Aayɩ. Tɔm ndʋ Daviid ma mayaɣ ŋga ka-taa yɔ tɩkɛ toovenim.

Iyele nɛ ɖɩna tɔm ndʋ ɛma mayaɣ ŋga ka-taa nɛ ndʋ ɛma masɩ lɛɛsɩ taa nɛ tɩlakɩ nɔɔ kʋɖʋmaɣ nɛ mayaɣ ŋga ka-taa tɔm yɔ. Ɛmawa se: «Mɛnɖɛyɩɣ-ŋ kaahɛzaɣ [yaa tam] nɛ mansa ña-hɩɖɛ, ndʋ monɖuwaa se malakɩ yɔ, mancakɩ tɩ-yɔɔ.» «Nɛ ma-laŋɩyɛ pilim mɛnsɛɣnɩ-ŋ nɛ manɖʋʋ-ŋ hɩɖɛ tam.» ‘Manɖʋʋ-ŋ hɩɖɛ tam tam.’—Keɣa 60:9; 85:12; 144:1, 2.

Alɩwaatʋ ndʋ Daviid ma tɔm ndʋ yɔ, ɛtaamaɣzɩɣ se ɛɛkaɣ sɩbʋ kaaʋ. Ɛɛnawa se Yehowa yɔɔdaa se ɛyaa kaɣ sɩbʋ mbʋ pʋyɔɔ yɔ palabɩ kɩwɛɛkɩm, nɛ ɛɛnawa ɖɔɖɔ se ɛkɛ kɩwɛɛkɩm laɖʋ. (Kiɖe 3:3, 17-19; Keɣa 50:6, 7) Ɛɛnawa se halɩ ɛyaa mba pɔ-tɔm kaakɛdɩnɩ Ɛsɔ yɔ pasɩba. Pa-taa nabɛyɛ lɛ Abraham, Izaakɩ nɛ Yakɔɔb. Nɛ Daviid kaanawa se ɛ-maɣmaɣ ɛkaɣ sɩbʋ. (Keɣa 36:25; 38:5) Ɛlɛ ɛ-tɔm ndʋ tɩwɛ Keɣa 60:9 taa yɔ, tɩwɩlɩɣ se ɛsɔɔlaa nɛ ɛtɛm ɛ-taa se ɛsaŋ Ɛsɔ tam, pʋ-tɔbʋʋ se alɩwaatʋ ndʋ payɩ ɛwɛ wezuu yɔ.—2 Sam. 7:12.

Tɔm ndʋ Daviid mawa yɔ, tɩ-taa natʋyʋ tukuuni mbʋ pɩtalɩ-ɩ e-wezuu caɣʋ taa yɔ, tɩ-taa natʋyʋ wɛ Keɣa 17, 50 nɛ 51 taa. Keɣa 22 taa, Daviid yɔɔdɩ Yehowa tɔm se ɛkɛ ninɖiɣyu weyi ɛwɩlɩɣ e-wondu nʋmɔʋ, ɛhɛzɩɣ tɩ-laŋa nɛ ɛkandɩyɩɣ tɩ-yɔɔ yɔ. Daviid kaakɛ ninɖiɣyu ɛnʋ ɛ-ɖɔndɩ. Nɛ ɛɛsɔɔlaa se ɛsɛɛ Ɛsɔ ‘e-wezuu caɣʋ avema tɩŋa.’—Keɣa 22:6.

Tɔzɩ ɖɔɖɔ se Yehowa fezuu ɖiyini Daviid nɛ ɛma tɔm ndʋ ɛmawa yɔ. Tɔm ndʋ ɛmawa yɔ, natʋ tɔm ndʋ pɩɩwɛɛ se tɩla pɩnzɩ sakɩyɛ wayɩ yɔ tɩwɛ tɩ-taa. Kɩɖaʋ nakʋyʋ yɔ: Keɣa 109 taa, Daviid ma alɩwaatʋ ndʋ ɛ-Kɩbaɣlʋ kaɣaɣ ‘Caɣʋ Ɛsɔ nɩwaŋ yɔɔ’ ɛsɔdaa se ɛmʋ ɖoŋ sɔsɔŋ yɔ pɩ-tɔm. Ɛmʋwaɣ ɖoŋ ɛnɩ se ɛlabɩnɩ we? Se eluzi Ɛsɔ koyindinaa nɛ ‘ɛhʋʋnɩ tɔm ajɛɛ.’ Daviid kaakɛ Yesu cɔzɔnaa taa nɔɔyʋ, Yesu kɛnɩ Mesiya, ɛkaɣaɣ kewiyitu tɔɔʋ ɛsɔdaa nɛ ɛkɛ «layʋ tam.» (Keɣa 109:1-6) Yesu yɔɔdaa se natʋ tɔm ndʋ tɩwɛɛ Keɣa 109 taa yɔ titukuuni-i nɛ tɩkaɣ labʋ pʋwayɩ.—Mat. 22:41-45.

Toovenim taa lɛ, tɔm ndʋ Daviid mawa yɔ, Yehowa ɖiyini-i nɛ ɛma-tʋ; titukuuni ɛ-tɛ alɩwaatʋ nɛ alɩwaatʋ ndʋ pakaɣ-ɩ fezuu cee wayɩ se ɛsɛɛ Yehowa tam yɔ. Ye mbʋ, Keɣa 36:10, 11, 29 taa tɔm pɩzɩɣ nɛ titukuni alɩwaatʋ ndʋ pama-tʋ yɔ nɛ cee wayɩ alɩwaatʋ. Masɩ nzɩ, sɩ-taa tɔm labɩ caanaʋ taa Izrayɛɛlɩ ɛjaɖɛ taa, nɛ tɩkaɣ labʋ cee wayɩ alɩwaatʋ ndʋ Ɛsɔ yeki nɛ ɛ-tamasɩ la yɔ.—Kalɩ tɔm ñʋʋ «Ma nɛ ŋ ɖɩkaɣ wɛʋ paradisuu taa» tɛ tayʋʋ 8; kɩwɛ Feŋuu Tilimiye ɖɩnɛ ɖɩ-taa.

Keɣa 60:9 taa tɔm nɛ masɩ nzɩ sɩ-taa tɔm labɩ nɔɔ kʋɖʋmaɣ nɛ mayaɣ ŋga yɔ sɩwɩlɩɣ se Daviid kaasɔɔlaa se ɛsɛɛ Yehowa caanaʋ taa Izrayɛɛlɩ taa nɛ pɩkɔɔ pɩsɩɩnɩ ɛ-sɩm wiye. Sɩwɩlɩɣ ɖɔɖɔ mbʋ ɛkaɣ labʋ cee wayɩ alɩwaatʋ ndʋ Yehowa feziɣ-i yɔ.