1. Alɩwaatʋ ndʋ nɔɔyʋ yɔɔdʋʋ se ɛkpaɣaa nɛ ekpeɣ lɛlʋ yɔ, ɛbɛ yɔɔ pɩwɛ kaɖɛ se pana se toovenim taa lɛ ekpeɣ-i?

 «MANKPAƔAA NƐ MENKPEƔ-Ŋ.» Ye ŋyɔɔdɩ tɔm natʋyʋ yaa ŋlabɩ nabʋyʋ nɛ pɩɖʋ nɔɔyʋ ɖɩwɩzɩyɛ nɛ eheyi-ŋ tɔm ndʋ yɔ, pɩtʋʋ fɛyɩ se pɩhɛzɩɣ ña-laŋɩyɛ siŋŋ. Ɛlɛ ye pɔtɔm se «mankpaɣaa nɛ menkpeɣ-ŋ» yɔ, pʋ-tɔbʋʋ lɛ suwe ɖeyi ɖeyi? Weyi ŋɖʋ-ɩ ɖɩwɩzɩyɛ yɔ, ɛzɩ ɛcaɣ ɛyɔɔdɩ se ña nɛ ɩ ɩɖaɣnɩ pɩsʋʋ taabalaa kɩbama na? Yaa ɛñɩnɩɣ se ɛyɔɔdɩ kɛlɛʋ yem se ɛtɩsɔɔlɩ se ɛtasɩ yɔɔdʋʋ mbʋ pɩlaba yɔ pɩ-tɔm? Alɩwaatʋ ndʋ nɔɔyʋ yɔɔdʋʋ se ɛkpaɣaa nɛ ekpeɣ lɛlʋ yɔ, pɩpɩzɩɣ nɛ pɩwɛɛnɩ tɔbʋʋ nɩʋ ndɩ ndɩ.

 2. Ɛzɩma pɔyɔɔdɩ Yehowa kpaɣʋ nɛ kpeɣu tɔm Masɩ taa? (Kalɩ ɖɔɖɔ pɩ-tɛɛ tɔm.)

² Ɛzɩma Yehowa kpakɩɣ nɛ ekpeɣu ɖa ɛyaa mantɩtalɩ pilimwaa yɔ, pɩwɛ ndɩ kpem nɛ ɛzɩma ɖɩkpakɩɣ nɛ ɖikpeɣu ɖama yɔ. Nɔɔyʋ ɛɛpɩzɩɣ nɛ ɛkpaɣ nɛ ekpeɣ ɛzɩ Yehowa kpakʋʋ nɛ ekpeɣu yɔ. Keɣa maɖʋ yɔɔdɩ Yehowa tɔm se: «Ñɔ-cɔlɔ kpaɣʋ nɛ kpeɣu siŋŋ wɛɛ, se pɩsa nɛ pese-ŋ sɔɔndʋ.» a (Keɣ. 130:4) Toovenim taa lɛ, Yehowa kpaɣʋ nɛ kpeɣu kɛ «kpaɣʋ nɛ kpeɣu siŋŋ.» Ɛnʋ wɩlɩɣnɩ-ɖʋ mbʋ kpaɣʋ nɛ kpeɣu kɛnaa ɖeyi ɖeyi yɔ. Ebree Masɩ hɔɔlɩŋ nɩɩyɩ taa lɛ, Bibl mayaa labɩnɩ tʋmɩyɛ tɔm piye naɖɩyɛ nɛ pɔyɔɔdɩ Yehowa kpaɣʋ nɛ kpeɣu tɔm nɛ patɩlabɩnɩ-ɖɩ tʋmɩyɛ kpa nɛ pɔyɔɔdɩ ɛzɩma ɛyaa kpakɩɣ nɛ pekpeɣu ɖama yɔ pɩ-tɔm.

 3. Ɛbɛ yɔɔ pɔtɔŋ se Yehowa kpaɣʋ nɛ kpeɣu wɛ ndɩ nɛ ɛyaa kpaɣʋ nɛ kpeɣu? (Izaayii 55:​6, 7)

³ Alɩwaatʋ ndʋ Yehowa kpakɩɣ nɛ ekpeɣ nɔɔyʋ yɔ, ɛhɩzɩɣ ɛyʋ ɛnʋ ɛ-kɩwɛɛkɩm caɣ caɣ. Taabalɩyɛ kɩbanɖɛ pɩzɩɣ nɛ ɖɩɖaɣnɩ wɛʋ ɛ nɛ ɩ pɛ-hɛkʋ taa. Ðɩwɛnɩ ɛsɩmɩyɛ siŋŋ se Yehowa kpakɩɣ  nɛ ekpeɣu-ɖʋ caɣ caɣ tam sakɩyɛ.—Kalɩ Izaayii 55:​6, 7.

 4. Ɛzɩma Yehowa sɩɣnɩ-ɖʋ se ɖɩnɩɩ kpaɣʋ nɛ kpeɣu siŋŋ tɔbʋʋ?

⁴ Ye Yehowa kpaɣʋ nɛ kpeɣu ɛwɛ ndɩ nɛ ɛzɩma ɛyaa mantɩtalɩ pilimwaa kpakɩɣ nɛ pekpeɣu ɖama yɔ, ɛzɩma ɖɩpɩzɩɣ nɛ ɖɩnɩɩ kpaɣʋ nɛ kpeɣu siŋŋ tɔbʋʋ? Yehowa tɩŋnɩ Bibl taa tɔm pee kɩbana naayɛ yɔɔ se ɛsɩnɩ-ɖʋ nɛ ɖɩnɩɩ ɛzɩma ɛkpakɩɣ nɛ ekpeɣu-ɖʋ yɔ pʋ-tɔbʋʋ. Tɔm ñʋʋ kʋnɛ kɩ-taa, ɖɩkaɣ tazʋʋ a-taa naayɛ taa. Akaɣ-ɖʋ sɩnʋʋ nɛ ɖɩna ɛzɩma Yehowa hɩzɩɣ kɩwɛɛkɩm nɛ alɩwaatʋ kʋɖʋmtʋ ndʋ tɩ-taa lɛ eyeki se taabalɩyɛ nɖɩ kɩwɛɛkɩm yeba nɛ ɖɩwɛɛkɩ yɔ, ɖɩɖaɣnɩ wɛʋ ɖa nɛ ɩ ɖɛ-hɛkʋ taa yɔ. Ðɩɩtazɩɣ tɔm pee ana a-taa lɛ, ɛsɩmɩyɛ nɖɩ ɖɩwɛnɩ ɖa-Caa sɔɔlɩm tʋ weyi ɛtɩŋɩɣnɩ nʋmɔŋ sakɩyɛ yɔɔ nɛ ekpeɣu-ɖʋ yɔ ɛ-yɔɔ yɔ, ɖɩkaɣ paɣlʋʋ nɛ pɩkɩlɩ.

YEHOWA KƲSƲƲ ÐA-KƖWƐƐKƖM

 5. Ɛbɛ lakɩ alɩwaatʋ ndʋ Yehowa kpeɣu-ɖʋ ɖa-kɩwɛɛkɩm yɔ?

⁵ Bibl taa lɛ, pakpakɩɣ kɩwɛɛkɩm ɖoŋ ɖoŋ nɛ pamaɣzɩɣnɩ sʋʋtʋ yuŋ ñɩndʋ natʋyʋ. Wiyaʋ Daviid yɔɔdɩ ɛ-kɩwɛɛkɩm tɔm ɛzʋnɔ: «Man-kɩwɛɛkɩm kpa huuye nɛ pɩkɩlɩ ma-ñʋʋ; pɩkɩlɩ-m yuŋ kpem, pɩwɛ ɛzɩ sʋʋtʋ sɔsɔtʋ natʋyʋ yɔ.» (Keɣ. 38:4) Ɛlɛ Yehowa kpakɩɣ nɛ ekpeɣu mba pekpiɖiɣ pa-kɩwɛɛkɩm yɔɔ yɔ. (Keɣ. 25:18; 32:5) Ebree tɔm pee wena pɛɖɛzaa se «kpaɣʋ nɛ kpeɣu» yɔ, a-tɔbʋʋ lɛ se «kʋsʋʋ» yaa «kpaɣʋ.» Ye mbʋ, alɩwaatʋ ndʋ Yehowa kpakɩɣ ɖa-kɩwɛɛkɩm nɛ ekpeɣu-ɖʋ yɔ, ɛkʋsʋʋ sʋʋtʋ yuŋ ñɩndʋ ɖɔ-yɔɔ. Pɩwɛ ɛzɩ sʋʋtʋ yuŋ ñɩndʋ kaawɛnɩ ɖa-hazasɩ yɔɔ nɛ ɛkpaɣ-tʋ nɛ ɛɖɛna yɔ.

 6. Ɛzɩma tɩyɛ Yehowa posuuni-ɖʋ ɖa-kɩwɛɛkɩm?

⁶ Bibl labɩnɩ tʋmɩyɛ tɔm pee lɛɛna nɛ kɩwɩlɩɣ se Yehowa kpakɩɣ ɖa-kɩwɛɛkɩm nɛ eposuuni-ɖʋ. Keɣa 103:12 heyiɣ-ɖʋ se: «Ɛzɩ wɩsɩ ɖɩlɩyɛ posuu kpem nɛ wɩsɩ ɖɩɖʋyɛ yɔ, mbʋ ɖɔɖɔ eposini-ɖʋ ɖa-kɩdɛkɛdɩm.» Wɩsɩ ɖɩlɩyɛ kɛnɩ lone nɖɩ ɖɩkɩlɩ posinuu wɩsɩ ɖɩɖʋyɛ yɔ. Lona ana, aakaɣ katʋʋ wiɖiyi kpa. Pʋ-tɔbʋʋ lɛ se Yehowa kpakɩɣ ɖa-kɩwɛɛkɩm nɛ eposuuni-ɖʋ ɖooo poliŋ nɛ pɩkɩlɩ ɛzɩma ɖɩpɩzɩɣ nɛ ɖɩmaɣzɩ yɔ. Tɔm ndʋ, tɩhɛzɩɣ ɖa-laŋɩyɛ se Yehowa kpakɩɣ ɖa-kɩwɛɛkɩm nɛ ekpeɣu-ɖʋ caɣ caɣ.

 7. Bibl yɔɔdaa se ɛbɛ Yehowa lakɩnɩ ɖa-kɩwɛɛkɩm? (Mikee 7:​18, 19)

⁷ Paa Yehowa ɛkpakɩɣ ɖa-kɩwɛɛkɩm nɛ eposuuni-ɖʋ yɔ, ɛzɩ ɛsɩɣ-pʋ ɛ-ɛsɩndaa mbʋ tam? Aayɩ. Wiyaʋ Ezekiyaasɩ yɔɔdɩ Yehowa tɔm se: «Ŋlɔ man-kɩwɛɛkɩm kpeekpe ñe-siɣye wayɩ.» Yaa ɛzɩ pɩ-tɛɛ tɔm yɔɔdʋʋ yɔ: «Ŋkʋsɩ man-kɩwɛɛkɩm kpeekpe ñɛ-ɛsɩndaa.» (Iza. 38:​9, 17; pɩ-tɛɛ tɔm) Tɔm pee ana, awɩlɩɣ se Yehowa kʋsʋʋ mba pekpiɖiɣ yɔ pa-kɩwɛɛkɩm ɛ-ɛsɩndaa nɛ ɛɛtasɩɣ-pʋ cɔnʋʋ. Papɩzɩɣ nɛ pɛɖɛzɩ tɔm loyaɣ ŋga ɖɔɖɔ ɛzʋnɔ: «Ŋyeba nɛ [man-kɩwɛɛkɩm] pɩsɩ ɛzɩ wiɖiyi pɩtaawɛɛ yɔ.» Palabɩnɩ tʋmɩyɛ tɔm pee lɛɛna Mikee 7:​18, 19 taa nɛ pañɩɣnɩ niye lɩmaɣzɩyɛ nɖɩ ɖɩ-yɔɔ. (Kalɩ Mikee 7:​18, 19.) Masɩ nzɩ sɩyɔɔdʋʋ se Yehowa lɔʋ ɖa-kɩwɛɛkɩm ɖooo teŋgu cukaŋ taa. Caanaʋ taa lɛ, ye pɔlɔ wonuu nakʋyʋ teŋgu cukaŋ taa yɔ, ɛyʋ nɔɔyʋ taapɩzɩɣ se ɛlɩzɩ-kʋ.

 8. Ðɩyɔɔdʋʋ nɛ pɩtalɩ cɩnɛ yɔ, ɛbɛ ɖɩkpɛlɩkaa?

⁸ Bibl wɩlɩ-ɖʋ kpayɩ kpayɩ se alɩwaatʋ ndʋ Yehowa kpakɩɣ ɖa-kɩwɛɛkɩm nɛ ekpeɣu-ɖʋ yɔ, ɛhɩzɩɣ-pʋ caɣ caɣ nɛ pɩtɩcɛyɩ se ɖɩtasɩ kʋʋ ɖa-tɩ tɔm. Ɛzɩ Daviid yɔɔdʋʋ yɔ, toovenim taa lɛ, «koboyaɣ tɩnaa lɛ mba pamanɩ paɣtʋ yɔɔ ɛlɛ pekpeɣ-wɛ yɔ, nɛ mba pa-kɩdɛkɛdɩm yɔɔ pohuuzaa yɔ; koboyaɣ tʋ lɛ ɛyʋ weyi Yehowa ɛɛkaɣ kpaɣʋ ɛ-kɩwɛɛkɩm nɛ ɛlabɩnɩ tʋmɩyɛ kaaʋ yɔ.» (Roma 4:​7, 8) Kpaɣʋ nɛ kpeɣu siŋŋ lɛ!

 YEHOWA HƖZƖƔ ÐA-KƖWƐƐKƖM

 9. Ɛzɩma Bibl sɩnɩ-ɖʋ nɛ ɖɩna se Yehowa kpeɣu-ɖʋ ɖa-kɩwɛɛkɩm caɣ caɣ?

⁹ Yehowa labɩnɩ tʋmɩyɛ tɔm pee lɛɛna se ɛsɩnɩ-ɖʋ nɛ ɖɩna ɛzɩma ɛtɩŋɩɣnɩ kɩhɛyʋʋ pʋ-ñʋʋ taa kɩlaʋ yɔɔ nɛ ɛhɩzɩɣ mba pekpiɖiɣ yɔ pa-kɩwɛɛkɩm yɔ. Ðɩkalɩɣ Bibl taa se Yehowa ñalɩɣ kɩwɛɛkɩm nɛ ɛhɩzɩɣ-pʋ. Piyeki nɛ kɩwɛɛkɩm laɖʋ wɛɛ kele kele. (Keɣ. 51:7; Iza. 4:4; Yer. 33:8) Yehowa maɣmaɣ yɔɔdɩ mbʋ pɩkaɣ lɩʋ pɩ-taa yɔ pɩ-tɔm. Ɛyɔɔdaa se: «Paa mɩ-kɩwɛɛkɩm ɩsɛ cɩɩɩ ɛzɩ calɩm yɔ, pɩkaɣ hʋlʋmʋʋ ɛzɩ ɖɔmbɛɛ yɔ; paa pɩɩsɛ cɩɩɩ ɛzɩ pɩsaʋ kɩsɛɛmʋʋ cɩɩɩ yɔ, pɩkaɣ hʋlʋmʋʋ ɛzɩ heŋ hʋndʋ kʋhʋlʋmʋtʋ yɔ.» (Iza. 1:18) Pɩwɛ kaɖɛ kpem se ɛyʋ ɛlɩzɩ tɔlɩm kɩsɛɛmɩm cɩɩɩ pɩsaʋ nakʋyʋ yɔɔ. Ɛlɛ Yehowa labɩnɩ tʋmɩyɛ tɔm pee anɛ se pɩsa nɛ ɖa-taa tɛ se ɛpɩzɩɣ nɛ ɛñalɩ ɖa-kɩwɛɛkɩm nɛ pɩlɩɩ caɣ caɣ nɛ pɩɩtasɩɣ-pʋ naʋ.

10. Ɛzɩma Bibl wɩlɩɣ se Yehowa kpeɣu-ɖʋ ɖa-kɩwɛɛkɩm faaa?

¹⁰ Ɛzɩ ɖɩnaʋ tɔm ñʋʋ ŋgʋ kɩɖɛwa yɔ kɩ-taa yɔ, pakpaɣ kɩwɛɛkɩm nɛ pamaɣzɩnɩ «kɩma.» (Mat. 6:12; Luka 11:4) Pʋyɔɔ lɛ, alɩwaatʋ ndʋ payɩ ɖɩyʋsʋʋnɩ Yehowa yɔ, ɖa-kɩmɩyɛ wɛɛ nɛ ɖɩpaɣlɩɣ nɛ pɩkɩlɩɣ. Ðɩtɔɔ-ɩ kɩmɩyɛ sɔsɔɖɛ kpem! Ɛlɛ alɩwaatʋ ndʋ Yehowa kpeɣu-ɖʋ yɔ, pɩwɛ ɛzɩ ekpeɣ-ɖʋ kɩmɩyɛ nɖɩ ɖɩtɔɔ-ɩ yɔ. Ɛɛpɔzʋʋ-ɖʋ se ɖɩhɛyɩ kɩwɛɛkɩm mbʋ ekpeɣ-ɖʋ yɔ pɩ-yɔɔ. Ɛyʋ weyi pekpeɣ-i ɛ-kɩmɩyɛ yɔ, ɛ-taa lakɩ leleŋ siŋŋ; mbʋ ɖɔɖɔ ɖa-taa lakɩ leleŋ siŋŋ alɩwaatʋ ndʋ Yehowa kpeɣu-ɖʋ ɖa-kɩwɛɛkɩm yɔ.

11. Bibl yɔɔdʋʋ se pahɩzɩɣ ɖa-kɩwɛɛkɩm yɔ pʋ-tɔbʋʋ lɛ suwe? (Tʋma Labʋ 3:19)

¹¹ Pɩɩsɩɣnɩ yem se Yehowa kpeɣu-ɖʋ ɖa-kɩma yaa ɖa-kɩwɛɛkɩm, ɛlɛ ɛhɩzɩɣ-pʋ ɖɔɖɔ. (Kalɩ Tʋma Labʋ 3:19.) Pɩsa nɛ ɖɩnɩɩ pɩ-taa lɛ, ɖɩkpaɣ kɩɖaʋ nakʋyʋ: kpaɣ se ŋtɔɔ nɔɔyʋ kɩmɩyɛ naɖɩyɛ nɛ ɛma-ɖɩ takayaɣ nakɛyɛ taa, nɛ pʋwayɩ lɛ ɛhɛɛ caŋa kɩmɩyɛ nɖɩ ɖɩ-taa nɛ pɩwɩlɩ se ekpeɣ-ŋ ɖɩ. Paa mbʋ yɔ, ɛyʋ pɩzɩɣ nɛ ɛna kɩmɩyɛ nɖɩ ŋtɔwaa yɔ caŋa ŋga kɛ-tɛɛ. Ɛlɛ ye pahɩzɩ nabʋyʋ kɩhɩzʋʋ yɔ pɩwɛ ndɩ. Pɩsa nɛ ɖɩnɩɩ tɔm tʋnɛ tɩ-taa lɛ, pɩwɛɛ se ɖɩtɔzɩ se tɔlɩm mbʋ ɛyaa lakaɣnɩ tʋmɩyɛ caanaʋ taa yɔ, papɩzaɣ se pakpaɣ lɩm nɛ pahɩzɩ-pʋ kɛlɛʋ yem. Ɛyʋ pɩzaɣ se elii sabʋʋ nakʋyʋ lɩm taa nɛ ɛhɩzɩ mbʋ pamanɩ tɔlɩm mbʋ yɔ. Ye mbʋ alɩwaatʋ ndʋ ‘pahɩzɩɣ’ kɩmɩyɛ naɖɩyɛ yɔ, ɖɩmʋkɩ caɣ caɣ. Ɛyʋ ɛɛpɩzɩɣ nɛ ɛtasɩ naʋ tɔm ndʋ paamawa yɔ. Pɩwɛɣ ɛzɩ kɩmɩyɛ nɖɩ ɖɩtaawɛɛ wiɖiyi nɛ ɖɩna yɔ. Pɩhɛzɩɣ ɖa-laŋa siŋŋ se ɖɩna se alɩwaatʋ ndʋ Yehowa kpeɣu-ɖʋ ɖa-kɩwɛɛkɩm yɔ, ɛhɩzɩɣ-pʋ caɣ caɣ.—Keɣ. 51:9.

12. Ɛbɛ ɛsɔmɩnʋʋ sɔsɔʋ kɩɖaʋ kpɛlɩkɩɣ-ɖʋ?

¹² Yehowa labɩnɩ tʋmɩyɛ tɔm pee lɛɛna nɛ ɛwɩlɩ ɛzɩma ɛhɩzɩɣ ɖa-kɩwɛɛkɩm yɔ. Ɛyɔɔdaa se: «Mankaɣ huuzuu ña-kɩdɛkɛdɩm yɔɔ ɛzɩ ɛsɔmɩnʋʋ pohuuzinaa yɔ nɛ mohuuzi ña-kɩwɛɛkɩm yɔɔ ɛzɩ ɛsɔmɩnʋʋ sɔsɔʋ pohuuzinaa yɔ.» (Iza. 44:22) Alɩwaatʋ ndʋ Yehowa kpeɣu-ɖʋ ɖa-kɩwɛɛkɩm yɔ, pɩwɛ ɛzɩ ɛkpaɣ ɛsɔmɩnʋʋ sɔsɔʋ nakʋyʋ nɛ ehuuzi pɩ-yɔɔ se pɩsa nɛ nɔɔyʋ ɛtaatasɩ-pʋ naʋ yɔ.

13. Alɩwaatʋ ndʋ Yehowa kpeɣu-ŋ ña-kɩwɛɛkɩm yɔ, ɛzɩma pɩlakɩ-ŋ?

¹³ Ɛbɛ tɔm tʋnɛ tɩkpɛlɩkɩɣ-ɖʋ? Alɩwaatʋ ndʋ Yehowa kpeɣu-ɖʋ ɖa-kɩwɛɛkɩm yɔ, pɩfɛyɩ se ɖiwolo pɩ-yɔɔ nɛ ɖɩkʋʋ ɖa-tɩ tɔm ɖa-kɩwɛɛkɩm mbʋ pɩ-yɔɔ ɖe-wezuu caɣʋ kpeekpe. Yehowa tɩŋnɩ Yesu calɩm yɔɔ nɛ ekpeɣ-ɖʋ ɖa-kɩwɛɛkɩm caɣ caɣ. Halɩ pɩwɛ ɛzɩ wiɖiyi ɖɩtɩla kɩwɛɛkɩm mbʋ nɛ ɖɩna yɔ. Ye ɖikpiɖi ɖa-kɩwɛɛkɩm yɔɔ yɔ, mbʋ Yehowa kpeɣu-ɖʋ.

YEHOWA YEKI SE TAABALƖYƐ KƖBANÐƐ ƐÐAƔNƖ WƐƲ ÐA NƐ Ɩ ÐƐ-HƐKƲ TAA

14. Ɛbɛ yɔɔ ɖɩpɩzɩɣ nɛ ɖɩtaa Yehowa liu se ɛkaɣ-ɖʋ kpeɣu ɖa-kɩwɛɛkɩm caɣ caɣ? (Cɔnɩ ɖɔɖɔ kɩlɛmɩŋ.)

¹⁴ Alɩwaatʋ ndʋ Yehowa kpeɣu-ɖʋ ɖa-kɩwɛɛkɩm yɔ, pɩhaɣ-ɖʋ waɖɛ se taabalɩyɛ kɩbanɖɛ  ɛɖaɣnɩ wɛʋ ɖa nɛ ɩ ɖɛ-hɛkʋ taa. Pɩsɩɣnɩ-ɖʋ se ɖɩtaawɛɛ nɛ ɖɩkʋʋ ɖa-tɩ tɔm kadadayaɣ. Pɩtɩpɔzɩ se sɔɔndʋ ɛkpa-ɖʋ se pʋtɔma yɔ Yehowa taa wɛɛ nɛ pɩwɩɣnɩ-ɖʋ nɛ ɛwɛɛ nɛ ɛñɩnɩɣ nʋmɔʋ nakʋyʋ se ɛtɩŋnɩ kɩ-yɔɔ nɛ ɛhɔ ɖa-nɩŋgbaŋʋʋ. Yehowa ɛɛkaɣ labʋ mbʋ kpa. Alɩwaatʋ ndʋ Yehowa heyiɣ-ɖʋ se ekpeɣu-ɖʋ ɖa-kɩwɛɛkɩm yɔ, ɛbɛ yɔɔ ɖɩpɩzɩɣ nɛ ɖɩtaa-ɩ liu? Yehowa heyi nayʋ Yereemii se: «Mankaɣ-wɛ kpeɣu pa-kɩdɛkɛdɩm, nɛ maakaɣ tasʋʋ tɔzʋʋ pa-kɩwɛɛkɩm yɔɔ.» (Yer. 31:34) Apostoloo Pɔɔlɩ labɩnɩ tʋmɩyɛ tɔm pee wena anɩɣzɩnɩ mbʋ yɔ nɛ ɛyɔɔdɩ tɔm ndʋ Yereemii yɔɔdaa yɔ. Ɛtɔm se: «Maakaɣ tasʋʋ tɔzʋʋ pa-kɩwɛɛkɩm yɔɔ.» (Ebr. 8:12) Ɛlɛ pʋ-tɔbʋʋ lɛ suwe ɖeyi ɖeyi?

15. Yehowa yɔɔdʋʋ se ɛɛkaɣ tasʋʋ tɔzʋʋ ɖa-kɩwɛɛkɩm yɔɔ yɔ, pʋ-tɔbʋʋ lɛ suwe?

¹⁵ Bibl taa lɛ, tɔm piye «tɔzʋʋ» ɛɛwɩlɩɣ paa ɛzɩmtaa se nɔɔyʋ tɔzʋʋ nabʋyʋ yɔɔ yaa ɛmaɣzɩɣ pɩ-yɔɔ. Ɛlɛ, pɩpɩzɩɣ nɛ pɩwɩlɩ se ɛlakɩ nabʋyʋ. Kɩdɛkɛdɩm laɖʋ weyi paakam Yesu cɔlɔ yɔ eheyi-i se: «Yesu, tɔzɩ mɔ-yɔɔ alɩwaatʋ ndʋ ŋsʋʋ ñe-Kewiyaɣ taa yɔ.» (Luka 23:​42, 43) Etaaheyiɣ Yesu yem se ɛmaɣzɩ ɛ-yɔɔ alɩwaatʋ ndʋ ɛsʋʋ e-Kewiyaɣ taa yɔ. Tɔm ndʋ Yesu cosi kɩdɛkɛdɩm laɖʋ ɛnʋ yɔ tɩwɩlɩɣ se ɛkaɣ nabʋyʋ labʋ nɛ efezi-i. Ye mbʋ, Yehowa yɔɔdʋʋ se ɛɛkaɣ tasʋʋ tɔzʋʋ ɖa-kɩwɛɛkɩm yɔɔ yɔ, ɛñɩnɩɣ yɔɔdʋʋ se ɛɛkaɣ-ɖʋ nabʋyʋ labʋ ɖa-kɩwɛɛkɩm mbʋ pɩ-yɔɔ. Ɛɛkaɣ hɔm ɖa-nɩŋgbaŋʋʋ wiɖiyi kɩwɛɛkɩm mbʋ ekpeɣ-ɖʋ yɔ pɩ-yɔɔ.

16. Mba Bibl kpaɣ-ɖʋ nɛ kɩmaɣzɩna?

¹⁶ Bibl labɩnɩ tʋmɩyɛ tɔm pee lɛɛna se kɩsɩnɩ-ɖʋ nɛ ɖɩnɩɩ pɩ-taa se alɩwaatʋ ndʋ Yehowa kpeɣu-ɖʋ ɖa-kɩwɛɛkɩm yɔ, ɖɩwɛɣ ɖa-tɩ yɔɔ. Ðɛ-tɛ mantɩtalɩ pilim wɛtʋ yeba nɛ ɖɩpɩsɩ «kɩwɛɛkɩm yomaa.» Ɛlɛ alɩwaatʋ ndʋ Yehowa kpeɣu-ɖʋ ɖa-kɩwɛɛkɩm yɔ, ɖɩwɛ ɛzɩ yomaa mba ‘poholi-wɛ kɩwɛɛkɩm nesi tɛɛ yɔ.’ (Roma 6:​17, 18; Natʋ 1:5) Alɩwaatʋ ndʋ ɖɩnaɣ se Yehowa kpeɣ-ɖʋ ɖa-kɩwɛɛkɩm yɔ, ɖa-taa pɩzɩɣ nɛ pɩla leleŋ ɛzɩ yom weyi poholi-i nɛ ɛwɛɛ ɛ-tɩ yɔɔ yɔ.

17. Ɛzɩma tɩyɛ Yehowa kpaɣʋ nɛ kpeɣu yeki se ɖɔ-yɔɔ ɛcɛ? (Izaayii 53:5)

 ¹⁷ Kalɩ Izaayii 53:5. Bibl yɔɔdʋʋ se ɖa-kɩwɛɛkɩm yɔɔ lɛ, ɖɩwɛ ɛzɩ ɛyaa mba pɛwɛnɩ kʋdɔŋ ŋgʋ kɩkɔŋnɩ sɩm yɔ. Ɛlɛ Yehowa tɩŋnɩ kɩhɛyʋʋ pʋ-ñʋʋ taa kɩlaʋ ŋgʋ ɛ-Pɩyalʋ lawa yɔ kɩ-yɔɔ nɛ ɛwaa-ɖʋ. (1 Pɩy. 2:24) Kɩhɛyʋʋ pʋ-ñʋʋ taa kɩlaʋ haɣ-ɖʋ waɖɛ se ɖɩñɔɔzɩ ɖa nɛ Yehowa ɖɛ-hɛkʋ taa taabalɩyɛ nɖɩ ɖa-kɩwɛɛkɩm kaawɛɛkaa yɔ. Alɩwaatʋ ndʋ pawaɣ nɔɔyʋ kʋdɔŋ sɔsɔʋ nakʋyʋ yɔ, ɛ-taa lakɩ leleŋ siŋŋ. Mbʋ ɖɔɖɔ ɖa-taa lakɩ leleŋ siŋŋ alɩwaatʋ ndʋ Yehowa kpeɣu-ɖʋ ɖa-kɩwɛɛkɩm nɛ taabalɩyɛ kɩbanɖɛ ɖaɣnɩ wɛʋ ɖa nɛ ɩ ɖɛ-hɛkʋ taa yɔ.

ƐZƖMA YEHOWA KPAƔƲ NƐ KPEƔU WAZƖƔ-ÐƲ?

18. Ɛbɛ ɖɩkpɛlɩkɩ Bibl taa tɔm pee ndɩ ndɩ wena ayɔɔdʋʋ Yehowa kpaɣʋ nɛ kpeɣu tɔm yɔ a-taa? (Kalɩ ɖɔɖɔ aɖakaɣ «Ɛzɩma Yehowa kpeɣu-ɖʋ ɖa-kɩwɛɛkɩm?»)

¹⁸ Ɛbɛ ɖɩkpɛlɩkɩ Bibl taa tɔm pee wena ayɔɔdʋʋ Yehowa kpaɣʋ nɛ kpeɣu tɔm yɔ a-taa? Alɩwaatʋ ndʋ Yehowa kpeɣu-ɖʋ ɖa-kɩwɛɛkɩm yɔ, pɩwɛ ɛzɩ wiɖiyi ɖɩtɩla kɩwɛɛkɩm mbʋ nɛ ɖɩna yɔ. Nɛ ɖa-taa pɩzɩɣ nɛ pɩtɛ se wiɖiyi ɛɛkaɣ ɖa-nɩŋgbaŋʋʋ hɔm kɩwɛɛkɩm mbʋ pɩ-yɔɔ. Piyeki se taabalɩyɛ kɩbanɖɛ ɛwɛɛ ɖa nɛ ɖa-Caa weyi ɛwɛ ɛsɔdaa yɔ ɖɛ-hɛkʋ taa. Alɩwaatʋ kʋɖʋmtʋ ndʋ tɩ-taa lɛ, ɖɩɩsɔʋ se kpaɣʋ nɛ kpeɣu siŋŋ kɛnɩ kʋjɔʋ. Yehowa lakɩ-ɖʋ kʋjɔʋ ŋgʋ mbʋ pʋyɔɔ yɔ ɛsɔɔlɩ-ɖʋ nɛ ɛlakɩ-ɖʋ camɩyɛ lakasɩ; ɛlɛ pɩtɩkɛ se ɖɩmʋnaa yɔɔ ɛlakɩ-ɖʋ kʋjɔʋ ŋgʋ.—Roma 3:24.

19. (a) Pɩpɔzʋʋ se ɖɩwɛɛnɩ ɛsɩmɩyɛ ɛbɛ yɔɔ? (Roma mba 4:8) (b) Ɛbɛ ɖɩkaɣ naʋ tɔm ñʋʋ ŋgʋ kɩkɔŋ yɔ kɩ-taa?

¹⁹ Kalɩ Roma mba 4:8. Ðɩwɛnɩ ɛsɩmɩyɛ siŋŋ Yehowa yɔɔ mbʋ pʋyɔɔ yɔ ɛkɛ «kpaɣʋ nɛ kpeɣu siŋŋ» tɛ Ɛsɔ. (Keɣ. 130:4) Ɛlɛ, pʋcɔ nɛ Yehowa kpeɣ-ɖʋ ɖa-kɩwɛɛkɩm lɛ, pɩpɔzʋʋ se ɖɩla nabʋyʋ nɛ pɩ-tɔm cɛyaa. Yesu yɔɔdaa se: «Ye iikpeɣu ɛyaa pa-kɩwɛɛkɩm yɔ, mɩ-Caa weyi ɛwɛ ɛsɔdaa yɔ, ɛɛkaɣ-mɩ kpeɣu ɖɔɖɔ mɩ-kɩwɛɛkɩm.» (Mat. 6:​14, 15) Ye mbʋ, pɩnaɣ kpayɩ kpayɩ se pɩpɔzʋʋ se ɖɩmaɣzɩnɩ Yehowa nɛ ɖikpeɣ lalaa pa-kɩwɛɛkɩm. Ɛlɛ ɛzɩma ɖɩpɩzɩɣ nɛ ɖɩla mbʋ? Ðɩkaɣ tazʋʋ tɔm ndʋ tɩ-taa tɔm ñʋʋ ŋgʋ kɩkɔŋ yɔ kɩ-taa.