Feŋuu Tilimiye takayɩsɩ nzɩ sɩlɩ pɩnaɣ kanɛ yɔ, ŋkalɩ-sɩ camɩyɛ na? Ye ŋkalɩ-sɩ camɩyɛ yɔ, maɣzɩ nɛ ŋna se ŋpɩzɩɣ nɛ ŋcosi tɔm pɔzʋʋ pʋnɛ pɩ-yɔɔ:

Pɔyɔɔdʋʋ se ‘ɖɩpɩsɩ ɖa-maɣzɩm kɩfam’ yɔ, pʋ-tɔbʋʋ lɛ suwe? (Roma 12:2)

Pɔtɔm se ‘ɖɩpɩsɩ ɖa-maɣzɩm kɩfam’ yɔ pɩɩsɩɣna se ɖɩla tʋma kɩbana naayɛ yem. Ɛlɛ, pɩpɔzʋʋ se ɖɩtazɩ nɛ ɖɩna ɛyʋ weyi ɖɩkɛnɩ ɖooo ɖa-taa yɔ nɛ ɖɩla lɛɣzɩtʋ ndʋ payɩ pɩpɔzʋʋ yɔ nɛ pɩsa nɛ ɖe-wezuu caɣʋ la nɔɔ kʋɖʋmaɣ nɛ Yehowa paɣtʋ nɛ ɛ-paɣtʋ kila.—w23.01, h. 8-9.

Ɛzɩma ɖɩpɩzɩɣ nɛ ɖɩwɛɛnɩ maɣzɩm mbʋ pɩmʋnaa yɔ alɩwaatʋ ndʋ ɖɩcɔŋnɩ mbʋ pɩwɛɛ nɛ pɩlakɩ ɛjaɖɛ yɔɔ yɔ?

Ðɩsɔɔlɩ kpem se ɖɩtɩlɩ mbʋ pɩwɛɛ nɛ pɩlakɩ ɛjaɖɛ yɔɔ sɔnɔ yɔ nɛ ɖɩna ɛzɩma piyeki se Bibl taa natʋ tɔm ɛla yɔ. Mbʋ ɛzɩ ɖɩɩwɛɛ nɛ ɖɩyɔɔdʋʋ ndʋ ɖa-maɣmaɣ ɖɩmaɣzɩɣ se pɩtɩla pɩkaɣ labʋ yɔ pɩ-tɔm nɛ pɩkɔnɩ tayʋʋ ɛgbɛyɛ taa lɛ, pɩwɛɛ se ɖɩyɔɔdʋʋ tɔm ndʋ tɩlɩnɩ wondu ndʋ Yehowa ɛgbɛyɛ lɩzaa yɔ tɩ-taa yɔ (1 Kɔr. 1:10)—w23.02, h. 16.

Tʋkaɣ ŋga wɛ Yesu lɩm mɩyɩsʋʋ nɛ ɛ-wayɩ tɩŋɩyaa lɩm mɩyɩsʋʋ hɛkʋ taa?

Pɩtaacɛyɩ se Yesu ɛha ɛ-tɩ Yehowa ɛzɩ ɖa yɔ, mbʋ pʋyɔɔ yɔ palʋlɩ-ɩ ɛjaɖɛ nɖɩ ɖɩtɛm ɖɩ-tɩ haʋ Ɛsɔ yɔ ɖɩ-taa. Yesu kaatalɩ pilim nɛ ɛtɩla kɩwɛɛkɩm nabʋyʋ. Pɩtaapɔzɩ se ekpiɖi kɩwɛɛkɩm nabʋyʋ yɔɔ.—w23.03, h. 5.

Ɛzɩma ɖɩpɩzɩɣ nɛ ɖɩsɩnɩ lalaa nɛ pocosi tɔm kediɣzisi taa?

Ðicosi tɔm nɛ tɩwɛɛ tobi; ye ɖɩlakɩ mbʋ yɔ pɩhaɣ sakɩyɛ waɖɛ nɛ papɩzɩ nɛ pocosi tɔm. Pɩwɛɛ ɖɔɖɔ se ɖɩtaakɩlɩ yɔɔdʋʋ lɩmaɣza sakɩyɛ tɔm. Ye ɖɩlabɩ mbʋ yɔ, pɩhaɣ lalaa waɖɛ nɛ pɔyɔɔdɩ lɩmaɣza lɛɛna tɔm.—w23.04, h. 23.

«Habɩyɛ kiɖeɖeye» nɖɩ ɖɩ-tɔm pɔyɔɔdɩ Izaayii 35:8 taa yɔ, ɛbɛ ɖɩkɛnaa?

Habɩyɛ nɖɩ, kajalaɣ lɛ ɖɩwɩlɩɣ habɩyɛ nɖɩ ɖɩ-yɔɔ Yuuda mba kaaɖɔma alɩwaatʋ ndʋ palɩnɩ Babilɔɔnɩ nɛ papɩsɩɣ pɛ-tɛ yɔ. Alɩwaatʋ ndʋ tɩɖɛwa pitileɖita yɔ tɩ-taa, ɛbɛ habɩyɛ nɖɩ ɖɩɩkɛnaa? Pɩnzɩ mɩnɩŋ sakɩyɛ pʋcɔ nɛ pɩtalɩɣ pɩnaɣ 1919 lɛ, palabɩ tʋma naayɛ se pɔñɔɔzɩ nʋmɔʋ: Pɛɖɛzɩ Bibl nɛ takayɩsɩ lɛɛsɩ kʋnʋmɩŋ sakɩyɛ taa nɛ palɩzɩ-sɩ. Ɛsɔ samaɣ wobi pɩ-yɔɔ nɛ kɔɖɔŋ «habɩyɛ kiɖeɖeye» yɔɔ; pɩsɩnɩ-kɛ nɛ kowolo pɩ-yɔɔ nɛ kɛsɛɣ Yehowa lɛɛlɛɛyɔ nɛ pɩkaɣ-kɛ sɩnʋʋ cee wayɩ alɩwaatʋ ndʋ Ɛsɔ Kewiyaɣ kaɣ ñɔɔzʋʋ tɛtʋ nɛ tɩwɛɛ ɖeu yɔ.—w23.05, h. 15-19.

Aduwa ñʋʋ 9 tasɩɣ-ɖʋ lɔŋ pɩlɩɩnɩ halaa 2 mba yɔɔ?

Aduwa ñʋʋ 9 yɔɔdʋʋ halʋ kɩmɛlɛŋ tɔm se ɛ-yatʋ wokini «Pɩlaʋ» taa, nɛ kɩyɔɔdɩ «lɔŋsɩnɖɛ siŋŋ» tɔm se ɖɩkɛ halʋ weyi ɛ-yatʋ wokini «tɔm taa nɩʋ lɛɣtʋ nʋmɔʋ» taa nɛ wezuu taa yɔ. (Adu. 9:​1, 6, 13, 18)—w23.06, h. 22-24.

Ɛzɩma Ɛsɔ wɩlɩ Lɔɔtɩ hɔɔlʋʋ taa se ɛwɛnɩ tɩ luzuu nɛ ɛkɛ weyi ɛnɩɣ tɔm taa yɔ?

Yehowa heyi Lɔɔtɩ se ɛlɩɩ Sodom nɛ ese nɛ ɛkpa pʋŋ egeetiye taa. Alɩwaatʋ ndʋ Lɔɔtɩ tendi Yehowa se ɛha-ɩ nʋmɔʋ nɛ ewolo Zowaarɩ tɛtʋ taa yɔ, Yehowa laba ɛzɩ ɛyɔɔdʋʋ yɔ.—w23.07, h. 21.

Ɛbɛ halʋ nɔɔyʋ pɩzɩɣ nɛ ɛla ye ɛ-tɛŋga ɛcɔŋnɩ kʋzʋʋ kɩlɛmɩŋ yɔ?

Pɩfɛyɩ se ɛkʋ ɛ-tɩ tɔm. Pɩwɛɛ se ɛka ɛ-lɩmaɣza ɛ nɛ Yehowa pa-taabalɩyɛ yɔɔ nɛ ɛkpakɩɣ alɩwaatʋ nɛ ɛmaɣzɩɣ Bibl taa kɛdɛsɩ nzɩ sɩyɔɔdʋʋ halaa mba paawɛ laŋwɛɛkɩyɛ taa nɛ patɩmnɩ Yehowa nɛ pehiɣ laŋɩyɛ hɛzʋʋ yɔ pɔ-tɔm. Ɛpɩzɩɣ nɛ ɛsɩnɩ ɛ-walʋ nɛ ɛlɛ se wɛtʋ ndʋ tɩpɩzɩɣ tiyele nɛ ɛtɔlɩ kpaca ŋgʋ kɩ-taa yɔ.—w23.08, h. 14-17.

Alɩwaatʋ ndʋ pakaɖɩɣnɩ-ɖʋ ɖe-tisuu yɔɔ yɔ, ɛzɩma lɛɣtʋ sɩɣnɩ-ɖʋ se ɖɩwɛɛnɩ hɛɛɛ wɛtʋ?

Pɩwɛɛ se ɖɩkpaɣ tɔm ndʋ nɔɔyʋ pɔzʋʋ-ɖʋ yɔ ɛzɩ mbʋ pɩpɩzɩɣ nɛ pɩsɩnɩ-ɖʋ nɛ ɖɩtɩlɩ mbʋ pɩ-yɔɔ ɛmaɣzɩɣ yaa mbʋ pɩ-tɔm cɛyɩ ɛ-ɛsɩndaa yɔ. Ðɩnɛ ɛlɛ, pɩkaɣ-ɖʋ sɩnʋʋ nɛ ɖicosi-i nɛ nɔɔ kɩbaŋa.—w23.09, h. 17.

Ɛbɛ Maarɩɩ kɩɖaʋ kpɛlɩkɩɣ-ɖʋ ɛzɩma ɖɩla nɛ ɖihiɣ ɖoŋ yɔ pɩ-yɔɔ?

Maarɩɩ nɩwa se ɛkaɣ pɩsʋʋ Mesiya ɖoo lɛ, eyeba nɛ lalaa sɩnɩ-ɩ. Gabrɩyɛɛlɩ nɛ Elizaabɛɛtɩ patɩŋnɩ Masɩ yɔɔ nɛ pakpazɩ-ɩ ɖoŋ. Ða ɖɔɖɔ ɖo-koobiya Krɩstʋ mba pɩzɩɣ nɛ pakpazɩ-ɖʋ ɖoŋ.—w23.10, h. 15.

Ɛzɩma Yehowa pɩzɩɣ nɛ ecosi ɖa-adɩma yɔɔ?

Yehowa labɩ tamaɣ se ewelisiɣ ɖa-adɩma nɛ ɛmaɣzɩɣ ɛzɩma alabɩ nɔɔ kʋɖʋmaɣ nɛ ɛ-kaɖʋwa yɔ pɩ-yɔɔ. (Yer. 29:12) Paa adɩma naayɛ ɩnɩɣzɩnɩ ɖama yɔ, Yehowa pɩzɩɣ ɛlɩzɩ se eecosuu a-yɔɔ kɩmaŋ, ɛlɛ paa ɛzɩmtaa lɛ ɛsɩɣnɩ-ɖʋ.—w23.11, h. 21-22.

Roma mba 5:2 yɔɔdɩ «lidaʋ» tɔm; ye mbʋ, ɛbɛ yɔɔ patasɩ yɔɔdʋʋ kɩ-tɔm kalɩtʋ 4 taa?

Alɩwaatʋ ndʋ ɛyʋ nɔɔyʋ nɩɣ tɔm kɩbandʋ yɔ, ɛpɩzɩɣ nɛ ɛwɛɛnɩ lidaʋ se ɛkaɣ caɣʋ wezuu paradisuu taa tɛtʋ yɔɔ. Ɛlɛ ɛwɛɣ nɛ ɛkatɩɣ kʋñɔmɩŋ nɛ ɛɖɔkʋʋ ɛ-laŋɩyɛ ɩ-taa nɛ ɛnaɣ ɛzɩma ɛ-tɔm kɛdɩnɩ Ɛsɔ lɛ, e-lidaʋ cɛyɩsɩɣ nɛ pɩkɩlɩ nɛ ɛ-taa tɛmnɩ-kʋ nɛ pɩkɩlɩ.—w23.12, h. 12-13.