Apostoloo Pɔɔlɩ ma Timootee weyi ɛɛkɛ ɛgbɛyɛ taa ɛzʋtʋyʋ ɛzɩ ɛnʋ yɔ se: «Manɖʋʋ-ŋ paɣtʋ Ɛsɔ nɛ Krɩstʋ Yesu nɛ Ɛsɔ tiyiyaa mba palɩzaa yɔ pɛ-ɛsɩndaa se ŋɖɔ tɔm ndʋ tɩ-yɔɔ, tazɩ pɩtɩŋa pɩ-taa camɩyɛ pʋcɔ nɛ ŋkpaɣ lɩmaɣzɩyɛ naɖɩyɛ nɛ taaɖʋ tʋkaɣ ɛyaa taa.»—1 Tim. 5:21.

Kajalaɣ lɛ, ɖɩkaɣ naʋ Ɛsɔ tiyiyaa mba paapɩzɩɣ nɛ pɛwɛɛ Ɛsɔ tiyiyaa tindimiye nɖɩ ɖɩ-taa yɔ. Pɩtʋʋ fɛyɩ se Ɛsɔ tiyiyaa mba, patɩkɛ patam numwaa 144000 taa mba. Alɩwaatʋ ndʋ Pɔɔlɩ ma Timootee tɔm ndʋ yɔ, pataapaɣzɩtɩ Krɩstʋ mba patam numwaa fezuu se pakpa ɛsɔdaa. Apostoloowaa nɛ patam numwaa lalaa taapɩsɩtɩ feziŋ, ye mbʋ paapɩzɩɣ nɛ pɛkɛnɩ «Ɛsɔ tiyiyaa mba palɩzaa yɔ.»—1 Kɔr. 15:​50-54; 1 Tes. 4:​13-17; 1 Yoh. 3:2.

Pɩtasɩ lɛ «Ɛsɔ tiyiyaa mba palɩzaa yɔ,» paapɩzɩɣ nɛ pɛkɛnɩ Ɛsɔ tiyiyaa mba pataaña Ɛsɔ Tɛʋ Sɔsɔʋ alɩwaatʋ taa yɔ. Ɛsɔ tiyiyaa mba, patɩŋ Sataŋ wayɩ nɛ papasɩ aleewaa nɛ paakɛ Yesu koyindinaa. (Kiɖe 6:2; Luka 8:​30, 31; 2 Pɩy. 2:4) Cee wayɩ, pakaɣ pɛɖʋʋ Ɛsɔ tiyiyaa kɩdɛkɛdaa mba pɔʋ sɔsɔʋ taa pɩnzɩ 1000, nɛ pʋwayɩ lɛ paɖɩzɩ pa nɛ Eleeu.—Yud. 6; Natʋ 20:​1-3, 10.

Ye mbʋ, «Ɛsɔ tiyiyaa» mba pɔ-tɔm Pɔɔlɩ yɔɔdaa yɔ, pɛkɛɣnɩ Ɛsɔ tiyiyaa mba pɛwɛ ɛsɔdaa nɛ paɖʋʋ nesi «Ɛsɔ nɛ Krɩstʋ Yesu» yɔ.

Ɛsɔ tiyiyaa siɣsiɣ tɩnaa kudokiŋ sakɩyɛ wɛna. (Ebr. 12:​22, 23) Pɩfɛyɩ se ɖɩmaɣzɩ se pa-tɩŋa palakɩ tʋmɩyɛ kʋɖʋmɖɩyɛ alɩwaatʋ kʋɖʋmtʋ yɔɔ. (Natʋ 14:​17, 18) Tɔzɩ se alɩwaatʋ natʋyʋ, Yehowa kaatiyi tiyiyu kʋɖʋm nɛ ɛkʋ Asiirii sɔɔjanaa 185000. (2 Awi. 19:35) Ɛlɛ pɩtɩla, Ɛsɔ tiyiyaa sakɩyɛ paɖʋ tʋmɩyɛ se palɩzɩ Yesu «Kewiyaɣ taa ɛyaa mba payɩ peyeki se pituuli lalaa yɔ nɛ mba pamaɣnɩ paɣtʋ yɔɔ yɔ.» (Mat. 13:​39-41) Pɩtɩla ɖɔɖɔ yɔ, paɖʋ Ɛsɔ tiyiyaa lalaa tʋmɩyɛ se ‘pekpeɣli ɛyaa mba ɛlɩzaa’ se pakpa ɛsɔdaa yɔ. (Mat. 24:31) Nɛ lalaa wɛɛ nɛ ‘pakandɩyɩɣ ɖɔ-yɔɔ ɖa-nʋmɔŋ tɩŋa taa.’—Keɣ. 91:11; Mat. 18:10; kpaɣ-tʋ nɛ ŋmaɣzɩnɩ Maatiyee 4:11; Luka 22:43.

Ɛsɔ tiyiyaa mba pɔ-tɔm pɔyɔɔdɩ 1 Timootee 5:21 taa yɔ, pɩtɩla paakɛ Ɛsɔ tiyiyaa mba paaɖʋ-wɛ ŋgee tʋmɩyɛ se pasɩna nɛ pɔcɔnɩ Ɛsɔ samaɣ yɔɔ yɔ. Tɔm ndʋ tɩcɔ mayaɣ ŋga nɛ tɩta yɔ tɩ-taa, Pɔɔlɩ tasɩ lɔŋ kɩbaŋ weyi itukuuni ɛzɩma pɩwɛɛ se ɛgbɛyɛ taa ɛzʋtʋyaa ɩla pa-tʋma yɔ nɛ ɛzɩma pɩwɛɛ se ɛgbɛyɛ taa mba ɩña ɛgbɛyɛ taa ɛzʋtʋyaa yɔ. Pɩwɛɛ se ɛgbɛyɛ taa ɛzʋtʋyaa kaalakɩ pa-tʋma lɛ, ‘patazɩ pɩtɩŋa pɩ-taa camɩyɛ pʋcɔ nɛ pakpaɣ lɩmaɣzɩyɛ naɖɩyɛ, nɛ pataaɖʋ tʋkaɣ ɛyaa taa,’ nɛ pɩfɛyɩ se pakpaɣ lɩmaɣzɩyɛ naɖɩyɛ nɛ patɩmaɣzɩ camɩyɛ nɛ pʋcɔ. Lɩmaɣzɩyɛ sɔsɔɖɛ nɖɩ ɖɩ-yɔɔ pɩwɛɛ se pɔɖɔ Pɔɔlɩ lɔŋ tasʋʋ yɔɔ yɔ, nɖɩ lɛ se pɛwɛɛ nɛ palakɩ pa-tʋmɩyɛ «Ɛsɔ nɛ Krɩstʋ Yesu nɛ Ɛsɔ tiyiyaa mba palɩzaa yɔ pɛ-ɛsɩndaa.» Ye mbʋ pɩnaɣ kpayɩ kpayɩ se paɖʋ Ɛsɔ tiyiyaa nabɛyɛ tʋmɩyɛ se pasɩnɩ ɛgbɛyɛ. Tʋmɩyɛ nɖɩ ɖɩ-hɔɔlɩŋ nɩɩyɩ lɛ se pakandɩyɩ Ɛsɔ sɛyaa yɔɔ, pasɩnɩ-wɛ tɔm susuu tʋmɩyɛ taa nɛ peheyiɣ Yehowa mbʋ panaɣ yɔ.—Mat. 18:10; Natʋ 14:6