1. Ha kɩɖaʋ ŋgʋ kɩwɩlɩɣ mbʋ pʋyɔɔ pɩpɔzʋʋ se Yehowa eɖiyi-ɖʋ yɔ.

 KPAƔ se ŋlebi laʋ nakʋyʋ tɛɛ. Ŋwɛ kaɖɛ taa siŋŋ mbʋ pʋyɔɔ yɔ tɛtɛgbɩna, tɛtɛ wondu ndɩ ndɩ nɛ sɔɔ cɔ-ŋ nɛ pɩta. Ŋpɩzɩɣ nɛ ŋtɔlɩ ɖɔɖɔ pɔʋ nakʋyʋ taa. Ɛlɛ ye ɛyʋ weyi ɛsɩm lone nɖɩ camɩyɛ yɔ, ɛwɛ ñɔ-cɔlɔ nɛ ɛwɩlɩɣ-ŋ nʋmɔʋ nɛ ɛsɩɣnɩ-ŋ se ŋna ɛzɩma ŋla nɛ kaɖɛ naɖɩyɛ ɛtaatalɩ-ŋ yɔ, ña-taa lakɩ leleŋ siŋŋ. Ɛjaɖɛ ɖɩnɛ ɖɩwɛ ɛzɩ laʋ ŋgʋ yɔ. Kala sakɩyɛ wɛ ɖɩ-taa nɛ apɩzɩɣ nɛ acamɩ ɖa nɛ Yehowa ɖa-taabalɩyɛ. Ɛlɛ ɖɩwɛnɩ Ðiyiyu kɩbanʋ nɔɔyʋ, ɛnʋ lɛ Yehowa. Ɛlɩzɩɣ-ɖʋ kala taa nɛ eɖiyiɣ-ɖʋ nɛ ewokini ɛjaɖɛ kɩfaɖɛ taa.

2. Ɛzɩma Yehowa ɖiyiɣ-ɖʋ?

² Ɛzɩma Yehowa ɖiyiɣ-ɖʋ? Kajalaɣ lɛ ɛtɩŋɩɣnɩ ɛ-Tɔm Bibl yɔɔ. Pɩtasɩ lɛ, ɛtɩŋɩɣnɩ ɛyaa yɔɔ nɛ eɖiyiɣ-ɖʋ. Kɩɖaʋ nakʋyʋ yɔ: Ɛtɩŋɩɣnɩ «yom siɣsiɣ tʋ nɛ lɔŋsɩnɖʋ» yɔɔ nɛ ɛhaɣ-ɖʋ fezuu taa tɔɔnaɣ ŋga kasɩɣnɩ-ɖʋ se ɖɩkpaɣ lɩmaɣza kɩbana yɔ. (Mat. 24:45) Yehowa tɩŋɩɣnɩ ɖɔɖɔ abalaa mba pɛwɛ niye yɔ pɔ-yɔɔ nɛ eɖiyiɣ-ɖʋ. Egeetiye yɔɔ cɔnɩyaa nɛ ɛgbɛyɛ taa ɛzʋtʋyaa pakpazɩɣ-ɖʋ ɖoŋ nɛ patasɩɣ-ɖʋ lɔŋ weyi ɛsɩɣnɩ-ɖʋ se ɖɩlʋbɩnɩ kala wena ɖɩkatɩɣ yɔ. Ðɩwɛnɩ ɛsɩmɩyɛ siŋŋ se Yehowa ɖiyiɣ-ɖʋ camɩyɛ mbʋ kɛdɛzaɣ kɩyakɩŋ kaɖɛ ñɩŋ ɛnɛ ɩ-taa. Pɩsɩɣnɩ-ɖʋ se ɖiwolo pɩ-yɔɔ nɛ ɖɩkɛ Yehowa taabalaa nɛ pɩsa nɛ ɖɩnɩɩ wezuu leleŋ sɔnɔ nɛ tam tam.

3. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

³ Ɛlɛ nabʋyʋ taa, pɩpɩzɩɣ nɛ pɩlabɩ-ɖʋ kaɖɛ se ɖɩɖɔ Yehowa lɔŋ tasʋʋ yɔɔ, kɔzɩ kɔzɩ alɩwaatʋ ndʋ ɛtɩŋɩɣnɩ ɛyaa mantɩtalɩ pilimwaa yɔɔ nɛ ɛtasɩɣ-ɖʋ lɔŋ ɛnɩ yɔ. Ɛbɛ yɔɔ? Mbʋ pʋyɔɔ yɔ lɔŋ tasʋʋ mbʋ, pɩpɩzɩɣ nɛ pɩwɛɛ ndɩ nɛ mbʋ ɖɩsɔɔlaa yɔ. Yaa  pɩpɩzɩɣ nɛ pɩlabɩ-ɖʋ ɛzɩ lɔŋ tasʋʋ mbʋ pɩtɩmʋna yɔ nɛ ɖɩkɔ tɔm ñʋʋ se pɩtɩlɩɩnɩ Yehowa cɔlɔ. Alɩwaatʋ ndʋ tɩ-taa pɩpɔzʋʋ kpem se ɖa-taa ɛtɛ se Yehowa ɖiyiɣni ɛ-samaɣ nɛ ɖa-taa tɛ ɖɔɖɔ se ye ɖɩɖɔŋ ɛ-lɔŋ tasʋʋ yɔɔ yɔ, pɩwazɩɣ-ɖʋ paa ɛzɩmtaa. Pɩsa nɛ ɖa-taa tɛmnɩ tɔm ndʋ nɛ pɩkɩlɩ lɛ, tɔm ñʋʋ kʋnɛ kɩkaɣ-ɖʋ sɩnʋʋ nɛ ɖɩna (1) ɛzɩma Yehowa ɖiyi ɛ-samaɣ Bibl alɩwaatʋ taa yɔ, (2) ɛzɩma ɛwɛɛ nɛ eɖiyiɣ-ɖʋ sɔnɔ yɔ, nɛ (3) ɛzɩma pɩkaɣ-ɖʋ wazʋʋ ye ɖɩɖɔŋ ɛ-lɔŋ tasʋʋ yɔɔ paa ɛzɩmtaa yɔ.

ƐZƖMA YEHOWA KAAÐIYI IZRAYƐƐLƖ ƐJAÐƐ?

4-5. Ɛzɩma Yehowa wɩlaa se ɛnʋ kaawɛna nɛ ɛtɩŋɩɣnɩ Moyizi yɔɔ nɛ eɖiyiɣ Izrayɛɛlɩ mba? (Cɔnɩ takayaɣ huyuu yɔɔ kɩlɛmʋʋ.)

⁴ Yehowa kaalɩzɩ Moyizi se eɖiyi Izrayɛɛlɩ mba nɛ ɛlɩzɩ-wɛ Ejipiti ɛjaɖɛ taa. Nɛ eeyeba nɛ Izrayɛɛlɩ mba na kpayɩ kpayɩ se ɛnʋ wɛna nɛ ɛtɩŋɩɣnɩ Moyizi yɔɔ nɛ eɖiyiɣ-wɛ. Eeyeba nɛ mɩndʋ tilimiye naɖɩyɛ wɩlɩɣ-wɛ nʋmɔʋ wɩsɩ taa; nɛ ɖoo taa lɛ, miŋ tilimiye wɩlɩɣ-wɛ nʋmɔʋ. (Ejl. 13:21) Moyizi tɩŋ tilimiye nɖɩ, nɛ ɖɩwɩlɩ ɛ nɛ Izrayɛɛlɩ mba nʋmɔʋ nɛ pɔkɔɔ patalɩ Teŋgu Kɩsɛɛmʋʋ nɔɔ. Sɔɔndʋ kaakpa samaɣ siŋŋ alɩwaatʋ ndʋ Ejipiti mba kaapaɣzɩ pa-wayɩ ɖʋʋ yɔ, mbʋ pʋyɔɔ yɔ pamaɣzaɣ se Ejipiti mba kaɣ-wɛ kʋʋ. Pamaɣzaɣ se piyiɣdi Moyizi kiyiɣduu nɛ ewoni-wɛ Teŋgu Kɩsɛɛmʋʋ nɔɔ. Ɛlɛ pitaayiɣdi-i kiyiɣduu. Yehowa maɣmaɣ tɩŋnɩnɩ Moyizi yɔɔ nɛ eɖiyi ɛ-samaɣ nɛ ewoni-kɛ peeɖe. (Ejl. 14:2) Peeɖe Ɛsɔ tɩŋnɩ nʋmɔʋ ŋgʋ kɩwɛ piti kpem yɔ kɩ-yɔɔ nɛ ɛya pa-ñʋʋ.—Ejl. 14:​26-28.

⁵ Pʋwayɩ, Moyizi wobi pɩ-yɔɔ nɛ ɛtɩŋnɩ mɩndʋ tilimiye yɔɔ nɛ eɖiyi Ɛsɔ samaɣ kañɩmbusuu taa pɩnzɩ 40. a Alɩwaatʋ natʋyʋ, Yehowa kaayeba nɛ tilimiye nɖɩ, ɖɩwɛɛ Moyizi kizinziku ñʋʋ yɔɔ, nɛ Izrayɛɛlɩ mba tɩŋa pɩzaɣ se pana-ɖɩ. (Ejl. 33:​7, 9, 10) Yehowa yɔɔdaɣnɩ Moyizi nɛ tilimiye nɖɩ ɖɩ-taa, nɛ Moyizi ñeheyiɣ samaɣ tɔm ndʋ Yehowa heyi-i yɔ. (Keɣ. 99:7) Izrayɛɛlɩ mba kaana kpayɩ kpayɩ se Yehowa kaawɛna nɛ ɛtɩŋɩɣnɩ Moyizi yɔɔ nɛ eɖiyiɣ-wɛ.

6. Ɛzɩma Izrayɛɛlɩ mba laba alɩwaatʋ ndʋ Yehowa ɖiyaɣ-wɛ yɔ? (Kɩgalʋʋ 14:​2, 10, 11)

⁶ Pɩlabɩ pʋtɔdɩyɛ se Izrayɛɛlɩ mba taa hɔɔlʋʋ sɔsɔʋ taatisiɣ se Yehowa kaawɛna nɛ ɛtɩŋɩɣnɩ Moyizi yɔɔ nɛ eɖiyiɣ-wɛ. (Kalɩ Kɩgalʋʋ 14:​2, 10, 11.) Pekizi tam sakɩyɛ se pɩtɩkɛ Moyizi yɔɔ Yehowa tɩŋɩɣna nɛ eɖiyiɣ-wɛ. Mbʋ pɩlɩ pɩ-taa yɔ lɛ se Yehowa tɩha nʋmɔʋ Izrayɛɛlɩ mba kpaɖʋʋ ŋgʋ se kɩsʋʋ Lidaʋ Tɛtʋ taa.—Kɩg. 14:30.

7. Ha mba paaɖɔm Yehowa lɔŋ tasʋʋ yɔɔ yɔ pa-kɩɖaŋ. (Kɩgalʋʋ 14:24) (Cɔnɩ ɖɔɖɔ kɩlɛmʋʋ.)

⁷ Paa mbʋ yɔ, Izrayɛɛlɩ mba nabɛyɛ ɖɔm Yehowa lɔŋ tasʋʋ yɔɔ. Yehowa yɔɔdaa se: «Kalɛɛbɩ [wɛɛ] . . . nɛ ɛtɩŋɩɣ-m nɛ ɛ-laŋɩyɛ pilim.» (Kalɩ Kɩgalʋʋ 14:24.) Yehowa wazɩ Kalɛɛbɩ nɛ ɛha-ɩ waɖɛ se ɛlɩzɩ Kanaŋ tɛtʋ taa ɖenɖe ɛsɔɔlaa se ɛcakɩ yɔ. (Yoz. 14:​12-14) Izrayɛɛlɩ ñɩma mba Yehowa ha-wɛ nʋmɔʋ nɛ pasʋʋ Lidaʋ Tɛtʋ taa yɔ, pɔɖɔm Yehowa lɔŋ tasʋʋ yɔɔ nɛ paha ɖɔɖɔ kɩɖaʋ kɩbaŋʋ. Alɩwaatʋ ndʋ Yozuwee lɛɣzɩ Moyizi lone taa nɛ eɖiyiɣ Izrayɛɛlɩ mba yɔ, «pañamɩ-ɩ siŋŋ e-wezuu caɣʋ kɩyakɩŋ kpeekpe.» (Yoz. 4:14) Piyeba nɛ Yehowa wazɩ-wɛ nɛ ɛcɛlɩ-wɛ tɛtʋ ndʋ ɛɛlabɩ-wɛ tamaɣ se ɛcɛlɩɣ-wɛ yɔ.—Yoz. 21:​43, 44.

8. Yɔɔdɩ ɛzɩma Yehowa kaaɖiyi ɛ-samaɣ awiya alɩwaatʋ taa yɔ pɩ-tɔm. (Cɔnɩ ɖɔɖɔ kɩlɛmʋʋ.)

⁸ Pɩnzɩ sakɩyɛ wayɩ, Yehowa lɩzɩ tɔm hʋyaa se peɖiyi ɛ-samaɣ. Pʋwayɩ, awiya alɩwaatʋ taa, Yehowa lɩzɩ nayaa se peɖiyi ɛ-samaɣ. Awiya wena aawɛ siɣsiɣ yɔ, aɖɔm nayaa lɔŋ tasʋʋ yɔɔ. Kɩɖaŋ nɩɩyɩ yɔ: Wiyaʋ Daviid luzi ɛ-tɩ  nɛ ɛmʋ nayʋ Naataanɩ lɔŋ sɩɣzʋʋ. (2 Sam. 12:​7, 13; 1 Kro. 17:​3, 4) Wiyaʋ Yozafaatɩ ta nayʋ Yahaziyɛɛlɩ liu nɛ ɛɖɔ ɛ-lɔŋ tasʋʋ yɔɔ nɛ eseɣti Yuuda samaɣ se ‘kɛwɛɛnɩ tisuu Ɛsɔ tɛ nayaa yɔɔ.’ (2 Kro. 20:​14, 15, 20) Alɩwaatʋ ndʋ Wiyaʋ Ezekiyaasɩ kaawɛ nɩɣzɛ taa yɔ, ɛpɔzɩ nayʋ Izaayii se ɛsɩnɩ-ɩ. (Iza. 37:​1-6) Alɩwaatʋ ndʋ payɩ awiya ɖɔm Yehowa lɔŋ tasʋʋ yɔɔ yɔ, Yehowa wazɩ-yɛ nɛ ɛkandɩyɩ ɛ-samaɣ yɔɔ. (2 Kro. 20:​29, 30; 32:22) Pɩɩwɛɛ se paa weyi ɛna kpayɩ kpayɩ se Yehowa kaawɛɛ nɛ ɛtɩŋɩɣnɩ ɛ-nayaa yɔɔ nɛ eɖiyiɣ ɛ-samaɣ. Ɛlɛ Izrayɛɛlɩ awiya hɔɔlʋʋ sɔsɔʋ nɛ samaɣ taa mba sakɩyɛ taawelisini Yehowa nayaa.—Yer. 35:​12-15.

ƐZƖMA YEHOWA ÐIYI KAJALAƔ PƖNZƖ MƖNƲƲ TAA KRƖSTƲ MBA?

9. Mba yɔɔ Yehowa kaatɩŋnaa nɛ eɖiyi Krɩstʋ mba kajalaɣ pɩnzɩ mɩnʋʋ taa? (Cɔnɩ ɖɔɖɔ kɩlɛmʋʋ.)

⁹ Kajalaɣ pɩnzɩ mɩnʋʋ taa, Yehowa kaayeba nɛ Krɩstʋ ɛgbɛyɛ ñɔ. Ɛzɩma eɖiyi kajalaɣ pɩnzɩ mɩnʋʋ taa Krɩstʋ ñɩma mba? Ɛlɩzɩ Yesu se ɛkɛ ɛgbɛyɛ ñʋʋdʋ. (Efɛz. 5:23) Ɛlɛ pɩtɩkɛ Yesu maɣmaɣ heyaɣni paa tɔmkpɛlɩkɩyʋ weyi mbʋ pɩwɛɛ se ɛla yɔ. Ɛtɩŋnɩ apostoloowaa nɛ Yeruzalɛm ɛzʋtʋyaa yɔɔ nɛ eɖiyi ɛ-tɔmkpɛlɩkɩyaa. (Tʋma 15:​1, 2) Pɩtasɩ lɛ, paalɩzɩ ɛgbɛyɛ taa ɛzʋtʋyaa se peɖiyi agbaa.—1 Tes. 5:12; Tiiti 1:5.

10. (a) Ɛzɩma kajalaɣ pɩnzɩ mɩnʋʋ taa Krɩstʋ mba sakɩyɛ kpakaɣ lɔŋ weyi patasaɣ-wɛ yɔ? (Tʋma Labʋ 15:​30, 31) (b) Bibl alɩwaatʋ taa, ɛbɛ yɔɔ nabɛyɛ taaɖɔŋ mba Yehowa lɩzaa se peɖiyi-wɛ yɔ pɔ-lɔŋ tasʋʋ yɔɔ? (Kalɩ aɖakaɣ « Ɛbɛ yɔɔ nabɛyɛ iitisiɣ se Yehowa tɩŋɩɣnɩ ɛyaa yɔɔ nɛ eɖiyiɣ ɛ-samaɣ?»)

¹⁰ Kajalaɣ pɩnzɩ mɩnʋʋ taa Krɩstʋ mba tisaa nɛ pɔɖɔ apostoloowaa lɔŋ tasʋʋ yɔɔ? Pa-taa sakɩyɛ taa kaalabɩ leleŋ nɛ lɔŋ weyi paatasɩ-wɛ yɔ nɛ petisi faaa nɛ pɔɖɔ ɩ-yɔɔ. Halɩ ‘pa-taa labɩ leleŋ nɛ ɛzɩma’ lɔŋ tasʋʋ mbʋ ‘pɩkpazɩ-wɛ ɖoŋ yɔ.’ (Kalɩ Tʋma Labʋ 15:​30, 31.) Ɛlɛ ɛzɩma Yehowa wɛɛ nɛ eɖiyiɣ ɛ-samaɣ ɖa-alɩwaatʋ tʋnɛ tɩ-taa?

ƐZƖMA YEHOWA ÐIYIƔ-ÐƲ SƆNƆ?

11. Ha kɩɖaʋ ŋgʋ kɩwɩlɩɣ ɛzɩma Yehowa ɖiyaɣ mba pɛɖɛɣaɣ ɛ-samaɣ nɔɔ alɩwaatʋ ndʋ tɩɖɛwa nɛ pitileɖita yɔ tɩ-taa yɔ.

¹¹ Yehowa wobi pɩ-yɔɔ nɛ eɖiyiɣ ɛ-samaɣ sɔnɔ. Ɛwɛɛ nɛ ɛtɩŋɩɣnɩ Bibl nɛ ɛ-Pɩyalʋ, weyi ɛkɛ ɛgbɛyɛ ñʋʋdʋ yɔ ɛ-yɔɔ nɛ eɖiyiɣ-kɛ. Nabʋyʋ wɛɛ nɛ pɩwɩlɩɣ-ɖʋ kpayɩ kpayɩ se Ɛsɔ wɛɛ nɛ ɛtɩŋɩɣnɩ ɛyaa yɔɔ nɛ eɖiyiɣ-ɖʋ sɔnɔ? Ɛɛɛ.  Maɣzɩ mbʋ pɩlabɩ pɩnaɣ 1870 wayɩ yɔ pɩ-yɔɔ nɛ ŋna. Charles Taze Russell nɛ ɛ-taabalaa paapaɣzɩ ɖiɣzinuu se pɩnaɣ 1914 kaɣ kɛnʋʋ pɩnaɣ ŋga kɔ-tɔm cɛyɩ siŋŋ Ɛsɔ Kewiyaɣ ɖʋtʋ taa yɔ. (Dan. 4:​25, 26) Palɩ tɔm ndʋ tɩ-yɔɔ, mbʋ pʋyɔɔ yɔ pañɩnɩ Bibl taa; nɛ paawɛnɩ tisuu se pakaɣ naʋ ɛzɩma kɩ-taa natʋ tɔm kaɣ labʋ yɔ. Alɩwaatʋ ndʋ pañɩnaɣ tɔm Bibl taa yɔ, ɛzɩ Yehowa ɖiyi-wɛ? Pɩtʋʋ fɛyɩ se eɖiyi-wɛ. Mbʋ pɩlabɩ ɛjaɖɛ yɔɔ pɩnaɣ 1914 taa yɔ, pɩwɩlaa se Ɛsɔ Kewiyaɣ paɣzɩ ka-tʋmɩyɛ. Pɩnaɣ ŋga Caama you kajalaɣ ñɩŋgʋ paɣzaa, nɛ kʋdɔmɩŋ, tɛtʋ ñamsʋʋ, nɛ ñɔɔsɩ kaakpa ɖoŋ ɖɔɖɔ. (Luka 21:​10, 11) Toovenim taa lɛ, Yehowa kaawɛɛ nɛ ɛtɩŋɩɣnɩ Bibl kpɛlɩkɩyaa siɣsiɣ tɩnaa mba pɔ-yɔɔ nɛ ɛsɩɣnɩ ɛ-samaɣ.

12-13. Ðʋtʋ ndʋ koobiya mba pɛɖɛɣaɣ Ɛsɔ samaɣ nɔɔ yɔ paalabɩ Caama you naalɛ ñɩŋgʋ alɩwaatʋ taa se tɔm susuu tʋmɩyɛ ɛɖɛɛnɩ ɛsɩndaa?

¹² Iyele nɛ ɖɩna ɖɔɖɔ mbʋ pɩlabɩ Caama you naalɛ ñɩŋgʋ alɩwaatʋ taa yɔ. Koobiya mba pɛɖɛɣaɣ ɛgbɛyɛ nɔɔ nɛ pɛwɛ ɖa-tʋmɩyɛ ɖɩlaɖɛ sɔsɔɖɛ taa yɔ, patazɩ Natʋ 17:8 taa nɛ pɩtɛ lɛ, peɖiɣzina se pɩtɩkɛ you ŋgʋ kiyekaɣna se Armaagedɔɔ you ɛpaɣzɩ. Ɛlɛ paaɖiɣzinaa se laŋhɛzɩyɛ alɩwaatʋ natʋyʋ kaɣ kɔm you ŋgʋ kɩ-wayɩ nɛ pɩha nʋmɔʋ nɛ posusi ɛyaa sakɩyɛ tɔm nɛ pɩkɩlɩ. Koobiya mba pɛɖɛɣaɣ nɔɔ yɔ, patʋlɩ Galaadɩ sukuli se pafalɩsɩ Ɛsɔtɔm tiyiyaa nɛ posusi tɔm nɛ pawɩlɩ tɔm tɛtʋ kpeekpe yɔɔ, paa pɩɩwɛ kiɖe tɛɛ ɛzɩ pɩtaakɛ lɩmaɣzɩyɛ kɩbanɖɛ yɔ. Paatiyini Ɛsɔtɔm tiyiyaa hɔɔlɩŋ ndɩ ndɩ taa, halɩ pɩkpɛndɩnɩ you alɩwaatʋ taa. Pɩtasɩ lɛ, yom siɣsiɣ tʋ labɩ ɖʋtʋ nɛ palɩzɩ sukuli nakʋyʋ b se pafalɩsɩ ɛgbɛyɛ taa mba tɩŋa nɛ papɩsɩ tɔm susuyaa nɛ tɔm wɩlɩyaa kɩbama nɛ pɩkɩlɩ. Nʋmɔŋ ɛnɩ ɩ-yɔɔ patɩŋnaa nɛ pɔñɔɔzɩ Ɛsɔ samaɣ se kala tɔm susuu tʋmɩyɛ nɖɩ ɖɩwɛnɩ ɛsɩndaa yɔ.

¹³ Sɔnɔ, ɖɩpɩzɩɣ nɛ ɖɩna kpayɩ kpayɩ se Yehowa kaawɛna nɛ eɖiyiɣ ɛ-samaɣ kaɖɛ alɩwaatʋ ndʋ tɩ-taa. Kpaɣnɩ Caama you naalɛ ñɩŋgʋ wayɩ, Yehowa sɛyaa hiɣ waɖɛ nɛ posusi tɔm laŋhɛzɩyɛ taa ajɛɛ sakɩyɛ taa. Piyeba nɛ ɛyaa sakɩyɛ tɩlɩ Yehowa nɛ tɔm susuu tʋmɩyɛ wɛɛ nɛ ɖɩɖɛɣnɩ ɛsɩndaa tɛtʋ kpeekpe yɔɔ.

14. Ɛbɛ yɔɔ ɖɩpɩzɩɣ nɛ ɖɩtaa liu lɔŋ weyi Yehowa ɛgbɛyɛ nɛ ɛzʋtʋyaa patasɩɣ-ɖʋ yɔ? (Natʋ 2:1) (Cɔnɩ ɖɔɖɔ kɩlɛmʋʋ.)

 ¹⁴ Sɔnɔ, Nɔɔɖɛyaa ɛgbɛyɛ taa mba woki pɩ-yɔɔ nɛ peyeki se Krɩstʋ eɖiyi-wɛ. Pɔsɔɔlaa se lɔŋ weyi patasɩɣ koobiya yɔ, ɩla nɔɔ kʋɖʋmaɣ nɛ Krɩstʋ lɩmaɣza. Nɛ patɩŋɩɣnɩ egeetiye yɔɔ cɔnɩyaa nɛ ɛgbɛyɛ taa ɛzʋtʋyaa yɔɔ nɛ patasɩɣ agbaa lɔŋ ɛnɩ. c Ɛzʋtʋyaa patam numwaa, pɩkpɛndɩnɩ ɛzʋtʋyaa lalaa payɩ, pɛwɛ Krɩstʋ «nesi kɩbanzɩ taa.» (Kalɩ Natʋ 2:1.) Ɛlɛ ɛzʋtʋyaa mba pa-tɩŋa patɩtalɩ pilim nɛ piyiɣdiɣ-wɛ. Piiyiɣdi Moyizi nɛ Yozuwee alɩwaatʋ natʋyʋ, nɛ piiyiɣdi ɖɔɖɔ apostoloowaa. (Kɩg. 20:12; Yoz. 9:​14, 15; Roma 3:23) Paa mbʋ yɔ, ɖɩpɩzɩɣ nɛ ɖɩna kpayɩ kpayɩ se Krɩstʋ wɛɛ nɛ eɖiyiɣ yom siɣsiɣ tʋ nɛ ɛgbɛyɛ taa ɛzʋtʋyaa camɩyɛ, nɛ ɛkaɣ wobu pɩ-yɔɔ nɛ eɖiyiɣ-wɛ mbʋ «kɩyakɩŋ tɩŋa nɛ pɩkɔɔ pɩtalɩ ɛjaɖɛ tɛm alɩwaatʋ taa.» (Mat. 28:20) Ye mbʋ, ɖɩpɩzɩɣ nɛ ɖɩtaa liu kiya lɔŋ weyi Yesu tasɩɣ-ɖʋ yɔ, ɛtɩŋɩɣnɩ mba ɛlɩzaa se pɛɖɛɛ-ɖʋ nɔɔ yɔ pɔ-yɔɔ nɛ ɛtasɩɣ-ɖʋ lɔŋ ɛnɩ.

YE ÐIWOBI PƖ-YƆƆ NƐ ÐƖÐƆŊ YEHOWA LƆŊ TASƲƲ YƆƆ YƆ, PƖWAZƖƔ-ÐƲ

15-16. Lɔŋ weyi ŋkpɛlɩkɩɣ mba pɔɖɔm Yehowa lɔŋ tasʋʋ yɔɔ yɔ pa-kɩɖaŋ taa?

¹⁵ Ye ɖiwobi pɩ-yɔɔ nɛ ɖɩɖɔŋ Yehowa lɔŋ tasʋʋ yɔɔ yɔ, ɖihikiɣ wazasɩ halɩ pɩkpɛndɩnɩ lɛɛlɛɛyɔ. Andy nɛ Robyn pɔɖɔm lɔŋ weyi yom siɣsiɣ tʋ tasaa se ɖɩcaɣ wezuu kɛlɛʋ yɔ ɩ-yɔɔ. (Mat. 6:22) Mbʋ pɩlɩ pɩ-taa yɔ lɛ se papɩzaa nɛ paha pa-tɩ nɛ pala tʋmɩyɛ Ɛsɔ sɛtʋ kuduyuŋ maʋ tʋmɩyɛ taa. Robyn yɔɔdaa se: «Nabʋyʋ taa, ɖɩsʋwaɣ kuduyuŋ weyi ɩtɩwalɩ yɔ ɩ-tɛɛ, nɛ ɖoŋ ɖoŋ lɛ ɖɩtaawɛɛnɩ tɔɔnaɣ ɖɩlaɖɛ. Nɛ pɩɩwɛɛ se mɛnpɛdɩ wondu sakɩyɛ ndʋ malakaɣnɩ tʋmɩyɛ fotonaa lɩzʋʋ taa yɔ, ŋgʋ maasɔɔlɩ tʋmɩyɛ nɖɩ. Alɩwaatʋ ndʋ mɛnpɛdɩ wondu ndʋ yɔ, mewiwa. Ɛlɛ ɛzɩ Abraham halʋ Saara yɔ, maatɛm man-taa se maakpiɖiɣ mbʋ melesaa yɔ pɩ-yɔɔ, ɛlɛ man-taa lakɩ leleŋ nɛ mbʋ manpɩzɩɣ nɛ mala Yehowa lɛɛlɛɛyɔ yɔ.» (Ebr. 11:15) Wazasɩ nzɩ Andy nɛ Robyn pehiɣaa? Robyn yɔɔdaa se: «Ða-taa wɛ leleŋ pɩdɩɩfɛyɩ, mbʋ pʋyɔɔ yɔ ɖɩnawa se ɖɩwɛɛ nɛ ɖɩhaɣ Yehowa mbʋ payɩ ɖɩwɛna yɔ. Alɩwaatʋ ndʋ ɖɩlakɩ teokrasɩ tʋma yɔ, pɩsɩɣnɩ-ɖʋ nɛ ɖɩnaɣ ɛzɩma wezuu caɣʋ kaɣ wɛʋ ɛjaɖɛ kɩfaɖɛ taa yɔ.» Andy ɖɔɖɔ yɔɔdaa se: «Ða-taa wɛ leleŋ, mbʋ pʋyɔɔ yɔ ɖɩkpakɩɣ ɖa-alɩwaatʋ nɛ ɖo-ɖoŋ kpeekpe nɛ ɖɩɖʋʋnɩ nesi Kewiyaɣ tʋma.»

¹⁶ Ye ɖiwobi pɩ-yɔɔ nɛ ɖɩɖɔŋ Yehowa lɔŋ tasʋʋ yɔɔ yɔ, wazasɩ lɛɛsɩ nzɩ ɖihikiɣ? Marcia tɛm Liisee sukuli lɛ, ɛɛsɔɔlaa se ɛɖɔ lɔŋ weyi paatasɩ-ɩ se ɛla nʋmɔʋ lɩzʋʋ tʋmɩyɛ yɔ  ɩ-yɔɔ. (Mat. 6:33; Roma 12:11) Ɛyɔɔdaa se: «Paaha-m waɖɛ se mala université falaa pɩnzɩ 4. Ɛlɛ maasɔɔlaa se mala tʋma sakɩyɛ Yehowa sɛtʋ taa. Pʋyɔɔ malɩzaa se mɛnkpɛlɩkɩɣ tadɩyɛ labʋ nɛ mehiɣ liidiye nɖɩ ɖɩsɩɣnɩ-m se mala nʋmɔʋ lɩzʋʋ tʋmɩyɛ yɔ. Lɩmaɣzɩyɛ kɩbanɖɛ kpem mankpaɣaa. Lɛɛlɛɛyɔ lɛ, mɛwɛɛ nɛ malakɩ nʋmɔʋ lɩzʋʋ tʋmɩyɛ nɛ taa leleŋ, nɛ man-tʋmɩyɛ haɣ-m nʋmɔʋ nɛ manɖʋʋ nesi Betɛɛlɩ taa nɛ malakɩ tʋma kɩbana lɛɛna Yehowa sɛtʋ taa.»

17. Ye ɖiwobi pɩ-yɔɔ nɛ ɖɩɖɔŋ Yehowa lɔŋ tasʋʋ yɔɔ yɔ, wazasɩ lɛɛsɩ nzɩ ɖihikiɣ? (Izaayii 48:​17, 18)

¹⁷ Nabʋyʋ taa, ɛgbɛyɛ tasɩɣ-ɖʋ lɔŋ weyi ɩkandɩyɩɣ ɖɔ-yɔɔ yɔ. Ɛgbɛyɛ pakɩ-ɖʋ se ɖɩtaasɔɔlɩ liidiye yaa ɖɩkpa ɖa-tɩ nɛ tʋma wena apɩzɩɣ ayele nɛ ɖɩmaanɩ Yehowa paɣtʋ yɔɔ yɔ. Ye ɖɩɖɔŋ Yehowa lɔŋ tasʋʋ yɔɔ hɔɔlɩŋ ɛnɛ ɩ-taa ɖɔɖɔ yɔ, pɩwazɩɣ-ɖʋ. Ðɩwɛɣnɩ ɛhʋyɛ kɩbanɖɛ nɛ ɖɩfɛɣ ɖɔɖɔ kala sakɩyɛ. (1 Tim. 6:​9, 10) Pɩpɩzɩɣ piyele nɛ ɖɩsɛɛ Yehowa nɛ ɖa-laŋɩyɛ pilim. Nabʋyʋ fɛyɩ se pɩpɩzɩɣ nɛ pɩha-ɖʋ taa leleŋ nɛ laŋhɛzɩyɛ nɛ pɩkɩlɩ mbʋ.—Kalɩ Izaayii 48:​17, 18.

18. Ɛbɛ yɔɔ ŋtɛm ña-taa se ŋwoki pɩ-yɔɔ nɛ ŋɖɔŋ Yehowa lɔŋ tasʋʋ yɔɔ?

¹⁸ Pɩtʋʋ fɛyɩ se Yehowa kaɣ wobu pɩ-yɔɔ nɛ ɛtɩŋɩɣnɩ ɛyaa yɔɔ nɛ ɛtasɩɣ-ɖʋ lɔŋ kʋñɔŋ sɔsɔʋ alɩwaatʋ taa nɛ Pɩnzɩ kudoku kewiyitu tɔɔʋ alɩwaatʋ taa. (Keɣ. 45:16) Ðɩkaɣ wobu pɩ-yɔɔ nɛ ɖɩɖɔŋ lɔŋ ɛnɩ ɩ-yɔɔ paa pɩɩlakɩ nɔɔ kʋɖʋmaɣ nɛ mbʋ ɖɩsɔɔlaa yɔ? Ye ɖɩɖɔŋ lɔŋ weyi Yehowa tasɩɣ-ɖʋ sɔnɔ yɔ ɩ-yɔɔ yɔ, pɩkaɣ-ɖʋ wɛʋ kɛlɛʋ se ɖɩla mbʋ alɩwaatʋ ndʋ tɩ-taa. Ye mbʋ, ɖɩɖɔ Yehowa lɔŋ tasʋʋ yɔɔ paa ɛzɩmtaa, ɛtɩŋɩɣnɩ mba ɛlɩzaa se pɛɖɛɛ-ɖʋ nɔɔ yɔ pɔ-yɔɔ nɛ ɛtasɩɣ-ɖʋ lɔŋ weyi yɔ, ɖɩɖɔ ɩ-yɔɔ ɖɔɖɔ. (Iza. 32:​1, 2; Ebr. 13:17) Ðɩpɩzɩɣ nɛ ɖɩtaa ɖe-Ðiyiyu Yehowa liu kiya nɛ ɖɩtɩŋ nʋmɔʋ ŋgʋ ɛwɩlɩɣ-ɖʋ yɔ, mbʋ pʋyɔɔ yɔ eposuu-ɖʋ nɛ mbʋ pɩpɩzɩɣ nɛ pɩwɛɛkɩ ɖa nɛ ɩ ɖa-taabalɩyɛ yɔ nɛ eɖiyiɣ-ɖʋ nɛ ewokini ɛjaɖɛ kɩfaɖɛ taa se ɖihiɣ wezuu maatɛŋ.