1-3. (a) Ɛbɛ yɔɔ ɖɩɩpɩtɩɣ se ɖɩpɩzɩɣ nɛ ɖɩpɩsɩ Ɛsɔ taabalaa? (b) Ɛyaa mba tɔm ɖɩkaɣ yɔɔdʋʋ ñʋʋ kʋnɛ kɩ-taa?

PAYA Abraham tam nabudozo Bibl taa se Ɛsɔ taabalʋ. (4 Awiya 20:7; Izaayii 41:8; Yakubu 2:23) E-ɖeke paya Bibl taa kpayɩ se Ɛsɔ taabalʋ. Pʋ-tɔbʋʋ lɛ se Abraham ɖeke pɩsɩnɩ Yehowa taabalʋ? Aayɩ, mbʋ pʋyɔɔ yɔ Bibl wɩlɩɣ se ɖa-tɩŋa ɖɩpɩzɩɣ nɛ ɖɩpɩsɩ Yehowa taabalaa.

² Bibl yɔɔdʋʋ halaa nɛ abalaa siɣsiɣ tɩnaa mba paañam Yehowa, pɛwɛɛnɩ tisuu ɛ-yɔɔ, nɛ papɩsɩ ɛ-taabalaa kɩbama yɔ pɔ-tɔm. (Kalɩ Keɣa 24:14.) Pɛkɛ “aseɣɖe tɩnaa canɖaʋ sɔsɔʋ” ŋgʋ kɩ-tɔm Pɔɔlɩ yɔɔdaa yɔ pa-taa nabɛyɛ. Pa-tɩŋa paakɛ Ɛsɔ taabalaa.​—Ebree 12:1.

³ Iyele nɛ ɖɩyɔɔdɩ ɛyaa mba Bibl yɔɔdaa se pɛkɛ Yehowa taabalaa yɔ, pa-taa naadozo tɔm. (1) Ruti, Mowaabʋ tɛtʋ taa lelu siɣsiɣ tʋ nɔɔyʋ; (2) Ezekiyasɩ, Yuda wiyaʋ siɣsiɣ tʋ nɔɔyʋ; nɛ (3) Maarɩɩ weyi ɛɛkɛ Yesu ɖoo yɔ. Ɛzɩma pɩɖɔma nɛ pa-taa paa weyi lɛ ɛpɩsɩ Ɛsɔ taabalʋ yɔ, ɛbɛ pɩpɩzɩɣ nɛ pɩkpɛlɩkɩ-ɖʋ?

4, 5. (a) Lɩmaɣzɩyɛ sɔsɔɖɛ nɖɩ pɩɩwɛɛ se Ruti ɛkpaɣ? (b) Nɛ ɛbɛ yɔɔ ɖɩ-kpaɣʋ taawɛɛ-ɩ kɛlɛʋ? (Cɔnɩ kiɖe tɛɛ kɩlɛmʋʋ.)

⁴ Nawomii nɛ e-wolaa Ruti nɛ Orpa pakʋyɩ Mowaabʋ nɛ pɔɖɔŋ nʋmɔʋ poliŋ ñɩŋgʋ se powolo Izrayɛɛlɩ. Palɩ nʋmɔʋ taa lɛ, Orpa kpaɣ lɩmaɣzɩyɛ se ɛpɩsɩɣ ɛ-tɛ Mowaabʋ. Ɛlɛ, Nawomii ñaaɖʋ ɛ-taa se ekpeŋ ɛ-tɛ Izrayɛɛlɩ ɛjaɖɛ taa. Ɛbɛ Ruti ñaaɖʋ ɛ-taa se ɛlakɩ? Pɩɩwɛɛ se ɛkpaɣ lɩmaɣzɩyɛ sɔsɔɖɛ naɖɩyɛ. Ɛkaɣ pɩsʋʋ ɛ-hɔʋ taa mba cɔlɔ Mowaabʋ tɛtʋ taa, yaa ɛkaɣ tɩŋʋʋ ɛ-waŋ Nawomii nɛ pɛɖɛɛ Bɛtɩlɛhɛm?​—Ruti 1:1-8, 14.

⁵ Ruti hɔʋ taa ñɩma kaawɛ Mowaabʋ tɛtʋ taa. Ɛpɩzaɣ se ɛpɩsɩ pɔ-cɔlɔ nɛ pɔcɔnɩ ɛ-yɔɔ. Ɛɛsɩm Mowaabʋ tɛtʋ taa ɛyaa, pa-kʋnʋŋ nɛ pɔ-sɔnzɩ. Nawomii taapɩzɩɣ se eheyi Ruti se ye ɛkɔm Bɛtɩlɛhɛm yɔ, ɛwɛɣnɩ wala ana. Pɩtasɩ lɛ, sɔɔndʋ kpaɣaɣ Nawomii se ɛɛkaɣ pɩzʋʋ nɛ ɛñɩnɩ-ɩ walʋ yaa ɖɩzʋyɛ. Pʋyɔɔ Nawomii heyi Ruti se ɛpɩsɩ Mowaabʋ tɛtʋ taa. Ɛzɩ ɖɩtɛm naʋ yɔ, Orpa “pɩsɩ ɛ-ɛyaa samaɣ cɔlɔ nɛ ɛ-agɔlɩma cɔlɔ.” (Ruti 1:9-15) Ɛlɛ ɛbɛ Ruti ñalaba? Ɛkpaɣ lɩmaɣzɩyɛ se ɛɛpɩsɩɣ ɛ-ɛyaa samaɣ cɔlɔ nɛ ɛ-agɔlɩma cɔlɔ.

6. (a) Lɩmaɣzɩyɛ kɩbanɖɛ nɖɩ Ruti kaakpaɣ? (b) Bowaazɩ yɔɔdʋʋ se Ruti kɔm nɛ ɛɖʋ Yehowa kʋyʋʋ yɔ, pʋ-tɔbʋʋ lɛ suwe?

⁶ Pʋtɔma yɔ, Ruti walʋ yaa ɛ-waŋ Nawomii kaasɩnɩnɩ-ɩ nɛ ɛtɩlɩ Yehowa. Ɛɛkpɛlɩkaa se Yehowa wɛ ndɩ nɛ Mowaabʋ agɔlɩma. Ɛɛsɔɔlɩ Yehowa nɛ ɛɛnawa se Yehowa kɛ Ɛsɔ weyi ɛmʋnaa se pɔsɔɔlɩ-ɩ nɛ pɛsɛɛ-ɩ yɔ. Pʋyɔɔ Ruti kpaɣ lɩmaɣzɩyɛ kɩbanɖɛ. Eheyi Nawomii se: “Ñɛ-ɛyaa samaɣ kɛ mɛ-ɛyaa samaɣ nɛ ñɛ-Ɛsɔ kɛ ɖɔɖɔ mɛ-Ɛsɔ.” (Ruti 1:16) Alɩwaatʋ ndʋ ɖɩmaɣzɩɣ ɛzɩma Ruti kaasɔɔlɩ Nawomii yɔ pɩ-yɔɔ lɛ, pitukuuni ɖa-laŋa siŋŋ. Ɛlɛ ɛzɩma Ruti kaasɔɔlɩ Yehowa yɔ, mbʋ tukuuni-ɖʋ kpem nɛ pɩkɩlɩ. Piitukuni Bowaazɩ ɖɔɖɔ siŋŋ pʋyɔɔ ɛsamɩ-ɩ pʋwayɩ nɛ ɛtɔ se ‘ɛkɔm Yehowa cɔlɔ nɛ ɛɖʋ-ɩ kʋyʋʋ.’ (Kalɩ Ruti 2:12.) Tɔm ndʋ Bowaazɩ yɔɔdaa yɔ, tɩtɔzʋʋ-ɖʋ ɛzɩma sumaɣ pɩɣa seɣ se kɛmɛlɩ ko-ɖoo keŋ tɛɛ kaɖɛ taa yɔ. (Keɣsi 35:8; 90:1-4) Mbʋ ɖɔɖɔ Yehowa kandɩyɩ Ruti yɔɔ nɛ sɔɔlɩm nɛ ɛwazɩ-ɩ e-tisuu yɔɔ. Wiɖiyi Ruti tikpiɖi lɩmaɣzɩyɛ nɖɩ ɛɛkpaɣ yɔ ɖɩ-yɔɔ kpa.

7. Ɛbɛ pɩzɩɣ nɛ pɩsɩnɩ mba sɔɔndʋ kpaɣ-wɛ se pakpaɣ pa-tɩ nɛ paha Yehowa yɔ?

⁷ Ɛyaa sakɩyɛ kpɛlɩkɩɣ Yehowa yɔɔ tɔm, ɛlɛ patɩsɔɔlɩ se paɖʋ-ɩ kʋyʋʋ. Sɔɔndʋ kpaɣ-wɛ se pakpaɣ pa-tɩ nɛ paha Yehowa nɛ pamɩyɩsɩ-wɛ lɩm. Ye pɩlakɩ-ŋ mbʋ yɔ, kpaɣ alɩwaatʋ nɛ ŋmaɣzɩ mbʋ piyeba nɛ sɔɔndʋ kpaɣ-ŋ yɔ pɩ-yɔɔ. Nɔɔyʋ fɛyɩ se ɛɛsɛɣ ɛsɔ nɔɔyʋ. Ye ɖɩɩsɛɣ Yehowa kɔyɔ, pɩwɩlɩɣ se ɖɩwɛɛ nɛ ɖɩsɛɣ ɛsɔ nɔɔyʋ. (Yozuwee 24:15) Ye ɖɩlɩzaa se ɖɩsɛɣ Ɛsɔ toovenim tʋ yɔ, pɩwɩlɩɣ se ɖɩkpaɣ lɩmaɣzɩyɛ kɩbanɖɛ. Ye ŋkpaɣ ña-tɩ nɛ ŋha Yehowa kɔyɔ, ŋwɩlɩɣ se ŋwɛnɩ tisuu se ɛkaɣ kɛʋ ña-ɖɩjɔzɩyɛ. Nɛ ɛkaɣ-ŋ sɩnʋʋ nɛ ŋsɛɛ-ɩ tam paa ŋkatɩɣ kala yɔ. Mbʋ ɛɛsɩnɩ Ruti.

8. Wɛtʋ ndʋ taa Ezekiyasɩ kaacaɣ nɛ ɛpaɣlɩ?

⁸ Wɛtʋ ndʋ tɩ-taa Ezekiyasɩ kaawɛɛ yɔ, tɩɩwɛ ndɩ kpem nɛ Ruti ñɩndʋ. Paalʋlɩ-ɩ Izrayɛɛlɩ samaɣ ŋga kaakpaɣ ka-tɩ nɛ kaha Ɛsɔ yɔ kɛ-hɛkʋ taa. Ɛlɛ pɩtaakɛ Izrayɛɛlɩ piya tɩŋa kaawɛnɩ siɣsiɣ Ɛsɔ ɛzɩdaa. Ezekiyasɩ caa Ahazɩ  kaakɛ wiyaʋ kɩdɛkɛdʋ. Ɛtaañaŋ Ɛsɔ tɛ templo, nɛ eeseɣti samaɣ se kɛsɛɛ ɛsɔnaa lalaa. Halɩ Ahazɩ kpaɣ e-piya nasɩyɩ nɛ ɛñaɣzɩ miŋ se ɛlaa cɛtɩm ɛsɔ nɔɔyʋ kɩlaʋ. Ye mbʋ, wɛtʋ ndʋ tɩ-taa Ezekiyasɩ kaacaɣ nɛ ɛpaɣlɩ yɔ, tɩɩwɛ kaɖɛ kpem.​—2 Awiya 16:2-4, 10-17; 4 Awiya 28:1-3.

9, 10. (a) Ɛbɛ pɩzaɣ se pituyi Ezekiyasɩ nɛ ɛ-taa wɩɩnɩ Yehowa? (b) Ɛbɛ yɔɔ pɩtɩpɔzɩ se ɖa-taa ɛwɩɩnɩ Yehowa? (c) Ɛbɛ yɔɔ pɩtɩmʋna se ɖɩmaɣzɩ se ɖɔ-hɔʋ wɛtʋ kaɣnɩ yebu nɛ ɖɩpɩsɩ ɛyʋ kɩbanʋ yaa ɛyʋ kɩdɛkɛdʋ?

⁹ Kɩɖaʋ kɩdɛkɛdʋʋ ŋgʋ Ahazɩ kaahawa yɔ, kɩpɩzaɣ se kituyi Ezekiyasɩ nɛ ɛ-hɔyɛ taa wɩɩnɩ Yehowa yaa ɛpɩsɩ ɛyʋ kɩdɛkɛdʋ ɛzɩ ɛ-caa yɔ. Sɔnɔ, mba pakatɩɣ kaɖɛ wɛtʋ ndʋ tɩtɩtalɩ Ezekiyasɩ ñɩndʋ yɔ, pa-taa nabɛyɛ maɣzɩɣ se pɛwɛnɩ toovenim se ‘pa-taa ɛwɩɩnɩ Yehowa’ yaa ɛ-ɛgbɛyɛ. (Aduwa 19:3) Lalaa ñamaɣzɩɣ se pa-ñɩma wɛtʋ kɩdɛkɛdɩtʋ yekina nɛ pacakɩ wezuu kɩdɛkɛdʋʋ yaa palakɩ kɩdɛkɛdɩm. (Ezekɩyɛɛlɩ 18:2, 3) Ɛlɛ pɛwɛnɩ toovenim na?

¹⁰ Ezekiyasɩ wezuu caɣʋ wɩlɩɣ se pɛfɛyɩnɩ toovenim. Nɔɔyʋ fɛyɩnɩ toovenim se ɛ-taa ɛwɩɩnɩ Yehowa, mbʋ pʋyɔɔ yɔ pɩtɩkɛ ɛnʋ lakɩna nɛ kɩdɛkɛdɩm talɩɣ ɛyaa. (Yɔb 34:10) Pɩkɛ toovenim se lʋlɩyaa pɩzɩɣ nɛ pawɩlɩ pe-piya se sɩla kɩbam yaa kɩdɛkɛdɩm. (Aduwa 22:6; Koloosi 3:21) Ɛlɛ pɩtɩwɩlɩ se ɖɔ-hɔʋ wɛtʋ kaɣnɩ yebu nɛ ɖɩpɩsɩ ɛyʋ kɩbanʋ yaa ɛyʋ kɩdɛkɛdʋ. Ɛbɛ yɔɔ? Mbʋ pʋyɔɔ yɔ Yehowa ha-ɖʋ tɩ-yɔɔ wɛʋ lɩzʋʋ waɖɛ, nɛ waɖɛ nɖɩ, ɖɩsɩɣnɩ-ɖʋ se ɖɩlɩzɩ se ɖɩlakɩ kɩbandʋ yaa kɩdɛkɛdɩm. (Wayɩ Wayɩ Paɣtʋ 30:19) Ɛzɩma Ezekiyasɩ labɩnɩ waɖɛ nɖɩ tʋmɩyɛ?

11. Ɛbɛ kaasɩnɩ Ezekiyasɩ nɛ ɛpɩsɩ Yuda wiyaʋ kɩbanʋ nɔɔyʋ?

¹¹ Paa Ezekiyasɩ caa kaakɛ Yuda wiyaʋ kɩdɛkɛdʋ nɔɔyʋ kɔyɔ, Ezekiyasɩ ñɔkɔm nɛ ɛpɩsɩ wiyaʋ kɩbanʋ. (Kalɩ 2 Awiya 18:5, 6.) Ɛtɩtɩŋ ɛ-caa kɩɖaʋ kɩdɛkɛdʋʋ. Ɛlɛ ɛlɩzaa se ewelisiɣni Yehowa nayaa ɛzɩ Izaayii, Mikee, nɛ Ozee. Ɛkpaɣ pɔ-lɔŋ tasʋʋ nɛ pɔ-lɔŋ sɩɣzʋʋ nɛ ɛlabɩnɩ  tʋmɩyɛ camɩyɛ. Mbʋ seɣtini-i nɛ ɛñɔɔzɩ mbʋ payɩ ɛ-caa kaawɛɛkaa yɔ, pɩ-taa sakɩyɛ. Ɛñɔɔzɩ templo nɛ kɩwɛɛ kele kele, ɛtɩmnɩ Yehowa se ekpeɣ samaɣ ka-kɩwɛɛkɩm, nɛ ɛyɔkɩ sɩʋ kpelisi Yuda tɛtʋ kpeekpe taa. (4 Awiya 29:1-11, 18-24; 31:1) Pʋwayɩ, alɩwaatʋ ndʋ Asiirii wiyaʋ Senakeribʋ ñɩnaɣ se eyooni Yerusalɛm yɔ, Ezekiyasɩ wɩlaa se ɛwɛ abalɩtʋ siŋŋ nɛ ɛwɛɛnɩ tisuu. Ɛɛwɛnɩ lidaʋ se Yehowa kaɣ pɔ-yɔɔ kandɩyʋʋ, nɛ ɛkpazɩ ɛ-samaɣ ɖoŋ. (4 Awiya 32:7, 8) Pɩkɔm nɛ pɩtalɩ alɩwaatʋ natʋyʋ lɛ Ezekiyasɩ paɣzɩ ɛ-tɩ kpazʋʋ, ɛlɛ Yehowa pasɩ-ɩ lɔŋ lɛ eluzi ɛ-tɩ. (4 Awiya 32:24-26) Pɩnaɣ kaɣlaa se Ezekiyasɩ ha-ɖʋ kɩɖaʋ kɩbaŋʋ. Etiyele se wɛtʋ ndʋ tɩɩwɛ ɛ-hɔʋ taa yɔ, tɩwɛɛkɩ e-wezuu caɣʋ. Ɛlɛ ɛwɩlaa se ɛɛkɛ Yehowa taabalʋ nɛ ɛha-ɖʋ kɩɖaʋ kɩbaŋʋ.

12. Ɛzɩ Ezekiyasɩ yɔ, sɔnɔ ɛzɩma ɛyaa sakɩyɛ wɩlaa se pɛkɛ Yehowa taabalaa?

¹² Sɔnɔ, ñʋʋ taa ɖoŋ lakasɩ tɔyɩnɩ ɛjaɖɛ yɔɔ, nɛ sɔɔlɩm fɛyɩ. Pʋyɔɔ lɛ, piya sakɩyɛ fɛyɩnɩ lʋlɩyaa kʋsɔɔlaa mba pɩwɛɛ se pɔcɔnɩ sɩ-yɔɔ camɩyɛ yɔ. (2 Timootee 3:1-5) Sɔnɔ, Krɩstʋ mba sakɩyɛ katɩɣ kala sakɩyɛ pɔ-hɔŋ taa, ɛlɛ palɩzaa se peyeki nɛ taabalɩyɛ kɩbanɖɛ wɛɛ pa nɛ Yehowa pɛ-hɛkʋ taa. Ɛzɩ Ezekiyasɩ yɔ, pawɩlɩɣ se pɩtɩkɛ pɔ-hɔʋ taa wɛtʋ yekina se papɩsɩ ɛyaa kɩbama yaa ɛyaa kɩdɛkɛdaa. Yehowa ha-ɖʋ tɩ-yɔɔ wɛʋ lɩzʋʋ waɖɛ, nɛ ɖɩpɩzɩɣ ɖɩlɩzɩ se ɖɩsɛɣ-ɩ nɛ ɖɩɖʋ-ɩ hɩɖɛ ɛzɩ Ezekiyasɩ yɔ.

13, 14. (a) Tʋmɩyɛ nɖɩ Ɛsɔ kaaɖʋ Maarɩɩ yɔ, ɛbɛ yɔɔ ɖɩpɩzaɣ se ɖɩwɛɛ-ɩ kaɖɛ? (b) Ɛlɛ alɩwaatʋ ndʋ Gabrɩyɛɛlɩ heyi-i tɔm ndʋ yɔ, ɛzɩma ɛlaba?

¹³ Ezekiyasɩ sɩba nɛ pɩla pɩnzɩ sakɩyɛ lɛ, halɩbɩɣa ŋga payaɣ se Maarɩɩ yɔ kapɩsɩ Yehowa taabalʋ kɩbanʋ nɛ Yehowa ɖʋ-kɛ tʋmɩyɛ sɔsɔɖɛ naɖɩyɛ. Yehowa heyi Maarɩɩ se ɛkaɣ haɣʋ hoɣa nɛ ɛlʋlɩ Ɛsɔ Pɩyalʋ. Ye Yehowa ɛtaasɔɔlɩ-ɩ nɛ ɛtaɣ-ɩ liu kɔyɔ, ɛtaaɖʋ-ɩ tʋmɩyɛ sɔsɔɖɛ nɖɩ. Ɛlɛ alɩwaatʋ ndʋ pacalɩ Maarɩɩ heyuu tʋmɩyɛ nɖɩ ɖɩ-tɔm yɔ, ɛzɩma ɛlaba?

¹⁴ Ðoŋ ɖoŋ lɛ, ɖɩyɔɔdʋʋ se hɩɖɛ sɔsɔɖɛ kpem Ɛsɔ ɖʋ Maarɩɩ. Ɛlɛ pʋtɔma yɔ, sɔɔndʋ kaakpa Maarɩɩ. Tiyiyu Gabrɩyɛɛlɩ heyi-i se ɛkaɣ haɣʋ hoɣa ɛlɛ ɛ nɛ abalʋ paasʋʋnɩ ɖama. Ɛlɛ Gabrɩyɛɛlɩ tiheyi ɛ-hɔʋ taa mba nɛ ɛ-cɔlɔ mba ɛzɩma pɩkaɣ ɖɔm nɛ ɛhaɣ hoɣa ŋga yɔ. Alɩwaatʋ ndʋ panaɣ-ɩ nɛ hoɣa yɔ, suwe pakaɣ maɣzʋʋ? Suwe ɛkaɣ heyuu ɛ-ɖaŋ Yosɛɛfʋ nɛ ɛlɛ tisi se pɩtɩkɛ hayitu ɛlaba? Pɩtasɩ lɛ, pɩɩkɛnɩ-ɩ tʋmɩyɛ sɔsɔɖɛ kpem se ɛcɔnɩ Ɛsɔ Pɩyalʋ yɔɔ nɛ ɛpaɣlɩ.  Toovenim taa lɛ, ɖɩtɩtɩlɩ ndʋ Maarɩɩ maɣzaɣ yɔ tɩ-tɩŋa, ɛlɛ ɖɩsɩm mbʋ ɛlaba alɩwaatʋ ndʋ Gabrɩyɛɛlɩ heyi-i tɔm ndʋ yɔ. Ɛyɔɔdaa se: “[Yehowa] lɩmɖʋyʋ yɔ ma, pɩlabɩ-m ɛzɩ ɛyɔɔdʋʋ yɔ.”​—Luka 1:26-38.

15. Ɛbɛ wɩlɩɣ se Maarɩɩ kaawɛnɩ tisuu siŋŋ?

¹⁵ Maarɩɩ kaawɛnɩ tisuu siŋŋ. Paa tʋmɩyɛ nɖɩ paɖʋ-ɩ yɔ, etisaɣ faaa nɛ ɛlakɩ-ɖɩ ɛzɩ yom yɔ. Ɛtaɣaɣ liu se Yehowa kaɣ-ɩ sɩnʋʋ nɛ ɛkandɩyɩ ɛ-yɔɔ. Ɛbɛ kaasɩnɩ Maarɩɩ nɛ ɛwɛɛnɩ tisuu sɔsɔm mbʋ? Paalʋlʋʋ-ɖʋ nɛ tisuu. Ɛlɛ, ye ɖɩñaɣ pana nɛ ɖɩpɔzɩ Ɛsɔ se ɛwazɩ ɖa-pana ñaɣʋ yɔɔ kɔyɔ, ɖɩpɩzɩɣ nɛ ɖɩwɛɛnɩ tisuu. (Efɛɛzɩ 2:8) Maarɩɩ ñaɣ pana siŋŋ nɛ ɛkpazɩ e-tisuu ɖoŋ. Ɛzɩma ɖɩlaba nɛ ɖɩna? Iyele nɛ ɖɩna ɛzɩma Maarɩɩ welisaɣ tɔm yɔ nɛ tɔm ndʋ ɛɛyɔɔdaa yɔ.

16. Ɛbɛ wɩlɩɣ se Maarɩɩ welisaɣ tɔm camɩyɛ?

¹⁶ Ɛzɩma Maarɩɩ welisaɣ tɔm yɔ. Bibl seɣtiɣ ɖa-taa “paa weyi lɛ se ekpeetini welisuu camɩyɛ, nɛ ɛwɛɛ nikaɣ ɖɩyɔɔdɩyɛ.” (Yakubu 1:19) Maarɩɩ kaasɩm welisuu camɩyɛ. Bibl wɩlɩɣ se Maarɩɩ welisaɣ tɔm ndʋ peheyaɣ-ɩ yɔ camɩyɛ, kɔzɩ kɔzɩ tɔm ndʋ ɛkpɛlɩkaɣ Yehowa yɔɔ yɔ. Ɛkpakaɣ alɩwaatʋ nɛ ɛmaɣzɩɣ tɔm ndʋ tɩ-yɔɔ. Alɩwaatʋ ndʋ ɛlʋlɩ Yesu nɛ ninɖiɣyaa kɔɔ nɛ peheyi-i tɔm ndʋ tiyiyu nɔɔyʋ heyi-wɛ yɔ, ewelisini-wɛ camɩyɛ. Pʋwayɩ Yesu kɔm nɛ ɛwɛɛnɩ pɩnzɩ 12 lɛ, ɛyɔɔdɩ tɔm natʋyʋ nɛ tɩla Maarɩɩ piti. Tɔm ndʋ ninɖiɣyaa heyi-i nɛ ndʋ Yesu ñeheyi-i pʋwayɩ yɔ, ewelisi-tʋ, ɛsɩɩ-tʋ ɛ-laŋɩyɛ taa, nɛ ɛmaɣzɩɣ tɩ-yɔɔ camɩyɛ.​—Kalɩ Luka 2:16-19, 49, 51.

17. Tɔm ndʋ Maarɩɩ kaayɔɔdaa yɔ, ɛbɛ tɩkpɛlɩkɩɣ-ɖʋ ɛ-yɔɔ?

¹⁷ Tɔm ndʋ Maarɩɩ kaayɔɔdaa yɔ. Bibl tɩyɔɔdɩ tɔm ndʋ Maarɩɩ yɔɔdaa yɔ tɩ-tɔm caaa. Luka 1:46-55 taa pama tɔm ndʋ ɛyɔɔdaa nɛ tɩkɩlɩ ɖaɣlʋʋ yɔ. Tɔm ndʋ Maarɩɩ yɔɔdɩ peeɖe yɔ, tɩwɩlɩɣ se ɛɛsɩm Ɛsɔtɔm camɩyɛ. Ɛbɛ yɔɔ ɖɩyɔɔdʋʋ mbʋ? Mbʋ pʋyɔɔ yɔ Maarɩɩ tɔm ndʋ, tɩlabɩ nɔɔ kʋɖʋmaɣ nɛ adɩma wena Samɩyɛɛlɩ ɖoo Hana kaalaba yɔ. (1 Samɩyɛɛlɩ 2:1-10) Pɩwɛ ɛzɩ Maarɩɩ kaaya masɩ ɛzɩ tam 20 mbʋ yɔ ɛ-tɔm yɔɔdʋʋ mbʋ pɩ-taa yɔ. Pɩwɩlɩɣ kpayɩ kpayɩ se ɛɛsɔɔlɩ yɔɔdʋʋ toovenim tɔm ndʋ ɛkpɛlɩkɩ ɛ-Taabalʋ sɔsɔ Yehowa yɔɔ yɔ.

18. Hɔɔlɩŋ weyi taa ɖɩpɩzɩɣ nɛ ɖɩmaɣzɩnɩ Maarɩɩ tisuu?

¹⁸ Ɛzɩ Maarɩɩ yɔ, nabʋyʋ taa Yehowa pɩzɩɣ nɛ ɛɖʋ-ɖʋ tʋma naayɛ nɛ pɩlabɩ-ɖʋ ɛzɩ akɩlɩ-ɖʋ kaɖɛ yɔ. Ye mbʋ yɔ, iyele nɛ ɖɩmaɣzɩnɩ Maarɩɩ, nɛ ɖiluzi ɖa-tɩ nɛ ɖitisi tʋma ana faaa nɛ ɖɩtaa liu se Yehowa kaɣ-ɖʋ sɩnʋʋ. Ye ɖiwelisiɣni Yehowa camɩyɛ nɛ ɖɩmaɣzɩɣ mbʋ ɖɩkpɛlɩkɩ ɛ nɛ ɛ-tamaɣ pɔ-yɔɔ yɔ, pɩwɩlɩɣ se ɖɩwɛɛ nɛ ɖɩmaɣzɩnɩ Maarɩɩ. Ye ɖɩlakɩ mbʋ yɔ, pɩpɩzɩɣ piseɣti-ɖʋ nɛ ɖiheyi lalaa mbʋ ɖɩkpɛlɩkaa yɔ nɛ taa leleŋ.​—Keɣa 76:12, 13; Luka 8:18; Roma 10:15.

19. Ye ɖɩmaɣzɩɣnɩ Bibl taa ɛyaa mba paawɛnɩ tisuu siŋŋ kɔyɔ, lidaʋ ŋgʋ ɖɩpɩzɩɣ nɛ ɖɩwɛɛna?

¹⁹ Pɩnaɣ kaɣlaa se ɛzɩ Abraham yɔ, Ruti, Ezekiyasɩ nɛ Maarɩɩ paakɛ Yehowa taabalaa. Pɩtasɩ lɛ, “aseɣɖe tɩnaa canɖaʋ sɔsɔʋ” nakʋyʋ kaapɩsɩ ɖɔɖɔ Ɛsɔ taabalaa. Tɛtɛ pɩla mbʋ nɛ ɖiwolo pɩ-yɔɔ nɛ ɖɩmaɣzɩnɩ pe-tisuu. (Ebree 6:11, 12) Ye ɖɩlakɩ mbʋ yɔ, ɖɩkaɣ kɛʋ Yehowa taabalaa tam nɛ ɖihiɣ wazasɩ sakɩyɛ.