1-2. (a) Ɛbɛ yɔɔ Yehowa ha-ɖʋ waɖɛ se ɖɩkɛ ɛ-hɔʋ taa mba? (b) Nɛ ɛzma ɛlaba se pɩsa nɛ ɖɩkɛ ɛ-hɔʋ taa mba?

YEHOWA ya-ɖʋ se ɖɩsʋʋ ɛ-sɛyaa hɔʋ taa. Pɩkɛnɩ yatʋ kɩbandʋ siŋŋ! Ðɔ-hɔʋ taa ñɩma kɛ ɛyaa mba paha pa-tɩ Ɛsɔ nɛ pɛwɛɛnɩ tisuu ɛ-Pɩyalʋ kɩhɛyʋʋ pʋ-ñʋʋ taa kɩlaʋ yɔɔ yɔ. Ðɩkɛ hɔʋ ŋgʋ kɩ-taa ñɩma wɛ taa leleŋ taa yɔ. Ðɩcakɩ wezuu ŋgʋ kɩwɛnɩ tɔbʋʋ nɩʋ yɔ lɛɛlɛɛyɔ, nɛ ɖa-taa wɛ leleŋ mbʋ pʋyɔɔ yɔ, ɖɩwɛnɩ lidaʋ se ɖɩkaɣ caɣʋ wezuu maatɛŋ, paa pɩkɛ ɛsɔdaa yaa tɛtʋ yɔɔ Paradisuu taa yɔ.

² Yehowa ha-ɖʋ waɖɛ se ɖɩkɛ ɛ-hɔʋ taa ñɩma mbʋ pʋyɔɔ yɔ, ɛsɔɔlɩ-ɖʋ siŋŋ. Ɛlɛ, pʋcɔ nɛ Yehowa pɩzɩ nɛ ɛla mbʋ lɛ, pɩɩpɔzaa se ɛlaa kɩlaʋ sɔsɔʋ nakʋyʋ. (Yoh. 3:16) ‘Ñɩm sɔsɔm pakpaɣaa nɛ payabɩnɩ-ɖʋ.’ (1 Kɔr. 6:20) Pɩtɩŋnɩ kɩhɛyʋʋ pʋ-ñʋʋ taa yɔɔ lɛ, Yehowa yeba se taabalɩyɛ kɩbanɖɛ ɛwɛɛ ɖa nɛ ɩ ɖɛ-hɛkʋ taa. Weyi ɛkɩlɩ ɛjaɖɛ kpeekpe yɔɔ yɔ, ɖɩpɩzɩɣ nɛ ɖɩyaa-ɩ se ɖa-Caa. Nɛ ɛzɩ ɖɩnaʋ tɔm ñʋʋ ŋgʋ kɩɖɛwa yɔ kɩ-taa yɔ, Yehowa kɛnɩ Caja kɩbanʋ weyi ɛ-wayɩ fɛyɩ yɔ.

3. Tɔm ndʋ ɖɩpɩzɩɣ nɛ ɖɩpɔzɩ ɖa-tɩ? (Kalɩ ɖɔɖɔ aɖakaɣ “ Ɛzɩ Yehowa maɣzɩɣ mɔ-yɔɔ?”)

³ Ɛzɩ Bibl mayʋ nɔɔyʋ kaapɔzʋʋ ɛ-tɩ yɔ, ɖɩpɩzɩɣ nɛ ɖɩpɔzɩ ɖa-tɩ se: “Malakɩ ɛzɩma nɛ mɛnsɛɛ [Yehowa] kɩbam mbʋ ɛlabɩm yɔ pɩyɔɔ?” (Keɣa 115:12) Tɔm cosuu lɛ se ɖɩɩkaɣ pɩzʋʋ kpa nɛ ɖɩhɛyɩ nabʋyʋ ɖa-Caa weyi ɛwɛ ɛsɔdaa yɔ mbʋ payɩ ɛlabɩ-ɖʋ yɔ pɩ-yɔɔ. Ɛlɛ, sɔɔlɩm mbʋ ɛwɛnɩ ɖɔ-yɔɔ yɔ, pituzuu-ɖʋ se ɖɩsɔɔlɩ-ɩ. Apostoloo Yohanɛɛsɩ mawa se: “Ðɩsɔɔlʋʋ, mbʋ pʋyɔɔ yɔ ɛnʋ calɩnɩ-ɖʋ sɔɔlʋʋ.” (1 Yoh. 4:19) Nʋmɔŋ weyi yɔɔ ɖɩpɩzɩɣ ɖɩtɩŋna nɛ ɖɩwɩlɩ ɖa-Caa weyi ɛwɛ ɛsɔdaa yɔ se ɖɩsɔɔlɩ-ɩ?

4. Ɛzɩ Yakubu 4:8 yɔɔdʋʋ yɔ, ɛbɛ yɔɔ pɩwɛɛ se ɖɩñaɣ pana nɛ ɖɩñɔtɩnɩ Yehowa?

⁴ Yehowa sɔɔlaa se ɖɩñɔtɩnɩ-ɩ nɛ ɖɩyɔɔdɩnɩ-ɩ. (Kalɩ Yakubu 4:8.) Eseɣtiɣ-ɖʋ se ‘ɖɩwɛɛ adɩma yɔɔ tam,’ nɛ ɛɖaŋ kpam se ewelisini-ɖʋ paa ɛzɩmtaa. (Roma 12:12) Pɩɩkɩlɩɣ-ɩ ɖɔkɩnʋʋ, nɛ pɩɩnɩɣ-ɩ kpa se etaawelisini-ɖʋ. Nɛ ɖɩkalɩɣ ɛ-Tɔm Bibl taa nɛ takayɩsɩ nzɩ sɩsɩɣnɩ-ɖʋ se ɖɩnɩɩ Bibl taa camɩyɛ yɔ nɛ ɖiwelisiɣni-i. Ye ɖiwelisiɣ camɩyɛ ɖe-kediɣzisi taa yɔ, ɖɩwɩlɩɣ ɖɔɖɔ se ɖiwelisiɣni-i. Ɛzɩ kɛdɛsɩ kɩbanzɩ yekuu se piya ɩñɔɔnɩ sɩ-lʋlɩyaa yɔ, mbʋ ɖɔɖɔ ye ɖɩyɔɔdʋʋnɩ Yehowa ɖoŋ ɖoŋ yɔ, pɩsɩɣnɩ-ɖʋ se ɖɩñɔɔnɩ-ɩ.

5. Ɛbɛ ɖɩpɩzɩɣ ɖɩla nɛ ɖa-adɩma wɛɛ ɖeu nɛ pɩkɩlɩ?

⁵ Maɣzɩ adɩma wena ŋlakɩ Yehowa yɔ a-yɔɔ. Yehowa sɔɔlaa se ɖiheyi-i ndʋ tɩwɛ ɖa-laŋa taa yɔ adɩma taa. (Keɣa 61:9) Pɩwɛɣ ɖeu se ɖɩpɔzɩ ɖa-tɩ tɔm tʋnɛ: ‘Adɩma wena malakɩ yɔ, a-taa lɛ tɔm kʋɖʋmtʋ mɔyɔɔdʋʋ paa ɛzɩmtaa, yaa tɔm ndʋ tɩlɩnɩ ɖooo ma-laŋɩyɛ taa yɔ, ndʋ mɔyɔɔdʋʋ?’ Pɩtʋʋ fɛyɩ se ŋsɔɔlɩ Yehowa siŋŋ nɛ ŋsɔɔlaa se ña nɛ ɩ mɩ-taabalɩyɛ ɛcɛyɩsɩ. Pɩsa nɛ ŋla mbʋ lɛ, pɩwɛɛ se ŋyɔɔdʋʋnɩ-ɩ ɖoŋ ɖoŋ. Heyi-i ɛzɩma pɩlakɩ-ŋ yɔ. Heyi-i mbʋ pɩhaɣ-ŋ taa leleŋ yɔ, nɛ mbʋ piyeki nɛ ŋwɛɣ nɩɣzɛ taa yɔ pɩ-tɔm. Ña-taa ɛtɛ se ŋpɩzɩɣ nɛ ŋpɔzɩ-ɩ se ɛsɩnɩ-ŋ.

6. Ɛbɛ pɩwɛɛ se ɖɩla nɛ ɖɩñɔɔnɩ ɖa-Caa weyi ɛwɛ ɛsɔdaa yɔ?

⁶ Pɩsa nɛ ɖɩñɔɔnɩ ɖa-Caa weyi ɛwɛ ɛsɔdaa yɔ lɛ, pɩwɛɛ se ɖɩwɩlɩɣ-ɩ ɛsɩmɩyɛ paa ɛzɩmtaa. Ðitisiɣ keɣa maɖʋ tɔm tʋnɛ tɩ-yɔɔ. Ɛmawa se: “Ŋlabɩ tʋma sɔsɔna, [Yehowa] mɛ-Ɛsɔ kɩlɩm, aayɩ, ŋfɛyɩnɩ ɖaɣʋ, ña weyi ŋlabɩ hama lakasɩ sɔsɔsɩ pɩŋŋ yɔ; pɩwɛ-m se mɛnkɛdɩ pɩtɩŋa, ɛlɛ maanaɣ se manpaɣzɩnɩ le, pɩɖɔ yem.” (Keɣa 39:6) Ðɩlakɩ nabʋyʋ nɛ pɩkpaɖɩ ɛsɩmɩyɛ wɛnʋʋ; ɖɩtɩŋɩɣnɩ ɖɔ-yɔɔdaɣ nɛ ɖa-lakasɩ yɔɔ nɛ ɖɩwɩlɩɣ Yehowa ɖɛ-ɛsɩmɩyɛ. Piyeki nɛ ɖɩwɛɣ ndɩ nɛ ɛyaa sakɩyɛ sɔnɔ. Ðɩwɛ ɛjaɖɛ nɖɩ ɖɩ-taa yɔ, ɖɩ-taa ɛyaa sakɩyɛ ɩɩwɩlɩɣ Ɛsɔ ɛsɩmɩyɛ mbʋ payɩ ɛlakɩ-wɛ yɔ pɩ-yɔɔ. Mbʋ pɩwɩlɩɣ se ɖɩwɛ “kɛdɛzaɣ kɩyakɩŋ taa” yɔ, pɩ-taa nabʋyʋ lɛ se ɛyaa fɛyɩnɩ ɛsɩmɩyɛ. (2 Tim. 3:1, 2) Tɛtɛ nɛ ɖɩtaawɛɛnɩ wɛtʋ ndʋ kpa!

7. Ɛbɛ Yehowa sɔɔlaa se ɖɩla, nɛ ɛbɛ yɔɔ?

⁷ Lʋlɩyaa tɩsɔɔlɩ se pe-piya ɩkɛ piya nzɩ sɩwɛ ñaɖʋʋ yɔ, ɛlɛ pɔsɔɔlaa se sɩkɛ taabalaa. Mbʋ ɖeyi ɖeyi Yehowa sɔɔlaa se ɛ-sɛyaa tɩŋa ɩkɛ taabalaa. Pʋyɔɔ lɛ, sɔɔlɩm mbʋ ɖɩwɛnɩ ɖama yɔɔ yɔ, pɩwɩlɩɣ se ɖɩkɛ toovenim Krɩstʋ ñɩma. (Yoh. 13:35) Ðitisiɣ keɣa maɖʋ tɔm tʋnɛ tɩ-yɔɔ. Ɛmawa se: “Laŋhɛzɩyɛ nɛ laŋhʋlʋmɩyɛ pɩkɛnaa, ɛyaa wɛʋ ɖama cɔlɔ ɛzɩ koobiya yɔ!” (Keɣa 132:1) Alɩwaatʋ ndʋ ɖɩsɔɔlʋʋ ɖo-koobiya yɔ, ɖɩwɩlɩɣ Yehowa se ɖɩsɔɔlɩ-ɩ. (1 Yoh. 4:20) Pɩwɛ ɖeu kpem se koobiya hɔʋ ŋgʋ kɩ-taa ɖɩwɛɛ yɔ, kɩ-taa ñɩma ‘lakɩ ɖama camɩyɛ, nɛ pɛkɛ pʋtɔdɩyɛ nayaa siŋŋ’!—Efɛz. 4:32.

8. Ɛzɩ 1 Yohanɛɛsɩ 5:3 yɔɔdʋʋ yɔ, lɩmaɣzɩyɛ kajalaɣ ñɩnɖɛ nɖɩ yɔɔ ɖɩñaŋ Yehowa?

⁸ Yehowa sɔɔlaa se piya ɩña sɩ-lʋlɩyaa, nɛ ɛsɔɔlaa ɖɔɖɔ se ɖɩñamɩ-ɩ. (Efɛz. 6:1) Ɛmʋnaa se ɖɩñamɩ-ɩ mbʋ pʋyɔɔ yɔ, ɛnʋ kɛnɩ ɖa-Lɩzɩyʋ, ɖe-wezuu Ðɔkɩyʋ, nɛ ɛkɛ lɔŋsɩnɖʋ nɛ pɩkɩlɩ lʋlɩyaa tɩŋa. Paa mbʋ yɔ, lɩmaɣzɩyɛ kajalaɣ ñɩnɖɛ nɖɩ ɖɩ-yɔɔ ɖɩñaŋ Yehowa yɔ, nɖɩ lɛ se ɖɩsɔɔlɩ-ɩ. (Kalɩ 1 Yohanɛɛsɩ 5:3.) Paa lɩmaɣza wena a-yɔɔ pɩwɛɛ se ɖɩña Yehowa yɔ aɖɔwa yɔ, ɛɛkpaɣ-ɖʋ nɛ ɖoŋ se ɖɩñamɩ-ɩ. Yehowa ha-ɖʋ tɩ-yɔɔ wɛʋ lɩzʋʋ waɖɛ; pʋyɔɔ lɛ, ɛ-taa lakɩ leleŋ alɩwaatʋ ndʋ ɖɩlɩzɩɣ se ɖɩñaŋɩ-ɩ mbʋ pʋyɔɔ yɔ, ɖɩsɔɔlɩ-ɩ yɔ.

9-10. Ɛbɛ yɔɔ pɩcɛyaa se ɖɩtɩlɩ Ɛsɔ paɣtʋ nɛ ɖɩɖɔ tɩ-yɔɔ?

 ⁹ Lʋlɩyaa tɩsɔɔlɩ se kaɖɛ naɖɩyɛ ɛtalɩ pe-piya. Pʋyɔɔ paɖʋʋ paɣtʋ ndʋ tɩkandɩyɩɣ sɩ-yɔɔ yɔ. Alɩwaatʋ ndʋ piya ñaŋ paɣtʋ ndʋ yɔ, sɩwɩlɩɣ se sɩtaɣ sɩ-lʋlɩyaa liu nɛ sɩñaŋ-wɛ. Ye mbʋ, pɩcɛyɩ siŋŋ nɛ pɩkɩlɩ se ɖɩtɩlɩ ɖa-Caa weyi ɛwɛ ɛsɔdaa yɔ, ɛ-paɣtʋ nɛ ɖɩɖɔ tɩ-yɔɔ. Ye ɖɩlakɩ mbʋ yɔ, ɖɩwɩlɩɣ Yehowa se ɖɩsɔɔlɩ-ɩ nɛ ɖɩñaŋɩ-ɩ, nɛ pɩwazɩɣ ɖa-maɣmaɣ ɖɔɖɔ. (Iza. 48:17, 18) Ɛlɛ, mba pekiziɣ Yehowa nɛ ɛ-paɣtʋ yɔ, pɩkɔŋnɩ-wɛ wɩzasɩ.—Gal. 6:7, 8.

¹⁰ Alɩwaatʋ ndʋ ɖɩcakɩ wezuu ŋgʋ kɩkɛdɩɣnɩ Yehowa yɔ, pɩkandɩyɩɣ ɖɔ-yɔɔ se kaɖɛ naɖɩyɛ ɛtaatalɩ-ɖʋ tomnaɣ yɔɔ, lɩmaɣza taa, nɛ fezuu taa. Yehowa sɩm mbʋ pɩwazɩɣ-ɖʋ nɛ pɩkpaɖɩ yɔ. Aurora wɛ Etaazuunii ɛjaɖɛ taa, ɛyɔɔdaa se: “Manawa se ye ɖɩñaŋ Yehowa yɔ, piyeki nɛ ɖe-wezuu caɣʋ wɛɛ ɖeu paa ɛzɩmtaa nɛ pɩkɩlɩ.” Tɔm ndʋ tɩkɛ toovenim ɖa-tɩŋa ɖɔ-hɔɔlʋʋ taa. Ŋɖɔm nʋmɔʋ ŋgʋ Yehowa wɩlɩ-ŋ nɛ sɔɔlɩm yɔ kɩ-taa lɛ, ɛzɩma pɩwazɩ-ŋ?

11. Ɛzɩma adɩma sɩɣnɩ-ɖʋ?

¹¹ Adɩma sɩɣnɩ-ɖʋ se ɖɩwɛɛnɩ ñamtʋ, halɩ pɩkpɛndɩnɩ alɩwaatʋ ndʋ pɩwɛ-ɖʋ kaɖɛ se ɖɩla mbʋ yɔ. Nabʋyʋ taa, pɩkaɣ-ɖʋ wɛʋ kaɖɛ se ɖɩña Yehowa, ɛlɛ pɩwɛɛ se ɖɩlʋbɩnɩ mbʋ pituyuu-ɖʋ se ɖɩla kɩdɛkɛdɩm yɔ paa ɛzɩmtaa. Keɣa maɖʋ tendi Ɛsɔ se: “La nɛ mana ɛzɩma mɔnɖɔkɩ ña-paɣtʋ, mancaɣ mɔnɖɔkɩ-tʋ nɛ ma-laŋɩyɛ pilim.” (Keɣa 118:34) Denise  kɛ paa ɖooye nʋmɔʋ lɩzɩyʋ, ɛyɔɔdaa se: “Alɩwaatʋ ndʋ pɩwɛ-m kaɖɛ se maña Yehowa paɣtʋ natʋyʋ yɔ, mantɩmɩɣ se ɛha-m ɖoŋ nɛ mala mbʋ pɩwɛ ɖeu yɔ.” Ða-taa pɩzɩɣ nɛ pɩtɛ se Yehowa kaɣ cosuu adɩma ana a-yɔɔ paa ɛzɩmtaa.—Luka 11:9-13.

12. Ɛzɩ Efɛɛzɩ mba 5:1 yɔɔdʋʋ yɔ, ɛbɛ pɩwɛɛ se ɖɩla?

¹² Kalɩ Efɛɛzɩ mba 5:1. Ɛzɩ Yehowa “piya kʋsɔɔlɩsɩ yɔ,” ɖɩlakɩ mbʋ ɖɩpɩzɩɣ yɔ se ɖɩmaɣzɩnɩ-ɩ. Ðɩmaɣzɩɣnɩ ɛ-wɛtʋ, pɩtɩŋnɩ ɛzɩma ɖɩsɔɔlʋʋ lalaa, ɖɩlakɩ-wɛ camɩyɛ lakasɩ nɛ ɖikpeɣu-wɛ yɔ pɩ-yɔɔ. Mba paasɩŋ Ɛsɔ yɔ, alɩwaatʋ ndʋ panaɣ ɖɔ-ɖɔnɛ kɩbanɖɛ yɔ, pɩpɩzɩɣ nɛ piseɣtiɣ-wɛ se pɛkpɛlɩkɩ ɛ-yɔɔ tɔm nɛ pɩkɩlɩ. (1 Pɩy. 2:12) Pɩwɛɛ se lʋlɩyaa Krɩstʋ ñɩma ɩñaɣ pana nɛ pɔcɔnɩ pe-piya yɔɔ ɛzɩ Yehowa cɔŋnʋʋ ɖɔ-yɔɔ yɔ. Ye palakɩ mbʋ yɔ, pe-piya pɩzɩɣ nɛ sɩsɔɔlɩ se sɩ-maɣmaɣ sɩɖʋ taabalɩyɛ nɛ ɖa-Caa sɔɔlɩm tʋ.

13. Ɛbɛ yɔɔ pɩwɛɛ se ɖɩka ɖa-lɩmaɣza?

¹³ Pɩɣa cikpelaɣ taa wɛɣ leleŋ nɛ ka-caa, nɛ kɔsɔɔlʋʋ yɔɔdʋʋ ɛ-yɔɔ tɔm. Mbʋ ɖɔɖɔ ɖa-taa wɛ leleŋ nɛ ɖa-Caa Yehowa weyi ɛwɛ ɛsɔdaa yɔ, nɛ ɖɩsɔɔlaa se lalaa ɩtɩlɩ-ɩ. Ða-laŋɩyɛ taa lɛ, pɩlakɩ ɖa-tɩŋa ɛzɩ pɩɩlabʋ wiyaʋ Daviid yɔ. Ɛmawa se: “[Yehowa] yɔɔ mankʋndʋʋ yem.” (Keɣa 33:3) Ye ɖɩwɛ fɛyɛ yɔ, ɛbɛ ɖɩpɩzɩɣ nɛ ɖɩla? Ɛzɩma ɖɩpɩzɩɣ nɛ ɖɩwɛɛ abalɩtʋ? Ye ɖɩkam ɖa-lɩmaɣza ɛzɩma Yehowa taa pɩzɩɣ nɛ pɩla leleŋ yaa ɛzɩma pɩkaɣ wazʋʋ lalaa siŋŋ, alɩwaatʋ ndʋ pɛkpɛlɩkɩɣ  ɛ-yɔɔ tɔm yɔ pɩ-yɔɔ yɔ, ɖɩkaɣ wɛʋ abalɩtʋ. Yehowa kaɣ-ɖʋ haʋ abalɩtʋ ndʋ pɩpɔzʋʋ-ɖʋ yɔ. Ɛɛsɩnɩ kajalaɣ pɩnzɩ mɩnʋʋ taa koobiya nɛ pɛwɛɛ abalɩtʋ, nɛ ɛkaɣ-ɖʋ sɩnʋʋ ɖɔɖɔ.—1 Tes. 2:2.

14. Lɩmaɣza wena a-yɔɔ pɩcɛyaa se ɖɩla kpɛlɩkɩyaa yɔ, a-taa naayɛ lɛ wena?

¹⁴ Yehowa ɛɛtʋkʋʋ ɛyaa taa, nɛ ɛ-taa lakɩ leleŋ alɩwaatʋ ndʋ ɛnaɣ se ɖɩwɩlɩɣ sɔɔlɩm lalaa, paa le patɩɩlɩnaa yɔ. (Tʋma 10:34, 35) Nʋmɔŋ kɩbaŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩwɩlɩ lalaa sɔɔlɩm yɔ, ɩ-taa nakʋyʋ lɛ se ɖisusi-wɛ tɔm kɩbandʋ. (Mat. 28:19, 20) Tʋmɩyɛ nɖɩ, pee wena ɖɩpɩzɩɣ nɛ ɖɩlʋlɩ? Mba pewelisiɣni-ɖʋ yɔ, papɩzɩɣ nɛ pɔñɔɔzɩ pe-wezuu caɣʋ lɛɛlɛɛyɔ, nɛ pɛwɛɛnɩ lidaʋ se pakaɣ caɣʋ wezuu maatɛŋ cee wayɩ.—1 Tim. 4:16.

15-16. Lɩmaɣza wena yɔɔ ɖɩpɩzɩɣ nɛ ɖɩwɛɛ taa leleŋ taa?

¹⁵ Yehowa kɛ Caja sɔɔlɩm tʋ, pʋyɔɔ lɛ ɛsɔɔlaa se ɛ-hɔʋ ɛwɛɛ taa leleŋ taa. (Iza. 65:14) Paa ɖɩwɛɛ nɛ ɖɩkatɩɣ kala yɔ, lɩmaɣza wena a-yɔɔ ɖɩpɩzɩɣ nɛ ɖɩwɛɛ taa leleŋ taa lɛɛlɛɛyɔ yɔ, aɖɔwa. Kɩɖaʋ nakʋyʋ lɛ se ɖa-taa tɛma se ɖa-Caa weyi ɛwɛ ɛsɔdaa yɔ, ɛsɔɔlɩ-ɖʋ siŋŋ. Ðɩsɩm Bibl taa toovenim tɔm. (Yer. 15:16) Nɛ ɖɩwɛ hɔʋ ŋgʋ kɩwɛ ŋgee yɔ kɩ-taa. Kɩ-taa ɛyaa sɔɔlɩ Yehowa, pɔsɔɔlɩ wezuu kɩbaŋʋ caɣʋ paɣtʋ ndʋ ɛɖʋwa yɔ, nɛ pɔsɔɔlɩ ɖɔɖɔ ɖama.—Keɣa 105:4,5.

¹⁶ Ðɩpɩzɩɣ nɛ ɖɩwɛɛ taa leleŋ taa mbʋ pʋyɔɔ yɔ, ɖa-taa tɛma se wezuu caɣʋ kaɣ ñɔɔzʋʋ cee wayɩ nɛ pɩkpaɖɩ. Ðɩnawa se piileɖiɣ lɛ, Yehowa ɖɩzɩɣ kañatʋ lakasɩ tɩŋa, nɛ ɛkaɣ tɩŋnʋʋ e-Kewiyaɣ yɔɔ nɛ ɛla nɛ tɛtʋ tɩŋa pɩsɩ Paradisuu. Ðɩwɛnɩ ɖɔɖɔ lidaʋ kɩbaŋʋ se mba pasɩba yɔ, pakaɣ-wɛ fezuu nɛ pa nɛ pɛ-ɛyaa kʋsɔɔlaa paɖaɣnɩ caɣʋ wezuu. (Yoh. 5:28, 29) Pɩkaɣ wɛʋ ɖeu kpem! Nɛ kɔzɩ kɔzɩ lɛ, ɖa-taa tɛma se pɩkazɩ pazɩ, paa weyi, ɛsɔdaa yaa tɛtʋ yɔɔ, kaɣ ɖʋʋ hɩɖɛ ɖa-Caa sɔɔlɩm tʋ, ɛha-ɩ samtʋ nɛ sɛtʋ ndʋ tɩmʋnɩ-ɩ yɔ.