Kɩyakʋ nakʋyʋ, Nuvɛɛlɩ Zelandɩ koobu halɩñɩnʋ nɔɔyʋ cɔnɩ jw.org yɔɔ video nakʋyʋ. Video ŋgʋ, kɩyɔɔdʋʋ ɛzɩma Yehowa naɣ ɛyaa pʋtɔdɩyɛ nɛ ɛlakɩ nabʋyʋ keekee nɛ pɩwɩlɩɣ se ɛnaɣ pa-pʋtɔdɩyɛ yɔ. (Iza. 63:​7-9) Ɛkpaɣ lɩmaɣzɩyɛ se ɛsɩɣnɩ nɔɔyʋ nɛ pɩwɩlɩ se ɛɖɔŋ tɔm ndʋ ɛkpɛlɩkaa yɔ tɩ-yɔɔ. Evemiye nɖɩ, ɛlɩ wondu yabʋ lɛ, ɛkatɩ halʋ nɔɔyʋ, ɛlɛ taawɛɛnɩ ɖɩzʋyɛ, nɛ eheyi halʋ ɛnʋ se ɛyakɩ-ɩ tɔɔnaɣ. Halʋ ɛnʋ etisi. Koobu ɛnʋ ɛkɔnɩ-ɩ tɔɔnaɣ lɛ, ɛtɩŋnɩ Wiɖiyi kʋñɔmɩŋ kaɣ tɛm na? tɛ traktɩ yɔɔ nɛ ɛlɩzɩ-ɩ aseɣɖe pazɩ.

Pɩlabɩ mbʋ lɛ, halʋ ɛnʋ ɛpaɣzɩ wiu. Ɛyɔɔdaa se ɛ-lʋlɩyaa kaakpɛlɩkɩ-ɩ toovenim ɖooo ɛ-pɩjatʋ taa, ɛlɛ ɛtɩɖɛɛnɩ ɛsɩndaa nɛ eyebu toovenim yɔ, pɩlakɩ pɩnzɩ sakɩyɛ yɔ. Ɛlɛ pitileɖi yɔ ɛwɛʋ nɛ ɛtɩmɩɣnɩ Yehowa se ɛsɩnɩ-ɩ nɛ ɛpɩsɩ ɛ-cɔlɔ yɔ. Koobu halɩñɩnʋ ɛnʋ ɛha halʋ ɛnʋ Bibl nɛ pala Bibl kpɛlɩkʋʋ ɖʋtʋ. a

Ɛzɩ Yehowa yɔ, ɖɩpɩzɩɣ ɖɩwɩlɩ se ɖɩnaɣ ɛyaa pʋtɔdɩyɛ pɩkpɛndɩnɩ ɖɔ-hɔʋ taa mba nɛ ɛgbɛyɛ taa koobiya. Pɩtasɩ lɛ ye ɖɩñɩnɩɣ nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩlɩzɩ ɛyaa lalaa aseɣɖe yɔ, ɖɩwɩlɩɣ se ɖɩnaɣ pa-pʋtɔdɩyɛ.