1. Ɛbɛ pɩwɛɛ se koobu abalɩñɩnʋ nɔɔyʋ ɛla nɛ piɖeni-i?

 WIYAƲ Daviid heyi Salomɔɔ se: «Wɛɛ ɖoŋ nɛ ŋwɩlɩ se ŋkɛ abalʋ.» (1 Awi. 2:​1-3) Pɩwɛɣ ɖeu se sɔnɔ koobiya abalɩñɩma tɩŋa ɩɖɔ lɔŋ tasʋʋ mbʋ pɩ-yɔɔ. Pɩsa nɛ piɖeni-wɛ lɛ, pɩpɔzʋʋ se pɛkpɛlɩkɩ ɛzɩma pɩwɛɛ se paña Ɛsɔ paɣtʋ nɛ pɔɖɔ Bibl paɣtʋ kila yɔɔ pe-wezuu caɣʋ hɔɔlɩŋ kpeekpe taa yɔ. (Luka 2:52) Ɛbɛ yɔɔ pɩcɛyaa kpem se evebiya ɩpɩsɩ Krɩstʋ ñɩma mba papɩ fezuu taa yɔ?

2-3. Ɛbɛ yɔɔ pɩcɛyaa se evebiya ɩpɩɩ fezuu taa?

² Koobiya abalɩñɩma wɛnɩ tʋma sakɩyɛ wena a-tɔm cɛyɩ hɔʋ taa nɛ ɛgbɛyɛ taa yɔ. Evebiya, pɩtʋʋ fɛyɩ se ɩmaɣzɩ tʋma wena aɖaŋ-mɩ nɛ ɛsɩndaa yɔ a-yɔɔ. Pʋtɔma yɔ ŋɖʋ ña-tɩ kaɖʋwa se ŋcaɣ se ŋpɩsɩ alɩwaatʋ tɩŋa Ɛsɔ sɛtʋ tʋmlaɖʋ, ɛgbɛyɛ taa tʋmlaɖʋ, nɛ pʋwayɩ ɛgbɛyɛ taa ɛzʋtʋyʋ. Pʋtɔma ŋsɔɔlaa ɖɔɖɔ se ŋkpaɣ halʋ nɛ ŋlʋlɩ piya. (Efɛz. 6:4; 1 Tim. 3:1) Pɩsa nɛ ŋtalɩ kaɖʋsɩ nzɩ nɛ piɖeni-ŋ camɩyɛ lɛ, pɩcɛyaa se ŋkɛ Krɩstʋ tʋ weyi ɛpɩ fezuu taa yɔ. b

³ Ɛbɛ pɩzɩɣ pɩsɩnɩ-ŋ nɛ ŋkɛ Krɩstʋ tʋ weyi ɛpɩ fezuu taa yɔ? Pɩcɛyaa se ŋkpɛlɩkɩ lɛɣtʋ sakɩyɛ nɛ ŋwɛɛ niye tɩ-taa. Ye mbʋ, ɛbɛ pɩzɩɣ pɩsɩnɩ-ŋ lɛɛlɛɛyɔ nɛ ŋñɔɔzɩ ña-tɩ nɛ ŋla tʋma wena aɖaŋɩ-ŋ nɛ ɛsɩndaa yɔ nɛ piɖeni-ŋ?

4. Le ŋpɩzɩɣ nɛ ŋlɩɩ kɩɖaŋ kɩbaŋ weyi pɩwɛɛ se ŋmaɣzɩna yɔ ɩ-yɔɔ? (Cɔnɩ ɖɔɖɔ kɩlɛmʋʋ.)

⁴ Maɣzɩnɩ mba paha kɩɖaŋ kɩbaŋ yɔ. Pɔyɔɔdɩ caanaʋ taa ɛyaa sakɩyɛ tɔm Bibl taa se paha kɩɖaŋ kɩbaŋ nɛ evebiya pɩzɩɣ nɛ pamaɣzɩnɩ-wɛ. Caanaʋ taa ɛyaa mba, paasɔɔlɩ Ɛsɔ nɛ paalabɩ  tʋma ndɩ ndɩ se pɩsa nɛ pɔcɔnɩ ɛ-samaɣ yɔɔ. Ŋpɩzɩɣ ɖɔɖɔ nɛ ŋna koobiya Krɩstʋ ñɩma mba papɩ fezuu taa nɛ pahaɣ kɩɖaŋ kɩbaŋ yɔ ñɔ-hɔʋ taa nɛ ñɛ-ɛgbɛyɛ taa. (Ebr. 13:7) Pɩtasɩ lɛ, Yesu Krɩstʋ ha-ŋ kɩɖaʋ ŋgʋ kɩtalɩ pilim yɔ. (1 Pɩy. 2:21) Kpaɣ alɩwaatʋ nɛ ŋkpɛlɩkɩ ɛyaa mba pɔ-tɔm camɩyɛ; ŋŋlakɩ mbʋ lɛ, maɣzɩ pɛ-wɛtʋ kɩbandʋ ndʋ tɩkɛdɩnɩ-ŋ yɔ tɩ-yɔɔ. (Ebr. 12:​1, 2) Pʋwayɩ lɛ, maɣzɩ nɛ ŋna ɛzɩma ŋpɩzɩɣ nɛ ŋmaɣzɩnɩ-wɛ yɔ.

5. (a) Ɛbɛ ŋpɩzɩɣ ŋla nɛ ŋwɛɛnɩ lɛɣtʋ ndʋ tɩsɩɣnɩ ɛyʋ se ɛmaɣzɩ ɛ-ñʋʋ taa camɩyɛ yɔ? (Keɣa 119:9) (b) Ɛbɛ yɔɔ pɩcɛyaa?

⁵ Ñaɣ pana nɛ ŋwɛɛnɩ «lɛɣtʋ ndʋ tɩsɩɣnɩ ɛyʋ se ɛmaɣzɩ ɛ-ñʋʋ taa camɩyɛ yɔ» nɛ ŋɖɔkɩ-tʋ kpam. (Adu. 3:21) Weyi ɛwɛnɩ lɛɣtʋ ndʋ tɩsɩɣnɩ ɛyʋ se ɛmaɣzɩ ɛ-ñʋʋ taa camɩyɛ yɔ, ɛmaɣzɩɣ camɩyɛ pʋcɔ nɛ ɛlakɩ nabʋyʋ. Ye mbʋ, ñaɣ pana nɛ ŋwɛɛnɩ lɛɣtʋ ndʋ nɛ ŋɖɔkɩ-tʋ kpam. Ɛbɛ yɔɔ? Mbʋ pʋyɔɔ yɔ evebiya sakɩyɛ wɛ ɛjaɖɛ yɔɔ nɛ peyeki se pa-maɣmaɣ pa-lɩmaɣza yaa ɛzɩma pɩlakɩ-wɛ yɔ mbʋ eɖiyini-wɛ pa-lakasɩ taa. (Adu. 7:7; 29:11) Teelee, filimwaa, intɛrnɛɛtɩ nɛ réseaux sociaux waa pɩzɩɣ ɖɔɖɔ nɛ pɛwɛɛnɩ ɖoŋ ña-maɣzɩm nɛ ña-lakasɩ yɔɔ. Ɛlɛ ɛzɩma ŋpɩzɩɣ ŋla nɛ ŋwɛɛnɩ lɛɣtʋ ndʋ tɩsɩɣnɩ ɛyʋ se ɛmaɣzɩ ɛ-ñʋʋ taa camɩyɛ yɔ? Kajalaɣ lɛ, kpɛlɩkɩ Bibl paɣtʋ kila nɛ ŋmaɣzɩ mbʋ pʋyɔɔ a-yɔɔ ɖɔm wɛ wazaɣ yɔ pɩ-yɔɔ. Pʋwayɩ lɛ, yele nɛ paɣtʋ kila ana asɩnɩ-ŋ nɛ ŋkpaɣ lɩmaɣza wena akɛdɩɣnɩ Yehowa yɔ. (Kalɩ Keɣa 119:9.) Ye ŋñaɣ pana nɛ ŋwɛɛnɩ lɛɣtʋ ndʋ yɔ, pɩkaɣ-ŋ sɩnʋʋ nɛ ŋkɛ Krɩstʋ tʋ weyi ɛpɩ fezuu taa yɔ. (Adu. 2:​11, 12; Ebr. 5:14) Yele nɛ ɖɩna ɛzɩma lɛɣtʋ ndʋ tɩsɩɣnɩ ɛyʋ se ɛmaɣzɩ ɛ-ñʋʋ taa camɩyɛ yɔ tɩkaɣ-ŋ sɩnʋʋ hɔɔlɩŋ ɛnɛ ɩ-naalɛ ɩ-taa yɔ: (1) Wɛtʋ ndʋ ŋwɛnɩ koobiya halɩñɩma yɔɔ yɔ nɛ (2) lɩmaɣza wena ŋkpakɩɣ ño-wondu suu nɛ ña-tɩ ñɔɔzʋʋ hɔɔlʋʋ taa yɔ.

6. Lɛɣtʋ ndʋ tɩsɩɣnɩ ɛyʋ se ɛmaɣzɩ ɛ-ñʋʋ taa camɩyɛ yɔ, ɛzɩma tɩpɩzɩɣ nɛ tɩsɩnɩ evebu nɛ ɛwɛɛnɩ ñamtʋ koobiya halɩñɩma yɔɔ?

⁶ Lɛɣtʋ ndʋ tɩsɩɣnɩ ɛyʋ se ɛmaɣzɩ ɛ-ñʋʋ taa camɩyɛ yɔ tɩkaɣ-ŋ sɩnʋʋ nɛ ŋwɛɛnɩ ñamtʋ halaa yɔɔ. Koobu abalɩñɩnʋ nɔɔyʋ pɩzɩɣ nɛ ɛsɔɔlɩ koobu halɩñɩnʋ nɔɔyʋ tɔm nɛ ɛñɩnɩɣ se ɛtɩlɩ-ɩ nɛ pɩkɩlɩ, nɛ pɩmʋnɩ mbʋ. Paa mbʋ yɔ, evebu weyi ɛwɛnɩ lɛɣtʋ ndʋ tɩsɩɣnɩ ɛyʋ se ɛmaɣzɩ ɛ-ñʋʋ taa camɩyɛ yɔ, ɛɛkaɣ yɔɔdʋʋ tɔm yaa ɛɛkaɣ maʋ tɔm natʋyʋ yaa ɛɛkaɣ labʋ nabʋyʋ nɛ piyele nɛ koobu halɩñɩnʋ ɛnʋ ɛmaɣzɩ se ɛñɩnɩɣ se ɛɖanɩ-ɩ. Ɛlɛ ye koobu abalɩñɩnʋ ɛnʋ ɛñɩnɩɣ  se ɛɖanɩ koobu halɩñɩnʋ ɛnʋ nɛ pɔɖɔkɩ nesi yɔ kalɩpiyeke. (1 Tim. 5:​1, 2) Ye ɛwɛɛ nɛ ɛɖanɩɣ koobu halɩñɩnʋ nɔɔyʋ yɔ, pɩwɛɛ se ɛkandɩyɩ koobu halɩñɩnʋ ɛnʋ ɛ-hɩɖɛ kɩbanɖɛ yɔɔ. Ɛzɩma tɩyɛ? Ɛɛkaɣ yebu se ɛ nɛ ɩ pɛwɛɛ pe-ɖeke ɖoŋnɔɔyʋ nɛ nɔɔyʋ fɛyɩ pɔ-cɔlɔ.—1 Kɔr. 6:18.

7. Lɛɣtʋ ndʋ tɩsɩɣnɩ ɛyʋ se ɛmaɣzɩ ɛ-ñʋʋ taa camɩyɛ yɔ, ɛzɩma tɩpɩzɩɣ nɛ tɩsɩnɩ evebu e-wondu suu nɛ ɛ-tɩ ñɔɔzʋʋ hɔɔlʋʋ taa?

⁷ Mbʋ evebu pɩzɩɣ nɛ ɛtasɩ labʋ nɛ pɩwɩlɩ se ɛwɛnɩ lɛɣtʋ ndʋ tɩsɩɣnɩ ɛyʋ se ɛmaɣzɩ ɛ-ñʋʋ taa camɩyɛ yɔ, mbʋ lɛ se ɛlɩzɩ wondu ndʋ esuu yɔ nɛ ɛzɩma ɛñɔɔzʋʋ ɛ-tɩ yɔ camɩyɛ. Ðoŋ ɖoŋ lɛ, mba palɩzɩɣ wondu kɩfatʋ ndʋ ɛyaa suu yɔ yaa mba peseɣtiɣ ɛyaa se paya wondu ndʋ yɔ paañaŋ Yehowa nɛ pacakɩ ɖɔɖɔ wezuu kɩdɛkɛdʋʋ. Pʋyɔɔ lɛ, wondu ndʋ palɩzɩɣ yɔ tɩɖɔkʋʋ ɛyaa kpaɖɩɩɩ yaa wondu ndʋ palɩzɩɣ yɔ abalaa nabɛyɛ suu-tʋ lɛ pɛwɛ ɛzɩ halaa yɔ. Evebu weyi eɖiɣni pɩʋ fezuu taa yɔ, ɛɛlɩzɩɣ wondu ndʋ esuu yɔ lɛ eyeki se Bibl paɣtʋ kila iɖiyi-i nɛ ɛmaɣzɩɣnɩ ɖɔɖɔ mba pahaɣ kɩɖaʋ kɩbaŋʋ ɛgbɛyɛ taa yɔ. Ɛpɩzɩɣ nɛ ɛpɔzɩ ɛ-tɩ se: «Wondu ndʋ malɩzɩɣ se monsuu yɔ, tɩwɩlɩɣ se mɛwɛnɩ maɣzɩm mbʋ pɩmʋnaa yɔ nɛ mañaŋ ɛyaa lalaa na? Ɛzɩma monsuu wondu yɔ, pɩwɛɣ ɛyaa lalaa kɛlɛʋ se pana se mɛnkɛ Yehowa sɛyʋ na?» (1 Kɔr. 10:​31-33; Tiiti 2:6) Evebu weyi ɛwɛnɩ lɛɣtʋ ndʋ tɩsɩɣnɩ ɛyʋ se ɛmaɣzɩ ɛ-ñʋʋ taa camɩyɛ yɔ, pɩtɩkɛ e-koobiya ɖeke ñaŋnɩ-ɩ, ɛlɛ ɛ-tɔm kɛdɩɣnɩ Yehowa ɖɔɖɔ.

8. Ɛzɩma evebu pɩzɩɣ nɛ ɛkɛ ɛyʋ weyi papɩzɩɣ nɛ pataa-ɩ liu yɔ?

⁸ Kɛ ɛyʋ weyi papɩzɩɣ nɛ pataa-ɩ liu yɔ. Evebu weyi papɩzɩɣ nɛ pataa-ɩ liu yɔ, ɛlakɩ tʋma wena paɖʋʋ-ɩ yɔ a-tɩŋa camɩyɛ. (Luka 16:10) Yele nɛ ɖɩna kɩɖaʋ kɩbaŋʋ ŋgʋ Yesu hawa yɔ. Ɛtaawɛɛ feendu nɛ ɛtaalakɩ kaakendu tʋma wena paɖʋ-ɩ yɔ a-yɔɔ kpa. Ɛlɛ ɛlabɩ tʋma wena payɩ Yehowa ɖʋ-ɩ yɔ halɩ pɩkpɛndɩnɩ alɩwaatʋ ndʋ pɩɩwɛ-ɩ kaɖɛ se ɛlabɩ-yɛ yɔ. Ɛɛsɔɔlɩ ɛyaa, kɔzɩ kɔzɩ ɛ-tɔmkpɛlɩkɩyaa, nɛ etisi faaa nɛ ɛcɛlɩ e-wezuu pɔ-yɔɔ. (Yoh. 13:1) Ɛzɩ Yesu yɔ, ñaɣ pana nɛ ŋla tʋma wena payɩ paɖʋʋ-ŋ yɔ. Ye ŋŋsɩŋ ɛzɩma pɩwɛɛ se ŋla tʋmɩyɛ naɖɩyɛ yɔ, wɛɛnɩ tɩ luzuu nɛ ŋpɔzɩ koobiya mba papɩ fezuu taa yɔ se pasɩnɩ-ŋ. Taaɖʋ ña-tɩ kamaɣ tʋma wena paɖʋʋ-ŋ yɔ a-taa, ŋgʋ ŋpɩzɩɣ ŋla nɛ pɩcɛzɩ mbʋ. (Roma 12:11) Ɛlɛ la ña-tʋma camɩyɛ nɛ ŋtɛm-yɛ ɛzɩ ‘Yehowa ŋlakɩ-yɛ yɔ, nɛ pɩtaawɛɛ ɛzɩ ɛyaa ŋlakɩ-yɛ yɔ.’ (Kol. 3:23) Toovenim taa lɛ, ŋtɩtalɩ pilim, pʋyɔɔ lɛ tɩlɩ ño-ɖoŋ kamaɣ nɛ ye picoɖi-ŋ hɔɔlʋʋ nakʋyʋ taa yɔ ŋtisi se picoɖi-ŋ.—Adu. 11:2.

9. Ɛbɛ yɔɔ pɩpɔzʋʋ se evebu ɛkpɛlɩkɩ lɛɣtʋ ndʋ tɩsɩɣnɩ-ɩ e-wezuu caɣʋ taa paa evemiye nɖɩ yɔ?

⁹ Pɩsa nɛ ŋpɩsɩ Krɩstʋ tʋ weyi ɛpɩ fezuu taa yɔ lɛ, pɩkaɣ pɔzʋʋ se ŋkpɛlɩkɩ lɛɣtʋ ndʋ tɩsɩɣnɩ-ŋ ñe-wezuu caɣʋ taa paa evemiye nɖɩ yɔ. Lɛɣtʋ ndʋ, tɩkaɣ-ŋ sɩnʋʋ nɛ ŋtisi nɛ ŋla tʋma wena paɖʋʋ-ŋ ɛgbɛyɛ taa yɔ, ŋhiɣ tʋmɩyɛ nɛ ŋcɔnɩ ña-kɩcɛyɩm yaa ñɔ-hɔʋ kɩcɛyɩm ɖeɖe, nɛ tɩsɩɣnɩ-ŋ ɖɔɖɔ nɛ taabalɩyɛ kɩbanɖɛ  wɛɛ ña nɛ lalaa mɩ-hɛkʋ taa. Yele nɛ ɖɩna kɩɖaŋ nɩɩyɩ.

10-11. Ye evebu nɔɔyʋ ɛsɩm tɔm kalʋʋ nɛ tɔm maʋ camɩyɛ yɔ, ɛzɩma pɩkaɣ wazʋʋ ɛ-maɣmaɣ nɛ pɩtɛ pɩwazɩ ɛgbɛyɛ? (Keɣa 1:​1-3) (Cɔnɩ ɖɔɖɔ kɩlɛmʋʋ.)

¹⁰ Kpɛlɩkɩ tɔm kalʋʋ nɛ tɔm maʋ camɩyɛ. Bibl yɔɔdʋʋ se ɛyʋ weyi ɛkalɩɣ Ɛsɔ tɔm paa evemiye nɖɩ nɛ ɛmaɣzɩɣ tɩ-yɔɔ yɔ, ɛkɛ koboyaɣ tʋ nɛ pɩɖɔŋnɩ-ɩ camɩyɛ. (Kalɩ Keɣa 1:​1-3.) Ye abalʋ nɔɔyʋ ɛkalɩɣ Bibl paa evemiye nɖɩ yɔ, ɛkaɣ tɩlʋʋ Yehowa lɩmaɣza nɛ pɩkaɣ-ɩ sɩnʋʋ nɛ ɛmaɣzɩ camɩyɛ nɛ ɛtɩlɩ ɛzɩma pɩwɛɛ se ɛlabɩnɩ Masɩ tʋmɩyɛ camɩyɛ yɔ. (Adu. 1:​3, 4) Abalaa mba palakɩ mbʋ yɔ, mba pɩpɔzʋʋ ɛgbɛyɛ taa. Ɛbɛ yɔɔ?

¹¹ Abalaa mba papɩzɩɣ tɔm wɩlʋʋ nɛ patɩŋɩɣnɩ Bibl yɔɔ nɛ patasɩɣ ɛyaa lɔŋ yɔ, mba pɩpɔzʋʋ ɛgbɛyɛ taa koobiya. (Tiiti 1:9) Ye ŋsɩm tɔm kalʋʋ nɛ tɔm maʋ camɩyɛ yɔ, pɩsɩɣnɩ-ŋ nɛ ŋñɔɔzɩ tɔm yɔɔdʋʋ nɛ tɔm cosuu mbʋ pɩwazɩɣ koobiya nɛ pɩkpazɩ-wɛ ɖoŋ yɔ. Ŋkaɣ pɩzʋʋ ɖɔɖɔ nɛ ŋma tɔm ndʋ tɩsɩɣnɩ-ŋ yɔ alɩwaatʋ ndʋ ŋkpɛlɩkɩɣ nɛ alɩwaatʋ ndʋ ŋwelisiɣ samaɣ taa tɔm yɔɔdʋʋ nabʋyʋ ɛgbɛyɛ taa nɛ kigbeɣliŋ taa yɔ. Tɔm ndʋ ŋmaɣ yɔ tɩkaɣ-ŋ sɩnʋʋ nɛ ŋcɛyɩsɩ ñe-tisuu nɛ ŋtɛ ŋkpazɩ lalaa ɖoŋ.

12. Ɛbɛ kaɣ-ŋ sɩnʋʋ nɛ ŋwelisiɣni lalaa camɩyɛ nɛ ŋyɔɔdʋʋnɩ-wɛ camɩyɛ?

¹² Kpɛlɩkɩ ɛzɩma pɩwɛɛ se ŋwelisini lalaa camɩyɛ nɛ ŋyɔɔdɩnɩ-wɛ camɩyɛ yɔ. Pɩpɔzʋʋ se abalʋ weyi ɛkɛ Krɩstʋ tʋ yɔ ɛkpɛlɩkɩ ɛzɩma pɩwɛɛ se ewelisini lalaa camɩyɛ nɛ ɛyɔɔdɩnɩ-wɛ camɩyɛ yɔ. Pʋ-tɔbʋʋ lɛ se pɩwɛɛ se ewelisini lalaa nɛ ɛnɩɩ pa-lɩmaɣza nɛ ɛzɩma pɩlakɩ-wɛ yɔ pɩ-taa camɩyɛ. (Adu. 20:5) Ɛ nɛ nɔɔyʋ paayɔɔdʋʋ lɛ, ɛpɩzɩɣ ɛkpɛlɩkɩ nɛ ɛtɩlɩ mbʋ nɔɔ ŋga ɛyʋ ɛnʋ ɛyɔɔdʋʋna yɔ kawɩlɩɣ yɔ. Ɛpɩzɩɣ ɛkpɛlɩkɩ nɛ ɛtɩlɩ ɖɔɖɔ mbʋ ɛyʋ ɛnʋ ɛ-ɛsɩndaa wɛtʋ nɛ ɛzɩma ɛlakɩnɩ e-tomnaɣ pilinzi tʋmɩyɛ yɔ pɩwɩlɩɣ yɔ. Ŋŋpɩzɩɣ nɛ ŋla mbʋ ye ŋŋkpakɩɣ alɩwaatʋ nɛ ña nɛ lalaa ɩcakɩ nɛ ɩkɛdɩɣ yɔ. Ye ŋtɩŋɩɣnɩ message waa yɔɔ paa ɛzɩmtaa nɛ ŋyɔɔdʋʋnɩ lalaa yɔ, pɩkaɣ-ŋ wɛʋ kaɖɛ se ña nɛ wɛ ɩkɛdɩ camɩyɛ alɩwaatʋ ndʋ ɩkatɩɣ ɖama yɔ. Pʋyɔɔ lɛ, ñɩnɩ nʋmɔŋ weyi ɩ-yɔɔ ŋpɩzɩɣ ŋtɩŋna nɛ ña nɛ lalaa ɩkatɩ nɛ ɩla kɛdaɣ yɔ.—2 Yoh. 12.

13. Ɛbɛ ɖɔɖɔ pɩwɛɛ se evebu ɛkpɛlɩkɩ? (1 Timootee 5:8) (Cɔnɩ ɖɔɖɔ kɩlɛmʋʋ.)

¹³ Kpɛlɩkɩ ɛzɩma pɩwɛɛ se ŋcɔnɩ ña-kɩcɛyɩm ɖeɖe yɔ. Pɩpɔzʋʋ se koobu abalɩñɩnʋ weyi ɛpɩ fezuu taa yɔ ɛpɩzɩ nɛ ɛcɔnɩ ɛ nɛ ɛ-hɔʋ pa-kɩcɛyɩm ɖeɖe. (Kalɩ 1 Timootee 5:8.) Ajɛɛ naayɛ taa lɛ, evebiya pɩzɩɣ nɛ pɛkpɛlɩkɩ tʋma naayɛ pa-lʋlɩyaa cɔlɔ yaa pɔ-hɔʋ taa tʋ nɔɔyʋ cɔlɔ. Ajɛɛ lɛɛna taa lɛ, evebu nɔɔyʋ pɩzɩɣ nɛ ɛkpɛlɩkɩ tadɩyɛ labʋ yaa tʋmɩyɛ naɖɩyɛ labʋ alɩwaatʋ ndʋ ɛwɛ sukuli taa yɔ. Paa pɩtɩɩkɛ suwe yɔ, pɩwɛɣ ɖeu se ŋkpɛlɩkɩ lɛɣtʋ ndʋ tɩsɩɣnɩ-ŋ se ŋhiɣ tʋmɩyɛ yɔ. (Tʋma 18:​2, 3; 20:34;  Efɛz. 4:28) Ñaɣ pana nɛ pasɩmɩ-ŋ se ŋkɛ ɛyʋ weyi ɛlakɩ tʋmɩyɛ nɛ kpekpeka yɔ, nɛ ye ŋpaɣzɩ tʋmɩyɛ naɖɩyɛ yɔ, ñaɣ pana nɛ ŋtɛm-ɖɩ. Ye ŋlakɩ mbʋ yɔ, pɩtʋʋ fɛyɩ se ŋkaɣ hiɣu tʋmɩyɛ nɛ ŋŋlesiɣ-ɖɩ. Wɛtʋ kɩbandʋ nɛ lɛɣtʋ ndʋ tɩ-tɔm ɖɩyɔɔdaa yɔ tɩpɩzɩɣ ɖɔɖɔ nɛ tɩsɩnɩ koobu abalɩñɩnʋ nɔɔyʋ nɛ ɛla tʋma wena aɖaŋɩ-ɩ nɛ ɛsɩndaa yɔ. Iyele nɛ ɖɩna tʋma ana a-taa naayɛ.

14. Ɛzɩma evebu pɩzɩɣ nɛ ɛñɔɔzɩ ɛ-tɩ nɛ ɛla alɩwaatʋ tɩŋa Ɛsɔ sɛtʋ tʋmɩyɛ?

¹⁴ Ŋpɩzɩɣ nɛ ŋpɩsɩ alɩwaatʋ tɩŋa Ɛsɔ sɛtʋ tʋmlaɖʋ. Koobiya abalɩñɩma mba papɩ fezuu taa yɔ, pa-taa sakɩyɛ paɣzɩ alɩwaatʋ tɩŋa Ɛsɔ sɛtʋ tʋmɩyɛ pe-evebitu taa. Nʋmɔʋ lɩzʋʋ tʋmɩyɛ sɩɣnɩ evebu se ɛkpɛlɩkɩ ɛzɩma ɛ nɛ ɛyaa ndɩ ndɩ pɛkpɛndɩ nɛ pala tʋmɩyɛ nɔɔ kʋɖʋmaɣ taa yɔ. Ðɩsɩɣnɩ-ɩ ɖɔɖɔ nɛ ɛkpɛlɩkɩ ɛzɩma ɛlabɩnɩ liidiye nɖɩ ehikiɣ yɔ tʋmɩyɛ camɩyɛ nɛ ɛtaawɛɛkɩ-ɖɩ yem yɔ. (Filp. 4:​11-13) Ye ŋcaɣ se ŋla alɩwaatʋ tɩŋa Ɛsɔ sɛtʋ tʋmɩyɛ yɔ, ŋpɩzɩɣ ŋpaɣzɩnɩ nʋmɔʋ lɩzʋʋ sɩnʋʋ tʋmɩyɛ. Ɛyaa sakɩyɛ lakɩ nʋmɔʋ lɩzʋʋ sɩnʋʋ tʋmɩyɛ alɩwaatʋ natʋyʋ nɛ pɩsɩɣnɩ-wɛ nɛ papaɣzɩ paa ɖooye nʋmɔʋ lɩzʋʋ tʋmɩyɛ. Paa ɖooye nʋmɔʋ lɩzʋʋ tʋmɩyɛ pɩzɩɣ pɩsɩnɩ-ŋ nɛ ŋla alɩwaatʋ tɩŋa Ɛsɔ sɛtʋ tʋma lɛɛna; a-taa naayɛ lɛ Ɛsɔ sɛtʋ kuduyuŋ maʋ yaa Betɛɛlɩ taa tʋmɩyɛ labʋ.

15-16. Ɛbɛ pɩzɩɣ pɩsɩnɩ evebu nɛ ɛpɩsɩ ɛgbɛyɛ taa tʋmlaɖʋ yaa ɛgbɛyɛ taa ɛzʋtʋyʋ?

¹⁵ Ŋpɩzɩɣ nɛ ŋpɩsɩ ɛgbɛyɛ taa tʋmlaɖʋ yaa ɛgbɛyɛ taa ɛzʋtʋyʋ. Pɩwɛɛ se koobiya abalɩñɩma ɩɖʋ pa-tɩ kaɖʋwa se pañakɩ pana nɛ papɩsɩ ɛgbɛyɛ taa ɛzʋtʋyaa nɛ pasɩnɩ po-koobiya. Bibl yɔɔdʋʋ se abalaa mba pañɩnɩɣ se patalɩ kaɖʋwa ŋga yɔ, «[pɔsɔɔlɩ] tʋmɩyɛ kɩbanɖɛ.» (1 Tim. 3:1) Pʋcɔ nɛ koobu abalɩñɩnʋ pɩsɩ ɛgbɛyɛ taa ɛzʋtʋyʋ lɛ, pɩpɔzʋʋ se ɛkɛ ɛgbɛyɛ taa tʋmlaɖʋ. Ɛgbɛyɛ taa tʋmlaɖaa sɩɣnɩ ɛgbɛyɛ taa ɛzʋtʋyaa hɔɔlɩŋ sakɩyɛ taa. Ɛgbɛyɛ taa ɛzʋtʋyaa nɛ ɛgbɛyɛ taa tʋmlaɖaa pasɩɣnɩ po-koobiya nɛ tɩ luzuu nɛ posusuu tɔm nɛ kpekpeka. Evebiya pɩzɩɣ nɛ pamʋna se pɛkɛ ɛgbɛyɛ taa tʋmlaɖaa halɩ paa pɛkɛ piya evelisi yɔ. Nɛ halɩ ɛgbɛyɛ taa tʋmlaɖʋ weyi ɛmʋnaa yɔ, papɩzɩɣ nɛ paha-ɩ waɖɛ nɛ ɛpɩsɩ ɛgbɛyɛ taa ɛzʋtʋyʋ paa ɛcɛzɩ pɩnzɩ 20 nɛ pitileɖi yɔ.

¹⁶ Ɛbɛ pɩzɩɣ nɛ pɩsɩnɩ-ŋ nɛ ŋmʋna se paha-ŋ wala ana? Bibl yɔɔdɩ wɛtʋ kɩbandʋ ndʋ pɩpɔzʋʋ se ŋwɛɛna nɛ paha-ŋ wala ana yɔ tɩ-tɔm. Nɛ pʋcɔ nɛ ŋwɛɛnɩ wɛtʋ kɩbandʋ ndʋ lɛ, pɩwɛɛ se ŋsɔɔlɩ Yehowa, ñɔ-hɔʋ taa mba nɛ ɛgbɛyɛ taa koobiya. (1 Tim. 3:​1-13; Tiiti 1:​6-9; 1 Pɩy. 5:​2, 3) Ñaɣ pana nɛ ŋnɩɩ paa wɛtʋ kɩbandʋ ndʋ lɛ tɩ-taa. Tɩmnɩ Yehowa se ɛsɩnɩ-ŋ nɛ ŋwɛɛnɩ wɛtʋ kɩbandʋ ndʋ. c

17. Ɛbɛ pɩzɩɣ pɩsɩnɩ evebu nɛ ɛñɔɔzɩ ɛ-tɩ nɛ ɛpɩsɩ walʋ nɛ hɔʋ ñʋʋdʋ? (Cɔnɩ ɖɔɖɔ kɩlɛmʋʋ.)

 ¹⁷ Ŋpɩzɩɣ nɛ ŋpɩsɩ walʋ nɛ hɔʋ ñʋʋdʋ. Ɛzɩ Yesu yɔɔdʋʋ yɔ, koobiya abalɩñɩma mba papɩ fezuu taa yɔ pa-taa nabɛyɛ lɩzɩɣ se pacakɩ ɛɖandʋ. (Mat. 19:12) Ɛlɛ ye ŋlɩzaa se ŋkpakɩɣ halʋ yɔ, ŋkaɣ tasʋʋ wɛnʋʋ sʋʋtʋ lɛɛtʋ. Ŋpɩsɩɣ walʋ nɛ hɔʋ ñʋʋdʋ. (1 Kɔr. 11:3) Yehowa sɔɔlaa se abalʋ ɛsɔɔlɩ ɛ-halʋ nɛ ɛcɔnɩ ɛ-yɔɔ tomnaɣ yɔɔ nɛ ɛkɛnɩ-ɩ taabalʋ kɩbanʋ nɛ ɛcɔnɩ e-fezuu taa kɩcɛyɩm ɖeɖe. (Efɛz. 5:​28, 29) Wɛtʋ kɩbandʋ nɛ lɛɣtʋ ndʋ tɩ-tɔm ɖɩyɔɔdɩ tɔm ñʋʋ kʋnɛ kɩ-taa nɛ pɩɖɛɛ yɔ, tɩkaɣ-ŋ sɩnʋʋ nɛ ŋkɛ walʋ kɩbanʋ. Tɩ-taa natʋyʋ yɔ: Wɛɛnɩ lɛɣtʋ ndʋ tɩsɩɣnɩ-ŋ se ŋmaɣzɩ ña-ñʋʋ taa camɩyɛ yɔ, wɛɛnɩ ñamtʋ halaa yɔɔ nɛ ŋkɛ ɛyʋ weyi papɩzɩɣ nɛ pataa-ɩ liu yɔ. Tɩkaɣ-ŋ sɩnʋʋ nɛ ŋñɔɔzɩ ña-tɩ camɩyɛ nɛ ŋkɛ walʋ nɛ hɔʋ ñʋʋdʋ kɩbanʋ.

18. Ɛbɛ pɩzɩɣ pɩsɩnɩ evebu nɛ ɛñɔɔzɩ ɛ-tɩ nɛ ɛpɩsɩ caja?

¹⁸ Ŋpɩzɩɣ nɛ ŋpɩsɩ caja. Ŋtɛŋ halʋ kpaɣʋ lɛ, pʋtɔma ŋpɩsɩɣ caja. Ɛzɩma Yehowa kɩɖaʋ pɩzɩɣ kɩsɩnɩ-ŋ nɛ ŋkɛ caja kɩbanʋ. Ŋpɩzɩɣ nɛ ŋkpɛlɩkɩ lɔŋ sakɩyɛ ɛ-cɔlɔ. (Efɛz. 6:4) Yehowa heyi ɛ-pɩyalʋ Yesu kaɣlaa se ɛsɔɔlɩ-ɩ nɛ ɛ-tɔm kɛdɩnɩ-ɩ. (Mat. 3:17) Ye ŋpɩsɩ caja yɔ, ñaɣ pana nɛ ŋheyiɣ ñe-piya ɖoŋ ɖoŋ se ŋsɔɔlɩ-sɩ. Saŋ-sɩ ɖoŋ ɖoŋ kɩbandʋ ndʋ sɩlakɩ yɔ tɩ-yɔɔ. Cajanaa mba pamaɣzɩɣnɩ Yehowa kɩɖaʋ yɔ, pasɩɣnɩ pe-piya nɛ sɩpɩsɩ Krɩstʋ ñɩma abalɩñɩma nɛ halɩñɩma mba papɩ fezuu taa yɔ. Ye ŋcɔŋnɩ ñɔ-hɔʋ taa mba nɛ ɛgbɛyɛ taa koobiya yɔɔ nɛ sɔɔlɩm yɔ nɛ ye ŋñakɩ pana nɛ ŋlɩzɩɣ sɔɔlɩm nɛ ŋwɩlɩɣ-wɛ nɛ ŋheyiɣ-wɛ se pamʋ ñɩm ñɛ-ɛsɩndaa yɔ, pɩsɩɣnɩ-ŋ nɛ ŋñɔɔzɩ ña-tɩ nɛ ŋkɛ caja kɩbanʋ. (Yoh. 15:9) Pɩkaɣ-ŋ sɩnʋʋ nɛ ŋpɩsɩ walʋ kɩbanʋ nɛ caja kɩbanʋ cee wayɩ. Ɛlɛ lɛɛlɛɛyɔ lɛ, ŋkaɣ wɛʋ wazaɣ Yehowa ɛsɩndaa, ñɔ-hɔʋ taa nɛ ɛgbɛyɛ taa.

19-20. Ɛbɛ pɩzɩɣ pɩsɩnɩ evebiya nɛ papɩsɩ Krɩstʋ ñɩma mba papɩ fezuu taa yɔ? (Cɔnɩ takayaɣ huyuu yɔɔ kɩlɛmʋʋ.)

¹⁹ Evebiya, pɩpɔzʋʋ-mɩ pana ñaɣʋ pɩdɩɩfɛyɩ pʋcɔ nɛ ɩpɩsɩ Krɩstʋ ñɩma mba papɩ fezuu taa yɔ. Pɩwɛɛ se ɩmaɣzɩnɩ mba pahaɣ kɩɖaŋ kɩbaŋ yɔ, ɩñaɣ pana nɛ ɩwɛɛnɩ lɛɣtʋ ndʋ tɩsɩɣnɩ-mɩ se ɩmaɣzɩ mɩ-ñʋʋ taa camɩyɛ yɔ, ɩkɛ ɛyaa mba papɩzɩɣ nɛ pataa-wɛ liu yɔ, ɩkpɛlɩkɩ lɛɣtʋ ndʋ tɩsɩɣnɩ-mɩ mi-wezuu caɣʋ taa yɔ nɛ ɩñɔɔzɩ mɩ-tɩ nɛ ɩla tʋma wena aɖaŋ-mɩ nɛ ɛsɩndaa yɔ.

²⁰ Alɩwaatʋ ndʋ ŋmaɣzɩɣ mbʋ pɩwɛɛ se ŋla nɛ ŋpɩɩ fezuu taa yɔ pɩ-yɔɔ yɔ, pɩpɩzɩɣ nɛ pɩlabɩ-ŋ ɛzɩ pɩkɩlɩ kaɖɛ yɔ. Ɛlɛ ŋpɩzɩɣ nɛ ŋlabɩ-pʋ. Tɔzɩ se Yehowa sɔɔlɩ faaa se ɛsɩnɩ-ŋ. (Iza. 41:​10, 13) Pɩtasɩ lɛ, ñɛ-ɛgbɛyɛ taa koobiya kaɣ-ŋ sɩnʋʋ ɖɔɖɔ. Alɩwaatʋ ndʋ ŋpɩsɩɣ Krɩstʋ tʋ weyi ɛpɩ fezuu taa yɔ, ŋkaɣ hiɣu taa leleŋ ñe-wezuu caɣʋ taa. Mɩ evebiya, ɖɩsɔɔlɩ-mɩ. Tɛtɛ nɛ Yehowa wazɩ-mɩ pana wena ɩwɛɛ nɛ ɩñakɩ lɛɛlɛɛyɔ se ɩpɩsɩ Krɩstʋ ñɩma mba papɩ fezuu taa yɔ a-yɔɔ.—Adu. 22:4.