Feŋuu Tilimiye takayɩsɩ nzɩ sɩlɩ pɩnaɣ kanɛ yɔ, ŋkalɩ-sɩ camɩyɛ na? Ye ŋkalɩ-sɩ camɩyɛ yɔ, maɣzɩ nɛ ŋna se ŋpɩzɩɣ nɛ ŋcosi tɔm pɔzʋʋ pʋnɛ pɩ-yɔɔ:

Kɩɖaʋ ŋgʋ Yehowa ha-ɖʋ lɩmaɣza wena pɩwɛɛ se ɖɩwɛɛnɩ halaa yɔɔ yɔ pɩ-hɔɔlʋʋ taa?

Ɛɛɖʋʋ tʋkaɣ halaa nɛ abalaa pɛ-hɛkʋ taa, ɛtɩsɔɔlɩ abalaa nɛ pɩkɩlɩ halaa. Ɛsɔ welisiɣni halaa, nɛ ɛmaɣzɩɣ ɛzɩma pɩlakɩ halaa yɔ pɩ-yɔɔ nɛ kala wena pakatɩɣ yɔ a-yɔɔ. Ɛtaɣ halaa liu nɛ ɛɖʋʋ-wɛ tʋma.—w24.01, h. 15-16.

Efɛɛzɩ mba 5:7 yɔɔdʋʋ se: «Ɩtaala ɛzɩ palakʋʋ yɔ.» Ɛzɩma ɖɩpɩzɩɣ nɛ ɖɩɖɔ lɔŋ tasʋʋ mbʋ pɩ-yɔɔ?

Apostoloo Pɔɔlɩ wɛɛ nɛ ɛpakɩ-ɖʋ se ɖɩtaaɖʋ taabalɩyɛ nɛ ɛyaa mba papɩzɩɣ peyele nɛ pɩwɛɛ-ɖʋ kaɖɛ se ɖɩɖɔ Yehowa paɣtʋ yɔɔ yɔ. Pɩtɩkɛ mba ɖɩnaɣ ɖɛ-ɛsɩndaa yɔ pe-ɖeke ɖɩpɩzɩɣ ɖɩɖʋʋnɩ taabalɩyɛ kɩdɛkɛdɩyɛ, ɛlɛ pɩpɩzɩɣ nɛ pɩkɛ ɖɔɖɔ mba ɖa nɛ wɛ ɖɩyɔɔdʋʋnɩ ɖama réseaux sociaux waa yɔɔ yɔ.—w24.03, h. 22-23.

Alɩwaatʋ ndʋ ɖɩnɩɣ cɛtɩm tɔm yɔ, ɛbɛ pɩwɛɛ se ɖɩla?

Pɩwɛɛ se ɖɩkpa ɖa-tɩ nɛ tɔm ndʋ ɖa-taabalaa tiyiɣni-ɖʋ ɛlɛ patɩkpaɣ alɩwaatʋ nɛ pañɩnɩ nɛ pana se tɩkɛ toovenim yaa cɛtɩm yɔ. Pɩwɛɛ se ɖɩkpa ɖa-tɩ ɖɔɖɔ nɛ message waa mba ɛyaa mba ɖɩɩsɩŋ-wɛ yɔ petiyiɣni-ɖʋ yɔ nɛ tisuu yebiyaa mba palakɩ ɛzɩ Bibl taa tɔm kɛdɩnɩ-wɛ yɔ.—w24.04, h. 12.

Tɔm ndʋ ɖɩsɩma pɩlɩɩnɩ ɛzɩma Yehowa kaɣ tɔm hʋnʋʋ Wiyaʋ Salomɔɔ nɛ ɛyaa mba pasɩbɩ Sodom nɛ Gomɔɔrɩ nɛ Tɛʋ Sɔsɔʋ alɩwaatʋ taa yɔ pɩ-yɔɔ nɛ tɔm ndʋ ɖɩɩsɩŋ?

Ðɩɩpɩzɩɣ nɛ ɖɩyɔɔdɩ nɛ ɖɩtɛ ɖa-taa se Yehowa ɖɩzɩ-wɛ kpaagbaa ɖɩzʋʋ. Ɛlɛ ɖɩnawa se ɛsɩm pɩtɩŋa nɛ ɛkɛ pʋtɔdɩyɛ nayʋ siŋŋ.—w24.05, h. 3-4.

Ye Ɛsɔ ɛkɛ ‘ɖa-Kaaʋ’ yɔ, piyeki se ɖa-taa ɛtɛmnɩ we? (Wp. 32:4)

Ðɩpɩzɩɣ nɛ ɖɩpɩsɩ Yehowa ɖa-ɖɩjɔzɩyɛ. Ɛkɛ weyi papɩzɩɣ nɛ pataa-ɩ liu yɔ, paa ɛzɩmtaa lɛ ɛɖɔŋ ɛ-tɔm yɔɔ. Nɛ ɛɛlɛɣzɩɣ, ɛ-wɛtʋ nɛ ɛ-kaɖʋwa paalɛɣzɩɣ kpa.—w24.06, h. 26-28.

Ɛbɛ pɩzɩɣ pɩsɩnɩ-ŋ nɛ ŋhiɣ taa leleŋ ñɛ-ɛgbɛyɛ kɩfaɖɛ taa?

Taa Yehowa liu. Ɛkaɣ-ŋ sɩnʋʋ ɛzɩ ɛɛsɩnʋʋ ɛ-sɛyaa caanaʋ taa yɔ. Taakpaɣ ñɛ-ɛgbɛyɛ kɩbɩnɖɛ nɛ ŋmaɣzɩnɩ ñɛ-ɛgbɛyɛ kɩfaɖɛ. Yele nɛ pɩɖɔkɩnɩ-ŋ ñɛ-ɛgbɛyɛ kɩfaɖɛ taa nɛ ŋñɩnɩ taabalaa kɩfama.—w24.07, h. 26-28.

Lɔŋ weyi ɖɩpɩzɩɣ nɛ ɖɩkpɛlɩkɩ Yesu aduwa 3 wena awɛ Maatiyee ñʋʋ 25 taa yɔ a-taa?

Heŋ nɛ pʋŋ eduuye wɩlɩɣ se pɩcɛyaa se ɖɩɖɔkɩ ɖe-siɣsiɣ wɛtʋ Yehowa ɛsɩndaa. Pɛlaa lɔŋsɩnɖaa nɛ pɛlaa kɩmɛlɛmɩŋ eduuye wɩlɩɣ se pɩwɛɛ se ɖɩñɔɔzɩ ɖa-tɩ nɛ ɖɩcaɣnɩ ɖɛ-ɛsa. Nɛ talaŋwaa eduuye wɩlɩɣ se pɩwɛɛ se ɖɩwɛɛ kpekpeka Yehowa tʋmɩyɛ taa.—w24.09, h. 20-24.

Salomɔɔ templo kʋjɔŋ kʋkʋyɩŋ kaakɛ nuŋgolonzi ɛzɩma?

Biblwaa nabɛyɛ taa, pama 2 Kroniiki 3:4 taa se kʋjɔŋ kʋkʋyɩŋ kaakɛ «nuŋgolonzi 120,» pʋ-tɔbʋʋ se mɛtanaa 53. Ɛlɛ Biblwaa lalaa taa, pɔyɔɔdaa se kʋjɔŋ ŋgʋ kɩ-kʋkʋyɩŋ kaakɛ «nuŋgolonzi 20» yaa mɛtanaa 9 mbʋ yɔ. Ye kʋjɔŋ ŋgʋ kɩ-kʋkʋyɩŋ ɛkɛ «nuŋgolonzi 20» yɔ, pɩmʋʋnɩ templo kolonzi kikiŋ camɩyɛ.—w24.10, h. 31.

Ye pɔtɔm se ɛgbɛyɛ taa tʋmlaɖʋ ɛkɛ ‘walʋ weyi ɛwɛnɩ halʋ kʋɖʋm yɔ,’ pʋ-tɔbʋʋ lɛ suwe? (1 Tim. 3:12)

Pʋ-tɔbʋʋ lɛ se ɛkpaɣ halʋ kʋɖʋm nɛ ɛɛcakɩ kʋzʋʋ kɩdɛkɛdʋʋ wezuu. Pɩtasɩ lɛ, pɩfɛyɩ se ɛcɛbɛlɩɣnɩ halaa lalaa.—w24.11, h. 19.

Ɛbɛ yɔɔ ɖɩpɩzɩɣ nɛ ɖɩyɔɔdɩ se Yohanɛɛsɩ 6:53 ɛɛyɔɔdʋʋ Kɩbaɣlʋ ɖanaɣ tɔɔnaɣ sɔnzɩ tɔm na?

Yohanɛɛsɩ 6:53 yɔɔdʋʋ se pɩwɛɛ se ɖɩtɔɔ Yesu tomnaɣ nɛ ɖɩñɔɔ ɛ-calɩm. Yuuda ñɩma mba pɩɩpɔzaa se pɛwɛɛnɩ tisuu Yesu yɔɔ yɔ, mba Yesu heyi tɔm ndʋ Galilee tɛtʋ taa pɩnaɣ 32 taa. Ɛlɛ pɩlabɩ pɩnaɣ kʋɖʋmaɣ pʋwayɩ pʋcɔ nɛ Yesu la Kɩbaɣlʋ ɖanaɣ tɔɔnaɣ sɔnzɩ Yeruzalɛm tɛtʋ taa. Peeɖe lɛ, Yesu yɔɔdaɣnɩ mba ɛ nɛ wɛ pakaɣ kewiyitu tɔɔʋ ɛsɔdaa yɔ.—w24.12, h. 10-11