1-2. (a) Alɩwaatʋ ndʋ yɔɔ ɖeyi ɖeyi ɖɩtɔzʋʋ ɖɛ-ɛyʋ kʋsɔɔlʋ weyi ɛsɩba yɔ ɛ-yɔɔ? (b) Ɛbɛ Yesu labɩ ɖoo wena aɖɛwa pʋcɔ nɛ ɛsɩkɩ yɔ a-taa?

ÐƖTƆZƲƲ ɖɛ-ɛyaa kʋsɔɔlaa mba pasɩba yɔ pɔ-yɔɔ paa pasɩbʋ yɔ pileɖaa yaa pitileɖi yɔ. Kɔzɩ kɔzɩ evemiye nɖɩ pasɩba yɔ ɖɩtalɩɣ lɛ, ɖɩtɔzʋʋ pɔ-yɔɔ.

² Paa pɩnaɣ ŋga ɖɩkpɛndɩɣ ɛyaa miiliyɔɔwaa sakɩyɛ yɔɔ ɛjaɖɛ kpeekpe yɔɔ nɛ ɖɩtɔzʋʋ ɛyʋ weyi ɖɩsɔɔlɩ siŋŋ yɔ ɛ-yɔɔ; ɛnʋ lɛ Yesu Krɩstʋ. (1 Pɩy. 1:8) Ðikpeɣliɣ se ɖɩtɔzɩ ɛyʋ weyi ɛcɛlɩ e-wezuu se pɩkɛ kɩhɛyʋʋ pʋ-ñʋʋ taa ɖɔ-yɔɔ se pɩsa nɛ ɛya ɖa-ñʋʋ kɩdɛkɛdɩm nɛ sɩm pe-nesi tɛɛ yɔ ɛ-yɔɔ. (Mat. 20:28) Toovenim taa lɛ, Yesu sɔɔlaa se ɛ-wayɩ tɩŋɩyaa ɩtɔzɩ ɛ-sɩm yɔɔ. Ðoo wena aɖɛwa pʋcɔ nɛ pakʋʋ-ɩ yɔ a-taa, ɛ nɛ ɛ-apostoloowaa pɔtɔɔ ŋgee ɖanaɣ tɔɔnaɣ nakɛyɛ, nɛ peeɖe ɛɖʋ paɣtʋ se: “Ɩwɛɛ nɛ ɩlakɩ mbʋ nɛ ɩtɔzʋʋnɩ mɔ-yɔɔ.”—Luka 22:19.

3. Ɛbɛ ɖɩkaɣ naʋ tɔm ñʋʋ kʋnɛ kɩ-taa?

³ Ɛyaa mba powoki Krɩstʋ sɩm yɔɔ tɔzʋʋ sɔnzɩ taa yɔ, pa-taa ɛyaa nabɛyɛ pazɩ wɛnɩnɩ lidaʋ se pakaɣ kpaʋ ɛsɔdaa. Ɛlɛ ɛyaa miiliyɔɔwaa sakɩyɛ mba pɛwɛnɩ lidaʋ se pakaɣ caɣʋ tɛtʋ yɔɔ yɔ powoki sɩ-taa ɖɔɖɔ. Tɔm ñʋʋ kʋnɛ kɩ-taa, ɖɩkaɣ naʋ lɩmaɣza wena a-yɔɔ ɛyaa tindima ana a-naalɛ asɔɔlɩ siŋŋ se awolo Krɩstʋ sɩm yɔɔ tɔzʋʋ sɔnzɩ taa yɔ. Ðɩkaɣ naʋ ɖɔɖɔ ɛzɩma sɔnzɩ nzɩ sɩ-taa wobu wazɩɣ-ɖʋ yɔ. Iyele nɛ ɖɩpaɣzɩnɩ tazʋʋ lɩmaɣza wena a-yɔɔ patam numwaa woki sɔnzɩ nzɩ sɩ-taa yɔ a-taa naayɛ taa.

4. Ɛbɛ yɔɔ patam numwaa tɔkɩ kpɔnɔ nɛ pɔñɔʋ vɛɛ Krɩstʋ sɩm yɔɔ tɔzʋʋ sɔnzɩ taa?

⁴ Paa pɩnaɣ ŋga, patam numwaa woki Krɩstʋ sɩm yɔɔ tɔzʋʋ sɔnzɩ taa nɛ pɔtɔkɩ kpɔnɔ nɛ pɔñɔʋ vɛɛ. Ɛbɛ yɔɔ pɩmʋnaa se pɔtɔɔ kpɔnɔ nɛ pɔñɔɔ vɛɛ? Pɩsa nɛ ɖicosi tɔm ndʋ tɩ-yɔɔ lɛ, iyele nɛ ɖɩna mbʋ pɩlabɩ ɖoo wena aɖɛwa pʋcɔ nɛ Yesu sɩkɩ yɔ a-taa yɔ. Pɔtɔɔ Paska tɔɔnaɣ nɛ pɩtɛ lɛ, Yesu la sɔnzɩ nasɩyɩ; nzɩ pɔkɔm nɛ payaɣ pʋwayɩ se Kɩbaɣlʋ Ðanaɣ Tɔɔnaɣ sɔnzɩ. Ɛcɛlɩ ɛ-tɛ apostoloowaa siɣsiɣ tɩnaa kpɔnɔ nɛ vɛɛ nɛ eheyi-wɛ se pɔtɔɔ nɛ pɔñɔɔ. Yesu heyi-wɛ agbaa naalɛ tɔm; agbaa ana lɛ ɛgbɛyɛ kɩfaɖɛ nɛ Kewiyaɣ ɛgbɛyɛ. * (Luka 22:19, 20, 28-30) Agbaa ana ahaɣ waɖɛ apostoloowaa mba nɛ ɛyaa nabɛyɛ pazɩ se papɩsɩ awiya nɛ cɔjɔnaa ɛsɔdaa. (Natʋ 5:10; 14:1) Patam numwaa mba pakazɩ tɛtʋ yɔɔ yɔ, pɛkɛ agbaa ana a-naalɛ a-taa ñɩma, pe-ɖeke papɩzɩɣna nɛ pɔtɔɔ kpɔnɔ nɛ pɔñɔɔ vɛɛ Krɩstʋ sɩm yɔɔ tɔzʋʋ sɔnzɩ taa.

5. Ɛbɛ patam numwaa sɩma pɩlɩɩnɩ lidaʋ ŋgʋ paha-wɛ yɔ kɩ-yɔɔ?

⁵ Lɩmaɣzɩyɛ lɛɛɖɛ nɖɩ ɖɩ-yɔɔ patam numwaa sɔɔlɩ siŋŋ se powolo Krɩstʋ sɩm yɔɔ tɔzʋʋ sɔnzɩ taa yɔ nɖɩ yɔ: Sɔnzɩ nzɩ sɩhaɣ-wɛ waɖɛ se pamaɣzɩ pe-lidaʋ yɔɔ. Yehowa ha-wɛ lidaʋ ŋgʋ kɩ-wayɩ fɛyɩ yɔ; lidaʋ ŋgʋ lɛ se pakaɣ wɛnʋʋ tomnaɣ ŋga kaasɩkɩ nɛ kaaɖazɩɣ yɔ ɛsɔdaa. Pɩtasɩ lɛ, pa nɛ Yesu nɛ ɛyaa 144 000 waa taa ñɩma mba pɛtɛm fezuu nɛ pakpa ɛsɔdaa yɔ, pakaɣ kewiyitu tɔɔʋ. Nɛ kɔzɩ kɔzɩ lɛ, pakaɣ sɩŋʋʋ Yehowa Ɛsɔ ɛsɩndaa! (1 Kɔr. 15:51-53; 1 Yoh. 3:2) Patam numwaa nawa se palɩzɩ-wɛ se pakpa ɛsɔdaa nɛ pɛwɛɛnɩ wala ana. Ɛlɛ pɩsa nɛ paha-wɛ waɖɛ nɛ pakpa ɛsɔdaa lɛ, pɩpɔzʋʋ se pɔɖɔkɩ pe-siɣsiɣ wɛtʋ nɛ pɩkɔɔ nɛ pɩtalɩ pa-sɩm wiye. (2 Tim. 4:7, 8) Patam numwaa maɣzɩɣ lidaʋ ŋgʋ pɛwɛna se pakaɣ kpaʋ ɛsɔdaa yɔ kɩ-yɔɔ lɛ, pa-taa lakɩ leleŋ siŋŋ. (Tiiti 2:13) Nɛ “heŋ lɛɛŋ” yɔ? (Yoh. 10:16) Lɩmaɣza wena a-yɔɔ powoki Krɩstʋ sɩm yɔɔ tɔzʋʋ sɔnzɩ taa yɔ a-taa naayɛ lɛ wena?

6. Ɛbɛ yɔɔ heŋ lɛɛŋ woki Krɩstʋ sɩm yɔɔ tɔzʋʋ sɔnzɩ taa?

⁶ Heŋ lɛɛŋ taa ñɩma woki Krɩstʋ sɩm yɔɔ tɔzʋʋ sɔnzɩ taa, ɛlɛ paatɔkɩ kpɔnɔ nɛ paañɔʋ vɛɛ; paa mbʋ yɔ pa-taa wɛ leleŋ se powolo nɛ pana mbʋ palakɩ yɔ. Pɩnaɣ 1938 taa peheyi ɛyaa mba pɛwɛnɩ lidaʋ se pakaɣ caɣʋ tɛtʋ yɔɔ yɔ kajalaɣ ɖeɖe kpayɩ se powolo Krɩstʋ sɩm yɔɔ tɔzʋʋ sɔnzɩ taa. 1^er mars 1938 tɛ Feŋuu Tilimiye fransɩɩ ñɩnɖɛ yɔɔdaa se: “Pɩwɛɣ ɖeu nɛ pɩmʋnaa kpem se heŋ lɛɛŋ iwolo kediɣzaɣ ŋga ka-taa nɛ pana mbʋ palakɩ yɔ. . . . Pɩpɔzʋʋ se pɩkɛnɩ-wɛ taa leleŋ alɩwaatʋ, nɛ pɩkɛnɩ-wɛ taa leleŋ alɩwaatʋ ɖɔɖɔ.” Ɛyaa mba payaɣ se powolo nesi ɖɔkʋʋ sɔnzɩ nasɩyɩ taa yɔ, pa-taa wɛ leleŋ se powolo nɛ pana mbʋ palakɩ yɔ. Mbʋ ɖɔɖɔ heŋ lɛɛŋ taa wɛ leleŋ se powolo Krɩstʋ sɩm yɔɔ tɔzʋʋ sɔnzɩ taa nɛ pana mbʋ palakɩ yɔ.

7. Ɛbɛ yɔɔ heŋ lɛɛŋ ɖaŋɩɣ Krɩstʋ sɩm yɔɔ tɔzʋʋ sɔnzɩ samaɣ taa tɔm yɔɔdʋʋ kpam?

⁷ Heŋ lɛɛŋ ɖɔɖɔ maɣzɩɣ lidaʋ ŋgʋ pɛwɛna yɔ kɩ-yɔɔ. Paɖaŋɩɣ Krɩstʋ sɩm yɔɔ tɔzʋʋ sɔnzɩ samaɣ taa tɔm yɔɔdʋʋ kpam mbʋ pʋyɔɔ yɔ, tɔm yɔɔdʋʋ mbʋ, pɩ-hɔɔlʋʋ sɔsɔʋ ñɩkɩɣ niye mbʋ Krɩstʋ nɛ ɛ-awumbiya 144 000 pakaɣ labʋ ɛyaa siɣsiɣ tɩnaa Pɩnzɩ Kudoku Kewiyitu Tɔɔʋ alɩwaatʋ taa  yɔ pɩ-yɔɔ. Yesu Krɩstʋ kewiyitu tɔɔʋ tɛɛ, awumbiya ana, akaɣ ɖʋʋ nesi nɛ tɛtʋ pɩsɩ paradisuu, nɛ asɩnɩ ɛyaa nɛ patalɩ pilim. Taa leleŋ sɔsɔŋ siŋŋ pɩkɛnɩ ɛyaa miiliyɔɔwaa sakɩyɛ mba powoki Krɩstʋ sɩm yɔɔ tɔzʋʋ sɔnzɩ taa yɔ se pamaɣzɩ ɛzɩma Bibl taa natʋ tɔm kaɣ labʋ yɔ pɩ-yɔɔ. Tɩ-taa natʋyʋ lɛ ndʋ tɩwɛ Izaayii 35:5, 6; 65:21-23 nɛ Natʋ 21:3, 4 taa yɔ. Pamaɣzɩɣ ɛzɩma pa nɛ pɛ-ɛyaa kʋsɔɔlaa pakaɣ wɛʋ ɛjaɖɛ kɩfaɖɛ taa yɔ pɩ-yɔɔ lɛ, pɩkpazɩɣ lidaʋ ŋgʋ pɛwɛnɩ cee wayɩ yɔɔ yɔ ɖoŋ nɛ pɛtɛŋ pa-taa se paayeki Yehowa sɛʋ kaaʋ.—Mat. 24:13; Gal. 6:9.

8. Lɩmaɣzɩyɛ lɛɛɖɛ nɖɩ yɔɔ heŋ lɛɛŋ woki Krɩstʋ sɩm yɔɔ tɔzʋʋ sɔnzɩ taa?

⁸ Iyele nɛ ɖɩna lɩmaɣzɩyɛ lɛɛɖɛ nɖɩ ɖɩ-yɔɔ heŋ lɛɛŋ woki Krɩstʋ sɩm yɔɔ tɔzʋʋ sɔnzɩ taa yɔ. Pañɩnɩɣ se pawɩlɩ patam numwaa se pɔsɔɔlɩ-wɛ nɛ paɖʋʋ-wɛ nesi. Ɛsɔtɔm kaayɔɔdaa se patam numwaa nɛ mba pɛwɛnɩ lidaʋ se pakaɣ caɣʋ tɛtʋ yɔɔ yɔ, pakaɣ kpɛndʋʋ nɛ pala tʋmɩyɛ nɔɔ kʋɖʋmaɣ taa. Ɛzɩma tɩyɛ? Iyele nɛ ɖɩtazɩ kɩɖaŋ nɩɩyɩ taa.

9. Natʋ tɔm ndʋ tɩwɛ Zekariya 8:23 taa yɔ, tɩwɩlɩɣ se lɩmaɣza wena heŋ lɛɛŋ wɛnɩ patam numwaa yɔɔ?

⁹ Kalɩ Zekariya 8:23. Natʋ tɔm kɩbandʋ tʋnɛ, tɩyɔɔdʋʋ lɩmaɣza wena heŋ lɛɛŋ wɛnɩ po-koobiya patam numwaa yɔɔ yɔ a-tɔm. Tɔm pee “Yuuda tʋ” nɛ “mɩ-cɔlɔ” wɩlɩɣ ɛyaa kʋɖʋmaa; mba lɛ patam numwaa mba pakazɩ tɛtʋ yɔɔ yɔ. (Roma 2:28, 29) “Ajɛɛ yɔɔdasɩ kpeekpe taa ɛyaa hiu” sɩŋnɩ heŋ lɛɛŋ. ‘Pekpiki’ pʋ-tɔbʋʋ lɛ se pɔñɔʋnɩ patam numwaa nɛ pɛkpɛndɩ pɔ-yɔɔ Ɛsɔ sɛtʋ kele kele ñɩndʋ taa. Pʋyɔɔ ɖanaɣ ŋga kɔ-yɔɔ palakɩ Krɩstʋ sɩm yɔɔ tɔzʋʋ sɔnzɩ yɔ, heŋ lɛɛŋ woki sɔnzɩ nzɩ sɩ-taa nɛ pawɩlɩɣ se pɔñɔnɩ patam numwaa.

10. Ɛbɛ Yehowa laba se pɩsa nɛ natʋ tɔm ndʋ tɩwɛ Ezekɩyɛɛlɩ 37:15-19, 24, 25 taa yɔ tɩla?

¹⁰ Kalɩ Ezekɩyɛɛlɩ 37:15-19, 24, 25. Pɩsa nɛ natʋ tɔm ndʋ tɩla lɛ, Yehowa yeba nɛ patam numwaa nɛ heŋ lɛɛŋ pɛkpɛndɩ nɛ palakɩ tʋmɩyɛ nɔɔ kʋɖʋmaɣ taa. Natʋ tɔm ndʋ tɩyɔɔdʋʋ kpoŋgbolonaa naalɛ tɔm. Mba pɛwɛnɩ ɛsɔdaa kpaʋ lidaʋ yɔ, pakpaɣ-wɛ nɛ pamaɣzɩnɩ “Yuuda” kpoŋgbolo (cejewiye nɖɩ ɖɩ-taa palɩzaɣ Izrayɛɛlɩ awiya yɔ), nɛ mba pɛwɛnɩ tɛtʋ yɔɔ caɣʋ lidaʋ yɔ, pakpaɣ-wɛ nɛ pamaɣzɩnɩ “Efrayim” kpoŋgbolo. * Yehowa kaɣ kpɛndʋʋ ɛyaa tindima ana a-naalɛ nɛ akaɣ pɩsʋʋ “kpoŋgbolo kʋɖʋmʋʋ.” Pʋ-tɔbʋʋ lɛ se pakaɣ kpɛndʋʋ nɛ pala tʋmɩyɛ nɔɔ kʋɖʋmaɣ taa pe-Wiyaʋ Krɩstʋ Yesu tɛɛ. Paa pɩnaɣ ŋga, patam numwaa nɛ heŋ lɛɛŋ powoki Krɩstʋ sɩm yɔɔ tɔzʋʋ sɔnzɩ taa; powoki lɛ, paatayɩɣ ɖama tindima naalɛ taa, ɛlɛ pɛkpɛndɩɣ nɛ pɛkɛ “ewiɖe kʋɖʋmɖɩyɛ, . . . ninɖiɣyu kʋɖʋm” tɛɛ.—Yoh. 10:16.

11. Ɛzɩma “heŋ” weyi ɩ-tɔm pɔyɔɔdɩ Maatiyee 25:31-36, 40 taa yɔ, ɩwɩlɩɣ se ɩɖʋʋ nesi Krɩstʋ koobiya?

¹¹ Kalɩ Maatiyee 25:31-36, 40. “Heŋ” weyi ɩ-tɔm pɔyɔɔdʋʋ eduuye ɖɩnɛ ɖɩ-taa yɔ ɩsɩŋnɩ kɛdɛzaɣ alɩwaatʋ taa ɛyaa siɣsiɣ tɩnaa mba pɛwɛnɩ tɛtʋ yɔɔ caɣʋ lidaʋ yɔ; mba lɛ heŋ lɛɛŋ. Pasɩɣnɩ Krɩstʋ koobiya patam numwaa mba pakazɩ tɛtʋ yɔɔ yɔ se pala tʋmɩyɛ sɔsɔyɛ naɖɩyɛ; tʋmɩyɛ nɖɩ lɛ ɛjaɖɛ kpeekpe yɔɔ tɔm susuu nɛ kpɛlɩkɩyaa labʋ tʋmɩyɛ.—Mat. 24:14; 28:19, 20.

12-13. Nʋmɔŋ lɛɛŋ weyi ɩ-yɔɔ heŋ lɛɛŋ tɩŋɩɣna nɛ ɩwɩlɩɣ se ɩɖʋʋ nesi Krɩstʋ koobiya yɔ, ɩ-taa nɩɩyɩ lɛ weyi?

¹² Paa pɩnaɣ ŋga, pɩkazɩɣ kpɩtaŋ nɩɩyɩ pʋcɔ nɛ pala Krɩstʋ sɩm yɔɔ tɔzʋʋ sɔnzɩ lɛ, heŋ lɛɛŋ susuu tɔm siŋŋ ɛjaɖɛ kpeekpe yɔɔ nɛ payaɣ laŋa kɩbana tɩnaa se pɔkɔɔ sɔnzɩ nzɩ sɩ-taa. Palakɩ mbʋ nɛ pawɩlɩɣ se paɖʋʋ nesi Krɩstʋ koobiya. (Kalɩ aɖakaɣ “ Ŋwɛɛ nɛ  ŋñɔɔzʋʋ ña-tɩ se ŋɖaŋ Krɩstʋ sɩm yɔɔ tɔzʋʋ sɔnzɩ na?”) Paɖʋʋ nesi ɖɔɖɔ nɛ palakɩ ɖʋtʋ ndʋ payɩ pɩpɔzʋʋ yɔ se pɩsa nɛ papɩzɩ pala Krɩstʋ sɩm yɔɔ tɔzʋʋ sɔnzɩ ɛjaɖɛ kpeekpe yɔɔ agbaa tɩŋa taa, paa patam num nɔɔyʋ ɛfɛyɩ agbaa ana a-taa sakɩyɛ taa yɔ. Heŋ lɛɛŋ taa wɛ leleŋ siŋŋ se ɩtɩŋɩɣnɩ nʋmɔŋ ɛnɩ ɩ-yɔɔ nɛ ɩɖʋʋ nesi Krɩstʋ koobiya. Heŋ ɛnɩ ɩnawa se Yesu kpakɩɣ mbʋ palakɩ e-koobiya patam numwaa yɔ ɛzɩ ɛ-maɣmaɣ pɛwɛɛ nɛ palakɩ-pʋ yɔ.—Mat. 25:37-40.

¹³ Paa lidaʋ ŋgʋ ɖɩtɩɩwɛna yɔ, lɩmaɣza lɛɛna wena yɔɔ ɖa-tɩŋa payɩ, ɖiwoki Krɩstʋ sɩm yɔɔ tɔzʋʋ sɔnzɩ taa?

14. Ɛzɩma Yehowa nɛ Yesu pawɩlɩ-ɖʋ sɔɔlɩm mbʋ pɩkpaɖaa yɔ?

¹⁴Ðɩwɛnɩ ɛsɩmɩyɛ sɔɔlɩm mbʋ Yehowa nɛ Yesu pawɩlɩ-ɖʋ yɔ pɩ-yɔɔ. Yehowa wɩlɩ-ɖʋ ɛ-sɔɔlɩm hɔɔlɩŋ sakɩyɛ taa, ɛlɛ hɔɔlɩŋ ɛnɩ ɩ-tɩŋa ɩ-taa lɛ, kʋɖʋmʋʋ nakʋyʋ kpaɖaa. Hɔɔlʋʋ ŋgʋ kɩ-taa Ɛsɔ wɩlɩ-ɖʋ sɔɔlɩm mbʋ pɩkpaɖaa yɔ, ŋgʋ lɛ se etiyi ɛ-Pɩyalʋ kʋsɔɔlʋ nɛ ɛkɔɔ ɛla kʋñɔŋ nɛ ɛsɩ ɖɔ-yɔɔ. (Yoh. 3:16) Ðɩnawa ɖɔɖɔ se Yesu wɩlɩ-ɖʋ sɔɔlɩm mbʋ pɩkɩlɩ pɩtɩŋa yɔ alɩwaatʋ ndʋ etisi faaa nɛ ɛkpaɣ e-wezuu nɛ ɛlaa ɖɔ-yɔɔ yɔ. (Yoh. 15:13) Ðɩɩpɩzɩɣ nɛ ɖɩhɛyɩ nabʋyʋ Yehowa nɛ Yesu sɔɔlɩm mbʋ pawɩlɩ-ɖʋ yɔ pɩ-yɔɔ kaaʋ. Ɛlɛ ɖɩpɩzɩɣ ɖɩtɩŋnɩ ɛzɩma ɖɩcakɩ wezuu paa evemiye nɖɩ yɔ pɩ-yɔɔ nɛ ɖɩwɩlɩ-wɛ ɖɛ-ɛsɩmɩyɛ. (Kol. 3:15) Nɛ ɖiwoki Krɩstʋ sɩm yɔɔ tɔzʋʋ sɔnzɩ taa se pɩsa nɛ ɖɩpɩzɩ ɖɩtɔzɩ sɔɔlɩm mbʋ pawɩlɩ-ɖʋ yɔ pɩ-yɔɔ, nɛ ɖɩwɩlɩ-wɛ ɖɔɖɔ ɖɔ-sɔɔlɩm.

15. Ɛbɛ yɔɔ kɩhɛyʋʋ pʋ-ñʋʋ taa kʋjɔʋ mʋ ñɩm siŋŋ patam numwaa nɛ heŋ lɛɛŋ pɛ-ɛsɩndaa?

¹⁵Kɩhɛyʋʋ pʋ-ñʋʋ taa kʋjɔʋ mʋ ñɩm siŋŋ ɖɛ-ɛsɩndaa. (Mat. 20:28) Kɩhɛyʋʋ pʋ-ñʋʋ taa kɩlaʋ mʋ ñɩm siŋŋ patam numwaa ɛsɩndaa, mbʋ pʋyɔɔ yɔ ŋgʋ yebina se pɛwɛɛnɩ lidaʋ kɩbaŋʋ ŋgʋ pɛwɛna yɔ. Pɩtɩŋnɩ tisuu mbʋ pɛwɛnɩ Krɩstʋ kɩlaʋ yɔɔ yɔ pɩ-yɔɔ lɛ, Yehowa ya-wɛ se pɛkɛ siɣsiɣ tɩnaa nɛ ɛkpaɣ-wɛ ɛzɩ e-piya yɔ. (Roma 5:1; 8:15-17, 23) Heŋ lɛɛŋ ɖɔɖɔ wɛnɩ ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ. Pɛwɛnɩ tisuu Krɩstʋ kɩlaʋ yɔɔ, pʋyɔɔ lɛ, pɛwɛ kele kele Ɛsɔ ɛsɩndaa, papɩzɩɣ nɛ palabɩ-ɩ tʋmɩyɛ kiɖeɖeye, nɛ pɛwɛnɩ lidaʋ se pakaɣ ‘lɩnʋʋ kʋñɔŋ sɔsɔʋ taa.’ (Natʋ 7:13-15) Nʋmɔŋ weyi ɩ-yɔɔ patam numwaa nɛ heŋ lɛɛŋ patɩŋɩɣna nɛ pawɩlɩɣ pɛ-ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ yɔ, ɩ-taa nakʋyʋ lɛ se powoki Krɩstʋ sɩm yɔɔ tɔzʋʋ sɔnzɩ taa paa pɩnaɣ ŋga.

16. Lɩmaɣzɩyɛ lɛɛɖɛ nɖɩ yɔɔ ɖiwoki Krɩstʋ sɩm yɔɔ tɔzʋʋ sɔnzɩ taa?

¹⁶ Lɩmaɣzɩyɛ lɛɛɖɛ nɖɩ ɖɩ-yɔɔ ɖiwoki Krɩstʋ sɩm yɔɔ tɔzʋʋ sɔnzɩ taa yɔ, nɖɩ lɛ se ɖɩsɔɔlaa se ɖɩña Yesu. Paa cee wayɩ lidaʋ ŋgʋ ɖɩtɩɩwɛna yɔ, ɖa-taa paa anɩ sɔɔlaa se ɛña paɣtʋ ndʋ Yesu ɖʋ ɖoo wena a-taa ɛlabɩ ɛ-sɩm yɔɔ tɔzʋʋ sɔnzɩ yɔ. Ɛtɔm se: “Ɩwɛɛ nɛ ɩlakɩ mbʋ nɛ ɩtɔzʋʋnɩ mɔ-yɔɔ.”—1 Kɔr. 11:23, 24.

17. Ɛzɩma Krɩstʋ sɩm yɔɔ tɔzʋʋ sɔnzɩ sɩɣnɩ-ɖʋ se ɖɩñɔtɩnɩ Yehowa nɛ pɩkɩlɩ?

¹⁷Pɩñɔtʋʋ-ɖʋ nɛ Yehowa nɛ pɩkɩlɩ. (Yak. 4:8) Ɛzɩ ɖɩtɛm naʋ nɛ pɩɖɛɛ yɔ, Krɩstʋ sɩm yɔɔ tɔzʋʋ sɔnzɩ haɣ-ɖʋ waɖɛ se ɖɩmaɣzɩ lidaʋ ŋgʋ Yehowa ha-ɖʋ yɔ kɩ-yɔɔ. Nɛ pɩhaɣ-ɖʋ waɖɛ se ɖɩmaɣzɩ sɔɔlɩm sɔsɔm mbʋ Yehowa wɩlɩ-ɖʋ yɔ pɩ-yɔɔ. (Yer. 29:11; 1 Yoh. 4:8-10) Alɩwaatʋ ndʋ ɖɩmaɣzɩɣ ɖe-lidaʋ ŋgʋ abʋta fɛyɩ yɔ kɩ-yɔɔ nɛ sɔɔlɩm mbʋ Ɛsɔ wɩlɩ-ɖʋ nɛ pɩɩtɛŋ yɔ pɩ-yɔɔ yɔ,  ɖɩsɔɔlʋʋ Yehowa nɛ pɩkɩlɩ nɛ ɖa nɛ ɩ ɖa-taabalɩyɛ tasɩɣ cɛyɩsʋʋ nɛ pɩkɩlɩ.—Roma 8:38, 39.

18. Ɛbɛ Yesu kɩɖaʋ yɔɔ maɣzʋʋ seɣtiɣ-ɖʋ se ɖɩla?

¹⁸Piseɣtiɣ-ɖʋ se ɖɩmaɣzɩnɩ Yesu kɩɖaʋ. (1 Pɩy. 2:21) Krɩstʋ sɩm yɔɔ tɔzʋʋ sɔnzɩ alɩwaatʋ taa, ɖɩkaŋ ɖa-lɩmaɣza Bibl taa kɛdɛsɩ nzɩ sɩyɔɔdʋʋ kpɩtaʋ kɛdɛzaɣ ñɩŋgʋ ŋgʋ Yesu caɣ tɛtʋ yɔɔ yɔ, ɛ-sɩm, nɛ e-femtu yɔɔ tɔm yɔ sɩ-yɔɔ. Nɛ ɖanaɣ ŋga kɔ-yɔɔ palakɩ Krɩstʋ sɩm yɔɔ tɔzʋʋ sɔnzɩ yɔ, samaɣ taa tɔm yɔɔdʋʋ tɔzʋʋ-ɖʋ sɔɔlɩm mbʋ Yesu wɩlɩ-ɖʋ yɔ pɩ-yɔɔ. (Efɛz. 5:2; 1 Yoh. 3:16) Alɩwaatʋ ndʋ ɖɩkalɩɣ Yesu tɩ laʋ kɩɖaʋ yɔɔ tɔm nɛ ɖɩmaɣzɩɣ tɩ-yɔɔ yɔ, piseɣtiɣ-ɖʋ se ‘ɖiwolo pɩ-yɔɔ nɛ ɖɩɖɔ ɛzɩ ɛlɛ ɖɔɖɔ ɖɔm yɔ.’—1 Yoh. 2:6.

19. Ɛzɩma ɖɩpɩzɩɣ ɖiwolo pɩ-yɔɔ nɛ ɖɩwɛɛ Ɛsɔ sɔɔlɩm taa?

¹⁹Ðɩtɛŋ ɖa-taa nɛ pɩkɩlɩ se ɖiwoki pɩ-yɔɔ nɛ ɖɩwɛɛ Ɛsɔ sɔɔlɩm taa. (Yud. 20, 21) Ye ɖɩlakɩ mbʋ payɩ ɖɩpɩzɩɣ yɔ se ɖɩña Ɛsɔ, ɖɩñalɩ ɛ-hɩɖɛ yɔɔ, nɛ ɖiyele nɛ ɛ-taa la leleŋ yɔ, ɖiwoki pɩ-yɔɔ nɛ ɖɩwɛɛ ɛ-sɔɔlɩm taa. (Adu. 27:11; Mat. 6:9; 1 Yoh. 5:3) Krɩstʋ sɩm yɔɔ tɔzʋʋ sɔnzɩ labʋ seɣtiɣ-ɖʋ se ɖɩtɛ ɖa-taa nɛ pɩkɩlɩ se paa evemiye nɖɩ lɛ, ɖɩcakɩ wezuu nɛ pɩwɛɛ ɛzɩ ɖɩwɛɛ nɛ ɖiheyiɣ Yehowa se: ‘Mɔnsɔɔlaa se mowolo pɩ-yɔɔ nɛ mɛwɛɛ ñɔ-sɔɔlɩm taa tam yɔ.’

20. Lɩmaɣza kɩbana wena yɔɔ ɖiwoki Krɩstʋ sɩm yɔɔ tɔzʋʋ sɔnzɩ taa?

²⁰ Paa ɖɩwɛnɩ lidaʋ se ɖɩkaɣ caɣʋ wezuu ɛsɔdaa yaa tɛtʋ yɔɔ tam yɔ, ɖɩwɛnɩ lɩmaɣza kɩbana wena a-yɔɔ ɖiwoki Krɩstʋ sɩm yɔɔ tɔzʋʋ sɔnzɩ taa yɔ. Paa pɩnaɣ ŋga, alɩwaatʋ ndʋ ɖikpeɣliɣ evemiye nɖɩ ɖi-wiye yɔ, ɖɩtɔzʋʋ ɛyʋ weyi ɖɩsɔɔlaa yɔ ɛ-sɩm yɔɔ, ɛnʋ lɛ Yesu Krɩstʋ. Kɔzɩ kɔzɩ lɛ, ɖɩtɔzʋʋ sɔɔlɩm mbʋ Yehowa wɩlɩ-ɖʋ nɛ pɩkpaɖɩ pɩtɩŋa yɔ pɩ-yɔɔ, mbʋ lɛ se ɛcɛlɩ ɛ-Pɩyalʋ se pɩkɛnɩ kɩhɛyʋʋ pʋ-ñʋʋ taa ɖɔ-yɔɔ. Sɛmɩɩyɔ pakaɣ labʋ Krɩstʋ sɩm yɔɔ tɔzʋʋ sɔnzɩ Kemeɣa 15 avril 2022 ɖanaɣ yɔɔ. Ðɩsɔɔlɩ Yehowa nɛ ɛ-Pɩyalʋ; pʋyɔɔ lɛ, Krɩstʋ sɩm yɔɔ tɔzʋʋ sɔnzɩ wiye, nabʋyʋ tɔm ɛɛpɩzɩɣ nɛ pɩcɛyɩ ɖɛ-ɛsɩndaa nɛ pɩkɩlɩ sɔnzɩ nzɩ sɩ-taa wobu.