1. Ɛbɛ Yehowa yɔɔdaa se pɩkaɣ labʋ ɖa-alɩwaatʋ taa?

YEHOWA kaayɔɔdɩ ɖa-alɩwaatʋ tʋnɛ tɩ-yɔɔ tɔm se: “Ajɛɛ yɔɔdasɩ kpeekpe taa ɛyaa hiu kaɣ kpibu Yuuda tʋ toko nɔɔ mbʋ yɔ se: ‘Ða nɛ mɩ ɖɩkaɣ wobu; toovenim ɖɩnɩwa se Ɛsɔ wɛ mɩ-cɔlɔ.’” (Zek. 8:23) Mayaɣ kanɛ ka-taa, “Yuuda tʋ” sɩŋnɩ mba Ɛsɔ ta-wɛ num fezuu kiɖeɖeu taa yɔ. Payaɣ-wɛ ɖɔɖɔ se “Ɛsɔ tɛ Izrayɛɛlɩ.” (Gal. 6:16) “Ɛyaa hiu” sɩŋnɩ mba pɛwɛnɩ lidaʋ se pacakɩ wezuu tam tɛtʋ yɔɔ yɔ. Panawa se Yehowa wazɩ patam numwaa samaɣ ŋga, nɛ pamaɣzɩɣ se pɩkɛnɩ-wɛ hɩɖɛ ɖʋʋ se pa nɛ wɛ pɛkpɛndɩ nɛ pɛsɛɛ-ɩ.

2. Ɛzɩma tɩyɛ “ɛyaa hiu” nɛ patam numwaa ‘powoki’?

² Paa pɩɩsaŋ se ɛyʋ ɛtɩlɩ patam numwaa mba pɛwɛ tɛtʋ yɔɔ sɔnɔ * yɔ pa-taa paa weyi lɛ ɛ-hɩɖɛ yɔ, mba pɛwɛnɩ lidaʋ se pakaɣ caɣʋ tɛtʋ yɔɔ yɔ, pa nɛ patam numwaa papɩzɩɣ nɛ ‘powolo.’ Ɛzɩma tɩyɛ? Bibl yɔɔdʋʋ se “ɛyaa hiu” kaɣ “kpibu Yuuda tʋ toko nɔɔ mbʋ yɔ se: ‘Ða nɛ mɩ ɖɩkaɣ wobu; toovenim ɖɩnɩwa se Ɛsɔ wɛ mɩ-cɔlɔ.’” Bibl mayaɣ ŋga, kɔyɔɔdʋʋ Yuuda tʋ kʋɖʋm tɔm. Ɛlɛ tɔm pee “mɩ” nɛ “mɩ-cɔlɔ” wɩlɩɣ se pɩtɩkɛ ɛyʋ kʋɖʋm tɔm pɔyɔɔdʋʋ. Pʋ-tɔbʋʋ se Yuuda tʋ ɛnʋ ɛtɩkɛ ɛyʋ kʋɖʋm ɛlɛ ɛsɩŋnɩ patam numwaa samaɣ kpeekpe. Ɛyaa mba patɩtaa-wɛ num yɔ, pa nɛ  patam numwaa pɛkpɛndaa nɛ pɛsɛɣ Yehowa. Paa mbʋ yɔ, paakpakɩɣ patam numwaa ɛzɩ pa-ñʋndɩnaa yɔ, mbʋ pʋyɔɔ yɔ panɩ pɩ-taa se Yesu kɛnɩnɩ pa-Ñʋʋdʋ.—Mat. 23:10.

3. Tɔm pɔzʋʋ mbʋ yɔɔ tɔm ñʋʋ kʋnɛ kɩkaɣ cosuu?

³ Ɛzɩma Krɩstʋ ñɩma patam numwaa wɛ Ɛsɔ samaɣ taa halɩ nɛ sɔnɔ yɔ pʋyɔɔ lɛ, nabɛyɛ pɩzɩɣ nɛ pɔpɔzɩ pa-tɩ se: (1) Lɩmaɣza wena pɩwɛɛ se patam numwaa ɩwɛɛnɩ pa-tɩ yɔɔ? (2) Lɩmaɣza wena pɩwɛɛ se ɖɩwɛɛnɩ mba pɔtɔkɩ kpɔnʋ nɛ pɔñɔʋ vɛɛ Krɩstʋ sɩm yɔɔ tɔzʋʋ sɔnzɩ wiye yɔ, pɔ-yɔɔ? (3) Ye mba pɔtɔkɩ kpɔnʋ nɛ pɔñɔʋ vɛɛ yɔ, pɛwɛɛ nɛ pɔɖɔʋ ɖɔʋ yɔɔ, ɛzɩ pɩwɛɛ se pɩha-ɖʋ nɩɣzɛ na? Tɔm ñʋʋ kʋnɛ, kɩkaɣ cosuu tɔm pɔzʋʋ mbʋ pɩ-yɔɔ.

4. Paɣʋ mbʋ wɛ 1 Kɔrɛntɩ mba 11:27-29 taa nɛ pɩwɛɛ se patam numwaa ɩmaɣzɩ pɩ-yɔɔ camɩyɛ, nɛ ɛbɛ yɔɔ?

⁴ Pɩwɛɛ se patam numwaa ɩmaɣzɩ paɣʋ mbʋ pɩwɛ 1 Kɔrɛntɩ mba 11:27-29 taa yɔ pɩ-yɔɔ camɩyɛ. (Kalɩ 1 Kɔrɛntɩ mba 11:27-29.) Ɛzɩma patam num nɔɔyʋ pɩzɩɣ nɛ ɛtɔɔ kpɔnʋ nɛ ɛñɔɔ vɛɛ Yesu sɩm yɔɔ tɔzʋʋ sɔnzɩ wiye, ɛlɛ “ɛtɩmʋna”? Ɛpɩzɩɣ nɛ  ɛla mbʋ, ye ɛtɔkɩ kpɔnʋ nɛ ɛñɔʋ vɛɛ ɛlɛ ɛɛñaŋ Yehowa paɣtʋ yɔ. (Ebr. 6:4-6; 10:26-29) Patam numwaa nawa se pɩwɛɛ se pɛwɛɛ siɣsiɣ ye pɔsɔɔlaa se pamʋ ‘kɩhɛyʋʋ ŋgʋ kɩkɛ Ɛsɔ yatʋ nɛ ɛsɔdaa kiŋ pɩtɩŋnɩ Krɩstʋ Yesu yɔɔ’ yɔ.—Fil. 3:13-16.

5. Lɩmaɣza wena pɩwɛɛ se Krɩstʋ ñɩma patam numwaa ɩwɛɛnɩ pa-tɩ yɔɔ?

⁵ Yehowa fezuu kiɖeɖeu sɩɣnɩ ɛ-sɛyaa se pataakpazɩ pa-tɩ ɛlɛ pɛwɛɛnɩ tɩ luzuu. (Efɛz. 4:1-3; Kol. 3:10, 12) Ye mbʋ, patam numwaa ɩɩmaɣzɩɣ se pakɩlɩ lalaa. Panawa se Yehowa ɛɛhaɣ fezuu kiɖeɖeu patam numwaa nɛ pɩkpaɖɩ ɛ-sɛyaa lalaa kokoko. Paamaɣzɩɣ se panɩɣ tɔm ndʋ Bibl yɔɔdʋʋ yɔ tɩ-taa nɛ pɩkpaɖɩ lalaa. Nɛ paakaɣ nɔɔyʋ heyuu kpa se ɛpɩsɩ patam num, nɛ pɩwɛɛ se ɛpaɣzɩ tɔɔʋ kpɔnʋ nɛ ɛñɔʋ vɛɛ Yesu sɩm yɔɔ tɔzʋʋ sɔnzɩ wiye. Ɛlɛ, tɩ luzuu yeba nɛ pana se Yehowa ɖeke yaɣnɩ ɛyaa se pakpa ɛsɔdaa.

6. Ɛzɩ 1 Kɔrɛntɩ mba 4:7, 8 yɔɔdʋʋ yɔ, wɛtʋ ndʋ pɩwɛɛ se Krɩstʋ ñɩma patam numwaa ɩwɛɛna?

⁶ Paa patam numwaa ɩnawa se pɩkɛnɩ-wɛ hɩɖɛ ɖʋʋ se paya-wɛ se pakpa ɛsɔdaa yɔ, paaɖaŋɩɣ se lalaa ɩha-wɛ ŋgee ñamtʋ natʋyʋ. (Fil. 2:2, 3) Panawa ɖɔɖɔ se alɩwaatʋ ndʋ Yehowa ta-wɛ num yɔ, etiyele se nɔɔyʋ ɛtɩlɩ nɛ pɩtasɩnɩ-wɛ. Pʋyɔɔ lɛ, pɩɩɖɩɣzɩɣ patam num nɔɔyʋ, ye pɩwɛ nabɛyɛ kaɖɛ se petisi kpaagbaa se ɛpɩsɩ patam num yɔ. Eɖiɣzinaa se Bibl heyiɣ-ɖʋ se ɖitaatisiɣ weyi ɛyɔɔdʋʋ se Ɛsɔ ha-ɩ ŋgee waɖɛ naɖɩyɛ yɔ, ɛ-tɔm yɔɔ lɛɛ lɛɛ. (Natʋ 2:2) Krɩstʋ tʋ patam num ɛɛñɩnɩɣ se ɛyaa ɩkɩlɩ kam pa-lɩmaɣza ɛ-yɔɔ. Pʋyɔɔ lɛ, eeheyiɣ ɛyaa mba ɛkatɩɣ yɔ se ɛpɩsɩ patam num. Nɛ pɩtʋʋ fɛyɩ se ɛɛtɩŋɩɣnɩ waɖɛ nɖɩ ɖɩ-yɔɔ nɛ ɛkʋndʋʋ lalaa ɛsɩndaa.—Kalɩ 1 Kɔrɛntɩ mba 4:7, 8.

7. Ɛbɛ pɩtɩmʋna se patam numwaa ɩlakɩ, nɛ ɛbɛ yɔɔ?

⁷ Krɩstʋ ñɩma patam numwaa ɩɩmaɣzɩɣ se pɩwɛɛ se pakpakɩɣ alɩwaatʋ nɛ pa nɛ patam numwaa lalaa ɖeke pacakɩ, nɛ pɩwɛɛ ɛzɩ pɛkɛ kɩjaʋ yɔɔ ɛgbɛyɛ naɖɩyɛ taa ñɩma yɔ. Paañakɩ pana se pañɩnɩ nɛ patɩlɩ patam numwaa lalaa se pɩsa nɛ pa nɛ wɛ pɔyɔɔdʋʋ ɛzɩma pata-wɛ num yɔ pɩ-tɔm, nɛ pa nɛ wɛ pekpeɣliɣ cabɩ cabɩ se pɛkpɛlɩkɩ Bibl. (Gal. 1:15-17) Ye patam numwaa ɩlakɩ mbʋ yɔ, piiyeki nɛ nɔɔ kʋɖʋmaɣ wɛɛ ɛgbɛyɛ taa. Ye palakɩ mbʋ yɔ, pakaɖɩɣnɩ fezuu kiɖeɖeu ŋgʋ kɩsɩɣnɩ Ɛsɔ samaɣ se kɛwɛɛ laŋhɛzɩyɛ nɛ nɔɔ kʋɖʋmaɣ taa yɔ.—Roma 16:17, 18.

8. Wɛtʋ ndʋ ŋwɛnɩ mba pɔtɔkɩ kpɔnʋ nɛ pɔñɔʋ vɛɛ Krɩstʋ sɩm yɔɔ tɔzʋʋ sɔnzɩ wiye yɔ pɔ-yɔɔ yɔ, ɛbɛ yɔɔ pɩwɛɛ se ŋcɔnɩ ti-ɖeɖe camɩyɛ? (Kalɩ ɖɔɖɔ pɩ-tɛɛ tɔm.)

⁸ Wɛtʋ ndʋ pɩwɛɛ se ɖɩwɛɛnɩ koobiya halaa nɛ abalaa mba pɛkɛ patam numwaa yɔ pɔ-yɔɔ? Pɩɩwɛɣ ɖeu se ɖɩkɩlɩ sam ɛyʋ nɔɔyʋ, paa ɛkɛ Krɩstʋ koobu patam num yɔ. (Mat. 23:8-12) Bibl yɔɔdʋʋ ɛzʋtʋyaa tɔm nɛ kiseɣtiɣ-ɖʋ se ‘ɖɩmaɣzɩnɩ pe-tisuu,’ ɛlɛ kitiheyi-ɖʋ se ɖɩpɩzɩɣ nɛ ɖɩkpaɣ ɛyʋ nɔɔyʋ ɛzɩ ɖa-ñʋʋdʋ yɔ. (Ebr. 13:7) Pɩkɛ toovenim se Bibl yɔɔdʋʋ se nabɛyɛ mʋnɩ “hɩɖɛ ɖʋʋ tam nabʋlɛ taa.” Pɩtɩkɛ se pɛkɛ patam numwaa yɔɔ pamʋnɩ mbʋ, ɛlɛ pamʋnaa, mbʋ pʋyɔɔ yɔ, “pɔcɔŋnɩ ɛgbɛyɛ yɔɔ camɩyɛ” nɛ “palakɩ tʋmɩyɛ nɛ kpekpeka tɔm yɔɔdʋʋ nɛ tɔm wɩlʋʋ taa.” (1 Tim. 5:17) Ye ɖɩkɩlɩɣ patam numwaa ɖɛyʋʋ nɛ ɖɩsaŋ-wɛ yɔ, pɩpɩzɩɣ nɛ pɩcɛyɩ-wɛ. * Yaa halɩ ɖɩpɩzɩɣ ɖiyele nɛ papaɣzɩ pa-tɩ kpazʋʋ. (Roma 12:3) Ða-taa nɔɔyʋ tɩsɔɔlɩ se ɛla nabʋyʋ nɛ piyele nɛ Krɩstʋ koobiya patam numwaa taa nɔɔyʋ la kɩwɛɛkɩm sɔsɔm mbʋ!—Luka 17:2.

9. Ɛzɩma ɖɩpɩzɩɣ nɛ ɖɩwɩlɩ se ɖɩñaŋ Krɩstʋ ñɩma patam numwaa?

⁹ Ɛzɩma ɖɩpɩzɩɣ nɛ ɖɩwɩlɩ se ɖɩñaŋ mba Yehowa ta-wɛ num yɔ? Ðɩɩkaɣ-wɛ pɔzʋʋ se pɛkɛdɩ-ɖʋ ɛzɩma pɩɖɔma nɛ papɩsɩ patam numwaa yɔ. Pe-ɖeke pɔ-tɔm pɩkɛnaa, nɛ ɖɩfɛyɩnɩ waɖɛ se ɖɩtɩlɩ-tʋ. (1 Tes. 4:11; 2 Tes. 3:11) Nɛ pɩtɩpɔzɩ se ɖɩkɔ tɔm ñʋʋ se patam num nɔɔyʋ halʋ yaa ɛ-walʋ, ɛ-lʋlɩyaa, yaa ɛ-hɔʋ taa ñɩma lalaa ɖɔɖɔ kɛ patam numwaa. Pɩtɩkɛ nɔɔyʋ hɔʋ cɔlɔ pɩlɩɣna nɛ ɛwɛɣnɩ ɛsɔdaa kpaʋ lidaʋ. Ɛsɔ haɣnɩ-ɩ kʋ. (1 Tes. 2:12) Pɩtɩmʋna ɖɔɖɔ se ɖɩpɔzɩ tɔm ndʋ tɩpɩzɩɣ nɛ tɩcɛyɩ lalaa yɔ. Pɩfɛyɩ se ɖɩpɔzɩ patam num nɔɔyʋ halʋ se eheyi-ɖʋ ndʋ ɛmaɣzɩɣ lidaʋ ŋgʋ ɛwɛna se ɛcaɣ tamtam wezuu tɛtʋ yɔɔ alɩwaatʋ ndʋ ɛ-walʋ ɛɛwɛɣ ɛ-cɔlɔ yɔ, kɩ-yɔɔ yɔ. Ða-taa pɩzɩɣ nɛ pɩtɛ se ɛjaɖɛ kɩfaɖɛ taa lɛ, Yehowa kaɣ ‘haɣzʋʋ mbʋ pifeziɣ yɔ, pi-liu ɖeɖe.’—Keɣa 144:16.

10. Ye ɖɩɩkɩlɩɣ ‘sam’ lalaa yɔ, ɛzɩma pɩpɩzɩɣ nɛ pɩkandɩyɩ ɖɔ-yɔɔ?

¹⁰ Ye ɖɩɩkpakɩɣ patam numwaa ɛzɩ pakɩlɩ lalaa yɔ, pɩkandɩyɩɣ ɖa-maɣmaɣ ɖɔ-yɔɔ ɖɔɖɔ. Ɛzɩma tɩyɛ? Bibl heyiɣ-ɖʋ se patam numwaa nabɛyɛ pɩzɩɣ nɛ pelesi pe-siɣsiɣ wɛtʋ. (Mat. 25:10-12; 2 Pɩy. 2:20, 21) Ɛlɛ ye ɖɩɩkɩlɩɣ ‘sam’ lalaa yɔ, ɖɩɩkaɣ-wɛ tɩŋʋʋ kpa, paa pɛkɛ patam numwaa, yaa mba lalaa sɩm-wɛ camɩyɛ yɔ, yaa mba papaɣzɩ Yehowa sɛʋ pileɖaa yɔ. (Yud. 16, pɩ-tɛɛ tɔm.) Nɛ ye pelesi pe-siɣsiɣ wɛtʋ yaa palɩ ɛgbɛyɛ taa yɔ, ɖɩɩkaɣ lesuu tisuu mbʋ ɖɩwɛnɩ Yehowa yɔɔ yɔ, yaa ɖɩɩkaɣ yebu ɛ-sɛʋ.

11. Lɛɣzɩtʋ ndʋ wɛɛ nɛ tɩlakɩ ɛyaa ɛzɩma tɔkɩ kpɔnʋ nɛ pɔñɔʋ vɛɛ Krɩstʋ sɩm yɔɔ tɔzʋʋ sɔnzɩ wiye yɔ, pɩ-hɔɔlʋʋ taa?

¹¹ Pɩlabɩ pɩnzɩ sakɩyɛ yɔ, ɛyaa mba pɔtɔkaɣ kpɔnʋ nɛ pɔñɔʋ vɛɛ Krɩstʋ sɩm yɔɔ tɔzʋʋ sɔnzɩ wiye yɔ, paawɛɛ nɛ papasɩɣ. Ɛlɛ, pɩnzɩ nzɩ sɩɖɛwa nɛ pitileɖita yɔ sɩ-taa, ɛyaa mba, pɛwɛɛ nɛ pɔɖɔʋ paa pɩnaɣ ŋga. Ɛzɩ pɩwɛɛ se ɖɩnɩɣzɩ pɩ-yɔɔ? Aayɩ. Iyele nɛ ɖɩna mbʋ pʋyɔɔ pɩfɛyɩ se ɖɩnɩɣzɩ yɔ.

12. Ɛbɛ yɔɔ pɩtɩpɔzɩ se ɖɩnɩɣzɩ ɛyaa ɛzɩma tɔkɩ kpɔnʋ nɛ pɔñɔʋ vɛɛ Krɩstʋ sɩm yɔɔ tɔzʋʋ sɔnzɩ wiye yɔ pɩ-yɔɔ?

¹² “Yehowa sɩm mba pɛkɛ ɛ-ñɩma yɔ.” (2 Tim. 2:19) Koobiya mba pakalɩɣ ɛyaa  mba pɔtɔkɩ kpɔnʋ nɛ pɔñɔʋ vɛɛ Krɩstʋ sɩm yɔɔ tɔzʋʋ sɔnzɩ wiye yɔ, paasɩŋ mba pɛkɛ patam numwaa toovenim taa yɔ, ɛlɛ Yehowa ñasɩma. Ye mbʋ, pakalɩɣ nɛ pɛkpɛndɩɣnɩ ɛyaa mba pamaɣzɩɣ se pɛkɛ patam numwaa, ɛlɛ patɩkɛ yɔ. Kɩɖaʋ nakʋyʋ yɔ. Mba pɔtɔkaɣ kpɔnʋ nɛ pɔñɔʋ vɛɛ yɔ, pa-taa nabɛyɛ yebi pʋwayɩ. Pɩtɩla maɣzɩm taa kʋdɔŋ yebina nɛ nabɛyɛ maɣzɩ se pa nɛ Krɩstʋ pakaɣ tɔɔʋ kewiyitu ɛsɔdaa. Toovenim taa lɛ, ɖɩɩsɩŋ patam numwaa ɛzɩma ɖeyi ɖeyi pɩkazɩ tɛtʋ yɔɔ yɔ.

13. Ɛzɩ Bibl yɔɔdɩ patam numwaa ɛzɩma pɩkaɣ kazʋʋ tɛtʋ yɔɔ alɩwaatʋ ndʋ kʋñɔŋ sɔsɔʋ paɣzɩɣ yɔ?

¹³ Patam numwaa kaɣ wɛʋ tɛtʋ hɔɔlɩŋ ndɩ ndɩ taa alɩwaatʋ ndʋ Yesu kɔŋ se ɛkpaɣ-wɛ nɛ ɛkpanɩ ɛsɔdaa yɔ. (Mat. 24:31) Bibl yɔɔdaa se kɛdɛzaɣ kɩyakɩŋ taa lɛ, pɩkaɣ kazʋʋ patam numwaa pazɩ tɛtʋ yɔɔ. (Natʋ 12:17) Ɛlɛ, kɩtɩyɔɔdɩ pa-taa ɛzɩma pɩkaɣ kazʋʋ tɛtʋ yɔɔ alɩwaatʋ ndʋ kʋñɔŋ sɔsɔʋ paɣzɩɣ yɔ.

14. Ɛzɩ Roma mba 9:11, 16 yɔɔdʋʋ yɔ, suwe ɖɩkpɛlɩkɩɣ pɩlɩɩnɩ patam numwaa lɩzʋʋ yɔɔ?

¹⁴ Yehowa ɖʋʋnɩ alɩwaatʋ ndʋ ɛlɩzɩɣ patam numwaa yɔ. (Roma 8:28-30) Yesu femtu wayɩ Yehowa paɣzɩ lɩzʋʋ patam numwaa. Pɩwɛ ɛzɩ kajalaɣ pɩnzɩ mɩnʋʋ taa lɛ, Krɩstʋ mba toovenim ñɩma tɩŋa kaakɛ patam numwaa yɔ. Pɩnzɩ nzɩ payɩ sɩtɩŋ pʋwayɩ yɔ sɩ-taa lɛ, mba payaɣaɣ pa-tɩ se Krɩstʋ ñɩma yɔ, pa-taa sakɩyɛ taatɩŋɩɣ Krɩstʋ wayɩ toovenim. Paa mbʋ yɔ, Yehowa kaata num toovenim Krɩstʋ ñɩma cabɩ waa mba paawɛ pɩnzɩ nzɩ sɩ-taa yɔ. Paawɛ ɛzɩ blee ŋgʋ Yesu kaayɔɔdaa se kɩkaɣ paɣlʋʋ  ñɩtʋ kɩdɛkɛdɩtʋ hɛkʋ taa yɔ. (Mat. 13:24-30) Yehowa wobi pɩ-yɔɔ nɛ ɛlɩzɩɣ ɛyaa mba pakaɣ wɛʋ ɛyaa 144000 * waa taa yɔ kɛdɛzaɣ kɩyakɩŋ taa. Pʋyɔɔ lɛ, ye Ɛsɔ ɛkpaɣ lɩmaɣza se ɛlɩzɩɣ pa-taa nabɛyɛ alɩwaatʋ ndʋ tɛmtʋ ñɔtɩ kpam yɔ tɩ-taa yɔ, toovenim taa lɛ, pɩfɛyɩ se ɖɩpɩtɩ ɛ-lɔŋsɩnɖɛ yɔɔ. (Kalɩ Roma mba 9:11, 16.) * Pɩwɛɛ se ɖɩkpa ɖa-tɩ nɛ ɖɩtaala ɛzɩ tʋmlaɖaa mba pɔ-tɔm Yesu yɔɔdɩ ɛ-kɩɖaʋ nakʋyʋ taa yɔ. Pemidi pɔ-mɔɔŋ tɛɛ pɩɩlɩnɩ mbʋ pa-ñʋʋdʋ labɩ mba papaɣzɩ tʋmɩyɛ kɛdɛzaɣ ñɩɣyʋʋ yɔɔ yɔ pɩ-yɔɔ.—Mat. 20:8-15.

15. Ɛzɩ patam numwaa tɩŋa kɛnɩnɩ “yom siɣsiɣ tʋ nɛ lɔŋsɩnɖʋ” weyi ɛ-tɔm pɔyɔɔdɩ Maatiyee 24:45-47 taa yɔ? Lɩzɩ pɩ-taa.

¹⁵ Mba pɛwɛnɩ ɛsɔdaa kpaʋ lidaʋ yɔ, pɩtɩkɛ pa-tɩŋa pɛkɛnɩ “yom siɣsiɣ tʋ nɛ lɔŋsɩnɖʋ.” (Kalɩ Maatiyee 24:45-47.) Ɛzɩ pɩɩwɛʋ kajalaɣ pɩnzɩ mɩnʋʋ taa yɔ, sɔnɔ Yehowa nɛ Yesu patɩŋɩɣnɩ koobiya abalaa cabɩ yɔɔ na nɛ pacalɩɣ, yaa pawɩlɩɣ tɔm ɛyaa sakɩyɛ. Krɩstʋ ñɩma patam numwaa pazɩ ɖeke yɔɔ patɩŋnɩ kajalaɣ pɩnzɩ mɩnʋʋ taa nɛ pama Krɩstʋ Mba Grɛɛkɩ Masɩ. Sɔnɔ, Krɩstʋ ñɩma patam numwaa pazɩ ɖeke wɛnɩnɩ waɖɛ se paha Ɛsɔ samaɣ “tɔɔnaɣ alɩwaatʋ ndʋ tɩmʋnaa yɔ tɩ-yɔɔ.”

16. Ɛbɛ ŋkpɛlɩkɩ tɔm ñʋʋ kʋnɛ kɩ-taa?

¹⁶ Ɛbɛ tɔm ñʋʋ kʋnɛ kɩkpɛlɩkɩ-ɖʋ? Yehowa kpaɣ lɩmaɣza se ɛhaɣ ɛ-samaɣ hɔɔlʋʋ sɔsɔʋ wezuu maatɛŋ tɛtʋ yɔɔ, nɛ ɛha ɛyaa pazɩ mba pa nɛ Yesu pakaɣ kewiyitu tɔɔʋ yɔ wezuu ɛsɔdaa. Yehowa wazɩɣ ɛ-sɛyaa tɩŋa, pʋ-tɔbʋʋ se “Yuuda tʋ” nɛ “ɛyaa hiu,” nɛ ɛñɩnɩɣ se paña paɣtʋ kʋɖʋmtʋ nɛ pɔɖɔkɩ pe-siɣsiɣ wɛtʋ. Pɩwɛɛ se pa-tɩŋa pɛwɛɛnɩ tɩ luzuu. Pɩwɛɛ se pa-tɩŋa pɛkpɛndɩ nɛ pɛsɛɛ-ɩ, nɛ nɔɔ kʋɖʋmaɣ wɛɛ pɛ-hɛkʋ taa. Nɛ pɩwɛɛ se pa-tɩŋa pañaɣ pana nɛ peyele nɛ laŋhɛzɩyɛ wɛɛ ɛgbɛyɛ taa. Ðɩwɛɛ nɛ ɖɩñɔtʋʋnɩ ɛjaɖɛ tɛm nɛ pʋyɔɔ lɛ, iyele nɛ ɖa-tɩŋa ɖiwolo pɩ-yɔɔ nɛ ɖɩsɛɣ Yehowa nɛ ɖɩtɩŋɩɣ Krɩstʋ wayɩ ɛzɩ “ewiɖe kʋɖʋmɖɩyɛ” yɔ.—Yoh. 10:16.