TƆM ÑƲƲ ŊGƲ ÐƖKPƐLƖKƖƔ YƆ 51
HENDU 3 Ðo-ɖoŋ, ɖe-lidaʋ nɛ ɖa-sɩnɩyʋ
Ñɛ-ɛsɩtɛɣlɩm mʋ ñɩm Yehowa ɛsɩndaa
«Teɣzi mɛ-ɛsɩtɛɣlɩm ñɔ-tɔnɛ kokoɖe taa. Patɩma pɩ-tɔm ña-takayaɣ taa yaa we?»—KEƔ. 56:8.
LƖMAƔZƖYƐ SƆSƆÐƐ
Ðɩkaɣ naʋ se Yehowa sɩm siziŋ weyi ɖɩnɩɣ yɔ, nɛ ɛkaɣ hɛzʋʋ ɖa-laŋɩyɛ ɛzɩ pɩpɔzʋʋ yɔ.
1-2. Wɛtʋ ndʋ pɩzɩɣ tiyele nɛ ɖitisi ɛsɩtɛɣlɩm?
ÐE-WEZUU caɣʋ alɩwaatʋ natʋyʋ taa, ɖa-tɩŋa ɖitisi ɛsɩtɛɣlɩm. Nabʋyʋ taa, ɖitisiɣ taa leleŋ ɛsɩtɛɣlɩm. Pʋtɔma yɔ, ŋtisi ɛsɩtɛɣlɩm wɛtʋ ndʋ tɩha-ŋ taa leleŋ yɔ tɩ-taa, ɛzɩ alɩwaatʋ ndʋ ŋlʋlaa yaa alɩwaatʋ ndʋ ŋtɔzɩ tɔm kɩbandʋ natʋyʋ yɔɔ yaa alɩwaatʋ ndʋ ŋɖaɣnɩ katʋʋ ña-taabalʋ kɩbanʋ weyi ŋtɩna-ɩ pɩlakɩ pɩnzɩ sakɩyɛ yɔ.
2 Ɛlɛ ɖoŋ ɖoŋ lɛ, ɖitisiɣ ɛsɩtɛɣlɩm mbʋ pʋyɔɔ yɔ ɖɩwɛ laŋwɛɛkɩyɛ taa yaa ɖɩwɛ kʋñɔŋ nakʋyʋ taa. Ðɩpɩzɩɣ nɛ ɖiwii alɩwaatʋ ndʋ ɛyʋ weyi ɖɩtaɣ-ɩ liu yɔ ɛlakɩ nabʋyʋ nɛ pitibi-ɖʋ yɔɔɔ kpem yɔ. Ðɩpɩzɩɣ ɖɔɖɔ nɛ ɖiwii alɩwaatʋ ndʋ kʋdɔŋ nakʋyʋ yeki nɛ ɖɩnɩɣ siziŋ siŋŋ yɔ yaa alɩwaatʋ ndʋ ɖɛ-ɛyʋ kʋsɔɔlʋ nɔɔyʋ sɩkɩ yɔ. Ye ɖɩwɛ wɛtʋ ndʋ tɩ-taa yɔ, pɩpɩzɩɣ nɛ pɩlabɩ-ɖʋ ɛzɩ pɩɩlabʋ nayʋ Yereemii alɩwaatʋ ndʋ Babilɔɔnɩ mba ɖɩzɩ Yeruzalɛm yɔ. Yereemii yɔɔdaa se: «Lɩm lemisi lɩɣnɩ mɛ-ɛsɩndaa nɛ pikpeŋ . . . Mɛ-ɛsa tisiɣ ɛsɩtɛɣlɩm kaahɛzaɣ, pɩɩsɩŋɩɣ.»—Kʋñ. 3:48, 49.
3. Alɩwaatʋ ndʋ Yehowa sɛyaa nɩɣ siziŋ yɔ, ɛzɩma pɩlakɩ-ɩ? (Izaayii 63:9)
3 Yehowa sɩm camɩyɛ tam ɛzɩma kʋñɔmɩŋ yeba nɛ ɖitisi ɛsɩtɛɣlɩm yɔ. Bibl heyiɣ-ɖʋ se ɛsɩm kʋñɔmɩŋ weyi payɩ ɖɩkatɩɣ yɔ, nɛ ewelisiɣni-ɖʋ alɩwaatʋ ndʋ ɖitendiɣ-i se ɛsɩnɩ-ɖʋ yɔ. (Keɣ. 34:15) Ɛlɛ paa Yehowa ɛnaɣ-ɖʋ nɛ ewelisiɣni-ɖʋ yɔ, ɛɛsɩɣnɩ peeɖe. Ɛkɛ caja kɩbanʋ weyi ɛsɔɔlɩ-ɖʋ yɔ, nɛ pʋyɔɔ lɛ alɩwaatʋ ndʋ ɖiwiɣ yɔ, ɛwɛɣ laŋwɛɛkɩyɛ taa nɛ ɛlakɩ nabʋyʋ lɛɛ lɛɛ se ɛsɩnɩ-ɖʋ.—Kalɩ Izaayii 63:9.
4. (a) Bibl taa kɩɖaŋ weyi taa ɖɩkaɣ tazʋʋ? (b) Ɛbɛ kɩɖaŋ ɛnɩ ɩkpɛlɩkɩɣ-ɖʋ Yehowa yɔɔ?
4 Bibl taa, Yehowa heyiɣ-ɖʋ ɛzɩma pɩlakaɣ-ɩ alɩwaatʋ ndʋ ɛ-sɛyaa tisaɣ ɛsɩtɛɣlɩm yɔ nɛ ɛzɩma ɛɛsɩnɩ-wɛ yɔ pɩ-tɔm. Mbʋ pɩɩtalɩ Hana, Daviid nɛ Wiyaʋ Ezekiyaasɩ yɔ, pɩsɩɣnɩ-ɖʋ se ɖɩna ɛzɩma pɩɩlabɩ Yehowa nɛ ɛzɩma ɛsɩnɩ-wɛ yɔ. Ɛbɛ kaayeba nɛ petisi ɛsɩtɛɣlɩm? Petendi Yehowa se ɛsɩnɩ-wɛ lɛ, ɛzɩma ɛlaba? Nɛ ɛzɩma pa-kɩɖaŋ hɛzɩɣ ɖa-laŋɩyɛ alɩwaatʋ ndʋ ɖɩwɛɣ laŋwɛɛkɩyɛ taa, yaa alɩwaatʋ ndʋ ɛyʋ weyi ɖɩtaɣ-ɩ liu yɔ ɛlakɩ nabʋyʋ nɛ pitibi-ɖʋ yɔɔɔ kpem yɔ yaa alɩwaatʋ ndʋ ɖilesiɣ lidaʋ yɔ.
LAŊWƐƐKƖYƐ ƐSƖTƐƔLƖM
5. Ɛzɩma pɩlakaɣ Hana alɩwaatʋ ndʋ ɛkataɣ tɩlasɩ yɔ?
5 Hana kaakatɩ tɩlasɩ sakɩyɛ, nɛ nzɩ yebina nɛ ɛwɛɛ laŋwɛɛkɩyɛ sɔsɔɖɛ taa nɛ ewiɣ. Hana walʋ kaawɛnɩ halʋ lɛlʋ nɛ pɩtasɩnɩ-ɩ. Payaɣ halʋ ɛnʋ se Peniina, nɛ ɛwɩlaɣ Hana ñaŋ pɩdɩɩfɛyɩ. Pɩtasɩ lɛ, Hana kaakɛ kaalʋlaɣ ɛlɛ Peniina ñaawɛnɩ piya sakɩyɛ. (1 Sam. 1:1, 2) Ehoŋaɣ Hana kaahɛzaɣ mbʋ pʋyɔɔ yɔ ɛlɛ fɛyɩnɩ piya. Ye ñaawɛnɩ Hana lone taa ɛzɩma pɩɩlabɩ-ŋ? Pɩɖʋwaɣ Hana ɖɩwɩzɩyɛ siŋŋ «nɛ piyeki nɛ ewiliɣ nɛ ɛɛtɔkɩ,» nɛ ɛɛwɛ «laŋwɛɛkɩyɛ taa siŋŋ.»—1 Sam. 1:6, 7, 10.
6. Ɛbɛ Hana laba nɛ pɩhɛzɩ ɛ-laŋɩyɛ?
6 Ɛbɛ hɛzɩ Hana laŋɩyɛ? Mbʋ pɩsɩnɩ-ɩ yɔ pɩ-taa nabʋyʋ lɛ se ewobi Ɛsɔ sɛtʋ kɩɖanɖʋʋ tɛɛ ɖenɖe pɛsɛɣaɣ Yehowa yɔ. Ɛtalɩ peeɖe lɛ, «ɛpaɣzɩ tɩmnʋʋ Yehowa nɛ ewiɣ pɩfɛyɩ sum.» Pɩtɩla ɛɛwɛ Ɛsɔ sɛtʋ kɩɖanɖʋʋ kadaɣ nɔnɔɔ cɔlɔ. Etendi Yehowa se: ‘Na ña-lɩmɖʋyʋ kʋñɔŋ nɛ ŋtɔzɩ mɔ-yɔɔ nɛ taasɔɔ ña-lɩmɖʋyʋ yɔɔ.’ (1 Sam. 1:10b, 11) Hana tɩmnɩ Yehowa nɛ eheyi-i ɛzɩma pɩlakaɣ-ɩ yɔ. Alɩwaatʋ ndʋ Yehowa na ɛ-pɛlɛ kʋsɔɔlʋ ɛsɩtɛɣlɩm yɔ, pɩtʋʋ fɛyɩ se piitukuni-i siŋŋ.
7. Hana kuli ɛ-laŋɩyɛ nɛ eheyi Yehowa ɛ-taa tɔm lɛ, ɛzɩma pɩlabɩ-ɩ?
7 Alɩwaatʋ ndʋ Hana kuli ɛ-laŋɩyɛ nɛ eheyi Yehowa ɛ-taa tɔm nɛ Cɔjɔ kɩlɩm Elii ɖɔɖɔ hɛzɩ ɛ-laŋɩyɛ yɔ, ɛzɩma pɩlabɩ-ɩ? Kɛdaɣ yɔɔdʋʋ se: «Halʋ kpaɣ ɛ-nʋmɔʋ nɛ ɛɖɛɛ nɛ ɛtɔɔ, nɛ ɛ-ɛsɩndaa tɩtasɩ ñɩŋʋʋ.» (1 Sam. 1:17, 18) Paa wɛtʋ kaɖɛ ñɩndʋ ndʋ tɩ-taa Hana kaawɛɛ yɔ tɩtaalɛɣzɩta yɔ, ɛ-laŋɩyɛ hɛwa. Ɛɛta Yehowa liu se ɛnɩɣ ɛzɩma pɩlakɩ-ɩ yɔ pɩ-taa, nɛ ɛsɩm kala wena ɛkatɩɣ yɔ nɛ ɛɛwɛnɩ lidaʋ se ɛkaɣ-ɩ sɩnʋʋ. Nɛ mbʋ Yehowa laba ɖɔɖɔ. Ɛna ɛ-kʋñɔŋ, ewelisi ɛ-adɩma nɛ pʋwayɩ lɛ, ɛwazɩ-ɩ nɛ ɛlʋlɩ piya.—1 Sam. 1:19, 20; 2:21.
8-9. Ɛzɩ Ebree mba 10:24, 25 yɔɔdʋʋ yɔ, ɛbɛ yɔɔ pɩwɛɛ se ɖɩla mbʋ payɩ ɖɩpɩzɩɣ yɔ nɛ ɖiwolo kediɣzisi? (Cɔnɩ ɖɔɖɔ kɩlɛmʋʋ.)
8 Lɔŋ weyi pɩkpɛlɩkɩɣ-ɖʋ yɔ. Ŋwɛɛ nɛ ŋkatɩɣ tɩlasɩ nzɩ siyeki nɛ ŋtisiɣ laŋwɛɛkɩyɛ ɛsɩtɛɣlɩm yɔ? Pʋtɔma yɔ, ŋwɛɛ nɛ ŋwiɣ mbʋ pʋyɔɔ yɔ ñɔ-hɔʋ taa tʋ nɔɔyʋ yaa ña-taabalʋ nɔɔyʋ sɩba. Nɛ ye ŋwɛ wɛtʋ ndʋ tɩ-taa yɔ, pɩtɩla ŋsɔɔlʋʋ se ŋwɛɛ ñe-ɖeke, nɛ mbʋ pɩlakɩ ɛyaa tɩŋa. Ɛlɛ ɛzɩ Hana wobu Ɛsɔ sɛtʋ kɩɖanɖʋʋ tɛɛ nɛ pɩhɛzɩ ɛ-laŋɩyɛ nɛ pɩtɛ pɩkpazɩ-ɩ ɖoŋ yɔ, ña ɖɔɖɔ paa pɩnɩ-ŋ yaa ŋwɛ laŋwɛɛkɩyɛ taa ɛlɛ ŋwoki kediɣzisi yɔ, pɩpɩzɩɣ nɛ pɩhɛzɩ ña-laŋɩyɛ. (Kalɩ Ebree mba 10:24, 25.) Alɩwaatʋ ndʋ pakalɩɣ Bibl masɩ nzɩ sɩhɛzɩɣ laŋɩyɛ yɔ kediɣzisi taa yɔ, Yehowa pɩzɩɣ nɛ ɛsɩnɩ-ɖʋ nɛ ɖɩmaɣzɩ tɔm ndʋ tɩkpazɩɣ-ɖʋ ɖoŋ yɔ tɩ-yɔɔ nɛ ɖiyele maɣzʋʋ mbʋ pɩhaɣ-ɖʋ laŋwɛɛkɩyɛ yɔ pɩ-yɔɔ. Piyeki nɛ ɖa-laŋɩyɛ hɛɛ paa ɖɛ-wɛtʋ ɛtɩlɛɣzɩ kpaagbaa yɔ.
9 Ðe-kediɣzisi taa, ɖo-koobiya kpazɩɣ-ɖʋ ɖoŋ nɛ pawɩlɩɣ-ɖʋ sɔɔlɩm siŋŋ, nɛ ɖa-laŋɩyɛ hɛɣ alɩwaatʋ ndʋ ɖɩwɛɣ pɔ-cɔlɔ yɔ. (1 Tes. 5:11, 14) Iyele nɛ ɖɩna koobu abalɩñɩnʋ nɔɔyʋ kɩɖaʋ; ɛkɛ nʋmɔʋ lɩzɩyʋ kiya nɛ elesi ɛ-halʋ. Ɛyɔɔdaa se: «Halɩ nɛ sɔnɔ, mɛwɛɛ nɛ mewiɣ. Nabʋyʋ taa mancakɩ ɖoŋnɔɔyʋ men-ɖeke nɛ mewiɣ. Ɛlɛ kediɣzisi wobu kpazɩ-m ɖoŋ siŋŋ. Tɔm kɩbandʋ ndʋ mon-koobiya heyiɣ-m yɔ, nɛ tɔm ndʋ pocosuu kediɣzisi taa yɔ, tɩhɛzɩɣ ma-laŋɩyɛ pɩdɩɩfɛyɩ. Paa ɛzɩmtaa mowoki kediɣzaɣ lɛ, ma-laŋɩyɛ hɛɣ paa maawɛ laŋwɛɛkɩyɛ yaa nɩɣzɛ taa pʋcɔ nɛ mowolo yɔ.» Alɩwaatʋ ndʋ ɖiwoki kediɣzisi yɔ, Yehowa pɩzɩɣ ɛtɩŋnɩ ɖo-koobiya yɔɔ nɛ ɛsɩnɩ-ɖʋ.
Ðo-koobiya pɩzɩɣ nɛ pɛhɛzɩ ɖa-laŋɩyɛ (Cɔnɩ tayʋʋ 8-9)
10. Ye ɖɩwɛ laŋwɛɛkɩyɛ sɔsɔɖɛ taa yɔ, ɛzɩma ɖɩpɩzɩɣ nɛ ɖɩmaɣzɩnɩ Hana kɩɖaʋ?
10 Pɩtasɩ lɛ, Hana hiɣ laŋɩyɛ hɛzʋʋ mbʋ pʋyɔɔ yɔ ɛtɩmaɣnɩ Yehowa nɛ eheyiɣ-i ɛzɩma pɩlakɩ-ɩ yɔ. Ña ɖɔɖɔ ŋpɩzɩɣ nɛ ‘ŋɖʋzɩ ña-nɩɣzɛ kpeekpe Yehowa nesi tɛɛ,’ nɛ ŋwɛɛnɩ lidaʋ se ɛkaɣ welisuu ña-adɩma nɛ ɛsɩnɩ-ŋ. (1 Pɩy. 5:7) Mɩlaa nabɛyɛ kʋ koobu halɩñɩnʋ nɔɔyʋ walʋ. Koobu ɛnʋ ɛyɔɔdaa se: «Maawɛ laŋwɛɛkɩyɛ sɔsɔɖɛ taa nɛ mamaɣzaɣ se maakaɣ pɩzɩɣ nɛ mantasɩ hiɣu taa leleŋ kpa. Ɛlɛ mantɩmaɣnɩ man-Caa Yehowa weyi ɛsɔɔlɩ-m siŋŋ yɔ nɛ pɩhɛzɩ ma-laŋɩyɛ. Nabʋyʋ taa, mantaapɩzɩɣ se mehiɣ tɔm pee wena amʋnaa yɔ, ɛlɛ ɛnɩɣaɣ mɔn-tɔm taa. Maawɛ laŋwɛɛkɩyɛ sɔsɔɖɛ taa nɛ nɩɣzɛ taa lɛ, mantɩmaɣnɩ-ɩ se ɛha-m laŋhɛzɩyɛ. Mantɩmɩɣ mbʋ lɛ, ma-laŋɩyɛ hɛɣ kpaagbaa, piyekaɣ nɛ manpɩzɩɣ nɛ malakɩ mbʋ pɩɩwɛɛ se mala evemiye nɖɩ yɔ.» Ye ŋwɛ laŋwɛɛkɩyɛ taa nɛ ŋheyiɣ Yehowa ɛzɩma pɩlakɩ-ŋ yɔ, ɛnɩɣ ñɔ-tɔm taa nɛ ɛnɩɣ ñe-siziŋ. Paa mbʋ pɩhaɣ-ŋ nɩɣzɛ yɔ pɩkpɛndɩ pɩwɛɛ yɔ, Yehowa pɩzɩɣ nɛ ɛhɛzɩ ña-laŋɩyɛ nɛ ŋhiɣ laŋhɛzɩyɛ. (Keɣ. 94:19; Filp. 4:6, 7) Nɛ ɛkaɣ-ŋ wazʋʋ ña-tɩ ɖɔkʋʋ yɔɔ.—Ebr. 11:6.
ƐSƖTƐƔLƖM MBƲ ŊTISIƔ ALƖWAATƲ NDƲ ƐYƲ WEYI ŊTAƔ-Ɩ LIU YƆ ƐLAKƖ NABƲYƲ NƐ PITIBI-Ŋ YƆƆƆ YƆ
11. Alɩwaatʋ ndʋ Daviid katɩ kala yɔ, ɛzɩma pɩlabɩ-ɩ?
11 Daviid kaakatɩ kala sakɩyɛ e-wezuu caɣʋ taa, nɛ kala ana ayeba nɛ etisi ɛsɩtɛɣlɩm. Ɛyaa sakɩyɛ paɖaɣ-ɩ, nɛ halɩ ɛ-taabalaa nɛ ɛ-hɔʋ taa mba nabɛyɛ ñɩnaɣ se palabɩ-ɩ kɩdɛkɛdɩm. (1 Sam. 19:10, 11; 2 Sam. 15:10-14, 30) Alɩwaatʋ natʋyʋ taa ɛmawa se: «Amuza nɩ-m; ɖoo kpeekpe, mɛ-ɛsɩtɛɣlɩm yeba nɛ man-kaɖʋ sɩ lɩm; mewiwa nɛ mɛ-ɛsɩtɛɣlɩm wadɩ ma-ñalʋʋ yɔɔ.» Ɛbɛ yɔɔ pɩɩlabɩ Daviid mbʋ? Ɛyɔɔdaa se: «Mba payɩ pacaɣ-m tɔm yɔ pɔ-yɔɔ.» (Keɣ. 6:6, 7) Ɛyaa lalaa lakasɩ kaayeba nɛ Daviid nɩɩ siziŋ siŋŋ nɛ halɩ ewii kpem.
12. Ɛzɩ Daviid yɔɔdʋʋ Keɣa 56:8 taa yɔ, ɛbɛ ɛ-taa kaatɛmnaa?
12 Paa Daviid kaakatɩ kala yɔ, ɛ-taa kaatɛma se Yehowa sɔɔlɩ-ɩ. Ɛmawa se: «Yehowa kaɣ nɩʋ me-wiluu taŋ.» (Keɣ. 6:8) Alɩwaatʋ lɛɛtʋ taa, ɛma tɔm kɩbandʋ ndʋ ɖɩnaɣ Keɣa 56:8 taa yɔ. (Kalɩ Keɣa 56:8.) Ðɩkalɩɣ tɔm ndʋ lɛ, ɖɩnaɣ se Yehowa sɔɔlɩ-ɖʋ kpem nɛ ɛmaɣzɩɣ ɛzɩma pɩlakɩ-ɖʋ yɔ pɩ-yɔɔ. Pɩlakaɣ Daviid ɛzɩ Yehowa teɣzi ɛ-ɛsɩtɛɣlɩm kokoɖe naɖɩyɛ taa yaa ɛma pɩ-tɔm takayaɣ nakɛyɛ taa yɔ. Daviid taa kaatɛma se Yehowa naɣ siziŋ weyi ɛnɩɣ yɔ nɛ ɛtɔzʋʋ ɩ-yɔɔ. Ɛ-taa kaatɛma ɖɔɖɔ se pɩtasɩna se ɛ-Caa sɔɔlɩm tʋ sɩm kala wena ɛkatɩɣ yɔ lɛ, ɛsɩm ɖɔɖɔ ɛzɩma pɩlakɩ-ɩ yɔ.
13. Alɩwaatʋ ndʋ ɛyaa lalaa lakɩ nabʋyʋ nɛ pɩha-ɖʋ laŋwɛɛkɩyɛ yɔ, tɔm ndʋ yɔɔ pɩwɛɛ se ɖɩtɔzɩ? (Cɔnɩ ɖɔɖɔ kɩlɛmʋʋ.)
13 Lɔŋ weyi pɩkpɛlɩkɩɣ-ɖʋ yɔ. Ŋwɛɛ nɛ ŋnɩɣ siziŋ mbʋ pʋyɔɔ yɔ ɛyʋ weyi ŋtaɣ-ɩ liu yɔ ɛlabɩ nabʋyʋ nɛ pitibi-ŋ yɔɔɔ kpem yaa pɩha-ŋ laŋwɛɛkɩyɛ na? Pɩtɩla ŋwɛɛ nɛ ŋnɩɣ siziŋ mbʋ pʋyɔɔ yɔ ña nɛ weyi ɛɛwɛɛ nɛ ɛlakɩ ɖʋtʋ se ɛɖɔkʋʋ nesi yɔ eyeba nɛ mɩ-ɖanɩyɛ sɩɩ tɩnaɣ tuda, yaa pɩtɩla yɔ ñɛ-ɛyʋ kʋsɔɔlʋ nɔɔyʋ yebi Yehowa sɛʋ. Koobu nɔɔyʋ halʋ labɩ acɛyɛ; koobu ɛnʋ ɛyɔɔdaa se: «Pɩɩɖɩɣzɩ-m kpem se pɩtalɩ-m mbʋ. Maawɛ laŋwɛɛkɩyɛ nɛ pana taa nɛ pɩlakaɣ-m ɛzɩ mɛnfɛyɩ wazaɣ nakɛyɛ yɔ.» Ye ɛyʋ weyi ŋtaɣ-ɩ liu yɔ ɛlabɩ nabʋyʋ nɛ pitibi-ŋ yɔɔɔ yaa pɩha-ŋ laŋwɛɛkɩyɛ kpem yɔ, tɩlɩ se Yehowa ɛɛkaɣ-ŋ lɔʋ kpa nɛ ɛkaɣ-ŋ sɩnʋʋ nɛ ña-laŋɩyɛ hɛɛ. Koobu ɛnʋ ɛyɔɔdaa se: «Mɔnkɔm nɛ menɖiɣzina se ɖa nɛ ɛyaa ɖa-taabalɩyɛ pɩzɩɣ nɛ ɖɩcɛ, ɛlɛ Yehowa kɛ ɖa-Kaaʋ. Paa ɛbɛ ɛtɩɩlaba yɔ, ɛwɛ ɖɔ-cɔlɔ paa ɛzɩmtaa. Ɛɛkaɣ lɔʋ mba pɛwɛ siɣsiɣ ɛ-ɛsɩndaa yɔ.» (Keɣ. 37:28) Tɔzɩ ɖɔɖɔ se Yehowa sɔɔlɩ-ŋ nɛ pɩkpaɖɩ sɔɔlɩm mbʋ ɛyʋ pɩzɩɣ nɛ ɛwɩlɩ-ŋ yɔ. Ɛyʋ weyi ŋtaɣ-ɩ liu yɔ, paa ɛbɛ ɛtɩɩlaba nɛ pitibi-ŋ yɔɔɔ kpem yɔ, Yehowa ɛɛlɛɣzɩɣ lɩmaɣza wena ɛwɛnɩ ñɔ-yɔɔ yɔ, ŋmʋ ñɩm ɛ-ɛsɩndaa. (Roma 8:38, 39) Pɩwɛɛ se ŋtɔzɩ tɔm tʋnɛ tɩ-yɔɔ: Paa ɛbɛ ɛyʋ nɔɔyʋ ɛtɩɩlabɩ-ŋ yɔ, ña-Caa weyi ɛwɛ ɛsɔdaa yɔ ɛsɔɔlɩ-ŋ.
Keɣsi takayaɣ sɩnɩɣ-ɖʋ se ɖa-taa ɛtɛ se Yehowa ñɔtɩnɩ mba pa-laŋa pʋʋtaa yɔ (Cɔnɩ tayʋʋ 13)
14. Tɔm ndʋ tɩwɛ Keɣa 34:18 taa yɔ, ɛzɩma tɩhɛzɩɣ ɖa-laŋɩyɛ?
14 Alɩwaatʋ ndʋ ɛyʋ weyi ɖɩtaɣ-ɩ liu yɔ ɛlakɩ nabʋyʋ nɛ pɩha-ɖʋ laŋwɛɛkɩyɛ siŋŋ yɔ, tɔm ndʋ Daviid yɔɔdɩ Keɣa 34:18 taa yɔ, tɩpɩzɩɣ ɖɔɖɔ nɛ tɩhɛzɩ ɖa-laŋɩyɛ. (Kalɩ Keɣa 34:18.) Tɔm taa tazʋʋ takayaɣ nakɛyɛ yɔɔdaa se tɔm loyaɣ «mba pɛwɛ laŋwɛɛkɩyɛ taa yɔ» tɔbʋʋ pɩzɩɣ nɛ pɩkɛ «mba pɛfɛyɩnɩ lidaʋ nakʋyʋ yɔ.» Ɛzɩma Yehowa sɩɣnɩ mba pɩlakɩ-wɛ mbʋ yɔ? Ɛzɩ caja sɔɔlɩm tʋ nɔɔyʋ kpakʋʋ ɛ-pɩɣa ŋga kɛwɛ laŋwɛɛkɩyɛ taa yɔ nɛ ɛhɛzɩɣ ka-laŋɩyɛ yɔ, mbʋ ɖɔɖɔ Yehowa wɛ ɖɔ-cɔlɔ kpam nɛ ɛnɩɣ ɖe-siziŋ nɛ ɛsɔɔlaa se ɛsɩnɩ-ɖʋ alɩwaatʋ ndʋ ɛyʋ weyi ɖɩtaɣ-ɩ liu yɔ ɛlakɩ nabʋyʋ nɛ pɩha-ɖʋ laŋwɛɛkɩyɛ yɔ, yaa alɩwaatʋ ndʋ ɖilesiɣ nabʋyʋ yɔ. Ɛsɔɔlɩ siŋŋ se ɛhɛzɩ ɖa-laŋɩyɛ nɛ ɛsɩnɩ-ɖʋ nɛ ɖiyele siziŋ nɩʋ. Nɛ ɛha-ɖʋ lidaʋ kɩbaŋʋ ŋgʋ kɩsɩɣnɩ-ɖʋ se ɖɩlʋbɩnɩ kala wena ɖɩkatɩɣ lɛɛlɛɛyɔ yɔ.—Iza. 65:17.
ƐSƖTƐƔLƖM MBƲ ÐITISIƔ ALƖWAATƲ NDƲ ÐILESIƔ LIDAƲ YƆ
15. Ɛbɛ kaayeba nɛ Ezekiyaasɩ sʋʋ laŋwɛɛkɩyɛ taa nɛ piyele nɛ ewii siŋŋ?
15 Alɩwaatʋ ndʋ Yuuda Wiyaʋ Ezekiyaasɩ kaawɛnɩ pɩnzɩ 39 yɔ, ɛɛhɩnɩ kʋdɔŋ sɔsɔʋ nakʋyʋ. Yehowa kaatiyi nayʋ Izaayii se eheyi Ezekiyaasɩ se ɛsɩkɩnɩ kʋdɔŋ ŋgʋ. (2 Awi. 20:1) Pɩɩwɛ ɛzɩ Ezekiyaasɩ fɛyɩnɩ lidaʋ nakʋyʋ yɔ. Ezekiyaasɩ nɩ tɔm ndʋ lɛ, tɩha-ɩ laŋwɛɛkɩyɛ nɛ ewii siŋŋ. Piyeba nɛ ɛtɩmnɩ Yehowa siŋŋ.—2 Awi. 20:2, 3.
16. Ɛzɩma Yehowa cosi adɩma wena Ezekiyaasɩ labɩnɩ ɛsɩtɛɣlɩm yɔ a-yɔɔ?
16 Adɩma wena Ezekiyaasɩ labɩnɩ ɛsɩtɛɣlɩm yɔ, aatukuni Yehowa siŋŋ nɛ eheyi-i nɛ sɔɔlɩm se: «Manɩ ña-adɩma. Mana ñɛ-ɛsɩtɛɣlɩm. Na, mawaɣ ña-kʋdɔŋ.» Yehowa tɩŋnɩ Izaayii yɔɔ nɛ ɛlabɩ-ɩ tamaɣ se ɛkaɣ-ɩ sɔzʋʋ pɩnzɩ e-wezuu yɔɔ nɛ ɛkaɣ holuu Yeruzalɛm Asiirii mba nesi tɛɛ.—2 Awi. 20:4-6.
17. Ɛzɩma Yehowa sɩɣnɩ-ɖʋ alɩwaatʋ ndʋ kʋdɔŋ sɔsɔʋ nakʋyʋ cɛyɩɣ-ɖʋ yɔ? (Keɣa 41:3) (Cɔnɩ ɖɔɖɔ kɩlɛmʋʋ.)
17 Lɔŋ weyi pɩkpɛlɩkɩɣ-ɖʋ yɔ. Kʋdɔŋ nakʋyʋ cɛyɩɣ-ŋ nɛ pɩlakɩ-ŋ ɛzɩ paapɩzɩɣ nɛ pawaa-kʋ yɔ? Tɩmnɩ Yehowa nɛ ŋheyi-i ɛzɩma pɩlakɩ-ŋ yɔ, ɛkaɣ-ŋ welisinuu paa ŋwɛɛ nɛ ŋtɩmɩɣnɩ-ɩ nɛ ɛsɩtɛɣlɩm yɔ. Bibl yeki se ɖa-taa ɛtɛ se «pʋtɔdɩyɛ naʋ siŋŋ Caa nɛ laŋɩyɛ hɛzʋʋ kpeekpe tɛ Ɛsɔ» kaɣ hɛzʋʋ ɖa-laŋa ɖa-nazɩm kpeekpe taa. (2 Kɔr. 1:3, 4) Sɔnɔ, Yehowa ɛɛkaɣ yebu nɛ ɖa-kʋñɔmɩŋ kpeekpe sɩɩ tɩnaɣ ɛlɛ ɖɩpɩzɩɣ nɛ ɖɩtaa-ɩ liu se paa ɛzɩmtaa lɛ, ɛkaɣ-ɖʋ sɩnʋʋ. (Kalɩ Keɣa 41:3.) Yehowa tɩŋɩɣnɩ e-fezuu kiɖeɖeu yɔɔ nɛ ɛhaɣ-ɖʋ ɖoŋ, lɔŋsɩnɖɛ nɛ maɣzɩm taa laŋhɛzɩyɛ se ɖɩɖɔkɩ ɖa-laŋɩyɛ. (Adu. 18:14; Filp. 4:13) Ɛtɩŋɩɣnɩ ɖɔɖɔ Bibl yɔɔ nɛ ɛhaɣ-ɖʋ lidaʋ se cee wayɩ ɛkaɣ ɖɩzʋʋ kʋdɔmɩŋ.—Iza. 33:24.
Yehowa kaɣ cosuu ɖa-adɩma yɔɔ nɛ ɛha-ɖʋ ɖoŋ, lɔŋsɩnɖɛ nɛ maɣzɩm taa laŋhɛzɩyɛ (Cɔnɩ tayʋʋ 17)
18. Mayaɣ ŋga hɛzɩɣ ña-laŋɩyɛ siŋŋ alɩwaatʋ ndʋ ŋkatɩɣ wɛtʋ kaɖɛ ñɩndʋ natʋyʋ yɔ? (Kalɩ aɖakaɣ « Tɔm ndʋ tɩpɩzɩɣ nɛ tɩhɛzɩ ɖa-laŋɩyɛ alɩwaatʋ ndʋ ɖitisiɣ ɛsɩtɛɣlɩm yɔ.»)
18 Tɔm ndʋ Yehowa kaaheyi Ezekiyaasɩ yɔ, tɩhɛzɩ ɛ-laŋɩyɛ. Ða ɖɔɖɔ Ɛsɔtɔm pɩzɩɣ nɛ tɩhɛzɩ ɖa-laŋɩyɛ. Yehowa yeba nɛ pama laŋɩyɛ hɛzʋʋ tɔm Bibl taa nɛ pasɩɩ se tɩhɛzɩ ɖa-laŋa alɩwaatʋ ndʋ ɖɩwɛɣ laŋwɛɛkɩyɛ taa yɔ. (Roma 15:4) Koobu halɩñɩnʋ nɔɔyʋ wɛ Afrika wɩsɩ ɖɩɖʋyɛ taa; alɩwaatʋ ndʋ ɖɔkɔtɔnaa wili-i nɛ pana se ɛwɛnɩ kansɛɛrɩ kʋdɔŋ yɔ, ɖoŋ ɖoŋ lɛ ewilaɣ. Ɛyɔɔdaa se: «Mayaɣ ŋga kɛhɛzɩɣ ma-laŋɩyɛ siŋŋ yɔ ŋga lɛ Izaayii 26:3. Paa ɖɩɩpɩzɩɣ nɛ ɖɩla nabʋyʋ se kaɖɛ nɖɩ ɖɩkatɩɣ yɔ ɖɩsɩɩ tɩnaɣ yɔ, mayaɣ ŋga kahaɣ-ɖʋ lidaʋ se Yehowa pɩzɩɣ nɛ ɛha-ɖʋ maɣzɩm taa laŋhɛzɩyɛ nɛ pɩsɩnɩ-ɖʋ nɛ ɖɩɖɔkɩ ɖa-laŋɩyɛ paa kaɖɛ nɖɩ lɛ ɖɩ-taa.» Mayaɣ nakɛyɛ hɛzɩɣ ña-laŋɩyɛ siŋŋ alɩwaatʋ ndʋ ŋkatɩɣ wɛtʋ kaɖɛ ñɩndʋ natʋyʋ nɛ pɩlakɩ-ŋ ɛzɩ lidaʋ nakʋyʋ fɛyɩ yɔ?
19. Wazasɩ nzɩ ɖaŋ-ɖʋ cee wayɩ?
19 Ðɩwɛ kɛdɛzaɣ kɩyakɩŋ taa, nɛ mbʋ piyeki nɛ ɖitisiɣ ɛsɩtɛɣlɩm yɔ pɩkaɣ wobu pɩ-yɔɔ nɛ pɩkpaɣ ɖoŋ kpaʋ yɔɔ. Ɛlɛ ɛzɩ ɖɩnaʋ Hana, Daviid nɛ Wiyaʋ Ezekiyaasɩ pa-kɩɖaŋ taa yɔ, Yehowa naɣ ɛsɩtɛɣlɩm mbʋ ɖitisiɣ yɔ nɛ pɩhaɣ-ɩ laŋwɛɛkɩyɛ. Ðɛ-ɛsɩtɛɣlɩm mʋ ñɩm siŋŋ ɛ-ɛsɩndaa. Ye mbʋ, alɩwaatʋ ndʋ ɖɩkatɩɣ wɛtʋ natʋyʋ nɛ pɩhaɣ-ɖʋ laŋwɛɛkɩyɛ yɔ, pɩtʋʋ fɛyɩ se ɖɩkaɣ sɔɔlʋʋ se ɖɩtɩmnɩ Yehowa nɛ ɖiheyi-i ɖa-taa tɔm. Tɛtɛ nɛ ɖitaaposi ɖa-tɩ kaaʋ nɛ ɖo-koobiya. Nɛ tɛtɛ nɛ ɖiwolo pɩ-yɔɔ nɛ ɖɩkalɩɣ Bibl nɛ ɖihiɣ laŋɩyɛ hɛzʋʋ mbʋ pɩlɩnɩ Yehowa cɔlɔ yɔ. Ða-taa pɩzɩɣ nɛ pɩtɛ se ye ɖiwobi pɩ-yɔɔ nɛ ɖɩɖɔkʋʋ ɖa-laŋɩyɛ yɔ, Yehowa kaɣ-ɖʋ wazʋʋ. Wazasɩ nzɩ sɩ-taa nasɩyɩ lɛ lidaʋ kɩbaŋʋ ŋgʋ ɛlabɩ-ɖʋ se ɛkaɣ hɩzʋʋ ɛsɩtɛɣlɩm mbʋ ɖitisiɣ alɩwaatʋ ndʋ ɖɩwɛ laŋwɛɛkɩyɛ taa yɔ, alɩwaatʋ ndʋ ɛyʋ weyi ɖɩtaɣ-ɩ liu yɔ ɛlakɩ nabʋyʋ nɛ pitibi-ɖʋ yɔɔɔ yɔ nɛ alɩwaatʋ ndʋ ɖilesiɣ lidaʋ yɔ. (Natʋ 21:4) Taa leleŋ ɛsɩtɛɣlɩm ɖeke ɖɩkaɣ tisuu alɩwaatʋ ndʋ tamaɣ ŋga kalakɩ yɔ.
HENDU 4 Yehowa “kɛnɩ me-Ninɖiɣyu”
