1. Kɛdɩ Yakubu hɔʋ yɔɔ tɔm.

HƆƲ ŋgʋ kɩ-taa Yesu neu Yakubu caɣaa nɛ ɛpaɣlɩ yɔ, kɩ-taa ñɩma kaawɛ siɣsiɣ Yehowa ɛ-ɛsɩndaa. * Yosɛɛfʋ nɛ Maarɩɩ mba pɛkɛ ɛ-lʋlɩyaa yɔ, paasɔɔlɩ Yehowa siŋŋ nɛ paalabɩ po-ɖoŋ ɖeɖe se pɛsɛɛ-ɩ. Pɩtasɩ lɛ, Yakubu ɖalʋ kɔm nɛ ɛpɩsɩ Mesiya weyi ɛ-tɔm paayɔɔdaa yɔ, nɛ pɩɩkɛnɩ Yakubu wazaɣ lɛɛka ɖɔɖɔ. Waɖɛ kɩbanɖɛ kpem pɩɩkɛnɩ Yakubu se ɛkɛ hɔʋ ŋgʋ kɩ-taa tʋ!

2. Lɩmaɣza wena yɔɔ pɩɩwɛɛ se Yakubu ɛsɔɔlɩ ɛ-ɖalʋ nɛ ɛñamɩ-ɩ?

² Pɩɩwɛɛ se Yakubu ɛsɔɔlɩ ɛ-ɖalʋ nɛ ɛñamɩ-ɩ lɩmaɣza sakɩyɛ yɔɔ. (Mat. 13:55) Kɩɖaŋ nɩɩyɩ yɔ: Alɩwaatʋ ndʋ Yesu wɛnɩ pɩnzɩ 12 yɔ, ɛɛsɩm Masɩ camɩyɛ nɛ pʋyɔɔ lɛ, ɛ-tɔm ɖɩɣzaɣ Yeruzalɛm tɔm wɩlɩyaa kpem. (Luka 2:46, 47) Pɩtɩla, Yakubu nɛ Yesu paakpɛndaa nɛ pala kafɩnda tʋmɩyɛ. Ye ɛ nɛ ɛ-ɖalʋ Yesu paakpɛndaa nɛ pala tʋmɩyɛ yɔ, pɩtʋʋ fɛyɩ se piiyeba nɛ ɛtɩlɩ-ɩ camɩyɛ. Ðoŋ ɖoŋ lɛ, Nathan Knorr yɔɔdaɣ se: “Ye ña nɛ ɛyʋ nɔɔyʋ ɩkpɛndɩɣ nɛ ɩlakɩ tʋmɩyɛ yɔ, ŋtɩlɩɣ ɛ-yɔɔ tɔm sakɩyɛ.” * Pɩtʋʋ fɛyɩ se Yakubu na ɖɔɖɔ ɛzɩma “Yesu lɔŋsɩnɖɛ wɛɛ nɛ ɖihukuu nɛ ɛpaɣlɩɣ tomnaɣ yɔɔ, nɛ ɛ-tɔm kɛdɩɣnɩ Ɛsɔ nɛ ɛyaa nɛ pɩkɩlɩɣ” yɔ. (Luka 2:52) Ye mbʋ, ɖɩpɩzɩɣ nɛ ɖɩmaɣzɩ se Yakubu kaawɛ mba papɩsɩ Yesu tɔmkpɛlɩkɩyaa kajalaɣ ñɩma yɔ pa-taa. Ɛlɛ, pɩtɩkɛ mbʋ pɩɩlaba.

3. Alɩwaatʋ ndʋ Yesu paɣzɩ ɛ-Ɛsɔ sɛtʋ tʋmɩyɛ tɛtʋ yɔɔ yɔ, ɛzɩma Yakubu laba?

³ Alɩwaatʋ ndʋ Yesu lakaɣ ɛ-Ɛsɔ sɛtʋ tʋmɩyɛ tɛtʋ yɔɔ yɔ, Yakubu tɩpɩsɩ ɛ-tɔmkpɛlɩkɩyʋ. (Yoh. 7:3-5) Toovenim taa lɛ, pɩtɩla Yakubu kaawɛ Yesu hɔʋ taa ñɩma mba pamaɣzaɣ se “ɛ-ñʋʋ taa cɔwa” yɔ pɛ-hɛkʋ taa. (Mark. 3:21) Nɛ nabʋyʋ fɛyɩ Bibl taa nɛ pɩwɩlɩɣ se Yakubu kaawɛ e-ɖoo  Maarɩɩ cɔlɔ alɩwaatʋ ndʋ pakam Yesu nazɩm sizika yɔɔ yɔ.—Yoh. 19:25-27.

4. Lɔŋ weyi ɖɩkaɣ kpɛlɩkʋʋ tɔm ñʋʋ kʋnɛ kɩ-taa?

⁴ Pʋwayɩ, Yakubu kɔm nɛ ɛwɛɛnɩ tisuu Yesu yɔɔ nɛ ɛpɩsɩ Krɩstʋ ɛgbɛyɛ taa tʋ weyi pañaŋaɣ yɔ. Tɔm ñʋʋ kʋnɛ kɩ-taa, ɖɩkaɣ naʋ lɔŋ naalɛ weyi ɖɩpɩzɩɣ nɛ ɖɩkpɛlɩkɩ Yakubu cɔlɔ yɔ. Ɛnɩ yɔ: (1) mbʋ pʋyɔɔ pɩpɔzʋʋ se ɖiwolo pɩ-yɔɔ nɛ ɖiluzuu ɖa-tɩ yɔ nɛ (2) ɛzɩma ɖɩpɩzɩɣ ɖɩla nɛ ɖɩkɛ wɩlɩyaa kɩbama yɔ.

5. Alɩwaatʋ ndʋ pefezi Yesu nɛ ɛwɩlɩ ɛ-tɩ Yakubu yɔ, ɛzɩma ɛlɛ laba?

⁵ Ɛzɩmtaa Yakubu pɩsɩ Yesu wayɩ tɩŋɩyʋ weyi ɛwɛ siɣsiɣ yɔ? Pefezi Yesu nɛ sɩɖaa taa nɛ pɩtɛ lɛ, “ɛwɩlɩ ɛ-tɩ Yakubu, nɛ pʋwayɩ lɛ, apostoloowaa tɩŋa.” (1 Kɔr. 15:7) Yesu wɩlɩ ɛ-tɩ Yakubu nɛ pɩtɛ lɛ, Yakubu pɩsɩ ɛ-tɔmkpɛlɩkɩyaa taa lɛlʋ. Alɩwaatʋ ndʋ apostoloowaa kpeɣli Yeruzalɛm ɛsɔdaa kuduyuu nakʋyʋ tɛɛ nɛ paɖaŋ se pamʋ fezuu kiɖeɖeu yɔ, Yakubu kaawɛ pa-taa. (Tʋma 1:13, 14) Pʋwayɩ, Yakubu taa kaalabɩ leleŋ se ɛpɩsɩ kajalaɣ pɩnzɩ mɩnʋʋ taa Nɔɔɖɛyaa Ɛgbɛyɛ taa tʋ. (Tʋma 15:6, 13-22; Gal. 2:9) Nɛ alɩwaatʋ natʋyʋ, pʋcɔ nɛ pɩtalɩɣ pɩnaɣ 62 lɛ, fezuu kiɖeɖeu sɩnɩ-ɩ nɛ ɛma takayaɣ nakɛyɛ Krɩstʋ ñɩma patam numwaa. Takayaɣ ŋga kasɩɣnɩ-ɖʋ sɔnɔ, paa ɖɩwɛnɩ lidaʋ se ɖɩkaɣ caɣʋ wezuu maatɛŋ ɛsɔdaa yaa tɛtʋ yɔɔ yɔ. (Yak. 1:1) Kajalaɣ pɩnzɩ mɩnʋʋ taa caanaʋ taa tɔm taa tazɩyʋ weyi payaɣ se Josèphe yɔ, ɛyɔɔdaa se Yuuda mba Cɔjɔ Kɩlɩm Anaanɩyaasɩ weyi ɛkɛ Ana pɩyalʋ yɔ ɛnʋ kaahanɩ nɔɔ nɛ pakʋ Yakubu. Yakubu ɖɔkɩ e-siɣsiɣ wɛtʋ Yehowa ɛsɩndaa pɩkɔɔ pɩsɩɩnɩ alɩwaatʋ ndʋ e-wezuu sɩ tɩnaɣ tɛtʋ yɔɔ yɔ.

6. Hɔɔlʋʋ ŋgʋ taa Yakubu kaawɛ ndɩ nɛ ɛ-alɩwaatʋ taa Ɛsɔ sɛtʋ ñʋndɩnaa?

⁶Yakubu luzaɣ ɛ-tɩ. Ɛbɛ yɔɔ ɖɩpɩzɩɣ nɛ ɖɩyɔɔdɩ mbʋ? Iyele nɛ ɖɩna tʋkaɣ ŋga kɛwɛ ɛzɩma Yakubu laba alɩwaatʋ ndʋ Yesu wɩlɩ-ɩ ɛ-tɩ yɔ nɛ ɛzɩma Ɛsɔ sɛtʋ ñʋndɩnaa sakɩyɛ laba yɔ, pɩ-hɛkʋ taa yɔ. Alɩwaatʋ ndʋ Yakubu na mbʋ pɩwɩlɩɣ kpayɩ kpayɩ se Yesu kɛ Ɛsɔ Pɩyalʋ yɔ, eluzi ɛ-tɩ nɛ etisi pɩ-yɔɔ. Ɛlɛ cɔjɔnaa sɔsaa mba paawɛ Yeruzalɛm yɔ patɩla mbʋ. Pataapɩzɩɣ se pɛkpɛzɩ se Yesu fezi Lazaarɩ nɛ sɩɖaa taa. Paa mbʋ yɔ, patitisi se Yehowa tiyini Yesu. Ɛlɛ pañɩnaɣ se pakʋ Yesu nɛ Lazaarɩ. (Yoh. 11:53; 12:9-11) Pʋwayɩ, alɩwaatʋ ndʋ pefezi Yesu yɔ, pañaɣ  pana se pɛmɛɛsɩ toovenim tɔm ndʋ ɛyaa. (Mat. 28:11-15) Ɛsɔ sɛtʋ ñʋndɩnaa mba pakpazaɣ pa-tɩ, mbʋ yebina nɛ pɔlɔ Mesiya.

7. Ɛbɛ yɔɔ pɩtɩpɔzɩ se ɖɩkpazɩ ɖa-tɩ?

⁷Lɔŋ weyi pɩkpɛlɩkɩɣ-ɖʋ yɔ: Taakpazɩ ña-tɩ, tisi faaa nɛ Yehowa wɩlɩ-ŋ tɔm. Kʋdɔŋ pɩzɩɣ kiyele nɛ ɛyʋ nɔɔyʋ laŋɩyɛ ɛɛtasɩɣ labʋ tʋmɩyɛ camɩyɛ. Mbʋ ɖɔɖɔ ye ɖɩwɛnɩ tɩ kpazʋʋ yɔ, pɩpɩzɩɣ nɛ pɩwɛɛ-ɖʋ kaɖɛ se ɖɩɖɔ Yehowa lɔŋ tasʋʋ yɔɔ. Farɩsɩ mba kpazaɣ pa-tɩ siŋŋ, mbʋ yebina nɛ pekizi se paatisiɣ mbʋ pɩwɩlɩɣ kpayɩ kpayɩ se Ɛsɔ fezuu lakaɣnɩ tʋmɩyɛ Yesu yɔɔ nɛ mbʋ pɩwɩlɩɣ kaɣlaa se ɛkɛ Ɛsɔ Pɩyalʋ yɔ pɩ-yɔɔ. (Yoh. 12:37-40) Pa-tɩ kpazʋʋ mbʋ, pɩɩkɛnɩ-wɛ kaɖɛ mbʋ pʋyɔɔ yɔ, pɩɖɩkaɣ-wɛ nʋmɔʋ se pataahiɣ wezuu maatɛŋ. (Mat. 23:13, 33) Pɩcɛyɩ siŋŋ se ɖiwolo pɩ-yɔɔ nɛ ɖɩhaɣ nʋmɔʋ Ɛsɔtɔm nɛ e-fezuu kiɖeɖeu se pɛwɛɛnɩ ɖoŋ ɖɛ-ɛyʋtʋ yɔɔ, nɛ ɖiyele nɛ peɖiyi ɖa-maɣzɩm nɛ lɩmaɣza wena ɖɩkpakɩɣ yɔ! (Yak. 3:17) Yakubu luzaɣ ɛ-tɩ, pʋyɔɔ etisi faaa se Yehowa ɛwɩlɩ-ɩ tɔm. Nɛ ɛzɩ ɖɩkɔŋʋʋ naʋ yɔ, ɛɛwɛnɩ tɩ luzuu pʋyɔɔ ɛpɩsɩ wɩlɩyʋ kɩbanʋ.

8. Ɛbɛ kaɣ-ɖʋ sɩnʋʋ nɛ ɖɩpɩsɩ wɩlɩyaa kɩbama?

⁸ Yakubu taala sukuli sɔsɔʋ. Pɩtʋʋ fɛyɩ se lɩmaɣza wena ɛ-alɩwaatʋ taa Ɛsɔ sɛtʋ ñʋndɩnaa kaawɛnɩ apostoloo Pɩyɛɛrɩ nɛ Yohanɛɛsɩ pɔ-yɔɔ yɔ, ana ɖɔɖɔ paawɛnɩ ɛ-yɔɔ. Pakpakaɣ-wɛ se “patɩla sukuli nɛ pɩɖɔɔ nɛ pɛkɛ ɛyaa yemwaa.” (Tʋma 4:13) Ɛlɛ, Yakubu kɔm nɛ ɛpɩsɩ wɩlɩyʋ kɩbanʋ. Nɛ ɖɩnaɣ tɔm ndʋ kpayɩ kpayɩ alɩwaatʋ ndʋ ɖɩkalɩɣ Bibl taa takayaɣ ŋga paya-kɛ nɛ ɛ-hɩɖɛ yɔ. Ɛzɩ Yakubu yɔ, pɩtɩla ɖa ɖɔɖɔ ɖɩtɩla sukuli nɛ pɩɖɔɔ. Paa mbʋ yɔ, Yehowa fezuu kiɖeɖeu nɛ falɩsʋʋ kɩbam mbʋ ɖɩmʋʋ Yehowa ɛgbɛyɛ taa yɔ pɩpɩzɩɣ pɩsɩnɩ-ɖʋ ɖɔɖɔ nɛ ɖɩpɩsɩ wɩlɩyaa kɩbama. Iyele nɛ ɖɩna kɩɖaʋ ŋgʋ Yakubu ha-ɖʋ tɔm wɩlʋʋ nʋmɔʋ taa yɔ, nɛ ɖɩna lɔŋ weyi ɖɩpɩzɩɣ nɛ ɖɩkpɛlɩkɩ yɔ.

9. Nʋmɔʋ ŋgʋ kɩ-yɔɔ Yakubu tɩŋnaa nɛ ɛwɩlɩ tɔm yɔ, suwe ŋpɩzɩɣ nɛ ŋyɔɔdɩ kɩ-yɔɔ?

⁹Yakubu tɩlabɩnɩ tʋmɩyɛ tɔm pee wena awɛ kaɖɛ yɔ yaa tɔm ndʋ tɩ-taa nɩʋ wɛ kaɖɛ yɔ. Piyeba nɛ mba pewelisaɣni-i yɔ, patɩlɩ mbʋ pɩɩwɛɛ se pala yɔ nɛ ɛzɩma palabɩ-pʋ yɔ. Iyele nɛ ɖɩna nʋmɔʋ kɛlɛʋ ñɩŋgʋ ŋgʋ  kɩ-yɔɔ Yakubu tɩŋnaa nɛ ɛwɩlɩ se alɩwaatʋ ndʋ pomuluu Krɩstʋ ñɩma yɔ, pɩpɔzʋʋ se petisi faaa nɛ pɔɖɔkɩ pa-laŋa nɛ pataacaɣnɩ nɔɔyʋ yɔ. Ɛmawa se: “Ðɩkpakɩɣ mba pɔɖɔkɩ pa-laŋa yɔ se pɛkɛ koboyaɣ tɩnaa. Ɩnɩ Yɔɔb laŋɩyɛ ɖɔkʋʋ tɔm nɛ ɩna mbʋ Yehowa yeba nɛ pɩtɛmnɩ-ɩ yɔ, nɛ iɖiɣzinaa se Yehowa wɛnɩ sɔɔlɩm sɔsɔm nɛ ɛkɛ pʋtɔdɩyɛ nayʋ.” (Yak. 5:11) Tɔzɩ se lɔŋ weyi Yakubu tasɩ e-koobiya yɔ, ɛlɩnɩ Masɩ taa na. Ɛlabɩnɩ tʋmɩyɛ Ɛsɔtɔm nɛ ɛsɩnɩ ɛ-tɔm welisiyaa nɛ pana se paa ɛzɩmtaa lɛ, Yehowa wazɩɣ mba pɔɖɔkʋʋ pe-siɣsiɣ wɛtʋ ɛ-ɛsɩndaa yɔ, ɛzɩ ɛɛwazʋʋ Yɔɔb yɔ. Yakubu tasaɣ lɔŋ ɛnɩ lɛ, ɛlabɩnɩ tʋmɩyɛ tɔm pee wena awɛ kɛlɛʋ nɛ a-taa wɛ nɩʋ yɔ. Ɛtɩŋnɩ nʋmɔʋ ŋgʋ kɩ-yɔɔ nɛ ɛhɔ ɛyaa lɩmaɣza nɛ ewoni Yehowa yɔɔ, nɛ pɩtɩkɛ ɛ-maɣmaɣ ɛ-yɔɔ.

10. Alɩwaatʋ ndʋ ɖɩwɩlɩɣ tɔm yɔ, nʋmɔŋ weyi ɩ-yɔɔ ɖɩpɩzɩɣ ɖɩtɩŋna nɛ ɖɩmaɣzɩnɩ Yakubu yɔ, ɩ-taa nakʋyʋ lɛ ŋgʋ?

¹⁰Lɔŋ weyi pɩkpɛlɩkɩɣ-ɖʋ yɔ: Alɩwaatʋ ndʋ ŋwɩlɩɣ tɔm yɔ, labɩnɩ tʋmɩyɛ tɔm ndʋ tɩwɛ kɛlɛʋ yɔ, nɛ tɩŋɩɣnɩ Bibl yɔɔ nɛ ŋwɩlɩɣ tɔm. Alɩwaatʋ ndʋ ɖɩwɩlɩɣ lalaa tɔm yɔ, pɩtɩpɔzɩ se ɖa-kaɖʋwa ɛkɛna se ɖɩwɩlɩɣ-wɛ se ɖɩsɩm tɔm sakɩyɛ. Ɛlɛ pɩwɛɛ se ɖa-kaɖʋwa ɛkɛna se ɖɩwɩlɩɣ-wɛ se Yehowa sɩm tɔm sakɩyɛ nɛ ɛmaɣzɩɣ pɔ-yɔɔ siŋŋ. (Roma 11:33) Ye ɖɩtɩŋɩɣnɩ Bibl taa masɩ yɔɔ paa ɛzɩmtaa nɛ ɖɩwɩlɩɣ tɔm yɔ, ɖɩpɩzɩɣ nɛ ɖɩtalɩ kaɖʋwa ŋga. Kɩɖaʋ nakʋyʋ yɔ: Mbʋ ɛzɩ ɖiiheyi ɖe-Bibl kpɛlɩkɩyaa mbʋ ɖɩkaɣ labʋ ye ɖɩɩwɛ po-lone taa yɔ lɛ, pɩwɛɛ se ɖɩsɩnɩ-wɛ nɛ pamaɣzɩ Bibl taa kɩɖaŋ yɔɔ nɛ patɩlɩ Yehowa lɩmaɣza nɛ ɛzɩma pɩlakɩ-ɩ yɔ. Ðɩnɛ ɛlɛ pɩkaɣ-wɛ seɣtuu nɛ pɔsɔɔlɩ se pɔ-tɔm ɩkɛdɩnɩ Yehowa, ɛlɛ pɩtaakɛ ɖa.

11. (a) Yakubu alɩwaatʋ taa, kala wena Krɩstʋ ñɩma nabɛyɛ kaawɛ nɛ palʋkɩna? (b) Nɛ lɔŋ weyi Yakubu tasɩ-wɛ? (Yakubu 5:13-15)

¹¹Yakubu tasaɣ ɛyaa lɔŋ weyi ɛmʋnaa yɔ. Takayaɣ ŋga Yakubu mawa yɔ ka-taa, pɩnaɣ kpayɩ kpayɩ se ɛɛsɩm kala wena e-koobiya Krɩstʋ ñɩma kaawɛɛ nɛ palʋkɩna yɔ, nɛ ɛtasɩ-wɛ lɔŋ weyi ɩ-taa tʋ kpayɩ kpayɩ yɔ pɩlɩɩnɩ mbʋ pɩwɛɛ se pala nɛ pawa kala ana yɔ pɩ-yɔɔ. Kɩɖaŋ nɩɩyɩ yɔ: Krɩstʋ ñɩma nabɛyɛ taaɖɔŋ lɔŋ weyi patasaɣ-wɛ yɔ ɩ-yɔɔ lɛɛ lɛɛ. (Yak. 1:22) Lalaa ñalakaɣ ɛsɩmɩyɛ yɔɔ lakasɩ ñɩm tɩnaa. (Yak. 2:1-3) Lalaa ɖɔɖɔ lɛ, pɩɩwɛ-wɛ kaɖɛ se pɔɖɔkɩ pa-nzʋlʋmɩyɛ. (Yak. 3:8-10) Krɩstʋ ñɩma mba, paawɛnɩ ɛjandʋ siŋŋ, ɛlɛ Yakubu kaawɛnɩ lidaʋ se papɩzɩɣ nɛ pɛlɛɣzɩ. Ɛtasɩ-wɛ lɔŋ nɛ nɔɔ kɩbaŋa, ɛlɛ eheyi-wɛ toovenim kpayɩ nɛ eseɣti mba pɩpɔzʋʋ se pasɩnɩ-wɛ yɔ se pɔpɔzɩ ɛzʋtʋyaa nɛ pasɩnɩ-wɛ nɛ pɛlɛɣzɩ wɛtʋ.—Kalɩ Yakubu 5:13-15.

12. Alɩwaatʋ ndʋ ɖɩsɩɣnɩ ɖe-Bibl kpɛlɩkɩyaa yɔ, ɛzɩma ɖɩpɩzɩɣ ɖiwolo pɩ-yɔɔ nɛ ɖɩwɛɛnɩ lɩmaɣza kɩbana?

¹²Lɔŋ weyi pɩkpɛlɩkɩɣ-ɖʋ yɔ: Tasɩ lalaa lɔŋ weyi ɛmʋnaa yɔ, ɛlɛ wɛɛnɩ lɩmaɣza kɩbana pɔ-yɔɔ. Ɛyaa mba ɖɩkpɛlɩkɩɣnɩ-wɛ Bibl yɔ, pɩwɛ pa-taa sakɩyɛ kaɖɛ se pɔɖɔ kɩ-lɔŋ tasʋʋ yɔɔ. (Yak. 4:1-4) Pʋcɔ nɛ peyele wɛtʋ kɩdɛkɛdɩtʋ ndʋ paawɛna yɔ nɛ pañaɣ pana nɛ pɛwɛɛnɩ Krɩstʋ ñɩma wɛtʋ kɩbandʋ lɛ, pɩpɩzɩɣ nɛ pɩkpaɣ-wɛ alɩwaatʋ natʋyʋ. Ɛzɩ Yakubu yɔ, pɩpɔzʋʋ se ɖɩla abalɩtʋ nɛ ɖiheyi ɖe-Bibl kpɛlɩkɩyaa hɔɔlɩŋ weyi ɩ-taa pɩpɔzʋʋ se pɛlɛɣzɩ wɛtʋ yɔ. Pɩtasɩ lɛ, pɩpɔzʋʋ se ɖiwolo pɩ-yɔɔ nɛ ɖɩwɛɛnɩ lɩmaɣza kɩbana pɔ-yɔɔ nɛ ɖɩwɛɛnɩ lidaʋ se Yehowa kaɣ hɔm ɛyaa mba poluzuu pa-tɩ yɔ nɛ ɛkɔnɩ ɛ-cɔlɔ, nɛ ɖɩwɛɛnɩ lidaʋ ɖɔɖɔ se ɛkaɣ-wɛ haʋ ɖoŋ nɛ pala lɛɣzɩtʋ pe-wezuu caɣʋ taa.—Yak. 4:10.

13. Ɛzɩ Yakubu 3:2 nɛ pɩ-tɛɛ tɔm wɩlʋʋ yɔ, tɔm ndʋ Yakubu ɖiɣzinaa?

¹³Yakubu kaawɛnɩ lɩmaɣza wena amʋnaa yɔ ɛ-maɣmaɣ ɛ-tɩ yɔɔ. Yakubu tɩmaɣzɩ se ɛ-tɔm cɛyaa nɛ pɩkpaɖɩ Krɩstʋ ñɩma lalaa mbʋ pʋyɔɔ yɔ, ɛkɛ Yesu neu yaa mbʋ pʋyɔɔ yɔ ehiɣ waɖɛ nɛ ɛla tʋma  sɔsɔna. Ɛya e-koobiya Krɩstʋ ñɩma lalaa se: “Mon-koobiya kʋsɔɔlaa.” (Yak. 1:16, 19; 2:5) Etiyele nɛ lalaa maɣzɩ se ɛtalɩ pilim. Ɛlɛ, alɩwaatʋ ndʋ ɛyɔɔdaɣ tɔm tʋnɛ yɔ, ɛya ɛ-tɩ pɩ-taa. Ɛtɔm se: “Piyiɣdiɣ ɖa-tɩŋa tam sakɩyɛ.”—Kalɩ Yakubu 3:2 nɛ pɩ-tɛɛ tɔm.

14. Ɛbɛ yɔɔ pɩpɔzʋʋ se ɖitisi faaa nɛ ɖɩyɔɔdɩ se picoɖuu-ɖʋ?

¹⁴Lɔŋ weyi pɩkpɛlɩkɩɣ-ɖʋ yɔ: Tɔzɩ se ɖa-tɩŋa ɖɩkɛ kɩwɛɛkɩm laɖaa. Pɩtɩpɔzɩ se ɖɩmaɣzɩ se hɔɔlɩŋ nɩɩyɩ taa lɛ, ɖɩkpaɖɩ mba ɖɩwɩlɩɣ-wɛ tɔm yɔ. Ɛbɛ yɔɔ pɩtɩpɔzɩ se ɖɩmaɣzɩ mbʋ? Ye ɖiyeba nɛ ɖe-Bibl kpɛlɩkɩyʋ maɣzɩ se piiyiɣdiɣ-ɖʋ yɔ, pɩpɩzɩɣ nɛ pitibi-i yɔɔɔ mbʋ pʋyɔɔ yɔ, pɩpɩzɩɣ piyele nɛ ɛmaɣzɩ se ɛɛkaɣ pɩzʋʋ kpa nɛ ɛña Ɛsɔ ɛzɩ pɩpɔzʋʋ yɔ. Ɛlɛ ye ɖiheyi ɖe-Bibl kpɛlɩkɩyʋ toovenim se pɩfɛyɩ-ɖʋ kɛlɛʋ paa ɛzɩmtaa se ɖɩɖɔ Bibl paɣtʋ kila yɔɔ, nɛ ɖiheyi-i ɖɔɖɔ ɛzɩma Yehowa sɩnɩ-ɖʋ nɛ ɖɩla lɛɣzɩtʋ ɖe-wezuu caɣʋ taa yɔ pɩ-tɔm yɔ, ɖɩkaɣ-ɩ sɩnʋʋ nɛ ɛna se ɛnʋ ɖɔɖɔ ɛpɩzɩɣ nɛ ɛsɛɛ Yehowa.

15. Kɩɖaŋ weyi Yakubu labɩnɩ tʋmɩyɛ yɔ, suwe ŋpɩzɩɣ nɛ ŋyɔɔdɩ ɩ-yɔɔ? (Yakubu 3:2-6, 10-12.)

¹⁵Yakubu labɩnɩ tʋmɩyɛ kɩɖaŋ weyi etukuuni ɛyʋ laŋɩyɛ yɔ. Pɩtʋʋ fɛyɩ se fezuu kiɖeɖeu kaasɩnɩ-ɩ; ɛlɛ pɩtɩla ɖɔɖɔ yɔ, ɛtazɩ kɩɖaŋ weyi ɛ-ɖalʋ Yesu labɩnɩ tʋmɩyɛ yɔ ɩ-taa, nɛ ɛkpɛlɩkɩ lɔŋ sakɩyɛ ɛzɩma ɛwɩlɩ tɔm yɔ pɩ-yɔɔ. Kɩɖaŋ weyi Yakubu labɩnɩ tʋmɩyɛ ɛ-takayaɣ taa yɔ ɩwɛ kɛlɛʋ, nɛ lɔŋ weyi ɩwɛ kɩɖaŋ ɛnɩ ɩ-taa yɔ ɩ-taa tʋ kpayɩ kpayɩ.—Kalɩ Yakubu 3:2-6, 10-12.

16. Ɛbɛ yɔɔ pɩwɛɛ se ɖɩlabɩnɩ tʋmɩyɛ kɩɖaŋ weyi ɩlakɩ tʋmɩyɛ camɩyɛ yɔ?

¹⁶Lɔŋ weyi pɩkpɛlɩkɩɣ-ɖʋ yɔ: Labɩnɩ tʋmɩyɛ kɩɖaŋ weyi ɩlakɩ tʋmɩyɛ camɩyɛ yɔ. Ye ŋlakɩnɩ tʋmɩyɛ kɩɖaŋ weyi ɩmʋnaa yɔ, pɩsɩɣnɩ ɛyaa se pana tɔm ndʋ ŋwɛɛ nɛ ŋwɩlɩɣ-wɛ yɔ pa-lɩmaɣza taa. Mbʋ ñɔ-tɔm welisiyaa naɣ pa-lɩmaɣza taa yɔ, pɩsɩɣnɩ-wɛ se pɔtɔzɩ Bibl taa toovenim tɔm kɩcɛyɩtʋ yɔɔ. Yesu lakaɣnɩ tʋmɩyɛ kɩɖaŋ weyi ɩlakɩ tʋmɩyɛ camɩyɛ yɔ ɛ-tɔm wɩlʋʋ taa, nɛ hɔɔlʋʋ ŋgʋ kɩ-taa lɛ ɛnʋ kaakpaɖɩna. E-neu Yakubu maɣzɩnɩ ɛ-kɩɖaʋ. Iyele nɛ ɖɩtazɩ kɩɖaŋ weyi Yakubu labɩnɩ tʋmɩyɛ yɔ ɩ-taa kʋɖʋmʋʋ taa nɛ ɖɩna mbʋ pʋyɔɔ kɩɖaʋ ŋgʋ kɩlakɩ tʋmɩyɛ camɩyɛ yɔ.

17. Kɩɖaʋ ŋgʋ Yakubu labɩnɩ tʋmɩyɛ Yakubu 1:22-25 taa yɔ, ɛbɛ yɔɔ kɩlakɩ tʋmɩyɛ camɩyɛ?

¹⁷ Kalɩ Yakubu 1:22-25. Ñɩnʋʋ kɩɖaʋ ŋgʋ Yakubu labɩnɩ tʋmɩyɛ yɔ, kɩlakɩ tʋmɩyɛ camɩyɛ lɩmaɣza sakɩyɛ yɔɔ. Ɛɛwɛnɩ lɔŋ  nɩɩyɩ ɖeyi ɖeyi ɛ-maɣzɩm taa. Lɔŋ ɛnɩ yɔ: Pɩsa nɛ Ɛsɔtɔm wazɩ-ɖʋ lɛ, tɩ-kalʋʋ ɖeke tɩmaɣ; pɩwɛɛ se ɖɩɖɔ tɔm ndʋ ɖɩkalɩɣ yɔ tɩ-yɔɔ. Kɩɖaʋ ŋgʋ Yakubu labɩnɩ tʋmɩyɛ yɔ, ɛ-tɔm welisiyaa pɩzaɣ se panɩɩ kɩ-taa kɛlɛʋ yem. Ɛyɔɔdɩ ɛyʋ weyi ɛwɛɛ nɛ ɛcɔŋnɩ ñɩnʋʋ taa yɔ ɛ-tɔm. Lɔŋ weyi ɛñɩnaɣ se pɛkpɛlɩkɩ? Lɔŋ ɛnɩ yɔ: Ye ɛyʋ nɔɔyʋ ɛcɔnɩ ɛ-tɩ ñɩnʋʋ taa nɛ ɛna se pɩpɔzʋʋ se ɛñɔɔzɩ nabʋyʋ, ɛlɛ ɛtɩñɔɔzɩ-pʋ yɔ, pɩkɛɣnɩ kɩmɛlɛndʋ. Mbʋ ɖɔɖɔ ye ɖɩkalɩ Ɛsɔtɔm nɛ ɖɩna se pɩpɔzʋʋ se ɖɩlɛɣzɩ ɖɛ-wɛtʋ natʋyʋ, ɛlɛ ɖɩtɩlɛɣzɩ yɔ, pɩkɛɣnɩ kɩmɛlɛndʋ.

18. Alɩwaatʋ ndʋ ɖɩlakɩnɩ tʋmɩyɛ kɩɖaʋ nakʋyʋ yɔ, nɩŋgbanzɩ naadozo nzɩ pɩpɔzʋʋ se ɖɩkpɛzɩ?

¹⁸ Alɩwaatʋ ndʋ ŋlakɩnɩ tʋmɩyɛ kɩɖaʋ nakʋyʋ yɔ, ŋpɩzɩɣ nɛ ŋmaɣzɩnɩ Yakubu kɩɖaʋ ye ŋkpɛzɩ nɩŋgbanzɩ sɩnɛ sɩ-naadozo yɔ: (1) Yele nɛ kɩɖaʋ ŋgʋ kɩmʋnɩ tɔm ndʋ tɩ-taa ŋwɛɛ nɛ ŋtazɩɣ yɔ. (2) Labɩnɩ tʋmɩyɛ kɩɖaʋ ŋgʋ kɩ-taa ñɔ-tɔm welisiyaa pɩzɩɣ nɛ panɩɩ kɛlɛʋ yɔ. (3) Yele nɛ lɔŋ weyi ɩwɛ kɩɖaʋ ŋgʋ kɩ-taa yɔ ɩ-taa tʋ kpayɩ kpayɩ. Ye pɩwɛ-ŋ kaɖɛ se ŋhiɣ kɩɖaŋ weyi ɩmʋnaa yɔ, wolo Index des publications des Témoins de Jéhovah taa. Hɔɔlʋʋ “Exemples” taa, ŋkaɣ naʋ kɩɖaŋ sakɩyɛ weyi ŋpɩzɩɣ nɛ ŋlabɩnɩ tʋmɩyɛ yɔ. Ɛlɛ, tɔzɩ se kɩɖaŋ wɛ ɛzɩ miikroo yɔ; ɩkaɣ yebu nɛ lɔŋ weyi ŋsɔɔlaa se ɛyaa ɩkpɛlɩkɩ yɔ ɩ-taa tʋ kpayɩ kpayɩ. Pʋyɔɔ lɛ, yele nɛ kɩɖaʋ ŋgʋ ŋlakɩnɩ tʋmɩyɛ yɔ kitukuni lɩmaɣza kɩcɛya wena ŋsɔɔlaa se patɩlɩ yɔ a-ɖeke. Toovenim taa lɛ, lɩmaɣzɩyɛ sɔsɔɖɛ nɖɩ ɖɩ-yɔɔ ɖɩsɔɔlaa se ɖɩwɛɛ niye tɔm wɩlʋʋ taa nɛ pɩkpaɖɩ yɔ, nɖɩ lɛ se ɖɩsɔɔlaa se ɖɩla mbʋ ɖɩpɩzɩɣ yɔ nɛ ɖɩsɩnɩ ɛyaa sakɩyɛ nɛ pɔkɔɔ Yehowa hɔʋ ŋgʋ kɩ-taa koboyaɣ wɛɛ yɔ kɩ-taa, ɛlɛ pɩtɩkɛ se ɖɩhɔ pa-lɩmaɣza nɛ ɖɩkɔnɩ ɖa-maɣmaɣ ɖɔ-yɔɔ.

19. Ɛzɩma ɖɩwɩlɩɣ se ɖɩsɔɔlɩ ɖo-koobiya?

¹⁹ Yakubu kaawɛnɩ ɖalʋ weyi ɛtalɩ pilim yɔ, ɛlɛ ɖa lɛ ɖɩfɛyɩna. Paa mbʋ yɔ, ɖɩwɛnɩ waɖɛ se ɖa nɛ koobiya hɔʋ ɖɩkpɛndɩɣ nɛ ɖɩsɛɣ Yehowa, nɛ hɔʋ ŋgʋ kɩ-taa ñɩma ɖɔwa. Ðɩwɩlɩɣ se ɖɩsɔɔlɩ-wɛ, ye ɖa nɛ wɛ ɖikpeɣliɣ, ɖɩkpɛlɩkɩɣ lɔŋ pɔ-cɔlɔ, nɛ ye ɖa nɛ wɛ ɖɩkpɛndɩɣ nɛ ɖɩlakɩ tɔm susuu nɛ tɔm wɩlʋʋ tʋmɩyɛ yɔ. Ye ɖɩñakɩ pana nɛ ɖɩmaɣzɩɣnɩ Yakubu kɩɖaʋ ɖɛ-wɛtʋ, ɖe-wezuu caɣʋ nɛ ɖɔ-tɔm wɩlʋʋ taa yɔ, pɩɖʋʋ Yehowa hɩɖɛ nɛ ɖɩsɩɣnɩ laŋa kɩbana tɩnaa se pɔñɔtɩnɩ ɖa-Caa kʋsɔɔlʋ weyi ɛwɛ ɛsɔdaa yɔ.