1. Alɩwaatʋ ndʋ patam numwaa tɩŋa kaɣ kpaʋ ɛsɔdaa?

 PƖLABƖ pɩnzɩ sakɩyɛ yɔ, Yehowa sɛyaa wɛɛ nɛ pɔpɔzʋʋ pa-tɩ se: «Ɛzɩmtaa patam numwaa mba pɩkazɩ tɛtʋ yɔɔ yɔ pa-taa kɛdɛzaɣ ñɩnʋ kaɣ kpaʋ ɛsɔdaa?» Ðooo lɛ ɖɩmaɣzaɣ se pɩtɩla Armaagedɔɔ you lakɩ nɛ pɩtɛ lɛ, patam numwaa nabɛyɛ kaɣ caɣʋ Paradisuu taa tɛtʋ yɔɔ alɩwaatʋ natʋyʋ. Ɛlɛ ɖɩkpɛlɩkɩ 15 juillet 2013 tɛ Feŋuu Tilimiye taa se patam numwaa mba pɩkazɩ tɛtʋ yɔɔ yɔ, pa-tɩŋa pakaɣ kpaʋ ɛsɔdaa pʋcɔ nɛ Armaagedɔɔ you paɣzɩ.—Mat. 24:31.

2. Tɔm ndʋ ɖa-taa nabɛyɛ pɩzɩɣ nɛ pɔpɔzɩ pa-tɩ, nɛ ɛbɛ ɖɩkaɣ naʋ tɔm ñʋʋ kʋnɛ kɩ-taa?

² Paa mbʋ yɔ, ɖa-taa nabɛyɛ pɩzɩɣ nɛ pɔpɔzɩ pa-tɩ se: Ɛbɛ kaɣ talʋʋ Krɩstʋ «heŋ lɛɛŋ» weyi ɩkaɣ wobu pɩ-yɔɔ nɛ ɩsɛɣ Yehowa siɣsiɣ tɛtʋ yɔɔ yɔ «kʋñɔŋ sɔsɔʋ» alɩwaatʋ taa? (Yoh. 10:16; Mat. 24:21) Sɔnɔ pɩtɩla, «heŋ lɛɛŋ» taa mba nabɛyɛ nɩɣzɩɣ se alɩwaatʋ ndʋ po-koobiya kʋsɔɔlaa patam numwaa kpaɣ ɛsɔdaa yɔ, mba ɩɩkaɣ wɛnʋʋ weyi ɛkaɣ-wɛ sɩnʋʋ nɛ ɛwɩlɩ-wɛ nʋmɔʋ yɔ. Iyele nɛ ɖɩtazɩ Bibl taa kɛdɛsɩ 2 nasɩyɩ taa; pɩtɩla nzɩ yebina nɛ pamaɣzɩɣ mbʋ. Pʋwayɩ lɛ ɖɩkaɣ naʋ mbʋ pʋyɔɔ pɩtɩcɛyɩ se panɩɣzɩ yɔ.

ƐBƐ ƐƐKAƔ TALƲƲ «HEŊ LƐƐŊ» TAA MBA?

3-4. Tɔm ndʋ nabɛyɛ pɩzɩɣ nɛ pɔpɔzɩ pa-tɩ, nɛ ɛbɛ yɔɔ?

³ Nabɛyɛ pɩzɩɣ nɛ pɔpɔzɩ pa-tɩ se alɩwaatʋ ndʋ Nɔɔɖɛyaa ɛgbɛyɛ taa koobiya ɩɩtasɩɣ wɛʋ se pawɩlɩ heŋ lɛɛŋ taa mba nʋmɔʋ yɔ, ɛzɩ pakaɣ yebu Yehowa sɛʋ na. Pɩtɩla Bibl taa kɛdɛsɩ nasɩyɩ yebina nɛ sɔɔndʋ kpaɣ-wɛ nɛ pɔpɔzʋʋ pa-tɩ tɔm ndʋ. Iyele nɛ ɖɩna kɩɖaŋ 2. Kajalaɣ ñɩŋgʋ tukuuni Cɔjɔ Kɩlɩm  Yehoyiyada. Ɛɛkɛ Ɛsɔ sɛyʋ siɣsiɣ tʋ. Ɛ nɛ ɛ-halʋ Yehosabaatɩ pakandɩyɩ abalɩbɩɣa ŋga payaɣ se Yehowaasɩ yɔ kɔ-yɔɔ nɛ pasɩnɩ-kɛ nɛ kapɩsɩ wiyaʋ kɩbanʋ. Alɩwaatʋ ndʋ payɩ Yehoyiyada kaawɛ wezuu yɔ, Yehowaasɩ kaalabɩ mbʋ pɩwɛ ɖeu yɔ. Ɛlɛ Yehoyiyada sɩba lɛ, Yehowaasɩ paɣzɩ labʋ mbʋ pɩfɛyɩ ɖeu yɔ. Ewelisini awumbiya kɩdɛkɛdaa nɛ eyele Yehowa sɛʋ.—2 Kro. 24:​2, 15-19.

⁴ Kɩɖaʋ 2 ñɩŋgʋ tukuuni Krɩstʋ ñɩma mba paacaɣ wezuu apostoloowaa sɩm wayɩ yɔ. Apostoloowaa taa weyi ɛsɩbɩ kɛdɛzaɣ ɖeɖe yɔ, ɛnʋ lɛ Yohanɛɛsɩ. Ɛɛwɛnɩ ɖoŋ kɩbaŋ Krɩstʋ mba sakɩyɛ yɔɔ. Ɛɛsɩnɩ-wɛ nɛ pɔɖɔkɩ pe-siɣsiɣ wɛtʋ Yehowa ɛsɩndaa. (3 Yoh. 4) Ɛzɩ Yesu apostoloowaa siɣsiɣ tɩnaa lalaa yɔ, alɩwaatʋ natʋyʋ ɛlʋbɩ siŋŋ nɛ ɛkandɩyɩ agbaa yɔɔ se tisuu yebiyaa ɩtaawɛɛnɩ ɖoŋ a-yɔɔ. (1 Yoh. 2:18; 2 Tes. 2:7) Ɛlɛ, Yohanɛɛsɩ sɩm wayɩ lɛ, agbaa taa koobiya sakɩyɛ pɩsɩ tisuu yebiyaa. Pɩnzɩ nasɩyɩ wayɩ lɛ, tisuu yebiyaa wɩlɩtʋ nɛ pa-lakasɩ kɩdɛkɛdɩsɩ su agbaa tɩŋa taa.

5. Tɔm ndʋ pɩtɩpɔzɩ se Bibl taa kɛdɛsɩ nzɩ sɩ-naalɛ siyele nɛ ɖɩmaɣzɩ?

⁵ Ɛzɩ Bibl taa kɛdɛsɩ nzɩ sɩ-naalɛ sɩwɩlɩɣ se mbʋ kaɣnɩ talʋʋ heŋ lɛɛŋ alɩwaatʋ ndʋ patam numwaa kpaɣ ɛsɔdaa yɔ? Alɩwaatʋ ndʋ tɩ-taa, ɛzɩ Krɩstʋ ñɩma siɣsiɣ tɩnaa mba pɛwɛɣ tɛtʋ yɔɔ yɔ, pakaɣ paɣzʋʋ labʋ mbʋ pɩfɛyɩ ɖeu yɔ ɛzɩ Yehowaasɩ kaalabʋ yɔ? Yaa pakaɣ pɩsʋʋ tisuu yebiyaa ɛzɩ Krɩstʋ mba sakɩyɛ kaalabʋ apostoloowaa sɩm wayɩ yɔ? Pɩɩkaɣ labʋ mbʋ kpa. Ða-taa pɩzɩɣ nɛ pɩtɛ se alɩwaatʋ ndʋ patam numwaa kaɣ kʋyʋʋ tɛtʋ yɔɔ yɔ, heŋ lɛɛŋ taa mba kaɣ wobu pɩ-yɔɔ nɛ pɛsɛɣ Yehowa ɛzɩ pɩmʋnʋʋ yɔ, nɛ Yehowa kaɣ wobu pɩ-yɔɔ nɛ ɛcɔŋnɩ pɔ-yɔɔ. Ɛbɛ yɔɔ ɖa-taa pɩzɩɣ nɛ pɩtɛmnɩ tɔm ndʋ?

YEHOWA SAMAƔ KAƔ WOBU PƖ-YƆƆ NƐ KƐSƐƔ-Ɩ ƐZƖ ƐSƆƆLƲƲ YƆ PAA ƐZƖMTAA

6. Alɩwaatʋ 3 ndʋ taa ɖɩkaɣ tazʋʋ?

⁶ Ɛbɛ yɔɔ ɖa-taa pɩzɩɣ nɛ pɩtɛ se Yehowa samaɣ kaɣ wobu pɩ-yɔɔ nɛ kɛsɛɣ-ɩ ɛzɩ ɛsɔɔlʋʋ yɔ paa ɛzɩmtaa, halɩ pɩkpɛndɩnɩ kaɖɛ alɩwaatʋ ndʋ tɩwɛnɩ ɛsɩndaa yɔ tɩ-taa? Mbʋ pʋyɔɔ yɔ Bibl lɩzɩ pɩ-taa se alɩwaatʋ ndʋ tɩ-taa ɖɩwɛɛ yɔ, tɩwɛ ndɩ kpem nɛ caanaʋ taa Izrayɛɛlɩ mba alɩwaatʋ, nɛ tɩwɛ ndɩ ɖɔɖɔ nɛ alɩwaatʋ ndʋ tɩkɔm apostoloowaa sɩm wayɩ yɔ. Ye mbʋ, iyele nɛ ɖɩtazɩ alɩwaatʋ ndʋ tɩ-naadozo tɩ-taa nɛ pɩkɩlɩ: (1) Caanaʋ taa Izrayɛɛlɩ mba alɩwaatʋ, (2) alɩwaatʋ ndʋ tɩkɔm apostoloowaa sɩm wayɩ yɔ, nɛ (3) ɖa-alɩwaatʋ, pʋ-tɔbʋʋ se «wondu tɩŋa ñɔɔzʋʋ alɩwaatʋ.»—Tʋma 3:21.

7. Caanaʋ taa Izrayɛɛlɩ mba alɩwaatʋ taa, alɩwaatʋ ndʋ Izrayɛɛlɩ nɛ kɩ-awiya palakaɣ lakasɩ kɩdɛkɛdɩsɩ yɔ, ɛbɛ yɔɔ mba paawɛ siɣsiɣ yɔ pataalesi lidaʋ?

⁷ Caanaʋ taa Izrayɛɛlɩ mba alɩwaatʋ. Alɩwaatʋ pazɩ pʋcɔ nɛ Moyizi sɩkɩ lɛ, eheyi Izrayɛɛlɩ mba se: «Mansɩm camɩyɛ se man-sɩm wayɩ lɛ, paa pɩɩlabɩ ɛzɩma yɔ ɩkaɣ labʋ lakasɩ kɩdɛkɛdɩsɩ nɛ iyele tɩŋʋʋ nʋmɔʋ ŋgʋ manɖʋ-mɩ paɣtʋ se ɩtɩŋ yɔ.» (Wp. 31:29) Moyizi paɣ ɖɔɖɔ Izrayɛɛlɩ mba se ye pamanɩ Ɛsɔ paɣtʋ yɔɔ yɔ, pakaɣ-wɛ wonuu yomiye taa. (Wp. 28:​35, 36) Tɔm ndʋ tɩlaba? Ɛɛɛ. Pɩnzɩ mɩnɩŋ sakɩyɛ taa, awiya sakɩyɛ lɩzaa se alakɩ mbʋ pɩfɛyɩ ɖeu Yehowa ɛsɩndaa yɔ, nɛ samaɣ tɩŋ a-wayɩ nɛ kɛsɛɛ cɛtɩm ɛsɔnaa. Pʋyɔɔ Yehowa hɔm Izrayɛɛlɩ samaɣ nɩŋgbaaŋ nɛ eyele nɛ Izrayɛɛlɩ awiya kewiyitu tɔɔʋ sɩɩ tɩnaɣ tɛtʋ yɔɔ. (Ezek. 21:​25-27) Ɛlɛ Izrayɛɛlɩ mba siɣsiɣ tɩnaa nawa se tɔm ndʋ Ɛsɔ yɔɔdaa yɔ tɩlaba lɛ, pɩha-wɛ abalɩtʋ nɛ powolo pɩ-yɔɔ nɛ pɛsɛɣ-ɩ siɣsiɣ.—Iza. 55:​10, 11.

8. Ɛzɩ pɩwɛɛ se pɩɖɩɣzɩ-ɖʋ se alɩwaatʋ ndʋ tɩkɔm apostoloowaa sɩm wayɩ yɔ tɩ-taa, tisuu yebiyaa wɩlɩtʋ sʋ Krɩstʋ ɛgbɛyɛ taa? Lɩzɩ pɩ-taa.

 ⁸ Alɩwaatʋ ndʋ tɩkɔm apostoloowaa sɩm wayɩ yɔ. Ɛzɩ pɩwɛɛ se pɩɖɩɣzɩ-ɖʋ se alɩwaatʋ ndʋ tɩkɔm apostoloowaa sɩm wayɩ yɔ tɩ-taa, tisuu yebiyaa wɩlɩtʋ sʋ Krɩstʋ ɛgbɛyɛ taa? Aayɩ. Yesu kaayɔɔdaa se tisuu yebu kaɣ tɔyʋʋ siŋŋ. (Mat. 7:​21-23; 13:​24-30, 36-43) Apostoloo Pɔɔlɩ, apostoloo Pɩyɛɛrɩ nɛ apostoloo Yohanɛɛsɩ pɔyɔɔdaa se natʋ tɔm ndʋ Yesu yɔɔdaa yɔ tɩɩtɛm paɣzʋʋ labʋ pa-alɩwaatʋ taa. (2 Tes. 2:​3, 7; 2 Pɩy. 2:1; 1 Yoh. 2:18) Apostoloowaa sɩm wayɩ, tisuu yebiyaa wɩlɩtʋ sʋ Krɩstʋ ɛgbɛyɛ taa. Tisuu yebiyaa lɩwa nɛ papɩsɩ Babilɔɔnɩ Sɔsɔʋ hɔɔlʋʋ nakʋyʋ, pʋ-tɔbʋʋ se ɛjaɖɛ yɔɔ cɛtɩm Ɛsɔ sɛtʋ ɛgbɛyɛ. Tɔm ndʋ Yesu kaayɔɔdaa yɔ tɩɩwɛɛ nɛ tɩlakɩ.

9. Alɩwaatʋ ndʋ tɩ-taa ɖɩwɛɛ yɔ, ɛzɩma tɩyɛ tɩwɛ ndɩ nɛ caanaʋ taa Izrayɛɛlɩ mba alɩwaatʋ nɛ alɩwaatʋ ndʋ tisuu yebiyaa sʋ ɛgbɛyɛ taa apostoloowaa sɩm wayɩ yɔ?

⁹ «Wondu tɩŋa ñɔɔzʋʋ alɩwaatʋ.» Alɩwaatʋ ndʋ tɩ-taa ɖɩwɛɛ yɔ tɩwɛ ndɩ nɛ caanaʋ taa Izrayɛɛlɩ mba alɩwaatʋ, nɛ tɩwɛ ndɩ ɖɔɖɔ nɛ alɩwaatʋ ndʋ tisuu yebiyaa sʋ ɛgbɛyɛ taa apostoloowaa sɩm wayɩ yɔ. Suwe payaɣ alɩwaatʋ ndʋ tɩ-taa ɖɩwɛɛ yɔ? Ðoŋ ɖoŋ lɛ, ɖɩyaɣ alɩwaatʋ ndʋ se ɛjaɖɛ kɩdɛkɛdɩyɛ ɖɩnɛ «[ɖɩ-]kɛdɛzaɣ kɩyakɩŋ.» (2 Tim. 3:1) Ɛlɛ Bibl wɩlɩɣ se alɩwaatʋ natʋyʋ ɖɔɖɔ paɣzɩ kɛdɛzaɣ kɩyakɩŋ ɛnɩ ɩ-taa, alɩwaatʋ ndʋ tɩɖaɣlaa nɛ pɩkɩlɩ kɛdɛzaɣ kɩyakɩŋ ɖaɣlɩkɩŋ. Alɩwaatʋ ndʋ tɩkaɣ wobu pɩ-yɔɔ nɛ tɩwɛɛ pɩkɔɔ pɩsɩɩnɩ alɩwaatʋ ndʋ Mesiya Kewiyaɣ lakɩ nɛ ɛyaa tɩŋa talɩ pilim nɛ tɛtʋ pɩsɩ paradisuu yɔ. Payaɣ alɩwaatʋ ndʋ se «wondu tɩŋa ñɔɔzʋʋ alɩwaatʋ.» (Tʋma 3:21) Alɩwaatʋ ndʋ tɩpaɣzɩ pɩnaɣ 1914. Wondu ndʋ pɔñɔɔzaa kpaɣnɩ alɩwaatʋ ndʋ tɩ-taa? Pasɩ Yesu Wiyaʋ ɛsɔdaa. Ye mbʋ, Wiyaʋ siɣsiɣ tʋ Daviid liɖe taa tʋ nɔɔyʋ tasɩ wɛʋ se ɛtɔɔ kewiyitu Yehowa lone taa. Ɛlɛ pɩtɩkɛ pi-ɖeke Yehowa ñɔɔzaa. Yehowa sɩ Yesu wiyaʋ nɛ pitileɖi lɛ, ɛpaɣzɩ ñɔɔzʋʋ Ɛsɔ sɛtʋ kele kele ñɩndʋ. (Iza. 2:​2-4; Ezek. 11:​17-20) Ɛzɩ cɛtɩm wɩlɩtʋ kaɣ tasʋʋ sʋʋ Ɛsɔ sɛtʋ kele kele ñɩndʋ ndʋ tɩ-taa?

10. (a) Natʋ tɔm ndʋ Bibl yɔɔdɩ ɖa-alɩwaatʋ taa Ɛsɔ sɛtʋ kele kele ñɩndʋ yɔɔ? (Izaayii 54:17) (b) Ɛbɛ yɔɔ natʋ tɔm ndʋ tɩhɛzɩɣ ɖa-laŋɩyɛ?

¹⁰ Kalɩ Izaayii 54:17. Maɣzɩ natʋ tɔm tʋnɛ tɩ-yɔɔ nɛ ŋna. Tɩyɔɔdʋʋ se: «Paa you wonuu ŋgʋ poluba se poyouni-ŋ yɔ, kɩɩkaɣ wazʋʋ pʋyʋ.» Natʋ tɔm ndʋ tɩwɛɛ nɛ tɩlakɩ sɔnɔ. Laŋɩyɛ hɛzʋʋ tɔm tʋnɛ ɖɔɖɔ titukuuni ɖa-alɩwaatʋ: «Yehowa kaɣ ña-pɩyalaa tɩŋa tɔm wɩlʋʋ, nɛ ña-pɩyalaa laŋhɛzɩyɛ kaɣ ɖɔʋ pɩdɩɩfɛyɩ. Ŋkaɣ kam camɩyɛ siɣsiɣ wɛtʋ taa. . . . Ŋŋkaɣ nabʋyʋ seu sɔɔndʋ nɛ nabʋyʋ  ɛɛkaɣ-ŋ ɖʋʋ sɔɔndʋ, mbʋ pʋyɔɔ yɔ sɔɔndʋ pʋyʋ ɛɛkaɣ-ŋ ñɔtɩnʋʋ.» (Iza. 54:​13, 14) Halɩ «ɛjaɖɛ ɖɩnɛ ɖɩ-ɛsɔ» Sataŋ maɣmaɣ ɛɛpɩzɩɣ nɛ ɛɖɩɣ nʋmɔʋ tʋmɩyɛ nɖɩ Ɛsɔ samaɣ wɛɛ nɛ kalakɩ se kawɩlɩ ɛyaa Ɛsɔ tɔm yɔ. (2 Kɔr. 4:4) Paɖaɣnɩ pɩsɩnʋʋ Ɛsɔ sɛtʋ kele kele ñɩndʋ nɛ cɛtɩm wɩlɩtʋ ɛɛkaɣ tasʋʋ sʋʋ tɩ-taa kpa. Pɔñɔɔzɩ-tʋ se tɩwɛɛ tam. Paa you wonuu ŋgʋ poluba se poyouni-ɖʋ yɔ, kɩɩkaɣ wazʋʋ pʋyʋ.

ƐBƐ KAƔ LABƲ?

11. Ɛbɛ yɔɔ ɖa-taa tɛma se alɩwaatʋ ndʋ patam numwaa kpaɣ ɛsɔdaa yɔ, sɔɔndʋ ɛɛkpaɣ samaɣ sɔsɔɔ nɛ nabʋyʋ?

¹¹ Ɛbɛ kaɣ labʋ alɩwaatʋ ndʋ patam numwaa kpaɣ ɛsɔdaa yɔ? Tɔzɩ se Yesu kɛnɩ ɖe-Ninɖiɣyu. Ɛnʋ lɛ Krɩstʋ ɛgbɛyɛ ñʋʋdʋ. Yesu yɔɔdɩ kpayɩ se: «Ðiyiyu kʋɖʋm ɩwɛna, ɛnʋ lɛ Krɩstʋ.» (Mat. 23:10) Yesu wɛɛ nɛ ɛtɔkɩ kewiyitu ɛsɔdaa, nɛ ɛkaɣ cɔnʋʋ ɛ-wayɩ tɩŋɩyaa toovenim mba yɔɔ paa ɛzɩmtaa. Krɩstʋ wɛna nɛ eɖiyiɣ-wɛ; pʋyɔɔ lɛ, sɔɔndʋ ɛɛkpaɣ-wɛ nɛ nabʋyʋ. Pɩkɛ toovenim se ɖɩɩsɩŋ ɛzɩma Krɩstʋ kaɣ ɖiyuu ɛ-samaɣ alɩwaatʋ ndʋ tɩ-taa yɔ pɩ-tɔm tɩŋa tete. Ye mbʋ, iyele nɛ ɖɩna Bibl taa kɩɖaŋ weyi ɩpɩzɩɣ nɛ ɩhɛzɩ ɖa-laŋɩyɛ yɔ.

12. (a) Ɛzɩma Yehowa cɔnɩ ɛ-samaɣ yɔɔ Moyizi sɩm wayɩ? (b) Ɛzɩma ɛcɔnɩ kɔ-yɔɔ alɩwaatʋ ndʋ paɖʋ Eliya tʋmɩyɛ lɛɛɖɛ yɔ? (Cɔnɩ ɖɔɖɔ kɩlɛmʋʋ.)

¹² Moyizi sɩba pʋcɔ nɛ Izrayɛɛlɩ mba sʋʋ Lidaʋ Tɛtʋ taa. Ɛbɛ talɩ Ɛsɔ samaɣ? Yehowa yebi ɛ-samaɣ sɩnʋʋ Moyizi sɩm wayɩ yaa we? Aayɩ. Alɩwaatʋ ndʋ payɩ kaawɛ siɣsiɣ yɔ, Yehowa kaawɛɛ nɛ ɛsɩɣnɩ-kɛ. Pʋcɔ nɛ Moyizi sɩkɩ lɛ, Yehowa kaaheyi-i se ɛlɩzɩ Yozuwee nɛ eɖiyi samaɣ. Moyizi kaafalɩsɩ Yozuwee pɩnzɩ sakɩyɛ. (Ejl. 33:11; Wp. 34:9) Pɩtasɩ lɛ, abalaa lalaa sakɩyɛ kaawɛɛ nɛ pɛɖɛɣ nɔɔ, mba lɛ ɛyaa kudokiŋ ñʋndɩnaa, ɛyaa mɩnɩŋ ñʋndɩnaa, ɛyaa nɩɩnʋwawaa ñʋndɩnaa, nɛ halɩ ɛyaa hiŋ ñʋndɩnaa; nɛ ɛyaa mba paawɛ niye. (Wp. 1:15) Paacɔnɩ Ɛsɔ samaɣ yɔɔ camɩyɛ. Ðɩnaɣ kɩɖaʋ ŋgʋ kɩ-ɖɔndɩ Eliya alɩwaatʋ taa. Ɛɛñaɣ pana siŋŋ pɩnzɩ sakɩyɛ nɛ ɛsɩnɩ Izrayɛɛlɩ mba nɛ pɛsɛɛ Yehowa. Ɛlɛ pʋwayɩ, Yehowa tiyi-i se ewolo Yuuda nɛ ɛla tʋmɩyɛ peeɖe. (2 Awi. 2:1; 2 Kro. 21:12) Ɛzɩ pɩwɩlɩɣ se paalɔ ɛyaa siɣsiɣ tɩnaa mba paawɛ Izrayɛɛlɩ cejewe hiu kewiyaɣ taa yɔ? Aayɩ. Eliya kaafalɩsɩ Eliizee pɩnzɩ sakɩyɛ. «Nayaa pɩyalaa» ɖɔɖɔ kaawɛɛ, nɛ paafalɩsɩ-wɛ sukulinaa nabɛyɛ taa. (2 Awi. 2:7) Ye mbʋ, ɛyaa siɣsiɣ tɩnaa sakɩyɛ kaawɛɛ se pasɩnɩ Ɛsɔ samaɣ. Yehowa tamaɣ wobi pɩ-yɔɔ nɛ kɛɖɛɣnɩ ɛsɩndaa, nɛ ɛɛwɛɛ nɛ ɛcɔŋnɩ ɛ-sɛyaa siɣsiɣ tɩnaa yɔɔ.

13. Laŋɩyɛ hɛzʋʋ tɔm ndʋ ɖɩnaɣ Ebree mba 13:5b taa? (Cɔnɩ ɖɔɖɔ kɩlɛmʋʋ.)

¹³ Ɛzɩ ɖɩnaʋ kɩɖaŋ ɛnɩ ɩ-taa yɔ, ŋmaɣzɩɣ se  ɛbɛ kaɣ labʋ alɩwaatʋ ndʋ patam numwaa taa kɛdɛzaɣ ñɩnʋ kpaɣ ɛsɔdaa yɔ? Pɩtɩcɛyɩ se ɖɩnɩɣzɩ tɔm ndʋ tɩ-yɔɔ. Bibl yɔɔdʋʋ laŋɩyɛ hɛzʋʋ tɔm tʋnɛ: Yehowa ɛɛkaɣ siɣye haʋ ɛ-samaɣ tɛtʋ yɔɔ kaaʋ. (Kalɩ Ebree mba 13:5b.) Ɛzɩ Moyizi nɛ Eliya yɔ, Krɩstʋ ñɩma patam numwaa mba pɛɖɛɣ nɔɔ Ɛsɔ samaɣ sɔnɔ yɔ, panɩ pɩ-taa se pɩcɛyaa se pafalɩsɩ ɛyaa lalaa. Pɩlakɩ pɩnzɩ sakɩyɛ yɔ, Nɔɔɖɛyaa ɛgbɛyɛ taa mba wɛɛ nɛ pafalɩsɩɣ heŋ lɛɛŋ taa abalaa sakɩyɛ se pɛɖɛɛ nɔɔ. Kɩɖaŋ nɩɩyɩ yɔ: Palabɩ ɖʋtʋ nɛ pafalɩsɩɣ ɛgbɛyɛ taa ɛzʋtʋyaa, egeetiye yɔɔ cɔnɩyaa, agbaa pilinzi kɔɔmiteewaa taa mba, Betɛɛlɩ taa tʋma yɔɔ cɔnɩyaa nɛ lalaa sukulinaa sakɩyɛ taa. Nɔɔɖɛyaa ɛgbɛyɛ falɩsɩ koobiya nabɛyɛ se pɛkɛ sɩnɩyaa Nɔɔɖɛyaa ɛgbɛyɛ kɔɔmiteewaa ndɩ ndɩ taa. Sɩnɩyaa mba, pɛwɛɛ nɛ palakɩ tʋma sakɩyɛ nɛ siɣsiɣ wɛtʋ lɛɛlɛɛyɔ. Pɔñɔɔzɩ-wɛ camɩyɛ se powolo pɩ-yɔɔ nɛ pɔcɔŋnɩ Krɩstʋ heŋ yɔɔ.

14. Tɔm ndʋ pɩwɛɛ se ɖɩɖɔkɩ?

¹⁴ Tɔm ndʋ pɩwɛɛ se ɖɩɖɔkɩ yɔ, ndʋ yɔ: Alɩwaatʋ ndʋ patam numwaa taa kɛdɛzaɣ ñɩnʋ kpaɣ ɛsɔdaa kʋñɔŋ sɔsɔʋ kɛdɛzaɣ alɩwaatʋ taa yɔ, Yehowa samaɣ ŋga kɛwɛ tɛtʋ yɔɔ yɔ, kakaɣ wobu pɩ-yɔɔ nɛ kɛsɛɣ-ɩ siɣsiɣ. Yesu Krɩstʋ kewiyitu tɔɔʋ kaɣnɩ yebu nɛ Ɛsɔ sɛyaa wolo pɩ-yɔɔ nɛ pala mbʋ. Pɩkɛ toovenim se alɩwaatʋ ndʋ tɩ-taa, ajɛɛ kɩgbɛndʋʋ ɛgbɛyɛ nɖɩ payaɣ se Gɔɔgɩ weyi ɛlɩnɩ Maagɔɔgɩ yɔ, ɖɩkaɣ kʋyʋʋ Ɛsɔ samaɣ yɔɔ. (Ezek. 38:​18-20) Ɛlɛ ɖɩɩkaɣ pɩzʋʋ nɛ ɖɩla Ɛsɔ samaɣ nabʋyʋ, ɖɩɩkaɣ pɩzɩɣ nɛ ɖɩɖɩɣ-kɛ nʋmɔʋ se kataasɛɛ Yehowa. Paa pɩɩlabɩ ɛzɩma yɔ Yehowa kaɣ ka-ñʋʋ yabʋ. Apostoloo Yohanɛɛsɩ na Krɩstʋ heŋ lɛɛŋ «samaɣ sɔsɔɔ» nakɛyɛ natʋ natʋyʋ taa. Peheyi Yohanɛɛsɩ se «samaɣ sɔsɔɔ» ŋga, kalɩnɩ «kʋñɔŋ sɔsɔʋ taa.» (Natʋ 7:​9, 14) Ye mbʋ, ɖa-taa tɛma se Yehowa kaɣ ka-ñʋʋ yabʋ.

15-16. Ɛzɩ pɔyɔɔdʋʋ Natʋ 17:14 taa yɔ, ɛbɛ Krɩstʋ koobiya patam numwaa kaɣ labʋ Armaagedɔɔ you alɩwaatʋ taa, nɛ ɛbɛ yɔɔ pɩkpazɩɣ-ɖʋ ɖoŋ?

¹⁵ Paa mbʋ yɔ, nabɛyɛ pɩzɩɣ nɛ pɔpɔzɩ pa-tɩ se: «Nɛ patam numwaa yɔ? Pakʋyʋʋ tɛtʋ yɔɔ nɛ pakpa ɛsɔdaa lɛ, ɛbɛ pakaɣ labʋ peeɖe?» Bibl cosi tɔm ndʋ tɩ-yɔɔ kpayɩ. Kɩwɩlɩɣ se ɛjaɖɛ ɖɩnɛ ɖɩ-yɔɔ kominawaa kaɣ «yonuu Heɣa.» Ɛlɛ paakaɣ-kɛ wabʋ. Bibl yɔɔdʋʋ se:  ‘Heɣa kaɣ-wɛ wabʋ.’ Nɛ akaɣ Heɣa ŋga sɩnʋʋ? Bibl cosaa se mba «paya-wɛ nɛ palɩzɩ-wɛ nɛ pɛwɛ siɣsiɣ yɔ,» mba kaɣnɩ-kɛ sɩnʋʋ. (Kalɩ Natʋ 17:14.) Mba lɛ mba? Mba lɛ patam numwaa mba pefezi-wɛ yɔ. Ye mbʋ, alɩwaatʋ ndʋ patam numwaa taa kɛdɛzaɣ ñɩnʋ kpaɣ ɛsɔdaa kʋñɔŋ sɔsɔʋ kɛdɛzaɣ alɩwaatʋ taa yɔ, tʋma kajalaɣ ñɩna wena palakɩ yɔ a-taa naɖɩyɛ lɛ se palakɩ you. Pɩkɛ tʋmɩyɛ sɔsɔyɛ kpem. Pʋcɔ nɛ patam numwaa nabɛyɛ pɩsɩɣ Yehowa Aseɣɖe Tɩnaa lɛ, paakɛ you laɖaa. Halɩ nabɛyɛ kaalabɩ sɔɔjatʋ tʋmɩyɛ. Ɛlɛ pʋwayɩ papɩsɩ toovenim Krɩstʋ ñɩma nɛ pɛkpɛlɩkɩ ɛzɩma pa nɛ lalaa pɛwɛɛ laŋhɛzɩyɛ taa yɔ. (Gal. 5:22; 2 Tes. 3:16) Peyebi ɖʋʋ nesi yoŋ. Ɛlɛ pefeziɣ-wɛ nɛ pakpa ɛsɔdaa lɛ, pa nɛ Krɩstʋ nɛ e-tiyiyaa kiɖeɖema pakaɣ labʋ kɛdɛzaɣ you nɛ poyooni Ɛsɔ koyindinaa.

¹⁶ Maɣzɩ pɩ-yɔɔ nɛ ŋna. Alɩwaatʋ ndʋ Krɩstʋ ñɩma patam numwaa kaawɛ tɛtʋ yɔɔ yɔ, pa-taa nabɛyɛ kaakɛ akpadɩyaa, halɩ nabɛyɛ kaakɛ ajamaa. Ɛlɛ alɩwaatʋ ndʋ pefeziɣ-wɛ nɛ pakpa ɛsɔdaa yɔ, pakaɣ pɩsʋʋ feziŋ weyi ɩwɛ ɖoŋ nɛ ɩɩsɩkɩ yɔ; pa nɛ pe-Wiyaʋ nɛ po-You laɖʋ Yesu Krɩstʋ pakaɣ kpɛndʋʋ nɛ pala you. Pɛtɛŋ Armaagedɔɔ you labʋ lɛ, pa nɛ Yesu pakaɣ labʋ tʋmɩyɛ nɛ pasɩnɩ ɛyaa nɛ patalɩ pilim. Pɩtʋʋ fɛyɩ se alɩwaatʋ ndʋ tɩ-taa lɛ, pakaɣ pɩzʋʋ nɛ pasɩnɩ po-koobiya kʋsɔɔlaa mba pɛwɛ tɛtʋ yɔɔ yɔ nɛ pɩkɩlɩ alɩwaatʋ ndʋ paakɛ ɛyaa mantɩtalɩ pilimwaa yɔ.

17. Ɛzɩma ɖɩlaba nɛ ɖɩna se pakaɣ huuzuu Ɛsɔ sɛyaa tɩŋa yɔɔ Armaagedɔɔ you taa?

¹⁷ Ŋkɛ heŋ lɛɛŋ taa tʋ na? Ye ɛɛɛ yɔ, ɛbɛ pɩkaɣ pɔzʋʋ se ŋla alɩwaatʋ ndʋ Armaagedɔɔ you sɔsɔʋ paɣzɩɣ yɔ? Pʋnɛ pi-ɖeke: Taa Yehowa liu nɛ ŋɖɔ ɛ-paɣtʋ yɔɔ. Ɛbɛ paɣtʋ ndʋ tɩpɩzɩɣ nɛ tɩkɛna? Bibl yɔɔdʋʋ laŋɩyɛ hɛzʋʋ tɔm tʋnɛ: «Sʋʋ ño-kuduyuŋ pɩ-taa ñɩŋ taa; nɛ ŋɖɩɣ nɔnɔsɩ ñɔ-yɔɔ. Mɛsɩ ña-tɩ alɩwaatʋ pazɩ pɩkɔɔ pɩtalɩ alɩwaatʋ ndʋ pana ɖɛwa yɔ.» (Iza. 26:20) Ɛsɔ sɛyaa siɣsiɣ tɩnaa tɩŋa mba pɛwɛ ɛsɔdaa nɛ tataa yɔ pakaɣ hiɣu ñʋʋ yabʋ alɩwaatʋ ndʋ tɩ-taa. Ɛzɩ apostoloo Pɔɔlɩ yɔ, ɖa ɖɔɖɔ ɖa-taa tɛma se paa pɩtɩɩkɛ «kominawaa, yaa wondu ndʋ tɩwɛ lɛɛlɛɛyɔ yɔ, yaa wondu ndʋ tɩkaɣ kɔm yɔ, . . . pɩɩkaɣ pɩzʋʋ nɛ pɩyasɩ-ɖʋ nɛ Ɛsɔ sɔɔlɩm.» (Roma 8:​38, 39) Paa ɛzɩmtaa lɛ, tɔzɩ se Yehowa sɔɔlɩ-ŋ nɛ ɛɛkaɣ-ŋ siɣye haʋ kaaʋ!