1-2. (a) Alɩwaatʋ ndʋ ɖɩmaɣzɩɣ Yesu wezuu caɣʋ nɛ ɛ-Ɛsɔ sɛtʋ tʋmɩyɛ yɔɔ yɔ, ɛzɩma pɩpɩzɩɣ nɛ pɩlabɩ-ɖʋ? (b) Ɛbɛ ɖɩkaɣ naʋ tɔm ñʋʋ kʋnɛ kɩ-taa?

 ALƖWAATƲ ndʋ ɖilesiɣ ɖɛ-ɛyʋ kʋsɔɔlʋ nɔɔyʋ yɔ, ɛyʋ ɛnʋ ɛtɛɖɩɣ-ɖʋ siŋŋ! Kiɖe tɛɛ lɛ, ɖɩmaɣzɩɣ avema wena aɖɛwa pʋcɔ nɛ ɖɛ-ɛyʋ kʋsɔɔlʋ ɛnʋ ɛsɩkɩ yɔ a-yɔɔ lɛ, pɩtɩla ɖɩnɩɣ siziŋ siŋŋ kɔzɩ kɔzɩ ye ɛyʋ ɛnʋ ɛtɔɔ kʋñɔŋ pʋcɔ nɛ ɛsɩ yɔ. Ɛlɛ alɩwaatʋ wɛɣ nɛ tɩɖɛɣ lɛ, ɖɩpɩzɩɣ nɛ ɖɩpaɣzɩ hiɣu taa leleŋ pazɩ alɩwaatʋ ndʋ ɖɩmaɣzɩɣ mbʋ ɛyʋ ɛnʋ ɛɛwɩlɩ-ɖʋ, mbʋ ɛɛlaba, yaa tɔm ndʋ ɛɛyɔɔdaa nɛ ɛkpazɩ-ɖʋ ɖoŋ yaa piyele nɛ ɖɩmʋʋyɩ yɔ pɩ-yɔɔ yɔ.

² Mbʋ ɖɔɖɔ, alɩwaatʋ ndʋ ɖɩkalɩɣ ɛzɩma Yesu tɔɔ kʋñɔŋ nɛ ɛsɩ yɔ pɩ-yɔɔ tɔm yɔ, ɖɩnɩɣ siziŋ. Kɔzɩ kɔzɩ lɛ, Yesu sɩm yɔɔ tɔzʋʋ sɔnzɩ alɩwaatʋ taa, ɖɩkpakɩɣ alɩwaatʋ nɛ ɖɩmaɣzɩɣ ɛzɩma ɛ-kɩlaʋ mʋ ñɩm siŋŋ yɔ pɩ-yɔɔ. (1 Kɔr. 11:24, 25) Paa mbʋ yɔ, ɖɩmaɣzɩɣ tɔm ndʋ payɩ Yesu yɔɔdaa nɛ mbʋ payɩ ɛlaba alɩwaatʋ ndʋ ɛɛwɛ tɛtʋ yɔɔ yɔ pɩ-yɔɔ lɛ, ɖihikiɣ taa leleŋ siŋŋ. Pɩtasɩ lɛ, ɖɩmaɣzɩɣ mbʋ eɖiɣni labʋ sɔnɔ nɛ mbʋ ɛkaɣ-ɖʋ labʋ cee wayɩ yɔ pɩ-yɔɔ lɛ, pɩkpazɩɣ-ɖʋ ɖoŋ. Ɛzɩ ɖɩkɔŋʋʋ naʋ tɔm ñʋʋ kʋnɛ kɩ-taa yɔ, ye ɖɩmaɣzɩɣ pɩtɩŋa payɩ mbʋ yɔ pɩ-yɔɔ nɛ ɖɩmaɣzɩɣ ɖɔɖɔ ɛzɩma ɛsɔɔlɩ-ɖʋ yɔ pɩ-yɔɔ yɔ, pɩpɩzɩɣ piseɣti-ɖʋ nɛ ɖɩtɩŋnɩ nʋmɔŋ nɩɩyɩ yɔɔ ɖeyi ɖeyi nɛ ɖɩwɩlɩ ɖɛ-ɛsɩmɩyɛ.

3. Lɩmaɣza wena yɔɔ pɩpɔzʋʋ se ɖɩwɛɛnɩ ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ?

³ Alɩwaatʋ ndʋ ɖɩmaɣzɩɣ Yesu wezuu caɣʋ nɛ ɛ-sɩm yɔɔ yɔ, piyeki se ɖɩwɛɛnɩ ɛsɩmɩyɛ. Yesu lakaɣ ɛ-Ɛsɔ sɛtʋ tʋmɩyɛ tɛtʋ  yɔɔ lɛ, eheyi ɛyaa wazasɩ nzɩ Ɛsɔ Kewiyaɣ kaɣ kɔnʋʋ yɔ sɩ-tɔm. Ðɩsɔɔlɩ Kewiyaɣ toovenim tɔm ndʋ siŋŋ. Ðɩwɛnɩ ɛsɩmɩyɛ kɩhɛyʋʋ pʋ-ñʋʋ taa kɩlaʋ yɔɔ mbʋ pʋyɔɔ yɔ, kɩhaɣ-ɖʋ waɖɛ se taabalɩyɛ kɩbanɖɛ ɛwɛɛ ɖa nɛ Yehowa nɛ Yesu ɖɛ-hɛkʋ taa. Mba pɛwɛɣnɩ tisuu Yesu yɔɔ yɔ, pɛwɛnɩ ɖɔɖɔ lidaʋ se pakaɣ caɣʋ wezuu tam nɛ pakaɣ tasʋʋ naʋ pɛ-ɛyaa kʋsɔɔlaa mba pasɩba yɔ. (Yoh. 5:28, 29; Roma 6:23) Pɩtɩkɛ nabʋyʋ ɖɩlaba nɛ ɖɩmʋna se ɖihiɣ wazasɩ nzɩ; nɛ mbʋ Ɛsɔ nɛ Krɩstʋ palabɩ-ɖʋ yɔ, ɖɩɩkaɣ pɩzʋʋ kpa nɛ ɖɩhɛyɩ-wɛ pi-lone taa. (Roma 5:8, 20, 21) Ɛlɛ ɖɩpɩzɩɣ nɛ ɖɩwɩlɩ-wɛ se ɖɩwɛnɩ ɛsɩmɩyɛ siŋŋ. Ɛzɩma tɩyɛ?

4. Ɛzɩma Maarɩɩ Magdalaa tʋ wɩlaa se ɛwɛnɩ ɛsɩmɩyɛ mbʋ Yesu labɩ-ɩ yɔ pɩ-yɔɔ? (Cɔnɩ kɩlɛmʋʋ.)

⁴ Iyele nɛ ɖɩna Yuuda halʋ nɔɔyʋ kɩɖaʋ; payaɣ-ɩ se Maarɩɩ Magdalaa tʋ. Ɛnɩɣaɣ siziŋ siŋŋ mbʋ pʋyɔɔ yɔ, aleewaa lʋbɛ kaawɛ ɛ-taa nɛ pawɩlɩɣ-ɩ ñaŋ. Pɩtʋʋ fɛyɩ se pɩlakaɣ-ɩ ɛzɩ kɩlabɩm nabʋyʋ fɛyɩ yɔ. Ye mbʋ, alɩwaatʋ ndʋ Yesu lɩzɩ-ɩ aleewaa mba po-yomiye taa yɔ, maɣzɩ nɛ ŋna ɛzɩma ɛɛwɛnɩ ɛsɩmɩyɛ siŋŋ yɔ! Ɛsɩmɩyɛ nɖɩ ɛɛwɛna yɔ, ɖiseɣti-i nɛ ɛpɩsɩ Yesu wayɩ tɩŋɩyʋ, nɛ ɛkpaɣ ɛ-alɩwaatʋ, e-ɖoŋ nɛ mbʋ ɛɛwɛna yɔ nɛ ɛsɩnɩ Yesu ɛ-Ɛsɔ sɛtʋ tʋmɩyɛ taa. (Luka 8:1-3) Paa Maarɩɩ taa kaalabɩ leleŋ siŋŋ nɛ mbʋ Yesu labɩ-ɩ yɔ, pɩtɩla etaaɖiɣzina se ɛlɛ kaɣaɣ-ɩ labʋ kʋjɔʋ ŋgʋ kɩkpaɖaa yɔ nɛ ɛsɩndaa. Yesu kaɣaɣ cɛlʋʋ e-wezuu ɛyaa yɔɔ, «se pɩsa nɛ weyi ɛwɛɣnɩ tisuu ɛ-yɔɔ yɔ, pataaɖɩzɩ-ɩ ɛlɛ ehiɣ wezuu maatɛŋ.» (Yoh. 3:16) Paa mbʋ yɔ, Maarɩɩ wobi pɩ-yɔɔ nɛ ɛwɛɛ siɣsiɣ, nɛ ɛtɩŋnɩ pɩ-yɔɔ nɛ ɛwɩlɩ se ɛwɛnɩ ɛsɩmɩyɛ Yesu yɔɔ. Alɩwaatʋ ndʋ Yesu nɩɣaɣ siziŋ nazɩm sizika yɔɔ yɔ, Maarɩɩ kaasɩŋ pɩ-cɔlɔ peeɖe mbʋ pʋyɔɔ yɔ ɛmaɣzaɣ Yesu yɔɔ nɛ ɛɛsɔɔlaa se ɛhɛzɩ ɛyaa lalaa mba paawɛ peeɖe yɔ pa-laŋa. (Yoh. 19:25) Yesu sɩba nɛ pɩtɛ lɛ, Maarɩɩ nɛ halaa lalaa naalɛ powoni sɔzɩŋ kɔɔ pɩlaʋ yɔɔ se pataa e-tomnaɣ. (Mark. 16:1, 2) Maarɩɩ ɖɔkɩ e-siɣsiɣ wɛtʋ lɛ, piyeba nɛ ehiɣ wazasɩ siŋŋ. Pefezi Yesu nɛ pɩtɛ lɛ, ɛwɩlɩ ɛ-tɩ Maarɩɩ nɛ ɛ nɛ ɩ pala kɛdaɣ. Nɛ Yesu wayɩ  tɩŋɩyaa hɔɔlʋʋ sɔsɔʋ taahiɣ waɖɛ nɖɩ.—Yoh. 20:11-18.

5. Ɛzɩma ɖɩpɩzɩɣ nɛ ɖɩwɩlɩ se ɖɩwɛnɩ ɛsɩmɩyɛ mbʋ payɩ Yehowa nɛ Yesu palabɩ-ɖʋ yɔ pɩ-yɔɔ?

⁵ Ye ɖa ɖɔɖɔ ɖɩlakɩnɩ tʋmɩyɛ ɖa-alɩwaatʋ, ɖo-ɖoŋ nɛ ɖe-liidiye nɛ ɖɩɖʋʋ nesi Kewiyaɣ tʋma yɔ, ɖɩwɩlɩɣ se ɖɩwɛnɩ ɛsɩmɩyɛ mbʋ payɩ Yehowa nɛ Yesu palabɩ-ɖʋ yɔ pɩ-yɔɔ. Ðɩpɩzɩɣ nɛ ɖɩha ɖa-tɩ faaa nɛ ɖɩɖʋ nesi nɛ pama kuduyuŋ weyi ɩ-taa palakɩ Ɛsɔ sɛtʋ kele kele ñɩndʋ yɔ nɛ pɔcɔnɩ ɩ-yɔɔ.

6. Ɛbɛ yɔɔ ɖɩpɩzɩɣ nɛ ɖɩyɔɔdɩ se kɩhɛyʋʋ pʋ-ñʋʋ taa kɩlaʋ kɛ kʋjɔʋ ŋgʋ palabɩ ɖa-taa paa anɩ yɔ?

⁶ Ðɩmaɣzɩɣ ɛzɩma Yehowa nɛ Yesu pɔsɔɔlɩ-ɖʋ siŋŋ yɔ pɩ-yɔɔ lɛ, piseɣtiɣ-ɖʋ se ɖa ɖɔɖɔ ɖɩsɔɔlɩ-wɛ. (1 Yoh. 4:10, 19) Alɩwaatʋ ndʋ ɖiɖiɣziɣna se Yesu sɩbɩ ɖa-taa paa anɩ lɛ ɛ-yɔɔ yɔ, piyeki nɛ ɖɩsɔɔlʋʋ-wɛ nɛ pɩkɩlɩɣ. Apostoloo Pɔɔlɩ sɩm tɔm ndʋ nɛ ɛlɩzɩ ɛ-ɛsɩmɩyɛ nɛ ɛwɩlɩ alɩwaatʋ ndʋ ɛma tɔm tʋnɛ Galaatii mba yɔ. Ɛmawa se: ‘Ɛsɔ Pɩyalʋ sɔɔlɩ-m nɛ ɛkpaɣ ɛ-tɩ nɛ ɛcɛlɩ mɔ-yɔɔ.’ (Gal. 2:20) Yehowa tɩŋnɩ kɩhɛyʋʋ pʋ-ñʋʋ taa kɩlaʋ yɔɔ nɛ ɛhɔmɩ-ŋ nɛ ɛkɔnɩ ɛ-cɔlɔ se pɩsa nɛ ŋkɛ ɛ-taabalʋ. (Yoh. 6:44) Ña-taa ɛɛlakɩ leleŋ siŋŋ se ŋna se Yehowa na pʋyʋ kɩbam ña-taa nɛ ɛhɛyɩ kɩhɛyʋʋ ŋgʋ kɩkpaɖaa yɔ se pɩsa nɛ ŋkɛ ɛ-taabalʋ? Piiyeki se ŋsɔɔlɩ Yehowa nɛ Yesu nɛ pɩkɩlɩ? Pɩwɛɣ ɖeu se ɖɩpɔzɩ ɖa-tɩ se: ‘Ɛbɛ sɔɔlɩm mbʋ pɩkaɣ-m seɣtuu se mala?’

7. Ɛzɩ ɖɩnaʋ kɩlɛmʋʋ taa yɔ, ɛzɩma ɖa-tɩŋa ɖɩpɩzɩɣ nɛ ɖɩwɩlɩ se ɖɩsɔɔlɩ Yehowa nɛ Yesu? (2 Kɔrɛntɩ mba 5:14, 15; 6:1, 2)

⁷ Sɔɔlɩm mbʋ ɖɩwɛnɩ Ɛsɔ nɛ Krɩstʋ pɔ-yɔɔ yɔ, piseɣtiɣ-ɖʋ se ɖɩwɩlɩ sɔɔlɩm ɛyaa lalaa. (Kalɩ 2 Kɔrɛntɩ mba 5:14, 15; 6:1, 2.) Nʋmɔŋ weyi ɩ-yɔɔ ɖɩtɩŋɩɣna nɛ ɖɩwɩlɩɣ lalaa sɔɔlɩm yɔ ɩ-taa nakʋyʋ lɛ se ɖisusuu tɔm nɛ kpekpeka. Ðɩyɔɔdʋʋnɩ ɛyaa mba payɩ ɖɩkatɩɣ yɔ. Ðiikiziɣ yɔɔdɩnʋʋ ɛyʋ nɔɔyʋ mbʋ pʋyɔɔ yɔ e-tomnaɣ tɔlɩm, ɛ-kʋnʋŋ yaa e-cejewiye wɛ  ndɩ, yaa mbʋ pʋyɔɔ yɔ ɛkɛ ñɩm tʋ yaa kʋñɔndʋ, yaa ɛlabɩ sukuli yaa ɛtɩla sukuli. Ye ɖɩyɔɔdʋʋnɩ ɛyaa mba payɩ ɖɩkatɩɣ yɔ, ɖɩwɛɛ nɛ ɖɩlakɩ Yehowa sɔɔlɩm mbʋ pʋyɔɔ yɔ ɛ-sɔɔlɩm lɛ «se ɛyaa ndɩ ndɩ ihiɣ ñʋʋ yabʋ nɛ pɛwɛɛnɩ toovenim tɛ sɩmtʋ siŋŋ.»—1 Tim. 2:4.

8. Ɛzɩma ɖɩpɩzɩɣ nɛ ɖɩwɩlɩ se ɖɩsɔɔlɩ ɖo-koobiya Krɩstʋ mba?

⁸ Ye ɖɩwɩlɩɣ sɔɔlɩm ɖo-koobiya Krɩstʋ mba yɔ, ɖɩwɩlɩɣ ɖɔɖɔ se ɖɩsɔɔlɩ Ɛsɔ nɛ Krɩstʋ. (1 Yoh. 4:21) Ðɩmaɣzɩɣ pa-kɩcɛyɩm yɔɔ siŋŋ nɛ ɖɩsɩɣnɩ-wɛ alɩwaatʋ ndʋ pakatɩɣ kala yɔ. Alɩwaatʋ ndʋ pelesiɣ pɛ-ɛyʋ kʋsɔɔlʋ nɔɔyʋ yɔ ɖɩhɛzɩɣ pa-laŋa, ɖiwoki nɛ ɖɩnaɣ-wɛ alɩwaatʋ ndʋ pɩwɩɣ-wɛ yɔ, nɛ ɖɩlakɩ ɖo-ɖoŋ ɖeɖe nɛ ɖɩkpazɩɣ-wɛ ɖoŋ alɩwaatʋ ndʋ pitiki-wɛ yɔɔɔ yɔ. (2 Kɔr. 1:3-7; 1 Tes. 5:11, 14) Ðiwoki pɩ-yɔɔ nɛ ɖɩtɩmɩɣ pɔ-yɔɔ mbʋ pʋyɔɔ yɔ ɖɩnawa se «ɛyʋ siɣsiɣ tʋ tenduu wɛnɩ ɖoŋ siŋŋ.»—Yak. 5:16.

9. Nʋmɔʋ lɛɛkʋ ŋgʋ yɔɔ ɖɩpɩzɩɣ ɖɩtɩŋna nɛ ɖɩwɩlɩ se ɖɩsɔɔlɩ ɖo-koobiya Krɩstʋ mba?

⁹ Ðɩwɩlɩɣ ɖɔɖɔ se ɖɩsɔɔlɩ ɖo-koobiya Krɩstʋ mba ye ɖɩñakɩ pana siŋŋ se ɖiyele nɛ laŋhɛzɩyɛ wɛɛ ɖa nɛ wɛ ɖɛ-hɛkʋ taa yɔ. Ðɩñakɩ pana se ɖɩmaɣzɩnɩ Yehowa kpaɣʋ nɛ kpeɣu. Yehowa tisi faaa nɛ ɛ-Pɩyalʋ sɩ ɖa-kɩwɛɛkɩm yɔɔ. Pʋyɔɔ lɛ, alɩwaatʋ ndʋ ɖo-koobiya yʋsʋʋnɩ-ɖʋ yɔ, pɩpɔzʋʋ se ɖa ɖɔɖɔ ɖitisi faaa nɛ ɖikpeɣ-wɛ. Ðɩtɩsɔɔlɩ se ɖɩla ɛzɩ yom kɩdɛkɛdʋ weyi ɛ-tɔm Yesu yɔɔdɩ e-eduuye naɖɩyɛ taa yɔ. Yom ɛnʋ, ɛtɔɔ ɛ-caa kɩmɩyɛ sɔsɔɖɛ nɛ ɛlɛ kpaɣ nɛ ekpeɣ-i. Ɛlɛ pʋwayɩ yom ɛnʋ ekizaa se eekpeɣu yom lɛlʋ kɩmɩyɛ cikpeɖe nɖɩ ɛlɛ tɔɔ-ɩ yɔ. (Mat. 18:23-35) Ye tɔm natʋyʋ ɛwɛ ña nɛ ɛgbɛyɛ taa koobu nɔɔyʋ mɩ-hɛkʋ taa yɔ, ŋpɩzɩɣ nɛ ŋkpɛzɩ kajalaɣ nɩŋgbaŋaɣ nɛ ŋyele nɛ laŋhɛzɩyɛ wɛɛ ña nɛ ɩ mɩ-hɛkʋ taa pʋcɔ nɛ ŋwolo Yesu sɩm yɔɔ tɔzʋʋ sɔnzɩ taa? (Mat. 5:23, 24) Ye ŋlabɩ mbʋ yɔ, ŋwɩlɩɣ se ŋsɔɔlɩ Yehowa nɛ Yesu siŋŋ.

10-11. Ɛzɩma ɛzʋtʋyaa pɩzɩɣ nɛ pawɩlɩ se pɔsɔɔlɩ Yehowa nɛ Yesu? (1 Pɩyɛɛrɩ 5:1, 2)

¹⁰ Ɛzɩma ɛgbɛyɛ taa ɛzʋtʋyaa pɩzɩɣ nɛ pawɩlɩ se pɔsɔɔlɩ Yehowa nɛ Yesu? Nʋmɔʋ sɔsɔʋ ŋgʋ kɩ-yɔɔ papɩzɩɣ patɩŋna nɛ pala mbʋ yɔ ŋgʋ lɛ se pɩwɛɛ se pɔcɔnɩ Yesu heŋ kɩcɛyɩm ɖeɖe. (Kalɩ 1 Pɩyɛɛrɩ 5:1, 2.) Yesu kaayeba nɛ apostoloo Pɩyɛɛrɩ nɩɩ tɔm ndʋ tɩ-taa kpayɩ kpayɩ. Pɩyɛɛrɩ kizaa se ɛɛsɩŋ Yesu tam nabudozo nɛ pɩtɛ lɛ, pɩtʋʋ fɛyɩ se ɛɛsɔɔlɩ siŋŋ se ɛwɩlɩ se ɛsɔɔlɩ Yesu. Pefezi Yesu nɛ pɩtɛ lɛ, ɛpɔzɩ Pɩyɛɛrɩ se: «Siimɔɔ, Yohanɛɛsɩ pɩyalʋ, ŋsɔɔlɩ-m?» Ðɩɩpɩtɩɣ se Pɩyɛɛrɩ kaalabɩ mbʋ payɩ ɛpɩzɩɣ yɔ se ɛwɩlɩ ɛ-Ñʋʋdʋ se ɛsɔɔlɩ-ɩ. Yesu heyi Pɩyɛɛrɩ se: «Ðiyi me-heŋ cikpeŋ.» (Yoh. 21:15-17) Nɛ pʋwayɩ Pɩyɛɛrɩ wezuu caɣʋ alɩwaatʋ ndʋ tɩɩkazaa yɔ tɩ-taa, ɛcɔnɩ Kɩbaɣlʋ heŋ yɔɔ nɛ sɔɔlɩm, nɛ ɛtɩŋnɩ pɩ-yɔɔ nɛ ɛwɩlɩ se ɛsɔɔlɩ Yesu.

¹¹ Ɛgbɛyɛ taa ɛzʋtʋyaa, ɛzɩma ɩpɩzɩɣ nɛ ɩwɩlɩ se tɔm ndʋ Yesu heyi Pɩyɛɛrɩ yɔ tɩ-tɔm cɛyɩ mɩ-ɛsɩndaa Yesu sɩm yɔɔ tɔzʋʋ sɔnzɩ alɩwaatʋ taa? Ye ikilimiɣ koobiya yɔɔ ɖoŋ ɖoŋ, nɛ kɔzɩ kɔzɩ lɛ ye ɩñakɩ pana se ɩsɩnɩ mba pɛhɛ fezuu taa yɔ se papɩsɩ Yehowa cɔlɔ yɔ, ɩwɩlɩɣ se ɩsɔɔlɩ Yehowa nɛ Yesu siŋŋ. (Ezek. 34:11, 12) Pɩtasɩ lɛ, ɩpɩzɩɣ nɛ ŋñaɣ pana nɛ ɩkpazɩ ɖoŋ Bibl kpɛlɩkɩyaa nɛ laŋa kɩbana tɩnaa lalaa mba pɔkɔŋ Yesu sɩm yɔɔ tɔzʋʋ sɔnzɩ taa yɔ. Ðɩsɔɔlaa se ɖiyele nɛ peɖiɣzina se ɖɩmaɣzɩɣ pɔ-yɔɔ mbʋ pʋyɔɔ yɔ ɖɩwɛnɩ lidaʋ se paba ɖɔɖɔ pakaɣ pɩsʋʋ Yesu wayɩ tɩŋɩyaa.

12. Ðoo wena aɖewa nɛ kife nɛ pakʋ Yesu yɔ a-taa, tɔm ndʋ ɛyɔɔdaa yɔ, ɛbɛ yɔɔ tɩ-yɔɔ maɣzʋʋ haɣ-ɖʋ abalɩtʋ? (Yohanɛɛsɩ 16:32, 33)

¹² Ðoo wena aɖɛwa nɛ kife nɛ pakʋ Yesu yɔ a-taa, eheyi ɛ-tɔmkpɛlɩkɩyaa se: «Ɩkaɣ tɔɔʋ kʋñɔmɩŋ ɛjaɖɛ yɔɔ, ɛlɛ ɩɖɔkɩ kpam! Mawabɩ  ɛjaɖɛ.» (Kalɩ Yohanɛɛsɩ 16:32, 33.) Ɛbɛ sɩnɩ Yesu nɛ ɛwɛɛ abalɩtʋ alɩwaatʋ ndʋ e-koyindinaa nazaɣ-ɩ yɔ nɛ ewolo pɩ-yɔɔ nɛ ɛɖɔkɩ e-siɣsiɣ wɛtʋ nɛ pɩkɔɔ pɩtalɩ ɛ-sɩm wiye? Ɛɛta Yehowa liu. Yesu kaanawa se ɛ-wayɩ tɩŋɩyaa kaɣ katʋʋ takɩm mbʋ pɩ-ɖɔndɩ, pʋyɔɔ ɛpɔzɩ Yehowa se ɛcɔnɩ pɔ-yɔɔ. (Yoh. 17:11) Ɛbɛ yɔɔ tɔm ndʋ tɩhaɣ-ɖʋ abalɩtʋ? Tɩhaɣ-ɖʋ abalɩtʋ mbʋ pʋyɔɔ yɔ Yehowa kɩlɩ ɖoŋ ɖo-koyindinaa tɩŋa. (1 Yoh. 4:4) Yehowa naɣ mbʋ payɩ pɩlakɩ yɔ. Ða-taa tɛma se ye ɖɩtaɣ Yehowa liu yɔ, ɖɩpɩzɩɣ nɛ ɖɩwa ɖɔ-sɔɔndʋ nɛ ɖɩwɛɛ abalɩtʋ.

13. Ɛzɩma Yosɛɛfʋ Ariimatee tʋ wɩlaa se ɛwɛ abalɩtʋ?

¹³ Iyele nɛ ɖɩna Yosɛɛfʋ Ariimatee tʋ kɩɖaʋ. Yuuda mba ñaŋaɣ-ɩ siŋŋ. Ɛɛkɛ Yuuda mba tɔm ɖɩhʋyɛ sɔsɔɖɛ taa tʋ pʋ-tɔbʋʋ Sahedrɛɛ taa tʋ. Ɛlɛ, alɩwaatʋ ndʋ Yesu lakaɣ ɛ-Ɛsɔ sɛtʋ tʋmɩyɛ tɛtʋ yɔɔ yɔ, Yosɛɛfʋ tɩwɩlɩ se ɛwɛ abalɩtʋ. Yohanɛɛsɩ yɔɔdaa se «ɛɛkɛ Yesu tɔmkpɛlɩkɩyʋ mɛsaɣ tɛɛ mbʋ pʋyɔɔ yɔ eseɣaɣ sɔɔndʋ Yuuda mba.» (Yoh. 19:38) Kewiyaɣ tɔm kaakɛdɩnɩ Yosɛɛfʋ, paa mbʋ yɔ etiyele nɛ lalaa tɩlɩ se ɛwɛnɩ tisuu Yesu yɔɔ. Pɩtʋʋ fɛyɩ se sɔɔndʋ kpaɣaɣ-ɩ se pɩtaakɛdɩ nɛ elesi lone sɔsɔɖɛ nɖɩ ɛɛwɛnɩ samaɣ taa yɔ. Ɛlɛ, Bibl heyiɣ-ɖʋ se Yesu sɩba nɛ pɩtɛ lɛ, Yosɛɛfʋ labɩ «abalɩtʋ nɛ ewolo Pilaatɩ ɛsɩndaa nɛ ɛpɔzɩ-ɩ Yesu tomnaɣ.» (Mark. 15:42, 43) Lɛɛlɛɛyɔ lɛ, Yosɛɛfʋ tɩñaɣ pana se ɛmɛsɩ ɛyaa se ɛkɛ Yesu tɔmkpɛlɩkɩyʋ.

14. Ye sɔɔndʋ ɛkpaɣ-ŋ nɛ ɛyaa yɔ, ɛbɛ pɩpɔzʋʋ se ŋla?

¹⁴ Wiɖiyi ŋtɛm seu ɛyaa sɔɔndʋ ɛzɩ Yosɛɛfʋ yɔ? Sukuli taa yaa tʋmɩyɛ taa, nabʋyʋ taa fɛyɛ kpaɣ-ŋ se ŋheyi ɛyaa lalaa se ŋkɛ Yehowa Aseɣɖe Tʋ na? Sɔɔndʋ kpaɣ-ŋ se ŋpɩsɩ tɔm susuyu yaa se ŋha ña-tɩ nɛ pamɩyɩsɩ-ŋ lɩm mbʋ pʋyɔɔ yɔ ŋnɩɣzɩɣ lɩmaɣza wena lalaa pɩzɩɣ nɛ pɛwɛɛnɩ ñɔ-yɔɔ yɔ a-yɔɔ? Taayele nɛ wɛtʋ ndʋ tɩɖɩɣ-ŋ nʋmɔʋ se ŋtaala mbʋ ŋnawa se pɩtʋʋzaa yɔ. Tɩmnɩ Yehowa siŋŋ. Pɔzɩ-ɩ se ɛha-ŋ abalɩtʋ nɛ ŋla ɛ-sɔɔlɩm. Ŋnaɣ ɛzɩma Yehowa wɛɛ nɛ ecosuu ña-adɩma yɔɔ yɔ lɛ, ŋkaɣ kpaʋ ɖoŋ nɛ ŋwɛɛ abalɩtʋ nɛ pɩkɩlɩ.—Iza. 41:10, 13.

15. Taa leleŋ weyi Yesu tɔmkpɛlɩkɩyaa hiɣaa alɩwaatʋ ndʋ ɛlɩzɩ ɛ-tɩ nɛ ɛwɩlɩ-wɛ yɔ, ɛbɛ eseɣti-wɛ nɛ pala? (Luka 24:52, 53)

¹⁵ Alɩwaatʋ ndʋ Yesu sɩba yɔ, ɛ-tɔmkpɛlɩkɩyaa kaawɛ laŋwɛɛkɩyɛ taa siŋŋ. Maɣzɩ se ñaawɛnɩ po-lone taa. Pɩtasɩnɩ se paalesi pa-taabalʋ kʋsɔɔlʋ lɛ, pɩlakaɣ-wɛ ɖɔɖɔ ɛzɩ pelesi pe-lidaʋ yɔ. (Luka 24:17-21) Ɛlɛ alɩwaatʋ ndʋ Yesu lɩzɩ ɛ-tɩ nɛ ɛwɩlɩ-wɛ yɔ, ɛkpaɣ alɩwaatʋ nɛ ɛsɩnɩ-wɛ nɛ panɩɩ ɛzɩma eyeba nɛ Bibl taa natʋ tɔm la yɔ pɩ-taa. Ɛɖʋ-wɛ ɖɔɖɔ tʋmɩyɛ kɩcɛyɩyɛ naɖɩyɛ  se pala. (Luka 24:26, 27, 45-48) Kɩyakɩŋ 40 wayɩ, Yesu pɩsaɣ ɛsɔdaa lɛ, laŋwɛɛkɩyɛ nɖɩ ɖɩ-taa tɔmkpɛlɩkɩyaa kaawɛɛ yɔ, ɖɩpɩsɩ taa leleŋ sɔsɔŋ. Pa-taa kaawɛ leleŋ siŋŋ mbʋ pʋyɔɔ yɔ panawa se Yesu wɛ wezuu nɛ ɛkaɣ-wɛ sɩnʋʋ nɛ pala tʋmɩyɛ nɖɩ ɛɖʋ-wɛ yɔ. Pa-taa leleŋ ɛnɩ eseɣti-wɛ nɛ powolo pɩ-yɔɔ nɛ pasaŋ Yehowa.—Kalɩ Luka 24:52, 53; Tʋma 5:42.

16. Ɛzɩma ɖɩpɩzɩɣ nɛ ɖɩmaɣzɩnɩ Yesu tɔmkpɛlɩkɩyaa?

¹⁶ Ɛzɩma ɖɩpɩzɩɣ nɛ ɖɩmaɣzɩnɩ Yesu tɔmkpɛlɩkɩyaa? Pɩtɩkɛ Yesu sɩm yɔɔ tɔzʋʋ sɔnzɩ alɩwaatʋ taa ɖeke ɖɩpɩzɩɣ nɛ ɖihiɣ taa leleŋ Yehowa sɛtʋ taa, ɛlɛ ɖɩpɩzɩɣ nɛ ɖihiɣ taa leleŋ pɩnaɣ kpeekpe taa. Pɩsa nɛ ɖihiɣ taa leleŋ ɛnɩ lɛ, pɩpɔzʋʋ se ɖɩsɩɩ Ɛsɔ Kewiyaɣ kajalaɣ ɖeɖe ɖe-wezuu caɣʋ taa. Kɩɖaŋ nɩɩyɩ yɔ: Sakɩyɛ labɩ lɛɣzɩtʋ tomnaɣ yɔɔ tʋmɩyɛ nɖɩ palakɩ yɔ ɖɩ-hɔɔlʋʋ taa se pɩsa nɛ paɖʋʋ nesi tɔm susuu tʋmɩyɛ, powoki kediɣzisi, nɛ palakɩ hɔʋ taa Ɛsɔ sɛtʋ ɖoŋ ɖoŋ. Halɩ koobiya nabɛyɛ lɩzaa se paakaŋ ñʋʋ nɛ tomnaɣ yɔɔ ñɩm ñɩnʋʋ se pɩsa nɛ pala tʋma sakɩyɛ ɛgbɛyɛ taa nɛ pɩkɩlɩ, yaa se pɩsa nɛ powolo nɛ paɖʋ nesi ɖenɖe pɩpɔzʋʋ Kewiyaɣ tɔm susuyaa nɛ pɩkɩlɩ yɔ, ŋgʋ ɛyaa lalaa ñamaɣzɩɣ se tomnaɣ yɔɔ ñɩm mbʋ pɩ-tɔm kɩlɩnɩ cɛyʋʋ. Pɩsa nɛ ɖiwolo pɩ-yɔɔ nɛ ɖɩsɛɣ Yehowa lɛ, pɩpɔzʋʋ-ɖʋ laŋɩyɛ ɖɔkʋʋ. Paa mbʋ yɔ, Yehowa labɩ-ɖʋ tamaɣ se ye ɖɩsɩ Kewiyaɣ tʋma kajalaɣ ɖeɖe ɖe-wezuu caɣʋ taa yɔ, ɛkaɣ-ɖʋ wazʋʋ siŋŋ.—Adu. 10:22; Mat. 6:32, 33.

17. Ɛbɛ ŋtɛm ña-taa se ŋlakɩ Yesu sɩm yɔɔ tɔzʋʋ sɔnzɩ alɩwaatʋ tʋnɛ tɩ-taa? (Cɔnɩ kɩlɛmʋʋ.)

¹⁷ Ðɩɖaŋ kpam se ɖɩla Yesu sɩm yɔɔ tɔzʋʋ sɔnzɩ Piya 4 avril wiye. Paa mbʋ yɔ, taaɖaŋ se evemiye nɖɩ ɖɩtalɩ pʋcɔ nɛ ŋkpaɣ alɩwaatʋ nɛ ŋmaɣzɩ Yesu wezuu caɣʋ nɛ ɛ-sɩm nɛ sɔɔlɩm mbʋ ɛ nɛ Yehowa palɩzaa nɛ pawɩlɩ-ɖʋ yɔ pɩ-yɔɔ. Yesu sɩm yɔɔ tɔzʋʋ sɔnzɩ alɩwaatʋ kpeekpe taa lɛ, tɩŋnɩ wala wena payɩ ŋhikiɣ yɔ a-yɔɔ nɛ ŋla mbʋ. Ŋpɩzɩɣ nɛ ŋlɩzɩ alɩwaatʋ natʋyʋ nɛ ŋkalɩ kɛdɛsɩ nzɩ sɩwɛ hatʋ cabɩ takayaɣ «Yesu wezuu caɣʋ tɛtʋ yɔɔ tɛ kɛdɛzaɣ kpɩtaʋ» taa yɔ nɛ ŋmaɣzɩ sɩ-yɔɔ; kɛwɛ jw.org yɔɔ, hɔɔlʋʋ TƆM SUSUU WONDU > Takayɩsɩ & Hatʋ Cabɩ Takayɩsɩ. Ŋŋkalɩɣ kɛdɛsɩ nzɩ lɛ, yʋsɩ Bibl masɩ nzɩ sɩpɩzɩɣ nɛ sɩsɩnɩ-ŋ nɛ ŋwɛɛnɩ ɛsɩmɩyɛ, sɔɔlɩm, abalɩtʋ, nɛ taa leleŋ nɛ pɩkɩlɩ yɔ. Pʋwayɩ lɛ, maɣzɩ nɛ ŋna nʋmɔŋ weyi ɩ-yɔɔ ɖeyi ɖeyi ŋpɩzɩɣ ŋtɩŋna nɛ ŋwɩlɩ se ŋwɛnɩ ɛsɩmɩyɛ siŋŋ yɔ. Ña-taa pɩzɩɣ nɛ pɩtɛ se pana wena payɩ ŋñakɩ se ŋtɔzɩ Yesu yɔɔ, Yesu sɩm yɔɔ tɔzʋʋ sɔnzɩ alɩwaatʋ taa yɔ, ɛ-taa kaɣ-yɛ labɩnʋʋ leleŋ.—Natʋ 2:19.