1-2. Ɛzɩ Maatiyee 5:11 yɔɔdʋʋ yɔ, lɩmaɣza wena pɩwɛɛ se ɖɩwɛɛnɩ takɩm yɔɔ?

YESU labɩ tamaɣ ɛ-wayɩ tɩŋɩyaa se pakaɣ wɛʋ koboyaɣ taa siŋŋ. Eheyi mba pɔsɔɔlɩ-ɩ yɔ ɖɔɖɔ se pakaɣ katʋʋ takɩm. (Mat. 10:22, 23; Luka 6:20-23) Ða-taa wɛ leleŋ se ɖɩkɛ Krɩstʋ tɔmkpɛlɩkɩyaa. Ɛlɛ ye ɖɔ-hɔʋ taa mba ɩñɩkɩɣ ɖɔ-yɔɔ se ɖɩtaasɛɛ Yehowa, komina ɛnazɩɣ-ɖʋ, ɖa-tʋmɩyɛ taa taabalaa yaa ɖo-sukuli taa taabalaa ɩñɩkɩɣ ɖɔ-yɔɔ se ɖɩla mbʋ pɩfɛyɩ ɖeu yɔ, ɛzɩma pɩlakɩ-ɖʋ? Alɩwaatʋ ndʋ ɖɩmaɣzɩɣ tɔm ndʋ tɩ-yɔɔ yɔ, pɩpɩzɩɣ piyele nɛ ɖɩpaɣzɩ nɩɣzʋʋ.

² Ɛyaa sakɩyɛ ɩɩnaɣ nazɩm ɛzɩ mbʋ pɩpɩzɩɣ nɛ pɩkɔnɩ ɛyʋ taa leleŋ yɔ. Ɛlɛ lɩmaɣza ana ɖeyi ɖeyi Bibl seɣtiɣ-ɖʋ se ɖɩwɛɛna. Tɔmkpɛlɩkɩyʋ Yakubu mawa se alɩwaatʋ ndʋ ɖɩkatɩɣ kʋñɔmɩŋ yɔ, pɩtɩpɔzɩ se ɖɩmaɣzɩ se ɖɩwɛ ɖe-ɖeke ɛlɛ pɩwɛɛ se ɖɩwɛɛ taa leleŋ taa. (Yak. 1:2, 12) Nɛ Yesu yɔɔdaa se pɩpɔzʋʋ se ɖɩwɛɛ taa leleŋ taa halɩ pɩkpɛndɩnɩ alɩwaatʋ ndʋ panazɩɣ-ɖʋ yɔ. (Kalɩ Maatiyee 5:11.) Ɛzɩma ɖɩpɩzɩɣ nɛ ɖɩwɛɛ taa leleŋ taa paa ɖɩwɛ takɩm taa yɔ? Takayaɣ ŋga Yakubu ma kajalaɣ pɩnzɩ mɩnʋʋ taa Krɩstʋ ñɩma yɔ, ɖɩpɩzɩɣ nɛ ɖɩkpɛlɩkɩ lɔŋ sakɩyɛ ka-taa lɩmaɣza naayɛ taa. Kajalaɣ lɛ, iyele nɛ ɖɩna kala wena kajalaɣ pɩnzɩ mɩnʋʋ taa Krɩstʋ ñɩma mba pakataa yɔ.

3. Yakubu pɩsɩ Yesu tɔmkpɛlɩkɩyʋ nɛ pitileɖi lɛ, ɛbɛ laba?

³ Yesu neu Yakubu pɩsɩ tɔmkpɛlɩkɩyʋ nɛ pitileɖi lɛ, papaɣzɩ nazʋʋ Yeruzalɛm Krɩstʋ ñɩma. (Tʋma 1:14; 5:17, 18) Alɩwaatʋ ndʋ pakʋ tɔmkpɛlɩkɩyʋ Etiyɛɛnɩ yɔ, Krɩstʋ ñɩma  sakɩyɛ se Yeruzalɛm tɛtʋ taa nɛ “pamɩzɩ ɖama Yuudee nɛ Samaarii ageeta kpeekpe taa” nɛ halɩ patalɩ ɖooo Ciiprɩ nɛ Antɩyɔɔsɩ. (Tʋma 7:58–8:1; 11:19) Tɔmkpɛlɩkɩyaa kaakatɩ kʋñɔmɩŋ sakɩyɛ. Paa mbʋ yɔ, posusi tɔm kɩbandʋ nɛ kpekpeka lona wena a-taa payɩ powoba yɔ, nɛ agbaa ñɔ Roma Kewiyaɣ hɔɔlɩŋ ndɩ ndɩ taa. (1 Pɩy. 1:1) Ɛlɛ kala sɔsɔna lɛɛna kaaɖaŋ kajalaɣ pɩnzɩ mɩnʋʋ taa Krɩstʋ ñɩma nɛ ɛsɩndaa.

4. Takɩm lɛɛbʋ mbʋ kajalaɣ pɩnzɩ mɩnʋʋ taa Krɩstʋ ñɩma kataa?

⁴ Kajalaɣ pɩnzɩ mɩnʋʋ taa Krɩstʋ ñɩma kaakatɩ kala sakɩyɛ. Pɩnaɣ 50 taa mbʋ yɔ, Roma Wiyaʋ Kloodi kaaɖʋ paɣtʋ se Yuuda mba tɩŋa ɩkʋyɩ Roma tɛtʋ taa. Ye mbʋ, Yuuda ñɩma mba paapɩsɩ Krɩstʋ ñɩma yɔ, pɩɩwɛɛ se peyele pa-ɖɩsɩ nɛ pakʋyɩ nɛ powolo pacaɣ ɖoŋlɛɛɖɛ. (Tʋma 18:1-3) Pɩnaɣ 61 taa mbʋ yɔ, apostoloo Pɔɔlɩ mawa se patʋ e-koobiya Krɩstʋ ñɩma ɛyaa ɛsɩndaa kaɣlaa, paɖʋ-wɛ salaka nɛ pamɩlɩ pa-ñɩm. (Ebr. 10:32-34) Nɛ ɛzɩ ɛyaa lalaa yɔ, pɩɩwɛɛ se Krɩstʋ ñɩma mba palʋbɩnɩ kʋñɔndʋtʋ nɛ kʋdɔŋ. —Roma 15:26; Fil. 2:25-27.

5. Tɔm ndʋ yɔɔ ɖɩkaɣ cosuu?

⁵ Yakubu ma ɛ-takayaɣ pʋcɔ nɛ pɩtalɩɣ pɩnaɣ 62. Nɛ alɩwaatʋ ndʋ, ɛɛsɩm takɩm mbʋ e-koobiya Krɩstʋ ñɩma kaawɛɛ nɛ pakatɩɣ yɔ camɩyɛ. Yehowa kaaɖiyi Yakubu nɛ ɛma lɔŋ tasʋʋ mbʋ pɩpɩzɩɣ nɛ pɩsɩnɩ Krɩstʋ ñɩma mba nɛ pɛwɛɛ taa leleŋ taa paa pɛwɛɛ nɛ pakatɩɣ takɩm yɔ. Iyele nɛ ɖɩtazɩ Yakubu takayaɣ taa nɛ ɖicosi tɔm pɔzʋʋ pʋnɛ pɩ-yɔɔ: Taa leleŋ weyi ɩ-tɔm Yakubu yɔɔdaa? Ɛbɛ pɩzɩɣ piyele nɛ Krɩstʋ tʋ nɔɔyʋ lesi taa leleŋ ɛnɩ? Nɛ ɛzɩma lɔŋsɩnɖɛ, tisuu nɛ abalɩtʋ papɩzɩɣ pasɩnɩ-ɖʋ nɛ ɖɩwɛɛ taa leleŋ taa paa kʋñɔŋ ŋgʋ taa ɖɩtɩɩwɛɛ yɔ?

6. Ɛzɩ Luka 6:22, 23 yɔɔdʋʋ yɔ, ɛbɛ yɔɔ Krɩstʋ tʋ nɔɔyʋ pɩzɩɣ nɛ ɛwɛɛ taa leleŋ taa alɩwaatʋ ndʋ ɛwɛɣ takɩm nabʋyʋ taa yɔ?

⁶ Ɛyaa maɣzɩɣ se ye pɛwɛnɩ tɔnʋʋ taa alaafɩya camɩyɛ, pɛwɛɛnɩ liidiye sakɩyɛ nɛ laŋhɛzɩyɛ wɛɛ pɔ-hɔʋ taa yɔ, pi-ɖeke pɩpɩzɩɣ piyele nɛ pehiɣ taa leleŋ. Ɛlɛ taa leleŋ weyi ɛ-tɔm Yakubu yɔɔdaa yɔ, ɛkɛnɩ piye nɖɩ Ɛsɔ fezuu kiɖeɖeu lʋlʋʋ yɔ ɖɩ-hɔɔlʋʋ nakʋyʋ, nɛ taa leleŋ ɛnɩ ɛɛlɩɣnɩ wɛtʋ ndʋ tɩ-taa ɛyʋ wɛɛ yɔ tɩ-cɔlɔ. (Gal. 5:22) Krɩstʋ tʋ pɩzɩɣ nɛ ɛwɛɛ taa leleŋ taa yaa ɛwɛɛ koboyaɣ taa siŋŋ, ye ɛnawa se ɛ-tɔm kɛdɩnɩ Yehowa yaa ɛmaɣzɩɣnɩ Yesu yɔ. (Kalɩ Luka 6:22, 23; Kol. 1:10, 11) Ðɩpɩzɩɣ nɛ ɖɩkpaɣ ɖa-taa leleŋ nɛ ɖɩmaɣzɩnɩ kanɖʋ taa miŋ. Kanɖʋ yaɖɛ huzuu kanɖʋ taa miŋ yɔɔ se paa helim ɛmakɩ yaa tɛʋ ɛnɩɣ yɔ, ɛtaaɖɩ. Ða ɖɔɖɔ ɖɩpɩzɩɣ nɛ ɖɩwɛɛ taa leleŋ taa mbʋ tam, paa ɛbɛ ɛtɩɩlakɩ ɖe-wezuu caɣʋ taa yɔ. Ðɩɩkaɣ lesuu taa leleŋ ɛnɩ alɩwaatʋ ndʋ ɖɩhɩnɩɣ kʋdɔŋ yaa ɖɩɩwɛɣnɩ liidiye sakɩyɛ yɔ. Nɛ halɩ ɖɩkaɣ wɛʋ taa leleŋ taa alɩwaatʋ ndʋ ɛyaa hoŋuu-ɖʋ yaa ɖɔ-hɔʋ taa mba yaa lalaa kaɖɩɣnɩ-ɖʋ yɔ. Ða-taa leleŋ pɩzɩɣ nɛ ɛpaɣlɩ alɩwaatʋ ndʋ payɩ ɛyaa ñakɩ pana se pala nɛ ɖilesi-i yɔ. Takɩm mbʋ ɖɩkatɩɣ ɖe-tisuu yɔɔ yɔ, pɩwɩlɩɣ se ɖɩkɛ Krɩstʋ tɔmkpɛlɩkɩyaa toovenim ñɩma. (Mat. 10:22; 24:9; Yoh. 15:20) Pʋyɔɔ Yakubu mawa se: “Mon-koobiya, alɩwaatʋ ndʋ ɩkatɩɣ takɩm ndɩ ndɩ yɔ, ɩkpaɣ-pʋ se pɩkɛ taa leleŋ sɔsɔŋ.”—Yak. 1:2.

7-8. Ɛbɛ yɔɔ ɖe-tisuu kpaɣ ɖoŋ alɩwaatʋ ndʋ pɩtakɩɣ-ɖʋ yɔ?

⁷ Yakubu yɔɔdɩ lɩmaɣzɩyɛ lɛɛɖɛ nɖɩ ɖɩ-yɔɔ Krɩstʋ ñɩma sɔɔlɩ faaa se pakatɩ takɩm, paa pɩtɩɩkɛ sɔsɔm yɔ ɖɩ-tɔm. Ɛyɔɔdaa se: “Mi-tisuu mbʋ pɩtakɩ-pʋ mbʋ yɔ, pɩkɔŋnɩ laŋɩyɛ ɖɔkʋʋ.” (Yak. 1:3) Papɩzɩɣ nɛ pakpaɣ takɩm nɛ pamaɣzɩnɩ miŋ weyi ɛ-taa paɖʋʋ ñɩɣyʋʋ se polubi-kʋ nɛ kɩpɩsɩ wonuu ŋgʋ kɩwɛ lɔŋ yɔ. Alɩwaatʋ ndʋ wonuu ŋgʋ kɩsaɣ miŋ nɛ kɩhɛɛ lɛ, ñɩɣyʋʋ kpaɣ ɖoŋ. Mbʋ ɖɔɖɔ alɩwaatʋ ndʋ ɖɩɖɔkʋʋ ɖa-tɩ takɩm taa yɔ, ɖe-tisuu kpaɣ ɖoŋ. Pʋyɔɔ Yakubu mawa se: “Iyele nɛ laŋɩyɛ ɖɔkʋʋ tɛzɩ pɩ-tʋmɩyɛ labʋ, se pɩsa nɛ ɩwɛɛ pilim nɛ ɩtaawɛɛnɩ kɩwɛɛkɩtʋ natʋyʋ hɔɔlʋʋ nakʋyʋ taa.” (Yak. 1:4) Alɩwaatʋ ndʋ ɖɩnaɣ se takɩm mbʋ ɖɩkatɩɣ yɔ pɩcɛyɩsɩɣ ɖe-tisuu lɛ, piyeki nɛ ɖɩɖɔkɩ ɖa-tɩ pɩ-taa nɛ taa leleŋ.

⁸ Yakubu yɔɔdɩ ɛ-takayaɣ taa ɖɔɖɔ kala wena apɩzɩɣ ayele nɛ ɖilesi ɖa-taa leleŋ yɔ a-taa naayɛ tɔm. Kala ana lɛ wena? Nɛ ɛzɩma ɖɩpɩzɩɣ ɖɩla nɛ ɖɩwabɩ-yɛ?

9. Ɛbɛ yɔɔ pɩpɔzʋʋ-ɖʋ lɔŋsɩnɖɛ?

⁹ Kaɖɛ: Alɩwaatʋ ndʋ ŋŋsɩŋ mbʋ ŋla yɔ. Alɩwaatʋ ndʋ ɖɩwɛɣ takɩm taa yɔ, ɖɩsɔɔlaa se  ɖɩpɩsɩnɩ Yehowa yɔɔ nɛ ɛsɩnɩ-ɖʋ nɛ ɖɩkpaɣ lɩmaɣza wena akɛdɩɣnɩ-ɩ nɛ awazɩɣ ɖo-koobiya nɛ asɩɣnɩ-ɖʋ se ɖɩɖɔkɩ ɖa-cɩŋgɩlɩm wɛtʋ kpam yɔ. (Yer. 10:23) Pɩsa nɛ ɖɩtɩlɩ mbʋ ɖɩla yɔ nɛ ɖɩtɩlɩ ɖɔɖɔ tɔm ndʋ pɩpɔzʋʋ se ɖicosi mba pakaɖɩɣnɩ-ɖʋ yɔ lɛ, pɩpɔzʋʋ-ɖʋ lɔŋsɩnɖɛ. Pɩpɩzɩɣ nɛ pitibi-ɖʋ yɔɔɔ mbʋ pʋyɔɔ yɔ ɖɩɩsɩŋ mbʋ ɖɩla yɔ, nɛ pɩpɩzɩɣ piyele nɛ ɖilesi ɖa-taa leleŋ kɛlɛʋ yem.

10. Pɩsa nɛ ɖihiɣ lɔŋsɩnɖɛ lɛ, ɛbɛ Yakubu 1:5 heyiɣ-ɖʋ se pɩcɛyaa se ɖɩla?

¹⁰ Mbʋ pɩwɛɛ se ŋla yɔ: Pɔzɩ Yehowa se ɛha-ŋ lɔŋsɩnɖɛ. Ye ɖɩsɔɔlaa se ɖɩɖɔkɩ ɖa-tɩ takɩm taa nɛ taa leleŋ yɔ, kajalaɣ lɛ, pɩwɛɛ se ɖɩpɔzɩ Yehowa adɩma taa se ɛha-ɖʋ lɔŋsɩnɖɛ nɖɩ pɩpɔzʋʋ-ɖʋ yɔ nɛ ɖɩkpaɣ lɩmaɣza kɩbana. (Kalɩ Yakubu 1:5.) Ɛbɛ pɩwɛɛ se ɖɩla ye pɩlakɩ-ɖʋ ɛzɩ Yehowa eecosuu ɖa-adɩma yɔɔ kpaagbaa yɔ? Yakubu yɔɔdaa se ‘ɖɩwɛɛ nɛ ɖɩpɔzʋʋ Ɛsɔ.’ Ye ɖiwobi pɩ-yɔɔ nɛ ɖɩpɔzʋʋ Yehowa lɔŋsɩnɖɛ yɔ, pɩɩkaɣ-ɩ nɩʋ. Ɛ-taa ɛɛkaɣ-ɖʋ wɩnʋʋ. Alɩwaatʋ ndʋ ɖɩtɩmɩɣnɩ ɖa-Caa weyi ɛwɛ ɛsɔdaa yɔ se ɛha-ɖʋ lɔŋsɩnɖɛ nɛ ɖɩɖɔkɩ ɖa-tɩ takɩm taa yɔ, ɛhaɣ-ɖʋ ɖɩ faaa. (Keɣa 24:12, 13) Ɛnaɣ takɩm mbʋ pɩ-taa ɖɩwɛɛ yɔ. Ɛnɩɣ ɖe-siziŋ nɛ ɛsɔɔlɩ siŋŋ se ɛsɩnɩ-ɖʋ. Pɩtʋʋ fɛyɩ se piyeki se ɖa-taa ɛla leleŋ. Ɛlɛ, nʋmɔʋ ŋgʋ yɔɔ Yehowa tɩŋɩɣna nɛ ɛhaɣ-ɖʋ lɔŋsɩnɖɛ?

11. Ɛbɛ pɩwɛɛ se ɖɩtasɩ labʋ nɛ ɖihiɣ lɔŋsɩnɖɛ?

¹¹ Yehowa tɩŋɩɣnɩ ɛ-Tɔm yɔɔ nɛ ɛhaɣ-ɖʋ lɔŋsɩnɖɛ. (Adu. 2:6) Pɩsa nɛ ɖɩwɛɛnɩ lɔŋsɩnɖɛ nɖɩ lɛ, pɩpɔzʋʋ se ɖɩkpɛlɩkɩ Ɛsɔtɔm nɛ ɛgbɛyɛ takayɩsɩ. Ɛlɛ pɩtasɩnɩ kpɛlɩkʋʋ lɛ pɩwɛɛ se ɖɩla nabʋyʋ. Pɩpɔzʋʋ se ɖɩla mbʋ Ɛsɔ pɔzʋʋ-ɖʋ yɔ. Yakubu mawa se: “Ɩpɩsɩ mba pɔɖɔŋ tɔm yɔɔ yɔ nɛ ɩtaakɛ welisiyaa ɖeke.” (Yak. 1:22) Alɩwaatʋ ndʋ ɖɩɖɔŋ Ɛsɔ lɔŋ tasʋʋ yɔɔ yɔ ɖɩpɩsɩɣ laŋhɛzɩyɛ tɩnaa, ɖɩnɩɣ tɔm taa, nɛ ɖɩkɛɣ pʋtɔdɩyɛ nayaa nɛ pɩkɩlɩ. (Yak. 3:17) Wɛtʋ kɩbandʋ tʋnɛ tɩsɩɣnɩ-ɖʋ se ɖɩpɩzɩ nɛ ɖɩlʋbɩnɩ paa takɩm mbʋ nɛ ɖitaalesi ɖa-taa leleŋ.

12. Ɛbɛ yɔɔ pɩcɛyɩ siŋŋ se ɖɩtɩlɩ Bibl camɩyɛ?

 ¹² Ɛsɔtɔm wɛ ɛzɩ ñɩnʋʋ yɔ, nɛ tɩsɩɣnɩ-ɖʋ se ɖɩna hɔɔlɩŋ weyi ɩ-taa pɩwɛɛ se ɖɩla lɛɣzɩtʋ yɔ nɛ ɛzɩma ɖɩpɩzɩɣ nɛ ɖɩla mbʋ yɔ. (Yak. 1:23-25) Nabʋyʋ taa ɖɩkpɛlɩkɩɣ Ɛsɔtɔm nɛ ɖɩtɛ lɛ, ɖɩpɩzɩɣ nɛ ɖiɖiɣzina se pɩpɔzʋʋ se ɖɩtaakɩlɩɣ pana kɔʋ lɛɛ lɛɛ. Yehowa sɩɣnɩ-ɖʋ se ɖɩtɩlɩ ɛzɩma ɖɩwɛɛnɩ hɛɛɛ wɛtʋ alɩwaatʋ ndʋ ɛyaa yaa kaɖɛ naɖɩyɛ yeki se ɖɩkɔ pana yɔ. Ye ɖɩwɛnɩ hɛɛɛ wɛtʋ yɔ, ɖɩpɩzɩɣ nɛ ɖɩlʋbɩnɩ kala wena ɖɩkatɩɣ yɔ camɩyɛ. Ðɩpɩzɩɣ ɖɔɖɔ nɛ ɖɩmaɣzɩ ɖa-ñʋʋ taa camɩyɛ nɛ pɩkɩlɩ nɛ ɖɩkpaɣ lɩmaɣza kɩbana. (Yak. 3:13) Pɩcɛyɩ siŋŋ se ɖɩtɩlɩ Bibl camɩyɛ!

13. Ɛbɛ yɔɔ pɩwɛɛ se ɖɩkpɛlɩkɩ ɛyaa mba pɔ-tɔm pɔyɔɔdɩ Bibl taa yɔ pa-kɩɖaŋ?

¹³ Nabʋyʋ taa ɖɩlakɩ kɩwɛɛkɩm nabʋyʋ nɛ pɩtɛ pʋcɔ nɛ ɖɩna se pɩtaapɔzɩ se ɖɩlabɩ-pʋ. Ɛlɛ ye ɖɩtɔm se ɖɩtɩŋɩɣnɩ nʋmɔʋ ŋgʋ kɩ-yɔɔ nɛ ɖɩkpɛlɩkɩ lɔŋ yɔ, pɩwɛ kaɖɛ. Nʋmɔʋ kɩbaŋʋ ŋgʋ kɩ-yɔɔ pɩwɛɛ se ɖɩtɩŋna nɛ ɖɩwɛɛnɩ lɔŋsɩnɖɛ yɔ, ŋgʋ lɛ se ɖɩkpɛlɩkɩ lɔŋ mbʋ lalaa laba nɛ pɩwɛɛ ɖeu nɛ mbʋ palaba nɛ pɩfɛyɩ ɖeu yɔ pɩ-taa. Pʋyɔɔ Yakubu seɣtiɣ-ɖʋ se ɖɩkpɛlɩkɩ lɔŋ ɛyaa mba pɔ-tɔm pɔyɔɔdɩ Bibl taa yɔ pɔ-cɔlɔ. Pa-taa nabɛyɛ yɔ: Abraham, Rahaabɩ, Yɔɔb, nɛ Eliya. (Yak. 2:21-26; 5:10, 11, 17, 18) Yehowa sɛyaa siɣsiɣ tɩnaa mba, papɩzaa nɛ pɔɖɔkɩ pa-tɩ kpam takɩm mbʋ pɩpɩzaɣ se piyele nɛ pelesi pa-taa leleŋ yɔ pɩ-taa. Pa-tɩ ɖɔkʋʋ kɩɖaŋ ɛnɩ ɩwɩlɩɣ se Yehowa pɩzɩɣ ɛsɩnɩ-ɖʋ nɛ ɖa ɖɔɖɔ ɖɩla mbʋ.

14-15. Ɛbɛ yɔɔ pɩpɔzʋʋ se ɖɩcɔnɩ ɖa-abʋta ɖeɖe?

¹⁴ Kaɖɛ: Alɩwaatʋ ndʋ ŋpɩtɩɣ ñe-tisuu yɔɔ yɔ. Nabʋyʋ taa, pɩpɩzɩɣ nɛ pɩlabɩ-ɖʋ kaɖɛ se ɖɩnɩɩ Bibl wɩlɩtʋ natʋyʋ taa. Yaa Yehowa pɩzɩɣ nɛ eecosuu ɖa-adɩma yɔɔ ɛzɩ ɖɩsɔɔlʋʋ yɔ. Pɩpɩzɩɣ piyele nɛ ɖɩpaɣzɩ pɩtʋʋ. Ye ɖɩtɩla nabʋyʋ se ɖɩnɩɩ tɔm ndʋ tɩ-yɔɔ ɖɩpɩtɩɣ yɔ tɩ-taa yɔ, abʋta ana, akaɣ camʋʋ ɖe-tisuu nɛ awɛɛkɩ taabalɩyɛ nɖɩ ɖɩwɛ ɖa nɛ Yehowa ɖɛ-hɛkʋ taa yɔ. (Yak. 1:7, 8) Nɛ halɩ apɩzɩɣ ayele nɛ ɖilesi lidaʋ ŋgʋ ɖɩwɛnɩ cee wayɩ yɔɔ yɔ.

¹⁵ Apostoloo Pɔɔlɩ kpaɣ ɖe-lidaʋ nɛ ɛmaɣzɩnɩ mɛlɛ kolaɣ. (Ebr. 6:19) Mɛlɛ kolaɣ sɩɣnɩ mɛlɛ se kɩsɩŋ yiɣyiɣ alɩwaatʋ ndʋ helim sɔsɔm makɩ yɔ nɛ kitaayooni kaaŋ sɔsɔŋ nɩɩyɩ. Ɛlɛ ye kpasɩ nzɩ paɖɩnɩ mɛlɛ kolaɣ nɛ patamnɩ mɛlɛ yɔ sɩcɛba yɔ, katɩtasɩ wɛʋ wazaɣ. Ɛzɩ kalɩkɔdaɣ camʋʋ kpasɩ nzɩ paɖɩnɩ mɛlɛ kolaɣ yɔ, mbʋ ɖɔɖɔ abʋta wena patɩcɔnɩ a-ɖeɖe yɔ acamɩɣ ɖe-tisuu. Ɛyʋ weyi ɛwɛnɩ abʋta yɔ, alɩwaatʋ ndʋ ɛkatɩɣ nazɩm nabʋyʋ yɔ ɛpɩzɩɣ nɛ elesi tisuu mbʋ ɛwɛna se Yehowa kaɣ labʋ ɛ-tamasɩ yɔɔ yɔ. Ye ɖilesi ɖe-tisuu yɔ, ɖilesiɣ ɖe-lidaʋ. Ɛzɩ Yakubu yɔɔdʋʋ yɔ, “weyi ɛpɩtɩɣ yɔ ɛwɛ ɛzɩ teŋgu taa lɩm hoɖe nɖɩ helim kʋsʋʋ nɛ pɩcɔzʋʋ yɔ.” (Yak. 1:6) Ɛyʋ weyi pɩlakɩ-ɩ mbʋ yɔ ɛɛpɩzɩɣ nɛ ehiɣ taa leleŋ kpa!

16. Ye ɖɩwɛɛ nɛ ɖɩpɩtɩɣ yɔ, ɛbɛ pɩwɛɛ se ɖɩla?

¹⁶ Mbʋ pɩwɛɛ se ŋla yɔ: Lʋbɩnɩ ña-abʋta; kpazɩ ñe-tisuu ɖoŋ. La nabʋyʋ kpɛdɛyɛ. Nayʋ Eliya alɩwaatʋ taa, Yehowa samaɣ kaapɩtɩ ke-tisuu yɔɔ. Eliya kaaheyi-kɛ se: “Ɩwɛɣ ikpiliɣni hɔɔlɩŋ naalɛ yɔɔ nɛ pɩkɔɔ pɩsɩɩnɩ ɖooye? Ye [Yehowa] ɛkɛnɩ Ɛsɔ yɔ, ɩtɩŋ ɛnʋ na; ɛlɛ ye Baalɩ yɔ, ɩtɩŋ ɛnʋ na.” (1 Aw. 18:21) Mbʋ ɖɔɖɔ pɩwɛɛ se ɖɩla sɔnɔ. Pɩpɔzʋʋ se ɖɩñɩnɩ ɛgbɛyɛ takayɩsɩ taa nɛ pɩsɩnɩ-ɖʋ nɛ ɖa-taa tɛ se Yehowa kɛnɩ Ɛsɔ, Bibl kɛnɩ ɛ-Tɔm nɛ Yehowa Aseɣɖe Tɩnaa kɛnɩ ɛ-samaɣ. (1 Tes. 5:21) Ye ɖɩlabɩ pɩtɩŋa payɩ mbʋ yɔ, pɩsɩɣnɩ-ɖʋ nɛ ɖɩlɔ ɖa-abʋta nɛ ɖɩcɛyɩsɩ ɖe-tisuu. Ye ɖɩnawa se pɩpɔzʋʋ se pasɩnɩ-ɖʋ nɛ ɖiyele pɩtʋʋ yɔ, ɖɩpɩzɩɣ nɛ ɖɩpɔzɩ ɛzʋtʋyaa se pasɩnɩ-ɖʋ. Ye ɖɩsɔɔlaa se ɖihiɣ taa leleŋ Yehowa sɛtʋ taa yɔ, pɩpɔzʋʋ se ɖɩkpaɣ lɩmaɣza kpɛdɛyɛ.

17. Ye pitibi-ɖʋ yɔɔɔ yɔ, ɛbɛ kaɣ labʋ?

¹⁷ Kaɖɛ: alɩwaatʋ ndʋ pitiki-ŋ yɔɔɔ yɔ. Ɛsɔtɔm yɔɔdʋʋ se: “Ye pɩnɩ-ŋ kʋñɔŋ kɩyakʋ wiye yɔ,  ño-ɖoŋ kɛ ɛjandʋ na.” (Adu. 24:10) Ebree tɔm piye nɖɩ pɛɖɛzaa se “pɩnɩ-ŋ” yɔ, papɩzɩɣ nɛ pɛɖɛzɩ-ɖɩ ɖɔɖɔ se “pitibi-ŋ yɔɔɔ” yɔ. Ye pitibi-ŋ yɔɔɔ yɔ, ŋkaɣ lesuu ña-taa leleŋ ɖɔɖɔ lɛɛ lɛɛ.

18. Laŋɩyɛ ɖɔkʋʋ tɔbʋʋ lɛ suwe?

¹⁸ Mbʋ pɩwɛɛ se ŋla yɔ: Taa Yehowa liu nɛ ɛha-ŋ abalɩtʋ nɛ ŋpɩzɩ ŋɖɔkɩ kpam. Ye ɖɩsɔɔlaa se ɖɩɖɔkɩ ɖa-tɩ takɩm taa yɔ, pɩpɔzʋʋ-ɖʋ abalɩtʋ. (Yak.5:11) Tɔm piye nɖɩ Yakubu labɩnɩ tʋmɩyɛ nɛ pɛɖɛzɩ-ɖɩ se “laŋɩyɛ ɖɔkʋʋ” yɔ, ɖɩhɔŋ ɖa-lɩmaɣza nɛ ɖiwokini ɛyʋ weyi ɛsɩŋ lone naɖɩyɛ taa nɛ eeciɣdiɣ yɔ ɛ-yɔɔ. Ðɩpɩzɩɣ nɛ ɖɩmaɣzɩ sɔɔja weyi ɛsɩŋ lone naɖɩyɛ taa nɛ abalɩtʋ nɛ eeseɣ alɩwaatʋ ndʋ koyindinaa kɔŋnɩ yɔ ɛ-yɔɔ yɔ.

19. Ɛbɛ ɖɩpɩzɩɣ nɛ ɖɩkpɛlɩkɩ kɩɖaʋ ŋgʋ apostoloo Pɔɔlɩ hawa yɔ kɩ-taa?

¹⁹ Apostoloo Pɔɔlɩ ha-ɖʋ kɩɖaʋ kɩbaŋʋ abalɩtʋ nɛ laŋɩyɛ ɖɔkʋʋ hɔɔlʋʋ taa. Nabʋyʋ taa pɩlakaɣ-ɩ ɛzɩ e-ɖoŋ tɛma yɔ. Ɛlɛ, ɛpɩzaa nɛ ɛɖɔkɩ ɛ-tɩ mbʋ pʋyɔɔ yɔ, ɛta Yehowa liu se ɛhaɣ-ɩ ɖoŋ weyi pɩpɔzʋʋ-ɩ yɔ. (2 Kɔr. 12:8-10; Fil. 4:13) Ye ɖiluzi ɖa-tɩ nɛ ɖɩtɩlɩ se pɩpɔzʋʋ se Yehowa ɛsɩnɩ-ɖʋ yɔ, ɖɩpɩzɩɣ nɛ ɖɩwɛɛnɩ ɖoŋ ɛnɩ nɛ abalɩtʋ ndʋ.—Yak. 4:10.

20-21. Tɔm ndʋ ɖa-taa pɩzɩɣ nɛ pɩtɛmna?

²⁰ Ða-taa pɩzɩɣ nɛ pɩtɛ se takɩm mbʋ ɖɩkatɩɣ yɔ, pɩtɩkɛ Yehowa hɔŋnɩ ɖa-nɩŋgbaŋʋʋ. Yakubu heyiɣ-ɖʋ se: “Ye nɔɔyʋ ɛwɛ takɩm taa yɔ, ɛtaayɔɔdɩ se: ‘Ɛsɔ wɛna nɛ ɛtakɩɣ-m.’ Mbʋ pʋyɔɔ yɔ paapɩzɩɣ nɛ patakɩ Ɛsɔ nɛ mbʋ pɩfɛyɩ ɖeu yɔ, nɛ ɛ-maɣmaɣ ɖɔɖɔ ɛɛtakɩɣ nɔɔyʋ mbʋ.” (Yak. 1:13) Ye ɖa-taa ɩtɛmnɩ toovenim tɔm ndʋ yɔ, ɖɩñɔtʋʋnɩ ɖa-Caa kʋsɔɔlʋ weyi ɛwɛ ɛsɔdaa yɔ nɛ pɩkɩlɩ.—Yak. 4:8.

²¹ Yehowa “ɛɛlɛɣzɩɣ.” (Yak. 1:17) Ɛɛsɩnɩ kajalaɣ pɩnzɩ mɩnʋʋ taa Krɩstʋ ñɩma takɩm mbʋ paakataa yɔ pɩ-taa, nɛ ɛkaɣ sɩnʋʋ ɖa-taa paa anɩ ɖɔɖɔ sɔnɔ. Tɩmnɩ Yehowa siŋŋ nɛ ŋpɔzɩ-ɩ se ɛha-ŋ lɔŋsɩnɖɛ, tisuu nɛ abalɩtʋ. Ɛkaɣ cosuu ña-adɩma yɔɔ. Ðɩnɛ ɛlɛ, ña-taa pɩzɩɣ nɛ pɩtɛ se ɛkaɣ-ŋ sɩnʋʋ nɛ ŋwɛɛ taa leleŋ taa alɩwaatʋ ndʋ ŋwɛɣ nɛ ŋɖɔkʋʋ ña-tɩ takɩm taa yɔ!