Ðiwolo pɩ-yɔɔ nɛ ɖɩsɛɛ Yehowa nɛ taa leleŋ
MAƔZƖ kɩyakʋ ŋgʋ ña-taa labɩ leleŋ nɛ pɩkɩlɩ yɔ kɩ-yɔɔ nɛ ŋna. Ɛzɩ pɩkɛ kɩyakʋ ŋgʋ ŋɖɔkɩ nesi yaa ŋlʋlɩ ña-kajalaɣ pɩɣa yɔ? Yaa kɩyakʋ ŋgʋ ŋkpaɣ ña-tɩ ŋha Yehowa nɛ pamɩyɩsɩ-ŋ lɩm yɔ? Pʋtɔma yɔ ŋɖiɣzinaa se kɩyakʋ ŋgʋ ŋha ña-tɩ Yehowa nɛ pamɩyɩsɩ-ŋ lɩm yɔ, ŋgʋ hanɩ-ŋ taa leleŋ nɛ pɩkɩlɩ. Nɛ Krɩstʋ mba lalaa taa kaalabɩ leleŋ siŋŋ se ŋwɩlɩ ɛyaa tɩŋa ɛzɩdaa se ŋsɔɔlɩ Ɛsɔ nɛ ña-laŋɩyɛ pilim, ñe-ciyam pilim, ña-maɣzɩm pilim nɛ ño-ɖoŋ pilim.—Maarkɩ 12:30.
Pɩtʋʋ fɛyɩ se kpaɣnɩ alɩwaatʋ ndʋ pamɩyɩsɩ-ŋ lɩm yɔ, ŋhiɣ taa leleŋ siŋŋ Yehowa sɛtʋ taa. Ɛlɛ tɔm susuyaa nabɛyɛ lesi taa leleŋ weyi paawɛnɩ kiɖe tɛɛ yɔ. Ɛbɛ yeba nɛ pelesi taa leleŋ ɛnɩ? Lɩmaɣza wena yɔɔ pɩwɛɛ se ɖiwolo pɩ-yɔɔ nɛ ɖɩsɛɛ Yehowa nɛ taa leleŋ?
MBƲ PIYEBA NƐ NABƐYƐ LESI TAA LELEŊ WEYI PAAWƐNA YƆ
Pɩtʋʋ fɛyɩ se Kewiyaɣ tɔm ndʋ ɖisusuu nɛ lidaʋ ŋgʋ Yehowa ha-ɖʋ se piileɖiɣ lɛ eɖeziɣ ɛjaɖɛ kɩdɛkɛdɩyɛ ɖɩnɛ nɛ ɛkɔnɩ ɛjaɖɛ kɩfaɖɛ yɔ, pɩhaɣ-ɖʋ taa leleŋ siŋŋ. Pɩtasɩ lɛ, Sofoniya 1:14 hɛzɩɣ ɖa-laŋɩyɛ se: “[Yehowa] kɩyakʋ sɔsɔʋ ñɔtaa, kɩñɔtaa nɛ kɩkɔŋ lɛɛ lɛɛ.” Ɛlɛ ye ɖɩɖaŋ kɩyakʋ ŋgʋ nɛ pɩlakɩ-ɖʋ ɛzɩ kɩɩkɔŋ lɔŋ kɔyɔ, pɩpɩzɩɣ piyele nɛ ɖilesi taa leleŋ weyi ɖɩɩwɛnɩ kiɖe tɛɛ yɔ, nɛ ɖɩɩtasɩɣ wɛʋ kpekpeka Yehowa sɛtʋ taa.—Aduwa 13:12.
Taabalɩyɛ kɩbanɖɛ nɖɩ ɖɩwɛ Ɛsɔ sɛyaa hɛkʋ taa yɔ, ɖiseɣtiɣ-ɖʋ se ɖiwolo pɩ-yɔɔ nɛ ɖɩsɛɛ Yehowa nɛ taa leleŋ. Halɩ pɩtɩla yɔ, Yehowa sɛyaa ɖɔnɛ kɩbanɖɛ hɔmnɩ-ɖʋ nɛ ɖɩkɔɔ toovenim Ɛsɔ sɛtʋ taa nɛ ɖɩpaɣzɩ Ɛsɔ sɛʋ nɛ taa leleŋ. (1 Pɩyɛɛrɩ 2:12) Ɛlɛ ye koobu nɔɔyʋ ɛɛɖɔŋ Ɛsɔ paɣtʋ yɔɔ nɛ pɔhɔ ɛ-nɩŋgbaaŋ, ɛbɛ pɩzɩɣ nɛ pɩla? Ye pɩlabɩ mbʋ yɔ, ɛyaa mba Yehowa sɛyaa ɖɔnɛ kɩbanɖɛ kaahɔm-wɛ nɛ pɔkɔɔ toovenim taa yɔ, pɩpɩzɩɣ nɛ pitii pa-taa nabɛyɛ yɔɔɔ nɛ pelesi taa leleŋ weyi paawɛna yɔ.
Wondu ndʋ palɩzɩɣ tadɩyɛ nʋmɔʋ taa Sataŋ ɛjaɖɛ ɖɩnɛ ɖɩ-taa yɔ, tɩpɩzɩɣ tiyele ɖɔɖɔ nɛ ɖilesi taa leleŋ weyi ɖɩɩwɛna yɔ. Sataŋ tɩŋɩɣnɩ ɛ-ɛjaɖɛ yɔɔ nɛ ɛñɩnɩɣ se ɖɩmaɣzɩ se pɩpɔzʋʋ se ɖɩwɛɛnɩ wondu ndʋ tɩ-tɔm tɩcɛyɩ yɔ. Ɛlɛ pɩwɛɣ ɖeu se ɖɩtɔzɩ Yesu tɔm tʋnɛ tɩ-yɔɔ: “Nɔɔyʋ ɛɛpɩzɩɣ ɛwɛɛnɩ caanaa naalɛ mbʋ pʋyɔɔ yɔ, yaa ɛsɔɔlʋʋ lɛlʋ nɛ ɛpaɖɩ lɛlʋ, yaa ɛmalɩɣnɩ lɛlʋ nɛ ese lɛlʋ. Ɩɩpɩzɩɣ ɩla Ɛsɔ Maatiyee 6:24) Ðɩɩpɩzɩɣ ɖɩsɛɛ Yehowa nɛ taa leleŋ ɛlɛ ɖɩtɛ ɖɩñɩnɩɣ se ɖɩwɛɛnɩ ɛjaɖɛ yɔɔ ñɩm sakɩyɛ.
nɛ liidiye pa-tʋmɩyɛ.” (ÐA-TAA LAKƖ LELEŊ NƐ ‘ÐA-ÑƲƲ YABƖTƲ TƐ ƐSƆ’
Mba pɔsɔɔlɩ Yehowa yɔ, ɛ-sɛtʋ tɩkɛnɩ-wɛ sʋʋtʋ. (1 Yohanɛɛsɩ 5:3) Ðɩtɔzɩ Yesu tɔm tʋnɛ tɩ-yɔɔ: “Ɩkɔɔ mɔn-cɔlɔ, mba mɩ ɩlakɩ kʋñɔŋ nɛ pɩnɩɣ-mɩ yɔ, nɛ mankaɣ-mɩ labʋ nɛ ɩhɛzɩ. Ɩkpaɣ man-sʋʋtʋ nɛ ɩsɩɣlɩ nɛ ɩkpɛlɩkɩ mɔn-cɔlɔ se: Mɛnkɛ laŋɩyɛ kɩbanɖɛ tʋ nɛ hɛɛɛ tʋ; nɛ ihiɣ hɛzʋʋ mi-ciyamnaa taa. Ɛɛɛ, man-sʋʋtʋ wɛ hʋnjaŋ nɛ tɩ-sɩɣlʋʋ fɛyɩ kaɖɛ.” (Maatiyee 11:28-30) Ye ɖɩkpaɣ Krɩstʋ sʋʋtʋ nɛ ɖɩsɩɣlɩ nɛ ɖɩtɩŋɩɣ ɛ-wayɩ kɔyɔ, pɩhɛzɩɣ ɖa-laŋa nɛ pɩha-ɖʋ taa leleŋ. Nɛ pɩtʋʋ fɛyɩ se ɖihikiɣ taa leleŋ sakɩyɛ Yehowa sɛtʋ taa. Iyele nɛ ɖɩna lɩmaɣza naadozo wena a-yɔɔ ɖɩpɩzɩɣ nɛ ɖihiɣ taa leleŋ ‘ɖa-ñʋʋ yabɩtʋ tɛ Ɛsɔ’ yɔɔ yɔ.—Habakuuki 3:18.
Ðɩsɛɣ Ɛsɔ koboyaɣ tʋ weyi ɛha-ɖʋ wezuu yɔ. (Tʋma Labʋ 17:28; 1 Timootee 1:11) Ɛsɔ yebina nɛ ɖɩwɛɛ wezuu. Ye mbʋ, ɖiwolo pɩ-yɔɔ nɛ ɖɩsɛɛ-ɩ nɛ taa leleŋ paa pamɩyɩsʋʋ-ɖʋ lɩm yɔ pileɖaa yaa pitileɖi yɔ.
Héctor kam ɛ-lɩmaɣza Ɛsɔ Kewiyaɣ yɔɔ nɛ ɛwɛɛ kpekpeka tɔm susuu taa, nɛ mbʋ sɩnɩnɩ-ɩ nɛ etilesi taa leleŋ weyi ɛɛwɛna yɔ
Ðɩna Héctor kɩɖaʋ. Ɛlabɩ egeetiye yɔɔ cɔnʋʋ tʋmɩyɛ pɩnzɩ 40. ‘Paa ɛkpadɩyaa kɔyɔ’ etiyele pana ñaɣʋ. (Keɣa 91:13-15) Héctor ɛɛtasɩɣ pɩzʋʋ nɛ ɛlakɩ tʋma wena ɛɛlakaɣ Yehowa sɛtʋ taa yɔ mbʋ pʋyɔɔ yɔ ɛ-halʋ hɩnɩ kʋdɔŋ. Paa mbʋ yɔ, pɩtɩpasɩ taa leleŋ weyi ɛɛwɛna yɔ. Ɛyɔɔdaa se: “Paa man-taa ɛfɛyɩ leleŋ se ma-halʋ kʋdɔŋ wɛɛ nɛ kɩtɛzɩɣ kɔzʋʋ nɛ pɩwɛ-m kaɖɛ se mɔncɔnɩ ɛ-yɔɔ kɔyɔ, mantiyele se taa leleŋ weyi mɛwɛnɩ Yehowa sɛtʋ taa yɔ ile. Manawa se Yehowa hanɩ-m wezuu nɛ lɩmaɣzɩyɛ kɩbanɖɛ naɖɩyɛ yɔɔ ɛlɩzɩ ɛyʋ. Piseɣtiɣ-m se mɔnsɔɔlɩ-ɩ siŋŋ nɛ mɛnsɛɛ-ɩ nɛ ma-laŋɩyɛ pilim. Pɩsa nɛ mantaalesi taa leleŋ weyi mɛwɛna yɔ lɛ, mañakɩ pana se mɛwɛɛ kpekpeka tɔm susuu taa nɛ manka ma-lɩmaɣza lidaʋ ŋgʋ Ɛsɔ Kewiyaɣ haɣ-ɖʋ yɔ kɩ-yɔɔ.”
Yehowa tiyi ɛ-Pɩyalʋ se ɛlaa ɛ-tɩ ɖɔ-yɔɔ nɛ ɖihiɣ taa leleŋ ɖe-wezuu caɣʋ taa. Bibl tɔŋ se: “Ɛsɔ sɔɔlɩ ɛjaɖɛ pɩŋŋ nɛ ɛcɛlɩ-ɖɩ ɛ-Pɩyalʋ ɛgbamɩyɛ se weyi etisiɣ ɛ-yɔɔ lɛ, etaale, ɛlɛ ehiɣ tamtam wezuu.” (Yohanɛɛsɩ 3:16) Ye ɖɩwɛnɩ tisuu Yesu kɩlaʋ yɔɔ kɔyɔ, Yehowa kaɣ-ɖʋ kpeɣu ɖa-kɩwɛɛkɩm nɛ ɖihiɣ wezuu maatɛŋ. Kɩlaʋ ŋgʋ, kiiseɣtiɣ-ɖʋ se ɖɩwɩlɩ Yehowa ɖɛ-ɛsɩmɩyɛ nɛ ɖɩsɛɛ-ɩ nɛ taa leleŋ yaa we?
Jesús yeba nɛ e-wezuu caɣʋ wɛɛ kɛlɛʋ nɛ ɛsɛɛ Yehowa nɛ taa leleŋ pɩnzɩ sakɩyɛ
Payaɣ koobu nɔɔyʋ Mɛkɩsiiki ɛjaɖɛ taa se Jesús. Ɛyɔɔdaa se: “Man-tʋmɩyɛ kaapɩsɩ-m yom. Nabʋyʋ taa malakaɣ tʋmɩyɛ kaahɛzaɣ kɩyakɩŋ sakɩyɛ, ɛlɛ pɩtaakɛnɩ kɩjɛyʋʋ se mala mbʋ. Malakaɣ mbʋ se
mehiɣ liidiye sakɩyɛ. Pʋwayɩ lɛ, mɛnkpɛlɩkɩ nɛ mantɩlɩ Yehowa nɛ ɛzɩma etiyi ɛ-Pɩyalʋ se ɛlaa ɛ-tɩ ɛyaa yɔɔ yɔ. Piyeba nɛ mɔnsɔɔlɩ siŋŋ se mɛnsɛɛ-ɩ. Peeɖe mankpaɣ man-tɩ nɛ maha Yehowa. Nɛ paa maalabɩ pɩnzɩ 28 tʋmɩyɛ nɖɩ ɖɩ-taa kɔyɔ, meyebi-ɖɩ nɛ manpaɣzɩ alɩwaatʋ tɩŋa Ɛsɔ sɛtʋ tʋmɩyɛ labʋ.” Kpaɣnɩ alɩwaatʋ ndʋ lɛ, koobu Jesús paɣzɩ hiɣu taa leleŋ Yehowa sɛtʋ taa.Pee wena ɖa-pana ñaɣʋ lʋlʋʋ yɔ, aakɔŋnɩ-ɖʋ wɩzasɩ ɛlɛ ahaɣ-ɖʋ taa leleŋ. Pʋcɔ nɛ ŋtɩlɩɣ Yehowa lɛ, ŋtɔzʋʋ ɛzɩma ñe-wezuu caɣʋ kaawɛɛ yɔ? Apostoloo Pɔɔlɩ tɔzɩ Roma Krɩstʋ mba se ‘ɖooo lɛ paakɛ kɩwɛɛkɩm yomaa’ ɛlɛ lɛɛlɛɛyɔ lɛ papɩsɩ “siɣsiɣ tɔm yomaa.” Pee wena pʋlʋlɩ-wɛ yɔ lɛ se ‘papɩsɩ kiɖeɖema’ nɛ kɛzɛɣa ŋga pakaɣ hiɣu yɔ lɛ tamtam wezuu. (Roma 6:17-22) Ða ɖɔɖɔ ɖɩcakɩ wezuu ŋgʋ kɩwɛ kele kele yɔ, nɛ pʋyɔɔ lɛ ɖɩlɩ wɩzasɩ nzɩ wezuu kɩdɛkɛdʋʋ yaa puuyaɣ lakasɩ kɔŋna yɔ sɩ-taa. Pɩkɛnɩ-ɖʋ taa leleŋ siŋŋ.
“Pɩnzɩ nzɩ mɛnsɛ Yehowa yɔ, sɩ-taa mehiɣ taa leleŋ nɛ pɩkɩlɩ.”—Jaime
Iyele nɛ ɖɩna Jaime kɩɖaʋ. Etaatisiɣ se Ɛsɔ wɛɛ, etisaɣ évolution wɩlɩtʋ yɔɔ, nɛ ɛɛkɛ ɖɔɖɔ aŋguluma maɖʋ. Pʋwayɩ lɛ, Jaime paɣzɩ kediɣzisi wobu nɛ sɔɔlɩm mbʋ pɩwɛ koobiya hɛkʋ taa yɔ, pitukuni-i siŋŋ. Pɩsa nɛ eyele ɛ-lakasɩ kɩbɩnzɩ lɛ, pɩɩwɛɛ se ɛtɩmnɩ Yehowa se ɛsɩnɩ-ɩ nɛ ɛwɛɛnɩ tisuu. Jaime yɔɔdaa se: “Pazɩ pazɩ lɛ, mɔnkɔɔ nɛ menɖiɣzina se Ɛsɔ wɛɛ nɛ ɛkɛ Caja kʋsɔɔlʋ nɛ pʋtɔdɩyɛ nayʋ. Ɛzɩma mɔnɖɔŋaɣ Yehowa paɣtʋ yɔɔ yɔ, pɩkandɩyɩ mɔ-yɔɔ. Ye mantaalɛɣzɩ me-wezuu caɣʋ kɔyɔ, pʋtɔma yɔ maatɛm sɩbʋ ɛzɩ man-taabalaa mba ma nɛ wɛ ɖɩmakaɣ aŋguluma yɔ. Pɩnzɩ nzɩ mɛnsɛ Yehowa yɔ, sɩ-taa mehiɣ taa leleŋ nɛ pɩkɩlɩ.”
PƖTAANƖƖ-ÐƲ
Ña-naʋ taa, lɩmaɣza wena pɩwɛɛ se ɖɩwɛɛna, alɩwaatʋ ndʋ ɖɩɖaŋɩɣ ɛjaɖɛ kɩdɛkɛdɩyɛ ɖɩnɛ ɖɩ-tɛm yɔ? Tɔzɩ se ɖɩwɛɛ nɛ ‘ɖiɖuu fezuu taa’ nɛ ɖɩkaɣ ‘kʋm tamtam wezuu.’ Ye mbʋ, “pɩtaaɖɛɛ-ɖʋ nɛ kɩbandʋ labʋ, mbʋ pʋyɔɔ yɔ kɩyakʋ talɩɣ lɛ, ɖɩkʋŋ kaahɛzaɣ.” (Galaatɩ 6:8, 9) Tɛtɛ pɩla mbʋ nɛ Yehowa sɩnɩ-ɖʋ nɛ ɖɩɖɔkɩ ɖa-tɩ kpam, nɛ ɖɩñaɣ pana nɛ ɖɩwɛɛnɩ wɛtʋ kɩbandʋ ndʋ tɩsɩɣnɩ-ɖʋ se ɖihiɣ ñʋʋ yabʋ kʋñɔŋ sɔsɔʋ alɩwaatʋ taa, nɛ ɖiwolo pɩ-yɔɔ nɛ ɖɩsɛɛ Yehowa nɛ taa leleŋ paa ɖɩkatɩɣ kʋñɔmɩŋ yɔ.—Natʋ 7:9, 13, 14; Yakubu 1:2-4.
Ye ɖɩɖɔkɩ ɖa-tɩ yɔ, ɖɩpɩzɩɣ nɛ ɖɩtaa liu se Yehowa kaɣ-ɖʋ wazʋʋ mbʋ pʋyɔɔ yɔ ɛɛsɔʋ tʋmɩyɛ nɖɩ ɖɩlakɩ nɛ ɛzɩma ɖɩsɔɔlɩ-ɩ nɛ ɖɩsaŋ ɛ-hɩɖɛ yɔ pɩ-yɔɔ. Ye ɖiwobi pɩ-yɔɔ nɛ ɖɩsɛɣ Yehowa nɛ taa leleŋ kɔyɔ, ɖɩkaɣ yɔɔdʋʋ ɖɔɖɔ ɛzɩ Keɣa maɖʋ Daviid yɔ. Ɛtɔm se: “Mansɩ [Yehowa] mɛ-ɛzɩdaa tam; ɛwɛ ma-nɩwaŋ yɔɔ, mbʋ mɛwɛ kaalɛyɩtʋ! Pʋyɔɔ ma-laŋɩyɛ mɛyɩɣ nɛ man-taa hʋlʋmʋʋ; ma-nandʋ maɣmaɣ caɣ ɖiɣ ɖiɣ, tiiseliɣ.”—Keɣa 15:8, 9.