NABƲYƲ taa, Bibl mayaa ɖaɣnaɣ cuuzuu tɔm natʋyʋ taa Bibl taa piye piye. Iyele nɛ ɖɩna lɩmaɣza 3 wena a-yɔɔ pʋtɔma Bibl mayaa lakaɣ mbʋ yɔ; lɩmaɣza ana yɔ:

Alɩwaatʋ ndʋ pama tɔm ndʋ yɔ. Caanaʋ taa Izrayɛɛlɩ alɩwaatʋ taa, ɛyaa sakɩyɛ taawɛɛnɩ Moyizi Paɣtʋ takayɩsɩ. Sakɩyɛ taa lɛ, alɩwaatʋ ndʋ samaɣ kpeɣliɣ Ɛsɔ sɛtʋ kɩɖanɖʋʋ tɛɛ yɔ, pakalɩɣ paɣtʋ ndʋ nɛ pewelisiɣ. (Wp. 31:​10-12) Alɩwaatʋ ndʋ ɛyaa sɩŋɩɣ samaɣ sɔsɔɔ taa nɛ pewelisiɣ tɔm ñɩɣtʋ sakɩyɛ yɔ, pɩtʋʋ fɛyɩ se wondu ndɩ ndɩ kɛzaɣ pa-lɩmaɣza. (Neh. 8:​2, 3, 7) Pʋyɔɔ alɩwaatʋ ndʋ paɖaɣnɩɣ cuuzuu tɔm natʋyʋ taa yɔ, pɩwɛɣ samaɣ kɛlɛʋ se kɔtɔzʋʋ masɩ taa tɔm yɔɔ nɛ kalakɩnɩ-tʋ tʋmɩyɛ. Pɩtʋʋ fɛyɩ se alɩwaatʋ ndʋ pocuuzaɣ tɔm pee naayɛ taa yɔ, pɩsɩɣaɣnɩ ɛyaa se pɔtɔzɩ tɔm kɩcɛyɩtʋ natʋyʋ yɔɔ, ɛzɩ Ɛsɔ paɣtʋ nɛ ɛ-tɔm hʋʋ paɣtʋ mbʋ yɔ.—Lev. 18:​4-22; Wp. 5:1.

Ɛzɩma pama tɔm ndʋ yɔ. Ye pakpaɣ Bibl taa tɔm 100 yɔ, tɩ-taa 10 kɛ hendu, ɛzɩ Keɣsi takayɩsɩ, Hendu taa Hendu nɛ Kʋñɔwiye mbʋ yɔ. Nabʋyʋ taa, paɖaɣnɩɣ cuuzuu tɔm pee naayɛ hendu taa nɛ pɩñɩkɩɣ niye hendu taa lɩmaɣzɩyɛ sɔsɔyɛ yɔɔ nɛ pɩsɩɣnɩ mba pewelisiɣ hendu ndʋ yɔ se pɔɖɔkɩ tɩ-taa tɔm pa-ñʋʋ taa. Ðɩna tɔm ndʋ tɩwɛ Keɣa 115:​9-11 taa yɔ. Tɩtɔŋ se: «Hayɩ Izrayɛɛlɩ, taa Yehowa liu—Ɛkɛ pa-sɩnɩyʋ nɛ pa-kpayʋʋ. Hayɩ Aarɔɔnɩ ɖɩɣa, taa Yehowa liu—Ɛkɛ pa-sɩnɩyʋ nɛ pa-kpayʋʋ. Mɩ mba iseɣ Yehowa sɔɔndʋ yɔ, ɩtaa Yehowa liu—Ɛkɛ pa-sɩnɩyʋ nɛ pa-kpayʋʋ.» Pɩtʋʋ fɛyɩ se ɛzɩma pocuuzi tɔm ndʋ tɩ-taa yɔ, pɩsɩɣaɣnɩ hendu teyaa se pɔtɔzʋʋ lɩmaɣza kɩcɛya ana a-yɔɔ.

Mbʋ pʋyɔɔ pama tɔm ndʋ yɔ. Nabʋyʋ taa, Bibl mayaa ɖaɣnaɣ cuuzuu tɔm loyisi nzɩ sɩ-tɔm cɛyaa yɔ sɩ-taa. Ðɩna kɩɖaʋ nakʋyʋ. Alɩwaatʋ ndʋ Yehowa kaaɖʋ Izrayɛɛlɩ mba paɣtʋ se pataatɔɔ calɩm yɔ, eyeba nɛ Moyizi cuuzi lɩmaɣzɩyɛ nɖɩ ɖɩ-yɔɔ ɛɖʋ paɣtʋ ndʋ yɔ ɖɩ-taa tam sakɩyɛ. Yehowa ñɩnaɣ se ɛñɩɣ niye tɔm tʋnɛ tɩ-yɔɔ: Paa tomnaɣ ŋga lɛ, ke-wezuu wɛ ka-calɩm taa; pʋ-tɔbʋʋ se calɩm sɩŋnɩ wezuu. (Lev. 17:​11, 14) Pʋwayɩ, apostoloowaa nɛ Yeruzalɛm ɛzʋtʋyaa pɔyɔɔdaɣ mbʋ pɩwɛɛ se Krɩstʋ mba ikizi nɛ pɔ-tɔm kɛdɩnɩ Ɛsɔ yɔ pɩ-tɔm lɛ, paɖaɣnɩ ñɩɣʋ niye se pɩcɛyaa se pɔsɔ calɩm.—Tʋma 15:​20, 29.

Paa paɖaɣnaɣ cuuzuu tɔm natʋyʋ taa Bibl taa yɔ, pɩtɩwɩlɩ se Yehowa sɔɔlaa se paa ɛzɩmtaa lɛ, ɖicuuzuu Bibl taa tɔm natʋyʋ taa. Yesu yɔɔdaa se: «Alɩwaatʋ ndʋ ŋtɩmɩɣ yɔ, taayɔɔdʋʋ tɔm kʋɖʋmtʋ tam.» (Mat. 6:7) Pʋwayɩ lɛ, ɛyɔɔdɩ mbʋ mbʋ ɖɩpɩzɩɣ nɛ ɖɩpɔzɩ ɖa-adɩma taa nɛ pɩlakɩ nɔɔ kʋɖʋmaɣ nɛ Ɛsɔ sɔɔlɩm yɔ. (Mat. 6:​9-13) Ye mbʋ, paa ɖiicuuzuu tɔm kʋɖʋmtʋ taa ɖa-adɩma taa yɔ, ɖɩpɩzɩɣ nɛ ɖɩɖaɣnɩ pɩsʋʋ lɩmaɣza kʋɖʋma yɔɔ tam sakɩyɛ.—Mat. 7:​7-11.

Ye mbʋ, lɩmaɣza kɩbana naayɛ yɔɔ pocuuzi tɔm pee naayɛ nɛ tɔm loyisi nasɩyɩ taa Bibl taa. Pɩkɛ nʋmɔŋ sakɩyɛ weyi ɩ-yɔɔ ɖa-Wɩlɩyʋ Sɔsɔ tɩŋɩɣna nɛ ɛwɩlɩɣ-ɖʋ tɔm se pɩwazɩ-ɖʋ yɔ ɩ-taa nakʋyʋ.—Iza. 48:​17, 18.