CƖLA 18 janvier 2023 wiye, posusi ŋgee tɔm natʋyʋ jw.org yɔɔ se koobu Gage Fleegle nɛ koobu Jeffrey Winder papɩsɩ Yehowa Aseɣɖe Tɩnaa tɛ Nɔɔɖɛyaa ɛgbɛyɛ taa mba. Koobiya mba pa-naalɛ pɛwɛʋ Yehowa sɛtʋ taa yɔ, pɩlakɩ pɩnzɩ sakɩyɛ yɔ nɛ pɔɖɔkɩ pe-siɣsiɣ wɛtʋ.

Etaazuunii tɛtʋ ndʋ payaɣ se Pɛnɩsilivaanii yɔ, tɩ-wɩsɩ ɖɩɖʋyɛ taa koobu Fleegle caɣaa nɛ ɛpaɣlɩ. Nɛ ɛ-lʋlɩyaa kpɛlɩkɩnɩ-ɩ toovenim. Ɛɛkɛ pɩɣa evelaɣ lɛ, ɛ-lʋlɩyaa kʋyɩ nɛ powolo tɛtʋ cikpetu natʋyʋ taa nɛ pɩpɔzaɣ tɔm susuyaa peeɖe. Pɩlabɩ alɩwaatʋ pazɩ pʋwayɩ lɛ, ɛha ɛ-tɩ nɛ pamɩyɩsɩ-ɩ lɩm 20 novembre 1988 wiye.

Koobu Fleegle lʋlɩyaa seɣtaɣ-ɩ paa ɛzɩmtaa se ɛla alɩwaatʋ tɩŋa Ɛsɔ sɛtʋ tʋmɩyɛ. Pamʋwaɣ egeetiye yɔɔ cɔnɩyaa nɛ Betɛɛlɩ koobiya ɖoŋ ɖoŋ pa-ɖɩɣa taa nɛ koobu Fleegle naɣaɣ ɛzɩma koobiya mba paawɛ taa leleŋ taa yɔ. Pamɩyɩsɩ-ɩ lɩm pitileɖi lɛ, ɛpɩsɩ paa ɖooye nʋmɔʋ lɩzɩyʋ 1^er septembre 1989 wiye. Pɩnzɩ 2 wayɩ lɛ, ɛpaɣzɩ tʋmɩyɛ labʋ Betɛɛlɩ, nɛ kaɖʋwa ŋga ɛɛɖʋ ɛ-tɩ alɩwaatʋ ndʋ ɛɛwɛnɩ pɩnzɩ 12 yɔ. Ɛpaɣzɩ labʋ tʋmɩyɛ Brooklyn tɛ Betɛɛlɩ taa octobre 1991 taa.

Betɛɛlɩ taa, koobu Fleegle labɩ tʋmɩyɛ takayɩsɩ hatʋ kpɛndʋʋ tʋmɩyɛ ɖɩlaɖɛ pɩnzɩ 8, pʋwayɩ lɛ powoni-i tʋmɩyɛ nɖɩ ɖɩcɔŋnɩ Ɛsɔ sɛtʋ tʋmɩyɛ yɔɔ yɔ ɖɩ-taa. Alɩwaatʋ ndʋ tɩ-taa, ɛɛwɛ ɛgbɛyɛ nɖɩ ɖɩ-taa pɔyɔɔdʋʋ Rusii kʋnʋŋ yɔ ɖɩ-taa nɛ ɛlabɩ pɩnzɩ nasɩyɩ ɛgbɛyɛ nɖɩ ɖɩ-taa. Ɛ nɛ Nadia pɔɖɔkɩ nesi pɩnaɣ 2006 taa; nɛ alɩwaatʋ ndʋ Nadia paɣzɩ labʋ tʋmɩyɛ Betɛɛlɩ. Palabɩ tʋmɩyɛ kooka ŋga ka-taa pɔyɔɔdʋʋ Pɔrtiigaalɩ kʋnʋŋ yɔ. Palabɩ ɖɔɖɔ tʋmɩyɛ kooka ŋga ka-taa pɔyɔɔdʋʋ Ɛsɩpaañɩ kʋnʋŋ yɔ nɛ pɩcɛzɩ pɩnzɩ 10. Koobu Fleegle labɩ tʋmɩyɛ pɩnzɩ sakɩyɛ tʋmɩyɛ nɖɩ ɖɩcɔŋnɩ Ɛsɔ sɛtʋ tʋmɩyɛ yɔɔ yɔ ɖɩ-taa, pʋwayɩ lɛ powoni-i Tɔm wɩlʋʋ kɔɔmitee taa nɛ pʋwayɩ ɖɔɖɔ lɛ powoni-i Ɛsɔ sɛtʋ tʋmɩyɛ kɔɔmitee taa. Ɛpɩsɩ Nɔɔɖɛyaa ɛgbɛyɛ tɛ Ɛsɔ sɛtʋ tʋmɩyɛ kɔɔmitee sɩnɩyʋ mars 2022 taa.

 Koobu Winder paɣlɩ Murrieta, Kalifɔrnii tɛtʋ taa Etaazuunii ɛjaɖɛ taa. Ɛ-lʋlɩyaa sɩnɩnɩ-ɩ nɛ ɛtɩlɩ toovenim, nɛ pamɩyɩsɩ-ɩ lɩm 29 mars 1986 wiye. Fenaɣ ŋga katɩŋ pʋwayɩ yɔ ɛpaɣzɩ nʋmɔʋ lɩzʋʋ sɩnɩyʋ tʋmɩyɛ. Tʋmɩyɛ nɖɩ ɖɩɩkɛdɩnɩ-ɩ siŋŋ nɛ halɩ ɛkpaɣ lɩmaɣzɩyɛ se ewoki ɖɩ-yɔɔ. Ɛlabɩ nʋmɔʋ lɩzʋʋ sɩnɩyʋ tʋmɩyɛ fenasɩ sakɩyɛ lɛ, ɛpɩsɩ paa ɖooye nʋmɔʋ lɩzɩyʋ 1^er octobre 1986 wiye.

Koobu Winder kaakɛ pɩɣa evelaɣ lɛ, ewolo Betɛɛlɩ se ɛna ɛ-ɖalaa 2 mba palakaɣ tʋmɩyɛ peeɖe alɩwaatʋ ndʋ tɩ-taa yɔ. Mbʋ seɣtini-i nɛ ɛpaɣlaa lɛ, ɛñɩɣ niye takayaɣ taa se ɛlakɩ tʋmɩyɛ Betɛɛlɩ. Nɛ mai 1990 taa lɛ, payaa-ɩ se ewolo nɛ ɛla tʋmɩyɛ Wallkill tɛ Betɛɛlɩ taa.

Koobu Winder labɩ tʋma ndɩ ndɩ Betɛɛlɩ taa: ɛcɔnɩ Betɛɛlɩ taa cɩɖɩ cɩɖɩ wɛtʋ yɔɔ, ɛlabɩ tʋmɩyɛ Betɛɛlɩ hayɩm taa nɛ tʋmɩyɛ nɖɩ ɖɩcɔŋnɩ Betɛɛlɩ taa mba yɔɔ yɔ ɖɩ-taa. Ɛ nɛ Angela pɔɖɔkɩ nesi pɩnaɣ 1997 taa, nɛ pa-naalɛ pɛkpɛndaa nɛ palakɩ tʋmɩyɛ Betɛɛlɩ kpaɣnɩ alɩwaatʋ ndʋ nɛ pɩkɔɔ pɩtalɩ sɔnɔ. Powoni-wɛ Warwick pɩnaɣ 2014 taa nɛ koobu Winder ɖʋ nesi nɛ pama ɖa-tʋmɩyɛ ɖɩlaɖɛ sɔsɔɖɛ. Pɩnaɣ 2016 taa, pakʋyaa nɛ powolo ɛgbɛyɛ sukulinaa ɖɩlaɖɛ nɖɩ ɖɩwɛ Patɛrsɔɔnɩ yɔ nɛ koobu Winder la tʋmɩyɛ videowaa nɛ tɔm kɩnɩnɩtʋ tʋma ɖɩlaɖɛ. Pɩlabɩ pɩnzɩ 4 pʋwayɩ lɛ, pakʋyɩ nɛ papɩsɩ Warwick nɛ palɩzɩ koobu Winder se ɛla tʋmɩyɛ Tʋmlaɖaa kɔɔmitee taa. Ɛpɩsɩ Nɔɔɖɛyaa ɛgbɛyɛ tɛ Tʋmlaɖaa kɔɔmitee sɩnɩyʋ mars 2022 taa.

Koobiya panɛ pɛkɛ «kʋjɔŋ,» nɛ ɖɩtɩmɩɣnɩ Yehowa se ɛwazɩ-wɛ siŋŋ, mbʋ pʋyɔɔ yɔ pɛwɛɛ nɛ palakɩ tʋmɩyɛ nɛ kpekpeka nɛ paɖʋʋ kewiyaɣ tʋma nesi.—Efɛz. 4:8.