TƆM ÑƲƲ ŊGƲ ÐƖKPƐLƖKƖƔ YƆ 4
Yehowa wazɩɣ pana wena ɖɩñakɩ se ɖɩla Yesu sɩm yɔɔ tɔzʋʋ sɔnzɩ yɔ
«Ɩwɛɛ nɛ ɩlakɩ mbʋ nɛ ɩtɔzʋʋnɩ mɔ-yɔɔ.»—LUKA 22:19.
HENDU 19 Kɩbaɣlʋ tɔɔnaɣ sɔnzɩ
LƖMAƔZA SƆSƆNA a
1-2. Ɛbɛ yɔɔ ɖiwoki Yesu sɩm yɔɔ tɔzʋʋ sɔnzɩ taa paa pɩnaɣ ŋga?
PƖÑƆTƲƲNƖ pɩnzɩ 2000 yɔ, Yesu cɛlɩ e-wezuu ɖɔ-yɔɔ nɛ pɩhaɣ-ɖʋ waɖɛ se ɖihiɣ wezuu maatɛŋ. Ðoo wena aɖɛwa pʋcɔ nɛ Yesu sɩkɩ yɔ a-taa, ɛɖʋ paɣtʋ ɛ-wayɩ tɩŋɩyaa se patɩŋnɩ sɔnzɩ kɛlɛʋ ñɩnzɩ nasɩyɩ yɔɔ nɛ pɔtɔzʋʋnɩ ɛ-kɩlaʋ yɔɔ; nɛ palakɩnɩ tʋmɩyɛ kpɔnɔ nɛ vɛɛ sɔnzɩ nzɩ sɩ-taa.—1 Kɔr. 11:23-26.
2 Ðɩñaŋ Yesu paɣtʋ mbʋ pʋyɔɔ yɔ ɖɩsɔɔlɩ-ɩ siŋŋ. (Yoh. 14:15) Paa pɩnaɣ ŋga Yesu sɩm yɔɔ tɔzʋʋ sɔnzɩ alɩwaatʋ taa, ɖɩkpakɩɣ alɩwaatʋ nɛ ɖɩtɩmɩɣ nɛ ɖɩmaɣzɩɣ ɛzɩma ɛ-sɩm mbʋ pitukuuni-ɖʋ yɔ pɩ-yɔɔ, nɛ ɖɩtɩŋɩɣnɩ pɩ-yɔɔ nɛ ɖɩwɩlɩɣ-ɩ ɖɛ-ɛsɩmɩyɛ mbʋ ɛlabɩ-ɖʋ yɔ pɩ-yɔɔ. Ða-taa wɛ leleŋ se ɖɩla sakɩyɛ tɔm susuu tʋmɩyɛ taa nɛ pɩkɩlɩ nɛ ɖɩyaa ɛyaa sakɩyɛ se pɔkɔɔ nɛ pɛkpɛndɩ ɖɔ-yɔɔ ŋgee sɔnzɩ nzɩ sɩ-taa. Nɛ toovenim taa lɛ, ɖɩtɛm ɖa-taa se ɖiiyeki nɛ nabʋyʋ ɖɩɣ-ɖʋ nʋmɔʋ se ɖitaawolo Yesu sɩm yɔɔ tɔzʋʋ sɔnzɩ taa.
3. Ɛbɛ ɖɩkaɣ naʋ tɔm ñʋʋ kʋnɛ kɩ-taa?
3 Tɔm ñʋʋ kʋnɛ kɩ-taa, ɖɩkaɣ naʋ hɔɔlɩŋ 3 weyi ɩ-taa Yehowa samaɣ ñaɣ pana siŋŋ se pɩsa nɛ kapɩzɩ nɛ kala Yesu sɩm yɔɔ tɔzʋʋ sɔnzɩ yɔ: (1) kalakɩ sɔnzɩ nzɩ ɛzɩ Yesu wɩlʋʋ-kɛ yɔ, (2) kayaɣ ɛyaa lalaa se pɔkɔɔ sɔnzɩ nzɩ sɩ-taa, nɛ (3) kalakɩ sɔnzɩ nzɩ paa kakatɩɣ kala yɔ.
ÐƖLAKƖ YESU SƖM YƆƆ TƆZƲƲ SƆNZƖ ƐZƖ YESU WƖLƲƲ-ÐƲ YƆ
4. Toovenim tɔm ndʋ taa palɩzɩɣ Yesu sɩm yɔɔ tɔzʋʋ sɔnzɩ taa paa pɩnaɣ ŋga, nɛ ɛbɛ yɔɔ pɩwɛɛ se ɖɩkpaɣ-tʋ se tɩmʋ ñɩm siŋŋ? (Luka 22:19, 20)
4 Paa pɩnaɣ ŋga Yesu sɩm yɔɔ tɔzʋʋ sɔnzɩ taa, ɖiwelisiɣ samaɣ taa tɔm yɔɔdʋʋ nabʋyʋ, nɛ tɩ-taa patɩŋɩɣnɩ Bibl yɔɔ nɛ pocosuu tɔm pɔzʋʋ sakɩyɛ yɔɔ. Palɩzɩɣ-ɖʋ mbʋ pʋyɔɔ pɩpɔzʋʋ ɛyaa kɩhɛyʋʋ pʋ-ñʋʋ taa yɔ nɛ ɛzɩma ɛyʋ kʋɖʋm sɩm pɩzɩɣ nɛ pihuuzi ɛyaa sakɩyɛ kɩwɛɛkɩm yɔɔ yɔ pɩ-taa. Pɔtɔzʋʋ-ɖʋ mbʋ kpɔnɔ nɛ vɛɛ pasɩŋnaa yɔ nɛ mba pɩwɛɛ se pɔtɔɔ kpɔnɔ nɛ pɔñɔɔ vɛɛ yɔ pɩ-tɔm. (Kalɩ Luka 22:19, 20.) Nɛ ɖɩkpakɩɣ alɩwaatʋ nɛ ɖɩmaɣzɩɣ cee wayɩ kɩbaŋʋ ŋgʋ kɩɖaŋ mba pɛwɛnɩ lidaʋ se pakaɣ caɣʋ tɛtʋ yɔɔ tam yɔ pɩ-yɔɔ. (Iza. 35:5, 6; 65:17, 21-23) Pɩwɛɛ se ɖɩkpaɣ toovenim tɔm ndʋ se tɩkɛ ñɩm pʋyʋ. Ɛyaa miiliyaarɩwaa sakɩyɛ ɩɩsɩŋ toovenim tɔm ndʋ, nɛ paasɩŋ Yesu kɩlaʋ wazaɣ. Pɩtasɩ lɛ, paalakɩ Yesu sɩm yɔɔ tɔzʋʋ sɔnzɩ ɛzɩ ɛɛwɩlʋʋ ɛ-wayɩ tɩŋɩyaa se pala yɔ. Ɛbɛ yɔɔ pɩwɛ mbʋ?
5. Apostoloowaa hɔɔlʋʋ sɔsɔʋ sɩba nɛ pɩtɛ lɛ, ɛzɩma ɛyaa paɣzɩ labʋ Yesu sɩm yɔɔ tɔzʋʋ sɔnzɩ?
5 Yesu apostoloowaa taa sakɩyɛ sɩba nɛ pɩla pazɩ lɛ, cɛtɩm Krɩstʋ mba paɣzɩ sʋʋ ɛgbɛyɛ taa. (Mat. 13:24-27, 37-39) «Pɔyɔɔdɩ tɔm ndʋ tɩtɩtʋʋzɩ yɔ se pɔhɔ tɔmkpɛlɩkɩyaa nɛ patɩŋ pa-wayɩ.» (Tʋma 20:29, 30) Tɔm ndʋ cɛtɩm Krɩstʋ ñɩma mba papaɣzɩ wɩlʋʋ nɛ «tɩtɩtʋʋzɩ yɔ», tɩ-taa natʋyʋ lɛ se Yesu tɩcɛlɩ e-tomnaɣ «tam kʋɖʋm nɛ pɩkpaɣ pɩɖɛɛ se ɛsɩɣlɩ ɛyaa sakɩyɛ kɩwɛɛkɩm» ɛzɩ Bibl wɩlʋʋ yɔ. Ɛlɛ pawɩlaɣ se pɩwɛɛ se palakɩ kɩlaʋ ŋgʋ tam sakɩyɛ. (Ebr. 9:27, 28) Sɔnɔ, ɛyaa sakɩyɛ tisiɣ cɛtɩm wɩlɩtʋ ndʋ tɩ-yɔɔ. Powoki cooci paa kpɩtaʋ ŋgʋ nɛ nabʋyʋ taa paa evemiye nɖɩ se pɩsa nɛ pɔtɔzʋʋ Yesu kɩlaʋ yɔɔ, nɛ kɩlaʋ ŋgʋ payaɣ Katooliki cooci taa se «Misa kɩlaʋ.» b Coocinaa lalaa taa, paakɩlɩɣ labʋ Yesu sɩm yɔɔ tɔzʋʋ sɔnzɩ ɖoŋ ɖoŋ, ɛlɛ pa-taa ɛyaa hɔɔlʋʋ sɔsɔʋ ɩɩnɩɣ Yesu kɩlaʋ tɔbʋʋ camɩyɛ. Nabɛyɛ pɩzɩɣ nɛ pɔpɔzɩ pa-tɩ se: ‘Ɛzɩ toovenim taa lɛ, Yesu sɩm pɩzɩɣ piyele nɛ pekpeɣ-m man-kɩwɛɛkɩm na?’ Ɛbɛ yɔɔ pɔpɔzʋʋ pa-tɩ tɔm ndʋ? Mbʋ pʋyɔɔ yɔ ɛyaa mba pɔyɔɔdʋʋ se Yesu sɩm ɛɛpɩzɩɣ nɛ piyele nɛ pekpeɣ ɛyaa pa-kɩwɛɛkɩm yɔ pɛwɛnɩ ɖoŋ pɔ-yɔɔ. Ɛzɩma Yesu wayɩ tɩŋɩyaa toovenim mba sɩɣnɩ ɛyaa se panɩɩ tɔm ndʋ tɩ-taa?
6. Tɔm ndʋ taa Bibl kpɛlɩkɩyaa nabɛyɛ nɩ pɩnaɣ 1872 taa?
6 Pɩnaɣ 1870 taa, Bibl taa tazɩyaa nabɛyɛ paɣzɩ Masɩ taa tazʋʋ siŋŋ nɛ Charles Russell kaaɖɛnɩ-wɛ nɔɔ. Pañɩnaɣ se patɩlɩ Yesu kɩlaʋ wazaɣ yɔɔ toovenim tɔm nɛ ɛzɩma pala ɛ-sɩm yɔɔ tɔzʋʋ sɔnzɩ yɔ. Pɩkɔm nɛ pɩtalɩ pɩnaɣ 1872 mbʋ yɔ lɛ, panɩɩ pɩ-taa se toovenim taa lɛ, Yesu hɛyɩ kɩhɛyʋʋ pʋ-ñʋʋ taa ɛyaa kpeekpe yɔɔ. Tɔm ndʋ tɩ-yɔɔ palɩwa yɔ, patɩsɩɩ-tʋ pa-tɩ; ɛlɛ patɩŋnɩ takayɩsɩ, tɔm susuu takayɩsɩ, nɛ fenaɣ fenaɣ takayɩsɩ yɔɔ nɛ peyele nɛ ɛyaa lalaa tɩlɩ-tʋ. Nɛ pitileɖi lɛ, pamaɣzɩnɩ kajalaɣ pɩnzɩ mɩnʋʋ taa Krɩstʋ ñɩma nɛ papaɣzɩ kpeɣluu tam kʋɖʋm pɩnaɣ taa nɛ palakɩ Yesu sɩm yɔɔ tɔzʋʋ sɔnzɩ.
7. Bibl kpɛlɩkɩyaa kajalaɣ ñɩma ñɩnaa nɛ palɩɩ tɔm ndʋ tɩ-yɔɔ yɔ, ɛzɩma tɩwɛɛ nɛ tɩwazɩɣ-ɖʋ?
7 Krɩstʋ ñɩma mba pañɩnʋʋ nɛ palɩɩ tɔm ndʋ tɩ-yɔɔ yɔ, pɩlakɩ pɩnzɩ sakɩyɛ yɔ; nɛ tɩwɛɛ nɛ tɩwazɩɣ-ɖʋ sɔnɔ. Ɛzɩma tɩyɛ? Yehowa sɩnɩ-ɖʋ nɛ ɖɩnɩɩ Yesu kɩlaʋ tɔbʋʋ nɛ ɛzɩma kɩkaɣ ɖa nɛ ɛyaa tɩŋa wazʋʋ yɔ pɩ-taa. (1 Yoh. 2:1, 2) Ðɩkpɛlɩkaa ɖɔɖɔ se Bibl wɩlɩɣ se ɛyaa mba pɔ-tɔm kɛdɩnɩ Ɛsɔ yɔ pe-lidaʋ wɛ tam nabʋlɛ taa; nabɛyɛ kaɣ caɣʋ wezuu ŋgʋ sɩm fɛyɩnɩ ɖoŋ kɩ-yɔɔ yɔ ɛsɔdaa nɛ ɛyaa miiliyɔɔwaa lalaa ñacaɣ wezuu maatɛŋ tɛtʋ yɔɔ. Alɩwaatʋ ndʋ ɖɩtazɩɣ nɛ ɖɩna ɛzɩma Yehowa sɔɔlɩ-ɖʋ siŋŋ nɛ ɛzɩma Yesu kɩlaʋ wazɩɣ ɖa-taa paa anɩ yɔ lɛ, ɖɩñɔtʋʋnɩ Yehowa nɛ pɩkɩlɩ. (1 Pɩy. 3:18; 1 Yoh. 4:9) Ye mbʋ, ɛzɩ ɖo-koobiya mba paacaɣ wezuu nɛ pɩɖɛɛ yɔ palabʋ yɔ, ɖa ɖɔɖɔ ɖɩyaɣ ɛyaa lalaa se pɛkpɛndɩ ɖɔ-yɔɔ nɛ ɖɩla Yesu sɩm yɔɔ tɔzʋʋ sɔnzɩ ɛzɩ Yesu wɩlʋʋ ɛ-wayɩ tɩŋɩyaa se pala yɔ.
ÐƖYAƔ ƐYAA LALAA SE PƆKƆƆ YESU SƖM YƆƆ TƆZƲƲ SƆNZƖ TAA
Ɛbɛ ŋpɩzɩɣ ŋla nɛ ŋɖʋ nesi Yesu sɩm yɔɔ tɔzʋʋ sɔnzɩ ŋgee tɔm susuu kiya? (Cɔnɩ tayʋʋ 8-10) e
8. Ɛbɛ Yehowa samaɣ laba se kayaa ɛyaa lalaa nɛ pɔkɔɔ Yesu sɩm yɔɔ tɔzʋʋ sɔnzɩ taa? (Cɔnɩ kɩlɛmʋʋ.)
8 Yehowa samaɣ paɣzʋʋ ɛyaa yaʋ se pɔkɔɔ Yesu sɩm yɔɔ tɔzʋʋ sɔnzɩ taa yɔ, pɩlakɩ pɩnzɩ sakɩyɛ. Pɩnaɣ 1881 taa, peheyi Etaazuunii koobiya se pekpeɣli ɖɩɣa nakɛyɛ taa Allegheny Pɛnɩsilivaanii egeetiye taa nɛ pala Yesu sɩm yɔɔ tɔzʋʋ sɔnzɩ. Pʋwayɩ lɛ, paa ɛgbɛyɛ nɖɩ ɖikpeɣlaɣ nɛ ɖɩlakɩ Yesu sɩm yɔɔ tɔzʋʋ sɔnzɩ. Mars 1940 taa peheyi koobiya se papɩzɩɣ nɛ payaa pe-egeetiye taa ñɩma mba payɩ toovenim tɔm kɛdɩnɩ-wɛ yɔ se pɔkɔɔ Yesu sɩm yɔɔ tɔzʋʋ sɔnzɩ taa. Pɩnaɣ 1960 taa, Betɛɛlɩ tiyini agbaa kajalaɣ ɖeɖe yaʋ takayɩsɩ se payaanɩ ɛyaa. Kpaɣnɩ alɩwaatʋ ndʋ, patayɩ ɛyaa Yesu sɩm yɔɔ tɔzʋʋ sɔnzɩ yaʋ takayɩsɩ miiliyaarɩwaa sakɩyɛ. Ɛbɛ yɔɔ ɖɩñakɩ pana siŋŋ mbʋ se ɖɩyaa ɛyaa lalaa?
9-10. Alɩwaatʋ ndʋ ɖɩñakɩ pana se ɖɩyaa ɛyaa lalaa nɛ pɔkɔɔ Yesu sɩm yɔɔ tɔzʋʋ sɔnzɩ taa yɔ, mba pɩwazɩɣ? (Yohanɛɛsɩ 3:16)
9 Lɩmaɣza wena a-yɔɔ ɖɩyaɣ ɛyaa lalaa se pɛkpɛndɩ ɖɔ-yɔɔ nɛ ɖɩla Yesu sɩm yɔɔ tɔzʋʋ sɔnzɩ yɔ, a-taa naɖɩyɛ lɛ se ɖɩsɔɔlaa se mba pɔkɔŋ sɔnzɩ nzɩ sɩ-taa kajalaɣ ɖeɖe yɔ pɛkpɛlɩkɩ nɛ patɩlɩ mbʋ Yehowa nɛ Yesu palabɩ ɖa-tɩŋa yɔ pɩ-yɔɔ toovenim tɔm. (Kalɩ Yohanɛɛsɩ 3:16.) Ðɩtaɣ liu se mbʋ panaɣ nɛ tɔm ndʋ panɩɣ sɔnzɩ nzɩ sɩ-taa yɔ pɩkaɣ-wɛ seɣtuu nɛ pɛkpɛlɩkɩ nɛ patɩlɩ Yehowa nɛ pɩkɩlɩ nɛ papɩsɩ ɛ-sɛyaa. Ɛlɛ sɔnzɩ nzɩ sɩwazɩɣ ɛyaa nabɛyɛ ɖɔɖɔ.
10 Ðɩyaɣ ɖɔɖɔ ɛyaa mba pɛhɛ fezuu taa yɔ. Ðɩlakɩ mbʋ se ɖɩtɔzɩ-wɛ se Ɛsɔ tiyele-wɛ sɔɔlʋʋ. Pa-taa sakɩyɛ tisiɣ nɛ pɔkɔŋ. Nɛ alɩwaatʋ ndʋ ɖɩnaɣ-wɛ yɔ ɖa-taa lakɩ leleŋ siŋŋ. Pɔkɔŋ Yesu sɩm yɔɔ tɔzʋʋ sɔnzɩ taa lɛ, pɩtɔzʋʋ-wɛ taa leleŋ weyi pehikaɣ alɩwaatʋ ndʋ pɛsɛɣaɣ Yehowa yɔ ɩ-yɔɔ. Iyele nɛ ɖɩna Monica kɩɖaʋ. c Ɛɖaɣnɩ paɣzʋʋ tɔm susuu COVID-19 kʋdɔŋ alɩwaatʋ taa. Ewobi sɔnzɩ nzɩ sɩ-taa 2021 nɛ pɩtɛ lɛ, ɛyɔɔdɩ se: «Krɩstʋ sɩm yɔɔ tɔzʋʋ sɔnzɩ sɩnɛ, sɩwɛ-m ŋgee kpem. Pɩlakɩ pɩnzɩ 20 yɔ, kajalaɣ ɖeɖe yɔ mantasɩ susuu tɔm nɛ mayaa ɛyaa se pɔkɔɔ Yesu sɩm yɔ tɔzʋʋ sɔnzɩ taa. Malabɩ mbʋ payɩ manpɩzɩɣ yɔ se mayaa ɛyaa lalaa mbʋ pʋyɔɔ yɔ mɛwɛnɩ ɛsɩmɩyɛ siŋŋ mbʋ Yehowa nɛ Yesu palabɩ-m yɔ pɩ-yɔɔ.» (Keɣa 102:1-4) Paa ɛyaa itisiɣ se pɔkɔŋ sɔnzɩ nzɩ sɩ-taa yaa paatisiɣ yɔ, ɖɩlakɩ ɖo-ɖoŋ ɖeɖe mbʋ pʋyɔɔ yɔ, ɖɩnawa se Yehowa taa lakɩ leleŋ nɛ ɖa-pana ñaɣʋ.
11. Ɛzɩma Yehowa wazɩ pana wena ɖɩñaɣaa nɛ ɖɩyaa ɛyaa se pɔkɔɔ Yesu sɩm yɔɔ tɔzʋʋ sɔnzɩ taa yɔ a-yɔɔ? (Agee 2:7)
11 Yehowa wazɩ pana wena ɖɩñaɣaa nɛ ɖɩyaa ɛyaa se pɔkɔɔ Yesu sɩm yɔɔ tɔzʋʋ sɔnzɩ taa yɔ a-yɔɔ siŋŋ. Pɩnaɣ 2021 taa, paa COVID-19 eeyeba nɛ paɖʋ paɣtʋ ndɩ ndɩ yɔ, ɛyaa mba pɔkɔm sɔnzɩ nzɩ sɩ-taa yɔ, paaɖɔwa nɛ pɩcɛzɩ pɩnzɩ lɛɛsɩ. Paakpɛndɩ ɛyaa 21 367 603. Pɩwɩlɩɣ se ɛyaa mba pɔkɔm sɔnzɩ nzɩ sɩ-taa yɔ, pɔɖɔwa nɛ pɩcɛzɩ Yehowa Aseɣɖe Tɩnaa mba pɛwɛ ɛjaɖɛ kpeekpe yɔɔ yɔ tam nabʋlɛ nɛ hɔɔlʋʋ mbʋ yɔ. Toovenim taa lɛ, pɩtɩkɛ ɛyaa ɛzɩma kɔŋ sɔnzɩ nzɩ sɩ-taa yɔ pɩ-tɔm ɖeke cɛyɩnɩ Yehowa ɛsɩndaa. Mba pɔkɔŋ yɔ pa-taa paa weyi tɔm cɛyɩ ɛ-ɛsɩndaa. (Luka 15:7; 1 Tim. 2:3, 4) Ða-taa tɛma se alɩwaatʋ ndʋ ɖɩyaɣ ɛyaa yɔ, Yehowa tɩŋɩɣnɩ pɩ-yɔɔ nɛ ɛsɩɣnɩ-ɖʋ se ɖɩlɩɩ laŋa kɩbana tɩnaa yɔɔ.—Kalɩ Agee 2:7.
ÐƖLAKƖ YESU SƖM YƆƆ TƆZƲƲ SƆNZƖ PAA ÐƖKATƖƔ KALA YƆ
Yehowa wazɩɣ pana wena ɖɩñakɩ se ɖɩla Yesu sɩm yɔɔ tɔzʋʋ sɔnzɩ yɔ (Cɔnɩ tayʋʋ 12) f
12. Wɛtʋ ndʋ pɩzɩɣ tiyele nɛ pɩlabɩ-ɖʋ kaɖɛ se ɖɩla Yesu sɩm yɔɔ tɔzʋʋ sɔnzɩ? (Cɔnɩ kɩlɛmʋʋ.)
12 Yesu kaayɔɔdaa se kɛdɛzaɣ alɩwaatʋ taa, ɖɩkaɣ katʋʋ kala sakɩyɛ. A-taa naayɛ yɔ: pakaɖɩɣnɩ-ɖʋ hɔʋ taa, panazɩɣ-ɖʋ, yoŋ nɛ kʋdɔmɩŋ sɔsɔŋ. (Mat. 10:36; Mark. 13:9; Luka 21:10, 11) Nabʋyʋ taa, wɛtʋ ndʋ tiyeki nɛ pɩlakɩ-ɖʋ kaɖɛ se ɖɩla Yesu sɩm yɔɔ tɔzʋʋ sɔnzɩ. Ɛbɛ ɖo-koobiya laba nɛ palʋbɩnɩ kala ana? Nɛ ɛzɩma Yehowa sɩnɩ-wɛ?
13. Artem labɩ abalɩtʋ nɛ ɛtɛ ɛ-taa se ɛlakɩ Yesu sɩm yɔɔ tɔzʋʋ sɔnzɩ salaka taa lɛ, ɛzɩma Yehowa wazɩ-ɩ?
13 Alɩwaatʋ ndʋ paɖʋʋ-ɖʋ salaka yɔ. Ðo-koobiya mba paɖʋ-wɛ salaka pe-tisuu yɔɔ yɔ, palakɩ mbʋ papɩzɩɣ yɔ se pɩsa nɛ pala Yesu sɩm yɔɔ tɔzʋʋ sɔnzɩ. Iyele nɛ ɖɩna Artem kɩɖaʋ. Pɩnaɣ 2020 Yesu sɩm yɔɔ tɔzʋʋ sɔnzɩ alɩwaatʋ taa, paaɖʋ-ɩ salaka kuduyuu cikpeluu nakʋyʋ tɛɛ, nɛ ɛyaa kagbanzɩ pɩzaɣ se pɛwɛɛ kɩ-tɛɛ alɩwaatʋ kʋɖʋmtʋ taa. Paa ɛɛwɛ salaka taa yɔ, ɛpɩzaa nɛ ehiɣ wondu ndʋ pɩpɔzʋʋ se ɛlabɩnɩ sɔnzɩ nzɩ yɔ. Nɛ ɛɛlabɩ ɖʋtʋ se ɛyɔɔdʋʋ Yesu sɩm yɔɔ tɔzʋʋ sɔnzɩ samaɣ taa tɔm. Ɛlɛ salaka taa mba lalaa ñɔwaɣ sɩgaa nɛ pɔyɔɔdʋʋ kʋzɔɔtʋ tɔm kpem. Ɛbɛ ɛlaba? Ɛpɔzɩ-wɛ se papɩzɩɣ peyele pa-kʋzɔɔtʋ tɔm ndʋ tɩ-yɔɔdʋʋ nɛ sɩgaa ñɔʋ ñɩɣyʋʋ kʋɖʋmʋʋ na. Pɩɩɖɩɣzɩ Artem se salaka tɩnaa mba petisaa se peyeki sɩgaa ñɔʋ nɛ paayɔɔdʋʋ kʋzɔɔtʋ tɔm sɔnzɩ nzɩ sɩ-alɩwaatʋ taa. Artem yɔɔdaa se: «Meheyi-wɛ se mansɩɣnɩ-wɛ nɛ patɩlɩ Yesu sɩm yɔɔ tɔzʋʋ sɔnzɩ yɔɔ tɔm.» Paa paayɔɔdaa se patɩsɔɔlɩ se panɩɩ sɔnzɩ nzɩ sɩ-yɔɔ tɔm yɔ, pana Artem yɔɔdɩ tɔm nɛ ɛla sɔnzɩ nzɩ nɛ pɩtɛ lɛ, pɔpɔzɩ-ɩ sɩ-yɔɔ tɔm sakɩyɛ.
14. Paa COVID-19 kʋdɔŋ ɛɛwɛɛ yɔ, pana wena koobiya ñaɣaa nɛ pala Yesu sɩm yɔɔ tɔzʋʋ sɔnzɩ?
14 COVID-19 kʋdɔŋ alɩwaatʋ taa. Alɩwaatʋ ndʋ kʋdɔŋ ŋgʋ kɩlɩwa yɔ, Yehowa samaɣ taa mba taapɩzɩɣ se pekpeɣli nɛ pala Yesu sɩm yɔɔ tɔzʋʋ sɔnzɩ. Ɛlɛ wɛtʋ ndʋ, tɩtɩɖɩɣ-wɛ nʋmɔʋ se pataala sɔnzɩ nzɩ. d Agbaa wena awɛ hɔɔlɩŋ weyi ɩ-taa Intɛrnɛɛtɩ wɛɛ yɔ atɩŋnɩ vidéoconférence yɔɔ nɛ ala sɔnzɩ nzɩ. Ɛlɛ ɛzɩma ɛyaa miiliyɔɔwaa mba pɛwɛ hɔɔlɩŋ weyi ɩ-taa Intɛrnɛɛtɩ fɛyɩ yɔ paba ñalaba? Ajɛɛ naayɛ taa lɛ, palabɩ ɖʋtʋ se ɛyaa iwelisi samaɣ taa tɔm yɔɔdʋʋ mbʋ teelee yaa raadiyoo yɔɔ. Pɩtasɩ lɛ, ɛgbɛyɛ pilinzi kpaɣ samaɣ taa tɔm yɔɔdʋʋ mbʋ tataɣ yɔɔ kʋnʋmɩŋ weyi ɩcɛzɩ 500 yɔ ɩ-taa se pɩsa nɛ ɛyaa mba pɛwɛ lona wena awɛ poliŋ yɔ a-taa yɔ papɩzɩ nɛ pala sɔnzɩ nzɩ. Nɛ koobiya siɣsiɣ tɩnaa sakɩyɛ labɩ ɖʋtʋ nɛ powoni samaɣ taa tɔm yɔɔdʋʋ mbʋ koobiya mba pɩpɔzaɣ-wɛ pʋ yɔ.
15. Ɛbɛ ŋkpɛlɩkɩ Bibl kpɛlɩkɩyʋ weyi payaɣ se Sue yɔ ɛ-kɩɖaʋ taa?
15 Alɩwaatʋ ndʋ pakaɖɩɣnɩ-ɖʋ hɔʋ taa yɔ. Nabɛyɛ lɛ, pakaɖɩɣnɩ-wɛ pɔ-hɔŋ taa nɛ mbʋ kɩlɩɣnɩ yebu nɛ pɩlakɩ-wɛ kaɖɛ se pala Yesu sɩm yɔɔ tɔzʋʋ sɔnzɩ. Iyele nɛ ɖɩna Bibl kpɛlɩkɩyʋ nɔɔyʋ kɩɖaʋ, payaɣ-ɩ se Sue. Pɩnaɣ 2021 taa, pɩɩsaɣ evemiye kʋɖʋmɖɩyɛ se pala sɔnzɩ nzɩ lɛ, Sue heyi weyi ɛkpɛlɩkɩɣnɩ-ɩ Bibl yɔ se ɛɛpɩzɩɣ nɛ ewolo sɔnzɩ nzɩ sɩ-taa mbʋ pʋyɔɔ yɔ pakaɖɩɣnɩ-ɩ ɛ-hɔʋ taa. Weyi ɛkpɛlɩkɩɣnɩ Sue Bibl yɔ ɛkalɩ-ɩ Luka 22:44. Pʋwayɩ lɛ ɛlɩzɩ-ɩ pɩ-taa se alɩwaatʋ ndʋ ɖɩkatɩɣ kala yɔ, pɩwɛɛ se ɖɩmaɣzɩnɩ Yesu nɛ ɖɩtɩmnɩ Yehowa nɛ ɖɩtaa-ɩ liu nɛ ɖa-laŋɩyɛ pilim. Tɛʋ fema lɛ, Sue ñɔɔzɩ wondu ndʋ palakɩnɩ sɔnzɩ nzɩ yɔ nɛ ɛcɔnɩ tanaŋ tɛɛ Ɛsɔ sɛtʋ ŋgee ɖʋtʋ ndʋ paɖʋ jw.org yɔɔ yɔ. Ðanaɣ ŋga, ɛsʋʋ ɛ-ɖaŋ taa nɛ ɛwɛɛ e-ɖeke nɛ ewelisi Yesu sɩm yɔɔ tɔzʋʋ sɔnzɩ nzɩ ɛ-tɛ pɔrtaabɩlɩ yɔɔ. Pʋwayɩ lɛ, Sue ma koobu weyi ɛkpɛlɩkɩɣnɩ-ɩ Bibl yɔ tɔm tʋnɛ: «Ðeɖe ñɔ-tɔm kpazɩ-m ɖoŋ kpem. Malabɩ mbʋ payɩ manpɩzɩɣ yɔ se mala Yesu sɩm yɔɔ tɔzʋʋ sɔnzɩ, nɛ toovenim taa lɛ Yehowa sɩnɩ-m. Man-taa wɛ leleŋ nɛ mɛwɛnɩ ɛsɩmɩyɛ siŋŋ, maanaɣ se mɔyɔɔdɩ suwe!» Ŋmaɣzɩɣ se ye ŋwɛ wɛtʋ ndʋ tɩnɩɣzɩnɩ mbʋ yɔ tɩ-taa yɔ, Yehowa pɩzɩɣ nɛ ɛsɩnɩ-ŋ ɖɔɖɔ?
16. Ɛbɛ yɔɔ ɖa-taa tɛma se Yehowa kaɣ wazʋʋ pana wena ɖɩñakɩ se ɖiwolo Yesu sɩm yɔɔ tɔzʋʋ sɔnzɩ taa yɔ? (Roma mba 8:31, 32)
16 Yehowa taa wɛ leleŋ siŋŋ nɛ pana wena ɖɩñakɩ se ɖɩla Yesu sɩm yɔɔ tɔzʋʋ sɔnzɩ yɔ. Alɩwaatʋ ndʋ ɖɩwɩlɩɣ ɖɛ-ɛsɩmɩyɛ mbʋ ɛlabɩ-ɖʋ yɔ pɩ-yɔɔ yɔ, ɖa-taa pɩzɩɣ nɛ pɩtɛ se ɛkaɣ-ɖʋ wazʋʋ. (Kalɩ Roma mba 8:31, 32.) Ye mbʋ, tɛtɛ nɛ ɖɩtɛ ɖa-taa se sɛmɩɩyɔ ɖiwoki Yesu sɩm yɔɔ tɔzʋʋ sɔnzɩ taa, nɛ ɖɩtɛ ɖa-taa ɖɔɖɔ se ɖɩlakɩ mbʋ payɩ ɖɩpɩzɩɣ yɔ nɛ ɖɩwalɩsɩ ɖɔ-tɔm susuu tʋmɩyɛ, sɔnzɩ nzɩ sɩ-alɩwaatʋ taa.
HENDU 18 Ðɩwɛɛnɩ ɛsɩmɩyɛ Yesu kɩlaʋ yɔɔ
a Ɛyaa miiliyɔɔwaa sakɩyɛ kaɣ kpeɣluu Piya 4 avril 2023 wiye ɛjaɖɛ kpeekpe yɔɔ se pala Yesu sɩm yɔɔ tɔzʋʋ sɔnzɩ. Ɛyaa sakɩyɛ hɔɔlʋʋ taa lɛ, kajalaɣ ɖeɖe lɛ pakaɣ kɔm sɔnzɩ nzɩ sɩ-taa. Lalaa lɛ, peyebi Yehowa sɛʋ nɛ patɩtasɩ wobu sɔnzɩ nzɩ sɩ-taa pɩlakɩ pɩnzɩ sakɩyɛ yɔ, nɛ pakaɣ wobu sɔnzɩ nzɩ sɩ-taa ɖɔɖɔ. Nabɛyɛ kaɣ lʋbɩnʋʋ kala sɔsɔna se pɩsa nɛ powolo sɩ-taa. Paa wɛtʋ ndʋ taa ŋwɛɛ yɔ, ña-taa pɩzɩɣ nɛ pɩtɛ se Yehowa taa kaɣ labʋ leleŋ se ŋñaɣ pana nɛ ŋwolo sɔnzɩ nzɩ sɩ-taa.
b Cooci woɖaa maɣzɩɣ se paalakɩ sɔnzɩ nzɩ lɛ, kpɔnɔ pɩsɩɣ Krɩstʋ tomnaɣ nɛ vɛɛ pɩsɩ Krɩstʋ calɩm. Pamaɣzɩɣ se alɩwaatʋ ndʋ payɩ nɔɔyʋ tɔkɩ kpɔnɔ nɛ ɛñɔɔ vɛɛ sɔnzɩ nzɩ sɩ-taa yɔ, ɛwɛɛ nɛ ɛlaɣ Yesu tomnaɣ nɛ ɛ-calɩm.
c Pɛlɛɣzɩ hɩla naayɛ.
d Kalɩ ɖɔɖɔ jw.org yɔɔ tɔm ñʋŋ «Le Mémorial de 2021.»
