ɛɛyɔɔdɩnɩ Yesu alɩwaatʋ ndʋ pa-naalɛ pacaɣaɣ sɩbʋ yɔ, tɔm ndʋ yɔɔ ŋkaɣ sɔɔlʋʋ se ña nɛ ɩ ɩla kɛdaɣ?

¹⁸ Kpaɣ se ŋwɛ Paradisuu taa nɛ ŋɖiɣni yɔɔdɩnʋʋ kɩdɛkɛdɩm laɖʋ weyi ɛɛyɔɔdɩnɩ Yesu yɔ. Pɩtʋʋ fɛyɩ se mɩ-naalɛ ɩkaɣ yɔɔdʋʋ ɛsɩmɩyɛ nɖɩ ɩwɛnɩ Yesu kɩlaʋ yɔɔ yɔ ɖɩ-tɔm. Pɩtɩla, ŋpɔzʋʋ-ɩ se ɛkɛdɩ-ŋ mbʋ pɩlabɩ kɛdɛzaɣ ñɩɣtʋ ndʋ Yesu caɣ wezuu tɛtʋ yɔɔ yɔ tɩ-taa tɔm nɛ pɩkɩlɩ, nɛ ɛkɛdɩ-ŋ ɖɔɖɔ ɛzɩma pɩlabɩ-ɩ alɩwaatʋ ndʋ Yesu tisaa se ɛlakɩ-ɩ mbʋ ɛpɔzɩ-ɩ yɔ pɩ-tɔm. Nɛ pɩtɩla, ɛlɛ ɖɔɖɔ ɛkaɣ-ŋ pɔzʋʋ se ŋkɛdɩ-ɩ ɛzɩma wezuu caɣʋ kaawɛ Sataŋ ɛjaɖɛ kɩdɛkɛdɩyɛ ɖɩnɛ ɖɩ-kɛdɛzaɣ alɩwaatʋ taa yɔ pɩ-tɔm. Ɛyaa mba pɛwɛ ɛzɩ abalʋ ɛnʋ yɔ, ɖɩkaɣ-wɛ wɩlʋʋ Ɛsɔtɔm, nɛ pɩkaɣ-ɖʋ kɛnʋʋ hɩɖɛ ɖʋʋ siŋŋ!—Efɛz. 4:22-24.

19. Ɛbɛ yɔɔ wezuu caɣʋ ɛɛkaɣ-ɖʋ lɩʋ sɔŋ Paradisuu taa? (Cɔnɩ takayaɣ huyuu yɔɔ kɩlɛmʋʋ.)

¹⁹ Wezuu caɣʋ ɛɛkaɣ-ɖʋ lɩʋ sɔŋ Paradisuu taa kpa. Paa ɛzɩmtaa lɛ, ɖɩkaɣ katʋʋ ɛyaa kɩbama nɛ ɖɩkaɣ labʋ tʋma wena awɛnɩ tɔbʋʋ nɩʋ yɔ. Mbʋ pɩkaɣ wɛʋ ɖeu nɛ pɩkpaɖɩ yɔ lɛ se ɖɩkaɣ tɩlʋʋ ɖa-Caa weyi ɛwɛ ɛsɔdaa yɔ camɩyɛ nɛ pɩkɩlɩ nɛ ɖɩkaɣ nɩʋ leleŋ mbʋ ɛhaɣ-ɖʋ yɔ pɩ-yɔɔ. Paa ɛzɩmtaa lɛ, ɖɩkaɣ kpɛlɩkʋʋ tɔm sakɩyɛ ɛ-yɔɔ nɛ pɩkɩlɩ nɛ ɖɩkaɣ kpɛlɩkʋʋ ɖɔɖɔ tɔm sakɩyɛ e-wondu kɩlɩzɩtʋ yɔɔ. Ðiwoki pɩ-yɔɔ nɛ ɖɩcakɩ wezuu nɛ pɩɖaɣlɩɣ lɛ, ɖɩkaɣ sɔɔlʋʋ Ɛsɔ nɛ pɩkɩlɩ. Ðɩwɛnɩ ɛsɩmɩyɛ siŋŋ se Yehowa nɛ Yesu palabɩ-ɖʋ tamaɣ se ɖɩpɩzɩɣ nɛ ɖɩcaɣ wezuu Paradisuu taa tam!