1. Ðoŋ weyi samaɣ taa tɔm ndʋ pɔyɔɔdɩ kigbeɣluu ŋgʋ palabɩ pɩnaɣ 1935 taa yɔ tɩɩwɛnɩ abalɩbɩɣa nakɛyɛ yɔɔ?

PAMƖYƖSƖ abalɩbɩɣa nakɛyɛ lɩm pɩnaɣ 1926 taa, nɛ alɩwaatʋ ndʋ lɛ kaawɛnɩ pɩnzɩ 18. Ka-lʋlɩyaa kaakɛ Bibl kpɛlɩkɩyaa; mbʋ payaɣaɣ Yehowa Aseɣɖe Tɩnaa alɩwaatʋ ndʋ tɩ-taa. Lʋlɩyaa mba, paawɛnɩ Abalɩbiya naadozo nɛ halɩbiya naalɛ, nɛ paafalɩsɩ-sɩ se sɩsɛɛ Ɛsɔ Yehowa nɛ sɩmaɣzɩnɩ Yesu Krɩstʋ. Alɩwaatʋ ndʋ tɩ-taa, ɛzɩ Bibl kpɛlɩkɩyaa tɩŋa kaalakʋʋ yɔ, paa pɩnaɣ ŋga abalɩbɩɣa ŋga kɔtɔkaɣ kpɔnɔ nɛ kɔñɔʋ vɛɛ Kɩbaɣlʋ Ðanaɣ Tɔɔnaɣ sɔnzɩ taa. Ɛlɛ, lidaʋ ŋgʋ kaawɛnɩ cee wayɩ yɔɔ yɔ kɩlɛɣzaa, alɩwaatʋ ndʋ kaanɩ samaɣ taa tɔm yɔɔdʋʋ mbʋ pʋ-ñʋʋ kɛnɩ “Samaɣ sɔsɔɔ” yɔ. Joseph Rutherford kaayɔɔdɩnɩ samaɣ taa tɔm ndʋ pɩnaɣ 1935 kigbeɣluu ŋgʋ palabɩ Wasɩŋtɔŋ, Etaazuunii ɛjaɖɛ taa yɔ kɩ-taa. Tɔm kɩfatʋ ndʋ Bibl kpɛlɩkɩyaa kaatɩlɩ kigbeɣluu ŋgʋ kɩ-taa?

2. Toovenim tɔm kɩfatʋ ndʋ taa koobu Rutherford lɩzɩ ɛ-tɔm yɔɔdʋʋ taa?

² Koobu Rutherford tɔm yɔɔdʋʋ taa, ɛyɔɔdɩ ɛyaa mba pakaɣ kɛʋ “samaɣ sɔsɔɔ” ŋga kɔ-tɔm pɔyɔɔdɩ Natʋ 7:9 taa yɔ pɔ-tɔm. Pʋcɔ nɛ pɩtalɩɣ mbʋ lɛ, Bibl kpɛlɩkɩyaa maɣzaɣ se samaɣ sɔsɔɔ kɛnɩ ɛyaa mba pakaɣ kpaʋ ɛsɔdaa, ɛlɛ pe-tisuu tɩtalɩ patam numwaa ñɩmbʋ yɔ. Koobu Rutherford tɩŋnɩ Masɩ yɔɔ nɛ ɛlɩzɩ pɩ-taa se patɩlɩzɩ samaɣ sɔsɔɔ taa mba se pacaɣ wezuu ɛsɔdaa, ɛlɛ pɛkɛnɩ Krɩstʋ heŋ lɛɛŋ *  weyi ɩkaɣ hiɣu ñʋʋ yabʋ “kʋñɔŋ sɔsɔʋ” taa nɛ ɩcaɣ wezuu tam tam tɛtʋ yɔɔ yɔ. (Natʋ 7:14) Yesu yɔɔdaa se: “Mɛwɛnɩ heŋ lɛɛŋ, weyi ɩfɛyɩ kalakʋ kʋnɛ kɩ-taa yɔ; ɛnɩ ɖɔɖɔ pɩwɛɛ se mɔnkɔnɩ-ɩ kɩ-taa, nɛ ɩkaɣ welisuu mɔ-nɔɔ, nɛ ɩkaɣ pɩsʋʋ ewiɖe kʋɖʋmɖɩyɛ, nɛ ɩwɛɛnɩ ninɖiɣyu kʋɖʋm.” (Yoh. 10:16) “Heŋ lɛɛŋ” ɛnɩ, ɩkɛnɩ Yehowa Aseɣɖe Tɩnaa siɣsiɣ tɩnaa mba pɛwɛnɩ lidaʋ se pakaɣ caɣʋ wezuu Paradisuu taa tɛtʋ yɔɔ tam tam yɔ. (Mat. 25:31-33, 46) Iyele nɛ ɖɩna ɛzɩma fezuu taa ñalɩmɩyɛ ɖɩnɛ ɖɩlɛɣzɩ Yehowa sɛyaa sakɩyɛ wezuu caɣʋ, pɩkpɛndɩnɩ koobu weyi ɛɛwɛnɩ pɩnzɩ 18 yɔ.—Keɣa 96:11a; Adu. 4:18.

3-4. Tɔm ndʋ ɛyaa kudokiŋ sakɩyɛ ɖiɣzini pɩnaɣ 1935 kigbeɣluu sɔsɔʋ taa pɩlɩɩnɩ pe-lidaʋ yɔɔ, nɛ ɛbɛ yɔɔ?

³ Pɩɩkɛnɩ alɩwaatʋ kɩbandʋ siŋŋ, alɩwaatʋ ndʋ tɔm yɔɔdɩyʋ heyi samaɣ se: “Ðitendi mba payɩ pɛwɛnɩ lidaʋ se pakaɣ caɣʋ tɛtʋ yɔɔ yɔ se pakʋyɩ nɛ pasɩŋ” yɔ. Koobu nɔɔyʋ kaawɛ kigbeɣluu ŋgʋ kɩ-taa; ɛyɔɔdaa se ɛyaa mba pakʋyaa nɛ pasɩŋ yɔ, paacɛzɩ ɛyaa mba paawɛ peeɖe yɔ, pɔ-hɔɔlʋʋ. Peeɖe koobu Rutherford yɔɔdaa se: “Ɩnaɣ samaɣ sɔsɔɔ ŋga yɔ!” Ɛyɔɔdɩ mbʋ lɛ, samaɣ kpalɩ nɛ kawɩlɩ se ka-taa kaawɛ leleŋ siŋŋ. Ɛyaa mba paakʋyaa nɛ pasɩŋ yɔ, paaɖiɣzinaa se patɩlɩzɩ-wɛ se pacaɣ wezuu ɛsɔdaa. Paanawa se Ɛsɔ tɩtɩŋnɩ e-fezuu yɔɔ nɛ ɛtaa-wɛ num. Evemiye nɖɩ ɖɩtɩŋ pʋwayɩ yɔ, ɛyaa 840 ha pa-tɩ nɛ pamɩyɩsɩ-wɛ lɩm, nɛ pɔ-hɔɔlʋʋ sɔsɔʋ kaakɛnɩ heŋ lɛɛŋ taa ñɩma.

⁴ Pɔyɔɔdɩ samaɣ taa tɔm ndʋ nɛ pɩtɛ lɛ, abalɩbɩɣa ŋga kɔ-tɔm ɖɩɩyɔɔdɩ kiɖe tɛɛ yɔ nɛ ɛyaa sakɩyɛ, peyele kpɔnɔ tɔɔʋ nɛ vɛɛ ñɔʋ Kɩbaɣlʋ Ðanaɣ Tɔɔnaɣ sɔnzɩ taa. Koobu nɔɔyʋ yɔɔdɩnɩ tɩ luzuu ɛzɩ lalaa yɔ se: “Krɩstʋ sɩm yɔɔ tɔzʋʋ sɔnzɩ nzɩ palabɩ pɩnaɣ 1935 yɔ, nzɩ kɛnɩ kɛdɛzaɣ ñɩnzɩ nzɩ sɩ-taa mɔntɔɔ kpɔnɔ nɛ mɔñɔɔ vɛɛ yɔ. Menɖiɣzinaa se Yehowa tɩtɩŋnɩ e-fezuu kiɖeɖeu yɔɔ nɛ ɛta-m num se ɛha-m ɛsɔdaa wezuu caɣʋ lidaʋ, ɛlɛ mɛwɛnɩ lidaʋ se mancakɩ wezuu tɛtʋ yɔɔ nɛ manɖʋ nesi nɛ tɩpɩsɩ paradisuu.” (Roma 8:16, 17; 2 Kɔr. 1:21, 22) Kpaɣnɩ alɩwaatʋ ndʋ lɛ, ɛyaa sakɩyɛ sɔzɩ samaɣ sɔsɔɔ yɔɔ nɛ pa nɛ patam numwaa mba pakazaa yɔ palakɩ tʋmɩyɛ nɔɔ kʋɖʋmaɣ taa.

5. Lɩmaɣza wena Yehowa wɛnɩ mba peyebi tɔɔʋ kpɔnɔ nɛ peyele vɛɛ ñɔʋ Krɩstʋ sɩm yɔɔ tɔzʋʋ sɔnzɩ taa yɔ pɔ-yɔɔ?

⁵ Lɩmaɣza wena Yehowa kaawɛnɩ ɛyaa mba peyebi kpɔnɔ tɔɔʋ nɛ vɛɛ ñɔʋ pɩnaɣ 1935 wayɩ yɔ pɔ-yɔɔ? Nɛ sɔnɔ, ye koobu nɔɔyʋ ɛtɔkɩ kpɔnɔ nɛ ɛñɔʋ vɛɛ Kɩbaɣlʋ Ðanaɣ Tɔɔnaɣ sɔnzɩ taa, ɛlɛ pʋwayɩ ɛkɔɔ eɖiɣzina se toovenim taa lɛ, patɩtaa-ɩ num, lɩmaɣza wena Yehowa wɛɣnɩ ɛ-yɔɔ? (1 Kɔr. 11:28) Nabɛyɛ tɔkaɣ kpɔnɔ nɛ pɔñɔʋ vɛɛ mbʋ pʋyɔɔ yɔ, pataatɩlɩ lidaʋ ŋgʋ pɛwɛna yɔ. Ɛlɛ, ye pɔkɔm nɛ peɖiɣzina se piyiɣdi-wɛ na, nɛ peyele kpɔnɔ tɔɔʋ nɛ peyele vɛɛ ñɔʋ nɛ powolo pɩ-yɔɔ nɛ pɛsɛɣ Yehowa siɣsiɣ yɔ, pɩtʋʋ fɛyɩ se ɛkaɣ-wɛ mʋʋ nɛ pɛkɛ heŋ lɛɛŋ taa ñɩma. Paatasɩɣ tɔɔʋ kpɔnɔ nɛ paatasɩɣ ñɔʋ vɛɛ, paa mbʋ yɔ powoki Krɩstʋ sɩm yɔɔ tɔzʋʋ sɔnzɩ taa mbʋ pʋyɔɔ yɔ, pɛwɛnɩ ɛsɩmɩyɛ siŋŋ mbʋ Yehowa nɛ Yesu palabɩ-wɛ yɔ pɩ-yɔɔ.

6. Yesu ɖʋ Ɛsɔ tiyiyaa paɣtʋ se pala we?

⁶ Kʋñɔŋ sɔsɔʋ ñɔtɩ kpam, pʋyɔɔ lɛ pɩwɛɣ ɖeu se ɖɩtazɩ tɔm ndʋ Natʋ ñʋʋ 7 tasɩɣ yɔɔdʋʋ patam numwaa nɛ heŋ lɛɛŋ weyi ɩkɛ samaɣ sɔsɔɔ yɔ pɔ-yɔɔ yɔ tɩ-taa. Yesu ɖʋ paɣtʋ tiyiyaa se pakpa ɖɩzʋʋ helim naanza.  Paakaɣ yebu helim mbʋ nɛ pɩma tɛtʋ yɔɔ pɩkɔɔ pɩsɩɩnɩ alɩwaatʋ ndʋ pañɩɣ mayaɣ patam numwaa tɩŋa yɔɔ yɔ, pʋ-tɔbʋʋ se Yehowa tisaa se pɛwɛ siɣsiɣ. (Natʋ 7:1-4) Nɛ kɩhɛyʋʋ ŋgʋ Krɩstʋ koobiya patam numwaa kaɣ mʋʋ pe-siɣsiɣ wɛtʋ yɔɔ yɔ, ŋgʋ lɛ se pa nɛ Krɩstʋ pakaɣ pɩsʋʋ awiya nɛ cɔjɔnaa ɛsɔdaa. (Natʋ 20:6) Yehowa, Yesu nɛ tiyiyaa pa-taa kaɣ labʋ leleŋ siŋŋ alɩwaatʋ ndʋ panaɣ se patam numwaa 144 000 mʋ pa-kɩhɛyʋʋ ɛsɔdaa yɔ.

7. (a) Ɛzɩ Natʋ 7:9, 10 yɔɔdʋʋ yɔ, mba Yohanɛɛsɩ na natʋ taa? (b) Nɛ ɛbɛ paawɛɛ nɛ palakɩ? (Cɔnɩ takayaɣ huyuu yɔɔ kɩlɛmʋʋ.)

⁷ Yohanɛɛsɩ yɔɔdɩ awiya nɛ cɔjɔnaa 144 000 mba pɔ-tɔm nɛ pɩtɛ lɛ, ɛna nabʋyʋ nɛ pɩwɛ cɔnʋʋ kpem. Ɛna “samaɣ sɔsɔɔ nakɛyɛ,” kehiɣ ñʋʋ yabʋ Armaagedɔɔ taa. Ɛyaa mba ɛcalɩ naʋ yɔ pɛwɛ ndɩ nɛ mba ɛna nabʋlɛ ɖeɖe yɔ mbʋ pʋyɔɔ yɔ, “samaɣ sɔsɔɔ” taa ñɩma ɖɔ sakɩyɛ nɛ pɩkɩlɩ ɛyaa 144 000 nɛ ɖɩɩpɩzɩɣ nɛ ɖɩtɩlɩ ɛyaa ɛzɩma ɖeyi ɖeyi kaɣ wɛʋ samaɣ ŋga ka-taa yɔ. (Kalɩ Natʋ 7:9, 10.) Samaɣ ŋga, “kosu tokonaa kɩɖaɣlaa kʋhʋlʋmaa,” pɩwɩlɩɣ se ‘ketipisi ka-tɩ’ nɛ Sataŋ ɛjaɖɛ nɛ kɛwɛ siɣsiɣ Ɛsɔ nɛ Krɩstʋ pɛ-ɛsɩndaa. (Yak. 1:27) Kamakɩ taa leleŋ kubusi mbʋ pʋyɔɔ yɔ, mbʋ Yehowa nɛ Yesu weyi ɛkɛ Ɛsɔ heɣa yɔ, palaba yɔ pɩyabɩ ka-ñʋʋ. Pɩtasɩ lɛ, kɔɖɔkɩ paadɛtʋ nɛ pɩwɩlɩɣ se ketisini taa leleŋ se Yehowa lɩzɩ Yesu se ɛkɛ Wiyaʋ.—Kpaɣ-tʋ nɛ ŋmaɣzɩnɩ Yohanɛɛsɩ 12:12, 13.

8. Suwe Natʋ 7:11, 12 heyiɣ-ɖʋ pɩlɩɩnɩ Yehowa hɔʋ ŋgʋ kɩwɛ ɛsɔdaa yɔ kɩ-yɔɔ?

⁸ Kalɩ Natʋ 7:11, 12. Mba pɛwɛ ɛsɔdaa yɔ pana samaɣ sɔsɔɔ lɛ, ɛbɛ palaba? Yohanɛɛsɩ na mba payɩ pɛwɛ ɛsɔdaa yɔ, paawɛ taa leleŋ taa nɛ pɛwɛɛ nɛ pasaŋ Ɛsɔ alɩwaatʋ ndʋ pana samaɣ sɔsɔɔ yɔ. Yehowa hɔʋ ŋgʋ kɩwɛ ɛsɔdaa yɔ, kɩ-taa kaɣ labʋ leleŋ siŋŋ se natʋ ndʋ tɩlaba, alɩwaatʋ ndʋ samaɣ sɔsɔɔ kaɣ lɩnʋʋ kʋñɔŋ sɔsɔʋ taa cɩŋgɩlɩm yɔ.

9. Ɛzɩ Natʋ 7:13-15 yɔɔdʋʋ yɔ, ɛbɛ samaɣ sɔsɔɔ ɖiɣni labʋ sɔnɔ?

⁹ Kalɩ Natʋ 7:13-15. Yohanɛɛsɩ mawa se samaɣ sɔsɔɔ taa ñɩma “[cɔtɩ] po-tokonaa kɩɖaɣlaa nɛ pahʋlʋnzɩ-wɛ Heɣa calɩm taa.” Pɩwɩlɩɣ se pɛwɛnɩ ɛhʋyɛ kele kele ñɩnɖɛ nɛ pɔ-tɔm kɛdɩnɩ Yehowa. (Iza. 1:18) Ɛyaa mba, pɛkɛnɩ Krɩstʋ ñɩma mba paha pa-tɩ nɛ pamɩyɩsɩ-wɛ lɩm yɔ, nɛ pɛwɛnɩ tisuu siŋŋ Yesu kɩlaʋ yɔɔ nɛ taabalɩyɛ kɩbanɖɛ wɛ pa nɛ Yehowa pɛ-hɛkʋ taa. (Yoh. 3:36; 1 Pɩy. 3:21) Piyeba nɛ pamʋna se pasɩŋ Ɛsɔ Kewiyaɣ kpelaɣ ɛsɩndaa, nɛ palakɩ-ɩ “tʋmɩyɛ kiɖeɖee wɩsɩ nɛ ɖoo” fezuu taa templo ŋgʋ kɩwɛ tɛtʋ yɔɔ yɔ kɩ-taa. Halɩ sɔnɔ, pɛwɛɛ nɛ palakɩ Kewiyaɣ tɔm susuu tʋmɩyɛ nɛ kpɛlɩkɩyaa labʋ tʋmɩyɛ hɔɔlʋʋ sɔsɔʋ nɛ kpekpeka, nɛ pawɩlɩɣ se pasɩɣ Ɛsɔ Kewiyaɣ tʋma kajalaɣ ɖeɖe.—Mat. 6:33; 24:14; 28:19, 20.

10. (a) Tɔm ndʋ samaɣ sɔsɔɔ taa tɛmnaa? (b) Nɛ tamaɣ ŋga kaɣ labʋ kɛ-ɛsɩndaa?

¹⁰ Samaɣ sɔsɔɔ ŋga kalɩnɩ kʋñɔŋ sɔsɔʋ taa yɔ, ka-taa tɛma se Ɛsɔ kaɣ wobu pɩ-yɔɔ nɛ ɛcɔnɩ kɔ-yɔɔ, mbʋ pʋyɔɔ yɔ, “Weyi ɛcaɣ kewiyaɣ kpelaɣ yɔɔ yɔ ɛkaɣ posuu e-kizinziku pɔ-yɔɔ.” Tamaɣ ŋga heŋ lɛɛŋ ɖaŋ kpam se kala yɔ, kakaɣ labʋ kiya. Bibl yɔɔdʋʋ se: “[Ɛsɔ kaɣ] hɩzʋʋ ɛsɩtɛɣlɩm kpeekpe pɛ-ɛsɩndaa, nɛ sɩm ɛɛkaɣ tasʋʋ wɛʋ, kʋñɔwiye nɛ kubusi mabʋ nɛ wɩzasɩ paakaɣ tasʋʋ wɛʋ ɖɔɖɔ.”—Natʋ 21:3, 4.

11-12. (a) Ɛzɩ pɔyɔɔdʋʋ Natʋ 7:16, 17 taa yɔ, wazasɩ nzɩ samaɣ sɔsɔɔ ɖaŋ kpam? (b) Ɛbɛ heŋ lɛɛŋ pɩzɩɣ nɛ ɩla Krɩstʋ sɩm yɔɔ tɔzʋʋ sɔnzɩ taa, nɛ ɛbɛ yɔɔ?

¹¹ Kalɩ Natʋ 7:16, 17. Alɩwaatʋ tʋnɛ tɩ-taa, ñɔɔsɩ wɩɣ Yehowa sɛyaa nabɛyɛ mbʋ pʋyɔɔ yɔ pɛfɛyɩnɩ liidiye se paya tɔɔnaɣ ŋga pɩpɔzʋʋ-wɛ yɔ, yaa you yebina nɛ tɔɔnaɣ  fɛyɩ. Lalaa lɛ, paɖɩɣ-wɛ salaka pe-tisuu yɔɔ. Ɛlɛ, samaɣ sɔsɔɔ taa ñɩma mba, pa-taa wɛ leleŋ mbʋ pʋyɔɔ yɔ, panawa se payakɩ pa-ñʋʋ alɩwaatʋ ndʋ paɖɩzɩɣ ɛjaɖɛ kɩdɛkɛdɩyɛ ɖɩnɛ nɛ pɩtɛ lɛ, pakaɣ wɛnʋʋ tomnaɣ yɔɔ nɛ fezuu taa tɔɔnaɣ sakɩyɛ paa ɛzɩmtaa. Alɩwaatʋ ndʋ Yehowa kaaɖɩzɩɣ Sataŋ ɛjaɖɛ kɩdɛkɛdɩyɛ ɖɩnɛ yɔ, ɛkaɣ kandɩyʋʋ samaɣ sɔsɔɔ yɔɔ se ɛ-pana wena pakpaɣaa nɛ pamaɣzɩnɩ “soŋaɣ sɔsɔɔ” yɔ, ataalabɩ-kɛ nabʋyʋ. Kʋñɔŋ sɔsɔʋ tɛŋ lɛ, Yesu kaɣ ɖiyuu mba pehiɣ ñʋʋ yabʋ tɛtʋ yɔɔ yɔ nɛ ewoni “wezuu [maatɛŋ] lɩm hila cɔlɔ.” Maɣzɩ nɛ ŋna: Samaɣ sɔsɔɔ wɛnɩ lidaʋ ŋgʋ kɩ-wayɩ fɛyɩ yɔ. Ɛyaa miiliyaarɩwaa mba pacaɣ wezuu nɛ pana yɔ pa-taa lɛ, pɩtɩla samaɣ sɔsɔɔ taa ñɩma ɩɩkaɣnɩ sɩbʋ kaaʋ.—Yoh. 11:26.

¹² Heŋ lɛɛŋ wɛnɩ lidaʋ kɩbaŋʋ siŋŋ nɛ kɩ-yɔɔ lɛ, pɛwɛnɩ ɛsɩmɩyɛ siŋŋ Yehowa nɛ Yesu pɔ-yɔɔ. Yehowa tɩlɩzɩ-wɛ se pacaɣ wezuu ɛsɔdaa, ɛlɛ ɛsɔɔlɩ-wɛ ɛzɩ ɛsɔɔlʋʋ paatam numwaa yɔ. Patam numwaa nɛ heŋ lɛɛŋ papɩzɩɣ nɛ pasa Ɛsɔ nɛ Krɩstʋ. Nʋmɔŋ weyi ɩ-yɔɔ patɩŋɩɣna nɛ palakɩ mbʋ yɔ, ɩ-taa nakʋyʋ lɛ se powoki Kɩbaɣlʋ Ðanaɣ Tɔɔnaɣ sɔnzɩ ɖɩlaɖɛ.

13-14. Ɛbɛ yɔɔ pɩwɛɛ se patam numwaa mba pakazaa yɔ nɛ heŋ lɛɛŋ pa-tɩŋa powoki Krɩstʋ sɩm yɔɔ tɔzʋʋ sɔnzɩ taa?

¹³ Pɩnzɩ nzɩ sɩɖɛwa pitileɖita yɔ sɩ-taa, ɛyaa mba powoki Krɩstʋ sɩm yɔɔ tɔzʋʋ sɔnzɩ taa yɔ, ye pakpaɣ ɛyaa kudoku yɔ, nabʋyʋ taa ɛyʋ kʋɖʋm tɔkɩnɩ kpɔnɔ nɛ ɛñɔʋ vɛɛ yaa nɔɔyʋ ɛɛtɔkɩ nɛ nɔɔyʋ ɛɛñɔʋ. Agbaa wena a-taa nɔɔyʋ ɛɛtɔkɩ kpɔnɔ nɛ ɛɛñɔʋ vɛɛ Krɩstʋ sɩm yɔɔ tɔzʋʋ sɔnzɩ taa yɔ, ana kɩlɩnɩ ɖɔʋ. Ɛyaa mba powoki Krɩstʋ sɩm yɔɔ tɔzʋʋ sɔnzɩ taa yɔ, pɔ-hɔɔlʋʋ sɔsɔʋ wɛnɩ tɛtʋ yɔɔ caɣʋ lidaʋ na. Ye mbʋ, ɛbɛ yɔɔ powoki Kɩbaɣlʋ Ðanaɣ Tɔɔnaɣ sɔnzɩ ɖɩlaɖɛ? Lɩmaɣzɩyɛ nɖɩ ɖɩ-yɔɔ ɛyaa woki nesi ɖɔkʋʋ sɔnzɩ nasɩyɩ taa yɔ, ɖɩ-yɔɔ ɖɔɖɔ ɛyaa mba paatɔkɩ kpɔnɔ nɛ paañɔʋ vɛɛ yɔ, powoki Kɩbaɣlʋ Ðanaɣ Tɔɔnaɣ sɔnzɩ ɖɩlaɖɛ. Ɛyaa woki nesi ɖɔkʋʋ sɔnzɩ taa mbʋ pʋyɔɔ yɔ, pɔsɔɔlaa se pawɩlɩ pɔ-sɔɔlɩm nesi ɖɔkɩyaa nɛ pasɩnɩ-wɛ. Mbʋ ɖɔɖɔ heŋ lɛɛŋ taa ñɩma woki Krɩstʋ sɩm yɔɔ tɔzʋʋ sɔnzɩ taa mbʋ pʋyɔɔ yɔ, pɔsɔɔlaa se pawɩlɩ pɔ-sɔɔlɩm Krɩstʋ nɛ patam numwaa nɛ paɖʋ-wɛ nesi. Heŋ lɛɛŋ woki ɖɔɖɔ Krɩstʋ sɩm yɔɔ  tɔzʋʋ sɔnzɩ taa se pawɩlɩ pɛ-ɛsɩmɩyɛ Yesu kɩlaʋ yɔɔ. Kɩlaʋ ŋgʋ, kɩhaɣ-wɛ waɖɛ se pacaɣ wezuu maatɛŋ tɛtʋ yɔɔ.

¹⁴ Lɩmaɣzɩyɛ sɔsɔɖɛ lɛɛɖɛ nɖɩ ɖɩ-yɔɔ heŋ lɛɛŋ woki Krɩstʋ sɩm yɔɔ tɔzʋʋ sɔnzɩ taa yɔ, nɖɩ lɛ se pañaŋ paɣtʋ ndʋ Yesu ɖʋwa yɔ. Alɩwaatʋ ndʋ Yesu nɛ ɛ-tɛ apostoloowaa siɣsiɣ tɩnaa pacalɩ labʋ Kɩbaɣlʋ Ðanaɣ Tɔɔnaɣ sɔnzɩ yɔ, eheyi-wɛ se: “Ɩwɛɛ nɛ ɩlakɩ mbʋ nɛ ɩtɔzʋʋnɩ mɔ-yɔɔ.” (1 Kɔr. 11:23-26) Ye mbʋ, heŋ lɛɛŋ wɛɣ Kɩbaɣlʋ Ðanaɣ Tɔɔnaɣ sɔnzɩ taa wobu yɔɔ nɛ pɩkɔɔ pɩsɩɩnɩ alɩwaatʋ ndʋ patam num nɔɔyʋ tɩtasɩ wɛʋ tɛtʋ yɔɔ yɔ. Nɛ heŋ lɛɛŋ yaɣ paa anɩ se ɛkɔɔ nɛ ɛkpɛndɩ ɩ-yɔɔ nɛ powolo Krɩstʋ sɩm yɔɔ tɔzʋʋ sɔnzɩ taa.

15. Ɛbɛ ɖɩpɩzɩɣ ɖɩla nɛ ɖɩsa Ɛsɔ nɛ Krɩstʋ alɩwaatʋ ndʋ ɖiwoki Krɩstʋ sɩm yɔɔ tɔzʋʋ sɔnzɩ taa yɔ?

¹⁵ Krɩstʋ sɩm yɔɔ tɔzʋʋ sɔnzɩ taa, ɖɩwɛnɩ waɖɛ se ɖitee hendu nɛ ɖɩtɩmɩ nɛ ɖɩsa Ɛsɔ nɛ Krɩstʋ. Samaɣ taa tɔm ndʋ pakaɣ yɔɔdʋʋ pɩnaɣ kanɛ yɔ, tɩ-ñʋʋ yɔ: “Ña-taa ɛla leleŋ nɛ mbʋ Ɛsɔ nɛ Krɩstʋ palabɩ-ŋ yɔ!” Tɩkaɣ yebu nɛ ɛsɩmɩyɛ nɖɩ ɖɩwɛnɩ Yehowa nɛ Krɩstʋ pɔ-yɔɔ yɔ ɖɩpaɣlɩ nɛ pɩkɩlɩ. Alɩwaatʋ ndʋ pɔcɔʋnɩ kpɔnɔ nɛ vɛɛ yɔ, ɖa mba ɖiwobi sɔnzɩ nzɩ sɩ-ɖɩlaɖɛ yɔ, pɩtɔzʋʋ-ɖʋ se wondu ndʋ tɩsɩŋnɩ Yesu tomnaɣ nɛ ɛ-calɩm. Pɩkaɣ-ɖʋ tɔzʋʋ se Yehowa yeba se ɛ-Pɩyalʋ ɛsɩ ɖo-lone taa nɛ pɩsa nɛ ɖɩpɩzɩ ɖihiɣ wezuu. (Mat. 20:28) Mba payɩ pɔsɔɔlɩ ɖa-Caa weyi ɛwɛ ɛsɔdaa yɔ nɛ ɛ-Pɩyalʋ yɔ, pakaɣ tisuu nɛ powolo Krɩstʋ sɩm yɔɔ tɔzʋʋ sɔnzɩ taa.

16. Hɔɔlɩŋ weyi taa patam numwaa nɛ heŋ lɛɛŋ pɛwɛ kɩmaŋ?

¹⁶ Hɔɔlɩŋ nɩɩyɩ taa lɛ, patam numwaa nɛ heŋ lɛɛŋ pɛwɛ kɩmaŋ. Yehowa tɩsɔɔlɩ pa-taa nabɛyɛ nɛ pɩkpaɖɩ lalaa. Pa-tɩŋa pamʋ ñɩm ɛ-ɛsɩndaa. Ðɩsɩm tɔm ndʋ mbʋ pʋyɔɔ yɔ, kɩhɛyʋʋ kʋɖʋmʋʋ ɛhɛyaa nɛ ɛya patam numwaa nɛ heŋ lɛɛŋ. Ŋgʋ lɛ ɛ-Pɩyalʋ kʋsɔɔlʋ wezuu. Tʋkaɣ ŋga kɛwɛ pɛ-hɛkʋ taa yɔ, ŋga lɛ se pɛfɛyɩnɩ lidaʋ kʋɖʋmʋʋ. Pɩpɔzʋʋ se pa-tɩŋa pɔɖɔkɩ pe-siɣsiɣ wɛtʋ Ɛsɔ nɛ Krɩstʋ pɛ-ɛsɩndaa. (Keɣa 30:24) Tɔzɩ se Ɛsɔ fezuu pɩzɩɣ nɛ kɩla tʋmɩyɛ kʋɖʋmɖɩyɛ ɖa-tɩŋa ɖɔ-yɔɔ. Pɩwɩlɩɣ se Yehowa haɣ e-fezuu kiɖeɖeu paa anɩ ɛzɩ pɩpɔzʋʋ-ɩ yɔ, paa ɛtɩɩkɛ patam num yaa heŋ lɛɛŋ taa tʋ yɔ.

17. Ɛbɛ patam numwaa mba pakazaa yɔ paɖaŋ kpam?

¹⁷ Paalʋlʋʋ patam numwaa nɛ ɛsɔdaa kpaʋ lidaʋ. Ɛsɔ haɣnɩ-wɛ lidaʋ ŋgʋ. Pamaɣzɩɣ pe-lidaʋ ŋgʋ kɩ-yɔɔ, patɩmɩɣ kɩ-yɔɔ, nɛ paɖaŋɩɣ kpam se pamʋ pa-kɩhɛyʋʋ ɛsɔdaa. Halɩ, patɩtɩlɩ ɛzɩma po-tomnaɣ kaɣ wɛʋ ɛsɔdaa yɔ. (Fil. 3:20, 21; 1 Yoh. 3:2) Paa mbʋ yɔ, paɖaŋ kpam se alɩwaatʋ ɛtalɩ  lɔŋ nɛ pakatɩ Yehowa, Yesu, tiyiyaa, nɛ patam numwaa lalaa. Paɖaŋ kpam se pa nɛ wɛ pɛwɛɛ Kewiyaɣ taa ɛsɔdaa.

18. Ɛbɛ heŋ lɛɛŋ ɖaŋ kpam?

¹⁸ Heŋ lɛɛŋ taa ñɩma ɖaŋ kpam se pacaɣ tɛtʋ yɔɔ tam. Mbʋ ɛyaa tɩŋa sɔɔlaa. (Ekl. 3:11; nwt) Paɖaŋ kpam se alɩwaatʋ ndʋ papɩzɩɣ nɛ paɖʋ nesi nɛ pɛlɛɣzɩ tɛtʋ kpeekpe nɛ tɩpɩsɩ paradisuu yɔ, tɩtalɩ lɔŋ. Pɩɩlakɩ-wɛ lɛɛ lɛɛ. Paɖaŋaa se alɩwaatʋ ɛtalɩ lɔŋ nɛ papɩzɩ nɛ pama pa-ɖɩsɩ, pahayɩ pa-kaɖasɩ nɛ pafalɩsɩ pe-piya pilim wɛtʋ taa. (Iza. 65:21-23) Paɖaŋ kpam se alɩwaatʋ ɛtalɩ lɔŋ nɛ pɛyɛlɩ nɛ powolo tɛtʋ yɔɔ lona sakɩyɛ taa, pʋŋ yɔɔ, laŋ tɛɛ, teŋgunaa nɔsɩ nɛ pɛkpɛlɩkɩ wondu ndʋ payɩ Yehowa lɩzaa yɔ tɩ-yɔɔ tɔm. Ɛlɛ, mbʋ pɩlakɩ-wɛ leleŋ nɛ pɩkɩlɩ yɔ lɛ se panawa se pa nɛ Yehowa pa-taabalɩyɛ kaɣ wobu pɩ-yɔɔ nɛ ɖɩcɛyɩsɩɣ cɛyɩsʋʋ yɔɔ.

19. (a) Waɖɛ nɖɩ Krɩstʋ sɩm yɔɔ tɔzʋʋ sɔnzɩ haɣ ɖa-taa paa anɩ? (b) Nɛ pɩnaɣ kanɛ, kɩyakʋ ŋgʋ pakaɣ labʋ Krɩstʋ sɩm yɔɔ tɔzʋʋ sɔnzɩ?

¹⁹ Yehowa ha ɛ-sɛyaa kpeekpe cee wayɩ lidaʋ kɩbaŋʋ nakʋyʋ. (Yer. 29:11) Krɩstʋ sɩm yɔɔ tɔzʋʋ sɔnzɩ haɣ ɖa-taa paa anɩ waɖɛ sɔsɔɖɛ se ɛsa Ɛsɔ nɛ Krɩstʋ mbʋ palabɩ-ɖʋ se pɩsa nɛ ɖɩpɩzɩ ɖihiɣ wezuu maatɛŋ yɔ pɩ-yɔɔ. Paa pɩnaɣ ŋga, Krɩstʋ sɩm yɔɔ tɔzʋʋ sɔnzɩ kɛnɩ kediɣzaɣ ŋga kɔ-tɔm cɛyɩ toovenim Krɩstʋ ñɩma ɛsɩndaa nɛ pɩkɩlɩ yɔ. Pakaɣ-kɛ labʋ Mazaɣ wiye, 27 mars 2021 wɩsɩ ɖʋʋ nɛ pɩtɛ lɛ. Pɩnaɣ kanɛ, ɛyaa sakɩyɛ kaɣ wɛnʋʋ waɖɛ faaa se powolo kediɣzaɣ sɔsɔɔ ŋga ka-taa. Lalaa ñakaɣ-kɛ wobu paa pakaɖɩɣnɩ-wɛ yɔ. Nabɛyɛ kaɣ labʋ Krɩstʋ sɩm yɔɔ tɔzʋʋ sɔnzɩ nzɩ salakanaa taa. Alɩwaatʋ ndʋ Yehowa, Yesu, Ɛsɔ tiyiyaa nɛ patam numwaa mba pefezaa yɔ pɛwɛɣ ɛsɔdaa nɛ pɔcɔŋnɩ-ɖʋ lɛ, tɛtɛ nɛ paa ɛgbɛyɛ nɖɩ, paa ɛgbɛyɛ cikpeɖe nɖɩ nɛ paa ɛyʋ weyi lɛ ɛla Krɩstʋ sɩm yɔɔ tɔzʋʋ sɔnzɩ camɩyɛ!