1. Ɛzɩma Yehowa wɩlaa se ɖe-wezuu mʋ ñɩm ɛ-ɛsɩndaa?

 KPAƔ se ña-taabalʋ nɔɔyʋ ha-ŋ ɖɩɣa nakɛyɛ. Tɔlɩm mbʋ pata ɖɩɣa ŋga yɔ, pɩ-hɔɔlɩŋ nɩɩyɩ cadaa nɛ ɖɩɣa ŋga kɔ-hɔɔlɩŋ nɩɩyɩ tʋlɩ pɔŋ ɖɔɖɔ. Paa mbʋ, dɔlaarɩwaa miiliyɔɔwaa sakɩyɛ ɛyabɩnɩ-kɛ. Pɩtʋʋ fɛyɩ se ɖɩɣa ŋga kamʋʋ ñɩm ñɛ-ɛsɩndaa nɛ ŋkaɣ kandɩyʋʋ kɔ-yɔɔ. Mbʋ ɖɔɖɔ Yehowa labɩ-ɖʋ kʋjɔʋ nakʋyʋ nɛ kɩmʋ ñɩm, ŋgʋ lɛ wezuu. Toovenim taa lɛ, Yehowa cɛlɩ ɛ-Pɩyalʋ se pɩkɛ kɩhɛyʋʋ pʋ-ñʋʋ taa ɖɔ-yɔɔ, nɛ ɛtɩŋnɩ pɩ-yɔɔ nɛ ɛwɩlɩ se ɖe-wezuu mʋ ñɩm siŋŋ ɛ-ɛsɩndaa.—Yoh. 3:16.

2. Ɛzɩ 2 Kɔrɛntɩ mba 7:1 yɔɔdʋʋ yɔ, ɛbɛ Yehowa sɔɔlaa se ɖɩla?

² Yehowa cɔlɔ wezuu Hiɖe wɛɛ. (Keɣa 35:10) Apostoloo Pɔɔlɩ tisi toovenim tɔm ndʋ tɩ-yɔɔ pʋyɔɔ ɛyɔɔdaa se: «Ɛ-yɔɔ ɖɩwɛ wezuu nɛ ɖiciɣdiɣ nɛ ɖɩwɛɛ.» (Tʋma 17:25, 28) Ye mbʋ, pɩmʋnɩ mbʋ se ɖɩyɔɔdɩ se ɖe-wezuu kɛ kʋjɔʋ ŋgʋ kɩlɩnɩ Ɛsɔ cɔlɔ yɔ. Ɛhaɣ-ɖʋ mbʋ pɩpɔzʋʋ-ɖʋ se ɖɩwɛɛ wezuu yɔ nɛ sɔɔlɩm. (Tʋma 14:15-17) Ɛlɛ Yehowa ɛɛtɩŋɩɣnɩ piti nʋmɔʋ nakʋyʋ yɔɔ se ɛkandɩyɩ ɖe-wezuu yɔɔ. Ɛsɔɔlaa se ɖɩla mbʋ payɩ ɖɩpɩzɩɣ yɔ nɛ ɖɩwɛɛ alaafɩya tomnaɣ taa nɛ fezuu taa. (Kalɩ 2 Kɔrɛntɩ mba 7:1.) Ɛbɛ yɔɔ pɩpɔzʋʋ se ɖɩkandɩyɩ ɖo-tomnaɣ taa alaafɩya nɛ ɖe-wezuu yɔɔ, nɛ ɛzɩma ɖɩpɩzɩɣ nɛ ɖɩla mbʋ?

3. Lɩmaɣza wena a-yɔɔ pɩpɔzʋʋ se ɖɩñaɣ pana nɛ ɖɩwɛɛnɩ tomnaɣ taa alaafɩya yɔ a-taa naɖɩyɛ lɛ nɖɩ?

³ Lɩmaɣza wena a-yɔɔ pɩpɔzʋʋ se ɖɩñaɣ pana nɛ ɖɩwɛɛnɩ tomnaɣ taa alaafɩya yɔ a-taa naɖɩyɛ lɛ se piyeki se ɖɩsɛɛ Yehowa nɛ ɖo-ɖoŋ kpeekpe. (Mark. 12:30) Ðɩsɔɔlaa se ‘ɖɩcɛlɩ ɖo-tomnasɩ ɛzɩ kɩlaʋ ŋgʋ kɩwɛ wezuu, kɩkɛ kiɖeɖeu nɛ kɩkɛdɩnɩ  Ɛsɔ yɔ;’ pʋyɔɔ lɛ, ɖɩɩlakɩ mbʋ ɖɩnawa se pɩkɔŋnɩ kaɖɛ ɖo-tomnaɣ taa alaafɩya yɔ. (Roma 12:1) Pɩkɛ toovenim se paa ɖɩtɩɩlabɩ ɛzɩma yɔ, ɖɩkaɣ hɩnʋʋ kʋdɔŋ. Ɛlɛ, ɖɩlakɩ mbʋ ɖɩpɩzɩɣ yɔ se ɖɩwɛɛnɩ tomnaɣ taa alaafɩya mbʋ pʋyɔɔ yɔ, ɖɩsɔɔlaa se ɖɩwɩlɩ ɖa-Caa weyi ɛwɛ ɛsɔdaa yɔ se wezuu kɛ kʋjɔʋ ŋgʋ kɩmʋ ñɩm ɖɛ-ɛsɩndaa yɔ.

4. Ɛbɛ Wiyaʋ Daviid kaasɔɔlaa se ɛla?

⁴ Wiyaʋ Daviid yɔɔdɩ mbʋ pʋyɔɔ wezuu kʋjɔʋ ŋgʋ Ɛsɔ labɩ-ɩ yɔ kɩmʋ ñɩm ɛ-ɛsɩndaa yɔ pɩ-tɔm alɩwaatʋ ndʋ ɛmawa se: «Ɛzɩ man-calɩm ɛkpɛdaa, pɩwazɩɣ-ŋ we, ye mansʋ pɔʋ pɩsɔzʋʋ-ŋ we? Ɛzɩ puuyuu ɖʋʋ-ŋ hɩɖɛ na, mʋzʋʋ pɩzɩɣ kisusi se ŋcakɩ ñɔ-tɔm yɔɔ?» (Keɣa 29:10) Pɩtɩla, Daviid ma tɔm ndʋ e-wezuu caɣʋ alɩwaatʋ kɛdɛzaɣ ñɩndʋ taa. Ɛlɛ, ɛɛtɛm ɛ-taa se ye pɩsaŋ yɔ ewoki pɩ-yɔɔ nɛ ɛcaɣ wezuu alɩwaatʋ sakɩyɛ nɛ pɩsa nɛ ewolo pɩ-yɔɔ nɛ ɛsɛɛ Yehowa. Pɩtʋʋ fɛyɩ se mbʋ ɖɔɖɔ ɖa-tɩŋa ɖɩtɛm ɖa-taa se ɖɩlakɩ.

5. Paa ɖɩkpadɩyɩ ɛzɩma yaa paa pɩwɩɣ-ɖʋ ɛzɩma yɔ, ɛbɛ ɖɩpɩzɩɣ nɛ ɖɩla?

⁵ Kʋdɔŋ nɛ akpadɩyɩtʋ papɩzɩɣ nɛ paɖɩɣ-ɖʋ nʋmɔʋ nɛ ɖɩɩtasɩɣ pɩzʋʋ se ɖɩla mbʋ ɖɩlakaɣ ɖooo lɛ yɔ pɩ-taa sakɩyɛ. Pɩpɩzɩɣ piyele nɛ ɖa-ñʋʋ taa sidi nɛ ɖɩwɛɛ laŋwɛɛkɩyɛ taa. Ɛlɛ, pɩpɔzʋʋ se ɖiwolo pɩ-yɔɔ nɛ ɖɩñakɩ pana nɛ ɖɩcɔŋnɩ ɖo-tomnaɣ taa alaafɩya ɖeɖe. Ɛbɛ yɔɔ? Mbʋ pʋyɔɔ yɔ, paa ɖɩkpadɩyɩ ɛzɩma yaa paa pɩwɩɣ-ɖʋ ɛzɩma yɔ, ɖɩpɩzɩɣ ɖiwolo pɩ-yɔɔ nɛ ɖɩsaŋ Yehowa ɛzɩ Wiyaʋ Daviid kaalabʋ yɔ. Ðiɖiɣziɣna se paa pɩwɩɣ-ɖʋ yaa paa ɖɩkpadɩyaa yɔ, ɖɩmʋ ñɩm ɖɛ-Ɛsɔ ɛsɩndaa lɛ, pitukuuni-ɖʋ siŋŋ. (Mat. 10:29-31) Halɩ paa pɩpɔzʋʋ se ɖɩsɩ yɔ, e-liu kaɣ wɛʋ siŋŋ se efezi-ɖʋ. (Yɔɔb 14:14, 15) Alɩwaatʋ ndʋ ɖɩwɛ wezuu yɔ, ɖɩsɔɔlaa se ɖɩla mbʋ ɖɩpɩzɩɣ yɔ nɛ ɖɩkandɩyɩ ɖo-tomnaɣ taa alaafɩya nɛ ɖe-wezuu yɔɔ.

6. Ɛbɛ Yehowa sɔɔlaa se ɖɩla tɔkɩyɛ nɛ ñɔtʋ hɔɔlʋʋ taa?

⁶ Bibl tɩkɛ takayaɣ ŋga keheyiɣ-ɖʋ ɛzɩma pɩwɛɛ se ɖɩcɔnɩ ɖo-tomnaɣ taa alaafɩya ɖeɖe yɔ yaa mbʋ pɩwɛɛ se ɖɩtɔɔ yɔ pɩ-tɔm. Paa mbʋ yɔ, kiheyiɣ-ɖʋ lɩmaɣza wena Yehowa wɛnɩ hɔɔlɩŋ ɛnɩ ɩ-naalɛ ɩ-taa yɔ a-tɔm. Kɩɖaʋ nakʋyʋ yɔ: Ɛtasɩɣ-ɖʋ lɔŋ se ɖɩlɔ «kɩdɛkɛdɩm» yaa mbʋ pɩpɩzɩɣ nɛ pɩkɔnɩ kaɖɛ ɖo-tomnaɣ yɔ. (Ekl. 11:10) Hiluu nɛ sʋlʋm kpaŋʋʋ kɔŋnɩ kaɖɛ ɛyʋ tomnaɣ nɛ Bibl yɔɔdʋʋ se lakasɩ nzɩ sɩfɛyɩ ɖeu. (Adu. 23:20) Yehowa sɔɔlaa se ɖɩwɛɛnɩ tɩ ɖɔkʋʋ alɩwaatʋ ndʋ ɖɩlɩzɩɣ tɔɔnaɣ ŋga ɖɩtɔɔ nɛ sʋlʋm mbʋ ɖɩñɔɔ yɔ nɛ ɖɩtaaɖɛlɛsɩ niye.—1 Kɔr. 6:12; 9:25.

7. Lɔŋ tasʋʋ mbʋ pɩwɛ Aduwa 2:11 taa yɔ, ɛzɩma pɩsɩɣnɩ-ɖʋ se ɖɩkpaɣ lɩmaɣza kɩbana ɖo-tomnaɣ taa alaafɩya hɔɔlʋʋ taa?

⁷ Ye ɖɩlakɩnɩ ɖa-maɣzɩm tʋmɩyɛ camɩyɛ yɔ, ɖɩpɩzɩɣ nɛ ɖɩkpaɣ lɩmaɣza wena awɩlɩɣ se wezuu kʋjɔʋ ŋgʋ Ɛsɔ labɩ-ɖʋ yɔ kɩmʋ ñɩm siŋŋ ɖɛ-ɛsɩndaa yɔ. (Keɣa 118:99, 100; kalɩ Aduwa 2:11.) Kɩɖaʋ nakʋyʋ yɔ: Ðɩmaɣzɩɣ mbʋ ɖɩtɔkɩ yɔ pɩ-yɔɔ camɩyɛ. Ye ɖɩsɔɔlɩ tɔɔnaɣ nakɛyɛ ɛlɛ ɖɩna se keyeki se ɖɩhɩnɩ kʋdɔŋ yɔ, ɛzɩma ɖɩmaɣzɩɣ camɩyɛ yɔ pɩsɩɣnɩ-ɖʋ se ɖikizi kɔ-tɔɔʋ. Ðɩwɩlɩɣ ɖɔɖɔ se ɖɩmaɣzɩɣ camɩyɛ ye ɖiɖou ɛzɩ pɩmʋnaʋ yɔ, ɖɩlakɩ hola aleɣya ɖoŋ ɖoŋ, ɖɩñakɩ pana se ɖo-tomnaɣ ɛwɛɛ cɩɖɩ cɩɖɩ tam, nɛ ɖɩñakɩ pana se ɖa-ɖɩsɩ ɩwɛɛ cɩɖɩ cɩɖɩ yɔ.

8. Ða-maɣmaɣ ɖa-tɩ yɔɔ kandɩyʋʋ hɔɔlʋʋ taa, Bibl wɩlɩɣ se lɩmaɣza wena Ɛsɔ wɛna?

⁸ Yehowa kaaɖʋ Izrayɛɛlɩ mba paɣtʋ pɩlɩɩnɩ mbʋ pɩwɛɛ se pala nɛ pakandɩyɩ pa-tɩ yɔɔ nɛ kɛgbɛdɩsasɩ sɔsɔsɩ ɩtaatalɩ-wɛ pa-ɖɩsɩ taa yaa pa-tʋma taa yɔ. (Ejl. 21:28, 29; Wp. 22:8) Ye ɛyʋ nɔɔyʋ ɛtɩɖʋna pʋcɔ  nɛ ɛkʋ ɛyʋ lɛlʋ yɔ, mbʋ pɩlɩɣaɣ pɩ-taa yɔ pɩkɔŋnaɣ-ɩ kala sɔsɔna. (Wp. 19:4, 5) Paɣtʋ pɔzaɣ se halɩ mba patɩɖʋna nɛ pɔkɔnɩ kaɖɛ pɩɣa ŋga patɩtɩɩlʋlɩtɩ-kɛ yɔ, pɩpɔzʋʋ se pɔhɔ pa-nɩŋgbaŋʋʋ. (Ejl. 21:22, 23) Masɩ wɩlɩɣ kpayɩ kpayɩ se Yehowa sɔɔlaa se ɖɩla mbʋ payɩ ɖɩpɩzɩɣ yɔ nɛ ɖɩfɛɛ kɛgbɛdɩsasɩ.

9. Ɛbɛ ɖɩpɩzɩɣ ɖɩla nɛ pɩsa nɛ ɖɩfɛɛ kɛgbɛdɩsasɩ? (Cɔnɩ ɖɔɖɔ kɩlɛmɩŋ.)

⁹ Ðɩwɩlɩɣ se wezuu kʋjɔʋ ŋgʋ Ɛsɔ labɩ-ɖʋ yɔ kɩmʋ ñɩm ɖɛ-ɛsɩndaa ye ɖɩñakɩ pana se kɛgbɛdɩsaɣ ɛtaatalɩ-ɖʋ ɖɩɣa yaa tʋmɩyɛ taa yɔ. Kɩɖaŋ nɩɩyɩ yɔ: Ye pɩpɔzʋʋ se ɖɩlɔ wondu ndʋ tɩwɛ lɔŋ yɔ, kɔ wena a-taa nɛ sɔtʋ yɔ, yaa ɖɔkɔtɔ tɛ kɔ yɔ, ɖɩlɔʋ wondu ndʋ ɖenɖe pɩɩkɔŋnɩ ɛyaa lalaa kaɖɛ yɔ. Pɩtasɩ lɛ, ɖɩñakɩ pana se ɖɩtaasɩɩ wondu ndʋ ɖenɖe piya pɩzɩɣ nɛ sɩna-tʋ yɔ. Ðɩtɩlɩɣ labʋ alɩwaatʋ ndʋ ɖɩlakɩnɩ tʋmɩyɛ miŋ, lɩm mbʋ pɩsa miŋ yɔ, nɛ wondu ndʋ tɩ-taa nɛ laatriki ɖoŋ yɔ. Nɛ alɩwaatʋ ndʋ ɖɩlakɩnɩ tʋmɩyɛ wondu ndʋ yɔ, ɖɩɩɖɛɣ nɛ ɖiyele-tʋ. Ye ɖɩkpaɣ kɔyɛ naɖɩyɛ, ɖɩñɔ sʋlʋm, yaa ɖom ɛtɩtalɩ-ɖʋ nɛ ɖa-lɩmaɣza fɛyɩ a-ɖeɖe yɔ, ɖɩɩsaɣ lɔɔɖɩyɛ. Nɛ alɩwaatʋ ndʋ ɖɩsaɣ lɔɔɖɩyɛ yɔ, ɖɩɩlakɩnɩ tʋmɩyɛ pɔrtaabɩlɩ.

10. Pʋcɔ nɛ lakasɩ nzɩ sɩpɩzɩɣ nɛ sɩkɔnɩ ɛyʋ wezuu kaɖɛ yɔ sɩla lɛ, ɛbɛ ɖɩpɩzɩɣ nɛ ɖɩla; nɛ alɩwaatʋ ndʋ lakasɩ nzɩ sɩwɛɣ nɛ sɩlakɩ yɔ ɛbɛ ɖɩpɩzɩɣ ɖɩla?

¹⁰ Nabʋyʋ taa, ɖɩɩpɩzɩɣ nɛ ɖɩɖɩɣ nʋmɔʋ lakasɩ nzɩ sɩpɩzɩɣ nɛ sɩkɔnɩ kaɖɛ ɖe-wezuu yɔ se sɩtaala. Tɔm ndʋ tɩkɛ toovenim kɔzɩ kɔzɩ asɛyɩŋ, kʋdɔmɩŋ kɩɖɛɖɛŋ, nɛ yoŋ hɔɔlʋʋ taa. Paa mbʋ yɔ, alɩwaatʋ ndʋ lakasɩ nzɩ sɩlakɩ yɔ, ɖɩpɩzɩɣ nɛ ɖɩñaɣ pana nɛ ɖɩla mbʋ ɖɩpɩzɩɣ yɔ nɛ ɖɩkandɩyɩ ɖa-tɩ yɔɔ nɛ ɖihiɣ wezuu wɛtʋ ndʋ tɩ-taa, ye ɖɩñaŋ paɣtʋ ndʋ komina ñʋndɩnaa ɖʋʋ se ɖɩlɩɩ egeetiye nɖɩ ɖɩ-taa yaa paɣtʋ lɛɛtʋ ndʋ paɖʋʋ-ɖʋ yɔ. (Roma 13:1, 5-7) Ðɩpɩzɩɣ nɛ ɖɩñɔɔzɩ ɖa-tɩ nɛ ɖɩɖaŋ lakasɩ nzɩ sɩlakɩ nɛ pɩpɔzʋʋ se ɛyʋ ɛla nabʋyʋ kpɛdɛyɛ yɔ sɩ-taa nasɩyɩ; pʋyɔɔ lɛ, pɩwɛ ɖeu se ɖɩɖɔ lɔŋ weyi ɖe-egeetiye taa komina ñʋndɩnaa tasɩɣ-ɖʋ yɔ ɩ-yɔɔ nɛ pɩsɩnɩ-ɖʋ nɛ ɖɩñɔɔzɩ ɖa-tɩ nɛ ɖɩɖaŋ asɛyʋʋ alɩwaatʋ. Pɩtɩla pɩwɛɣ ɖeu se ɖɩñɔɔzɩ lɩm, tɔɔnasɩ nzɩ sɩɩwɛɛkɩɣ yɔ nɛ kɔ naayɛ nɛ ɖɩsɩɩ.

11. Ye kʋdɔŋ kɩɖɛɖɛʋ nakʋyʋ ɛlɩ ɖenɖe ɖɩwɛɛ yɔ, ɛbɛ pɩpɔzʋʋ se ɖitisi faaa nɛ ɖɩla?

¹¹ Ye kʋdɔŋ kɩɖɛɖɛʋ nakʋyʋ ɛlɩ ɖenɖe ɖɩwɛɛ yɔ, ɛbɛ pɩpɔzʋʋ se ɖɩla? Pɩpɔzʋʋ se ɖɩña paɣtʋ ndʋ ñʋndɩnaa ɖʋʋ yɔ. Tɩ-taa natʋyʋ lɛ nesi saŋʋʋ, ɖama posinuu, mɔŋ yɔɔ huuzuu, nɛ ɖʋtʋ ndʋ palaba se pasɩɩ kʋdɔndɩnaa kɩjaʋ yɔ. Ye ɖɩɖɔŋ paɣtʋ ndʋ tɩ-yɔɔ yɔ, ɖɩwɩlɩɣ se wezuu kʋjɔʋ ŋgʋ Ɛsɔ labɩ-ɖʋ yɔ kɩmʋ ñɩm ɖɛ-ɛsɩndaa siŋŋ.

12. Alɩwaatʋ ndʋ lakasɩ nasɩyɩ lakɩ nɛ pɩpɔzʋʋ se ɖɩla nabʋyʋ kpɛdɛyɛ yɔ, ɛzɩma paɣtʋ kiɖe nɖɩ ɖɩwɛ Aduwa 14:15 taa yɔ, ɖɩsɩɣnɩ-ɖʋ se ɖɩtɩlɩ tɔm ndʋ tɩ-yɔɔ pɩwɛɛ se ɖitisi yɔ?

¹² Alɩwaatʋ ndʋ lakasɩ nasɩyɩ lakɩ nɛ pɩpɔzʋʋ se pala nabʋyʋ kpɛdɛyɛ yɔ, ɖa-taabalaa nɛ ɖɔ-cɔlɔ ñɩma pɩzɩɣ nɛ pɛyɛlɩɣnɩ tɔm ndʋ tɩtɩkɛ toovenim yɔ, nɛ tɔm susuu wondu pɩzɩɣ nɛ tisusuu tɔm ndʋ tɩtɩkɛ toovenim ɖɔɖɔ yɔ. Mbʋ ɛzɩ ɖiitisi «tɔm kpeekpe» yɔɔ lɛ, pɩwɛɣ ɖeu se ɖiwelisini ñʋndɩnaa nɛ fɛɖaa mba papɩzɩɣ nɛ pataa-wɛ liu nɛ pɩkɩlɩ yɔ. (Kalɩ Aduwa 14:15.) Nɔɔɖɛyaa ɛgbɛyɛ nɛ ɛgbɛyɛ pilinzi lakɩ mbʋ payɩ papɩzɩɣ yɔ se patɩlɩ toovenim pʋcɔ nɛ peheyi koobiya ɛzɩma pala ɛgbɛyɛ taa kediɣzisi nɛ tɔm susuu tʋmɩyɛ yɔ. (Ebr. 13:17) Ye ɖɩɖɔŋ lɔŋ weyi patasɩɣ-ɖʋ yɔ ɩ-yɔɔ yɔ, ɖɩkandɩyɩɣ ɖa-maɣmaɣ nɛ ɛyaa lalaa yɔɔ se kaɖɛ naɖɩyɛ ɛtaatalɩ-ɖʋ. Pɩtasɩ lɛ, pɩtɩla pɩsɩɣnɩ ɛyaa lalaa nɛ pɛwɛɛnɩ lɩmaɣza kɩbana Yehowa Aseɣɖe Tɩnaa yɔɔ.—1 Pɩy. 2:12.

13. Alɩwaatʋ ndʋ pañɩnɩɣ se paɖʋ-ɖʋ calɩm yɔ, ɛzɩma ɖɩwɩlɩɣ se wezuu kʋjɔʋ ŋgʋ Ɛsɔ labɩ-ɖʋ yɔ kɩmʋ ñɩm ɖɛ-ɛsɩndaa?

¹³ Ɛyaa sakɩyɛ sɩma se ɖa Yehowa Aseɣɖe Tɩnaa ɖikiziɣ calɩm. Ðikiziɣ calɩm mbʋ pʋyɔɔ yɔ ɖɩnawa se calɩm kɛ pʋyʋ kiɖeɖeu. Ðɩñaŋ paɣtʋ ndʋ Yehowa ɖʋ calɩm hɔɔlʋʋ taa yɔ nɛ ɖikiziɣ se pataaɖʋ-ɖʋ calɩm halɩ pɩkpɛndɩnɩ alɩwaatʋ ndʋ ɖɩhɩnɩɣ kʋdɔŋ nɛ pɩpɔzʋʋ se palabɩ-ɖʋ kɔyɛ kpɛdɛyɛ yɔ. (Tʋma 15:28, 29) Paa mbʋ yɔ, pɩɩwɩlɩɣ se ɖɩsɔɔlaa se ɖɩsɩ. Ɛlɛ wezuu kʋjɔʋ ŋgʋ Ɛsɔ labɩ-ɖʋ yɔ, kɩmʋ ñɩm ɖɛ-ɛsɩndaa. Ðɩpɔzʋʋ fɛɖaa mba petisiɣ faaa nɛ patɩŋɩɣnɩ nʋmɔŋ kɩbaŋ yɔɔ nɛ pawaɣ ɛyaa kʋdɔmɩŋ nɛ paaɖʋʋ calɩm yɔ se pasɩnɩ-ɖʋ.

14. Ɛzɩma ɖɩpɩzɩɣ ɖɩla nɛ pɩtaakɩlɩɣ pɔzʋʋ se patɩŋɩɣnɩ kʋdɔmɩŋ waʋ nʋmɔʋ ŋgʋ kɩwɛ kaɖɛ yɔ kɩ-yɔɔ nɛ palabɩ-ɖʋ kɔyɛ?

¹⁴ Mbʋ mbʋ pɩ-tɔm ɖɩyɔɔdɩ tɔm ñʋʋ kʋnɛ kɩ-taa yɔ, ye ɖɩlakɩ-pʋ nɛ ɖɩcɔŋnɩ ɖo-tomnaɣ taa alaafɩya yɔɔ camɩyɛ yɔ, pɩtɩla pɩɩkaɣ pɔzʋʋ se palabɩ-ɖʋ tʋmɩyɛ yaa patɩŋnɩ kʋdɔmɩŋ waʋ nʋmɔʋ lɛɛkʋ ŋgʋ kɩwɛ kaɖɛ yɔ kɩ-yɔɔ nɛ palabɩ-ɖʋ kɔyɛ. Ye ɖɩwɛnɩ tomnaɣ taa alaafɩya camɩyɛ yɔ, alɩwaatʋ ndʋ pɩwɩɣ-ɖʋ nɛ pɩpɔzʋʋ se palabɩ-ɖʋ tʋmɩyɛ yɔ, pɩɩkɩlɩɣ labʋ kaɖɛ  nɛ palakɩ-ɖʋ tʋmɩyɛ nɛ pɩtɛ lɛ ɖɔ-yɔɔ kaɣ cɛbʋ lɛɛ lɛɛ nɛ pɩkɩlɩ. Ye ɖɩñakɩ pana se mbʋ pɩpɩzɩɣ nɛ pɩkɔnɩ-ɖʋ kaɖɛ yɔ pɩtaawɛɛ ɖa-ɖɩsɩ nɛ ɖa-tʋma taa, nɛ ye ɖɩñakɩ pana nɛ ɖɩñaŋ habɩyɛ yɔɔ paɣtʋ camɩyɛ yɔ, pɩpɩzɩɣ nɛ pɩsɩnɩ-ɖʋ ɖɔɖɔ nɛ kɛgbɛdɩsasɩ ɩtaakɩlɩɣ-ɖʋ talʋʋ nɛ pɩpɔzɩ se palabɩ-ɖʋ tʋmɩyɛ kpɛdɛyɛ.

15. (a) Ɛbɛ yɔɔ pɩcɛyaa se ɖɩwɛɛnɩ takayaɣ ŋga kawɩlɩɣ ɛzɩma ɖɩsɔɔlaa se palabɩ-ɖʋ kɔyɛ yɔ? (Cɔnɩ ɖɔɖɔ kɩlɛmʋʋ.) (b) Ɛzɩ ɖɩnaʋ video taa yɔ, calɩm tʋmɩyɛ labɩnʋʋ kɔyɛ nʋmɔʋ taa hɔɔlʋʋ taa lɛ, ɛbɛ pɩzɩɣ pɩsɩnɩ-ɖʋ nɛ ɖɩkpaɣ lɩmaɣza kɩbana?

¹⁵ Wezuu kɛ kʋjɔʋ ŋgʋ kɩmʋ ñɩm ɖɛ-ɛsɩndaa yɔ, pʋyɔɔ lɛ ɖɩñakɩ pana se ɖɩwɛɛnɩ takayaɣ ŋga kawɩlɩɣ ɛzɩma ɖɩsɔɔlaa se palabɩ-ɖʋ kɔyɛ yɔ nɛ kɛwɛɛ ɖɔ-yɔɔ paa ɛzɩmtaa. b Ðɩtɩŋɩɣnɩ takayaɣ ŋga kɔ-yɔɔ nɛ ɖɩyɔɔdʋʋ lɩmaɣza wena ɖɩwɛnɩ calɩm ɖʋʋ nɛ kɔyɛ labʋ nʋmɔŋ nɩɩyɩ yɔɔ yɔ pɩ-tɔm. Ŋwɛnɩ takayaɣ ŋga lɛɛlɛɛyɔ? Ye pɩpɔzʋʋ se ŋwɛɛnɩ-kɛ yaa ŋlɛɣzɩ ŋga ŋtɛm wɛnʋʋ yɔ, la mbʋ kpaagbaa. Ye ɖɩma ɛzɩma ɖɩsɔɔlaa se palabɩ-ɖʋ kɔyɛ yɔ takayaɣ yɔɔ kpayɩ kpayɩ yɔ pɩkaɣ-ɖʋ sɩnʋʋ nɛ palabɩ-ɖʋ kɔyɛ lɛɛ lɛɛ, mbʋ pʋyɔɔ yɔ pɩɩkaɣ pɔzʋʋ se ɖɩkpaɣ alɩwaatʋ sakɩyɛ nɛ ɖa nɛ fɛɖaa ɖɩyɔɔdɩ pɩ-tɔm. Pɩkaɣ yebu ɖɔɖɔ nɛ pataalabɩ-ɖʋ kɔyɛ nɖɩ ɖɩpɩzɩɣ nɛ ɖɩkɔnɩ-ɖʋ kaɖɛ yɔ. c

16. Ye ɖɩɩsɩŋ tɔm ndʋ ɖeyi ɖeyi ɖɩma takayaɣ ŋga kawɩlɩɣ ɛzɩma ɖɩsɔɔlaa se palabɩ-ɖʋ kɔyɛ yɔ ka-taa yɔ, ɛbɛ ɖɩpɩzɩɣ nɛ ɖɩla?

 ¹⁶ Paa ɖɩtɩkpadɩyɩ yaa ɖɩwɛnɩ tomnaɣ taa alaafɩya camɩyɛ yɔ, kɛgbɛdɩsasɩ pɩzɩɣ nɛ pɩtalɩ ɖa-tɩŋa payɩ; nɛ pɩpɩzɩɣ nɛ pɩwɩɩ-ɖʋ ɖɔɖɔ. (Ekl. 9:11) Pʋyɔɔ lɛ, pɩtʋʋ fɛyɩ se pɩkɛɣnɩ lɔŋsɩnɖɛ se ɖɩwɛɛnɩ takayaɣ ŋga kawɩlɩɣ ɛzɩma ɖɩsɔɔlaa se palabɩ-ɖʋ kɔyɛ yɔ. Ye ŋŋsɩŋ tɔm ndʋ ŋma takayaɣ ŋga ka-taa yɔ, pɔzɩ ñɛ-ɛgbɛyɛ taa ɛzʋtʋyaa se pasɩnɩ-ŋ; mbʋ pʋyɔɔ yɔ sakɩyɛ taa lɛ, pasɩm tɔm ndʋ pɩwɛɛ se pama takayaɣ ŋga ka-taa yɔ camɩyɛ. Ɛlɛ kɔyɛ labʋ nʋmɔʋ taa lɛ, paakaɣ kpaɣʋ lɩmaɣza ño-lone taa. Ña-sʋʋtʋ pɩkɛnaa. (Gal. 6:4, 5) Ɛlɛ papɩzɩɣ pasɩnɩ-ŋ nɛ ŋnɩɩ lɩmaɣza wena ŋkpakɩɣ yɔ a-taa nɛ ŋma mbʋ ŋlɩzaa se ŋlakɩ yɔ takayaɣ ŋga ka-taa.

17. Tomnaɣ taa alaafɩya hɔɔlʋʋ taa lɛ, ɛzɩma ɖɩpɩzɩɣ nɛ ɖɩwɩlɩ se ɖɩkɛ ɛyaa mba panɩɣ tɔm taa yɔ?

¹⁷ Ðɛ-ɛhʋyɛ nɖɩ ɖɩkpaɣ Bibl nɛ ɖɩfalɩsɩna yɔ, nɖɩ sɩɣnɩnɩ-ɖʋ nɛ ɖɩkpakɩɣ lɩmaɣza wena atukuuni ɖo-tomnaɣ taa alaafɩya nɛ ɛzɩma ɖɩsɔɔlaa se palabɩ-ɖʋ kɔyɛ yɔ a-taa sakɩyɛ. (Tʋma 24:16; 1 Tim. 3:9) Alɩwaatʋ ndʋ ɖɩkpakɩɣ lɩmaɣza nɛ ɖiheyiɣ ɛyaa lalaa lɩmaɣza wena ɖɩkpaɣ yɔ a-tɔm yɔ, pɩwɛɣ ɖeu se ɖɩlabɩnɩ tʋmɩyɛ paɣtʋ kiɖe nɖɩ ɖɩwɛ Filiipi mba 4:5 taa yɔ. Ðɩtɔŋ se: «Iyele nɛ ɛyaa tɩŋa tɩlɩ se ɩkɛ mba panɩɣ tɔm taa yɔ.» Ye ɖɩkɛ ɛyaa mba panɩɣ tɔm taa yɔ, ɖɩɩkɩlɩɣ nɩɣzʋʋ ɖo-tomnaɣ taa alaafɩya yɔɔ kadadayaɣ nɛ ɖɩɩkaɣ ñɩɣʋ ɛyaa lalaa yɔɔ se pɛwɛɛnɩ lɩmaɣza wena ɖɩwɛna yɔ. Ðɩsɔɔlɩ ɖo-koobiya nɛ ɖɩñaŋ-wɛ, paa lɩmaɣza wena pakpakɩɣ yɔ awɛ ndɩ nɛ wena ɖɩkpakɩɣ yɔ.—Roma 14:10-12.

18. Ɛzɩma ɖɩpɩzɩɣ ɖɩwɩlɩ ɖɛ-ɛsɩmɩyɛ wezuu kʋjɔʋ yɔɔ?

¹⁸ Yehowa cɔlɔ wezuu hiɖe wɛɛ; pʋyɔɔ lɛ, ye ɖɩkandɩyɩɣ ɖe-wezuu yɔɔ nɛ ɖɩhaɣ-ɩ mbʋ ɖɩwɛna nɛ pɩkpaɖɩ ɖeu yɔ, ɖɩwɩlɩɣ-ɩ ɖɛ-ɛsɩmɩyɛ. (Natʋ 4:11) Lɛɛlɛɛyɔ lɛ, pɩpɔzʋʋ se ɖɩlʋbɩnɩ kʋdɔmɩŋ nɛ asɛyɩŋ. Ɛlɛ pɩtɩkɛ wezuu ŋgʋ ɖa-Lɩzɩyʋ kaasɔɔlaa se ɖɩcaɣ. Pɩkazɩ pazɩ lɛ, ɛkaɣ-ɖʋ haʋ wezuu maatɛŋ. Nɛ pʋbʋ taa lɛ wɩzasɩ nɛ sɩm paakaɣ tasʋʋ wɛʋ. (Natʋ 21:4) Pʋcɔ nɛ pɩtalɩ mbʋ lɛ, ɖɩsɔɔlɩ kpem se ɖɩwɛɛ wezuu nɛ ɖɩsɛɛ ɖa-Caa kʋsɔɔlʋ Yehowa weyi ɛwɛ ɛsɔdaa yɔ!