1, 2. (a) Ɛzɩma ɖɩlaba nɛ ɖɩna se ɛyaa pɩzɩɣ nɛ papɩsɩ Ɛsɔ taabalaa? (b) Ɛbɛ ɖɩkaɣ kpɛlɩkʋʋ ñʋʋ kʋnɛ kɩ-taa?

KPAƔNƖ kɩyakʋ ŋgʋ palʋlɩ-ɖʋ nɛ pɩkɔɔ pɩtalɩ ɖa-sɩm wiye yɔ, ɖɩñɩnɩɣ se lalaa ɩsɔɔlɩ-ɖʋ. Pɩtɩkɛ sɔɔlɩm mbʋ pɩwɛ halʋ nɛ abalʋ pɛ-hɛkʋ taa yɔ pi-ɖeke ɛyaa ñɩnɩɣ, ɛlɛ pañɩnɩɣ ɖɔɖɔ sɔɔlɩm mbʋ pɩwɛ taabalaa hɛkʋ taa yɔ. Ɛlɛ sɔɔlɩm mbʋ pɩ-tɔm kɩlɩ cɛyʋʋ ɖe-wezuu caɣʋ taa yɔ lɛ Yehowa sɔɔlɩm. Pɩwɛ ɛyaa sakɩyɛ kaɖɛ se petisi se Ɛsɔ nɛ ɛyaa papɩzɩɣ nɛ pɛkɛ taabalaa, mbʋ pʋyɔɔ yɔ paanaɣ-ɩ nɛ ɛkɛ Ðoŋ Tɩŋa Tʋ. Ɛlɛ ɖa lɛ, ɖɩnawa se ɛyaa pɩzɩɣ nɛ papɩsɩ Ɛsɔ taabalaa.

² Bibl wɩlɩɣ se ɛyaa nabɛyɛ kaapɩsɩ Ɛsɔ taabalaa. Nɛ pɩwɛɣ ɖeu se ɖɩkpɛlɩkɩ pa-kɩɖaŋ. Ɛbɛ yɔɔ? Mbʋ pʋyɔɔ yɔ, taabalɩyɛ ɖʋʋ nɛ Ɛsɔ kɛnɩ kaɖʋwa kɩbaŋa ŋga ɖɩpɩzɩɣ nɛ ɖɩɖʋ ɖa-tɩ ɖe-wezuu caɣʋ taa yɔ. Ye mbʋ, iyele nɛ ɖɩna Abraham kɩɖaʋ. (Kalɩ Yakubu 2:23.) Ɛbɛ kaasɩnɩ Abraham nɛ ɛpɩsɩ Ɛsɔ taabalʋ? Tisuu sɩnɩnɩ Abraham nɛ ɛpɩsɩ  Ɛsɔ taabalʋ; pʋyɔɔ paya-ɩ se mba pa-tɩŋa pɛwɛnɩ tisuu yɔ pa-caa. (Roma 4:11) Ðɩɩtazɩɣ Abraham kɩɖaʋ taa lɛ, pɔzɩ ña-tɩ se: ‘Ɛzɩma manpɩzɩɣ nɛ mamaɣzɩnɩ Abraham tisuu nɛ mɛncɛyɩsɩ ma nɛ Yehowa ɖa-taabalɩyɛ?’

3, 4. (a) Ɛbɛ kaatakɩ Abraham tisuu siŋŋ? (b) Ɛbɛ yɔɔ Abraham kaatisi faaa se ɛlaa ɛ-pɩyalʋ Izaakɩ?

³ Maɣzɩ se ŋɖiɣni naʋ Abraham, ɛwɛnɩ pɩnzɩ 125, eɖiɣni ɖɔm hɛɛɛ hɛɛɛ nɛ ɛkpaɣ pʋʋ nakʋyʋ. ^[1] Ɛ-pɩyalʋ Izaakɩ weyi ɛɛwɛnɩ pɩnzɩ 25 yɔ, ɛwɛɛ nɛ ɛtɩŋɩɣ ɛ-wayɩ. Izaakɩ hɔɔlɩ ɖasɩ, nɛ Abraham ñɔɖɔkɩ sɩɣa nɛ mbʋ epuzini miŋ yɔ. Pʋtɔma yɔ, wiɖiyi Abraham taaɖɔ nʋmɔʋ kaɖɛ ñɩŋgʋ nakʋyʋ mbʋ nɛ ɛna. Ɛlɛ pɩtɩkɛ ɛkpadɩyaa yɔɔ nʋmɔʋ ŋgʋ kɩ-ɖɔm kaawɛ-ɩ kaɖɛ, mbʋ pʋyɔɔ yɔ alɩwaatʋ ndʋ tɩ-taa ɛɛwɛnɩ e-ɖoŋ. Nʋmɔʋ ŋgʋ kɩ-ɖɔm kaawɛ-ɩ kaɖɛ mbʋ pʋyɔɔ yɔ, Yehowa kaapɔzɩ-ɩ se ɛkpaɣ ɛ-pɩyalʋ nɛ ɛlaa.​—Kiɖe Tɛɛ Tɔm 22:1-8.

⁴ Pɩtʋʋ fɛyɩ se mbʋ Yehowa pɔzɩ Abraham se ɛla yɔ, pɩɩtakɩ e-tisuu siŋŋ. Nabɛyɛ yɔɔdʋʋ se Yehowa pɔzʋʋ Abraham se ɛlaa ɛ-pɩyalʋ yɔ, pɩkɛ kañatʋ lakasɩ. Nɛ nabɛyɛ ñɔyɔɔdʋʋ se Abraham taasɔɔlɩ ɛ-pɩyalʋ, pʋyɔɔ etisaa se ɛkpakɩɣ-ɩ nɛ ɛlaa. Ɛyaa yɔɔdʋʋ tɔm ndʋ, mbʋ pʋyɔɔ yɔ pɛfɛyɩnɩ tisuu, nɛ paasɩŋ mbʋ tisuu siŋŋ kɛnaa yɔ. (1 Kɔrɛntɩ 2:14-16) Ɛlɛ Abraham taañaŋ Ɛsɔ se pɔtɔm se pañamɩ-ɩ. Ɛñaŋaɣ Yehowa mbʋ pʋyɔɔ yɔ ɛɛwɛnɩ tisuu siŋŋ. Ɛɛnawa se Yehowa ɛɛkaɣ-ɩ pɔzʋʋ kpa se ɛla mbʋ pɩpɩzɩɣ nɛ pɩkɔnɩ-ɩ kaɖɛ tam yɔ. Abraham kaanawa ɖɔɖɔ se ye ɛñam Yehowa kɔyɔ, Yehowa kaɣ ɛ nɛ ɛ-pɩyalʋ kʋsɔɔlʋ wazʋʋ. Ɛbɛ kaasɩnɩ Abraham nɛ ɛpɩzɩ ɛwɛɛnɩ tisuu sɔsɔm mbʋ? Sɩmtʋ nɛ mbʋ ɛna e-wezuu caɣʋ taa yɔ.

5. (a) Pɩtɩla yɔ, a-yɔɔ pɩtɩŋnaa nɛ Abraham tɩlɩ Yehowa? (b) Nɛ mbʋ Abraham kpɛlɩkɩ Yehowa yɔɔ yɔ, ɛzɩma pɩsɩnɩ-ɩ?

⁵ Sɩmtʋ. Tɛtʋ ndʋ payaɣ se Uuri yɔ, tɩ-taa Abraham kaacaɣ nɛ ɛpaɣlɩ. Uuri tɛtʋ taa mba sɛɣaɣ agɔlɩma, nɛ mbʋ ɖɔɖɔ Abraham caa Teera lakaɣ. (Yozuwee 24:2) Ye mbʋ, ɛzɩma Abraham laba nɛ ɛkpɛlɩkɩ Yehowa yɔɔ tɔm? Bibl wɩlɩɣ se Abraham kɛ Noa pɩyalʋ Sɛm liɖe taa tʋ nɔɔyʋ. Nɛ Abraham kaawɛnɩ pɩnzɩ 150 mbʋ yɔ, pʋcɔ nɛ Sɛm sɩkɩ. Sɛm kaawɛnɩ tisuu siŋŋ, nɛ pɩtʋʋ fɛyɩ se eeheyi ɛ-hɔʋ taa mba Yehowa yɔɔ tɔm. Ðɩɩsɩŋ ɛzɩma pɩɖɔm ɖeyi ɖeyi nɛ Abraham tɩlɩ Yehowa yɔ. Ɛlɛ pɩtɩla yɔ, Sɛm yɔɔ pɩtɩŋnaa. Mbʋ Abraham kpɛlɩkɩ Yehowa yɔɔ yɔ, mbʋ sɩnɩnɩ-ɩ nɛ ɛsɔɔlɩ-ɩ nɛ ɛwɛɛnɩ tisuu siŋŋ.

6, 7. Ɛbɛ nɛ ɛbɛ labɩ Abraham wezuu caɣʋ taa nɛ pɩkpazɩ e-tisuu ɖoŋ?

⁶ Mbʋ ɛna e-wezuu caɣʋ taa yɔ. Ɛbɛ Abraham na e-wezuu caɣʋ taa nɛ pɩsɩnɩ-ɩ nɛ ɛwɛɛnɩ tisuu siŋŋ Yehowa yɔɔ? Nabɛyɛ yɔɔdʋʋ se mbʋ pɩ-yɔɔ ɛyʋ maɣzɩɣ yɔ, pɩwɛnɩ ɖoŋ ɛ-laŋɩyɛ yɔɔ, nɛ mbʋ pɩwɛ ɛ-laŋɩyɛ taa yɔ, pɩnaɣ ɛ-lakasɩ taa. Mbʋ Abraham kpɛlɩkɩ Ɛsɔ yɔɔ yɔ, pitukuni ɛ-laŋɩyɛ nɛ piseɣti-i nɛ ɛwɛɛnɩ ñamtʋ siŋŋ “Ɛsɔ Kɩlɩm weyi ɛlɩzɩ ɛsɔdaa nɛ tataa yɔ” ɛ-yɔɔ. (Kiɖe Tɛɛ Tɔm 14:22) “Ñamtʋ” ndʋ ɖɔɖɔ payaɣ se Ɛsɔ sɔɔndʋ seu. (Ebree 5:7) Pʋcɔ nɛ taabalɩyɛ kɩbanɖɛ wɛɛ ɖa nɛ Ɛsɔ ɖɛ-hɛkʋ taa lɛ, pɩwɛɛ se ɖise-i sɔɔndʋ. (Keɣa 24:14) Wɛtʋ kɩbandʋ ndʋ tɩɩsɩnɩnɩ Abraham nɛ ɛña Yehowa.

⁷ Ɛsɔ kaaheyi Abraham nɛ Saara se peyele pa-ɖɩɣa Uuri tɛtʋ taa nɛ powolo  pacaɣ ɛjaɖɛ nɖɩ paasɩŋ yɔ ɖɩ-taa. Paapaɣzɩ kpadɩyʋʋ nɛ pɩtasɩ lɛ, pɩkaɣ pɔzʋʋ se pasʋʋ kizinzikiŋ tɛɛ pe-wezuu kɩyakɩŋ kpeekpe. Paa Abraham kaanawa se pakaɣ katʋʋ kala sakɩyɛ yɔ, ɛɛtɛm ɛ-taa nɛ ɛña Yehowa. Nɛ pʋyɔɔ lɛ, Ɛsɔ wazɩ-ɩ nɛ ɛkandɩyɩ ɛ-yɔɔ. Alɩwaatʋ natʋyʋ awiya naayɛ ñɩnaɣ se amʋ ɛ-halʋ Saara nɛ Abraham wezuu maɣmaɣ wɛɛ kaɖɛ taa, ɛlɛ Yehowa tɩŋnɩ maamaaci lakasɩ nasɩyɩ yɔɔ nɛ ɛkandɩyɩ ɛ nɛ Saara pɔ-yɔɔ. (Kiɖe Tɛɛ Tɔm 12:10-20; 20:2-7, 10-12, 17, 18) Piyeba nɛ Abraham tisuu tasɩ kpaʋ ɖoŋ nɛ pɩkɩlɩ.

8. Ɛbɛ pɩzɩɣ pɩsɩnɩ-ɖʋ nɛ ɖɩwɛɛnɩ sɩmtʋ nɛ lɔŋ weyi iyeki se ɖa nɛ Yehowa ɖa-taabalɩyɛ ɛcɛyɩsɩ yɔ?

⁸ Taabalɩyɛ kɩbanɖɛ pɩzɩɣ nɛ ɖɩwɛɛ ɖa nɛ Yehowa ɖɛ-hɛkʋ taa? Ɛɛɛ. Ɛzɩ Abraham yɔ, pɩwɛɛ se ɖɩkpɛlɩkɩ nɛ ɖɩtɩlɩ Yehowa. Sɔnɔ, sɩmtʋ nɛ mbʋ pɩpɩzɩɣ pɩsɩnɩ-ɖʋ nɛ ɖɩtɩlɩ Yehowa yɔ, pɩwɛ Bibl taa. Ye mbʋ, mbʋ pɩsɩɣnɩ-ɖʋ se ɖɩtɩlɩ Yehowa yɔ, pɩɖɔwa nɛ pɩkɩlɩ mbʋ pɩɩsɩnɩ Abraham yɔ. (Danɩyɛɛlɩ 12:4; Roma 11:33) Bibl wɩlɩɣ-ɖʋ tɔm sakɩyɛ Yehowa “weyi ɛlɩzɩ ɛsɔdaa nɛ tataa yɔ” ɛ-yɔɔ. Mbʋ ɖɩkpɛlɩkɩɣ Yehowa yɔɔ yɔ, piyeki se ɖɩsɔɔlɩ-ɩ nɛ ɖɩñamɩ-ɩ siŋŋ. Nɛ sɔɔlɩm nɛ ñamtʋ ndʋ, tiseɣtiɣ-ɖʋ se ɖɩɖɔ ɛ-paɣtʋ yɔɔ. Ye ɖɩɖɔŋ ɛ-paɣtʋ yɔɔ kɔyɔ, ɖɩkaɣ naʋ ɛzɩma ɛkandɩyɩɣ ɖɔ-yɔɔ nɛ ɛwazɩɣ-ɖʋ yɔ. Nɛ pɩkpɛlɩkɩɣ-ɖʋ lɔŋ ɖe-wezuu caɣʋ taa. Ye ɖɩsɛɣ Yehowa nɛ ɖa-laŋɩyɛ pilim yɔ, pɩkaɣ yebu nɛ ɖihiɣ taa leleŋ, laŋhɛzɩyɛ nɛ koboyaɣ. (Keɣa 33:9; Aduwa 10:22) Ðɩɩkpɛlɩkɩɣ nɛ ɖɩtɩlɩɣ Yehowa nɛ ɖɩnaɣ ɛzɩma ɛwazɩɣ-ɖʋ yɔ lɛ, ɖa nɛ ɩ ɖa-taabalɩyɛ kaɣ cɛyɩsʋʋ nɛ pɩkɩlɩ.

9, 10. (a) Ɛbɛ pɩzɩɣ piyele nɛ ɛyaa naalɛ hɛkʋ taa taabalɩyɛ cɛyɩsɩ? (b) Ɛbɛ wɩlɩɣ se Abraham kaakpaɣ ɛ nɛ Yehowa pa-taabalɩyɛ ɛzɩ ñɩm pʋyʋ yɔ nɛ ɛcɛyɩsɩ-ɖɩ?

⁹ Taabalɩyɛ kɩbanɖɛ wɛ ɛzɩ ñɩm sɔsɔm nabʋyʋ yɔ. (Kalɩ Aduwa 17:17.) Taabalɩyɛ kɩbanɖɛ fɛyɩ ɛzɩ ñɩɣlɩm wonuu ŋgʋ payabɩ-kʋ nɛ liidiye sɔsɔɖɛ se palabɩnɩ ajana yem yɔ. Ɛlɛ ɖɩwɛ ñɩm ɛzɩ hɛɖʋʋ kɩbaŋʋ ŋgʋ pɩpɔzʋʋ se pamɩzɩ-kʋ lɩm nɛ pɔcɔnɩ kɩ-yɔɔ pʋcɔ nɛ kɩpaɣlɩ yɔ. Abraham kaakpaɣ ɛ nɛ Yehowa pa-taabalɩyɛ ɛzɩ ñɩm pʋyʋ yɔ nɛ ɛñaɣ pana nɛ ɛkandɩyɩ ɖɩ-yɔɔ. Ɛzɩma ɛlaba?

¹⁰ Abraham wobi pɩ-yɔɔ nɛ ɛñaŋ Yehowa. Alɩwaatʋ ndʋ ɛ nɛ ɛ-hɔʋ nɛ ɛ-lɩmɖʋyaa powokaɣ Kanaŋ yɔ, eyeba nɛ paa ɛzɩmtaa lɛ Yehowa ɖiyi-i ɛ-lɩmaɣza kpaɣʋ taa, paa pɩtɩɩkɛ lɩmaɣza sɔsɔna yaa cikpena yɔ. Pɩɩsaɣ pɩnaɣ kʋɖʋmaɣ se Abraham ɛlʋlɩ Izaakɩ lɛ, Yehowa heyi-i se ɛpɛlɩ abalaa mba paawɛ ɛ-ɖɩɣa taa yɔ pa-tɩŋa. Pʋbʋ taa lɛ, Abraham kaawɛnɩ pɩnzɩ 99. Ɛzɩ Abraham kaañɩnɩ kawanaɣ  nakɛyɛ se ekizi labʋ mbʋ Yehowa pɔzɩ-ɩ yɔ? Aayɩ, ɛlɛ ɛta Yehowa liu nɛ ɛla mbʋ ɛlɛ pɔzɩ-ɩ yɔ “puwiye maɣmaɣ.”​—Kiɖe Tɛɛ Tɔm 17:10-14, 23.

11. (a) Ɛbɛ yɔɔ Sodom nɛ Gomɔɔrɩ ɖezuu tɔm kaaha Abraham lɩmaɣza? (b) Nɛ ɛzɩma Yehowa sɩnɩ-ɩ?

¹¹ Abraham ñaŋaɣ Yehowa paa ɛzɩmtaa halɩ pɩkpɛndɩnɩ wondu cikpetu taa. Mbʋ yebina nɛ pa-taabalɩyɛ cɛyɩsɩ. Ɛɛnawa se ɛpɩzɩɣ nɛ ɛyɔɔdɩnɩ Yehowa pɩtɩŋa pɩ-taa, halɩ ɛpɩzaɣ se ɛpɔzɩ-ɩ se ɛsɩnɩ-ɩ ye ɛɛnɩɣ tɔm natʋyʋ tɔbʋʋ camɩyɛ yɔ. Alɩwaatʋ ndʋ Yehowa yɔɔdaa se eɖeziɣ Sodom nɛ Gomɔɔrɩ tɛtʋ yɔ, pɩɩha Abraham lɩmaɣza. Ɛbɛ yɔɔ? Sɔɔndʋ kpaɣaɣ-ɩ se pɩtaala nɛ Yehowa ɖezi ɛyaa kɩdɛkɛdaa nɛ ɛkpɛndɩnɩ ɛyaa kɩbama. Pʋtɔma yɔ, ɛmaɣzaɣ Looti nɛ ɛ-hɔʋ taa ñɩma mba paawɛ Sodom yɔ pɔ-yɔɔ. Abraham kaata liu Yehowa weyi ɛkɛ “tɛtʋ kpeekpe tɔm hʋyʋ” yɔ, piyeba nɛ eheyi Yehowa mbʋ pɩcɛyaɣ-ɩ yɔ nɛ tɩ luzuu. Yehowa ɖʋ suuɖu nɛ ewelisini ɛ-taabalʋ Abraham nɛ ɛwɩlɩ-ɩ se ɛkɛ Ɛsɔ pʋtɔdɩyɛ nayʋ. Ɛlɩzɩ-ɩ pɩ-taa se paa eɖeziɣ ɛyaa kɩdɛkɛdaa kɔyɔ, ɛyakɩ ɛyaa kɩbama ñʋʋ.​—Kiɖe Tɛɛ Tɔm 18:22-33.

12, 13. (a) Sɩmtʋ nɛ mbʋ Abraham na e-wezuu caɣʋ taa yɔ, ɛzɩma pɩsɩnɩ-ɩ pʋwayɩ? (b) Ɛbɛ wɩlɩɣ se Abraham kaawɛnɩ lidaʋ Yehowa yɔɔ?

¹² Pɩnaɣ kpayɩ kpayɩ se sɩmtʋ nɛ mbʋ Abraham na e-wezuu caɣʋ taa yɔ, pɩsɩnɩ-ɩ nɛ ɛcɛyɩsɩ ɛ nɛ Yehowa pa-taabalɩyɛ. Piyeba nɛ pʋwayɩ, Yehowa pɔzɩ Abraham se ɛkpaɣ ɛ-pɩyalʋ nɛ ɛlaa-ɩ lɛ, ɛtaapɩtɩ kpa se Yehowa kɛ Ɛsɔ weyi ɛwɛnɩ suuɖu, ɛnaɣ pʋtɔdɩyɛ, ɛkandɩyɩɣ ɛyaa yɔɔ nɛ Ɛsɔ weyi papɩzɩɣ nɛ pataa-ɩ liu yɔ. Abraham kaawɛnɩ lidaʋ se Yehowa tɩlɛɣzɩ kpɛlɩ nɛ ɛpɩsɩ kañatʋ tʋ. Ɛbɛ yɔɔ ɖɩyɔɔdʋʋ mbʋ?

¹³ Pʋcɔ nɛ Abraham yele ɛ-lɩmɖʋyaa nɛ ɛɖɛɛ lɛ, eheyi-wɛ se: “Mɩ nɛ kpaŋaɣ ɩcaɣ cɩnɛ yɔ. Ma nɛ pɩɣa ɖiwoki lɔlɔ yɔ nɛ ɖiluŋ Ɛsɔ tɛɛ nɛ ɖɩpɩsɩ ɖɩkɔɔ mɩ-cɔlɔ.” (Kiɖe Tɛɛ Tɔm 22:5) Suwe Abraham ñɩnaɣ yɔɔdʋʋ? Ɛcɛtaɣ kɩcɛtʋ se ɛ nɛ Izaakɩ papɩsɩɣ nɛ pɔkɔɔ, ŋgʋ ɛɛnawa se ɛkaɣ-ɩ laʋ na? Aayɩ. Bibl yɔɔdʋʋ se Abraham kaanawa se ye Izaakɩ ɛsɩba yɔ, Yehowa pɩzɩɣ nɛ efezi-i. (Kalɩ Ebree 11:19.) Abraham kaatɔzaa se paa ɛ nɛ ɛ-halʋ Saara paakpadɩyaa kpem kɔyɔ, Yehowa sɩnɩ-wɛ nɛ palʋlɩ pɩɣa. (Ebree 11:11, 12, 18) Piyeba nɛ eɖiɣzina se nabʋyʋ fɛyɩ Ɛsɔ kaɖɛ. Abraham taatɩlɩ mbʋ pɩkaɣ labʋ puwiye yɔ. Ɛlɛ ɛɛwɛnɩ tisuu se paa ɛla ɛ-pɩyalʋ yɔ, Yehowa kaɣ-ɩ fezuu se pɩsa nɛ lidaʋ tɔm ndʋ payɩ ɛyɔɔdaa yɔ tɩla. Mbʋ yebina nɛ payaa Abraham se mba payɩ pɛwɛnɩ tisuu yɔ pa-caa.

14. (a) Kala wena ŋkatɩɣ Yehowa sɛtʋ taa? (b) Nɛ ɛzɩma Abraham kɩɖaʋ pɩzɩɣ nɛ kɩsɩnɩ-ŋ?

 ¹⁴ Sɔnɔ, Yehowa ɛɛpɔzʋʋ-ɖʋ se ɖɩkpaɣ ɖe-piya nɛ ɖɩlaa-ɩ kɩlaʋ, ɛlɛ ɛpɔzʋʋ-ɖʋ se ɖɩña ɛ-paɣtʋ. Nabʋyʋ taa, ɖɩɩsɩŋ mbʋ piyeba nɛ ɛɖʋ-ɖʋ paɣtʋ ndʋ yɔ, yaa pɩtɩla yɔ pɩwɛ-ɖʋ kaɖɛ se ɖɩñam-tʋ. Mbʋ pɩlakɩ-ŋ? Nabɛyɛ lɛ, tɔm susuu wɛ-wɛ kaɖɛ. Pʋtɔma yɔ pɛwɛ fɛyɛ nɛ pʋyɔɔ lɛ, pɩwɛ-wɛ kaɖɛ se pɔyɔɔdɩnɩ ɛyaa mba paasɩŋ yɔ. Lalaa lɛ, pɩtɩtɩlɩ yɔ sɔɔndʋ kpaɣ-wɛ se pɛwɛɛ ndɩ nɛ lalaa po-sukuli taa yaa pa-tʋma taa. (Egipiti Lɩʋ 23:2; 1 Tesalooniki 2:2) Ye pɔpɔzɩ-ŋ se ŋla nabʋyʋ nɛ ŋnaɣ se pɩkɩlɩ-ŋ kaɖɛ yɔ, maɣzɩ Abraham tisuu nɛ ɛ-abalɩtʋ yɔɔ. Ye ɖɩkpaɣ alɩwaatʋ nɛ ɖɩmaɣzɩ halaa nɛ abalaa mba paaɖɔkɩ pe-siɣsiɣ wɛtʋ kpam yɔ pɔ-yɔɔ kɔyɔ, pɩpɩzɩɣ piseɣti-ɖʋ nɛ ɖɩmaɣzɩnɩ-wɛ nɛ ɖɩñɔtɩnɩ ɖa-taabalʋ Yehowa kpam.​—Ebree 12:1, 2.

15. Ɛbɛ yɔɔ ɖɩɩpɩtɩɣ se Abraham tikpiɖi wiɖiyi se pʋyɔɔ ɛñam Yehowa?

¹⁵ Wiɖiyi Abraham kpiɖaa se pʋyɔɔ ɛɖɔm Ɛsɔ paɣtʋ yɔɔ? Bibl tɔŋ se Abraham sɩbɩ “akpadɩyɩtʋ kɩbandʋ taa, ɛpɩwa nɛ ɛ-kɩyakɩŋ ɖɔwa.” (Kiɖe Tɛɛ Tɔm 25:8) Paa Abraham kaawɛnɩ pɩnzɩ 175 yɔ, ɛpɩzaɣ se ɛmaɣzɩ pɩnzɩ sakɩyɛ nzɩ ɛcaɣ wezuu yɔ sɩ-yɔɔ nɛ taa leleŋ. Ɛbɛ yɔɔ? Mbʋ pʋyɔɔ yɔ ɛ nɛ Yehowa pa-taabalɩyɛ tɔm kaakɩlɩnɩ cɛyʋʋ ɛ-ɛzɩdaa e-wezuu caɣʋ kpeekpe taa. Ɛlɛ Abraham kaawɛnɩ lidaʋ se ɛtasɩɣ caɣʋ wezuu cee wayɩ.

16. Taa leleŋ weyi Abraham kaɣ hiɣu paradisuu taa?

¹⁶ Bibl yɔɔdaa se Abraham ɖaŋaɣ “tɛtʋ ndʋ tɩwɛnɩ tigiɖe siŋŋ yɔ, ndʋ Ɛsɔ maɣmaɣ kɛ tɩ-mayʋ nɛ tɩ-lɔɖʋ yɔ.” (Ebree 11:10) Tɛtʋ ndʋ Abraham kaaɖaŋaa yɔ lɛ Ɛsɔ Kewiyaɣ. Ye mbʋ, Abraham kaawɛnɩ lidaʋ se wiɖiyi ɛkaɣ naʋ ɛzɩma Ɛsɔ Kewiyaɣ kaɣ ɖiyuu tɛtʋ kpeekpe yɔ. Nɛ toovenim taa lɛ, mbʋ pɩkaɣ labʋ. Maɣzɩ nɛ ŋna ɛzɩma Abraham taa kaɣ labʋ leleŋ alɩwaatʋ ndʋ ɛkaɣ caɣʋ paradisuu taa tɛtʋ yɔɔ nɛ ɛcɛyɩsɩɣ ɛ nɛ Ɛsɔ pa-taabalɩyɛ tam yɔ. Ɛ-taa kaɣ labʋ leleŋ kpem se ɛna se e-tisuu sɩnɩ Ɛsɔ sɛyaa pɩnzɩ sakɩyɛ. Paradisuu taa, ɛkaɣ naʋ se kɩlaʋ ŋgʋ Yehowa kaapɔzɩ-ɩ se ɛlaa Moriya Pʋʋ yɔɔ yɔ, kɩsɩŋnɩ pʋyʋ sɔsɔ nɔɔyʋ. (Ebree 11:19) Pɩtasɩ lɛ, ɛkaɣ naʋ se siziŋ weyi ɛnɩ alɩwaatʋ ndʋ ɛñɩnaɣ laʋ ɛ-pɩyalʋ Izaakɩ yɔ, ɛsɩnɩ ɛyaa miiliyɔɔwaa sakɩyɛ nɛ patɩlɩ siziŋ weyi Yehowa nɩ alɩwaatʋ ndʋ ɛcɛlɩ ɛ-Pɩyalʋ Yesu Krɩstʋ se ɛlaa ɛ-tɩ ɛyaa yɔɔ yɔ. (Yohanɛɛsɩ 3:16) Abraham kɩɖaʋ sɩnɩ ɖa-tɩŋa se ɖɩwɛɛnɩ ɛsɩmɩyɛ kɩhɛyʋʋ pʋ-ñʋʋ taa kɩlaʋ ŋgʋ kɩwɩlɩɣ se Yehowa sɔɔlɩ-ɖʋ siŋŋ yɔ, kɩ-yɔɔ nɛ pɩkɩlɩ.

17. (a) Ɛbɛ ŋɖʋ ña-taa se ŋlakɩ? (b) Nɛ ɛbɛ ɖɩkaɣ naʋ ñʋʋ ŋgʋ kɩkɔŋ yɔ, kɩ-taa?

¹⁷ Tɛtɛ pɩla mbʋ nɛ ɖa-taa paa weyi lɛ, ɛmaɣzɩnɩ Abraham tisuu. Ɛzɩ Abraham yɔ, sɩmtʋ nɛ mbʋ ɖɩna ɖe-wezuu caɣʋ taa yɔ, pɩpɩzɩɣ nɛ pɩsɩnɩ-ɖʋ. Ðɩwɛɣ nɛ ɖɩkpɛlɩkɩɣ se ɖɩtɩlɩ Yehowa nɛ ɖɩñamɩ-ɩ nɛ pɩkɩlɩ lɛ, ɖɩkaɣ naʋ se ɛwazɩɣ-ɖʋ nɛ ɛkandɩyɩɣ ɖɔ-yɔɔ siŋŋ. (Kalɩ Ebree 6:10-12.) Tɛtɛ pɩla mbʋ nɛ Yehowa kɛ ɖa-taabalʋ tam. Ñʋʋ ŋgʋ kɩkɔŋ yɔ kɩ-taa, ɖɩkaɣ naʋ ɖɔɖɔ ɛyaa siɣsiɣ tɩnaa naadozo mba papɩsɩ Ɛsɔ taabalaa kɩbama yɔ pa-kɩɖaŋ.