Mary nɛ ɛ-walʋ John a pɛwɛ ɛjaɖɛ nɖɩ ɖɩ-taa ɛyaa sakɩyɛ lɩnɩ Filipiini nɛ powolo se pala tʋmɩyɛ yɔ, nɛ pa-taa wɛ leleŋ se posusi ɛyaa mba tɔm kɩbandʋ. COVID-19 kʋdɔŋ alɩwaatʋ taa, Mary paɣzɩ Bibl kpɛlɩkɩnʋʋ ɛyaa mba pɛwɛ ɛjaɖɛ nɖɩ ɖɩ-taa ɛwɛɛ yɔ. Ɛlɛ ɛpaɣzɩ ɖɔɖɔ kpɛlɩkɩnʋʋ ɛyaa mba pɛwɛ ajɛɛ lɛɛna taa yɔ. Ɛzɩma ɛpɩzaa nɛ ɛla mbʋ?

Mary pɔzaɣ e-Bibl kpɛlɩkɩyaa se: «Ŋsɩm nɔɔyʋ se ɛsɔɔlaa se ɛkpɛlɩkɩ Bibl na?» Ye pocosaa se ɛɛɛ yɔ, ɛpɔzʋʋ-wɛ se pasɩnɩ-ɩ nɛ ɛ nɛ wɛ pɔyɔɔdɩ. Ðoŋ ɖoŋ lɛ, tɔm pɔzʋʋ kɛlɛʋ ñɩmbʋ mbʋ, pɩlʋlaɣ pee kɩbana. Ɛbɛ yɔɔ? Mbʋ pʋyɔɔ yɔ ɛyaa mba pɔsɔɔlɩ Ɛsɔtɔm yɔ, ɖoŋ ɖoŋ lɛ, pɔsɔɔlaa se peheyi pɔ-hɔŋ taa mba nɛ pa-taabalaa tɔm ndʋ pɛkpɛlɩkɩɣ yɔ tɩ-tɔm. Mary pɔzaɣ tɔm ndʋ lɛ, pee kɩbana wena pɩlʋlaɣ?

Mary Bibl kpɛlɩkɩyʋ weyi payaɣ se Jasmin yɔ eheyi-i ɛyaa 4 tɔm se paba ɖɔɖɔ pɔsɔɔlaa se pɛkpɛlɩkɩ Bibl. Pa-taa lɛlʋ lɛ Kristine. Kristine kaasɔɔlɩ kpɛlɩkʋʋ siŋŋ nɛ halɩ eheyi Mary se pɛkpɛlɩkɩ tam nabʋlɛ kpɩtaʋ taa. Mary pɔzɩ-ɩ se ɛsɩm nɔɔyʋ se ɛsɔɔlɩ Bibl kpɛlɩkʋʋ lɛ, eheyi-i se: «Ɛɛɛ, mankaɣ-ŋ sɩnʋʋ nɛ ŋyɔɔdɩnɩ man-taabalaa.» Kpɩtaŋ pazɩ wayɩ lɛ, Kristine sɩnɩ Mary nɛ ɛyɔɔdɩnɩ ɛ-taabalaa mba pɔsɔɔlɩ kpɛlɩkʋʋ yɔ, pɛkpɛndɩ 4. Pʋwayɩ lɛ, Kristine tasɩ heyuu Mary ɛ-taabalaa lalaa tɔm. Nɛ paba ɖɔɖɔ pa-taa nabɛyɛ heyi Mary pa-taabalaa nabɛyɛ tɔm.

Kristine kaasɔɔlaa ɖɔɖɔ se ɛ-hɔʋ taa ñɩma mba pɛwɛ Filipiini yɔ pɛkpɛlɩkɩ Bibl. Pʋyɔɔ ɛyɔɔdɩnɩ ɛ-pɛlɛ Andrea. Kiɖɛ tɛɛ lɛ Andrea yɔɔdaɣ se: «Yehowa Aseɣɖe Tɩnaa kɛ kɩjaʋ yɔɔ ɛgbɛyɛ naɖɩyɛ; paatisiɣ Yesu yɔɔ, nɛ Bibl taa, Nɔɔ Haʋ Kɩbɩm ɖeke palakɩnɩ tʋmɩyɛ.» Ɛlɛ pɛkpɛlɩkɩ tam kʋɖʋm ɖeke lɛ, eɖiɣzina se tɔm ndʋ ɛmaɣzaɣ Aseɣɖe Tɩnaa yɔɔ yɔ tɩtɩkɛ toovenim. Paa ɛzɩmtaa ɛkpɛlɩkɩɣ tɔm kɩfatʋ natʋyʋ Bibl taa lɛ, ɛyɔɔdaɣ se: «Ye Bibl ɛyɔɔdɩ tɔm ndʋ yɔ, pɩwɩlɩɣ se tɩkɛ toovenim.»

Pʋwayɩ lɛ, Andrea sɩnɩ Mary nɛ ɛpaɣzɩ Bibl kpɛlɩkɩnʋʋ ɛ-taabalaa 2 nɛ ɛ-tʋmɩyɛ taa taabalʋ nɔɔyʋ. Pɩtasɩ lɛ, Andrea caa neu halɩñɩnʋ nɔɔyʋ kɛ yʋlʋm, payaɣ-ɩ se Angela. Alɩwaatʋ ndʋ Mary nɛ Andrea pɛkpɛlɩkaɣ yɔ ewelisaɣ, ɛlɛ Mary taaɖiɣzina. Kɩyakʋ nakʋyʋ lɛ, Angela heyi Andrea se ɛyɔɔdɩnɩ Mary nɛ ɛpaɣzɩ ɛnʋ ɖɔɖɔ Bibl kpɛlɩkɩnʋʋ. Angela kaasɔɔlɩ tɔm ndʋ ɛkpɛlɩkaɣ yɔ. Fenaɣ kʋɖʋmaɣ taa, ɛɛɖɔkɩ masɩ sakɩyɛ taa tɔm ɛ-ñʋʋ taa, nɛ ɛɛsɔɔlaa se ɛkpɛlɩkɩ tam nabʋnaza kpɩtaʋ taa. Andrea sɩnɩ-ɩ nɛ ɛtɩŋnɩ visioconférence yɔɔ nɛ ɛpaɣzɩ kediɣzisi taa tɔm welisuu ɖoŋ ɖoŋ.

Alɩwaatʋ ndʋ Mary nɩwa se paa ɛzɩmtaa ɛ nɛ Kristine paakpɛlɩkɩɣ lɛ, Kristine walʋ Joshua cakɩ  pɩ-cɔlɔ lɛ, Mary heyi-i se ɛsɔzɩ pɔ-yɔɔ nɛ pɛkpɛlɩkɩ. Nɛ Joshua cosi-i se: «Mankaɣ welisuu kiwelisu, ɛlɛ taapɔzɩ-m tɔm natʋyʋ. Ye ŋpɔzɩ-m tɔm yɔ mɛnɖɛɣ kpaagbaa.» Papaɣzɩ kpɛlɩkʋʋ nɛ pɩla ɛzɩ cɛcɛsɩ 5 mbʋ yɔ lɛ, Joshua tɛm pɔzʋʋ tɔm sakɩyɛ nɛ pɩkɩlɩ ndʋ Kristine pɔzaa yɔ; nɛ ɛnʋ ɖɔɖɔ ɛpɔzɩ se pɛkpɛlɩkɩnɩ-ɩ Bibl.

Tɔm kɛlɛʋ ñɩndʋ ndʋ Mary pɔzaɣ yɔ, tiyeba nɛ ɛpaɣzɩ ɛyaa sakɩyɛ Bibl kpɛlɩkɩnʋʋ. Ɛlabɩ ɖʋtʋ nɛ koobiya lalaa kpɛlɩkɩnɩ pa-taa sakɩyɛ. Ɛyaa mba Mary paɣzɩ Bibl kpɛlɩkɩnʋʋ yɔ pa-tɩŋa paakpɛndɩ ɛyaa 28, nɛ pɛwɛ ajɛɛ 4 taa.

Jasmin, Bibl kpɛlɩkɩyʋ kajalaɣ ñɩnʋ weyi pɔyɔɔdɩ ɛ-tɔm kɩɖaʋ kʋnɛ kɩ-taa yɔ, pamɩyɩsɩ-ɩ lɩm avril 2021 taa. Pamɩyɩsɩ Kristine lɩm mai 2022 taa; ɛpɩsɩ ɛ-hɔʋ cɔlɔ Filipiini ɛjaɖɛ taa. Pamɩyɩsɩ ɖɔɖɔ ɛyaa mba Kristine heyi Mary pɔ-tɔm nɛ ɛkpɛlɩkɩnɩ-wɛ yɔ pa-taa 2 lɩm. Pamɩyɩsɩ Angela lɩm fenasɩ nasɩyɩ wayɩ, nɛ lɛɛlɛɛyɔ lɛ ɛpɩsɩ paa ɖooye nʋmɔʋ lɩzɩyʋ. Kristine walʋ Joshua, pɛ-pɛlɛ Andrea nɛ Bibl kpɛlɩkɩyaa lalaa sakɩyɛ, pɛwɛɛ nɛ pɛɖɛɣnɩ ɛsɩndaa fezuu taa.

Kajalaɣ pɩnzɩ mɩnʋʋ taa, ɛyaa sakɩyɛ kaaheyi pɔ-hɔŋ taa mba nɛ pa-taabalaa tɔm ndʋ paakpɛlɩkɩ Yesu yɔɔ yɔ tɩ-tɔm. (Yoh. 1:​41, 42a; Tʋma 10:​24, 27, 48; 16:​25-33) Pɩwɛɣ ɖeu se ŋpɔzɩ ñe-Bibl kpɛlɩkɩyaa nɛ ɛyaa lalaa mba Bibl tɔm kɛdɩnɩ-wɛ yɔ se: «Ŋsɩm nɔɔyʋ se ɛsɔɔlaa se ɛkpɛlɩkɩ Bibl na?» Ye ŋpɔzɩ tɔm kɛlɛʋ ñɩndʋ ndʋ yɔ, pʋtɔma yɔ ña ɖɔɖɔ ŋkaɣ naʋ ɛyaa sakɩyɛ mba pɔsɔɔlaa se pɛkpɛlɩkɩ Bibl yɔ.