Palʋlɩ-m pɩnaɣ 1927 taa tɛtʋ cikpetu natʋyʋ taa, tɩñɔtɩnɩ Chicago tɛtʋ ndʋ tɩwɛ Illinois Etaazuunii ɛjaɖɛ taa yɔ. Man-caa nɛ mon-ɖoo palʋlɩ piya 5: Jetha, Don, ma, Karl nɛ Joy. Ða-tɩŋa ɖɩɩtɛm ɖa-taa se ɖɩsɛɣ Yehowa nɛ ɖa-laŋɩyɛ pilim. Jetha wobi Galaadɩ sukuli ɖaŋ 2 ñɩŋgʋ pɩnaɣ 1943 taa. Don wobi Betɛɛlɩ taa Brooklyn Niyuu Yɔrɩkɩ tɛtʋ taa pɩnaɣ 1944. Karl ñowobi Betɛɛlɩ pɩnaɣ 1947, nɛ Joy ñowolo pɩnaɣ 1951. Pa-kɩɖaŋ nɛ ma-lʋlɩyaa kɩɖaŋ seɣti-m se mala nɛ pɩkɩlɩ Yehowa sɛtʋ taa.

Ma-lʋlɩyaa kalaɣ Bibl nɛ paasɔɔlɩ Ɛsɔ, nɛ paakpɛlɩkɩ-ɖʋ se ɖa ɖɔɖɔ ɖɩsɔɔlɩ Ɛsɔ. Ɛlɛ man-caa pɩsɩ sɔɔja nɛ ɛla Camaa you kajalaɣ ñɩŋgʋ Erɔɔpɩ taa nɛ pɩtɛ lɛ, ɛtɩtasɩ wɛnʋʋ ñamtʋ coocinaa yɔɔ. Mon-ɖoo sɛ Ɛsɔ se ɛlabaɣ lɛ kpem se man-caa pɩsaa nɛ ɛkɔɔ ɖɩɣa nɛ alaafɩya, pʋyɔɔ ɛtɔm se: «Karl, ɖɩɖaɣnɩ paɣzʋʋ cooci wobu ɛzɩ ɖooo lɛ yɔ.» Paaba cosi se: «Mankpakɩɣ-ŋ nɛ mowona ɛlɛ maasʋʋ pɩ-taa.» Mon-ɖoo pɔzɩ-ɩ se: «Ɛbɛ yɔɔ?» Ecosi se: «You alɩwaatʋ taa, Ɛsɔ sɛtʋ ñʋndɩnaa mba pɛwɛ ɛgbɛyɛ kʋɖʋmɖɩyɛ taa ɛlɛ patɩnaɣ hɔɔlɩŋ ndɩ ndɩ yɔɔ yɔ, pawazɩ sɔɔjanaa nɛ po-you wondu yɔɔ. Hɔɔlʋʋ ŋgʋ Ɛsɔ ɖʋwaɣ nesi?»

Pʋwayɩ mon-ɖoo ɖɛ cooci lɛ, Yehowa Aseɣɖe Tɩnaa 2 kɔɔ ɖɛ-tɛ nɛ pɔkɔtɩ nɔnɔɔ. Paaha man-caa takayɩsɩ 2, payaɣ-sɩ se Lumière, nɛ patazɩ Natʋ takayaɣ taa tɔm taa sɩ-taa. Takayɩsɩ nzɩ, sɩɩkɛdɩnɩ man-caa nɛ etisi nɛ ɛmʋ-sɩ. Mon-ɖoo kɔma nɛ ɛna takayɩsɩ nzɩ lɛ, ɛpaɣzɩ-sɩ kalʋʋ. Kɩyakʋ nakʋyʋ mon-ɖoo kalaɣ egeetiye taa tɔm susuu takayaɣ nakɛyɛ lɛ, ɛna pama ka-taa se palabɩ ɖʋtʋ nɛ patɩŋɩɣnɩ Lumière takayɩsɩ yɔɔ nɛ pɛkpɛlɩkɩɣ Bibl; nɛ payaɣ ɛyaa mba pɔsɔɔlaa yɔ se powolo kpɛlɩkʋʋ mbʋ pi-ɖeɖe. Peeɖe ɛkpaɣ lɩmaɣzɩyɛ se ewoki. Ɛtalaa lɛ, halʋ akpadɩyʋ nɔɔyʋ tʋlɩ-ɩ nɔnɔɔ. Mon-ɖoo kaaɖɔkɩ takayɩsɩ nzɩ sɩ-taa lɛɛka, nɛ ɛpɔzɩ se: «Ɩkpɛlɩkɩɣ takayaɣ kanɛ cɩnɛ?» Halʋ ɛnʋ ecosi-i se: «Ɛɛɛ, mon-ɖoo, sʋʋ.» Kpɩtaʋ ŋgʋ kɩtɩŋ pʋwayɩ yɔ kɩ-taa, mon-ɖoo wokaɣ lɛ ɛkpɛndɩnɩ ɖa piya ɖa-tɩŋa, nɛ kpaɣnɩ alɩwaatʋ ndʋ ɖiwokaɣ paa kpɩtaʋ ŋgʋ.

Kediɣzaɣ nakɛyɛ taa, kediɣzaɣ yɔɔ cɔnɩyʋ lɩzɩ-m se mankalɩ Keɣa 144:15. Mayaɣ ŋga kɔtɔŋ se mba pɛsɛɣ Yehowa yɔ panɩɣ leleŋ. Mɔnsɔɔlɩ mayaɣ ŋga nɛ mɔnsɔɔlɩ ɖɔɖɔ 1 Timootee 1:​11, kɔtɔŋ se Yehowa kɛ «Ɛsɔ koboyaɣ tʋ,» nɛ Efɛɛzɩ mba 5:​1, kaka ñeseɣtiɣ-ɖʋ se ɖɩpɩsɩ «mba pamaɣzɩɣnɩ Ɛsɔ yɔ.» Piyeba nɛ menɖiɣzina se pɩwɛɛ se man-taa ɛla leleŋ  se mɛnsɛɣ ma-Lɩzɩyʋ, nɛ mɛnsɛɛ-ɩ se ɛlabaɣ lɛ mbʋ pʋyɔɔ yɔ ɛha-m waɖɛ nɖɩ. Nɛ mbʋ mañaɣ pana se mala me-wezuu caɣʋ kpeekpe taa.

Ɛgbɛyɛ nɖɩ ɖɩɩkɩlɩ ñɔtɩnʋʋ Chicago yɔ, ɖiiposini-ɖʋ ɛzɩ kilomɛtanaa 32 mbʋ yɔ. Paa mbʋ yɔ ɖiwokaɣ kediɣzisi, piyeba nɛ mantɩlɩ Bibl taa tɔm nɛ pɩkɩlɩ. Mɔntɔzʋʋ se kɩyakʋ nakʋyʋ kediɣzaɣ yɔɔ cɔnɩyʋ ya Jetha se ecosi tɔm. Mewelisi tɔm ndʋ ecosaa yɔ nɛ pɩtɛ lɛ meheyi man-tɩ se: «Mansɩm tɔm ndʋ. Manpɩzaɣ se mankpazɩ nesi nɛ moncosi.» Piyeba nɛ manpaɣzɩ kediɣzisi ñɔɔzʋʋ nɛ moncosuu tɔm sɩ-taa. Kɔzɩ kɔzɩ lɛ, mɛnɖɛnɩ ɛsɩndaa fezuu taa ɛzɩ ɖɔ-hɔʋ taa piya lɛɛsɩ yɔ. Pamɩyɩsɩ-m lɩm pɩnaɣ 1941 taa.

Maasɔʋ kigbeɣluu ŋgʋ palabɩ pɩnaɣ 1942 Klevelandɩ tɛtʋ taa Ohio yɔ kɩ-yɔɔ kpa. Ɛyaa kaakpeɣli Etaazuunii lona ndɩ ndɩ wena acɛzɩ 50 yɔ a-taa nɛ patɩŋɩɣnɩ kaŋgalaafu yɔɔ nɛ pewelisiɣ kigbeɣluu taa tɔm. Ðɔ-hɔʋ nɛ hɔŋ lɛɛŋ sakɩyɛ kaasʋ kizinzikiŋ tɛɛ kigbeɣluu ɖɩlaɖɛ cɔlɔ. Paawɛɛ nɛ palakɩ Caama you naalɛ ñɩŋgʋ alɩwaatʋ ndʋ tɩ-taa, nɛ panazaɣ Yehowa Aseɣɖe Tɩnaa nɛ pɩkɩlɩɣ. Ðoo taa maana koobiya nabɛyɛ patʋsɩ pɔ-lɔɔɖa miŋ nɛ aha ɛsa nɛ kizinzikiŋ. Koobiya mba petisaa se pa-taa nɔɔyʋ cakɩ paa lɔɔɖɩyɛ nɖɩ lɛ ɖɩ-taa nɛ efeŋiɣ ɖoo taa. Ye nabɛyɛ ɩkɔma se palakɩ puuyaɣ lakasɩ yɔ, pakpazɩɣ pɛ-ɛsɩndaa miŋ nɛ pepiti pɛ-ɛsa nɛ pahʋlɩ lɔɔɖa. Ðɩnɛ ɛlɛ lalaa pɩzɩɣ palɩɩ nɛ pasɩnɩ-wɛ. Peeɖe meheyi man-tɩ se: «Yehowa samaɣ ñɔɔzɩ ka-tɩ camɩyɛ nɛ kaɖaŋ pɩtɩŋa.» Piyeba nɛ ma-laŋɩyɛ hɛɛ nɛ monɖoo, nɛ nabʋyʋ tɩla.

Pɩnzɩ sakɩyɛ wayɩ, maawɛɛ nɛ mamaɣzɩɣ kigbeɣluu ŋgʋ kɩ-yɔɔ lɛ, menɖiɣzina se mon-ɖoo taanɩɣzɩ paa ññɩɩ nɛ sɔɔndʋ taakpa-ɩ. Ɛɛta Yehowa nɛ ɛ-ɛgbɛyɛ liu kiya. Maakaɣ sɔʋ kɩɖaʋ kɩbaŋʋ ŋgʋ ɛhawa yɔ kɩ-yɔɔ kpa.

Alɩwaatʋ pazɩ pʋcɔ nɛ kigbeɣluu ŋgʋ kɩtalɩɣ lɛ, mon-ɖoo kaapɩsɩ paa ɖooye nʋmɔʋ lɩzɩyʋ. Pʋyɔɔ ewelisi camɩyɛ tɔm yɔɔdʋʋ mbʋ pitukaɣni alɩwaatʋ tɩŋa Ɛsɔ sɛtʋ tʋmɩyɛ yɔ. Ðɩpɩsaɣ ɖɩɣa lɛ, ɛyɔɔdɩ se: «Mɔnsɔɔlaa se mowolo nʋmɔʋ lɩzʋʋ tʋmɩyɛ yɔɔ, ɛlɛ maapɩzɩɣ nɛ malabɩ-ɖɩ nɛ mɛntɛ mala ɖɩɣa tʋma tɩŋa camɩyɛ.» Pʋwayɩ lɛ ɛpɔzɩ-ɖʋ se ɖɩpɩzɩɣ nɛ ɖɩsɩnɩ-ɩ. Peeɖe ɖicosi-i se ɛɛɛ; piyeba nɛ ɛɖʋ ɖa-taa paa anɩ tʋmɩyɛ se ɛhazɩ kuduyuu kʋɖʋmʋʋ yaa kuduyuŋ naalɛ tɛɛ paa tanaŋ ŋgʋ pʋcɔ nɛ ɖɩlɩzɩ sɔntɔ. Ðɩɖɛɣ sukuli lɛ, ewiliɣ nɛ ɛna se ɖɩhazɩ kuduyuŋ tɛɛ, nɛ pʋwayɩ lɛ ɛɖɛɛ tɔm susuu. Pɩɩɖɔkɩnɩ-ɩ siŋŋ, ɛlɛ ɛtaalakɩ kaakendu e-piya yɔɔ kpa. Ðɩpɩsɩɣ ɖɩɣa wɩsɩ taa se ɖɩtɔɔ tɔɔnaɣ, nɛ ɖɩkɔŋnɩ sukuli ɖanaɣ lɛ, paa ɛzɩmtaa ɛwɛɛ nɛ ekeŋni-ɖʋ. Kɩyakɩŋ nɩɩyɩ ɖɩlɩɣnɩ sukuli lɛ, ɖa nɛ ɩ ɖɩlɩɣ tɔm susuu; pɩsɩnɩ-ɖʋ nɛ ɖɩtɩlɩ tʋmɩyɛ nɖɩ nʋmɔʋ lɩzɩyaa lakɩ yɔ.

Manpaɣzɩ paa ɖooye nʋmɔʋ lɩzʋʋ tʋmɩyɛ alɩwaatʋ ndʋ maawɛnɩ pɩnzɩ 16 yɔ. Man-caa taakɛtɩ Yehowa Aseɣɖe Tʋ, paa mbʋ yɔ ɛ-ɛsa kaawɛ ɛzɩma monsusaɣ tɔm yɔ pɩ-yɔɔ. Ðanaɣ nakɛyɛ, meheyi-i se mañaɣ pana siŋŋ se mehiɣ nɔɔyʋ nɛ mɛnkpɛlɩkɩnɩ-ɩ Bibl, ɛlɛ mantihiɣ. Pʋwayɩ lɛ mɔnpɔzɩ-ɩ se: «Ŋtisiɣ se ma nɛ ŋ ɖɩkpɛlɩkɩ Bibl?» Ɛsɩŋ pazɩ nɛ ɛmaɣzɩ lɛ, ecosi-m se: «Maanaɣ mbʋ pɩɖɩkɩ-m nʋmɔʋ yɔ.» Piyeba nɛ man-caa pɩsɩ men-Bibl kpɛlɩkɩyʋ kajalaɣ ñɩnʋ. Pɩɩkɛnɩ-m waɖɛ sɔsɔɖɛ kpem.

 Ma nɛ ɩ ɖɩkpɛlɩkɩ «La vérité vous affranchira» takayaɣ. Ðɩkpɛlɩkaa nɛ pɩla alɩwaatʋ natʋyʋ lɛ, menɖiɣzina se man-caa kaawɛna nɛ ɛsɩɣnɩ-m se mɛnkɛ Bibl kpɛlɩkɩyʋ nɛ wɩlɩyʋ kɩbanʋ. Ðanaɣ nakɛyɛ, ɖɩkalɩ tayʋʋ nabʋyʋ nɛ pɩtɛ lɛ, ɛyɔɔdɩ se: «Mansɩm tɔm ndʋ takayaɣ yɔɔdaa yɔ. Ɛlɛ ɛzɩma ŋlaba nɛ ŋna se ndʋ takayaɣ yɔɔdʋʋ yɔ tɩkɛ toovenim?» Mantaañɔɔzɩ man-tɩ se moncosi tɔm ndʋ tɩ-yɔɔ kpaagbaa, pʋyɔɔ meheyi-i se: «Maapɩzɩɣ nɛ moncosi-ŋ tɔm ndʋ tɩ-yɔɔ lɛɛlɛɛyɔ, ɛlɛ cee nɛ tɛʋ fe ɖɩɩkpɛlɩkɩɣ lɛ, mankaɣ-ŋ tɩ-yɔɔ cosuu.» Nɛ mbʋ malaba. Mana masɩ nzɩ sɩñɩkɩɣ niye tɔm ndʋ ɖɩkpɛlɩkaa yɔ tɩ-yɔɔ yɔ. Pʋwayɩ lɛ, mɛnkpɛlɩkɩ ɛzɩma mañɩnɩ tɔm yɔ se pɩsa nɛ mɔñɔɔzɩ man-tɩ camɩyɛ pʋcɔ nɛ ɖɩkpɛlɩkɩ. Pɩsɩnɩ-m nɛ mɛnɖɛɛnɩ ɛsɩndaa fezuu taa, nɛ pɩsɩnɩ man-caa ɖɔɖɔ. Ɛɖɔŋaɣ tɔm ndʋ ɛɛwɛɛ nɛ ɛkpɛlɩkɩɣ yɔ tɩ-yɔɔ, nɛ pamɩyɩsɩ-ɩ lɩm pɩnaɣ 1952 taa.

Malɩ ɖɩɣa alɩwaatʋ ndʋ maawɛnɩ pɩnzɩ 17 yɔ. Jetha a pɩsɩ Ɛsɔtɔm tiyiyu nɛ Don ñowolo Betɛɛlɩ. Pa-naalɛ paasɔɔlɩ pa-tʋma nɛ pɩɩkpazɩ-m ɖoŋ siŋŋ. Pʋyɔɔ mañɩɣ niye takayaɣ taa se paha-m waɖɛ nɛ mala tʋmɩyɛ Betɛɛlɩ nɛ mañɩɣ niye takayaɣ taa ɖɔɖɔ se paha-m waɖɛ nɛ mowolo Galaadɩ sukuli, nɛ manɖaŋ se Yehowa ɛlɩzɩ ɖenɖe ɛsɔɔlaa se mala tʋmɩyɛ yɔ. Ɛbɛ lɩ pɩ-taa? Paya-m se mowolo Betɛɛlɩ taa pɩnaɣ 1946 taa.

Malabɩ Betɛɛlɩ tʋma ndɩ ndɩ sakɩyɛ, piyeba nɛ mehiɣ waɖɛ nɛ mɛnkpɛlɩkɩ tɔm kɩfatʋ sakɩyɛ. Mɛwɛʋ Betɛɛlɩ yɔ, pɩlakɩ pɩnzɩ 75 yɔ, nɛ alɩwaatʋ ndʋ tɩ-taa mɛnkpɛlɩkɩ ɛzɩma palɩzɩɣ takayɩsɩ yɔ nɛ liidiye akɔnta labʋ. Mɛnkpɛlɩkɩ ɖɔɖɔ ɛzɩma payakɩ wondu nɛ ɛzɩma petiyiɣni wondu hɔɔlɩŋ lɛɛŋ taa yɔ. Ɛlɛ, kɔzɩ kɔzɩ lɛ, man-taa wɛ leleŋ nɛ tanaŋ tɛɛ Ɛsɔ sɛtʋ ndʋ palakɩ paa tanaŋ ŋgʋ nɛ samaɣ taa tɔm ndʋ pɔyɔɔdʋʋ Betɛɛlɩ taa nɛ patɩŋɩɣnɩ pɩ-yɔɔ nɛ pawɩlɩɣ-ɖʋ Bibl taa tɔm yɔ.

Mɛnkpɛlɩkɩ lɔŋ ɖɔɖɔ me-neu Karl cɔlɔ, ɛkɔm Betɛɛlɩ taa pɩnaɣ 1947 taa. Ɛɛkɛ Bibl kpɛlɩkɩyʋ kɩbanʋ nɛ wɩlɩyʋ weyi ɛwɛ niye yɔ. Kɩyakʋ nakʋyʋ, mɔnpɔzɩ-ɩ se ɛsɩnɩ-m nɛ mɔñɔɔzɩ samaɣ taa tɔm yɔɔdʋʋ nabʋyʋ. Malɩzɩ Karl pɩ-taa se mañɩnaa nɛ malɩɩ tɔm sakɩyɛ yɔɔ ɛlɛ maasɩŋ ɛzɩma malabɩnɩ-tʋ tʋmɩyɛ yɔ. Ɛtɩŋnɩ tɔm pɔzʋʋ pʋnɛ pɩ-yɔɔ nɛ ɛsɩnɩ-m: «Joel, ñɔ-tɔm ñʋʋ lɛ ŋgʋ?» Piyeba nɛ manɩɩ ɛ-tɔm taa kpaagbaa nɛ malabɩnɩ tʋmɩyɛ tɔm ndʋ tɩsɩɣnɩ-m se mantazɩ mɔn-tɔm ñʋʋ taa yɔ ti-ɖeke nɛ meyele lɛɛtʋ. Maasɔʋ lɔŋ weyi mɛnkpɛlɩkɩ ɛ-cɔlɔ yɔ ɩ-yɔɔ kpa.

Pɩsa nɛ ɖihiɣ taa leleŋ Betɛɛlɩ taa lɛ, pɩwɛɛ se ɖɩla ɖo-ɖoŋ kpeekpe tɔm susuu taa. Nɛ ye ɖɩlakɩ mbʋ yɔ, ɖɩpɩzɩɣ nɛ ɖɩlɩɩ tɔm ndʋ tɩkpazɩɣ-ɖʋ ɖoŋ  yɔ tɩ-yɔɔ. Tɔm ndʋ tɩ-yɔɔ mankɩlɩɣ tɔzʋʋ yɔ, tɩlabɩ ɖanaɣ nakɛyɛ Bronx, Niyuu Yɔrɩkɩ tɛtʋ taa. Ma nɛ koobu abalɩñɩnʋ nɔɔyʋ ɖiwoba nɛ ɖɩna halʋ nɔɔyʋ; halʋ ɛnʋ eetisaa nɛ ɛmʋ Feŋuu Tilimiye nɛ Réveillez-vous! takayɩsɩ. Ðɩpaɣzɩ kɛdaɣ ɛzʋnɔ: «Ðanaɣ kanɛ, ɖɩwɛɛ nɛ ɖɩsɩɣnɩ ɛyaa se pɛkpɛlɩkɩ Bibl taa tɔm ndʋ tɩkpazɩɣ-wɛ ɖoŋ yɔ.» Peeɖe ecosaa se: «Ye Bibl tɔm ɩyɔɔdʋʋ yɔ, ɩsʋʋ.» Ðɩkalɩ-ɩ masɩ nzɩ sɩyɔɔdʋʋ Ɛsɔ Kewiyaɣ nɛ ɛjaɖɛ kɩfaɖɛ pɔ-yɔɔ tɔm yɔ sɩ-taa sakɩyɛ nɛ ɖɩlɩzɩ-ɩ pɩ-taa. Piitukuni-i siŋŋ, pʋyɔɔ kpɩtaʋ ŋgʋ kɩtɩŋ pʋwayɩ yɔ ɖɩpɩsaa lɛ, ɛyaa ɛ-taabalaa sakɩyɛ se pɔkɔɔ nɛ pewelisini-ɖʋ. Pʋwayɩ, ɛ nɛ ɛ-walʋ papɩsɩ Yehowa sɛyaa mba pɔɖɔkɩ pe-siɣsiɣ wɛtʋ yɔ.

Maawɛɛ nɛ mañɩnɩɣ weyi ma nɛ ɩ ɖɩɖɔkɩ nesi yɔ nɛ pɩla pɩnzɩ 10 lɛ, mankatɩ koobu halɩñɩnʋ weyi ɛmʋna-m yɔ. Ɛbɛ sɩnɩ-m nɛ mehiɣ halʋ kɩbanʋ? Mantɩmnɩ Yehowa nɛ mamaɣzɩ mbʋ mɔnsɔɔlaa se ma nɛ ma-halʋ ɖɩla ɖe-nesi ɖɔkʋʋ wayɩ yɔ pɩ-yɔɔ.

Ðɩlabɩ Yankee Stadium kigbeɣluu pɩnaɣ 1953 taa nɛ pɩtɛ lɛ, mankatɩ koobu halɩñɩnʋ nɔɔyʋ; payaɣ-ɩ se Mary Aniol. Mary nɛ mɔn-kɔɔ Jetha paalabɩ Galaadɩ sukuli ɖaŋ naalɛ ñɩŋgʋ nɛ ɛ nɛ ɩ palakaɣnɩ pɛ-Ɛsɔtɔm tiyiyu tʋmɩyɛ lone kʋɖʋmɖɩyɛ taa. Mary kɛdɩ-m Ɛsɔtɔm tiyiyu tʋmɩyɛ nɖɩ ɛlakaɣ Kaarayiibi taa yɔ ɖɩ-tɔm nɛ taa leleŋ; ɛkɛdɩ-m ɖɔɖɔ ɛyaa mba ɛkpɛlɩkɩnɩ Bibl peeɖe yɔ pɔ-tɔm nɛ taa leleŋ. Ðɩɩwɛɛ nɛ ɖɩñakɩ pana se ɖɩtɩlɩ ɖama lɛ, ɖiɖiɣzina se ɖa-naalɛ ɖɩwɛnɩ fezuu taa kaɖʋsɩ kʋɖʋmsɩ. Ðɩɩwɛɛ nɛ ɖɩsɔɔlʋʋ ɖama nɛ pɩkɩlɩɣ, nɛ ɖɩɖɔkɩ nesi avril 1955 taa. Mary wɩlɩ hɔɔlɩŋ sakɩyɛ taa se ɛkɛnɩ-m kʋjɔʋ ŋgʋ kɩlɩnɩ Yehowa cɔlɔ yɔ nɛ ɛkɛ kɩɖaʋ kɩbaŋʋ ŋgʋ ɛyʋ pɩzɩɣ nɛ ɛmaɣzɩna yɔ. Ɛ-taa lakaɣ leleŋ nɛ tʋma wena payɩ paɖʋwaɣ-ɩ yɔ. Ɛlakaɣ tʋmɩyɛ siŋŋ, ɛmaɣzaɣ ɛyaa lalaa yɔɔ siŋŋ nɛ paa ɛzɩmtaa lɛ ɛsɩɣaɣ Kewiyaɣ tʋma kajalaɣ ɖeɖe. (Mat. 6:33) Ðɩlabɩ egeetiye yɔɔ cɔnʋʋ tʋmɩyɛ pɩnzɩ 3, nɛ pɩnaɣ 1958 taa lɛ, payaa-ɖʋ se ɖiwolo nɛ ɖɩla tʋmɩyɛ Betɛɛlɩ.

Mɛnkpɛlɩkɩ lɔŋ sakɩyɛ Mary cɔlɔ. Kɩɖaʋ nakʋyʋ yɔ: Ðɩɖɔkɩ nesi kpaagbaa lɛ, ɖɩkpaɣ lɩmaɣzɩyɛ se ɖɩkpɛndɩɣ nɛ ɖɩkalɩɣ Bibl, nɛ ɖɩkalɩɣ masɩ 15 paa evemiye nɖɩ. Ða-taa kʋɖʋm kalɩɣ hɔɔlʋʋ nakʋyʋ lɛ, paa weyi ɛyɔɔdɩ ndʋ ɛmaɣzɩɣ masɩ nzɩ sɩ-yɔɔ yɔ nɛ ɖɩyɔɔdɩ ɛzɩma ɖɩpɩzɩɣ nɛ ɖɩlabɩnɩ-sɩ tʋmɩyɛ ɖe-wezuu caɣʋ taa yɔ pɩ-tɔm. Ðoŋ ɖoŋ lɛ, Mary heyaɣ-m mbʋ ɛkpɛlɩkɩ Galaadɩ sukuli taa nɛ ɛ-Ɛsɔtɔm tiyiyu tʋmɩyɛ taa yɔ pɩ-tɔm. Kɛdɛsɩ nzɩ, sɩsɩnɩ-m nɛ mɛwɛɛ niye samaɣ taa tɔm yɔɔdʋʋ taa nɛ pɩkɩlɩ nɛ mantɩlɩ ɖɔɖɔ ɛzɩma mankpazɩ koobiya halɩñɩma ɖoŋ yɔ nɛ pɩkɩlɩ.—Adu. 25:11.

Ma-halʋ kʋsɔɔlʋ Mary sɩbɩ pɩnaɣ 2013 taa. Ɛlɛ, manɖaŋ kpam se mana-ɩ ɛjaɖɛ kɩfaɖɛ taa. Pʋcɔ nɛ alɩwaatʋ ndʋ tɩtalɩ lɛ, mɛntɛm man-taa se mowoki pɩ-yɔɔ nɛ mɛnkpɛlɩkɩɣ Yehowa tɔm nɛ mantaɣ-ɩ liu nɛ ma-laŋɩyɛ kpeekpe. (Adu. 3:​5, 6) Mamaɣzɩɣ mbʋ Yehowa samaɣ kaɣ labʋ ɛjaɖɛ kɩfaɖɛ taa yɔ pɩ-yɔɔ lɛ, pɩhɛzɩɣ ma-laŋɩyɛ nɛ pɩhaɣ-m taa leleŋ. Pɩtʋʋ fɛyɩ se ɖa-Wɩlɩyʋ sɔsɔ kaɣ-ɖʋ wɩlʋʋ tɔm kɩfatʋ nɛ ɖɩkaɣ ɛ-yɔɔ tɔm kɩfatʋ kpɛlɩkʋʋ ɖɔɖɔ. Toovenim taa lɛ, maasɩŋ ɛzɩma mɛnsɛɛ-ɩ mbʋ payɩ ɛkpɛlɩkɩ-m yɔ pɩ-yɔɔ yɔ, nɛ maasɩŋ ɛzɩma mɛnsɛɛ-ɩ lootiye nɖɩ ɛlabɩ-m hɔɔlɩŋ ndɩ ndɩ taa yɔ ɖɩ-yɔɔ yɔ.