PƖNZƖ sakɩyɛ yɔ, Bibl yɔɔ ndɔnjɔɔlɩyɛ laɖaa yɔɔdaa se Wiyaʋ Bɛlɩsazaarɩ weyi ɛ-tɔm pɔyɔɔdɩ Danɩyɛɛlɩ takayaɣ taa yɔ, ɛtɩcaɣ wezuu wiɖiyi nɛ ɛna. (Dan. 5:1) Paawɛnɩ lɩmaɣza ana mbʋ pʋyɔɔ yɔ, tɛtɛɛ wondu ñɩnɩyaa taapɩzɩɣ se pawɩlɩ kpayɩ se toovenim taa lɛ, ɛɛcaɣ wezuu. Ɛlɛ, Lɩmaɣza ana, alɛɣzɩ pɩnaɣ 1854 taa. Ɛbɛ yɔɔ?

Pɩnaɣ ŋga ka-taa, Aŋgletɛɛrɩ ɛjaɖɛ lone taa caɣyʋ weyi payaɣ se John George Taylor yɔ, ɛlɩ njɛyɛ naɖɩyɛ yɔɔ tɛtʋ ndʋ payaɣaɣ caanaʋ taa se Uuri yɔ tɩ-taa; sɔnɔ peeɖe payaɣ se Iraakɩ hadɛ kiŋ. Tilimiye sɔsɔyɛ naɖɩyɛ kaawɛ peeɖe nɛ ɛjaɖɛ lone taa caɣyʋ ɛnʋ, ɛlɩɩ cʋʋ wondu natʋyʋ yɔɔ. Paa cʋʋ wonuu ŋgʋ lɛ, kɩɖaɣlɩ ɛzɩ santimɛtawaa 10 mbʋ yɔ, nɛ matʋ natʋyʋ kaawɛ tɩ-yɔɔ. Matʋ ndʋ tɩɩwɛ cʋʋ wondu ndʋ tɩ-taa lɛɛkʋ yɔɔ yɔ, tɩ-hɔɔlʋʋ nakʋyʋ kaakɛ adɩma wena paalaba se Babilɔɔnɩ Wiyaʋ Nabooniidi nɛ ɛ-pɩyalʋ sɔsɔ Bɛlɩsazaarɩ pacaɣ wezuu kɩɖaɣlʋʋ yɔ. Halɩ Bibl yɔɔ ndɔnjɔɔlɩyɛ laɖaa kaatisaa se mbʋ pʋyɔɔ palɩwa yɔ, pɩwɩlɩɣ se Bɛlɩsazaarɩ kaacaɣ wezuu nɛ ɛna.

Paa mbʋ yɔ, pɩtasɩnɩ se Bibl yɔɔdʋʋ se Bɛlɩsazaarɩ kaacaɣ wezuu nɛ ɛna lɛ, kɩyɔɔdʋʋ ɖɔɖɔ se ɛɛkɛ wiyaʋ. Hɔɔlʋʋ ŋgʋ kɩ-taa ɖɔɖɔ, ndɔnjɔɔlɩyɛ laɖaa pɩtaɣ. Kɩɖaʋ nakʋyʋ yɔ. Aŋgletɛɛrɩ lɔŋsɩnɖʋ William Talbot kaama pɩnaɣ 1875 taa mbʋ yɔ se nabɛyɛ yɔɔdaa se: “Bɛlɩsazaarɩ nɛ ɛ-caa Nabooniidi paatɔɔ kewiyitu alɩwaatʋ kʋɖʋmtʋ taa. Ɛlɛ nabʋyʋ ɛɛwɩlɩɣ paa ññɩɩ se pɩkɛ toovenim.”

Ɛlɛ, abʋta ana asɩ tɩnaɣ alɩwaatʋ ndʋ cʋʋ wondu lɛɛtʋ yɔɔ matʋ wɩlaa se Bɛlɩsazaarɩ caa, Wiyaʋ Nabooniidi kaaposini Babilɔɔnɩ tɛtʋ pɩnzɩ sakɩyɛ alɩwaatʋ natʋyʋ taa yɔ. Aatɔɔ kewiyitu tɛtʋ ndʋ tɩ-yɔɔ alɩwaatʋ ndʋ ɛtaawɛɛ yɔ? Takayaɣ nakɛyɛ (Encyclopaedia Britannica) yɔɔdaa se: “Alɩwaatʋ ndʋ Nabooniidi kaawɛ yomiye taa yɔ, ɛcɛlɩ Bɛlɩsazaarɩ kewiyitu nɛ ɛ-sɔɔjanaa hɔɔlʋʋ sɔsɔʋ.” Ye mbʋ toovenim taa lɛ, Bɛlɩsazaarɩ kaatɔɔ kewiyitu ɛ-caa lone taa Babilɔɔnɩ yɔɔ alɩwaatʋ ndʋ tɩ-taa. Pʋyɔɔ Alan Millard weyi ɛkɛ tɛtɛɛ wondu ñɩnɩyʋ nɛ kʋnʋmɩŋ yɔɔ lɔŋsɩnɖʋ yɔ, ɛyɔɔdaa se pɩmʋnɩ mbʋ se “Danɩyɛɛlɩ takayaɣ yaɣ Bɛlɩsazaarɩ se ‘wiyaʋ.’”

Toovenim taa lɛ, Ɛsɔ sɛyaa hɔɔlʋʋ taa lɛ, mbʋ pɩcalɩ wɩlʋʋ kpayɩ kpayɩ se papɩzɩɣ nɛ pataa Danɩyɛɛlɩ takayaɣ liu, nɛ Ɛsɔ ɖiyina nɛ pama-kɛ yɔ, pɩwɛ Bibl maɣmaɣ taa.—2 Tim. 3:16.